‘ವಿದ್ಯಾರ್ಥಿಗಳು ನನ್ನಂತ ತಾಯಂದಿರಿಗಾಗಿ ಪ್ರತಿಭಟನೆ ನಡೆಸುತ್ತಿದ್ದಾರೆ’

19 ವರ್ಷದ ಸನಾ ಶೇಖ್‌ಗೆ ತಮ್ಮ ತಂದೆ ಜಾಫರ್ ಹುಸೇನ್ ಹೆಸರಿನಲ್ಲಿ ಆಸ್ಪತ್ರೆಯೊಂದನ್ನು ತೆರೆಯುವ ಕನಸಿತ್ತು.

ಉದ್ಯಮದಲ್ಲಿ ತೀವ್ರ ನಷ್ಟ ಅನುಭವಿಸಿದ ನಂತರ, 50 ವರ್ಷದ ಹುಸೇನ್ ಆಂಧ್ರಪ್ರದೇಶದ ಪ್ರೊದ್ದಟ್ಟೂರ್ ಗ್ರಾಮದಿಂದ ಕೆಲಸಕ್ಕಾಗಿ ಸುಮಾರು 12 ವರ್ಷಗಳ ಹಿಂದೆ ಕುವೈತ್‌ಗೆ ಹೋಗಿದ್ದರು.

ತಮ್ಮ ಹೆಣ್ಣುಮಕ್ಕಳಿಗೆ ಒಳ್ಳೆಯ ಶಿಕ್ಷಣ ಕೊಡಿಸಬೇಕೆಂಬ ಆಸೆಯಿಂದ ಹುಸೇನ್‌ರ ಹೆಂಡತಿ 40 ವರ್ಷದ ʼಹಬೀಬುನ್ನೀಸಾ ಶೇಖ್ʼ ತಮ್ಮ ಮೂರು ಮಕ್ಕಳೊಂದಿಗೆ ಹೈದರಾಬಾದ್‌ಗೆ ಹೋಗಿ ನೆಲೆಸಿದ್ದರು. ಅವರ ತಾಯಿಯ ಮನೆಯ ಪಕ್ಕದ ಅಪಾರ್ಟ್‌ಮೆಂಟ್‌ನಲ್ಲೇ ಅವರ ವಾಸ ಶುರುವಾಗಿತ್ತು.

“ಸನಾ ತನ್ನ ತಂದೆಗೆ ತುಂಬಾ ಕ್ಲೋಸ್‌ ಇದ್ದಳು,” ಎಂದು ಹಬೀಬುನ್ನೀಸಾ ಹೇಳುತ್ತಾರೆ. “ದಿನಾಲು ಬೆಳಿಗ್ಗೆ ಅವರಿಬ್ಬರು ಮಾತನಾಡುತ್ತಿದ್ದರು. ತನ್ನ ತಂದೆ ಮಾಡಿದ ತ್ಯಾಗಗಳ ಬಗ್ಗೆ ಅವಳಿಗೆ ಗೊತ್ತಿತ್ತು. ನಷ್ಟ ಅನುಭವಿಸಿದ ನಂತರ ಅವರು ದೂರ ಹೋಗಬೇಕಾಯಿತು ಎಂದು ಗೊತ್ತಿದ್ದ ಕಾರಣ ಸನಾ ತನ್ನ ಯಶಸ್ಸನ್ನು ತಂದೆಗೆ ಅರ್ಪಿಸಲುಬಯಸಿದ್ದಳು.”

ಮೇ 3, 2026 ರಂದು ಪರೀಕ್ಷಾ ಹಾಲಿನಿಂದಹೊರಗೆ ಬಂದ ಮೇಲೆ ಸನಾ ಮೊದಲು ಫೋನ್ ಮಾಡಿದ್ದು ಕುವೈತ್‌ನಲ್ಲಿದ್ದ ತಮ್ಮ ತಂದೆಗೆ. “ತಾನು ಪರೀಕ್ಷೆಯನ್ನು ತುಂಬಾ ಚೆನ್ನಾಗಿ ಬರೆದಿರುವುದಾಗಿ ತುಂಬಾ ಖುಷಿಯಿಂದ ಅವಳು ನನಗೆ ಹೇಳಿದಳು.” ಈ ಖುಷಿಯನ್ನು “ನಿನ್ನ ತಾಯಿಯ ಜೊತೆಗೆ ಅಥವಾ ಹೋಟೆಲ್‌ಗೆ ಹೋಗಿ ಊಟ ಮಾಡುವ ಮೂಲಕ ಸೆಲೆಬ್ರೇಟ್‌ ಮಾಡು ಎಂದು ನಾನು ಅವಳಿಗೆ ಹೇಳಿದ್ದಾಗಿ ಹುಸೇನ್ ಹೇಳುತ್ತಾರೆ.”

ಇನ್ನೊಬ್ಬ ಹುಡುಗಿ ಎಸ್. ಅನಿತಾಳಿಗೂ ಒಂದು ಕನಸಿತ್ತು. 17 ವರ್ಷದ ಅನಿತಾ ತಮಿಳುನಾಡಿನ ಕುಳುಮೂರ್ಗ್ರಾಮದ ದಲಿತ ಕುಟುಂಬಕ್ಕೆ ಸೇರಿದ ಹುಡುಗಿ. ಅನಿತಾಗೆ ಏಳು ವರ್ಷವಿದ್ದಾಗ ಅವಳ ತಾಯಿ ಖಾಯಿಲೆಯಿಂದಾಗಿ ತೀರಿಕೊಂಡಿದ್ದರು. ಅವರ ತಂದೆ ತರಕಾರಿ ಮಾರುಕಟ್ಟೆಯಲ್ಲಿ ದಿನಗೂಲಿಯಾಗಿ ಕೆಲಸ ಮಾಡುತ್ತಿದ್ದರು. ಅನಿತಾಗೆ ಡಾಕ್ಟರ್ ಆಗಬೇಕೆಂಬ ಆಸೆಯಿತ್ತು.

“ಅವಳು ದೊಡ್ಡವಳಾಗಿ ನಮ್ಮ ಹಾಗೇ ಅವಕಾಶ ವಂಚಿತ ಕುಟುಂಬಗಳಿಗೆ ವೈದ್ಯಕೀಯ ಸೇವೆ ಮಾಡಬೇಕು ಅಂದುಕೊಂಡಿದ್ದಳು” ಎಂದು ಹೇಳುವ 36 ವರ್ಷದ ಅವಳ ಸಹೋದರ ಮಣಿರತ್ನಂ “ಅವಳು ಮೊದಲಿನಿಂದಲೂ ತುಂಬಾ ಚುರುಕಾದ ವಿದ್ಯಾರ್ಥಿಯಾಗಿದ್ದಳು” ಎನ್ನುತ್ತಾರೆ.

