पीएसपी: बिकास के नाव में सह्याद्रि लोग डूब रहल बा

“हम एइजे पैदा भईल रहनी. एही जंगलन में, ए डोंगर (पहाड़) के बीच पलल बढ़ल हईं,” येमा सोंगड़ ए पत्रकार के अपनी गांव के बारे में बता रहल बाड़ें. उनकरी चेहरा पर मुस्कान लगातार खिल रहल बा. हरियाली से लदल सह्याद्रि के पहाड़ के बीच घेराईल लाल माटी के खपरा वाला घर देखे में प्रकृति आ मानव के शांत समागम निहर बुझाला. उ ए बात से अनजान बाड़ें बाकिर ई दुनिया के सबले समृद्ध आ संवेदनशील जैव विविधता वाला आठ ‘मुख्य इलाकन’ में से बा.

दुर्भाग्य से एकर 280 हेक्टेयर हिस्सा जल्दिये पानी में समाए वाला बा.

“हमनी के खेत हो डोंगर के पीछे बा,” येमा महाराष्ट्र के लादेवाड़ी गांव (काल्भोंडे गांव ग्राम पंचायत) के अपनी घर के आंगन में खड़ा हो के एगो पहाड़ी के ओर इशारा करत के कहेलन. उ आ उनकर मेहरारू सुली दूनो जाने आदिवासी हवें आ 70 के फेंटा में बाड़ें. उनके अपनी छोट खेत में वरई (बर्नयार्ड मिलेट) उगावे खातिर हर बेर एक घंटा के यात्रा करे के पड़ेला. “ई खेती बरसात के मौसम में होखेला. हमनी के 5-6 बोरा (कुंतल) मिलेला. एक एकड़ से भी कम खेत के ई कुल पैदावार हवे जेसे अगिला साल के फसल ले 15 सदस्यन के परिवार के पेट पाले के बा जेमे येमा, सुली, उनकर चार गो बेटा, तीन गो पतोह आ छव गो पोता-पोती बाड़ें सन. परिवार जेतना खेत पर निर्भर बा ओतने जंगल पर भी निर्भर रहे के पड़ेला.

“जंगलो हमनी के मदद करेला,” उ कहेलन. “फल, रानकंदो (वाइल्ड ट्यूबर्स), सब्जी, जुकाम, बोखार आ घुटना के दर्द खातिर औषधीय पौधा कुल जंगल से मिलेला.” येमा आ 97 परिवारन के उनकर समुदाय मा ठाकुर अनुसूचित जनजाति से सम्बंधित हवे आ एइजा ठाणे जिला के शाहपुर तालुका में उनके जिए में जंगल के महत्वपूर्ण भूमिका बा. “हमनी के पेड़ ना काटेनी जा. हमनी के टूटल टहनी इंधन खातिर उठावेनी जा. हमनी के पक्का मकान माटी, इंटा आ जंगल के लकड़ी से बनावेनी जा जवन दशकन ले चलेला.”

अपना मूड़ी के चारों ओर लपेटल गमछा के ठीक करत येमा सात दशक से अधिक समय से चलल आ रहल वन्यजीवन संघे अपनी सह-अस्तित्व के कहानी सुना रहल बाड़ें. “बिबट्या (चीतल) एइजा आवेला. मोर आ बानर भी एइजा लादेवाड़ी (गांव) में लउकत रहेला. एइजा कब्बो कवनो टकराव ना भईल.”

एकरी बजाय एगो एकदम अलग संसाधन संघर्ष से येमा के आसपास समस्या पैदा होखे के डर बा.

“सरकार बिजली बनावे खातिर एइजा एगो बांध बनावल चाहतिया,” येमा के पड़ोसी सोमनाथ वाघ कहेलन. ई 30 बरिस के किसान प्रस्तावित भावली पम्प्ड स्टोरेज प्रोजेक्ट (पीएसपी) के बारे में इशारा करत बाड़ें. लादेवाड़ी के लोगन के ए परियोजना के बारे में एमओयू साईन भईला के पूरा एक साल बाद, 2022 में पता चलल.

