सींग के ककई: सराय तरीन के नोहर पुरखौती

संभल शहर के एक ठन मोहल्ला, सराय तरीन मं, जेन ह हड्डी अऊ सींग ले बने सामान जइसने बटन, बीयर के गिलास, घर के सजावटी सामान अऊ रसोई के बर्तनों बर मशहूर हवय, मोहम्मद इस्लाम के नानकन भाड़ा वाले दुकान मं लेवाल मन के लाइन लगे रहिथे. लइका मन पिपरमेंट अऊ सियान मन रोज के रासन बिसोथें. संगे संग, कुछेक डोकरा सियान मन बढ़िया ककई – सींग की कंगी (भंइसा के सींग ले बने ककई) बिसोय ला आय हवंय, जइसने के इस्लाम ह दुकान के बोर्ड मं हाथ मं लिखे हवय.

60 बछर के इस्लाम, सराय तरीन के तउन आखिरी कारीगर मन ले एक आय जेन ह सींग ले ककई बनाय मं अभू घलो माहिर हवय. ओकर जुन्ना संगवारी, 70 बछर के मकसूद खान, ये सामान बनाके देवेइय्या लोगन मन ले एक आय.

इस्लाम हहुक्का के दम लगावत कहिथे, “ये कला के जेन कारीगर मन गुजर गे हें, वो मन के संग ये कला घलो चले गे –येला फिर ले आगू ले जाय संभव नो हे. तुमन सराय तारीन मं कहूँ घलो चले जावव, गर तुमन सींग के ककई के कारीगर ला खोजत हव, त हर कोनो तुमन ला मोर तीर ले आही.”

साल 2022 मं ये कला ला भौगोलिक संकेत (जीआई) टैग मिलिस, जेन ह बौद्धिक संपदा संरक्षन के एक ठन रूप आय जेन ह सामान मन ला ओकर मूल जगा के आधार ले अलग पहिचान दिलाथे. उत्तर प्रदेश सरकार के एक ठन ज़िला, एक ठन उत्पाद योजना मं घलो सींग अऊ हड्डी के हस्तशिल्प ला संभल बर खास बताके प्रचारित करथे.

“जिसके सिर पर बाल, उसकी कंगी [जेकर मुड़ मं चुंदी, ओकर ककई]” इस्लाम मजाक के बोली मं ये हाना ला कहिथे. “एक जमाना रहिस जब ककई हर जगा मिलत रहिस – हर गली अऊ चऊक मं.”

वो अपन दुकान जेन ह ओकर साल आय (काम करे के जगा घलो आय) वोला 2,000 रूपिया महिना भाड़ा मं लेगे हवय, अऊ दुकानदारी के संग कारीगरी घलो करत चले आवत हवय. ओकर आगू ओकर हुनर के अऊजार बगरे परे हवंय: कतको किसिम के आरी,रैत (छेनी), छिल्ली (खुरचनी), रेगमाल (रेतमल) कागज, अऊ ककई राखे के एक ठन अड्डा (लकरी के तख्ता).

अब तो अऊजार घलो मिले मुस्किल होगे हे, वो ह कहिथे. “जइसने कारीगर बांचे नइ यें, तइसनेच अऊजार बनेइय्या घलो कोनो नइ यें. मंय हर बखत कोनो न कोनो जुगाड़ करत रहिथों. जइसने, आरी ला ले लो – ये मं एक ठन खास किसिम के दांत होथे जेन ह अब नइ मिलय. ये ला मंय खास करके अलीगढ़ मं बनवाय रहंय,” इस्लाम कहिथे.

ककई बनाय बर, इस्लाम तीर के कतको कारखानास (कारखाना) ले 15 रूपिया ककई नग के रेट ले सींग के चपटा टुकड़ा बिसोथे – पोंडा सींग ला वजन ले दबाके चपटा कर देय जाथे. एक ठन तियार कंघी 20 रूपिया मं बिकाथे, वोला ककई पाछू 5 रूपिया के नफा होथे. एक ठन ककई बनाय मं वोला दू घंटा लागथे.

“एक कंघी 75 हाथों से निकालकर बनती थी [एक ठन ककई 75 झिन के हाथ ले होके बनत रहिस],” इस्लाम कहिथे. “अब मंय ये सब्बो खुदेच करथों. मंय हर महिना सैकड़ों ककई बनाथों अऊ गर अल्लाह ह चाहिस त कोनो न कोनो सप्लायर येला बिसोय ला जरुर आही.” जउन दिन हमन उहाँ जाय रहेन, मकसूद खान ह 600 रूपिया मं 30 ठन ककई बिसोय रहिस.

