’پارلیمنٹ کو یاد دلانے آیا ہوں کہ ہم زندہ ہیں‘

’’لوگوں کو لگتا ہے کہ ہم ایک امتحان یا ایک نوکری کی وجہ سے [مارچ میں شامل ہونے] یہاں آئے ہیں۔ ہم اس لیے آئے ہیں کیوں کہ ہر سال یہ یقین کرنا مشکل ہوتا جا رہا ہے کہ ہمارے مستقبل کی کوئی اہمیت بھی ہے،‘‘ چھوٹو یادو کہتے ہیں۔

ستائیس سالہ چھوٹو یادو، بہار کے سیوان ضلع سے ٹرین کے جنرل ڈبے میں دو دن کا سفر کر کے دہلی پہنچے تھے۔ ’’ہمارے گاؤوں میں نوجوان یا تو روزگار کی تلاش میں ہجرت کرنے پر مجبور ہیں یا پھر ایسی ملازمتوں اور مواقع کے انتظار میں رہتے ہیں جو کبھی حاصل نہیں ہوتے۔‘‘

’’چلو سنسد [پارلیمنٹ کی جانب مارچ]!‘‘ کا آغاز کاکروچ جنتا پارٹی (سی جے پی) کی اس اپیل سے ہوا جس میں ہندوستانی نوجوانوں کے مسائل کو براہِ راست پارلیمنٹ تک پہنچانے کی بات کی گئی تھی، جہاں ۲۰ جولائی ۲۰۲۶ کو مانسون اجلاس شروع ہوا۔

اب یہ احتجاج صرف سی جے پی تک محدود نہیں رہا بلکہ ملک بھر کے مختلف شہروں میں پھیل کر ایک وسیع عوامی تحریک کی شکل اختیار کر چکا ہے۔

بار بار امتحانی پرچوں کے لیک ہونے کے واقعات نے بے روزگاری، سرکاری ملازمتوں میں بھرتیوں میں تاخیر، اور اس بحران کے خلاف ایک وسیع تحریک کو جنم دیا ہے جسے مظاہرین عوامی اداروں، مجموعی نظام اور طرزِ حکمرانی پر اعتماد میں مسلسل کمی قرار دیتے ہیں۔ یہ تحریک اب ان نوجوانوں کے لیے اپنی مایوسی اور غم و غصے کے اظہار کا ایک پلیٹ فارم بن چکی ہے جو روزگار کے کم ہوتے مواقع، گاؤوں سے بڑھتی ہوئی ہجرت، اور اس احساس کا شکار ہیں کہ خصوصاً دیہی ہندوستان کے نوجوانوں کو اُن فیصلوں سے الگ رکھا جا رہا ہے جو ان کے مستقبل کا تعین کرتے ہیں۔

’’میں دہلی اس لیے آیا ہوں کیونکہ میں نہیں چاہتا کہ میرے جیسے گاؤوں کے نوجوان اپنے مستقبل سے امید کھو بیٹھیں،‘‘ پالی کے گورنمنٹ میڈیکل کالج میں ایم بی بی ایس کے آخری سال کے طالب علم، ۲۵ سالہ دھیرم کہتے ہیں۔ وہ اپنے ۲۴ سالہ دوست آشو رام کے ساتھ یہاں پہنچے، جو ہیومینٹیز کے طالب علم ہیں۔ دونوں دوست ۱۵ گھنٹے کے رات بھر کے سفر کے بعد ۱۹ جولائی کی دوپہر کو دہلی پہنچے تھے۔

’’باڑمیر [دیہی راجستھان] میں پرورش پانے سے انسان میں مشکلات کا مقابلہ کرنے کی طاقت پیدا ہوتی ہے۔ لوگ وہاں قحط، دوریوں اور وسائل کی کمی کے باوجود زندگی گزارتے ہیں۔ لیکن نوجوانوں کو ایک ناکام نظام کے سہارے زندہ رہنے پر مجبور نہیں کیا جانا چاہیے،‘‘ ہمارے اردگرد احتجاجی ہجوم کے درمیان دھیرم نے پاری سے بات کرتے ہوئے کہا۔ ’’ہم پارلیمنٹ اس لیے آئے ہیں تاکہ اقتدار میں بیٹھے لوگوں کو یاد دلائیں کہ ہمارے مستقبل کو بھی اتنی ہی سنجیدگی اور فوری توجہ ملنی چاہیے جتنی کسی بھی دوسرے قومی مسئلے کو دی جاتی ہے۔‘‘