पीएसपी ऊर्जा भण्डारण प्रणाली हवे. एमे दू गो जलकोष आपस में जुड़ल रहेला. बिजली के खपत जब कम रहेला, तब ग्रिड पर बचल-खुचल ऊर्जा के इस्तेमाल स पानी के नीचे वाला जलाशय से ऊपर वाला जलाशय में पंप कइल जाला. आ जब बिजली के मांग ब़ जाला, त उहे पानी ऊपर से छोड़ल जाला आ ओहि से बिजली बनावल जाला. एके मौजूदा जलविद्युत परियोजना पर, मौजूदा जलाशय या नदी से बाहर के परियोजना के रूप में बनावल जाला.

भावली पीएसपी नदी से अलग (ऑफ़-रिवर) परिजयोजना हवे जेकर प्रस्तावित क्षमता 1500 मेगावाट (एमडब्ल्यू) बिजली उत्पादन करे के बा. ई भारत सरकार के देश के नवीकरणीय ऊर्जा क्षमता के 2030 ले 500 गीगावाट (जीडब्ल्यू) तक बढ़ावे के संकल्प के हिस्सा हवे. नासिक नगर निगम के इगतपुरी में जामुंडे गांव के पास स्थित भावली बांध परियोजना खातिर ऊपर के जलाशय होखी जबकि नीचे के जलाशय ठाणे के लादेवाड़ी के लगे बनावल जाई.

“हऊ ढलान देखतानी?” लगे के पर्वत श्रृंखला के ओर इशारा करत के सोमनाथ पूछेलन. “नासिक जाये खातिर हमनी के ओके पार करे के पड़ेला. एमे एक घंटा लागेला आ ई हमनी खातिर शार्ट कट निहर हवे.” ई रास्ता के उपयोग दूनो जिला के लोग करेला. एक बेर प्रोजेक्ट शुरू हो जाई त ए लोगन के अइसन रास्ता लेवे के पड़ी जेमे दुगुना समय लागी आ आवे-जाए में भी पईसा खर्च करे के पड़ी. प्रोजेक्ट में 35.18 हेक्टेयर निजी जमीन आ काफी अधिक 243.74 हेक्टेयर वन्यभूमि के जरूरत बा. पीएसपी से 10 परिवार विस्थापित होइहें सन आ काल्भोंडे, कोठाले आ जामुंडे गांव के अन्य 130 परिवारन पर एकर असर पड़ी.

सोमनाथ सुरंग, पावरहाउस आ अन्य कंक्रीट के बने वाला जगहन के ले के चिंता में बाड़ें जेकरा बनला के उम्मीद बा. “ए ढलान पर ई छोट खेत हमनी के समुदाय के लोगन के हवे. ई पानी में डूब जाई या त निर्माण खातिर साफ़ करा दिहल जाई.” एही में से एगो खेत से सोमनाथ के आठ लोगन के परिवार के पेट पाले खातिर पांच कुंतल धान मिलेला. “ई हमनी खातिर हमेशा के नुकसान (खेती के उपज के) बा.”

“हमनी के परिवार बड़ बा. हमनी के अपनी खेत आ जंगल के वजह से खईला पर कम खर्चा करेनी जा,” उ बतावेलन. एइजा अधिकांश लोग बीपीएल (गरीबी रेखा के नीचे) कार्ड होखला के बावजूद राशन ना ले पावेला. काहें कि सबसे नजदीक वाली राशन के दुकान 10 किलोमीटर दूर बा. सोमनाथ बतावेलन कि उनकी उमिर के बहुत लोग बेरोजगारी से जूझ रहल बा. लादेवाड़ी के निवासी आ आसपास के गांवन के ज्यादातर लोग पियाज के खेतन में काम करे खातिर आलेफाटा (नगर-कल्याण आ पुणे-नाशिक हाईवे के चौराहे पर स्थित आले गांव) जायेलें. ओमे से ज्यादातर लोग साल में दू तीन बेर ए खेतन में जाए खातिर लगभग दू महिना ले यात्रा करेला.

