سینگ کی کنگھیوں کا مرکز، سنبھل کا سرائے ترین

ہڈیوں اور سینگوں کی مصنوعات جیسے بٹن، بیئر کے گلاس، گھر کی آرائش کی چیزیں اور باورچی خانہ کے ساز و سامان کے لیے مشہور سنبھل قصبہ کے سرائے ترین محلہ میں محمد اسلام کی ایک چھوٹی سی کرایے کی دکان ہے۔ اس دکان پر گاہکوں کے آنے جانے کا مستقل سلسلہ جاری رہتا ہے۔ یہاں قندی کی تلاش میں بچے اور روازانہ کی راشن کی تلاش میں بالغ موجود رہتے ہیں۔ اس کے علاوہ کچھ بزرگ مرد [بھینس کی] سینگ کی عمدہ کنگھیاں خریدنےکے لیے آتے ہیں۔ اسلام کی دکان کے سائن بورڈ کو ہاتھ سے پینٹ کیا گیا ہے، جس پر ’سینگ کی کنگھی‘ لکھا ہوا ہے۔

اسلام کی عمر ۶۰ سال ہے اور وہ سرائے ترین کے آخری چند دستکاروں میں سے ایک ہیں، جو اب بھی سینگ کی کنگھیاں بنانے میں مہارت رکھتے ہیں۔ ان کے دیرینہ ساتھی، مقصود خان، جن کی عمر ۷۰ کی دہائی کے اواخر میں پہنچ چکی ہے، ان اشیاء کے باقی ماندہ سپلائرز میں سے ایک ہیں۔

’’دنیا سے رخصت ہو چکے اس دستکاری سے وابستہ کاریگر اپنے ساتھ اس فن کو بھی لے گئے۔ اب اس کی بازیافت نہیں ہو سکتی،‘‘ حقہ کا کش لیتے ہوئے اسلام کہتے ہیں۔ ’’آپ پورے سرائے ترین میں کہیں بھی سینگ کی کنگھی بنانے والے کسی کاریگر کو تلاش کریں گے تو ہر شخص آپ کو میری طرف ہی بھیجے گا۔‘‘

سال ۲۰۲۲ میں اس ہنر کو ایک جغرافیائی نشان کا (جی آئی) ٹیگ دیا گیا تھا۔ یہ ٹیگ املاک دانش کے تحفظ کی ایک شکل ہے، جو مصنوعات کو ان کے اصل مقام کی بنیاد پر تفریق کرنے میں مدد کرتی ہے۔ سنبھل سے منسلک سینگ اور ہڈیوں کی دستکاری کو اترپردیش حکومت کی ’ایک ضلع ایک پروڈکٹ‘ اسکیم کے تحت دستکاری کے زمرے میں فروغ دیا جاتا ہے۔

’’جس کے سر پر بال، اس کی کنگھی،‘‘ اسلام مزاحیہ لہجے میں کہتے ہیں۔ ’’ایک وقت تھا جب ہر گلی، ہر کوچے اور ہر چوراہے پر کنگھیاں دستیاب تھیں ۔‘‘

وہ اپنی دکان اور ورکشاپ کے لیے ۲۰۰۰ روپے ماہانہ کرایہ ادا کرتے ہیں، جہاں ان کا کردار بطور دکاندار اور کاریگر مسلسل بدلتا رہتا ہے۔ ان کے سامنے اس دستکاری سے متعلق اوزار بکھرے پڑے ہیں، جن میں کئی قسم کی آریاں، ریت (چھینی)، چھلی (کھرچنی)، ریگمال کے صفحے، اور ایک اڈا (ایک لکڑی کا تختہ) جسے کنگھیوں کو پکڑنے کے لیے استعمال کیا جاتا ہے، شامل ہیں۔