इस्लाम अड्डा ऊपर एक ठन सींग के टुकड़ा राखथे अऊ छिल्ली ले उपर परत ला खुरचथे. इस्लाम बताथे, “येला छिलाई के काम कहिथें. ये ह ये काम के सबले मिहनत वाले काम आय. पहिली के जमाना मं, कारीगर अक्सर ये बूता करे ला नइ चाहत रहिन काबर के ये मं घंटों बइठे रहे ला परत रहिस.”

सींग के टुकड़ा ला माफिक खुरचे के बाद, वो ह ककई के दांत काटे बर कतको किसिम के आरी काम मं लाथे. इस्लाम कहिथे, “हुनर ये बात मं हवय के हरेक दाँत समान दूरिहा मं रहय. ककई मं दाँत तय नइ रहय. हरेक दांत के आकार ककई के आकार उपर रहिथे. सिरिफ दस्तकार ह दाँत बनाय सकथे. मशीन अतक सफई के काम करे नइ सकय.”

तीन इंच के सींग के टुकड़ा ला लेके बूता करत, इस्लाम दूनों डहर दू कोरी दू (42) ठन दांत बनाथे. बड़े टुकड़ा के मतलब जियादा दांत, जेन ह एक मिलीमीटर ले घलो कम दूरिहा मं होही. ओकर कुछु ककई छोटे-छोटे होथे- आधा उंगरी जतक ऊँच.

दाँत बनाय के बाद, ककई ला रेतमल मारे जाथे, ओकर बाद वोला अऊ बढ़िया बनाय बर खुरचे जाथे. बने के बाद वोला दूसर बेर पालिश करके चमकाय जाथे. ग्राहेक के कहे ले, ककई मं फूल अऊ चिन्हा पारे जाथे.

“ये ककई सिरिफ भंइसाच के सींग ले बनथे. बइला के सींग गोंदली कस परत वाले होथे – आरी ले चीरे नइ जाय सकय. हड्डी मन भारी कड़ा होथें. सिरिफ भंइसाच के सिंग ककई बनाय के काम के होथे,” इस्लाम कहिथे.

ओकर दुकान मं कांच के एक ठन शोकेस मं आनी-बानी के ककई रखाय हवंय. सरदारों की कंगी, जेन ह पगड़ी बाँधे बर काम मं आथे; मुल्लाओं-वाली कंगी, जेन ह दाढ़ी कोरे बर होथे; अऊ भूरुवा कंघी, जेन ह फीका भुरुवा रंग के ककई होथे.

बजार ले एक ठन खास किसिम के सींग वाले ककई नंदा गे हे, जेन ला तेल वाली कंगी कहिथें, जेकर पोंडा दांत, मुड़ मं तेल डारे बर होवत रहिस. इस्लाम कहिथे, “जेन कारीगर येला बनाय जानत रहिन, वो सब्बो मन गुजर चुके हवंय.”

इस्लाम ह 10 बछर के उमर मं अपन ददा ले ककई बनाय के हुनर सीखे रहिस. वो ह कहिथे, “ये हमारा दादीलाही काम है [ये हमर पुरखौती के काम आय].’ ककई बनेइय्या हरेक कारीगर सराय तरीन के बासिंदा आय. वो मन भलेच कोनो आन जगा मं काम करत होंय, फेर वो मन के जरी इहींचे जुरे हवंय.” इस्लाम ला ये हुनर सीखे मं 15 बछर लाग गीस.

ओकर लइका मन अपन काम बूता मं लाग गे हवंय – एक बेटा मुरादाबाद मं बढ़ई हवय; दूसर दर्जी आय; दू झिन बेटी घरेच मं दर्जी के काम करथें; दू झिन पढ़त हवंय; सबले बड़े बेटी के बिहाव हो चुके हवय. ओकर बाद घलो, वो ह काम करे बंद नइ करे सकय, वो ह कहिथे. दस्तकार ठलहा नइ रहय. मोला काम मं मजा आथे. मिहनत जरुर हवय, फेर मोर देह नइ पिरावय. जिस्म काम माँगता है [देह काम मांगथे].”