ಅವಳು ಸ್ಟೇಟ್ ಬೋರ್ಡ್ ಪರೀಕ್ಷೆಯಲ್ಲಿ ಶೇಕಡಾ 98ರಷ್ಟು ಮಾರ್ಕ್ಸ್‌ ತಗೊಂಡಿದ್ದಳು. ಅವಳ ಆಯ್ಕೆಯ ಕಾಲೇಜಿಗೆಪ್ರವೇಶ ಪಡೆಯಲು ಮತ್ತು ಅವಳ ಕನಸುಗಳನ್ನು ನನಸಾಗಿಸಿಕೊಳ್ಳಲು ಅಗತ್ಯಕ್ಕಿಂತಲೂ ಹೆಚ್ಚಿನ ಅಂಕಗಳು ಅವಳಿಗೆ ಸಿಕ್ಕಿತ್ತು.

ಈ ಇಬ್ಬರೂ ಹುಡುಗಿಯರು ಹಿಂದುಳಿದಕುಟುಂಬಗಳಿಂದ ಬಂದವರಾಗಿದ್ದರು. ಸಾಮಾಜಿಕ ಅಡೆತಡೆಗಳನ್ನು ಮೆಟ್ಟಿ ನಿಂತು ಒಳ್ಳೆಯ ಬದುಕು ಕಟ್ಟಿಕೊಳ್ಳುವ ತಮ್ಮ ಸಾಮರ್ಥ್ಯದ ಮೇಲೆ ಇಬ್ಬರಿಗೂ ನಂಬಿಕೆಯಿತ್ತು. ಆದರೆ ಅವರ ಆಕಾಂಕ್ಷೆಗಳು ಸಡನ್‌ ಆಗಿ ಅರ್ಧದಲ್ಲೇ ತುಂಡಾಯಿತು. ಈ ಎರಡೂ ದುರಂತಗಳು ಒಂಬತ್ತು ವರ್ಷಗಳ ಅಂತರದಲ್ಲಿ ನಡೆದಿದ್ದರೂ, ಅವುಗಳನ್ನು ಒಂದು ಸಾಮಾನ್ಯ ಎಳೆ ಬೆಸೆದಿತ್ತು: ಅದೇ 'ನ್ಯಾಷನಲ್‌ ಎಲಿಜಿಬಿಲಿಟಿ ಕಮ್‌ ಎಂಟ್ರೆನ್ಸ್‌ ಟೆಸ್ಟ್' (ಎನ್‌ಇಇಟಿ). ಭಾರತದ ಈ ರಾಷ್ಟ್ರೀಯ ವೈದ್ಯಕೀಯಪ್ರವೇಶ ಪರೀಕ್ಷೆಯು ಇವರಿಬ್ಬರಿಗೂ ಬೇರೆ ಬೇರೆ ರೀತಿಯಲ್ಲಿ ಅನ್ಯಾಯ ಮಾಡಿತ್ತು.

ಅನಿತಾ 2017ರಲ್ಲಿ ಸಾವನ್ನಪ್ಪಿದಳು. ಆಕೆಯದ್ದು ನೀಟ್ ಪರೀಕ್ಷೆಗೆ ಸಂಬಂಧಪಟ್ಟಂತೆ ಮೊದಲ ಆತ್ಮಹತ್ಯೆಯಾಗಿತ್ತು. ಸನಾ ಕಳೆದ ತಿಂಗಳು ತನ್ನ ಬದುಕನ್ನು ಕೊನೆಗೊಳಿಸಿಕೊಂಡಳು. ಆನ್‌ಲೈನ್ ಸುದ್ದಿ ಪೋರ್ಟಲ್ 'ನ್ಯೂಸ್‌ಲಾಂಡ್ರಿ' ನಡೆಸಿದ ಅನಾಲಿಸಿಸ್ಪ್ರಕಾರ, ಈ ದಶಕದಲ್ಲಿ ವಿವಿಧ ಪರೀಕ್ಷೆಗಳ ಪ್ರಶ್ನೆಪತ್ರಿಕೆ ಸೋರಿಕೆಯಾದ 89 ಪ್ರತ್ಯೇಕಪ್ರಕರಣಗಳು ಮಾಧ್ಯಮ ವರದಿಗಳಲ್ಲಿ ದಾಖಲಾಗಿವೆ. ಇದು ನೀಟ್ ಬರೆಯುವ ವಿದ್ಯಾರ್ಥಿಗಳು ಸೇರಿದಂತೆ ಕನಿಷ್ಠ 6.5 ಕೋಟಿ ವಿದ್ಯಾರ್ಥಿಗಳ ಮೇಲೆ ಪರಿಣಾಮ ಬೀರಿದೆ.

2026ರ ಜುಲೈ 20ರಂದು ದೆಹಲಿಯ ಜಂತರ್ ಮಂತರ್‌ನಲ್ಲಿ ಭಾರತದ ಯುವಜನತೆಯ ಒಳಗೆ ಮಡುಗಟ್ಟಿದ್ದ ಆಕ್ರೋಶವು ದೊಡ್ಡದಾಗಿ ಸ್ಪೋಟಗೊಂಡಾಗ, ಅನಿತಾ ಮತ್ತು ಸನಾ ಅವರ ಕುಟುಂಬದವರೂ ಅವರೊಂದಿಗೆ ಕೈಜೋಡಿಸಿದರು. ಪ್ರತಿಭಟನಾನಿರತ ವಿದ್ಯಾರ್ಥಿಗಳನ್ನು ಬೆಂಬಲಿಸಿ ಜೊತೆ ನಿಲ್ಲೋದಿಕ್ಕೆ ತಮ್ಮ ತಮ್ಮ ರಾಜ್ಯಗಳಿಂದ ದೇಶದ ರಾಜಧಾನಿಗೆ ಪ್ರಯಾಣ ಬೆಳೆಸಿದರು. ಓದಿ: ‘ನಾವೂ ಇದ್ದೇವೆ ಎನ್ನುವುದನ್ನು ಸಂಸತ್ತಿಗೆ ನೆನಪಿಸಲು ಇಲ್ಲಿಗೆ ಬಂದಿದ್ದೇನೆʼ

ಒಂದು ಮೀಮ್ ಪೇಜ್‌ ಆಗಿ ಶುರುವಾದ 'ದಿ ಕಾಕ್ರೋಚ್ ಜನತಾ ಪಾರ್ಟಿ' ಯುವ ಜನರ ಚಳವಳಿಯಾಗಿ ರೂಪಾಂತರಗೊಂಡಿತು. ಇದು 'ಆಲ್ ಇಂಡಿಯಾ ಸ್ಟೂಡೆಂಟ್ಸ್ ಅಸೋಸಿಯೇಷನ್' (ಎಐಎಸ್‌ಎ) ಮತ್ತು 'ಆಲ್ ಇಂಡಿಯಾ ಸ್ಟೂಡೆಂಟ್ಸ್ ಫೆಡರೇಶನ್' (ಎಐಎಸ್‌ಎಫ್) ಗಳಂತಹ ವಿದ್ಯಾರ್ಥಿ ಸಂಘಟನೆಗಳೊಂದಿಗೆ ಸೇರಿ, ಜುಲೈ 20, 2026 ರಂದು ಸಂಸತ್ತಿಗೆ ಶಾಂತಿಯುತಮೆರವಣಿಗೆ ನಡೆಸಲು ಕರೆ ನೀಡಿತು.