وہ کہتے ہیں کہ اب اوزار تلاش کرنا مشکل ہوگیا ہے۔ ’’جس طرح اب کاریگر ملنا محال ہے، اسی طرح اوزار بنانے والا بھی کوئی نہیں ہے۔ میں ہمیشہ کسی نہ کسی طرح کا جوگاڑ کرتا رہتا ہوں۔ مثال کے طور پر آری کو ہی لے لیجئے- اس میں خاص قسم کے دانت ہیں جو آپ کو اب نہیں مل سکتے۔ میں نے اسے خاص طور پر علی گڑھ سے بنوایا تھا،‘‘ اسلام کہتے ہیں۔

کنگھیاں بنانے کے لیے اسلام قریب کے کارخانوں سے ۱۵ روپے فی پلیٹ کے حساب سے کھوکھلی سینگوں کو دبا کر چپٹی کی گئیں پلیٹیں خریدتے ہیں۔ ایک تیار کنگھی تقریباً ۲۰ روپے میں فروخت ہوتی ہے، جس سے وہ ۵ روپے کا منافع حاصل کرتے ہیں۔ ایک کنگھی بنانے میں انہیں دو گھنٹے لگتے ہیں۔

’’ایک کنگھی ۷۵ ہاتھوں سے نکل کر بنتی تھی [یعنی۷۵ کاریگر کام کرتے تھے]،‘‘ اسلام کہتے ہیں۔ ’’اب میں یہ سارے کام خود ہی کرتا ہوں، میں انہیں ہر مہینے سینکڑوں کی تعداد میں بناتا ہوں اور اگر اللہ کی مرضی ہوتی ہے تو کوئی تقسیم کار انہیں خریدنے آ جاتا ہے۔‘‘ جس دن ہم ان سے ملے تھے اس دن مقصود خان نے ۶۰۰ روپے میں ۳۰ کنگھیاں خریدی تھیں۔

سینگ کے پلیٹ کو اسلام اڈا پر چڑھا کر اس کی سطح کو کھرچنے کے لیے چھلی کا استعمال کرتے ہیں۔ ’’اسے چھلی کا کام کہتے ہیں،‘‘ اسلام وضاحت کرتے ہیں۔ ’’یہ شاید اس عمل کا سب سے زیادہ محنت طلب حصہ ہے۔ پرانے وقتوں میں، کاریگر اکثر کام کے اس حصہ سے گریز کرتے تھے، کیونکہ اس میں گھنٹوں بیٹھنا پڑتا تھا۔‘‘

سینگ کے پلیٹ کو مناسب موٹائی تک کھرچنے کے بعد کنگھی کے دانت کاٹنے کے لیے مختلف قسم کی آریاں استعمال کی جاتی ہیں۔ ’’اس فن کا راز اس بات کو یقینی بنانے میں مضمر ہے کہ ہر دو دانت یکساں فاصلہ پر ہوں۔ کنگھی کے دانتوں کی کوئی مقررہ تعداد نہیں ہوتی۔ ہر دانت کا سائز کنگھی کے مجموعی سائز پر بھی منحصر کرتا ہے،‘‘ اسلام کہتے ہیں۔ ’’صرف ایک دستکار ہی دانت بنا سکتا ہے۔ مشینیں اس طرح کے تفصیلی کام نہیں کر سکتیں۔‘‘

سینگ کے تین انچ کے پلیٹ پر کام کرتے ہوئے، اسلام دونوں طرف ۴۲ دانت تراشتے ہیں۔ بڑی پلیٹوں پر زیادہ دانت بنتے ہیں۔ دو دانتوں کے درمیان ایک ملی میٹر سے بھی کم کا فاصلہ ہوتا ہے۔ کچھ مینی ئیچر (مختصر) کنگھیاں آدھی انگلی کے برابر ہوتی ہیں۔

دانت تراشنے کے بعد کنگھیوں کو ریگ مال سے گھسا جاتا ہے، اور ایک بہتر شکل دینے کے لیے اسے دوبارہ تراشا جاتا ہے۔ حتمی شکل ملنے کے بعد دوسری مرتبہ اس پر پالش کیا جاتا ہے، جس سے مخصوص چمک حاصل ہوتی ہے۔ خصوصی فرمائش پر کنگھی کو پھولوں اور نقطوں سے مزین کیا جاتا ہے۔

