‘लइका मन के विरोध मोर जइसने महतारी बर आय’

सना शेख़ के एक ठन सपना रहिस. 19 बछर के सना एक ठन अस्पताल खोले चाहत रहिस अऊ ओकर नांव अपन ददा, जाफ़र हुसैन के नांव मं राखे ला चाहत रहिस.

50 बछर के हुसैन, आंध्र प्रदेश के अपन गाँव प्रोडतूर ले करीबन 12 बछर पहिली काम के सिलसिला मं कुवैत चले गे रहिस, काबर के ओकर कारोबार ला भारी घाटा होय रहिस.

अपन बेटी मन ला बढ़िया पढ़ाय-लिखाय बर, ओकर 40 बछर के घरवाली हबीब-उन-निसा शेख़ अपन तीनों बेटी मन ला धरके हैदराबाद चले गिस. वो ह अपन दाई के घरेच तीर मं एक ठन बिल्डिंग मं रहे लगिस.

हबीब-उन-निसा कहिथे, “सना अपन ददा के भारी दुलौरिन रहिस. वो दूनों हरेक बहिनिया एक दूसर ले गोठियावत रहंय. ओला पता रहिस के ओकर ददा ह येकर बर कतको तियाग करे हवय. घाटा होय के बाद ओला दूरिहा जाय ला परिस, ते पायके वो ह अपन कामयाबी ला ओला देय ला चाहत रहिस.”

3 मई, 2026 के दिन जब सना एग्ज़ाम हॉल ले बहिर निकरिस, त वो ह सबले पहिली कुवैत मं अपन ददा ला फ़ोन करिस. हुसैन ह बताइस, “वो ह भारी उछाह ले मोला बताय रहिस के ओकर पेपर ह भारी बढ़िया बने हवय. मंय वोला कहेंय के वो ह अपन दाई संग खुसी मनाय धन कोनो होटल मं जाके खाना खाए.”

एक झिन अऊ किसोर उमर के नोनी, एस. अनीता के घलो इही सपना रहिस. 17 बछर के अनीता तमिलनाडु के कुझुमुर गाँव के एक झिन दलित परिवार के रहिस. जब वो ह सात बछर के रहिस, बीमारी सेती ओकर दाई ह गुजर गे रहिस. ओकर ददा ह सब्ज़ी मंडी मं रोजी मजूरी करत रहिस. अनिता डॉक्टर बनना चाहत रहिस.

ओकर 36 बछर के भाई मणि रत्नम कहिथे, “वो ह बड़े होके हमर जइसने ज़रूरतमंद परिवार के इलाज करे ला चाहत रहिस. वो ह सुरु ले होनहार लइका रहिस.”

वो ह अपन स्टेट बोर्ड परीक्षा मं 98 फीसदी अंक हासिल करे रहिस. अपन पसंद के कॉलेज मं भर्ती होय अऊ अपन सपना ला पूरा करे बर ये ह बनेच जियादा होना रहिस.

दूनों नोनी मन वंचित परिवार मन ले रहिस. दूनों ला अपन काबिलियत उपर भरोसा रहिस के ओ मन समाज के बिघन ला पार करके खुशहाल जिनगी गढ़ सकथें. फेर ओकर मन के आस मं बिघन आ गे. ये दूनों घटना मं नो बछर के अंतर रहिस, फेर एक बात दूनों मं समान रहिस: नेशनल एलिजिबिलिटी कम एंट्रेंस टेस्ट (नीट). देस (भारत) के राष्ट्रीय मेडिकल प्रवेश परीक्षा ह दूनों के संग अलग-अलग तरह ले अनियाव करिस.

अनीता के मऊत साल 2017 मं होय रहिस. वो ह नीट ले जुड़े आत्महत्या के पहिला मामला रहिस. सना ह बीते महीना अपन जान दे दिस. ऑनलाइन न्यूज़ पोर्टल न्यूज़लॉन्ड्री के मुताबिक. ये दसक मं मीडिया रिपोर्ट मन मं अलग-अलग परीक्षा मं पेपर लीक के 89 मामला आगू मं आइस, जेकर ले नीट परीक्षा देवेइय्या समेत कम से कम 6.5 करोड़ लइका मन के उपर असर परिस.