जब इस्लाम करा ककई के काम नइ रहय, त वो ह लकरी के खिलौना, लकरी के पलंग धन नट (अपन भार बनाके रखेइय्या पुतरी) घलो बनाथे. वो ह कहिथे, “ मंय ये जिनिस मन ला तब बनाय सुरु करेंय जब 12 बछर पहिली एक ठन अलहन होय के बाद खटिया धर ले रहंय. मंय ठलहा बइठे रहे नइ सकंव, येकरे सेती मंय अपन भार रखेइय्या पुतरी मन ला बनायेंव, जेन ला 50 रूपिया मं बेंचेंय.”

ये हुनर ह ओकर लइका मन के पालन-पोसन मं काम आइस, फेर घर के माली हालत तभेच सुधरिस जब ओकर लइका मन काम-बूता करे सुरु करिन.

इस्लाम गरब ले कहिथे, “मोर सब्बो बेटी मन कुरान पढ़ लेथें, फेर मोर बेटा मन नइ. जब मोर लइका मन कमाय लगिन, त वो मन मोर दूनों छोटे बेटी मन ला कालेज पढ़े बर पठोइन. घर के सब्बो लोगन मन ये मं अपन हाथ बंटाइन. अब दूनों बेटी मन काम करे ला चाहत हवंय. हो सकथे वो मन घरेच मं ट्यूसन पढ़ायेंव.” परिवार मं अऊ कोनों कालेज नइ पढ़ींन.

चालीस बछर पहिली, इस्लाम 12-15 घंटा बूता करके 11-12 रूपिया कमावत रहिस. वो ह कहिथे, “बस पेट ही भर जाता था, कुछ बचता नहीं था.”

ये कारीगर कभू-कभू दिन भर बूता करे के बाद रतिहा दू बजे उठ जावय अऊ ककई बनाय सुरु कर देवय.“बहुत अजीब-ओ-ग़रीब वक़्त था [ भारी अजीबो गरीब बखत रहिस]. सात कारीगर वाले कारखाना ले 700 ककई/ककवा बनत रहय, अऊ अइसने कतको कारखाना रहिस.”

मकसूद खान, जेन ह बीते 60 बछर ले सप्लाई करे के काम करत हवय, कहिथे,”इस काम से हमें उल्फत है [ ये काम ले मोला लगाव हवय].”

एक जमाना मं लोगन मन के मानना रहिस के सींग के ककवा ह इलाज के काम आथे. “माने जावत रहिस के ये ह आने ककवा के बनिस्बत जूँ-लकीरें (जुहां अऊ लीख) ला बढ़िया ढंग ले हेर देथे. येला बउरे ले रुसी घलो कम होवत रहिस. मंडी ह सौदागर मन (बड़े बेपारी) ले भराय रहय, जेन मन देस भर मं भेजत रहिन,” खान कहिथे.“अब सौदागर भी खत्म, और ख़रीदार भी [ अब बेपारी घलो नंदा गे अऊ लेवाल घलो]. "

ये ककवा खासकरके माईलोगन मन के मनपसंद के रहिस, जेन मन गाँव के मेला- मड़ई मं खोजत रहंय. खान कहिथे, “आज घलो सियान माईलोगन मन ये ककवा ला खोजथें, फेर नवा पीढ़ी के माईलोगन मन येला बिसोय मं हिचकथें.”

खान अऊ इस्लाम, जेकर मन के 40 बछर ले कारोबारी नाता रहे हवय,पारी-पारी ले एकेच हुक्का ले दम मारथें. खान सुरता करथे, “वो जमाना मं हरेक कारखाना मं एक ठन हुक्का होवय. एक बहाना था आराम करने का [सुस्ताय के एक ठन बहाना]. सियान मन हुक्का तीर बइठे रहंय अऊ कम उमर के लोगन मन ला काम करत देखत रहंय.”

ककई/ककवा बनेइय्या जेन मन दीगर कारोबार मं चले गे हवंय, वो मन आज घलो हुक्का के दम लगाय के संगे-संग हँसी-मजाक करे बर इस्लाम करा आथें.

सींघ की कंगी के सबले बड़े बजार कानपुर रहिस, ओकर बाद आगरा के नंबर आवय. सराय तरीन मं आज हड्डी अऊ सींग के हाथ ले बने सामान बड़े पैमाना मं यूरोप, अमेरिका अऊ खाड़ी देश मन मं भेजे जाथे, फेर सींग के कंगी के लेवाली देसेच मं रहिस.