دہلی میں، باڑمیر سے ہی تعلق رکھنے والے ان کے دوست پریم پرکاش بھی اس مارچ میں ان کے ساتھ شامل ہوئے، جو ایک میڈیکل گریجویٹ ہیں اور ملک کے ممتاز طبی ادارہ یعنی دہلی کے ایمز میں بطور انٹرن خدمات انجام دے رہے ہیں۔

’’لوگ اکثر مجھ سے پوچھتے ہیں کہ میڈیکل اسٹوڈنٹ احتجاج کیوں کر رہا ہے؟ میرا جواب بہت سادہ ہے: میں اپنی زندگی مریضوں کے علاج میں گزاروں گا، لیکن میں ایک شہری بھی ہوں۔ نوجوانوں کو درپیش مسائل اسپتال کے دروازے پر ختم نہیں ہو جاتے۔ اگر ہم آج خاموش رہے تو ہمیں ایسے ادارے ورثے میں ملیں گے جو سب کے لیے ناکام ثابت ہوں گے، حتیٰ کہ اُن لوگوں کے لیے بھی جن کی خدمت کرنے کی ہمیں تربیت دی گئی ہے،‘‘ ۲۵ سالہ پریم پرکاش کہتے ہیں۔

تعلیمی نظام کے دوسرے سرے پر انوپ کمار جیسے نوجوان بھی موجود ہیں، جو اتر پردیش کے گونڈا ضلع سے تعلق رکھتے ہیں۔ ان کی عمر ۱۵ سال ہے، مگر وہ دوسری جماعت کے طالب علم ہیں۔ انہوں نے تعلیم کا آغاز بہت دیر سے کیا کیونکہ ان کے والدین، جو مزدوری کرتے ہیں، انہیں پہلے اسکول بھیجنے کی استطاعت نہیں رکھتے تھے۔ انوپ نے بھی کم عمری ہی سے خاندان کی کفالت میں ہاتھ بٹانے کے لیے مزدوری کی ہے۔

’’اگرچہ میں صرف دوسری جماعت میں پڑھتا ہوں، لیکن میں دنیا کو اتنا دیکھ چکا ہوں کہ یہ سمجھ سکوں کہ کیا صحیح ہے اور کیا غلط،‘‘ انوپ نے اس نمائندہ سے کہا۔ ’’میں یہاں اس لیے آیا ہوں کیونکہ ایک دن میں بھی ڈاکٹر بننا چاہتا ہوں۔ جب میں بارہویں جماعت میں پہنچ کر میڈیکل کے داخلہ امتحانات کی تیاری کروں گا تو میں یہ فکر نہیں کرنا چاہتا کہ میرا مستقبل میری محنت کے بجائے کسی امتحانی پرچے کے لیک ہونے سے طے ہو۔‘‘

اس تاریخی مارچ سے چند روز قبل ہی ہزاروں افراد دارالحکومت کے جنتر منتر پر جمع ہونا شروع ہو گئے تھے۔ وہ ملک بھر کے چھوٹے شہروں اور دیہاتوں سے آئے تھے۔ بہت سے شرکاء کے لیے دہلی کا سفر کئی دن کی منصوبہ بندی اور ٹرین و بس کے طویل سفر کے بعد ممکن ہوا۔ کچھ نے ٹکٹ خریدنے کے لیے آپس میں پیسے جمع کیے، جبکہ دوسرے اپنے دوستوں کے گروپ کے ساتھ سفر کر کے آئے۔

اتر پردیش کے علی گڑھ ضلع کے بڑھسیرا گاؤں سے تعلق رکھنے والے ۱۷ سالہ پرنکشِت کہتے ہیں، ’’میں یہاں پارلیمنٹ کو یہ یاد دلانے آیا ہوں کہ ہم زندہ ہیں۔‘‘ یہ ان کی زندگی کا پہلا موقع ہے جب وہ اپنے گاؤں سے باہر نکلے ہیں۔ وہ کہتے ہیں، ’’ہمارے گاؤں کے زیادہ تر لوگوں نے کبھی پارلیمنٹ نہیں دیکھی ہے… لیکن ہم بچپن سے یہی یقین کرتے ہوئے بڑے ہوئے ہیں کہ وہ ہماری نمائندگی کرتی ہے۔‘‘

