اسکولیوسس سے پریشان ہندوستانی نوجوان

سیونتی رائے کی ڈانس ٹیچر نے سب سے پہلے اپنی طالبہ کے غیرمتناسب کندھوں پر دھیان دیا تھا۔ اس ابھرتی ہوئی رقاصہ کی حرکتیں متوازن نہیں تھیں۔ کچھ ہی دنوں بعد ۱۳ سال کی عمر میں اس بچی میں اسکولیوسس (ریڑھ کی خمیدگی) کی تشخیص ہوئی۔ ’’عجیب بات یہ تھی کہ شروع شروع میں اس تشخیص کو لے کر میں خوش تھی، کیونکہ کہ میرے بچپن کے آئیڈیل، رتک روشن [مشہور فلم اسٹار جو رقص میں مہارت کے لیے مشہور ہیں] میں بھی اس مرض کی تشخیص ہوئی تھی،‘‘ سیونتی ہنستے ہوئے یاد کرتی ہیں۔

روشن کی اسکولیوسس کی تشخیص اس وقت ہوئی جب ان کی عمر ۲۱ سال کی تھی۔ انہیں بتایا گیا کہ وہ کبھی ڈانس نہیں کرسکیں گے۔ اسکولیوسس کی وجہ سے ریڑھ کی ہڈی ایک طرف مڑ جاتی ہے۔ عام لوگوں کی ریڑھ کی ہڈی میں باقاعدہ خم ہوتے ہیں، لیکن اس بیماری میں مبتلا بچوں اور نوعمروں کی ریڑھ کی ہڈی یا اس کے کچھ حصے غیر معمولی طور پر انگریزی کے حروف ’ایس‘ یا ’سی‘ کی شکل میں مڑ جاتے ہیں۔

نوعمروں کی آئیڈیوپیتھک اسکولیوسس (اے آئی ایس) سرجری کے لیے سیونتی نے جنوبی ۲۴ پرگنہ میں واقع اپنے گھر سے کولکاتا کا سفر طے کیا۔ اس پروسیجر میں ان کی ریڑھ کی ہڈی کو سیدھا کرنے کے لیے ان کی کمر میں دو سلاخیں اور ۱۴ اسکرو لگائے گئے تھے۔

’’اب مجھے کچھ بھی محسوس نہیں ہوتا،‘‘ ۱۲ سال بعد وہ کہتی ہیں۔ ’’زندگی معمول پر لوٹ آئی ہے۔ میں نے اسکولیوسس کے ساتھ جینا سیکھ لیا ہے اور معمول کی زندگی میں واپس آگئی ہوں،‘‘ وہ مسکراتے ہوئے اضافہ کرتی ہیں۔ ہم مغربی بنگال کے ایک قصبہ ڈائمنڈ ہاربر میں ان کے دادا کے گھر کی چھت پر بیٹھے ہیں، جہاں سے ہگلی ندی گزر کر خلیج بنگال میں ملتی ہے۔

حالانکہ، سیونتی کی اسکولیوسس نے انہیں بے ڈھب بنا دیا تھا، لیکن لاکھوں دوسرے مریضوں کے لیے یہ بیماری تکلیف دہ، کمزور کرنے والی اور ان کے دل کے عارضہ اور سانس کی تکلیف کا باعث بن سکتی ہے۔ دیہی علاقوں کے مریضوں کے لیے صحیح تشخیص کا پہلا مرحلہ بھی ایک چیلنج ہے۔

جیسے مرشد آباد کے سالار قصبہ سے تعلق رکھنے والے نوعمر محمد جمیل (بدلا ہوا نام ) بھی شدید درد میں مبتلا تھے۔ ان کے والدین زرعی مزدور کے علاوہ تعمیراتی مقامات پر کام کرنے والے مہاجر مزدور ہیں۔ وہ اپنے کمسن بیٹے کے دوبارہ چلنے کی امید کھو چکے تھے۔ انہوں نے پاری کو بتایا، ’’جمیل کی نقل و حرکت ختم ہو گئی تھی۔ ریڑھ کی ہڈی کی خرابی نے اس کے اعصاب اور پٹھوں کو جکڑ لیا تھا۔ وہ درد میں تھا اور کمزور ہوگیا تھا، اور کوئی وزن اٹھانے سے قاصر تھا۔‘‘