“आलेफाटा हमनी खातिर एमआईडीसी (महाराष्ट्र औद्योगिक विकास निगम) निहर बा,” सोमनाथ कहेलन. “हमनी के 300-350 रुपिया दिहाड़ी खातिर महिना में दू या तीन हफ्ता काम करेनी जा. नाहीं त हमनी के मुंबई या ठाणे में निर्माण स्थलन पर काम करे जायेनी जा.”

बेरोजगारी के मुद्दा कागज ले रहि जाला आ अक्सरहा अइसन परियोजना के पक्ष में माहौल बनावे के औजार बन जाला. ऊर्जा मंत्रालय सन् 2023 के दिशा निर्देश में कहले बा: “सीमेंट आ स्टील निहर स्थानीय उद्योगन के प्रोत्साहन मिली आ अर्थव्यवस्था में रोजगार सृजन के प्रेरणा मिली. एकर स्थानीय क्षेत्र के विकास में लाभकारी प्रभाव बा. पीएसपी सामाजिक आर्थिक आ क्षेत्रीय विकास के विचार जईसे इन्फ्रास्ट्रक्चर के अपग्रेड कईल आ रोजगार सृजन खातिर एगो आदर्श निवेश हवे.” दिशा निर्देश में कहीं नईखे बतावल गईल कि खेत आ जंगलन पर निर्भर समुदाय के आजीविका आ जीवनशैली के नुकसान के बदला में ‘पारिस्थिकी अनुकूल’ प्रस्ताव या जागरूकता के कवनो जिक्र बा, कि ना.

मार्गदर्शिका के अनुसार ई कुल परेशानी जेएसडब्ल्यू एनर्जी पीएसपी टू लिमिटेड के संघे ए 9,000 करोड़ के परियोजना के निर्माण खातिर अउरी माहौल बना दिही.

“ई समुदाय प्राकृतिक संसाधनन से समृद्ध क्षेत्रन पर सीधा तरीके से निर्भर बा; सबसे पहिले ओही लोगन पर असर पड़ी,” पुणे के पर्यावरणविद आ पारिस्थितिकी बहाली पर काम करे वाली संस्था ओइकोस के सह-संस्थापक मानसी करंदीकर कहेली. “अइसन क्लीन एनर्जी प्रोजेक्टन में ऊर्जा के उत्पादन के प्रक्रिया तेज होखेला बाकिर ओकरी (अन्य) प्रतिकूल प्रभावन के ना गिनल जाला.

“पश्चिमी घाटन के तटीय हिस्सा में जहां पीएसपी के निर्माण होखे वाला बा, अधिक बरखा, लाल माटी, आ गरम आर्द्र जलवायु के वजह से ओइजा बढ़िया जैव-विविधता आ संवेदनशील पारिस्थिकी तंत्र के संघे वनस्पतियन के बढ़िया वृद्धि होला,” मानसी कहेली. परियोजना के पर्यावरणीय मूल्याङ्कन में प्रस्तावित परियोजना स्थल पर वन्यजीव (संरक्षण) अधिनियम, 1972 के अनुसूची 1 से कई गो अत्यधिक संरक्षित प्रजातियन के भी मिलल दर्ज कईल गईल. एमे तेंदुआ, धारीदार गीदड़, सियार आ भेड़िया वगैरह शामिल बा. मूल्याङ्कन में ए क्षेत्र में उगे वाला तीन ‘लगभग संकटग्रस्त’ आ दू गो ‘संकटग्रस्त’ पौधन के प्रजातियन के भी दर्ज कईल गईल.

“ई जंगल माटी के बहे से बचावेला, जमीन के खुराक देवेला आ भूजल भराई में मदद करेला,” मानसी कहेली. जंगल के नुकसान भईला के मतलब ए फायदा के भी नुकसान बा. अइसन मौसम में मूसलाधार बरखा होखे लागेला, त माटी कट क बहे लागेला आ पहाड़ के खिसके के डर बढ़ जाला. ई विशेष रूप से चिंता के विषय बा काहे कि 2023 से पूर्व के दशक में पश्चिमी घाट के 58.22 वर्ग किलोमीटर जंगल पहिलहीं उजड़ चुकल बा.

