सराय तरिन के नामी सींग वाला बारीक कंघी

संभल के सराय तरिन हड्डी आ सींग से बनल सामान खातिर प्रसिद्ध हवे जईसे बटन, बीयर के गिलास, घर सजावे के सामान आ किचेन के सामान. एइजा के मोहम्मद इस्लाम के छोट किराया के दुकान में ग्राहकन के आवाजाही बराबर बनल रहेला. बच्चा लोग इहंवा टॉफी आ बड़ लोग राशन के खोज में आईल बा. कुछ उमिरदराज लोग एगो बढ़िया दांत वाला कंघी भी खोज रहल बाड़ें; ई सींग के कंघी (भैंस के सींग से बनल कंघी) हवे जेकरी बारे में तख्ती पर हाथे से लिख के दोकान के ऊपर टांगल बा.

इस्लाम (60 बरिस) सराय तरिन के आखिरी कारीगरन में से एक हवें जे सींग के कंघी अब्बो बना रहल बाड़ें. लम्बा समय से उनकर साथी रहल मक़सूद खान उमिर के 70वां फेंटा में बाड़ें आ ए चीज के सप्लाई करे वाला आखिरी लोगन में बाचल बाड़ें.

“ए शिल्प के कारीगर लोग, जे गुजर गईल बाड़ें, ए कला के अपनहीं संघे लेले गईलें – अब एकरा दोबारा जिन्दा करे के कोसिस नइखे हो रहल,” इस्लाम हुक्का से धुआं उड़ावत के कहेलन. “आप पूरा सराय तरिन घूम लिहीं बाकिर सींग से कंघी बनावे वाला कारीगर खोजतानी त सब केहू आपके हमरे लगे भेजी.”

ए कारीगरी के 2022 में भौगोलिक संकेत (जीआई) टैग दिहल गईल रहे, जवन एक तरह के बौद्धिक सम्पदा संरक्षण हवे आ उत्पाद के उनकी उत्पत्ति के आधार पर अलग करे में मदद करेला. सींग आ हड्डी के हस्तशिल्प के उत्तर प्रदेश सरकार के ‘एक जिला एक उत्पाद योजना’ के तहत सम्भल खातिर विशेष रूप से बढ़ावा दिहल गईल बा.

“जिसके सर पर बाल, उसकी कंघी (जेकर बार बा ओके कंघी के जरूरत बा),” इस्लाम सहजता से एगो आम कहावत कहेलन. “एगो समय रहे जब हर जगह, हर गली के कोना आ चौराहा पर कंघी लउकत रहे.”

उनकर दुकान, जवन उनकर कार्यशाला भी हवे, के 2,000 रुपिया महीना किराया देवे के होला आ उ दुकानदार आ कारीगर के दोहरी भूमिका से जूझत रहेलन. उनकरी सामने उनकी कारीगरी के सामान फईल गईल बा: कई तरह के आरी, रैत (चक्कू) छिल्ली (खुरचे वाला), रेगमाल के शीट (बालू कागज) आ एगो अड्डा (लकड़ी के बोर्ड) जहां कंघियन के रक्खल जाला.

उ कहेलन कि अब औजार मिलल भी मुश्किल हो गईल बा. “जईसे कवनो कारीगर नईखन स बाचल ओही तरे केहू औजार भी नईखे बनावत. हमके हरदम कवनो न कवनो जुगाड़ लगावे के पड़ेला. जईसे आरी के लेईं, एमे विशेष तरह के दांत बा जवन अउरी कहीं ना मिली. ई हम खास तौर पर अलीगढ़ से बनववले रहनी,” इस्लाम कहेलन.

कंघी बनावे खातिर इस्लाम चिक्कन सींग प्लेट खोजेलन – खोखला सींग के खोलल आ दबा के बनावल – जवन आसपास के कारखाना से 15 रुपिया प्रति पीस के हिसाब से मिलेला. बनल कंघी प्रति पीस 20 रुपिया में बिकाला जवना में उनके प्रति पीस 5 रुपिया के फायदा होला. एगो कंघी बनावे में उनके दू घंटा लागेला.

“एक कंघी 75 हाथों से निकल कर बनती थी (एगो कंघी पर 75 करीगर लोग काम करे),” इस्लाम कहेलन. “अब एके हम अकेले करेनी. हम हर महीना सैकड़न में बनावेनी आ अगर अल्लाह चाहिहें त कवनो सप्लायर ओके कीने आई.” हमनी के दौरा वाले दिन मक़सूद खान 600 रुपिया में 30 गो कंघी कीन के ले गईलें.

