अंधियार मं परे झारग्राम के सबर

“रोज के पंताभात (बासी) खाय के छोड़ हमर करा खाय बर अऊ काय हवय?” बासी मं लाल मिर्चा अऊ नून ला रमजत बातो मल्लिक कहिथे.

संझा के बखत हवय, बाटो अऊ ओकर घरवाला योगेन मल्लिक तीर के जंगल ले तुरते लहूटे हवंय. आदिवासी बस्ती के आने परिवार मन के जइसने, ये जोड़ा घलो दिन भर जंगल मं सरई पाना टोरे मं गुजार देथे, जेन ला वो ह हफ्ता बजार मं बेचे सकय.

ओकर मन के घर पश्चिम बंगाल के झारग्राम जिला के बेनाशुली गाँव मं हवय – जिहां खास करके सबर आदिवासी (पश्चिम बंगाल मं येला सबर के रूप मं सूचीबद्ध करेगे हवय), समाज के लोगन मन रहिथें. ये आदिवासी समाज देस के सबले गरीब अऊ वंचित लोगन मन ले एक आय, जेन ह भूखमरी अऊ कुपोसन के संग भारी कठिन जिनगी जीयत हवंय.

मंय कतको बछर ले सब्बर समाज के लोगन मन के जानकरी जुटाय बर ये इलाका मं जावत रहे हवंव. अंगरेज मन ये मन ला आपराधिक जनजाति के ठप्पा लगा दे रहिन, फेर साल 1952 मं ये मन ला येकर सूची ले हटाय गीस. बनेच कम लोगन मन करा जमीन हवय अऊ वो मन अपन गुजारा बर जंगल के भरोसे हवंय. पढ़व: सबर आदिवासी: 70 बछर बाद घलो कोनहा मं परे भूखन मरत

जब घलो मंय उहाँ जाय हवं, त देखे हंव के ओकर मन के हालत मं कोनो सुधार नइ होय हवय- न त कुछु बछर मं अऊ न कतको दस बछर गुजर के बाद. भूख मिटाय के काम, मऊह दारु खाय के काम करथे; येला पिये के बाद पेट भरे जइसने लागथे. असल मं, करीबन हरेक के घर-परिवार मं दारू के लत तेजी ले बढ़त हवय (मऊहा दारू करीबन हरेक जगा बनाय जाथे), जेकर सेती कुपोसन अऊ खून के कमी जइसने समस्या आम बात होगे हवय.

जंगल के गियान सेती सबर आदिवासी सीजन के हिसाब ले मिलेइय्या जिनिस मन के भरोसे रहिथें: जइसने फर. कांदा, चिरई, सांप, मेचका, घोंघी, नान-नान मछरी अऊ केंकरा, मुसुआ के बिल ले मिले धान, छोटे जानवर,मंदरस अऊ कतको जिनिस. फेर देस के जंगल कम होवत जावत हवंय - “साल 2011 ले 2021 के बीच मं, 40,709, 28 वर्ग किलोमीटर भारी घन जंगल (वीडीएफ) अऊ मंझोला घन जंगल, खुला जंगल बन गीस”(स्टेट ऑफ़ इंडियाज़ फ़ॉरेस्ट रिपोर्ट 2023).

कोंदा भक्ता कहिथे, “जंगल अतक कम होगे हवय के हाथी मन ले आमना-सामना अब पहिली ले जियादा होथे; मोला अपन गोड़ खराब होय के डर हवय.” कोंदा भक्ता उपर साल 2026 के सुरु मं जंगल ले लकरी ले के लहूटे बखत हाथी ह बेरहमी ले हमला कर दे रहिस.

अब पारंपरिक खाय के जिनिस मिले मुस्किल होगे हवय, ते पायके वो मन सरकारी रासन (पीडीएस) के भरोसे हवंय. सरकार के अंत्योदय अन्न योजना (एएवाई) रासन कार्ड के तहत, पश्चिम बंगाल मं काबिल परिवार मन ला हरेक महीना 15 किलो चऊर अऊ 20 किलो गहूं मिलथे. फेर सिंगधुई गाँव के सबर आदिवासी अजीत कोटल कहिथे, “हमन ला रासन सोसायटी के रासन देवेइय्या ले अपन जरूरत के मुताबिक पूरा चऊर नइ मिलय. ये हमेसा कम होथे. हमन ला नइ पता काबर होथे. हमन सिकायत घलो करेन, फेर कुछु नइ होइस.”

ये रिपोर्टर ह देखिस के अजीत जइसने कतको परिवार मन ला ओकर मन के हक ले कम मिलथे.

जेन लोगन मन अइसने करथें घलो, त ले वो मन जियादा कुछु करे नइ सकंय.अजित भुइयां कहिथे, “जंगल नंदावत जावत हवय अऊ खाय के जिनिस घलो.” परसिया गाँव के बासिंदा सबर आदिवासी अजीत बतावत जाथे, “अइसने कतको दिन गुजरे हवय जब हमन सिरिफ एक बेर पसिया पीके रहि जाथन.”

बीते बछर 2025 मं भमरा नायक के 15 बछर के बेटी रूपाली नायक गुजर गिस. बेनाशुली गाँव के बासिंदा भमरा नायक ह ये रिपोर्टर ला बताइस, “ मोर बेटी ला करीबन बचपना ले खून के कमी के दिक्कत रहिस. कभू-कभू मोला लागथे के गर ओला खाय के पोठ जिनिस मिले रहितिस, त वो ह ये बीमारी ले लड़े सके रहितिस.”

50 बछर के उमर के नायक के कहना आय के ओकर परिवार हाट (हफ्ता बजार) मं सरई पाना बेचके गुजारा करथे. “ओडिशा ले लोगन मन येला बिसोय ला आथें. हमन 1,000 पाना के गड्डी ला 60 रूपिया मं बेचथन. गर मंय हफ्ता मं चार गड्डी बेचथों, त मोला 240 रूपिया मिलथे. इहाँ के अधिकतर परिवार करीबन अतकेच कमाथें.” 40 फीसदी साक्षरता दर (साल 2013 के रिपोर्ट) अऊ गरीबी सेती, सबर समाज के लोगन मन कोचिया के भरोसे हवंय.

गोठियावत बेरा ढरत जावत हवय. सिंगधुई मं जनवरी (पुस) के जाड़ ले मंय कांपत हवं, फेर कतको के घर मं बने ढंग के छानी घलो नइ ये. संध्या भक्ता खुल्ला मं रांधत हवय अऊ ओकर पोसे सुवा ओकर तीर मं खेलत हवय. जब मंय ओकर ले पूछेंय के रतिहा खाय बर काय बनात हवय, त वो ह कहिथे, “आज रतिहा बर साग अऊ भात हवय.”