’’یہ کنگھیاں صرف بھینس کے سینگوں سے بنائی جا سکتی ہیں۔ بیلوں کے سینگ پیاز کے چھلکوں کی طرح تہہ دار ہوتے ہیں، جن پر آری چلانا ناممکن ہے۔ ہڈیاں بہت سخت ہوتی ہیں۔ صرف بھینس کے سینگوں میں کنگھی بنانے کے لیے صحیح کثافت موجود ہوتی ہے،‘‘ اسلام کہتے ہیں۔

ان کی دکان پر شیشے کی الماری میں کئی طرح کی کنگھیاں رکھی ہوئی ہیں۔ وہاں سرداروں کی کنگھی ہے، جن کا استعمال پگڑیاں باندھنے میں ہوتا ہے۔ ملاؤں والی کنگھی ہے، جو داڑھی سنوارنے کے کام آتی ہے۔ اور ہلکے بھورے رنگ کی بھورا کنگھی ہے۔

سینگ کی ایک خاص قسم کی کنگھی تیل والی کنگھی ہوتی ہے، جو اب بازار سے غائب ہو چکی ہے۔ اس کنگھی کے دانت کھوکھلے ہوتے ہیں جو سر پر تیل چھوڑتے ہیں۔ اسلام کہتے ہیں، ’’وہ کاریگر جو ایسی کنگھیاں بنانا جانتے تھے سب ختم ہو گئے۔‘‘

اسلام نے کنگھی بنانے کا ہنر ۱۰ سال کی عمر میں اپنے والد سے سیکھا تھا۔ وہ کہتے ہیں، ’’یہ ہمارا داد الہٰی کام ہے [یہ ہمارا آبائی کام ہے]۔ سینگ کی کنگھی کے ہر کاریگر کا تعلق سرائے ترین سے ہے۔ انہوں نے کہیں اور کام کیا ہوگا، لیکن ان کی جڑیں اسی زمین میں ہیں،‘‘ وہ کہتے ہیں۔ اسلام کو اس ہنر کو سیکھنے میں ۱۵ سال لگے تھے۔

ان کے بچے اب کام کر رہے ہیں۔ ایک بیٹا مراد آباد میں لکڑی کا کاریگر ہے، دوسرا درزی کا کام کرتا ہے۔ دو بیٹیاں گھر سے درزی کا کام کرتی ہیں اور دو ابھی زیر تعلیم ہیں، جبکہ سب سے بڑی دو بیٹیاں شادی شدہ ہیں۔ پھر بھی وہ کام نہیں روک سکتے۔ وہ کہتے ہیں، ’’دستکار بیکار نہیں بیٹھ سکتا۔ میں کام سے لطف اندوز ہوتا ہوں۔ یقینی طور پر یہ محنت طلب کام ہے، لیکن میرے جسم میں درد نہیں ہوتا۔ جسم کام مانگتا ہے۔‘‘

جب اسلام کنگھی نہیں بنا رہے ہوتے ہیں تو وہ لکڑی کے کھلونے بناتے ہیں، مثلاً لکڑی کے چھوٹے پلنگ یا نٹ (توازن کرنے والے گڈے)۔ ’’میں نے یہ چیزیں اس وقت بنانا شروع کیں جب میں۱۲ سال پہلے ایک حادثہ کے بعد صاحب فراش تھا۔ میں بیٹھ کر آرام نہیں کرسکتا تھا، اس لیے میں نے توازن کرنے والایہ گڈا بنایا، جسے میں نے ۵۰ روپے میں فروخت کیا،‘‘ وہ کہتے ہیں۔

ان کے اس ہنر نے ان کے بچوں کی پرورش میں مدد کی، لیکن کنبے نے مالی نمو تب دیکھی جب ان کے بچوں نے کام کرنا شروع کیا۔