इस्लाम अड्डा पर एगो सींग प्लेट रखेलन आ एकर सतह चिकना करे खातिर छिल्ली के उपयोग करेलन. “एके छिलाई के काम कहल जाला,” इस्लाम समझावेलन. “ई प्रक्रिया के सबसे मेहनत वाला काम हवे. पुरान समय में कारीगर लोग अक्सर एसे बचल चाहें काहें कि एमे घंटो बईठ के काम करे के पड़ेला.”

जब सींग प्लेट के उचित मोटाई में छील दिहल जाला, त उ कंघी के दांत बनावे खातिर अलग-अलग तरह के आरी के उपयोग करेलन. “कला एही में बा कि हर दांत के बीच के जगह एक बराबर होखे. कंघी में केतना दांत होखी एकर कवनो निश्चित संख्या नईखे. हर दांत के आकार कंघी के पूरा आकार पर भी निर्भर होखेला,” इस्लाम बतावेलन. खाली एगो दस्तकार (कारीगर) ही दांत बना सकेला. मशीन एतना बारीक काम ना कर सकेले.”

तीन इंच के सींग प्लेट पर काम करत के इस्लाम दूनो तरफ 42 गो दांत बनावत बाड़ें. बड़ प्लेट में ढेर दांत होखेला आ ओकरी बीच के दूरी एक मिलीमीटर से भी कम होला. उनकर बनावल कुछ कंघी बहुत छोट, आधा अंगुरी के बराबर लमहर बाड़ी सन.

दांत बनवला के बाद कंघियन के बालू कागज से रगड़ल जाला आ ओकरी बाद सुंदर फिनिश खातिर फिर से छीलल जाला. एक बेर आकार फाइनल हो जाला, त एक बेर अउरी पॉलिश कईल जाला ताकि एके चिकनाई मिल सके. अनुरोध कईला पर कंघी पर फूल आ बिंदुअन संघे नक्काशी भी कईल जा सकेला.

“ई कंघी खाली भैंस के सींग से बन सकेला. बैल के सींग प्याज निहर परतदार होला, ओके काटल संभव नईखे. हड्डी बहुत कड़ा होला. खाली भैंस के सींग में ही कंघी बनावे लायक सही घनत्व होला,” इस्लाम कहेलन.

उनकी दुकान में शोकेस में कइएक तरह के कंघी सब राखल बा. ओमे पगड़ी संवारे खातिर सरदारों की कंघी, दाढ़ी संवारे खातिर मुल्लाओं वाली कंघी आ पारंपरिक तरीका के भुअर कंघी खास बा.

एगो खास तरह के तेल वाला कंघी होखत रहे, जेकर खोखला दांत से तेल निकलत रहे. बाकिर ऊ अब बाजार से गायब हो गईल बा. “जवन कारीगर लोग एके बनावे जानें उ सब गुजर गईल बाड़ें,” इस्लाम कहेलन.

इस्लाम 10 बरिस की उमिर में अपने पिताजी से कंघी बनावे के कला सिखलें. “ये हमारा दादीलाही काम है (ई पुश्तैनी काम हवे). सींग के कंघी बनावे वाला हर कारीगर सराय तरिन के हवे. उ काम कहीं अउरी भी करे लेकिन ओकर जड़ एही जगह से जुड़ल बा,” उ कहेलन. ई कला के सीखे में इस्लाम के 15 बरिस लागल.

उनकर बच्चा अब काम करत बाड़ें सन. एगो लईका मोरादाबाद में लकड़ी के कारीगर हवे; दूसर एगो टेलर हवे; दू गो लईकी घरे से टेलर के काम करेली सन; दू गो अभी पढ़ाई करत बाड़ी सन आ बड़की दू गो के बियाह हो गईल बा. तब्बो, उ काम कईल बंद ना कर सकेलन, उनकर कहनाम बा. “कारीगर कबो खाली ना बईठ सकेला. हमके काम में मजा आवेला. एमे मेहनत होला बाकिर हमार देह ना दुखाला. जिस्म काम मांगता है (शरीर के काम चाहीं).”