لیکن خوش قسمتی سے ان کی ملاقات سینئراسپائن سرجن ڈاکٹر سومیہ جیت باسو سے ہوئی۔ اور ۲۰۲۲ کے موسم گرما میں جمیل کی سرجری ہوئی، اور وہ پہلی بار بغیر درد کے اپنے پیروں پر کھڑے ہوئے۔

سیونتی نے بھی اپنی کمر اور ظاہری وضع کی درستگی کے بعد اسٹیج پر واپسی کی اور بطور تھیٹر آرٹسٹ اپنا کریئر بنایا، جو ان کی قوت مدافعت اور شفایابی کی غیرمعمولی انسانی صلاحیت کا ثبوت ہے۔ ’’میں نے اپنی تھیٹر ٹیم کے ساتھ کئی اسٹیج پرفارمنس دی ہے،‘‘ وہ مجھے بتاتی ہیں۔ ان کے پیچھے ان کے شوز کے پراپس چھت پر رکھے ہوئے ہیں۔

’’ہم نے سفر کیا،‘‘ ۲۵ سالہ خاتون معمول کی زندگی میں اپنی کامیاب واپسی پر زور دیتے ہوئے کہتی ہیں۔ اسکولیوسس کی خوفناک بیماری جس نے کبھی ان کی زندگی معطل کرنے کا خطرہ پیداکر دیا تھا، اب محض ایک فوٹ نوٹ بن گئی تھی۔

جب دنیا کے تیز ترین انسان یوسین بولٹ نے اپنی سوانح عمری میں یہ انکشاف کیا کہ انہیں اسکولیوسس تھی تو اس بیماری کو ایک بین الاقوامی چہرہ مل گیا۔ بولٹ کی ناہموار چال اب ایک تحقیقی مطالعہ کا موضوع ہے، جس کے مرکز میں ۱۰۰ اور ۲۰۰ میٹر کے اس اولمپک چیمپئن کی بائیو مکینکس ہیں۔

دنیا میں اسکولیوسس کے مریضوں کی ایک بڑی تعداد ہے ( کل آبادی کے دو سے چار فیصد لوگ اس سے متاثر ہیں۔ لڑکوں کے مقابلے لڑکیاں زیادہ متاثر ہوتی ہیں)۔ سال ۲۰۲۲ میں شائع ہونے والی اس رپورٹ میں کہا گیا ہے کہ ہندوستان میں اس کو لے کر بیداری کی بھی کمی ہے اور جانکاری کی بھی۔ اے آئی ایس اسکولیوسس کی واحد شکل نہیں ہے، بلکہ یہ پیدائشی، اعصابی اور انحطاطی بھی ہوتی ہے۔

اسپائن سرجن باسو نے دیکھا ہے کہ بہت سے مریض بہت دیر سے آتے ہیں، یا ان کی تشخیص ہی نہیں ہوتی ہے۔ ’’ہم میں سے بہت سے ڈاکٹروں کے پاس کوئی واضح جانکاری نہیں ہوتی ہے۔ آپ نے اسکولیوسس کے بارے میں کتنے مضامین دیکھے یا پڑھے ہیں؟ یہاں تک کہ ہندوستانی حکومت نے بھی اس پر کوئی ڈیٹا شائع نہیں کیا ہے،‘‘ ایسوسی ایشن آف اسپائن سرجنز آف انڈیا (اے ایس ایس آئی) کے سابق صدر باسو کہتے ہیں۔ انہوں نے مزید کہا کہ اعداد و شمار اور معلومات کی کمی کی وجہ سے متاثرہ افراد کی مدد رک جاتی ہے۔

اسکولیوسس کی تشخیص عام طور پر جسمانی معائنہ کے ذریعے ہوتی ہے، جس میں جسمانی وضع اور ریڑھ کی ہڈی کی ترتیب کا مشاہدہ شامل ہوتا ہے۔ خمیدگی کی شدت کا تعین کرنے کے لیے ایکس رے کے ذریعے تصدیق اور پیمائش کی جاتی ہے۔ لیکن اگر آپ کا تعلق مغربی بنگال کے دیہی علاقوں سے ہے، تو ایک عام ایکسرے حاصل کرنا ایک چیلنج بن جاتا ہے، کیونکہ ریاست میں ریڈیو گرافروں کی دو تہائی اسامیاں خالی ہیں (دیہی صحت کی شماریات ۲۰۲۱-۲۰۲۲)۔ یہاں صرف ایک تہائی کمیونٹی ہیلتھ سینٹرز (سی ایچ سی) میں ریڈیو گرافرموجود ہیں۔