’’میری تمام بیٹیاں قرآن پڑھ سکتی ہیں،‘‘ اسلام فخریہ لہجے میں کہتے ہیں، ’’لیکن میرے بیٹے نہیں پڑھ سکتے۔ ایک بار جب میرے بچوں نے کام کرنا شروع کیا، تو انہوں نے میری سب سے چھوٹی دو بیٹیوں کو کالج بھیج دیا۔ کنبے کے ہر فرد نے اس میں اپنا حصہ ادا کیا، اب دونوں لڑکیاں کام کرنا چاہتی ہیں۔ شاید وہ ہوم ٹیوٹر بن جائیں۔‘‘ کنبے کا کوئی دوسرا فرد کالج نہیں گیا۔

چالیس سال پہلے اسلام دن میں ۱۲ سے ۱۵ گھنٹے کام کرکے ۱۱ سے ۱۲ روپے کماتے تھے۔ ’’بس پیٹ بھر جاتا تھا، کچھ بچتا نہیں تھا،‘‘ وہ کہتے ہیں۔

دستکار کبھی کبھی پورے دن کے کام کے بعد صبح ۲ بجے اٹھ کر دوبارہ کنگھی بنانا شروع کر دیتے تھے۔ ’’بہت عجیب و غریب وقت تھا وہ۔ سات کاریگروں پر مشتمل ایک کارخانہ سے ۷۰۰ تک کنگھیاں نکلتی تھیں، اور ایسے بہت سے کارخانے تھے۔‘‘

مقصود خان، جو پچھلے ۶۰ سالوں سے بطور سپلائر کام کر رہے ہیں، بول پڑتے ہیں، ’’اس کام سے ہمیں الفت ہے۔‘‘

دہائیوں قبل لوگوں کا خیال تھا کہ سینگ کی کنگھی کے طبی فوائد بھی ہیں۔ ’’یہ خیال کیا جاتا تھا کہ دوسری کنگھیوں کے مقابلے میں یہ جوئیں اور لیکھیں بہتر ڈھنگ سے نکالتی ہیں۔ اس کے استعمال سے خشکی میں بھی کمی آتی ہے۔ یہ وہ زمانہ تھا جب منڈیاں سوداگروں سے بھری ہوئی تھیں، جو پورے ملک میں ایک کے بعد ایک کریٹ بھیجتے تھے،‘‘ خان کہتے ہیں۔ ’’اب سوداگر بھی ختم، اور خریدار بھی۔‘‘

یہ کنگھیاں خواتین کے درمیان خاصی مقبول تھیں، جو انہیں گاؤں کے میلوں میں تلاش کرتی تھیں۔ خان کہتے ہیں، ’’آج بھی بڑی عمر کی خواتین ان کنگھیوں کو تلاش کرتی ہیں، لیکن چھوٹی عمر کی خواتین انہیں خریدنے سے گریزاں ہیں۔‘‘

خان اور اسلام، جنہوں نے ۴۰ سالوں سے کاروباری تعلقات کو پروان چڑھایا ہے، باری باری سے مشترکہ حقے کا کش لگا رہے ہیں۔ ’’اس زمانے میں ہر کارخانے میں ایک حقہ ہوتا تھا۔ یہ ایک بہانہ تھا آرام کرنے کا،‘‘ خان یاد کرتے ہیں۔ ‘‘بزرگ افراد حقے کے گرد بیٹھ جاتے اور چھوٹوں کو کام کرتے دیکھتے رہتے۔‘‘

دوسرے پیشے اختیار کر لینے والے کنگھی ساز اب بھی حقہ کے چند کش لینے اور ہنسی مذاق کرنے اسلام کے پاس آتے رہتے ہیں۔

سینگ کی کنگھی کا سب سے بڑا بازار کانپور تھا، اس کے بعد آگرہ کا نمبر آتا تھا۔ آج کے سرائے ترین کی ہڈیوں اور سینگوں کی دستکاریاں، جو زیادہ تر یورپ، امریکہ اور خلیجی ممالک میں برآمد کی جاتی ہیں، کے برعکس سینگوں کی کنگھیوں کی مانگ پوری طرح سے گھریلو تھی۔