खान कहिथे, “आज लोग सींग से भिंडयाते हैं [आज लोगन मन सींग ला नइ भावंय]. नवा पीढ़ी येकर ले असकटाथे.” वो ह लेवाली गिरे सेती ये बात के संगे संग प्लास्टिक के ककई के बढ़त चलन ला घलो जिम्मेवार मानथे.

इस्लाम कहिथे के सींग वाले ककई बिसोइय्या अधिकतर ग्राहेक हिंदू होवत रहिन, जेन मं रीत –रिवाज मं घलो बउरत रहिन. “पहले ये बताते थे लोग नदी में गए, सर में ये कंगी लगाई, और गंगा मैया को चढ़ा दी [हमन ला बताय गे रहिस के लोगन मन अपन चुंदी मं ककई पहिरत रहिन, गंगा मं नुहावत रहिन, अऊ रीत-रिवाज मुताबिक नदिया मं चढ़ावत रहिन. सबले अमीर परिवार मन येला सैकड़ों तादाद मं बिसोवत रहिन.”

वो ह मानथे के आज के बखत मं हिंदू सींग ले परहेज करथे, फेर कोनो कारन नइ बतावंय. वो ह बस अतके कहिथे, “अब वो मन ला बने करके पता हवय के वो मन काबर परहेज करथें.”

लेवाली गिरे के दूसर कारन गाँव अऊ कस्बा के मेला-मड़ई के खतम हो जाय आय. इस्लाम सुरता करत कहिथे, “हमन ये ककई/ ककवा अतक जियादा बेचत रहेन के कारीगर मेला ले लहूटे के बाद अपन लइका मन के बिहाव कर देवत रहिन. एक ठन मेला ले हमन ला आठ-नो दिन मं करीबन 10,000 रूपिया के नफा होवत रहिस. अजमेर, कलियर, बदायूँ अऊ दीगर शहर मन मं उर्स [सूफ़ी संत मन के बरसी] के मेला भरत रहिस. अलीगढ़ जइसने शहर मं नुमाइश (प्रदर्सनी) लगत रहय. अऊ नेजा (संभल अऊ ओकर तीर-तखार के गाँव मन मं सूफी बीर मन के सुरता मं भरेइय्या मेला), मुहर्रम, ईद, मेहंदी के रात बर इहाँ के गाँव मन मं मेला भरत रहिस. वो जमाना अब नंदा गे, अब सायदेच कोनो मेला भरथे.”

चार बछर पहिली, इस्लाम ला नोएडा के एक ठन व्यापार मेला मं नेवते गे रहिस. इस्लाम कहिथे, “जेन जिनिस ला मंय कभू पहिली देखे नइ रहंय- विदेशी लोगों की थी [वो विदेसी लोगन मन रहिन]. मंय अपन जिनगी मं पहिली बखत बिदेसी मन ला अतक लकठा ले देखे रहंय.”

उद्घाटन बखत, मुख्यमंत्रीयोगी आदित्यनाथ ओकर स्टॉल मं आइस. इस्लाम कहिथे, “भीड़ मोर चरों कोती जमा होगे. वो मन के मन बहलाय बर, मंय एक कलाबाजी करंय- मंय एक ठन गोड़ ला अपन घेंच मं डार देंय अऊ ओकर बाद सींग के टुकड़ा मं आरी चलाय लगंय, सब्बो मन ताली बजाइन.” इस्लाम वो सुरता ला बतावत कहिथे, “मंय जिनगी मं पहिली बेर कोनो फैशन शो घलो देखेंय.”

वइसे सराय तरीन ले पारंपरिक सींग की कंगी (ककई) करीबन नंदा चुके हवय, ओकर बाद घलो हड्डी अऊ सींग के हस्तशिल्प फरत-फूलत उदीम हवय, जेन ह अधिकतर बिदेस भेजे जाथे. ये इलाका सप्लायर अऊ बहिर भेजेइय्या मन के बैनर ले भरे हवय, फेर कारखाना मं, कारीगर अऊ मजूर मन के कतको पीढ़ी हड्डी अऊ सींग हस्तशिल्प के काम के अलग-अलग हिस्सा ला करथें. अधिकतर मजूर मुसलमान आंय.

खान ह दुख जतावत कहिथे, “जवान पीढ़ी हस्तशिल्प के काम मं लगे हवय, फेर वो मन ला ये बात के पता नइ ये के सींग की कंगी ले ये सब्बो कइसने सुरु होइस.”

