سبر آدیواسیوں کو نمک اور تیل بھی میسر نہیں

باتو ملِک چاول کو تھوڑا ذائقہ دار بنانے کے لیے لال مرچ اور نمک پیس رہی تھیں۔ انہوں نے کہا، ’’پانتا بھات [بچے ہوئے چاول کو رات بھر پانی میں چھوڑنے کے بعد اس میں خمیر اٹھتا ہے، اسے ہی پانتا بھات کہتے ہیں] کے علاوہ ہمارے پاس کھانے کے لیے اور ہے ہی کیا؟‘‘

شام ہو چکی ہے۔ باتو اور ان کے شوہر جوگین ملِک ابھی ابھی پاس کے جنگل سے لوٹے ہیں۔ اس آدیواسی بستی کے دیگر کنبوں کی طرح باتو اور جوگین بھی دن بھر جنگل میں سال (شوریا روبسٹا) کے پتّے اکٹھا کرتے ہیں، جنہیں ہفتہ واری بازار میں فروخت کیا جاتا ہے۔

ان کا گھر مغربی بنگال کے جھاڑگرام ضلع کے بیناشولی گاؤں میں ہے، جہاں کی اکثریت سبر آدیواسیوں (مغربی بنگال میں ’سوَر‘ کے طور پر درج) پر مشتمل ہے۔ اس آدیواسی برادری کا شمار ملک کے سب سے غریب اور پس ماندہ طبقوں میں ہوتا ہے، جو بھکمری اور سوء تغذیہ کا شکار ہیں۔

میں گزشتہ کئی برسوں سے سبر آدیواسیوں کی خیر خبر لینے کے لیے اس علاقہ میں آتا رہا ہوں۔ برطانوی دورِ حکومت میں انہیں ’مجرم پیشہ قبیلہ‘ کا درجہ دیا گیا تھا، جسے ۱۹۵۲ میں ختم کر دیا گیا۔ لیکن آج بھی اس برادری کے زیادہ تر لوگوں کے پاس اپنی زمین نہیں ہے اور گزر بسر کے لیے یہ لوگ جنگلات پر منحصر ہیں۔ پڑھیں: بھکمری کے شکار مغربی بنگال کے سبر آدیواسی

جب بھی میں یہاں آتا ہوں، تو دیکھتا ہوں کہ یہاں کے آدیواسیوں کی زندگیاں ویسی کی ویسی ہیں۔ اتنے برسوں، دہائیوں میں ان کی زندگی میں کوئی تبدیلی نہیں آئی ہے۔ بھوک مٹانے کے لیے یہاں کے لوگ مہوا (مدھوکا لانگی فولیا) سے بنی مقامی شراب پیتے ہیں۔ شراب یہاں کھانے کا متبادل بن گئی ہے، کیوں کہ اسے پینے کے بعد پیٹ بھرا ہوا سا محسوس ہوتا ہے۔ شراب نوشی کا مسئلہ بڑھنے کی وجہ سے تقریباً ہر گھر سوء تغذیہ اور خون کی کمی کے مسئلہ میں گرفتار ہے۔

جنگل کے بارے میں سبر آدیواسیوں کی سمجھ کافی گہری ہے، جس کی وجہ سے وہ اس سے ملنے والی موسمی پیداواروں اور چیزوں پر منحصر رہتے ہیں۔ جیسے: پھل، قند، چوزے، سانپ، مینڈک، گھونگھے، چھوٹی مچھلیاں، کیکڑے، چوہوں کے بلوں سے نکالا گیا دھان، چھوٹے جنگلی جانور، شہد وغیرہ۔ لیکن ہندوستان میں جنگلوں کی کثافت مسلسل گھٹتی جا رہی ہے۔ سال ۲۰۲۳ کی اسٹیٹ آف انڈیاز فاریسٹ رپورٹ کے مطابق، ’’۲۰۱۱ سے ۲۰۲۱ کے درمیان پورے ہندوستان میں ۲۸ء۴۰۷۰۹ مربع کلومیٹر کے دائرہ میں پھیلے بہت زیادہ گھنے اور درمیانی گھنے جنگل کھلے جنگلوں میں بدل گئے۔‘‘