20 जुलाई, 2026 के दिन जब दिल्ली के जंतर-मंतर मं देस के नवा पीढ़ी के लइका मन के भीतर जमा गुस्सा फूट परिस, त अनीता अऊ सना के परिवार घलो ओकर मन के संग सामिल हो गिन. वो मन विरोध करत लइका मन के संग होय ला दिखाय बर अपन-अपन राज ले देस के रजधानी मं आइन. पढ़व: ‘मंय संसद ला ये चेताय आय हंव के हमन घलो हवन’

कॉकरोच जनता पार्टी – जेन ह पहिली एक ठन मीम पेज रहिस अऊ बाद मं नवा पीढ़ी के आंदोलन बन गिस. वो ह ऑल इंडिया स्टूडेंट्स एसोसिएशन' (एआईएसए) अऊ ऑल इंडिया स्टूडेंट्स फेडरेशन (एआईएसएफ) जइसने छात्र संगठन मन के संग मिलके 20 जुलाई, 2026 के दिन संसद तक शांतिपूर्ण रैली निकारे के अपील करिन.

वो मन शिक्षा मंत्री धर्मेंद्र प्रधान के इस्तीफा के मांग करत रहिन. येकर पहिली 25 दिन तक ले, लद्दाख के पर्यावरण कार्यकर्ता सोनम वांगचुक अऊ छात्र कार्यकर्ता नेहा बोरा, मनीष कुमार अऊ आमीन अमितोज जंतर-मंतर मं इहीच मांग मन ला लेके भूख हड़ताल मं रहिन. ओकर मन के मांग रहिस के शैक्षणिक परीक्षा अऊ सरकारी भर्ती मन मं जवाबदेही अऊ पारदर्शिता तय करे जाय.

जंतर-मंतर के सड़क मन मं हजारों-हजार लोगन मन, जेन मं अधिकतर नवा पीढ़ी के लइका मन रहिन, पुलिस अऊ सुरक्षा बल मन के भारी संख्या मं मौजूदगी के बीच उमड़ परिन. अकास ह सरकार-विरोधी नारा मन ले गूंज उठिस अऊ पूरा इलाका विरोध के एक तिहार मं बदल गे.

एकर जुवाब मं केंद्र सरकार ह इंटरनेट सेवा मन ला बंद कर दिन, पुलिस अऊ अर्धसैनिक बल मन के अऊ जियादा टुकड़ी मन ला उंहे तैनात कर दिस.

जइसने-जइसने दिन चढ़त गिस, नारा के जगा आँसू गैस के आवाज अऊ शांतिपूर्ण प्रदर्सन करेइय्या मन के उपर लाठीचार्ज के चीख पुकार ह ले लिस. कतको के मुड़ी फूटगे रहिस अऊ लहू बोहावत रहय. नोनी मन के कपड़ा फाड़ दे गे रहिस. इहाँ तक के कम उमर के लइका मन ला घलो छोड़े नइ गिस. कम से कम तीन झिन उपर पैलेटगन चले गिस; कश्मीर मं इही पैलेट गन ले कतको लोगन मन के आंखी खराब होय के घटना आगू मं आ चुके हवय.

ये अतियाचारी कार्रवाई के बाद घलो, लइका मन जंतर-मंतर लहूट आइन अऊ अऊ घलो जादा जोस के संग अपन विरोध-प्रदर्सन के जगा ला फिर ले कब्ज़ा कर लिन.

हबीब-उन-निसा ह अपन आंखी के आगू जेन अतियाचार ला देखिस, ओकर ले भारी डर गे रहिस, फेर प्रदर्सन करेइय्या मन के साहस ले ओला घलो प्रेरना मिलिस. गुजरे सना शेख के दाई ह पारी ला बताइस, “ मंय एक झिन आम महतारी अंव अऊ मोर लइका मन मोर संसार. मंय घर-गृहस्थी वाले माइलोगन के जिनगी गुजारे हवंव, फेर राज करेइय्या मन मोर संसार ला उजार दिन. ओकरे मन के सेती मोर बेटी के जान चले गिस. तुंहर काम हमर रच्छा करना आय, हमर जिनगी उजारे नइ.”