जब इस्लाम कंघी ना बनावेलन त उ लकड़ी के खेलौना, लकड़ी के छोट पलंग या नट, संतुलन बनावे वाली गुड़िया भी बनावेलन. “हम ई कुल चीज बनावे तब शुरू कईनी जब 12 बरिस पहिले गो दुर्घटना के बाद हमके बिस्तर पकड़े के पड़ल. हम खाली बईठ के आराम ना कर सकेनी एसे हम संतुलन वाली गुड़िया बनवनी जेके हम 50 रुपिया में बेचनी,” उ बतावेलन.

एही कला से उ अपनी बच्चन के पालन पोषण कईलें बाकिर परिवार में आर्थिक बढ़ोत्तरी तब्बे भईल ह जब उनकर लईका काम करे शुरू कईलें हं सन.

“हमार कुल बेटी कुरान पढ़ लेवेली सन,” इस्लाम गर्व से बतावेलन, “बाकिर हमार बेटा ना पढ़ेला. जब हमार बेटा कमाए लगलें सन त उ हमरी दू गो छोट बेटियन के कॉलेज भेजलें सन. परिवार के कुल सदस्य मदद करे लागल. अब दूनो लईकी काम कईल चाहतरी सन. हो सकेला उ घरे वाला ट्यूशन शुरू करें सन.” परिवार में अउरी केहू कॉलेज नईखे गईल.

इस्लाम के चालीस बरिस पहिले 12-15 घंटा के काम के बाद 11-12 रुपिया मिले. “बस पेट ही भर जाता था, कुछ बचता नहीं था (काम से खाली पेट भरे बाकिर कुछ बचावे के ना रहे),” उ कहेलन.

कारीगर लोग कबो कबो पूरा दिन के काम के बाद राती के 2 बजे उठ जाएं आ फिर से कंघी बनावे शुरू कर दें. “बहुत अजीब-ओ-गरीब वक्त था (बहुत अजीब समय रहे). सात कारीगरन के एगो कारखाना से 700 कंघी बाहर निकले आ अइसन कई गो कारखाना रहे.”

मकसूद खान, जे पिछली 60 बरिस से सप्लायर के काम करत बाड़ें, बात में हिस्सा लेलें. “इस काम से हमें उल्फियत है (ए काम से हमनी के भावनात्मक रूप से जुड़ल बानी जा).”

दशकन पहिले लोगन के विश्वास रहे कि सींग के कंघी से बहुत सा चिकित्सकीय फायदा होला. “मानल जात रहे कि एसे जूं-लीख (सर के जुआं आ लीख) अन्य कंघियन के तुलना में बेहतर तरीका से हटेला. एकरी उपयोग से कपार में रुसी भी कम हो जाला. मंडी (बाजार) सौदागर (व्यापारी) लोगन से भरल रहत रहे जे पूरा देश में क्रेट पर क्रेट भेजे लोग,” खान बतावेलन. “अब सौदागर भी ख़तम और खरीददार भी (अब व्यापारी भी खतम बा आ कीने वाला लोग भी).”

कंघी खास तौर पर महिला लोगन में बहुत लोकप्रिय रहे जेके उ लोग गांवन के मेला में खोजें. “आज भी पुरान मेहरारू लोग अइसन कंघी खोजेला बाकिर युवा महिला लोग एके ना कीनेला,” खान कहेलन.

खान आ इस्लाम में 40 बरिस से एगो व्यापारिक रिश्ता बा आ दूनो जाने एक ही हुक्का से बारी बारी दम खींच रहल बा. “ओ समय हर कारखाना में हुक्का रहे. एक बहाना था आराम करने का (काम के बीच सुस्ताए के बढ़िया बहाना रहे),” खान याद करेलन. “बुजुर्ग लोग हुक्का के लगे बईठे आ युवा लोगन के काम करत के देखें.”

दूसरी धंधा में चल गईल कंघी बनावे वाला लोग भी अब्बो इस्लाम के लगे हंसी मजाक करे आ हुक्का फूंके आवेला.

सींग के कंघी के सबसे बड़ बाजार कानपुर रहे, ओकरी बाद आगरा के स्थान रहे. आज सराय तरिन में हड्डी आ सींग के हस्तशिल्प जवन मुख्यतः यूरोप, अमेरिका आ खाड़ी देशन में निर्यात कईल जाला, के विपरीत सींग के कंघियन के मांग पूरी तरह से घरेलू बाजार के रहे.