38 बछर के मेहदी हसन इहाँ के एक वितरक आंय, जेकर पुरखा के लोगन मन सींग-ककई कारीगर रहिन. वो ह सुरता करत कहिथे, “मोर ददा अऊ बबा सींग के ककई के काम करत रहिन. मंय तब नानचिक रहंय, फेर मोला सुरता हवय के वो मन सींग ला अपन हाथ ले काटंय, ढालंय, आकार देवंय अऊ पालिश करंय, जेन ह ये बखत मसीन ले होथे.”

हसन ह कारीगर के रूप मं सुरु करिस अऊ अपन ददा महमूद हसन ले देख के ये हुनर सिखिस. वो ह कहिथे, “हमन इंजीनियर धन डॉक्टर बन सकत रहेन, फेर वो बखत हमर माली हालत के सेती पढ़ई-लिखई हमर प्राथमिकता नइ रहिस. येकरे सेती, हमन अपन बेवसाय ला आगू बढ़ाय उपर धियान देन.”

हसन के आफिस मं सींग ले बने कतको सामान रखाय हवय: बीयर के गिलास, फोटो फ्रेम, कप, फर के टुकना, पासा, चश्मा के फ्रेम अऊ घर के सजावटी कतको जिनिस. हसन कहिथे, “अंगरेज हर चीज़ नेचुरली इस्तेमाल करना चाहते है अंगरेज प्राकृतिक सामान काम मं लाय पसंद करथें].” वो ह गरब ले कहिथे, “येकरे सेती हमर अधिकतर सामान यूरोप, खाड़ी के देश मन ला अऊ अमेरिका भेजे जाथें. संभल ला कोनो नइ जानय, फेर सराय तरीन मं हमर काम के सेती दुनिया वोला जानथे.”

देसी लेवाली न के बरोबर हवय. हसन कहिथे के जब कारीगर अऊ सप्लायर मन बिदेसी मांग ला पूरा करे मं धियान लगा दीन त इहाँ के लोगन मन के अतक महंगा जिनिस बिसोय, वो मन के बस मं नइ रहिगे, त सींग के सामान बनाय पूरा बंद होगे. “येकर छोड़, हिंदू लेवाल ये सामान मन ला बिसोय मं हिचकथें काबर के ये सींग ले बने होथे.” हसन के मुताबिक, ये कारोबार मं बूता करेइय्या हिंदू -जम्मो मजूर मन के 20 फीसदी ले घलो कम- पेकिंग के काम करथें धन सप्लायर अऊ निर्यातक (बिदेस भेजेइय्या) के रूप मंकाम करथें.

हसन के खरखाना मं, हाथ भर लंबा सींग के ढेरी लगे हवय. हसन कहिथे, “जइसने भारत मं अलग-अलग भाखा हवंय, वइसनेच इहाँ घलो अलग-अलग सींग हवंय. सबले बढ़िया सींग गुजराती भंइसा के होथे, खासकरके अहमदाबाद के तीर-तखार के, काबर के वो बड़े-बड़े होथें अऊ वोला बनाय मं सुभीता होथे.”

कारखाना के हवा मं गरदा उड़त रहिथे. हसन कहिथे, “कुछु बखत बाद हमन का येकर आदत हो जाथे.” ये बांचे जिनिस मन ला संकेल के, पैक करके बजार मं बेचे जाथे, जेन ला खातू धन दीगर काम मं बउरे जाथे.

हसन अपन कच्चा माल ले जुरे बात के तुरते जुवाब देथे, कहिथे के हस्तशिल्प बर जानवर मन ला मारे नइ जावय. हड्डी अऊ सींग जेन ला कचरा समझ के फेंक देय जाथे, वोला बिसो के काम के जिनिस बना लेय जाथे.

कच्चा माल, जउन ह इहाँ गीला सामान के नांव ले जाने जाथे, वोला सराय तरीन ले जाय के पहिली बूचड़खाना मं सूखे बर छोड़ देय जाथे.

सूखाय के बाद, कच्चा माल ला टुकड़ा मं काटे जाथे अऊ ओकर बाद सिकाई के काम करे जाथे, मतलब कोयला के आगि मं नरम करके चपटा करे जाथे. हसन बताथे, “भारी गरमी सेती सिकाई के काम सबले मिहनत वाले आय.”

चपटा करे के बाद, सींग ला लोहा के सांचा ले कतको आकार मं गढ़े जाथे. ओकर बाद ये टुकड़ा मन ला मसीन ले सफाई अऊ पालिश करे जाथे.