ಈ ಚಳುವಳಿಯ ಮೂಲಕ ಅವರು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಗೆ ಆಗ್ರಹಿಸುತ್ತಿದ್ದರು. ಇದೇ ಕಾರಣಕ್ಕಾಗಿ 25 ದಿನಗಳ ಹಿಂದಿನಿಂದ, ಲಡಾಖ್‌ನ ಪರಿಸರ ಹೋರಾಟಗಾರ ಸೋನಮ್ ವಾಂಗ್ಚುಕ್ ಮತ್ತು ವಿದ್ಯಾರ್ಥಿ ಹೋರಾಟಗಾರರಾದ ನೇಹಾ ಬೋರಾ, ಮನೀಷ್ ಕುಮಾರ್ ಹಾಗೂ ಆಮೀನ್ ಅಮಿತೋಜ್ ಜಂತರ್ ಮಂತರ್‌ನಲ್ಲಿ ಉಪವಾಸ ಸತ್ಯಾಗ್ರಹ ನಡೆಸುತ್ತಿದ್ದರು. ಈ ಮೂಲಕ ಶೈಕ್ಷಣಿಕ ಪರೀಕ್ಷೆಗಳು ಮತ್ತು ರಾಜ್ಯ ಸರ್ಕಾರದ ನೇಮಕಾತಿಗಳಲ್ಲಿ ಹೊಣೆಗಾರಿಕೆ ಹಾಗೂ ಪಾರದರ್ಶಕತೆಯನ್ನು ತರಬೇಕು ಎಂಬುದು ಅವರ ಒತ್ತಾಯವಾಗಿತ್ತು.

ಭಾರೀ ಪೊಲೀಸ್ ಮತ್ತು ಭದ್ರತಾ ಸಿಬ್ಬಂದಿಯ ಬಂದೋಬಸ್ತಿನ ನಡುವೆಯೂ, ಜಂತರ್ ಮಂತರ್‌ನ ರಸ್ತೆಗಳಲ್ಲಿ ಸಾವಿರಾರು ಜನರು, ಅದರಲ್ಲೂ ಮುಖ್ಯವಾಗಿ ಯುವ ಜನ ಸಾಗರವೇ ಹರಿದು ಬಂತು. ಆಕಾಶವು ಸರ್ಕಾರದ ವಿರುದ್ಧ ಘೋಷಣೆಗಳಿಂದ ಪ್ರತಿಧ್ವನಿಸಿ, ಪ್ರತಿಭಟನೆಯ ಬೀದಿಗಳು ಪ್ರತಿರೋಧದ ಉತ್ಸವದಂತಾದವು.

ಕೇಂದ್ರ ಸರ್ಕಾರವು ಇದಕ್ಕೆ ಪ್ರತಿಕ್ರಿಯೆಯಾಗಿ ಇಂಟರ್‌ನೆಟ್ ಸಂಪರ್ಕವನ್ನು ಕಡಿತಗೊಳಿಸಿತು. ಪ್ರತಿಭಟನಾ ಸ್ಥಳಕ್ಕೆ ಪೊಲೀಸ್ ಮತ್ತು ಅರೆಸೈನಿಕ ಪಡೆಗಳನ್ನು ಕಳುಹಿಸಿತು.

ದಿನ ಕಳೆದಂತೆ, ಟಿಯರ್‌ ಗ್ಯಾಸಿನ ಸದ್ದು ಪ್ರತಿರೋಧದ ಘೋಷಣೆಗಳ ಮೇಲೆ ಅಪ್ಪಳಿಸಿದವು. ಶಾಂತಿಯುತವಾಗಿ ನಡೆಯುತ್ತಿದ್ದ ಪ್ರತಿಭಟನೆಯ ವಿರುದ್ಧ ಲಾಠಿಚಾರ್ಜ್‌ನ ಆರ್ಭಟಗಳು ಕೇಳಿಬಂದವು. ತಲೆಯಿಂದ ರಕ್ತ ಹರಿಯುವುದು ಸೇರಿದಂತೆ, ಪ್ರತಿಭಟನಾಕಾರರಿಗೆ ಗಂಭೀರ ಗಾಯಗಳಾದವು, ಯುವತಿಯರ ಉಡುಪುಗಳು ಹರಿಯಲ್ಪಟ್ಟವು. ಅಪ್ರಾಪ್ತ ವಿದ್ಯಾರ್ಥಿಗಳನ್ನೂ ಬಿಡದೇ ಹೊಡೆಯಲಾಯಿತು. ಕಾಶ್ಮೀರದಲ್ಲಿ ಅನೇಕರ ದೃಷ್ಟಿ ಕಸಿದುಕೊಂಡು ಕುಖ್ಯಾತಿ ಪಡೆದಿದ್ದಪೆಲೆಟ್ಗನ್‌ಗಳ ಏಟು ಕನಿಷ್ಠ ಮೂರು ಜನರ ದೇಹ ಹೊಕ್ಕವು.

ಕ್ರೂರ ದೌರ್ಜನ್ಯಕ್ಕೆ ಒಳಗಾದ ನಂತರವೂ ಜಂತರ್ ಮಂತರ್‌ಗೆ ಮರಳಿದ ವಿಧ್ಯಾರ್ಥಿಗಳು, ಇನ್ನಷ್ಟು ಹೆಚ್ಚಿನ ಉತ್ಸಾಹದೊಂದಿಗೆ ಪ್ರತಿಭಟನಾ ಸ್ಥಳವನ್ನು ಮತ್ತೆ ತಮ್ಮ ವಶಕ್ಕೆ ತೆಗೆದುಕೊಂಡರು.