“आज लोग सींग से भिन्डयाते हैं (आज के लोग सींग ना लिहल चाहेला). युवा पीढ़ी के लागेला ई गन्दा हवे,” खान कहेलन. ए धारणा के संघे प्लास्टिक के कंघियन के बढ़त प्रचलन के भी उ मांग में कमी के कारण मानेलन.

इस्लाम के कहनाम बा कि कंघी खरीदे वाला ज्यादातर ग्राहक हिन्दू रहें जे एकर उपयोग धार्मिक रीती-रिवाज में करे. “पहले ये बताते थे लोग कि नदी में गए, सर में ये कंघी लगायी और गंगा मैया को चढ़ा दी (हमनी के बतावल जाए कि लोग कंघी के अपनी बार में लगावे, गंगा नहाये आ रीती-रिवाज के तहत कंघी गंगा जी के अर्पित कर देवे). धनी परिवार के लोग एके बेर में सैकड़ों कंघी कीनल करें.”

उ मानेलन कि हिन्दू लोग अब सींग से बचेला बाकिर कवनो कारण ना बतावेलें. “ओही लोग के बेहतर पता होई कि काहें उ लोग अब एसे बचेलें,” उ एतने बोलेलें.

गिरत मांग के एगो अउरी कारण बा गांव आ क़स्बा में मेलन के खतम भईल. “हमनी के एतना बड़ संख्या में कंघी मेला में बेचीं जा कि मेला से लौटला के बाद कारीगर लोग अपनी बच्चन के बियाह कर देवें. एगो मेला में हमनी के आठ नौ दिन में करीब 10,000 रुपिया के फायदा कमा लिहीं जा. अजमेर, कलियर, बदायूं आ अउरी जगहन पर उर्स (सूफी संतन के पुण्यतिथि) के मेला होखे. अलीगढ़ जईसन शहरन में नुमाइश (प्रदर्शनी) होखे. आ नेजा (सम्भल आ आसपास के गांवन में एगो सूफी योद्धा के याद में मनावल जाला), मुहर्रम, ईद आ मेहंदी की रात खातिर स्थानीय गांवन के मेला होखे,” इस्लाम पुरान याद में अझुरात कहेलन. “उ दिन अब खतम हो गईल बा, अब मुश्किले से कवनो मेला देखे के मिलेला.”

इस्लाम के चार बरिस पहिले नॉएडा में एगो ट्रेड फेयर में आमंत्रित कईल गईल रहे. “अइसन चीज हम कब्बो ना देखले रहनी – विदेशी लोगों की थी (विदेशी लोगन खातिर रहे). हम अपनी जिनगी में पहली बेर विदेशी लोगन के एतना नजदीक से देखनी,” इस्लाम कहेलन.

उद्घाटन के दौरान मुख्य मंत्री योगी आदित्यनाथ उनकर स्टाल के दौरा कईलें. “हमरी आसपास भीड़ एकट्ठा हो गईल रहे. उनकी ख़ुशी खातिर हम एगो स्टंट कईनी – हम आपन एगो गोड़ अपनी कपार के पीछे लॉक कर दिहनी आ ओकरी बाद सींग प्लेट पर आरी चलावे लगनी. सब केहू ताली बजवलस,” ओ ख़ुशी वाला याद से प्रफुल्लित इस्लाम बतावेलन. “पहली बेर ही हम अपनी जिनगी में फैशन शो भी देखनी.”

हालांकि पारम्परिक सींग के कंघी सराय तरिन से लगभग गायब हो गईल बा, हड्डी आ सींग के हस्तशिल्प एगो समृद्ध उद्योग बा जेकर ज्यादातर हिस्सा निर्यात में जाला. ए क्षेत्र में हर जगह सप्लायर आ निर्यातक के बैनर लागल बा जबकि कारखानन के भीतर कई पीढ़ी के कारीगर आ मजदूर हड्डी आ सींग के हस्तशिल्प के अलग-अलग चरणन पर काम कर रहल बाड़ें. ज्यादातर काम करे वाला लोग मुस्लिम बाड़ें.

“नया पीढ़ी हस्तशिल्प के काम में लागल बा बाकिर ओ लोगन के कवनो जानकारी नईखे कि कईसे इ कुल सींग के कंघी से शुरू भईल रहे,” खान अफ़सोस जतावत कहेलन.

मेहदी हसन, 38, एगो स्थानीय वितरक हवें जिनकर पूर्वज लोग सींग के कंघी बनावे वाला कारीगर रहे. “हमार पिता आ दादा सींग के कंघी के काम करें,” उ याद करेलन. “हम तब लईका रहनी बाकिर हमके याद बा उ अपनी हाथ से सींगन के काटें, आकार दें आ पॉलिश करें, जवन अब मशीनन से कईल जाला.”