کونڈا بھکتا ۲۰۲۶ کی شروعات میں جنگل سے جلاون کی لکڑی لے کر لوٹتے وقت ہاتھی کے حملہ کا شکار ہوئے تھے۔ وہ بتاتے ہیں، ’’جنگلوں میں درخت اتنے کم ہو گئے ہیں کہ اب ہمیں ہاتھیوں کا سامنا پہلے سے کہیں زیادہ کرنا پڑ رہا ہے۔ مجھے اپنی ٹانگ گنوانے کا خطرہ ہے۔‘‘

روایتی غذائی ذرائع کی کمی کے سبب اب وہ عوامی نظام تقسیم (پی ڈی ایس) پر منحصر ہیں۔ مغربی بنگال میں انتیودیہ انّ یوجنا (اے اے وائی) راشن کارڈ کے تحت، کارڈ رکھنے والے کنبوں کو ہر مہینے ۱۵ کلو چاول اور ۲۰ کلو گیہوں ملنا چاہیے۔ لیکن سنگدھوئی گاؤں کے سبر آدیواسی اجیت کوٹل کہتے ہیں، ’’ہمیں راشن ڈیلر پورا راشن نہیں دیتے۔ چاول ہمیشہ کم ملتا ہے۔ کیوں کم ملتا ہے، ہمیں نہیں معلوم۔ ہم نے شکایت بھی کی، لیکن کچھ نہیں ہوا۔‘‘

اس رپورٹر نے پایا کہ اجیت جیسے کئی کنبوں کو اتنا راشن نہیں ملتا جتنا انہیں ضابطہ کے مطابق ملنا چاہیے۔

جنہیں پورا راشن مل بھی جاتا ہے، انہیں نہیں معلوم کہ صرف چاول کے ساتھ اور کیا کھائیں؟ پراسیہ گاؤں کے سبر آدیواسی اجیت بھوئیاں کہتے ہیں، ’’جنگل برباد ہو رہے ہیں اور اس کے ساتھ ہی ہمارے کھانے کے ذرائع بھی۔‘‘ وہ مزید کہتے ہیں، ’’کئی دن ایسے گزرے ہیں جب ہم نے صرف ایک بار پکے ہوئے چاول کا پتلا پانی پی کر دن گزارا ہے۔‘‘

بھرم نائک کی ۱۵ سال کی بیٹی روپالی نائک کی ابھی پچھلے سال (۲۰۲۵) موت ہو گئی۔ بیناشولی گاؤں کے رہنے والے بھرم نائک بتاتے ہیں، ’’میری بیٹی طویل عرصہ سے خون کی کمی [انیمیا] کا شکار تھی۔ سمجھ لو بچپن سے ہی۔ کبھی کبھی مجھے لگتا ہے کہ اگر اسے مقوی غذا ملی ہوتی تو شاید وہ اس سے لڑ پاتی۔‘‘

عمر کی پانچ دہائی پار کر چکے نائک کہتے ہیں کہ ان کی فیملی ہفتہ واری بازار میں سال کے پتّے بیچ کر اپنا گزارہ کرتی ہے۔ ’’اوڈیشہ سے لوگ انہیں خریدنے آتے ہیں۔ ایک ہزار پتّوں کے ایک گٹھر کے ۶۰ روپے ملتے ہیں۔ اگر میں ہفتہ میں چار گٹھر بیچ دوں، تو ۲۴۰ روپے کما لیتا ہوں۔ یہاں زیادہ تر کنبوں کی کمائی تقریباً اتنی ہی ہے۔‘‘ سال ۲۰۱۳ کی ایک رپورٹ کے مطابق، برادری میں شرح خواندگی صرف ۴۰ فیصد ہے۔ غریبی اور ناخواندگی کے سبب سبر لوگ بچولیوں پر منحصر رہنے کو مجبور ہیں۔

ہماری بات چیت میں دن ڈھل گیا۔ سنگدھوئی میں جنوری کی سرد ہوا سے میرے ہاتھ پیر کانپ رہے تھے۔ لیکن یہاں کئی گھروں میں ٹھیک سے چھت بھی نہیں ہے۔ سندھیا بھکتا کھلے آسمان کے نیچے کھانا بنا رہی تھیں اور ان کا پالتو طوطا ان کے آس پاس کھیل رہا تھا۔ جب میں نے ان سے رات کے کھانے کے بارے میں پوچھا، تو انہوں نے بتایا، ’’آج رات ابلی ہوئی سبزیاں اور چاول بنا ہے۔‘‘