3 मई, 2026 के दिन सना के परीक्षा बनेच बढ़िया होय के बाद, केंद्र सरकार ह घोसना करिस के नीट के पेपर फूट गे रहिस अऊ लइका मन ला फिर ले परीक्षा देय ला परही. वो ह भारी टूट गे. ओकर जोरदार तियारी के ओकर उपर फिकिच ले बनेच असर परे रहिस. नीट भारी कठिन परीक्षा आय, जेकर ले मेडिकल कालेज मन के 1,30, 000 ले घलो कम सीट बर 20 लाख ले जियादा उम्मीदवार होथें. कतको बछर के तियारी करे के बाद, सना ला लगे रहिस के दुवाब खतम गे हवय. फेर अब ओला फिर ले उहिच मुस्किल बखत ले जूझे ला रहिस.

दुख के बात ये आय के दुबारा परीक्षा देय के बोझा, ओला अपन जान देय ले घलो कठिन लगिस. 21 जून के दिन होवेइय्या दुबारा परीक्षा के एक दिन पहिली, अपन कमरा मं फांसी लगाय के पहिली ओ ह बस कागज मं अतकेच लिखिस – “मोला माफ़ कर दिहू.”

वो ह तउन 20 झिन ले जियादा लइका मन ले एक आय जेन मन एकरे सेती आत्महत्या करिन.

जाफ़र कहिथे, “वो बिहनिया ओ ह मोर कोनो फोन के जुवाब नइ दिस.” भगवान करे रइतिस के मोर गोठ- बात हो जाय रइतिस त आज ओ ह हमर संग रइतिस.”

दुखियारिन महतारी हबीब-उन-निसा कहिथे, “मंय अतक दूरिहा सिरिफ येकरे सेती आय हवंव के ये बताय सकंव के मंय कइसने बखत ले गुजरत हवंव.” ओला ये घलो बिस्वास नइ होवत रहय के ओकर सबले बड़े बेटी अब ये दुनिया छोड़ चुके हवय. वो ह कहिथे, “हो सकथे के हमन पांच बछर मं मर जावन धन डोकरा सियान के जिनगी गुजारन, फेर हमन ला ये पीरा जिनगी भर अपन संग लेके चले ला परही.रतिहा मं मोर बने करके नींद नइ परय: आधा रात मं मोर हाथ-गोड़ कांपे लागथे.”

ओकर बाद घलो, दाई-ददा अपन 15 अऊ 11 बछर के दूनों बेटी ला छोड़ के दिल्ली चले आइन. “मंय ओकर मन के बारे मं सोचत रहिथों अऊ हलाकान रहिथों. मंय इहाँ राज करेइय्या लोगन मन ला ये बताय ला आय हवंव के ओ मन गलत हवंय. काय सत्ता ह तुमन ला अंधरा कर दे हवय? लइका मन मोर जइसने महतारी मन बर विरोध करत हवंय. ओ मन हमर दुख ला समझथें. मोर दुख मं सामिल लोगन मन ला पुलिस के हाथ ले मार खावत देखे भारी पीरा भरे रहिस. गर तुमन हमर दुख-पीरा ला समझे नइ सकव, त तुंहर ताकत के काय फायदा? बच्चों पे इतना जुल्म मत करिये (बिनती हवय लइका मन के उपर अतक जुलुम झन करव).”

मणि रत्नम बर ये ह डेजा वू (पहिली घलो होय) जइसने अनुभव आय.

नीट के बिचार सेबल पहिली साल 2010 मं आय रहिस अऊ प्रधानमंत्री नरेंद्र मोदी के अगुवई वाले केंद्र सरकार के मानना रहिस के साल 2016 मं नीट लागू करे ले मेडिकल शिक्षा व्यवस्था मं सुधार होही. फेर ये कहे गलत नइ ये के दस बछर बाद घलो कोनो सुधार नइ होय हवय.