हसन एगो कारीगर के रूप में शुरुआत कईलें आ अपनी पिता, महमूद हसन के देख के ए कला के सिखलें. “हमनी के डॉक्टर या इंजीनियर बन सकत रहनी जा बाकिर अपनी ख़राब आर्थिक स्थिति के वजह से शिक्षा हमनी के प्राथमिकता में ना रहे. एसे, हमनी के आपन काम बढ़ावे में ध्यान दिहनी जा,” उ कहेलन.

हसन के कार्यालय में सींग से बनल उत्पाद के विस्तृत श्रृंखला राखल बा जेमे बीयर के गिलास, फोटो फ्रेम, कप, फल वाला टोकरी, पासा, चश्मा के फ्रेम आ घर सजावे के सामान वगैरह बा. “अंग्रेज हर चीज नैचुरली इस्तेमाल करना चाहते हैं (विदेशी लोग प्राकृतिक उत्पाद उपयोग कईल पसंद करेला),” हसन बतावेलन. “एही से हमनी के ज्यादातर सामान के निर्यात यूरोप, खाड़ी देशन आ अमेरिका में कईल जाला. सम्भल के केहू ना जानेला बाकिर दुनिया एके ओ काम से जानेले जवन काम हमनी के सराय तरिन में करेनी जा,” उ गर्व से कहेलन.

घरेलू मांग नगण्य बा. हसन बतावेलन कि सींग के कंघी के काम तब खतम हो गईल जब कारीगर आ सप्लायर लोग विदेशी मांग पूरा करे खातिर आपन धंधा बदल दिहल आ स्थानीय लोग महंगा उत्पाद कीने में असमर्थ होखे लगलें. “हिन्दू लोग ए उत्पादन के कीने में संकोच करेला काहें कि ई सींग से बनल होला.” हसन के मानल जाओ त ए उद्योग में 20 प्रतिशत से भी कम हिन्दू बाड़ें जे या त पैकेजिंग में काम करेलें या फिर सप्लायर या निर्यातक के रूप में.

हसन के कारखाना में एक हाथ जेतना बड़ सींगन के भरमार लागल बा. जईसे भारत में अलग-अलग भाषा बाड़ी सन, अलग-अलग तरह के सींग भी बा,” हसन कहेलन. “सबसे बढ़िया गुजरात के भैंसन के होला, खास तौर पर अहमदाबाद के आसपास काहें कि उ बड़ होखेला आ ओपर कारीगरी आसानी से होला.”

कारखाना में खुरचला के बाद उड़े वाला लकड़ी के बुरादा से हवा में घनापन बा. “एक समय के बाद हमनी के एकर आदत हो जाला,” हसन कहेलन. ए बुरादा के एकट्ठा कईल जाला, पैक कईल जाला आ बाजार में बेचल जाला जेके खाद या अन्य कामन खातिर उपयोग कईल जाला.

हसन अपनी कच्चा माल के स्रोत के बतावे में तुरंत कहेलन कि एकरी खातिर जानवरन के मारल ना जाला. एकरी बजाय ओ हड्डी आ सींग के कीनल जाला जवन ऐसे बेकार समझल जाला आ ओके कुछ उपयोगी चीजन में बदल दिहल जाला.

कच्चा माल जेके स्थानीय रूप से गीला सामान कहल जाला, सराय तरिन में भेजे से पहिले बूचड़खाने में सूखे खातिर छोड़ दिहल जाला.

एक बेर सूख गईला के बाद कच्चा माल के टुकड़न के काट दिहल जाला आ फिर एपर सिकाई का काम कईल जाला जहां एके जरत कोयला पर नरम आ चपटा कईल जाला. “तगड़ा गर्मी के वजह से सिकाई के प्रक्रिया सबसे मेहनत वाला काम होखेला,” हसन बतावेलन.

समतल कईला के बाद सींग के धातु के सांचा के उपयोग कर के अलग-अलग आकार या रूप में दबावल जाला. दबावल पीस के फिर मशीन से ठीक कर के पॉलिश कईल जाला.