’’آج لوگ سینگ سے بھندیاتے [نظر بچاتے] ہیں۔ نئی نسل سوچتی ہے کہ یہ گندا ہے،‘‘ خان کہتے ہیں۔ وہ مانگ میں کمی کی وجہ اس تاثر کے ساتھ ساتھ پلاسٹک کی کنگھیوں کے بڑھتے ہوئے استعمال کو بھی قرار دیتے ہیں۔

اسلام کا کہنا ہے کہ سینگ کی کنگھی خریدنے والے زیادہ تر گاہک ہندو تھے، جو اسے مذہبی رسومات میں بھی استعمال کرتے تھے۔ ’’پہلے یہ بتاتے تھے لوگ کہ ندی میں گئے، سر میں یہ کنگھی لگائی، اور گنگا میا کو چڑھا دی۔ امیر ترین خاندان اسے سینکڑوں کی تعداد میں خریدتے تھے۔‘‘

وہ تسلیم کرتے ہیں کہ آج ہندو سینگوں کی کنگھی سے دامن بچاتے ہیں، لیکن کوئی وجہ نہیں بتاتے۔ ’’وہی بہتر جانتے ہیں کہ وہ اب اس سے کیوں گریز کرتے ہیں،‘‘ وہ کہتے ہیں۔

مانگ میں کمی کی دوسری وجہ گاؤوں اور قصبوں کے میلوں کا ختم ہونا ہے۔ ’’ہم یہ کنگھیاں اتنی بڑی تعداد میں فروخت کرتے تھے کہ میلوں سے واپسی کے بعد کاریگر اپنے بچوں کی شادیاں کر لیتے تھے۔ میلے سے ہمیں آٹھ نو دنوں میں تقریباً ۱۰ ہزار روپے کا منافع حاصل ہو جاتا تھا۔ اجمیر، کلیر، بدایوں اور دیگر شہروں میں عرس کے میلے لگتے تھے۔ علی گڑھ جیسے شہروں میں نمائشیں لگتی تھیں۔ نیزا کے لیے مقامی دیہاتی میلے [ایک صوفی جنگجو کی یاد میں سنبھل اور آس پاس کے گاؤں میں لگنے والے میلے]، محرم اور عید کے میلے لگتے تھے اور منہدی کی رات ہوتی تھی،‘‘ اسلام یاد کرتے ہیں۔ ’’شاید اب وہ دن چلے گئے، اب شاید ہی میلے لگتے ہوں۔‘‘

چار سال پہلے نوئیڈا کے ایک تجارتی میلہ میں اسلام کو مدعو کیا گیا تھا۔ ’’یہ ایسی چیز تھی جس میں، میں نے پہلے کبھی شرکت نہیں کی تھی۔ یہ میلہ ودیشی (غیرملکی) لوگوں کے لیے تھا۔ میں نے اپنی زندگی میں پہلی بار غیرملکیوں کو اتنے قریب سے دیکھا،‘‘ اسلام کہتے ہیں۔

افتتاح کے دوران وزیر اعلی یوگی آدتیہ ناتھ نے ان کے اسٹال کا دورہ کیا تھا۔ ’’ایک ہجوم میرے ارد گرد جمع ہو گیا تھا۔ ان کی تفریح کے لیے، میں نے ایک کرتب دکھایا۔ میں نے اپنی ایک ٹانگ اپنے سر کے پیچھے باندھ کر سینگ کی پلیٹ پر آری کھینچنا شروع کر دیا۔ سب نے تالیاں بجائیں،‘‘ اسلام کہتے ہیں۔ اس دن کو یاد کر کے وہ اب بھی خوش ہوتے ہیں۔ ’’میں نے اپنی زندگی میں پہلی بار فیشن شو بھی دیکھا۔‘‘