तमिलनाडु तउन सुरु के राज मन ले के रहिस जेन ह नीट लागू करे के विरोध करे रहिस अऊ साल 2016 मं ओला एक बछर के छुट घलो मिले रहिस – वो बखत मुख्यमंत्री जे. जयललिता रहिस. राज सरकार के कहना रहिस के ओकर अपन शिक्षा बेवस्था भारी मजबूत हवय अऊ मेडिकल एडमिशन बर कोनो उपराहा केन्द्रीय परीक्षा के जरूरत नइ ये. साल 2021 मं ये बात तब सही साबित होईस जब जस्टिस ए.के. राजन कमेटी ने नीट उपर अपन रिपोर्ट जारी करिस.

रिपोर्ट मं मिलिस के नीट असल मं वंचित लइका मन बर मेडिकल कॉलेज मन मं एडमिशन पाय अऊ मुस्किल बना देथे.

साल 2010 मं, तमिलनाडु के अलग-अलग मेडिकल कॉलेज मन मं एडमिसन लेवेइय्या लइका मन ले 80 फीसदी ले जियादा लइका इंग्लिश मीडियम स्कूल ले रहिन. साल 2017 ये संख्या बढ़के 98.41 फीसदी होगे. उहिंचे, तमिल मीडियम के लइका मन के संख्या करीबन 20 फीसदी ले घटके 2 फीसदी ले घलो कम होगे.

जेन लइका ला येकर अंताज रहिस, वो अनीता रहिस – मणि रत्नम कि बहिनी अऊ कुडुमुर गाँव के एक झिन दलित नोनी.

अगस्त 2017 मं, वो ह बीते बछर मिले छूट ला आगू बढ़ाय के मांग करत देस के सुप्रीम कोर्ट करा गिस. सुप्रीम कोर्ट ह येकर ले इनकार कर दिस. 1 सितंबर 20 17 मं, जब घर मं कोनो नइ रहिन, वो बखत वो ह आत्महत्या कर लिस. वो ह 17 बछर के रहिस.

मणि रत्नम कहिथे, “वोला पूरा भरोसा रहिस के तमिलनाडु बर छूट चलत रइही. ओ ह स्टेट बोर्ड के परीक्षा मं खुद ला साबित करे रहिस अऊ नीट के परीक्षा सिरिफ अनुभव बर दे रहिस. ते पायके, नीट परीक्षा मं ओकर नंबर जादा बने नइ रहिस. फेर जब सुप्रीम कोर्ट के फइसला आइस, त ओकर दुनियाच उजर गे. जेन परीक्षा बर वो ह अतक मिहनत ले तियारी करे रहिस, ओकर कोनो गिनती नइ रहिस.”

ओकर मऊत के बाद तमिलनाडु भर मं भारी विरोध-प्रदर्सन होइस. लइका मन सड़क मं उतर आइन अऊ अचानक प्रदर्सन अऊ रद्दा जाम करे लगिन. ओ मन ले कुछु मन भूख हड़ताल घलो करिन. प्रदर्सन करेइय्या मन मोदी के पुतला जलाइन. सैकड़ों लोगन मन ला गिरफ़्तार करे गिस. जब 20 जुलाई, 2026 के दिन मणिरत्नम जंतर-मंतर मं ठाड़े रहिस, त वोला सितंबर 2017 के विरोध-प्रदर्सन मन के सुरता आ गे.

वो ह कहिथे, “मोला लागथे के जमू देस उहिच मसूस करत हवय जेन ला तमिलनाडु ह नौ बछर पहिली मसूस करे रहिस. ये लिहाज ले, मोला खुशी हवय के ये मुद्दा राष्ट्रीय स्तर तक ले हबरगे हवय. ये ह फासीवादी सरकार आय अऊ ये ह अपन लइका मन ला समान मऊका नइ दे चाहत हवय.”