مزید برآں، ایکسرے کے بعد کسی ماہر سے مشورہ لینا تقریباً ناممکن ہے، کیونکہ ریاست کے دیہی علاقوں میں ماہرین کی تشویشناک حد تک کمی ہے۔ یہاں ماہرین کی صرف چھ فیصد اسامیاں پُر کی گئی ہیں۔ دیہی علاقوں میں اسکولیوسس کا پتہ لگانے والے طبی ماہرین کو تلاش کرنا ایک اور چیلنج ہے۔ اس کے علاوہ ماہرین سے اپوائنٹمنٹ کے لیے طویل انتظار بھی اہل خانہ کی حوصلہ شکنی کرتا ہے۔

اور پھر پریشان والدین کو غلط معلومات اور گمراہ کن مشورے بھی دیے جاتے ہیں۔

کھوکُن پائیک کا کہنا ہے کہ غلط مشورے نے نہ صرف ان کی بیٹی کی تکلیف کو طول دیا، بلکہ اس کی وجہ سے ان کی بچت بھی ختم ہوگئی۔ ’’میں نے دو سے تین لاکھ روپے خرچ کیے ہیں۔ یہ میرے جیسے شخص کے لیے بہت بڑی رقم ہے،‘‘ پائیک کہتے ہیں جو پاتھر پرتیما گاؤں میں ٹھیلا گاڑی سے سامان پہنچا کر تقریباً ۸۰۰۰ روپے ماہانہ کماتے ہیں۔ ان کے جیسے زیادہ تر کنبے اونچی شرح سود پر نجی قرضوں کے ذریعے علاج کے لیے رقم کا انتظام کرتے ہیں۔

کھوکُن پائیک کی نو سالہ بیٹی سوما پائیک نے شروع میں کمر درد کی شکایت کی اور جلد ہی ان کی زندگی روزمرہ کی جدوجہد میں تبدیل ہو گئی۔ ’’درد میں اضافہ کی وجہ سے اس [سوما] کے لیے قلم پکڑنا مشکل ہو گیا،‘‘ مغربی بنگال کے جنوبی ۲۴ پرگنہ ضلع میں اپنے چھوٹے سے کچے مکان میں بیٹھے سوما کے والد یاد کرتے ہوئے کہتے ہیں۔ سوما کے اسکول کے کام کو نقصان پہنچا، اور یہ ان کے اور ان کے کنبے کے لیے مزید پریشانی کا سبب بنا۔

سال در سال درد بڑھتا گیا، بالآخر سوما کی نقل و حرکت بند ہوگئی۔ وہ ٹھیک سے سانس بھی نہیں لے پا رہی تھی۔ اس کے اہل خانہ نے اس کے علاج کے لیے بہت بھاگ دوڑ کی، اور اگلے تین سالوں میں انھوں نے صحت کی نگہداشت فراہم کرنے والوں سے مشورہ لیے اور علاج کے مختلف متبادل کی تلاش کیے۔ یہ جذباتی طور پر تھکا دینے والا اور مالی نقطہ نظر سے مشکل کام تھا۔

کھوکن پائیک کو وہ دن اچھی طرح یاد ہے جب وہ امید اور اضطراب کے ملے جلے احساس کے ساتھ اسپائن ریسرچ فاؤنڈیشن (ایس آر ایف) پہنچے تھے۔ ایس آر ایف کولکاتا میں واقع ایک غیر منافع بخش ادارہ ہے جو پچھلے ۱۶ سالوں سے پسماندہ خاندانوں کے لیے ریڑھ کی ہڈی کی سرجری کے لیے فنڈ فراہم کر رہا ہے۔

