‘आज त खाली नूने-भात खइनी ह’

“पांता भात (बासी भात आ पानी) छोड़ के हमनी लगे रोज खाए खातिर आउर का बा?” भात के स्वदगर बनावे खातिर लाल मरिचाई आ नून पीसत बातो मलिक कहली.

सांझ हो गइल बा. बातो आ उनकर घरवाला, योगेन मलिक लोग लगे के जंगल से अबही-अबही लउटल बा. दूनो प्राणी लोग, गांव के दोसर आदिवासी परिवार जइसन, रोज जंगल में दिन भर घूम-घूम के साल (शोरिया रोबस्टा) के पत्ता सब चुनेला आ हाट में बेचेला.

एह लोग के घर पस्चिम बंगाल के झारग्राम जिला के बेनाशुली गांव में पड़ेला. इहंवा जादेतर सबर आदिवासी समाज के लोग रहेला (बंगाल में एह लोग के सवर भी कहल जाला.) ई लोग देस के सबसे गरीब आ पिछड़ल समाज में आवेला, आ भूख आ कुपोषण के साया में जियत बा.

सबर लोग के जिनगी देखे आ दर्ज करे खातिर हम एह इलाका में कइएक साल से आ रहल बानी. अंगरेज लोग एह लोग के 'अपराधी जनजाति' के दरजा देले रहे, जेकरा 1952 में समाप्त कर देवल गइल. आजो बहुते कम लोग लगे जमीन बा, ऊ लोग जंगले के सहारे जी रहल बा. पढ़ीं: ‘नून-तेल सपना बा’

जब-जब हम इहंवा लउट के अइनी, त इहे देखनी कि एह लोग के हालत जस के तस बा, कवनो सुधार नइखे भइल. ना साल में, ना दसक में. भूख मिटावे खातिर महुआ (माधुका लॉन्गिफोलिया) से बनल देसी शराब लोग के खाना जइसन बन गइल बा. एकरा से पेट भरल-भरल लागेला. सांच पूछीं त, लगभग हर घर में शराब बनता आ पियल जाता. कुपोषण आ खून के कमी इहंवा के जिनगी के हिस्सा बन गइल बा.

जंगल के समझ होखे से सबर आदिवासी लोग मौसम के हिसाब से मिले वाला चीज खा के जिनगी चलावेला. फल, कंद-मूल, चिरई के बच्चा, सांप, बेंग, घोंघा, छोट मछरी, केकड़ी, चूहा के बिल से निकलल धान, छोट जानवर आ महुआ, शहद इत्यादि. बाकिर अफसोस कि भारत में जंगल अब पहिले जइसन घना नइखे रह गइल. भारत के स्टेट ऑफ इंडियाज फॉरेस्ट रिपोर्ट 2023 के हिसाब से, 2011 से 2021 के बीच 40,709,28 वर्ग किमी के घना जंगल में गाछ सब कम हो गइल आ बीच में जगह-जगह खाली जमीन देखाई पड़े लागल.

“जंगल अब एतना हल्का हो गइल कि हाथी से भेंट-घाट अब पहिले से जादे होखे लागल बा. हमरा त लागेला कि कहीं हम आपन गोड़ ना गंवा बइठीं,” कोंडा भोक्ता कहेलन. ऊ 2026 के सुरु में जंगल से लकड़ी लावे घरिया हाथी के हमला में गंभीर रूप से जख्मी हो गइल रहस.

असली देसी खानी मिलल मुस्किल होखे से, ऊ लोग अब पूरा तरीका से जन वितरण प्रणाली (पीडीएस रासन) पर निर्भर हो गइल बा. राज्य के अंत्योदय अन्न योजना (एएवाई) राशन कार्ड पर पस्चिम बंगाल में योग्य परिवार के हर महीना 15 किलो चाउर आ 20 किलो गेहूं मिल जाला. बाकिर सिंगधुई गांव के सबर आदिवासी अजीत कोटल के कहनाम बा, “रासन वाला हमनी के पूरा चाउर नइखे देत. हमेसा कम आवेला. पता ना काहे. हमनी शिकायतो कइनी, बाकिर कवनो सुनवाई ना भइल.”

रिपोर्टर पइलन कि अजीत जइसन बहुते परिवार के जेतना हक बा, ओकरा अनुसार रासन नइखे मिलत.

आ जेकरा मिलियो जाला, उहो जिनगी में कुछ खास जोड़ नइखे पावत. अजीत भुइयां कहेलन, “जंगल खाली हो गइल बा, हमनी के पेट भरे के साधन कम हो गइल बा.” ऊ परासिया गांव के सबर आदिवासी बाड़न. “बहुते दिन हमनी खाली एक टाइम पातर माड़ पी के गुजारा कइले बानी.”

बेनाशुली गांव के भामरा नायक के 15 साल के लइकी, रूपाली नायक पछिला साल (2025) ना रहली. ऊ बतावेलन, “हमार लइकी बहुते दिन से एनीमिया से परेसान रहे, लगभग कहीं जब ऊ बच्चा रहे, तबे से. हमरा त केतना बेरा लागेला कि जदि ओकरा सही खाना-पीना मिलल रहीत त ऊ एह तरह ना मरित,”

पचास पार नायक के कहनाम बा कि घर-परिवार के गुजारा हाट में साल के पत्ता बेच के होखेला. ऊ कहेलन, “ओडिशा से लोग एकरा कीने आवेला. हम 1000 पत्ता के एक बंडल 60 रुपइया में बेचिला. हफ्ता में जदि चार बंडल बेचा गइल त हमरा 240 रुपइया मिल जाला. इहंवा के परिवार एह तरीका से पइसा कमाला.” खाली 40 प्रतिशत साक्षरता (2013 के रिपोर्ट) आ भारी गरीबी चलते सबर लोग बिचौलिया के दया पर जियता.

बतकही के बीच दिन ढल रहल बा. जनवरी के ठंडा हवा सिंगधुई में देह कंपा रहल बा. बाकिर इहंवा के बहुते घर में ढंग के छतो नइखे. संध्या भक्ता बाहरे खाना बना रहल बाड़ी, उनकर पालतू तोता लगे मंडरा रहल बा. खाए में का बा, पूछला पर ऊ बतइली, “आज उसिनल तरकारी आ भात बनल बा.”