ಹಬೀಬುನ್ನೀಸಾ ಅವರು ತಾನು ಕಂಡ ಹಿಂಸಾಚಾರದಿಂದ ಆಘಾತಗೊಂಡರೂ, ಪ್ರತಿಭಟನಾಕಾರರಿಂದ ಪ್ರೇರಿತರಾಗಿದ್ದರು. "ನಾನು ಒಬ್ಬಳು ಸಾಮಾನ್ಯ ತಾಯಿ, ನನ್ನ ಮಕ್ಕಳೇ ನನ್ನ ಪ್ರಪಂಚ," ಎಂದು ತೀರಿಹೋದ ಸನಾ ಶೇಕ್ ತಾಯಿ 'ಪಾರಿ'ಗೆ ತಿಳಿಸಿದರು. "ನಾನು ಮನೆ ನೋಡಿಕೊಳ್ಳುತ್ತಾ ಜೀವನ ನಡೆಸುತ್ತಿದ್ದೆ, ಆದರೆ ಅಧಿಕಾರದಲ್ಲಿರುವವರು ನನ್ನ ಬದುಕನ್ನು ಅಸ್ತವ್ಯಸ್ತಗೊಳಿಸಿದರು. ಅವರ ನಿರ್ಧಾರಗಳಿಂದಾಗಿ ನನ್ನ ಮಗಳು ತೀರಿಕೊಂಡಳು. ನೀವು ನಮ್ಮನ್ನು ರಕ್ಷಿಸಬೇಕೇ ಹೊರತು ನಮ್ಮ ಜೀವನವನ್ನು ಹಾಳುಮಾಡಬಾರದು" ಎಂದರು.

ಮೇ 3, 2026 ರಂದು ಸನಾ ತನ್ನ ಪರೀಕ್ಷೆಗಳಲ್ಲಿ ಒಳ್ಳೆಯ ಅಂಕಗಳೊಂದಿಗೆ ಪಾಸ್ ಆದ ನಂತರ, ನೀಟ್ ಪ್ರಶ್ನೆಪತ್ರಿಕೆ ಸೋರಿಕೆಯಾಗಿದೆ ಮತ್ತು ವಿದ್ಯಾರ್ಥಿಗಳು ಮರುಪರೀಕ್ಷೆಗೆ ಹಾಜರಾಗಬೇಕು ಎಂದು ಕೇಂದ್ರ ಸರ್ಕಾರ ಘೋಷಿಸಿತು. ಇದರಿಂದ ಆಕೆ ಸಂಪೂರ್ಣವಾಗಿ ಕುಗ್ಗಿಹೋದಳು. ಈಗಾಗಲೇ ಪರೀಕ್ಷೆಗಾಗಿ ಪಟ್ಟ ಕಠಿಣ ಪರಿಶ್ರಮ ಆಕೆಯ ಮೇಲೆ ತೀವ್ರ ಪರಿಣಾಮ ಬೀರಿತ್ತು. ನೀಟ್ ತುಂಬಾ ಕಾಂಪಿಟೀಷನ್‌ ಇರುವ ಪರೀಕ್ಷೆಯಾಗಿದ್ದು, ವೈದ್ಯಕೀಯ ಕಾಲೇಜುಗಳಲ್ಲಿ ಇರುವ 1,30,000 ಕ್ಕಿಂತ ಕಡಿಮೆ ಸೀಟುಗಳಿಗಾಗಿ 20 ಲಕ್ಷಕ್ಕೂ ಹೆಚ್ಚು ಆಕಾಂಕ್ಷಿಗಳು ಪರೀಕ್ಷೆ ಬರೆಯುತ್ತಾರೆ. ವರ್ಷಗಳ ಸಿದ್ಧತೆಯ ನಂತರ, ಅನುಭವಿಸಿದ ಒತ್ತಡವೆಲ್ಲಾ ಕೊನೆಗೂ ಮುಗಿಯಿತುಅಂತ ಸನಾ ಅಂದುಕೊಂಡಿದ್ದಳು. ಆದರೆ ಈಗ ಆಕೆ ಅದೇ ಒತ್ತಡಗಳ ಮೂಲಕ ಮತ್ತೆ ಹಾದು ಹೋಗಬೇಕಾಗಿತ್ತು.

ದುಃಖದ ಸಂಗತಿಯೆಂದರೆ, ಮರುಪರೀಕ್ಷೆ ಬರೆಯುವ ಭಾರವು ಆತ್ಮಹತ್ಯೆಯ ಪತ್ರ ಬರೆಯುವುದಕ್ಕಿಂತಲೂ ಹೆಚ್ಚಾಗಿ ಕಂಡಿತು ಹುಡುಗಿಗೆ. ಜೂನ್ 21 ರಂದು ಮರುಪರೀಕ್ಷೆಯ ಒಂದು ದಿನದ ಮೊದಲು ತನ್ನ ಕೋಣೆಯಲ್ಲಿ "ನನ್ನನ್ನು ಕ್ಷಮಿಸಿ" ಎಂದು ಗೀಚಿಟ್ಟು, ನೇಣಿಗೆ ಶರಣಾಗಿದ್ದಳು.

ಇದೇ ಕಾರಣಕ್ಕಾಗಿ ಆತ್ಮಹತ್ಯೆ ಮಾಡಿಕೊಂಡ 20ಕ್ಕೂ ಹೆಚ್ಚು ವಿದ್ಯಾರ್ಥಿಗಳಲ್ಲಿ ಸನಾ ಕೂಡಾ ಒಬ್ಬಳು.

"ಅವತ್ತು ಬೆಳಿಗ್ಗೆ ಅವಳು ನನ್ನ ಫೋನ್ ರಿಸೀವ್‌ ಮಾಡಿಲ್ಲ," ಎಂದು ಜಾಫರ್ ಹೇಳುತ್ತಾರೆ. ನೋವಿನಿಂದ ಕಂಗಾಲಾಗಿದ್ದ ಆ ತಂದೆ "ಒಂದು ವೇಳೆ ನಾನು ಆಕೆಯೊಂದಿಗೆ ಮಾತನಾಡಲು ಸಾಧ್ಯವಾಗಿದ್ದರೆ, ಆಕೆ ಇಂದಿಗೂ ನಮ್ಮೊಂದಿಗಿರುತ್ತಿದ್ದಳೇನೋ," ಎಂದು ಪ್ರತಿಭಟನಾ ಸ್ಥಳದಲ್ಲಿ ಮಾತನಾಡುತ್ತಾ ಹೇಳಿದರು.