मुम्तिआज खान, जे 15 बरिस से कारीगर बाड़ें, हाले में आपन कम्पनी शुरू कईले हं आ अब उ कारीगर आ वितरक दूनो के रूप में काम करेलन. उ हड्डी से बने वाला बटन पर काम करेलन. “हमनी के जवन बनावेनी जा ओके देखल जाओ त सींग आ हड्डी में बहुत फरक नईखे,” उ कहेलन. “बाकिर सींग के उत्पाद बनावे खातिर अधिक सामग्री के जरूरत होखेला आ एमे समय भी अधिक लागेला.

कुछ उत्पादन में डिजाईन आ ओकर उमिर बढ़ावे खातिर सींग आ हड्डी के मिला दिहल जाला. “उदाहरन खातिर, एगो फ़ोटो फ्रेम सींग से बनावल जा सकेला बाकिर सजावटी पच्चीकारी वाला सामान हड्डी से बनेला,” मुम्तिआज समझावेलन. कुछ उत्पाद बनावे में केमिकल का काम (सिंथेटिक कोटिंग) आ प्लास्टिक के डिटेलिंग भी होखेला.

मुम्तिआज भारी मात्रा में, आमतौर पर कुंतल में हड्डी मंगावेलन. कच्चा सींग के एक किलो उनके लगभग 70 रुपिया में पड़ेला बाकिर एक किलो तैयार बटन बनावे में चार किलो कच्चा माल लाग जाला. ई बटन लगभग 440 रुपिया प्रति किलोग्राम के हिसाब से बिक जाला. दूसरी शब्दन में कहल जाओ त एक कुंतल (100 किलो) कच्चा सींग से करीब 30 किलो बटन बनेला.

बटन, अक्सर हड्डी से बने वाला, सराय तरिन के मुख्य पहचानन में से एक हवे. “ई बटन आमतौर पर लक्जरी सूट में लागेला. ई प्रक्रिया मशीन के उपयोग कर के पॉलिश से पहिले हड्डी के टुकड़न के काटे से शुरू होखेला. एकरी बाद टिकली का काम होला जेमे सामग्री के सटीक बटन के आकार में ढालल जाला, ओकरी बाद एपर नक्काशी या फिर फाइनल पॉलिश कईल जाला.

एगो कारीगर अनुभव आ काम के गुणवत्ता के आधार पर 400 से 800 रुपिया प्रतिदिन कमा सकेला. “एगो नया कारीगर टिकली का काम कर के 500 रुपिया कमा सकेला जबकि एगो अनुभवी कारीगर के ओही काम खातिर 800 रुपिया मिल सकेला. ई काम के गुणवत्ता पर भी निर्भर करेला,” मुम्तिआज कहेलन.

आपन कंपनी बनावे आ श्रमिक के रूप में अब काम ना करे के अपनी फैसला पर उ कहेलन, “पैसे को पैसा कमाता है (निवेश से धन बढ़ेला). हम ओतने कमा तानी जेतना श्रमिक रहनी त कमाईं. फरक एतने बा कि अब तनाव बढ़ गईल बा,” उ कहेलन.

कुवैत में हॉस्पिटैलिटी में काम कर के लौटल मुम्तिआज आपन खाली समय समाचार देख के बितावेलन. “लगभग 50 प्रतिशत सींग आ हड्डी के व्यवसाय खतम हो गईल बा,” उ बतावेलन. ई रूस आ युक्रेन के युद्ध, इजराईल-गाजा टकराव आ अमेरिका द्वारा लगावल गईल नया टैरिफ के वजह से भईल ह.”

युवा पीढ़ी सप्लायर आ निर्यातक बने के इच्छुक बा. उदाहरण खातिर, मक़सूद खान के बेटा हस्तशिल्प वाला उत्पाद के बेचे खातिर सोशल मीडिया के उपयोग करेला.

इस्लाम आ खान इ सोच के दुखी बाड़ें कि कंघी बनावे के कला भविष्य में बस एगो याद बन के रहि जाई. “हम ई कला के अपनी बच्चन आ सराय तरिन के युवा लोगन के सिखावल चाहेनी बाकिर कवनो फायदा नईखे.. पहले ये काम इस जगह का सहारा था (एक समय इहे काम सबकर आजीविका चलावे),” इस्लाम कहेलन. “अगर अब्बो एमे फायदा रहित त केहू एके छोड़ के ना गईल होखित.”

ई स्टोरी मृणालिनी मुखर्जी फाउंडेशन (एमएमएफ) द्वारा समर्थित बा.

अनुवाद: विमल चन्द्र पाण्डेय