اگرچہ سینگ کی روایتی کنگھی سرائے ترین سے تقریباً معدوم ہو چکی ہے، لیکن ہڈیوں اور سینگوں کی دستکاری ایک ترقی پذیر صنعت ہے۔ یہاں کی زیادہ تر مصنوعات برآمد کی جاتی ہیں۔ یہ خطہ سپلائرز اور برآمد کاروں کے بینروں سے بھرا ہوا ہے۔ وہیں کارخانوں کے اندر کاریگروں اور مزدوروں کی نسلیں ہڈیوں اور سینگوں کی دستکاری کے مختلف مراحل پر کام کرتی ہیں۔ یہاں مزدوروں کی اکثریت مسلمانوں کی ہے۔

خان افسوس کا اظہار کرتے ہوئے کہتے ہیں، ’’نوجوان نسل دستکاری کے کاموں میں مصروف ہے، لیکن انہیں اس کا کوئی علم نہیں ہے کہ یہ سب سینگ کی کنگھی سازی سے شروع ہوا تھا۔‘‘

مہدی حسن(۳) ایک مقامی تقسیم کار ہیں جن کے آباء و اجداد سینگ کی کنگھی کے کاریگر کے طور پر کام کرتے تھے۔ ’’میرے والد اور دادا سینگ کی کنگھی کا کام کرتے تھے۔‘‘ وہ یاد کرتے ہیں۔ ’’میں اس وقت بچہ تھا، لیکن مجھے یاد ہے کہ وہ اپنے ہاتھوں سے سینگوں کو کاٹتے، مولڈ کرتے، شکل دیتے اور پالش کرتے، جو اب مشینوں سے کیا جاتا ہے۔‘‘

حسن نے بطور کاریگر شروعات کی اور اپنے والد محمود حسن کو دیکھ کر یہ ہنر سیکھا۔ ’’ہم انجینئر یا ڈاکٹر بن سکتے تھے، لیکن اس وقت ہماری خستہ مالی حالت کی وجہ سے تعلیم کو ترجیح نہیں دی گئی۔ اس لیے ہم نے اپنے کاروبار کو بڑھانے پر توجہ دی،‘‘ وہ بتاتے ہیں۔

حسن کے دفتر میں سینگوں کی مصنوعات کے ایک وسیع سلسلے کی نمائش کی گئی ہے، جن میں بیئر گلاسیں، فوٹو فریم، کپ، پھلوں کی ٹوکریاں، گوٹیاں، چشموں کے فریم اور گھر کی سجاوٹ کے ساز و سامان شامل ہیں۔ ’’انگریز ہر چیز نیچرلی (قدرتی) استعمال کرنا چاہتے ہیں،‘‘ حسن رائے زنی کرتے ہیں۔ ’’اسی وجہ سے ہماری زیادہ تر اشیاء یورپ، خلیجی ممالک اور امریکہ کو برآمد کی جاتی ہیں۔ سنبھل کو کوئی نہیں جانتا، لیکن سرائے ترین میں ہم جو کام کرتے ہیں اس کی وجہ سے دنیا اسے پہچانتی ہے،‘‘ وہ فخریہ لہجے میں کہتے ہیں۔

ملک کے اندر مانگ نہ ہونے کے برابر ہے۔ حسن کا کہنا ہے کہ سینگ کی کنگھی کی پیداوار اس وقت مکمل طور پر ختم ہو گئی جب کاریگر اور سپلائرز بین الاقوامی مانگ کو پورا کرنے کے لیے متحرک ہو گئے اور مقامی لوگ مہنگی مصنوعات خریدنے سے گریز کرنے لگے۔ ’’نیز، ہندو خریدار ان مصنوعات کو خریدنے میں تامل کرتے ہیں کیونکہ یہ سینگوں سے بنی ہوتی ہیں۔‘‘ اس صنعت میں ہندوؤں کی تعداد ۲۰ فیصد سے بھی کم ہے، جو حسن کے مطابق یا تو پیکیجنگ کا کام کرتے ہیں یا سپلائرز اور برآمد کار کے طور پر۔