’’اپنی بیٹی کو دوبارہ اپنے پیروں پر کھڑا دیکھنا بہت اچھا لگا۔ ہمارے خواب و خیال میں بھی نہیں تھا کہ سرجری اتنی کامیاب ہوگی۔ تمام ڈاکٹروں کا شکریہ، ہم خوش نصیب ہیں،‘‘ ان کے والد پاری سے کہتے ہیں۔

فلم اسٹار ریتک روشن خوش قسمت تھے کہ ان کی اسکولیوسس کی تشخیص جلد ہو گئی اور صحیح ورزش سے وہ صحت یاب ہو گئے۔ لیکن سوما کے لیے گزرے ہوئے سالوں کا مطلب تھا کہ سرجری ہی واحد متبادل ہے۔ ’’اگر جلد تشخیص ہو جائے تو آپریشن کی ضرورت شاذ و نادر ہی پڑتی ہے۔ ہم صرف تسمہ لگا کر یا معمولی ورزش کی مدد سے ریڑھ کی ہڈی کے منحنی خطوط کو ٹھیک کرسکتے ہیں۔ ہمارے لیے آپریشن ہمیشہ آخری متبادل ہوتا ہے،‘‘ ڈاکٹر تری ننجن سارنگی کہتے ہیں۔ وہ ایک نیورو اینستھیزیولوجسٹ اور ایس آر ایف کے بانی ٹرسٹی ہیں۔ ان کے ۱۵ سالہ کریئر کے دوران اتنے معاملے آئے ہیں کہ ان کے لیے سب کو یاد رکھنا مشکل ہے۔

’’آپریشن اہل خانہ کے لیے ایک بہت بڑا مالی بوجھ ہوتا ہے۔ خمیدگی کو درست کرنے کے آپریشن پر ۵ سے ۱۵ لاکھ روپے خرچ ہوسکتے ہیں،‘‘ وہ مزید کہتے ہیں۔ سرجریوں کی تعداد، درآمد شدہ یا مقامی اسکریو کا انتخاب، ہسپتال میں صحت کی بحالی کا وقت، یہ تمام چیزیں اس میں شامل ہو جاتی ہیں۔ وہ وضاحت کرتے ہیں کہ انشورنس کمپنیاں عام طور پر اسکولیوسس سرجری کا بیمہ نہیں کرتی ہیں، حالانکہ یہ کاسمیٹک سرجری نہیں ہے، بلکہ ایک حفاظتی سرجری ہے۔

مغربی بنگال کے جنوبی ۲۴ پرگنہ کی ایک اور نوعمر لڑکی کے لیے بھی سرجری ہی واحد متبادل تھی۔ پندرہ سالہ میناکشی (بدلا ہوا نام ) دیہی علاقے میں رہتی ہیں اور شروعات میں ان کے مرض کی تشخیص نہیں ہو پائی تھی۔

"’’یری بیٹی لگاتار ۱۰ منٹ سے زیادہ کھڑی نہیں رہ سکتی تھی۔ وہ اپنی طاقت کھو چکی تھی۔ یہ دیکھ کر دل بیٹھ جاتا تھا کہ ہماری چاق و چوبند لڑکی بستر سے نہیں اٹھ سکتی تھی،‘‘ ڈائمنڈ ہاربر میں مقیم میناکشی کے والد نرمل سرکار کہتے ہیں۔ وہ یہاں مچھلی ذخیرہ کرنے والی ایک یونٹ میں بطور مینیجر کام کرتے ہیں۔ ان کی ماہانہ آمدنی تقریباً ۱۰ ہزار روپے ہے۔ ان کی بیٹی کی سرجری کا خرچ ان کی چھ سال کی تنخواہ کے برابر تھا۔ ’’ہم پریشان تھے۔ ہم نے امید چھوڑ دی تھی،‘‘ ڈائمنڈ ہاربر کے پرشور مچھلیوں کے اسٹوریج میں پاری سے بات کرتے ہوئے انہوں نے کہا۔

ایس آر ایف سے اتفاقیہ تعارف سےان کی پریشانیاں ختم ہو گئیں۔ ’’آپریشن کے دو ہفتے بعد میری بیٹی اپنے پیروں پر واپس کھڑی ہوگئی تھی۔ اب وہ دسویں جماعت کا امتحان دینے کے لیے تیار ہے،‘‘ وہ خوش ہوکر کہتے ہیں۔ اور وہ لڑکی جو چلنے کی صلاحیت اور طاقت کھو چکی تھی، اب روزانہ سائیکل چلا کر اسکول جاتی ہے۔