"ನಾನು ಅನುಭವಿಸುತ್ತಿರುವ ನೋವನ್ನು ವ್ಯಕ್ತಪಡಿಸಲು ಇಷ್ಟೊಂದು ದೂರ ಬಂದಿದ್ದೇನೆ," ಎಂದು ದುಃಖದಿಂದ ನರಳುತ್ತಿರುವ ತಾಯಿ ಹಬೀಬುನ್ನೀಸಾ ಹೇಳುತ್ತಾರೆ. ತಮ್ಮ ಹಿರಿಯ ಮಗಳು ಇನ್ನು ಮುಂದೆ ಇಲ್ಲ ಎಂಬುದನ್ನು ಒಪ್ಪಿಕೊಳ್ಳಲು ಅವರು ಇನ್ನೂ ಹೆಣಗಾಡುತ್ತಿದ್ದಾರೆ. "ನಾವು ಐದು ವರ್ಷಗಳಲ್ಲಿ ಸಾಯಬಹುದು, ಅಥವಾ ವಯಸ್ಸಾಗುವವರೆಗೆ ಬದುಕಿರಬಹುದು, ಆದರೆ ನಮ್ಮ ಉಳಿದ ಜೀವನ ಪೂರ್ತಿ ಈ ನೋವನ್ನು ಹೊರಬೇಕಾಗುತ್ತದೆ," ಎಂದು ಹೇಳುವ ಅವರು, "ರಾತ್ರಿ ವೇಳೆ ನನಗೆ ಸರಿಯಾಗಿ ನಿದ್ರೆ ಬರುವುದಿಲ್ಲ, ಮಧ್ಯರಾತ್ರಿಯಲ್ಲಿ ನನ್ನ ಕೈ-ಕಾಲುಗಳು ನಡುಗಲು ಪ್ರಾರಂಭಿಸುತ್ತವೆ." ಅಂತ ಹೇಳುತ್ತಾರೆ.

ಆದರೂ, ಆ ಪೋಷಕರು ತಮ್ಮ 15 ಮತ್ತು 11 ವರ್ಷದ ಇಬ್ಬರು ಹೆಣ್ಣುಮಕ್ಕಳನ್ನು ಮನೆಯಲ್ಲಿ ಬಿಟ್ಟು ದೆಹಲಿಗೆ ಬಂದಿದ್ದಾರೆ. "ನಾನು ಅವರ ಬಗ್ಗೆಯೇ ಯೋಚಿಸುತ್ತಾ ಆತಂಕಕ್ಕೊಳಗಾಗುತ್ತೇನೆ. ಅಧಿಕಾರದಲ್ಲಿರುವವರು ಮಾಡುತ್ತಿರುವುದು ತಪ್ಪು ಎಂದು ಹೇಳಲು ನಾನು ಇಲ್ಲಿಗೆ ಬಂದಿದ್ದೇನೆ. ಅಧಿಕಾರ ನಿಮ್ಮ ಕಣ್ಣನ್ನು ಕುರುಡುಗೊಳಿಸಿದೆಯೇ? ಆ ವಿದ್ಯಾರ್ಥಿಗಳು ನನ್ನಂತ ತಾಯಂದಿರಿಗಾಗಿ ಪ್ರತಿಭಟಿಸುತ್ತಿದ್ದಾರೆ. ಅವರು ಸೆನ್ಸಿಟಿವ್‌ ಆಗಿರುವ ವಿದ್ಯಾರ್ಥಿಗಳು. ನನ್ನ ದುಃಖವನ್ನು ಹಂಚಿಕೊಂಡವರ ಮೇಲೆ ಪೊಲೀಸರು ಹಲ್ಲೆ ನಡೆಸುವುದನ್ನು ನೋಡಲು ತುಂಬಾ ನೋವಾಗುತ್ತದೆ. ನಮ್ಮ ನೋವು ನಿಮಗರ್ಥವಾಗದಿದ್ದರೆ, ನಿಮ್ಮ ಅಧಿಕಾರದಿಂದ ಏನು ಪ್ರಯೋಜನ? ದಯವಿಟ್ಟು ಮಕ್ಕಳ ಮೇಲೆ ಕ್ರೌರ್ಯ ಎಸಗಬೇಡಿ. ಬಚ್ಚೋಂ ಪೆ ಇತ್ನಾ ಜುಲ್ಮ್ ಮತ್ ಕರಿಯೇ [ದಯವಿಟ್ಟುಮಕ್ಕಳ ಮೇಲೆ ಇಷ್ಟೊಂದು ದೌರ್ಜನ್ಯ ಮಾಡಬೇಡಿ]."

ಮಣಿರತ್ನಂ ಪಾಲಿಗೆ ಇದೊಂದು ದೇಜಾವು ರೀತಿಯ ಅನುಭವ

ನೀಟ್ ಪರೀಕ್ಷೆಯ ಪರಿಕಲ್ಪನೆಯನ್ನು ಮೊದಲು 2010 ರಲ್ಲಿ ರೂಪಿಸಲಾಯಿತು. 2016 ರಲ್ಲಿ ನೀಟ್ ಜಾರಿಗೆ ತರುವುದರಿಂದ ವೈದ್ಯಕೀಯ ಶಿಕ್ಷಣ ವ್ಯವಸ್ಥೆಯ ಸುಧಾರಣೆಯಾಗುತ್ತದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಕೇಂದ್ರ ಸರ್ಕಾರ ಬಿತ್ತು. ಆದರೆ ಒಂದು ದಶಕದ ನಂತರ, ಯಾವುದೂ ಅಂದುಕೊಂಡಂತೆ ಆಗಿಲ್ಲ ಎಂದು ಖಚಿತವಾಗಿ ಹೇಳಬಹುದು.

ತಮಿಳುನಾಡು ನೀಟ್ ಹೇರಿಕೆಯನ್ನು ಮೊದ ಮೊದಲು ವಿರೋಧಿಸಿದ ರಾಜ್ಯಗಳಲ್ಲಿ ಒಂದು. 2016 ರಲ್ಲಿ, ಅಂದಿನ ಮುಖ್ಯಮಂತ್ರಿ ಜೆ. ಜಯಲಲಿತಾ ಅವರ ಅವಧಿಯಲ್ಲಿ ರಾಜ್ಯಕ್ಕೆ ಒಂದು ವರ್ಷದ ವಿನಾಯಿತಿಯೂ ಸಿಕ್ಕಿತ್ತು. ತಮ್ಮ ಶಿಕ್ಷಣ ವ್ಯವಸ್ಥೆಯು ಸಾಕಷ್ಟು ಪ್ರಬಲವಾಗಿದೆ ಮತ್ತು ವೈದ್ಯಕೀಯ ಪ್ರವೇಶಕ್ಕೆ ಪ್ರತ್ಯೇಕ ಕೇಂದ್ರೀಕೃತ ಪರೀಕ್ಷೆಯ ಅಗತ್ಯವಿಲ್ಲ ಎಂದು ತಮಿಳುನಾಡು ರಾಜ್ಯ ಸರ್ಕಾರಕ್ಕೆ ನಂಬಿಕೆಯಿತ್ತು. 2021 ರಲ್ಲಿ ನ್ಯಾಯಮೂರ್ತಿ ಎ.ಕೆ. ರಾಜನ್ ಸಮಿತಿಯು ನೀಟ್ ಕುರಿತು ತನ್ನ ವರದಿಯನ್ನುಪ್ರಕಟಿಸಿದಾಗ ರಾಜ್ಯ ಸರ್ಕಾರದ ಈ ನಿಲುವು ಸರಿ ಇದೆ ಅಂತ ಸಾಬೀತಾಯಿತು.