“सरकार के लोग खुदे आराम से कह देवेला, “हे तर जंगल आहे (ई त जंगल हवे). बाकिर ई परियोजना निश्चित रूप से होखी. हमके ओ लोगन के बोली में कवनो चिंता परवाह नईखे लउकत,” ठाणे कलेक्टर कार्यालय के कुछ अधिकारियन संघे भईल भारी गंभीर बातचीत याद करत काशीनाथ अगिवले कहेलन. उ परियोजना के नाशिक किनारे पर स्थित जामुंडे गांव के सरपंच हवें. “जब जनवरी 2024 में एगो जन सुनवाई भईल रहे त उ लोग कहलें कि हमनी के एगो ग्राम सभा ठराव (प्रस्ताव) देवे के चाहीं, आ अगर हमनी के ना देब जा, तब्बो उ लोग एके करिहें काहें कि केंद्र सरकार के आदेश बा.”

काशीनाथ के मन में भरम आ लाचारी के लहर उठे लागल बा. “हमनी के गांव छोट बा. अगर हमनी के विरोध (पीएसपी के) कईलो चाहीं जा त हमनी के सबकर समर्थन ना मिली. कम से कम मुआवजा त मिली,” एके ले के उ आश्वस्त बाड़ें.

तब्बो काशीनाथ के कई गो चिंता बा. उ हमरी संघे जंगल की ओर चलत के आपन चिंता साझा करेलन आ बगल से बहत पानी के मन हरसावे वाला आवाज आ रहल बा. “एइजा बहुत नदी नाला बा. पानी पहाड़ी से आवेला. ए पानी में हमनी के मछरी भी मिलेला.” गर्मी में एइजा के निवासी लोग जलाशय से पानी ले जाला आ मानसून में खाए या बेचे खातिर मछरी पकड़ेला. “बांध बनला से ई प्राकृतिक बहाव रुक जाई. जंगल गइल त ई सब खतम हो जाई.”

“243 हेक्टेयर में फइलल ई जंगल बहुते बड़ बा. हमनी लगे काटल जंगल के बदला में गाछ लगावे खातिर जमीन नईखे,” मानसी करंदीकर कहेली आ बतावेली कि प्रभाव प्रबंधन योजना में 268,114 पौधन के मुआवजा के वनीकरण के उल्लेख बा. “उ लोग कवनो दूसरी जगह पर पेड़-पौधा लगाई.”

अइसन सब योजना सत्तर के फेंटा में पहुंचल काके सोंगड़ के बचकाना लागेला. “इहे जंगल दूसरी जगह कईसे बनावल जाई?” उ पूछेली. ई कहला में कवनो अतिश्योक्ति नईखे कि उ जंगल के हर कोना में कदम रख चुकल बाड़ी. “झाडांचा वय कोणाला माईत? (ए पेड़न के उमिर केकरा पता बा?) आदमी लोग ई पेड़ नईखे लगवले.”

काके अपनी एक कमरा के घर में चुपचाप बईठल बाड़ी. एक ओर कपड़ा के ढेर लागल बा आ दीवार पर नाम, नम्बर आ चित्र बनल बा. उ आ उनकर दिवंगत पति सकरु जंगल के उत्पादन के बेचला से मिलल पईसा से ई घर बनावल लोग. “हम आम, अमरुद, जाम्बुल (मालाबार प्लम), बोर (जुजुबे), पलश (बूटा मोनोस्पर्मा) के पतई, जंगली सब्जी एकट्ठा करेनी आ ओके कसारा के बाजार में बेच देवेनी. कुछ लोग एही पर निर्भर बा. हां! उ सुनिश्चित करेली कि हमनी के बूझ जाईं जा कि उ जंगल के केतना कदर करेली.

