अरुणाचल के माटी मं मोनयुल गीत

…मोनयुल चोले ग्याल लो
मोनयुल चोले ग्याल लो

(…अमर रहय मोनपा माटी
अमर रहय मोनयुल)

ये ह स्कूल के प्रार्थना सभा के आखिरी गाना आय, जेन ह मोर मन मं कतको सवाल उपजा जाथे. सिरिफ येकरे सेती नइ के ये ह अनजान आय धन येकर सेती नइ के ये ह एक ठन अइसने भाखा आय जेन ला मंय जानंव, फेर येकर बर घला के ये वो भाखा ले घलो बनेच अलग लागथे, जेन ला मंय ये हिमालय के घाटी मं इहाँ के लोगन मन ला बोलत सुने हवं. मंय बीते कुछु बखत ले बुड़ती कमेंग जिला के चुग गाँव मं मोन्पा जिनगी के दस्तावेजीकरन करत हवं.

जुलाई महिना के आखिरी बृहस्पत के बिहनिया हवय. मंय वो जगा मं हवं जेन ला कतको लोगन मन अरुणाचल प्रदेश के सबले सुग्घर गाँव मानथें. नवांग सेरिंग के फटफटी के पाछू बइठके- वो ह एक ठन सरकारी स्कूल के गुरूजी आंय- मंय चुग ले करीबन 2 कोस दूरिहा रामा कैंप मं पीएम श्री गवर्मेंट सेकेंडरी स्कूल हबर गे हवं. तीर-तखार के कतको लइका मन हरेक बिहनिया रेंगत स्कूल जाथें.

बिहनिया के 9 बजे हवय अऊ मंय स्टेज ले कार्यक्रम ला चलावत कुछेक लइका मन के ठीक पाछू, भिथि के जतका लकठा होय सकय ओतक जाय के कोसिस करत हवं. मोर आगू हरियर डोंगरी हवय, अकास मं नीला अऊ उज्जर बादर हवय, जेन ह लइका मन के ड्रेस ले मेल खावत हवय. अऊ 260 लइका मन बढ़िया कतार मं ठाढ़े हवंय.

वो मन मंजुश्री (धन बोधिसत्व, सबले बड़े ग्यान अऊ ग्यान के चिन्हारी) के नांव लेके प्रार्थना सुरु करथें, ओकर बाद संस्कृत के एक ठन श्लोक. ओकर बाद राष्ट्रगान अऊ आखिर मं मोन्पा (वो मन के मूल भाखा मं मोनयुल) गीत घाटी मं गूँज जाथे. मोर रोंवा रोंवा ठाढ़ हो जाथे येकर लय ले. ये आखिरी गीत खास करके मोला अपन डहर खींच के ले गीस.

बाद मं, एकेच नांव के दो झिन संगवारी लइका, तेंज़िन ड्रेमा, जेन मं एक झिन तीसरी क्लास मं अऊ दूसर चौथी क्लास मं पढ़थे, मोर बर वो मन उहिच गीत गाथें. गाँव के मलिआमा बस्ती के सब्बो मोन्पा लइका मन ये गीत ला जानथें, चाहे वो मन घाटी के तीनों स्कूल मेर ले कोनो मं घलो जावत होंय. भोटी लिपि मं लिखाय दिरांग मोन्पाभाखा के ये गीत वो मन के सांस्कृतिक विरासत ले जुड़े एक ठन महत्तम जुड़ाव माने जाथे.

तिब्बती साहित्य मं मोन के मतलब तिब्बती पठार के बनिस्बत कम ऊँच वाले भूंइय्या आऊ अऊ पा के मतलब आय लोगन मन. येकरे सेती, मोन्पा के शाब्दिक मतलब आय हिमालय के ढलान मं तिब्बत के रक्सहूँ दिग मं रहेइय्या लोगन मन. अक्सर वो मन ला वो मन के रहे के जगा मन ले, जीविका ले अऊ बोले जवेइय्या भाखा के अधार ले उपसमूह बनाके बांटे जाथे. वइसे, सब्बो मोन्पा महायान बौद्ध धरम ला मानथें. ये धरम के इतिहास 8 वीं सदी ईस्वी तक जाथे जब ये ह तिब्बत के रद्दा ले आय रहिस. इहाँ मोन्पा होय ला बौद्ध पहिचान के रूप मं समझे जाथे.

साल 2011 मं अरुणाचल प्रदेश सरकार ह बुड़ती कामेंग समेत चार ठन बौद्ध बहुल जिला सब्बो स्कूल मन मं भोटी लिपि के पढ़ई जरूरी कर दे रहिस. “अब जब नवा पीढ़ी के कतको लोगन मन उच्च शिक्षा अऊ नउकरी बर कस्बा अऊ शहर डहर जावत हवंय, य हमन चाहत हवन के वो मन हमर भाखा अऊ संस्कृति के महत्तम ला समझंय,” नवांग कहिथे.

साल 2011 के जनगणना के आंकड़ा मन के मुताबिक, करीबन 13,703 लोगन मन मोन्पा भाखा परिवार के कोनो न कोनो रूप ला बोलथें, जेन मं 12,398 अकेल्ला अरुणाचल मं हवंय. दिरांग मोन्पा एक ठन खस भाषाई उपसमूह आय, जेन ला सरकार ह, नंदावत जावत भाखा मन के संरक्षन अऊ संरक्षन योजना मं सामिल करे गे हवय अऊ बुड़ती कामेंग के दिरांग उपजिला मं येकर सिरिफ 896 बोलेइय्या हवंय.

स्कूल मं हिंदी के टीचर ताशी सेरिंग कहिथे, “मोन्पा भाखा तिब्बती-बर्मी परिवार ले जुरे हवय, ये मं भोटी लिपि बउरे जाथे अऊ येकर कतको बोली हवय. अब हमर बर 8 वीं क्लास तक ले पढ़ाय जरूरी हवय.”

स्कूल मं हरेक दिन प्रार्थना सभा होथे, अऊ हरेक दिन लइका मन एकेच धार मं चारों गाना गाथें. अइसने करके दूनों तेनज़िनड्रेमा येला कंठस्थ कर ले हवंय. “ये एक ठन अइसने गीत आय जेन ला हमन स्कूल मं सीखे हवन. ये ह एक ठन मोनपा गीत आय. ये ह पारंपरिक गीत आय. मंय बस अतकेच जानथों. येकर मतलब हमन नइ जानन,” वो ह हांसत कहिथे.

ये मोन्पा (जेन ला मोनयुल घलो कहे जाथे) गीत अरुणाचल प्रदेश के बूड़ती कामेंग के चुग गांव मं गाये गे हवय. रिपोर्टर नवांग सेरिंग, (दिरांग) अऊ गेंदे सांगे (तवांग) ला गीत के टीका करे मं मदद करे सेती आभार जतावत हवन.

पारी के नंदावत जावत भाखा परियोजना (ईएलपी), अजीम प्रेमजी यूनिवर्सिटी ले मिले मदद के हिस्सा आय. येकर मकसद भारत के खतरा मं परे भाखा मन ला, ओकर बोलेइय्या मन के बात ला अऊ अनुभव के दस्तावेजीकरन करे आय.

अनुवाद: निर्मल कुमार साहू