میں نے جتنے بھی ڈاکٹروں سے ملاقات کی، سب نے اس بات پر زور دیا کہ اس بیماری کی روک تھام کے لیے بچوں اور والدین میں اس کے بارے میں بیداری پیدا کرنا بہت ضروری ہے۔ ایس آر ایف نے کولکاتا اور اس کے گرد و نواح کے پسماندہ اسکولوں میں اسکریننگ پروگرام شروع کیا ہے۔ ڈاکٹر سومیہ جیت باسو کہتے ہیں، ’’ہم سے وابستہ سرجن باقاعدگی سے اپنے خرچے پر اسکولی کلینک کا دورہ کرتے ہیں۔‘‘

اسکولیوسس کے لیے وقف دو ہفتہ میں ایک بار لگنے والی اپنی کلینک میں، باسو تقریباً ۴۰-۵۰ مریضوں کو دیکھتے ہیں۔ میں ایسے ہی ایک کلینک کا حصہ تھا جہاں وہ مغربی بنگال کے ضلع نادیا سے تعلق رکھنے والے ایک مریض کے اہل خانہ سے بات کر رہے تھے۔ وہ یہ بتا رہے تھے کہ کس طرح تسمہ باندھنے کے باوجود اسکولیوسس کے بڑھنے کو نہیں روکا جا سکا، اور مریض کی نقل و حرکت اور یہاں تک کہ اس کے قلبی فنکشن کو بچانے کے لیے سرجری کیوں ضروری ہے۔

میں نے والدین کو سوالات پوچھتے ہوئے جدوجہد کرتے اور جوابات سے خوفزدہ ہوتے ہوئے دیکھا ہے: ’’کیا وہ اسکول جا سکتی ہے؟ کیا وہ دوبارہ سوئمنگ کلاسز میں شامل ہوسکتی ہے؟ اگر وہ دوبارہ چل نہیں سکی تو کیا ہوگا؟‘‘

باسو نے انہیں یقین دلایا، لیکن ساتھ ہی خبردار کیا: ’’آپ کی بیٹی کو کسی بھی حالت میں ورزش نہیں چھوڑنی ہے۔‘‘ انہوں نے مزید کہا کہ ان کی ٹیم کا ایک فزیو تھیراپسٹ بحالی کے پورے عمل کے دوران ان کے رابطے میں رہے گا۔

آپریشن کے بعد فزیو تھیراپی آخری مرحلہ ہوتا ہے۔ فزیو تھیراپسٹ شووک گھوش جب ایک مریض کو دیکھنے گئے تھے تو میں ان کے ساتھ تھا۔ اس کی سرجری دسمبر ۲۰۲۴ میں ہوئی تھی۔ ان کی خوش مزاجی ان کے مریضوں کے لیے ایک فوری یقین دہانی کا سبب بن جاتی ہے۔

ہم ہگلی ضلع کی ایک کچی بستی میں گئے جہاں ۱۴ سالہ سہانا پروین (بدلا ہوا نام) اپنے والدین کے ساتھ رہتی ہیں۔ جیسے ہی ہم ۱۰x۱۲فٹ کے کمرے کے اندر داخل ہوئے، ہماری نظریں فوراً اس نوعمر لڑکی پر پڑیں جو بغیر کسی سہارے کے چہل قدمی کر رہی تھی۔

گھوش کو دیکھ کر سہانا خوشی سے جھوم اٹھی۔ گھوش کی ٹیم اس کی اسکولیوسس کی سرجری کے بعد متعدد بار اس سے مل چکی ہے۔ اپنی چہل قدمی کے دوران رک کر اس نے کہا: ’’جب سے میری سرجری ہوئی ہے، کوئی بھی مجھے الگ طرح سے نہیں دیکھتا۔ میں بہت آرام محسوس کرتی ہوں اور پراعتماد ہوں۔ میں ورزش ضرور کروں گی۔

…لیکن اب میں کبوتروں کو دانا ڈالنے چھت پر جا رہی ہوں۔‘‘

ترجمہ نگار: شفیق عالم