حسن کے کارخانہ میں ایک ایک ہاتھ تک کے سینگ رکھے ہوئے ہیں۔ ’’جس طرح ہندوستان میں مختلف زبانیں بولی جاتی ہیں، اسی طرح مختلف سینگیں بھی ہوتی ہیں،‘‘ حسن رائے دیتے ہیں۔ ’’بہترین سینگیں گجرات، خاص طور پر احمد آباد کے آس پاس کی بھینسوں سے آتی ہیں، کیونکہ وہ بڑی ہوتی ہیں اور ان پر آسانی سے کام کیا جا سکتا ہے۔‘‘

کارخانہ کی ہوا میں آری سے نکلے ہوئے سنیگوں کے برادے رچے بسے ہیں۔ حسن کہتے ہیں، ’’ہمیں تھوڑی دیر بعد اس کی عادت ہو جاتی ہے۔‘‘ سینگ کی باقیات کو جمع کرکے پیک کیا جاتا ہے اور بازار میں فروخت کر دیا جاتا ہے، جسے کھاد کے طور پر یا دیگر مقاصد کے لیے استعمال کیا جاتا ہے۔

حسن خام مال کے حصول سے متعلق خدشات کو دور کرنے میں عجلت ظاہر کرتے ہوئے کہتے ہیں کہ یہاں دستکاری کے لیے جانوروں کو ذبح نہیں کیا جاتا۔ اس کے بجائے ہڈیوں اور سینگوں، جنہیں بصورت دیگر فضلہ کے طور پر ضائع کر دیا جاتا، کو خرید کر مفید شے میں تبدیل کر دیا جاتا ہے۔

خام مال، جسے مقامی طور پر گیلا سامان کہا جاتا ہے، کو سرائے ترین منتقل کرنے سے قبل مذبح خانوں میں خشک ہونے کے لیے چھوڑ دیا جاتا ہے۔

خشک ہونے کے بعد خام مال کو ٹکڑوں میں کاٹ دیا جاتا ہے، اس کے بعد انہیں نرم اور چپٹا کرنے کے لیے جلتے ہوئے کوئلے پر سینکائی کی جاتی ہے۔ ’’شدید گرمی کی وجہ سے سینکائی کنگھی سازی کے عمل کا سب سے زیادہ محنت طلب حصہ ہے،‘‘ حسن بتاتے ہیں۔

چپٹا کرنے کے بعد، دھات کے سانچوں کا استعمال کرتے ہوئے سینگ کو مختلف ہئیتوں اور شکلوں میں دبایا جاتا ہے۔ دبائے ہوئے ٹکڑوں کو پھر مشینوں کے ذریعے صاف اور پالش کیا جاتا ہے۔

ممتاز خان ۱۵ سال سے بطور کاریگر کام کر رہے ہیں۔ انہوں نے حال ہی میں اپنی فرم شروع کی ہے اور اب وہ کاریگر اور تقسیم کار دونوں حیثیتوں میں کام کرتے ہیں۔ وہ ہڈیوں کے بٹن کا کام کرتے ہیں۔ ’’ہم جو کچھ بناتے ہیں اس کے لحاظ سے سینگ اور ہڈی میں زیادہ فرق نہیں ہے،‘‘ وہ کہتے ہیں۔ ’’لیکن سینگ کی مصنوعات کو زیادہ مواد کی ضرورت ہوتی ہے اور اس میں زیادہ وقت صرف ہوتا ہے۔‘‘

کچھ مصنوعات ڈیزائن میں بہتری اور استحکام کو بڑھانے کے لیے سینگ اور ہڈیوں کو ملا کر بنائی جاتی ہیں۔ ’’مثال کے طور پر فوٹو فریم سینگ سے بنایا جاتا ہے، جبکہ اس پر جڑے جانے والے آرائشی بوٹے ہڈیوں سے تیار کیے جاتے ہیں،‘‘ ممتاز وضاحت کرتے ہیں۔ کچھ مصنوعات میں کیمیکل کا کام اور پلاسٹک کی تفصیلات بھی شامل ہوتی ہیں۔

