अरुणाचल के मोनयुल गीत

मोनपा धरती के जय होखो...
मोनयुल के जय होखो

स्कूल के प्रार्थना सभा में सबले आखिर में गावल जाए वाला गीत सुन के हम चकरा गइनी. एह ला ना कि ई हमरा खातिर बाइली भाषा में रहे, बलुक एहु ला कि ई उहो भाषा से भिन्न लागत रहे जेकरा हम हिमालय के एह घाटी के बाशिंदा लोग से अबले सुनले रहीं. इहंवा हम वेस्ट कमेंग जिला के चुग गांव में मोनपा लोग के जिनगी लगे से देखे-बुझे आइल बानी.

जुलाई के अंतिम बीफे (गुरुवार) के दिन, भोरे-भोरे के बात बा. पहाड़ी सब के बीच में, अरुणाचल के सबले सुन्नदर गांव में से एगो में हम आइल बानी. इहंवा के सरकारी स्कूल के एगो मास्टर, नवांग सेरिंग संगे उनकर फटफटिया (मोटरसाइकिल) में पाछू बइठ के हम रामा कैंप के पीएम श्री गवर्नमेंट सेकेंडरी स्कूल पहुंचनी. ई स्कूल चुग गांव से कोई 6 किमी दूर पड़ेला. इहंवा रोज भोर में लगे के गांव सब से लइका लोग पैदल चलके आवेला.

भोर के नौ बाजल बा, असेंबली होखहीं वाला बा. हम मंच पर कार्यक्रम के संचालन कर रहल छात्र लोग के लाइन के ठीक पाछू, देवाल से सट के ठाड़ हो जात बानी. सोझे हरियर चद्दर ओढले पहाड़, बुल्लू आसमान आ ओह पर साफ आ उज्जर बादल सब तइरत लउक रहल बा- सब बच्चा लोग के स्कूल ड्रेस से मेल खा रहल बा.

बच्चा लोग सबले पहिले मंजुश्री (परम ज्ञान आ प्रकाश के प्रतीक, बोधिसत्व) के नाम जपलक. तब संस्कृत में एगो श्लोक गावल गइल. एकरा बाद उहंवा राष्ट्रगान आ आखिर में मोनपा (चाहे मोनयुल, जइसन कि ऊ लोग आपन भाषा में बोलेला) गीत गूंजे लागल. एक तरह के क्रम में गावल ई गीत सब हमरा बहुते रोचक लागल, खास करके आखिरी वाला.

बाद में हमरा हमनाम दू ठो दोस्त लोग मिलल. नाम रहे तेन्जिन ड्रेमा. एगो तीसरा में रहस, त दोसरका चउथा कक्षा में. दुनो दोस्त लोग हमरा उहे गीत सुनइलक. गांव के मालियामा टोला से आवे वाला मोनपा लरिका लोग के, चाहे ऊ लोग घाटी के कवनो तीन स्कूल में पढ़त होखे, ई गीत कंठस्थ बा. भोटी लिपि में लिखल, दिरांग मोनपा के ई गीत लरिकन के ओह लोग के सांस्कृतिक बिरासत से जोड़ेला.

तिब्बती साहित्य में ‘मोन’ के मतलब बा तिब्बती पठार से नीचे बसल इलाका. आ ‘पा’ के मतलब बा, लोग. त मोनपा के मतलब भइल, तिब्बत के दक्खिन दिसा में हिमालय के ढलान पर रहे वाला लोग. इहंवा रहे वाला लोग आपन बोली, भौगोलिक स्थान आ जीविकोपार्जन के तरीका के हिसाब से अलग-अलग समूह में बंटल बा. बाकिर सभे मोनपा लोग महायान बौद्ध धरम के पालन करेला. ई धरम आठमा शताब्दी में तिब्बत से होके इहंवा पहुंचल. एहिजा मोनपा के पहिचान जादे करके बौद्ध धरम से जोड़ के देखल जाला.

सन् 2011 में अरुणाचल प्रदेस सरकार भोटी लिपि के पढ़ाई अनिवार्य कर देलक, खास करके ओह चार जिला में जहंवा बौद्ध जनसंख्या जादे रहे. एह में वेस्ट कमेंगो शामिल बा. नवांग कहेलन, “अब त नयका लइका-लइकी लोग पढ़े आ कमाई करे खातिर सहर भागता. हमनी चाहतानी कि ऊ लोग आपन भाषा आ संस्कार के मोल बूझे.”

सन् 2022 के जनगणना के हिसाब से, मोनपा बोले वाला कोई 13,703 बोलनिहार लोग बचल बा. एह में से 12,398 त अरुणाचले में बा. दिरांग मोनपा, जे मोनपा के एगो खास उपभाषा बा, अब संकट में बा. प्रदेस सरकार एकरा बचावे खातिर एकरा ‘लुप्तभाषा संरक्षण योजना’ में रखले बा. वेस्ट कमेंग के दिरांग इलाका में अब ई बोली बोले वाला मात्र 896 लोग बचल बा.

स्कूल में हिंदी पढ़ावे वाला ताशी सेरिंग बतावत बाड़न, “मोनपा, टिबेटो-बर्मन भाषा परिवार के हिस्सा बा. ई भोटी लिपि में लिखल जाला आ एकरा रंग-बिरंग के बोली में बोलल जाला. अब एह लिपि के स्कूल में आठमा तक पढ़ावल जरूरी कर देवल गइल बा.”

स्कूल में प्रार्थना सभा रोज होखेला, आउर लरिका लोग रोज उहे चार ठो गीत, उहे क्रम में गावेला. एहि से दुनो तेन्जिन ड्रेमा के ई रटा गइल बा. “ई गीत हमनी स्कूले में सिखनी. ई मोनपा हवे, हमनी के परंपरा से जुड़ल गीत. हमनी बस एतने जानतानी. बाकिर गीत के का मतलब बा, हमनी ना बुझीं,” ऊ ठिठियात कहली.

मोनपा (जेकरा मोनयुल भी पुकारल जाला) गीत वेस्ट कमेंग जिला के चुग गांव में बोलल जाए वाला भाषा के रूप में पहिचानल गइल बा. रिपोर्टर नवांग सेरिंग (दिरांग) आ गेंदे सांगे (तवांग) के एह गीत के बुझे में मदद करे खातिर आभार प्रकट करे के चाहत बाड़ी.

पारी के लुप्तप्राय भाषा परियोजना (ईएलपी), अजीम प्रेमजी यूनिवर्सिटी के सहजोग से चले वाला एगो खास पहल बा. एकर मकसद भारत के संकटग्रसत भाषा के, ओकरा बोले वाला आम अवाम आ ओकर जिनगी के अनुभव के सहारे दस्तावेजीकरण कइल बा.

अनुवादक: स्वर्ण कांता