اتر پردیش کے بلند شہر ضلع کے کیولی خورد گاؤں سے تعلق رکھنے والے ۱۸ سالہ ہری کرشن کے دوستوں نے ان کے دہلی آنے کے لیے ۵۰۰۰ روپے جمع کیے۔ زرعی مزدور کے بیٹے ہری کرشن کا کہنا ہے کہ اس سفر کی وجہ سے انہیں کئی دن کی دہاڑی سے بھی محروم ہونا پڑے گا۔

وہ کہتے ہیں، ’’پتہ نہیں اس احتجاج سے کچھ بدلے گا بھی یا نہیں، لیکن اگر ہم آج اپنی آواز بلند نہیں کریں گے تو کل کچھ بھی نہیں بدلے گا۔ میں اتنا ضرور چاہتا ہوں کہ آئندہ یہ کہہ سکوں کہ میں نے اپنی طرف سے ہر ممکن کوشش کی تھی۔‘‘ ہاتھ میں ایک نوٹ بک لیے وہ مسلسل نعرے لکھنے میں مصروف ہیں، جنہیں بعد میں مجمع میں موجود دوسرے لوگ بلند آواز سے دہراتے ہیں۔

احتجاج کرنے والے ۱۹ جولائی ۲۰۲۶ بروز پیر دن بھر نعرے لگاتے رہے، مختلف زبانوں میں گیت گاتے رہے اور مقررین کی تقاریر سنتے رہے۔ انہوں نے اپنے ہاتھوں میں بے روزگاری، زرعی بحران، بے دخلی، تعلیم، فسطائیت اور آئینی حقوق سے متعلق پلے کارڈز بھی اٹھا رکھے تھے۔

امتحانی پرچوں کے لیک ہونے کے واقعات کی شفاف تحقیقات کے مطالبہ کے ساتھ ساتھ مظاہرین ان طلباء کے لیے بھی جوابدہی کا مطالبہ کر رہے ہیں جنہوں نے مسابقتی امتحانات کے دباؤ، غیر یقینی صورتِ حال اور بار بار کی ناکامیوں کے باعث خودکشی کر لی۔

بہار کے سمستی پور ضلع سے تعلق رکھنے والے ۱۹ سالہ محمد گولو کہتے ہیں، ’’لوگ سمجھتے ہیں کہ دیہی علاقوں کے نوجوان سیاست کو نہیں سمجھتے۔‘‘ گولو روزگار کے لیے برقی آلات (الیکٹرانک سامان) کی مرمت کا کام کرتے ہیں، جو انہوں نے اپنے کنبہ کی خراب مالی حالت کے باعث اختیار کیا۔

انہوں نے پاری سے بات کرتے ہوئے کہا، ’’ہمیں سیاست سمجھ میں آنے لگتی ہے جب کسی اسکول میں استاد نہیں ہوتا، کسی اسپتال میں ڈاکٹر موجود نہیں ہوتا، یا کسی بھرتی کے امتحان کو منسوخ کر دیا جاتا ہے۔ سیاست ہمارے لیے ٹیلی ویژن پر دیکھی جانے والی کوئی چیز نہیں ہے، بلکہ سیاست ہی طے کرتی ہے کہ ہمیں تعلیم ملے گی، روزگار ملے گا یا بہتر زندگی بنانے کا کوئی موقع ملے گا۔‘‘

گولو کا کہنا ہے کہ دہلی کا سفر ان کے لیے اس بات کو یقینی بنانے کا ایک ذریعہ تھا کہ گاؤوں کے نوجوانوں کے مسائل، چاہے صرف ایک دن کے لیے ہی سہی، ملک کے سیاسی مرکز تک پہنچ سکیں اور وہاں ان کی آواز سنی جائے۔

اس مجمع میں ایسے لوگ بھی شامل ہوئے جو ملک کے مختلف خطوں سے آئے تھے اور جو شاذ و نادر ہی ایک ہی سیاسی پلیٹ فارم پر اکٹھے نظر آتے ہیں، مگر سینکڑوں کلومیٹر دور رہنے کے باوجود انہیں تقریباً ایک جیسے مسائل کا سامنا ہے۔ وہ رات بھر سفر کر کے آئے تھے، کئی لوگوں نے بسوں اور ٹرینوں میں ایک دن سے زیادہ کا سفر طے کیا تھا۔ ان کے ساتھ بیگ، پانی کی بوتلیں، لپیٹے ہوئے بینرز اور گھر والوں کا تیار کیا ہوا کھانا بھی تھا۔ وہ اپنے کھیت، جنگلات، کلاس روم، کاروبار اور تعمیراتی مقامات چھوڑ کر آئے تھے۔ ان میں سے بہت سے لوگ پہلی مرتبہ پارلیمنٹ آئے تھے۔ ان میں کسانوں اور مزدوروں کے بچے، آدیواسی نوجوان، اپنے خاندان میں پہلی بار اعلیٰ تعلیم حاصل کرنے والے گریجویٹس، یومیہ اجرت پر کام کرنے والے مزدور اور مختلف شعبوں سے تعلق رکھنے والے دوسرے نوجوان شامل تھے۔