सना ला गुजरे महीना भर ले जियादा होगे हवय. जाफ़र कुवैत ले हैदराबाद लहूट आय हवय अऊ इहींचे काम-धंधा खोजत हवय.

वो ह कहिथे, “मंय अब अपन घरवाली अऊ बेटी मन ला छोड़के नइ जाय सकंव. हमन बनेच कमजोर अऊ हतास हवन. मोला इहींचे कुछु न कुछु खोजे ला परही. फेर मंय अब 50 बछर ले जादा के हो चुके हवंव अऊ ये उमर मं काम मिले आसान नइ ये.”

वो मन हैदराबाद छोड़के अपन गाँव लहूट आय हवंय. सना के गुजर जाय के बाद परिवार बर उहाँ रहे संभव नइ रहिस. वो जगा ह ओ मन ला सताय लगिस. हबीब-उन-निसा बताथे के सना के पढ़े के दराज ला साफ करे बखत ओ मं ओकर किताब मन मिलीन. रोंवासी आवाज मं वो ह कहिथे, “वो ह कतक लगन ले पढ़ई करे रहिस. फेर हमर संग जेन दू झिन बेटी हवं, ओकर मन बर हिम्मत जुटाय ला परही.”

दूनों बेटी मन डॉक्टर बने ला चाहत हवंय. फेर परिवार के भावना साफ हवय. जाफर कहिथे, “हमन ओकर मन के उपर थोकन घलो दुवाब डारे ला नइ चाहन. हमन ओ मन ला कहे हवन के ओ मन उहिच करें जेन ह ओ मन ला सही लगे. हमन अभू घलो सना ला खोय के दुख ले उबरे के कोसिस करत हवन.”

अनीत के गुजरे के बछर भर बाद, मणि रत्नम ह ओकर गाँव मं एक ठन लाइब्रेरी सुरू करिस अऊ ओला अनीता के नांव मं रखिस. वोला पण बहिनी के गुजरे के दुख ले उबरे के जरूरत रहिस. वो ह कहिथे, “मंय ओकर सुरता ला सम्मान देय ला चाहत रहेंय. हमन पिछड़ा समाज के लइका मन बर कार्यक्रम अऊ स्टडी सेंटर चलाथन. हमन ओकर मन के परीक्षा के तियारी मं मदद करथन.”

वो ह आठ बछर तक ले लाइब्रेरी संभालिस, फेर पइसा के दिक्कत ले जूझे ला परिस. नौ महीना पहिली, वो ह येला अपन भरोसा के एक झिन ला दे दिस अऊ चेन्नई मं नउकरी कर लिस, जिहां वो ह एक ठन स्किल सेंटर मं संचालक हवय.

तमिलनाडु राज घलो ओला बिसोरे नइ ये. मार्च 2023 मं, अरियालुर जिला मेडिकल कॉलेज – जेन जिला मं ओकर गाँव आथे – ह अपन ऑडिटोरियम के नांव अनीता के नांव मं राखिस. अगस्त 2023 मं, डीएमके पार्टी के अध्यक्ष एम.के. स्टालिन ह कहिस के नीट ला खतम करे ह अनीता ला असल श्रद्धांजलि होहि; संग मं, ओकर पार्टी ह एक दिन के भूख हड़ताल घलो करिस.

मणि रत्नम कहिथे, “ओला सुरता करत सम्मान ला देखे के मोर जी जुड़ा जाथे. वो ह एक ठन अनियाव भरे बेवस्था के खिलाफ लड़ई लड़िस, ठऊका वइसनेच जइसने आज लइका मन लड़त हवंय. हमन ओ मन ला घलो नइ भुलावन.”

गर तुंहर मन मं आत्महत्या के विचार आवत हवंय धन कोनो दिक्कत मं हव, त बिनती हवय के नेशनल हेल्पलाइन किरण ला 1800-599-0019 (24/7 टोल-फ्री) मं कॉल करव, धन अपन तीर-तखार के कोनो घलो हेल्पलाइन मं संपर्क करव.