ممتاز بڑی مقدار میں ہڈیوں کا مواد حاصل کرتے ہیں، عام طور پر کوئنٹل کے حساب سے۔ ایک کلو گرام کچے سینگ کی قیمت تقریباً ۷۰ روپے ہوتی ہے۔ لیکن صرف ایک کلو بٹن بنانے میں تقریباً چار کلو خام مواد کی ضرورت ہوتی ہے۔ یہ بٹن تقریباً ۴۴۰ روپے فی کلوگرام کے حساب سے فروخت ہوتے ہیں۔ بالفاظ دیگر، ایک کوئنٹل (۱۰۰ کلوگرام) سینگ سے تقریباً ۳۰ کلوگرام بٹن حاصل ہوتے ہیں۔

عموماً ہڈیوں سے تیار کیے جانے والے بٹن سرائے ترین کی دستخطی مصنوعات میں سے ایک ہیں۔ ’’یہ بٹن عموماً مہنگے سوٹ پر لگتے ہیں،‘‘ ممتاز کہتے ہیں۔ بٹن سازی کا عمل مشین کے ذریعے ہڈیوں کے ٹکڑوں کو کاٹنے سے شروع ہوتا ہے۔ پھر اس کی پالش ہوتی ہے۔ اس کے بعد اسے ٹکلی کے کام سے گزارتے ہیں، جہاں بٹن کو اصل شکل دی جاتی ہے اور اسے کندہ کاری یا حتمی پالش کے لیے تیار کیا جاتا ہے۔

تجربے اور معیار کی بنیاد پر کوئی کاریگر یومیہ ۴۰۰ سے ۸۰۰ روپے کما لیتا ہے۔ ’’ٹکلی کے کام میں کوئی نوآموز ۵۰۰ روپے کمائے گا، تو کسی زیادہ تجربہ کار کاریگر کو اسی کام کے لیے روزانہ ۸۰۰ روپے ملیں گے۔ یہ اجرت کام کے معیار پر بھی منحصر ہے،‘‘ ممتاز کہتے ہیں۔

ایک فرم کے مالک ہونے اور مزدور کے طور پر کام نہ کرنے کے اپنے فیصلہ پر غور کرتے ہوئے، وہ کہتے ہیں۔ ’’پیسے کو پیسہ کماتا ہے۔ میری آمدنی تقریباً وہی ہے جو بطور مزدور تھی۔ فرق یہ ہے کہ اب میں زیادہ تناؤ محسوس کرتا ہوں،‘‘ وہ کہتے ہیں۔

کویت میں ہوٹل میں کام کرکے واپس لوٹنے والے ممتاز اپنا خالی وقت خبریں دیکھنے میں گزارتے ہیں۔ ’’ہڈیوں اور سینگوں کی دستکاری کے تقریباً ۵۰ فیصد کاروبار بند ہو چکے ہیں،‘‘ وہ کہتے ہیں۔ ’’اس کی وجوہات میں روس اور یوکرین کے درمیان جنگ، اسرائیل-غزہ تنازع، اور امریکہ کی طرف سے عائد کردہ نئے محصولات شامل ہیں۔‘‘

نئی نسل برآمد کار یا تقسیم کار بننے کی خواہش مند ہے۔ مثال کے طور پر مقصود خان کے فرزند دستکاری کی مصنوعات فروخت کرنے کے لیے سوشل میڈیا کا استعمال کرتے ہیں۔

اسلام اور مقصود خان کو فکر ہے کہ کنگھی بنانے کا ہنر مستقبل قریب میں کسی دن محض یاد بن کر نہ رہ جائے۔ ’’میں اپنے بچوں اور سرائے ترین کے نوجوانوں کو یہ ہنر سکھانا چاہتا ہوں، لیکن اس کا کوئی فائدہ نہیں ہے۔ پہلے یہ کام یہاں کے لوگوں کا سہارا تھا،‘‘ اسلام کہتے ہیں۔ ’’اگر یہ اب بھی منافع بخش ہوتا تو کوئی بھی اسے نہیں چھوڑتا۔‘‘

اس اسٹوری کو مرنالنی مکھرجی فاؤنڈیشن (ایم ایم ایف) کی فیلوشپ کا تعاون حاصل ہے۔

ترجمہ نگار: شفیق عالم