15 बछर ले कारीगर रहेइय्या मुमतियाज़ खान ह हालेच मं अपन खुद के कंपनी सुरू करिस अऊ अब वो ह कारीगर अऊ वितरक दूनों आय. वो ह हड्डी ले बने बटन के काम करथे. वो ह कहिथे, “हमन जेन बनाथन, वो मं सींग अऊ हड्डी मं जियादा फेरफार नइ ये. फेर सींग ले बने सामान मं जियादा सामान लागथे अऊ बखत घलो जियादा लागथे.”

कुछु सामान मं डिज़ाइन अऊ टिकाऊ बनाय बर सींग अऊ हड्डी दूनों मिलाय जाथे. मुमतियाज़ बताथें, “जइसने, फोटो फ्रेम सींग ले बनाय जा सकथे, फेर सजावटी जोड़ हड्डी ले करे जाथे.” कुछू सामान मन मं केमिकल का काम [सिंथेटिक कोटिंग] अऊ प्लास्टिक के काम घलो रहिथे.

मुमतियाज हड्डी के सामान थोक मं, अक्सर क्विंटल मं बिसोथे. एक किलो कच्चा सींग के दाम वोला करीबन 70 रूपिया परथे, फेर एक किलो बटन बनाय मं करीबन चार किलो कच्चा माल लागथे. ये बटन करीबन 440 रूपिया किलो बिकथे. दूसर ढंग ले कहे जाय त एक क्विंटल (100 किलो) कच्चा सींग ले करीबन 30 किलो बटन बनथे.

सराय तरीन के खास जिनिस मन ले एक आय हड्डी ले बने बटन. मुमतियाज कहिथे, “ये बटन अक्सर शाही सूट मं बउरे जाथे.”येकर काम मसीन ले हड्डी ला काटे ले सुरु होथे, ओकर बाद वोला पालिश करे जाथे. ओकर बाद वोला टिकली के काम कहे जाथे, जिहां सामान ला नक्काशी धन आखिरी पालिश मनचाहा बटन के आकार देय जाथे.

एक झिन कारीगर अपन तजुरबा अऊ काम के सफई मुताबिक रोज के 400 ले 800 रूपिया कमाथे. मुमतियाज कहिथे, “टिकली के काम मं एक झिन नवा कारीगर 500 रूपिया कमा सकथे, फेर जियादा तजुरबा वाले कारीगर उहिच काम के रोज के 800 रूपिया कमाय सकथे. ये काम के सफई उपर घलो रहिथे.”

अपनी कंपनी खोले अऊ मजूरी नइ करे ला लेके वो ह कहिथे, “पैसे को पैसा कमाता है [पइसा ला पइसा कमाथे]. मंय अब ओतकेच कमावत हवं जतक मजूरी करे बखत कमावत रहंय. फरक अब सिरिफ अतक हवय के अब मोर उपर काम के बोझा जियादा हवय.”

कुवैत ले लहुटे मुमतियाज, जिहां वो ह सेवा-सत्कार के चाकरी करत रहिस, अपन खाली बखत मं समाचार देखे मं गुजारथे. वो ह कहिथे, “करीबन 50 फीसदी हड्डी अऊ सींग के हस्तशिल्प कारोबार बंद होगे हवय. रूस अऊ यूक्रेन मं लड़ई, इज़राइल-गाजा मं लड़ई अऊ अमेरिका के लगाय गे नवा टेक्स येकर कारन आय.”

नवा जवान पीढ़ी बिदेस भेजेइय्या धन सप्लायर बने ला चाहथे. जइसने के, मकसूद खान के बेटा हस्तशिल्प के सामान ला बेचे बर सोशल मीडिया ला काम मं लाथे.

इस्लाम अऊ खान के संसो हवय के काय ककई बनाय के काम अवेइय्या बखत कुछेक दिन मं, बस सुरता बन के रहि जाही?. “मंय अपन लइका मन ला अऊ सराय तरीन के लइका मन ला ये काम सिखाय ला चाहत हवं, फेर ये मं कोनो नफा नइ ये. पहले यह काम इस जगह का सहारा था [पहिली ये काम कभू ये जगा के आसरा रहिस], इस्लाम कहिथे.” “गर ये अभू घलो मुनाफा देवत रइतिस, त कोनो येला छोड़तिसच नइ.”

ये कहिनी मृणालिनी मुखर्जी फ़ाउंडेशन (एमएमएफ़) ले मिले फ़ेलोशिप के तहत लिखे गे हवय.

अनुवाद: निर्मल कुमार साहू