ان سب کا ایک ہی سوال تھا: برسوں کی پڑھائی، انتظار اور امید کے بعد آخر ان کا مستقبل کیسا ہوگا؟

اس تحریک کی قیادت کاکروچ جنتا پارٹی (سی جے پی) کر رہی ہے، جس نے اپنا نام ’’کاکروچ‘‘ (تلچٹا) کے لفظ سے لیا ہے۔ یہ وہی توہین آمیز لفظ ہے جسے اپنے عہدہ پر فائز ایک جج نے بے روزگار نوجوانوں کے لیے استعمال کیا تھا۔ تحریک نے اسی لفظ کو اپنی شناخت بنا کر اسے استقامت، مزاحمت اور خاموش نہ رہنے کی علامت میں تبدیل کر دیا ہے۔

احتجاج کے فوری مطالبات میں وزیرِ تعلیم دھرمیندر پردھان کا استعفی، امتحانی پرچوں کے لیک ہونے کے واقعات کی شفاف تحقیقات، ذمہ دار افراد کے خلاف کارروائی، سرکاری ملازمتوں میں بروقت بھرتیاں، اور ملک کے امتحانی و بھرتی کے نظام پر عوام کا اعتماد بحال کرنے کے لیے بنیادی اصلاحات شامل ہیں۔

اس احتجاج کو تعلیمی اصلاحات کے علمبردار اور ماحولیاتی کارکن سونم وانگچُک کی بھی حمایت حاصل ہوئی، جنہوں نے تحریک سے اظہارِ یکجہتی کے لیے دہلی کے جنتر منتر پر غیر معینہ مدت کی بھوک ہڑتال شروع کر دی۔ تقریباً تین ہفتے تک بغیر خوراک کے بھوک ہڑتال جاری رکھنے کے بعد، ۱۸ جولائی کو دہلی پولیس نے انہیں زبردستی صفدرجنگ اسپتال منتقل کر دیا تھا۔ پولیس کا کہنا تھا کہ ڈاکٹروں نے خبردار کیا تھا کہ ان کی مسلسل بگڑتی ہوئی صحت فوری طبی مداخلت کی متقاضی ہے۔

پڑوسی ریاست اتر پردیش کے ہاپوڑ ضلع سے اویس اور زید بھی احتجاج میں شریک ہونے آئے تھے۔ اویس نے بی ٹیک کا کورس ادھورا چھوڑ دیا، جبکہ زید نے دسویں جماعت کے بعد اس لیے تعلیم ترک کر دی کیونکہ ان کا خاندان مزید تعلیمی اخراجات برداشت نہیں کر سکتا تھا۔ اب وہ اپنے گھر کے اخراجات پورے کرنے کے لیے اویس کے ساتھ کام کرتے ہیں۔

زید کہتے ہیں، ’’میں نہیں چاہتا کہ اگلی نسل کو بھی انہی وجوہات کی بناپر اپنی تعلیم چھوڑنی پڑے جن کی وجہ سے مجھے چھوڑنی پڑی۔ انہیں وہ مواقع ملنے چاہئیں جو مجھے کبھی نہیں مل سکے۔‘‘

اویس اور زید دونوں کے لیے سب سے مشکل مرحلہ اپنے اہلِ خانہ کو اس سفر کی اجازت دینے پر آمادہ کرنا تھا۔

’’وہ اس لیے خوف زدہ تھے کیونکہ ہم مسلمان ہیں،‘‘ زید کہتے ہیں۔ ’’میری والدہ بار بار مجھے منع کرتی رہیں کہ احتجاج میں نہ جاؤں، کیونکہ انہوں نے دیکھا ہے کہ جب بھی احتجاج کے دوران حالات خراب ہوتے ہیں تو سب سے پہلے مسلمانوں کو ہی نشانہ بنایا جاتا ہے۔‘‘