ನೀಟ್ ಪರೀಕ್ಷೆಯು ಅವಕಾಶ ವಂಚಿತ ವರ್ಗಗಳ ಮಕ್ಕಳಿಗೆ ವೈದ್ಯಕೀಯಕಾಲೇಜುಗಳಲ್ಲಿ ಪ್ರವೇಶ ಪಡೆಯುವುದನ್ನು ಮತ್ತಷ್ಟು ಕಷ್ಟಕರಗೊಳಿಸುತ್ತದೆ ಎಂದು ಆ ವರದಿ ಬಹಿರಂಗಪಡಿಸಿದೆ.

2010 ರಲ್ಲಿ, ತಮಿಳುನಾಡಿನ ವಿವಿಧ ವೈದ್ಯಕೀಯ ಕಾಲೇಜುಗಳಿಗೆ ಶೇಕಡಾ 80 ಕ್ಕಿಂತ ಸ್ವಲ್ಪ ಹೆಚ್ಚಿನ ಸಂಖ್ಯೆಯಲ್ಲಿ ಇಂಗ್ಲೀಷ್‌ ಮೀಡಿಯಂನ ವಿದ್ಯಾರ್ಥಿಗಳಿಗೆ ಪ್ರವೇಶ ಸಿಕ್ಕಿತ್ತು. ಆ ಸಂಖ್ಯೆಯು 2017 ರಲ್ಲಿ ಶೇಕಡಾ 98.41 ಕ್ಕೆ ಏರಿಕೆಯಾಯಿತು. ಅದೇ ಸಮಯದಲ್ಲಿ ತಮಿಳು ಮೀಡಿಯಂನಲ್ಲಿ ಕಲಿತ ವಿದ್ಯಾರ್ಥಿಗಳ ಪ್ರಮಾಣವುಸುಮಾರು ಶೇಕಡಾ 20 ರಿಂದ ಶೇಕಡಾ 2 ಕ್ಕಿಂತಲೂ ಕಡಿಮೆಗೆ ಕುಸಿಯಿತು.

ಇದನ್ನು ಮುಂಚಿತವಾಗಿಯೇ ಊಹಿಸಿದ್ದು ಕುಳುಮೂರ್ಗ್ರಾಮದ ಮಣಿರತ್ನಂ ಅವರ ತಂಗಿ ಮತ್ತು ದಲಿತ ವಿದ್ಯಾರ್ಥಿನಿಯಾದ ಅನಿತಾ.

2017 ರ ಆಗಸ್ಟ್‌ನಲ್ಲಿ, ಹಿಂದಿನ ವರ್ಷದ ವಿನಾಯಿತಿಯನ್ನು ಮುಂದುವರಿಸಬೇಕೆಂದು ಒತ್ತಾಯಿಸಿ ಆಕೆ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದಳು. ಆದರೆ, ಅತ್ಯುನ್ನತ ನ್ಯಾಯಾಲಯವು ಇದನ್ನು ನಿರಾಕರಿಸಿತು. 2017 ರ ಸೆಪ್ಟೆಂಬರ್ 1 ರಂದು, ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ಆಕೆ ಆತ್ಮಹತ್ಯೆ ಮಾಡಿಕೊಂಡಳು. ಆ ಹುಡುಗಿಗೆ ಆಗ 17 ವರ್ಷ ವಯಸ್ಸಾಗಿತ್ತು.

"ತಮಿಳುನಾಡಿಗೆ ಈ ವಿನಾಯಿತಿ ಮುಂದುವರಿಯುತ್ತದೆ ಎಂದು ಆಕೆಗೆ ಸಂಪೂರ್ಣ ಭರವಸೆಯಿತ್ತು," ಎಂದು ಮಣಿರತ್ನಂ ಹೇಳುತ್ತಾರೆ. "ಆಕೆ ರಾಜ್ಯ ಬೋರ್ಡ್ ಪರೀಕ್ಷೆಗಳಲ್ಲಿ ತನ್ನ ಸಾಮರ್ಥ್ಯವನ್ನು ಪ್ರೂವ್‌ ಮಾಡಿದ್ದಳು ಹಾಗೂ ಅನುಭವಕ್ಕಾಗಿ ನೀಟ್ ಪರೀಕ್ಷೆಗೆ ಹಾಜರಾಗಿದ್ದಳು. ಆದ್ದರಿಂದ, ನೀಟ್ ಪರೀಕ್ಷೆಯಲ್ಲಿ ಆಕೆಗೆ ಅಷ್ಟೇನೂ ಒಳ್ಳೆಯ ಮಾರ್ಕ್ಸ್‌ ಬಂದಿರಲಿಲ್ಲ. ಆದರೆ ಸುಪ್ರೀಂ ಕೋರ್ಟ್ ತೀರ್ಪು ಬಂದಾಗ, ಆಕೆಯ ಪ್ರಪಂಚವೇ ಕುಸಿದುಬಿದ್ದಂತಾಯಿತು. ಆಕೆ ಸಂಪೂರ್ಣ ಶ್ರಮವಹಿಸಿ ಸಿದ್ಧವಾಗಿದ್ದ ಪರೀಕ್ಷೆಯು ಲೆಕ್ಕಕ್ಕೇ ಇಲ್ಲದಂತಾಗಿತ್ತು."