’’میں نے اپنی والدہ سے پوچھا، ’اگر ایک دن میری بھی ایک بیٹی ہوئی اور امتحانی پرچہ لیک ہونے کی وجہ سے اس کا مستقبل برباد ہو گیا تو کیا ہوگا؟ اگر وہ برسوں محنت سے پڑھائی کرے، لیکن پھر بھی اسے اپنی صلاحیت کے مطابق منصفانہ موقع نہ ملے تو؟‘‘ یہ کہتے ہوئے زید کے چہرے پر ایک اداس سی مسکراہٹ پھیل جاتی ہے۔

اپنے اہلِ خانہ کی تشویش کے باوجود، دونوں دوست اگلے ہی دن دہلی کے لیے روانہ ہو گئے۔ ان کا یقین تھا کہ خاموش رہنے کا خطرہ، اپنی آواز بلند کرنے کے لیے سفر کرنے کے خطرے سے کہیں زیادہ بڑا ہے۔

پارلیمنٹ کی طرف مارچ کے دن، یعنی ۲۰ جولائی ۲۰۲۶ کو دہلی پولیس کی جانب سے علاقہ میں پابندیاں عائد کیے جانے کے بعد مظاہرین کو آگے بڑھنے سے روک دیا گیا۔ متعدد افراد کو حراست میں لے لیا گیا، جبکہ کچھ زخمی بھی ہوئے۔ پولیس نے مظاہرین کو منتشر کرنے کے لیے لاٹھی چارج کیا اور آنسو گیس کے گولے بھی داغے، لیکن مظاہرین مختلف مقامات پر دوبارہ جمع ہو گئے۔

دیہی علاقوں سے اتنی بڑی تعداد میں نوجوانوں کی آمد نے بہت سے لوگوں کو حیران کر دیا ہے۔

دیہی اتر پردیش سے تعلق رکھنے والے نوجوان ابھیشیک کمار کہتے ہیں، ’’اب ہو گیا ہمارا۔ ہمیں حکومت سے ایسی توقع نہیں تھی۔ انہوں نے ہمارے ساتھ ایسا سلوک کیا جیسے ہماری کوئی عزت ہی نہ ہو، جیسے ہماری کوئی اہمیت ہی نہ ہو۔‘‘ ابھیشیک اور ان کے دوست مارچ کرنے والوں کی اگلی صف میں موجود تھے جب پولیس نے آنسو گیس کے گولے داغے۔ اس کے بعد ہونے والے لاٹھی چارج میں وہ بھی زخمی ہوئے۔

ابھیشیک (۲۴) سرکاری ملازمتوں کے بھرتی امتحانات کی تیاری کر رہے ہیں۔ وہ اپنے دوستوں، ۲۵ سالہ کرن اور ۲۰ سالہ روہت کمار کے ساتھ اتر پردیش کے آگرہ ضلع کے فتح پور علاقہ سے دہلی آئے تھے۔ وہ پیر کی صبح چار بجے دارالحکومت پہنچے، احتجاج میں شریک ہوئے اور اسی شام واپس روانہ ہو گئے۔

کرن نے پاری سے گفتگو کرتے ہوئے کہا، ’’ہم اپنے ساتھ صرف زخم ہی نہیں بلکہ شدید مایوسی کا احساس بھی واپس لے جا رہے ہیں۔‘‘

بعد ازاں، سی جے پی کے دو نمائندوں نے مرکزی وزیر جے پی نڈا سے ملاقات کر کے اپنے مطالبات پر مشتمل ایک یادداشت (میمورنڈم) پیش کی۔

اتر پردیش کے پریاگ راج ضلع کے فتح پور علاقہ سے تعلق رکھنے والے ۲۲ سالہ املیش، جو بی ایس سی کے طالب علم ہیں، کہتے ہیں، ’’اب جبکہ ہم اپنا خون بہا چکے ہیں، میں اس وقت تک یہاں سے نہیں جاؤں گا جب تک ہمارے مطالبات پورے نہیں کیے جاتے۔ ہم اس سے بہتر سلوک کے مستحق ہیں۔‘‘

وہ مزید کہتے ہیں، ’’ہم نہایت احتیاط اور پُرامن طریقے سے مارچ کر رہے تھے۔ ہم نے تو پولیس کو پھول بھی پیش کیے، لیکن اس کے باوجود انہوں نے ہمارے خلاف تشدد کا استعمال کیا۔‘‘

کریک ڈاؤن کے باوجود املیش کا کہنا ہے کہ وہ احتجاج جاری رکھیں گے۔ ’’اگر مجھے اس مقصد کے لیے اپنی جان بھی دینی پڑی تو میں اس کے لیے بھی تیار ہوں۔‘‘