ಆಕೆಯ ಸಾವು ತಮಿಳುನಾಡಿನಾದ್ಯಂತ ತೀವ್ರ ಪ್ರತಿಭಟನೆಗೆ ಕಾರಣವಾಯಿತು. ವಿದ್ಯಾರ್ಥಿಗಳು ಬೀದಿಗಿಳಿದು ದಿಢೀರ್ ಧರಣಿ ಹಾಗೂ ರಸ್ತೆ ತಡೆ ನಡೆಸಿದರು. ಕೆಲವರು ಉಪವಾಸ ಸತ್ಯಾಗ್ರಹವನ್ನೂ ಕೈಗೊಂಡರು. ಪ್ರತಿಭಟನಾಕಾರರು ಮೋದಿಯವರ ಪ್ರತಿಕೃತಿಗಳಿಗೆ ಬೆಂಕಿ ಕೊಟ್ಟರು. ನೂರಾರು ಜನರನ್ನು ಬಂಧಿಸಲಾಯಿತು. ಮಣಿರತ್ನಂಅವರು 2026 ರ ಜುಲೈ 20 ರಂದು ಜಂತರ್ ಮಂತರ್‌ನಲ್ಲಿ ನಿಂತಿರುವಾಗ, 2017 ರ ಸೆಪ್ಟೆಂಬರ್‌ನಲ್ಲಿ ನಡೆದ ಪ್ರತಿಭಟನೆಗಳು ಅವರ ಕಣ್ಣಮುಂದೆ ಬಂದು ಹೋಗುತ್ತಿವೆ.

"ತಮಿಳುನಾಡು ಒಂಬತ್ತು ವರ್ಷಗಳ ಹಿಂದೆ ಅನುಭವಿಸಿದ ನೋವನ್ನೇ ಇಂದು ಇಡೀ ದೇಶ ಅನುಭವಿಸುತ್ತಿದೆ ಎಂದು ನನಗೆ ಅನ್ನಿಸುತ್ತಿದೆ," ಎಂದು ಅವರು ಹೇಳುತ್ತಾರೆ. "ಆ ದೃಷ್ಟಿಯಲ್ಲಿ, ಈ ವಿಷಯವು ರಾಷ್ಟ್ರಮಟ್ಟದಲ್ಲಿ ಚರ್ಚೆಯಾಗುತ್ತಿರುವುದಕ್ಕೆ ನನಗೆ ಸಂತೋಷವಿದೆ. ಇದೊಂದು ಫ್ಯಾಸಿಸ್ಟ್ ಸರ್ಕಾರ, ಮತ್ತು ಇದು ತನ್ನ ವಿದ್ಯಾರ್ಥಿಗಳಿಗೆ ಸಮಾನ ಅವಕಾಶಗಳನ್ನು ಕೊಡಲು ತಯಾರಿಲ್ಲ."

ಸನಾ ಅವರು ತೀರಿಕೊಂಡು ಕೇವಲ ಒಂದು ತಿಂಗಳಷ್ಟೇ ಆಗಿದೆ. ಜಾಫರ್ ಕುವೈತ್‌ನಿಂದ ಹೈದರಾಬಾದ್‌ಗೆ ಹಿಂತಿರುಗಿದ್ದು, ತಮ್ಮ ತಾಯ್ನಾಡಿನಲ್ಲೇ ಉದ್ಯೋಗಾವಕಾಶಗಳನ್ನು ಹುಡುಕುತ್ತಿದ್ದಾರೆ.

"ನಾನೀಗ ನನ್ನ ಹೆಂಡತಿ ಮತ್ತು ಹೆಣ್ಣುಮಕ್ಕಳನ್ನು ಬಿಟ್ಟು ಹೋಗಲು ಸಾಧ್ಯವಿಲ್ಲ," ಎಂದು ಅವರು ಹೇಳುತ್ತಾರೆ. "ನಾವು ತುಂಬಾ ನೊಂದಿದ್ದೇವೆ ಮತ್ತು ಖಿನ್ನತೆಯಲ್ಲಿದ್ದೇವೆ. ನಾನು ಇಲ್ಲೇ ಏನಾದರೂ ಕೆಲಸ ಹುಡುಕಿಕೊಳ್ಳಬೇಕು. ಆದರೆ ನನಗೀಗ 50 ವರ್ಷಕ್ಕೂಹೆಚ್ಚು ವಯಸ್ಸಾಗಿದೆ. ಈ ವಯಸ್ಸಿನಲ್ಲಿ ಕೆಲಸ ಸಿಗುವುದು ಸುಲಭವಲ್ಲ."

ಅವರು ಹೈದರಾಬಾದ್‌ನಿಂದ ತಮ್ಮ ಗ್ರಾಮಕ್ಕೆ ಹಿಂತಿರುಗಿ ಹೋಗಿದ್ದಾರೆ. ಸನಾ ನಿಧನಳಾದ ನಂತರ ಅವರ ಕುಟುಂಬಕ್ಕೆ ಹೈದರಾಬಾದಿನಲ್ಲಿಯೇ ವಾಸಿಸುವುದನ್ನು ಮುಂದುವರಿಸಲು ಸಾಧ್ಯವಿರಲಿಲ್ಲ. ಆ ಜಾಗ ಅವರ ಕುಟುಂಬವನ್ನು ಕಾಡಲು ತೊಡಗಿತ್ತು. ಸನಾಳ ಡ್ರಾಯರ್ ಕ್ಲೀನ್‌ ಮಾಡುವಾಗ, ಸನಾಳ ಪುಸ್ತಕಗಳ ಪುಟಗಳನ್ನು ತಿರುವಿ ಹಾಕಿದ್ದಾಗಿ ಹಬೀಬುನ್ನೀಸಾ ಹೇಳುತ್ತಾರೆ. "ಅವಳು ಬಹಳ ಶ್ರದ್ಧೆಯಿಂದ ಓದುತ್ತಿದ್ದಳು," ಎಂದು ಹೇಳುವಾಗ ಅವರ ಧ್ವನಿ ನಡುಗುತ್ತಿತ್ತು. "ಆದರೆ ನಮ್ಮೊಂದಿಗಿರುವ ಇಬ್ಬರು ಹೆಣ್ಣುಮಕ್ಕಳಿಗಾಗಿ ನಾವು ಧೈರ್ಯ ತಳೆದು ಮುನ್ನಡೆಯಬೇಕಿದೆ."

ಇಬ್ಬರೂ ಹೆಣ್ಣುಮಕ್ಕಳು ಅದಾಗಲೇ ಡಾಕ್ಟರ್‌ ಆಗುವ ಆಸೆಯನ್ನು ವ್ಯಕ್ತಪಡಿಸಿದ್ದಾರೆ. ಆದರೆ ಇದಕ್ಕೆ ಒಪ್ಪಿಕೊಳ್ಳಲು ಆಗದೆ, ಬಿಟ್ಟು ಬಿಡಲೂ ಆಗದೆ ಅವರ ಮನಸ್ಸು ಹೊಯ್ದಾಡುತ್ತಿದೆ. "ನಾವು ಅವರ ಮೇಲೆ ಯಾವುದೇ ಒತ್ತಡ ಹೇರಲು ಇಷ್ಟ ಪಡುವುದಿಲ್ಲ" ಎಂದು ಜಾಫರ್ ಹೇಳುತ್ತಾರೆ. "ಅವರಿಗೆ ಏನು ಮಾಡಲು ಇಷ್ಟವೋ ಅದನ್ನೇ ಮಾಡಲು ಹೇಳಿದ್ದೇವೆ. ನಾವಿನ್ನೂ ಸನಾಳ ಅಗಲಿಕೆಯ ನೋವಿನಿಂದಹೊರಬರಲು ಯತ್ನಿಸುತ್ತಿದ್ದೇವೆ."

ಅನಿತಾ ನಿಧನಳಾಗಿ ಒಂದು ವರ್ಷದ ನಂತರ ತಮ್ಮ ಗ್ರಾಮದಲ್ಲಿ ಗ್ರಂಥಾಲಯವೊಂದನ್ನು ಪ್ರಾರಂಭಿಸಿದ ಮಣಿರತ್ನಂಅದಕ್ಕೆ ಅವಳ ಹೆಸರಿಟ್ಟರು. ತಮ್ಮ ತಂಗಿಯ ಅಗಲಿಕೆಯ ನೋವಿನಿಂದಹೊರಬರಲು ಅವರು ಏನಾದರೂ ಒಂದು ಮಾಡಬೇಕಿತ್ತು. "ಆಕೆಯ ನೆನಪನ್ನು ಗೌರವಿಸಲುನಾನು ಬಯಸಿದೆ,". ಆದ್ದರಿಂದ, "ನಾವು ಹಿಂದುಳಿದ ಸಮುದಾಯಗಳ ವಿದ್ಯಾರ್ಥಿಗಳಿಗಾಗಿ ಕಾರ್ಯಕ್ರಮಗಳನ್ನು ಮತ್ತು ಅಧ್ಯಯನ ಕೇಂದ್ರಗಳನ್ನು ನಡೆಸುತ್ತೇವೆ. ಅವರು ತಮ್ಮ ಪರೀಕ್ಷೆಗಳಿಗೆ ಸಿದ್ಧರಾಗಲು ನಾವು ನೆರವಾಗುತ್ತೇವೆ ಎಂದು ಹೇಳಿದರು.

ಹಣಕಾಸಿನ ಸಮಸ್ಯೆ ಎದುರಾಗುವವರೆಗೂ ಎಂಟು ವರ್ಷಗಳ ಕಾಲ ಆ ಗ್ರಂಥಾಲಯದ ಉಸ್ತುವಾರಿಯನ್ನು ಮಣಿರತ್ನಂ ನೋಡಿಕೊಂಡರು. ಒಂಬತ್ತು ತಿಂಗಳ ಹಿಂದೆ ಗ್ರಂಥಾಲಯದ ಉಸ್ತುವಾರಿಯನ್ನು ನಂಬಿಕಸ್ಥ ವ್ಯಕ್ತಿಯೊಬ್ಬರಿಗೆ ಒಪ್ಪಿಸಿದ ಅವರು ಸ್ಕಿಲ್‌ ಸೆಂಟರ್‌ ಒಂದರಲ್ಲಿ ಆಡಳಿತಾಧಿಕಾರಿಯಾಗಿ ಕೆಲಸ ಮಾಡಲು ಚೆನ್ನೈಗೆ ಹೋದರು.

ತಮಿಳುನಾಡು ರಾಜ್ಯವೂ ಆಕೆಯನ್ನು ಮರೆತಿಲ್ಲ. ಮಾರ್ಚ್ 2023 ರಲ್ಲಿ, ಆಕೆಯ ಗ್ರಾಮವಿರುವ ಅರಿಯಲೂರ್ಜಿಲ್ಲಾ ವೈದ್ಯಕೀಯಕಾಲೇಜು ತನ್ನ ಆಡಿಟೋರಿಯಂಗೆಅನಿತಾ ಅವರ ಹೆಸರನ್ನಿಟ್ಟಿತು. ಡಿಎಮ್‌ಕೆ ಪಕ್ಷದ ಅಧ್ಯಕ್ಷ ಎಂ. ಕೆ. ಸ್ಟಾಲಿನ್ ಆಗಸ್ಟ್ 2023 ರಲ್ಲಿ ಒಂದು ದಿನದ ಉಪವಾಸ ಸತ್ಯಾಗ್ರಹ ಮಾಡಿದಾಗ, 'ನೀಟ್ ಪರೀಕ್ಷೆಯನ್ನು ರದ್ದುಗೊಳಿಸುವುದೇ ಅನಿತಾಗೆ ಸಲ್ಲಿಸುವ ನಿಜವಾದ ಶ್ರದ್ಧಾಂಜಲಿ' ಎಂದು ಹೇಳಿದ್ದರು.

"ಆಕೆಯ ನೆನಪನ್ನು ಗೌರವಿಸಿರುವುದನ್ನು ಕಂಡು ನನ್ನ ಮನಸ್ಸು ತುಂಬಿ ಬರುತ್ತದೆ" ಎಂದು ಮಣಿರತ್ನಂ ಹೇಳುತ್ತಾರೆ. "ಇಂದು ವಿದ್ಯಾರ್ಥಿಗಳು ಹೋರಾಡುತ್ತಿರುವಂತೆಯೇ ಆಕೆಯೂ ಅನ್ಯಾಯದ ವ್ಯವಸ್ಥೆಯ ವಿರುದ್ಧ ಹೋರಾಡಿದ್ದಳು. ನಾವೂ ಅವರನ್ನು ಸಹ ಮರೆಯುವುದಿಲ್ಲ."

ನೀವು ಆತ್ಮಹತ್ಯೆಯ ಆಲೋಚನೆಗಳಿಂದ ಬಳಲುತ್ತಿದ್ದರೆ ಅಥವಾ ಮಾನಸಿಕವಾಗಿ ಯಾತನೆಯನ್ನು ಅನುಭವಿಸುತ್ತಿದ್ದರೆ ದಯವಿಟ್ಟು ಕಿರಣ್‌ರವರಿಗೆ ಕಾಲ್‌ ಮಾಡಿ. ರಾಷ್ಟ್ರೀಯ ಸಹಾಯವಾಣಿ ಸಂಖ್ಯೆ 1800-599-0019 (24/7 ಟೋಲ್ ಫ್ರೀ)ಗೆ ಸಂಪರ್ಕಿಸಿ, ಅಥವಾ ನಿಮ್ಮ ಸಮೀಪದ ಸಹಾಯವಾಣಿಗೆ ಕರೆ ಮಾಡಿ.