हाले में उ बेमार रहली. सबले नजदीक के स्वास्थ्य केंद्र कसारा शहर में लगभग 23 किलोमीटर दूर बा. “हमरा अक्सर कमजोरी बुझाला. सम्भव होखे त एगो दवाखाना (क्लिनिक) आसपास खोलवा दिहीं जहां हम चल के अपने से जा सकीं,” उ सरकार के एगो दोसर सुझाव देत के कहेली.

अगस्त 2024 में जब नदी घटी आ जल विद्युत् परियोजना खातिर बनल विशेषज्ञ मूल्यांकन समिति (ईएसी) के बैठक भइल, त लोग के कइ गो चिंता सभ उहंवा सामने आइल. पर्यावरणीय मंजूरी के तबले रोक दिहल गईल जबले जेएसडब्ल्यू माटी के नमूना, पानी के उपलब्धता आ वन्यजीव संरक्षण योजना पर अतिरिक्त जानकारी ना दे देवे. कंपनी से इहो कहल गईल बा कि उ एगो वचनपत्र जमा करे जेसे सुचिश्चित कईल जाओ कि मानसून के दौरान पानी के बहाव के रोके या अवरुद्ध करे के कवनो स्थिति ना बनी.

“बाकिर कम्पनी अपनी वादा पूरा करी?” काशीनाथ के शंका बा.

क्षेत्र के अन्य निवासी लोग भी मुद्दा के उठवले बा. “अगर जेएसडब्ल्यू जानकारी दे देई त का प्रोजेक्ट पास हो जाई?” बबन हरने पूछेलन जे शाहपुर के किसान आ सामाजिक कार्यकर्ता हवें. “आ ई एगो अनुसूचित क्षेत्र हवे, तब्बो ग्रामीणन के मंजूरी लिहला के बारे में सोचल भी ना गईल.”

विशेषज्ञ समिति प्रस्ताव पर विचार करे से पहिले एगो साईट विजिट के भी फैसला लेले बा. “बाकिर फिर से ई एगो औपचारिकता ही बुझा रहल बा,” हिमांशु ठक्कर कहेलन, इहां के साउथ एशिया नेटवर्क ऑन डैम्स, रिवर्स एंड पीपल (एसएएनडीआरपी) के समन्वयक हईं जवन नदियन, समुदायन आ बड़ पैमाना पर जल अवसंरचना से सम्बंधित मुद्द्न पर काम करे वाला एगो औपचारिक नेटवर्क हवे.

“देखीं, ईएसी हमेशा से अइसने रहल बा. ई त बस नाम के संस्था बा, एक तरह से रबर स्टाम्प वाला. ई कबो ना ना कहे,” हिमांशु कहेलन. “इहां तक ले कि पुणे में अदानी के वारंगी-वरसगाँव पम्प्ड स्टोरेज प्रोजेक्ट खातिर भी; हमनी के उनके (ईएसी) के लिखले रहनी जा कि एह से समुदाय के मछरी पालन आ संरक्षण इलाका पर बड़ असर पड़ी. तब्बो ऊ लोग एके मंजूरी दे दिहल. उ लोग बिना सोचले-समझले हरेक योजना पर मुहर लगा देत बा.”

ईएसी 29 मई 2025 के भईल एगो फ़ॉलो-अप मीटिंग में मंत्रालय से पूर्व पर्यावरण मंजूरी खातिर प्रस्ताव के सिफारिश कईलस.

रिपोर्ट छप गइल बाकिर जेएसडब्ल्यू कार्यालय आ विशेषज्ञ मूल्यांकन समिति अबहियो चुप्पी सधले बा, ई रिपोर्टर के टिप्पणी पर कवनो जवाब नइखे मिलल.

विडंबना बा कि जब भारत अपना हरित भविष्य के लक्ष्य के ओर कदम बढ़ा रहल बा, एतना जरूरी पारिस्थितिकी आ सामाजिक पहल के भूमिका कम रह जा रहल बा. भावली पीएसपी पूरा भारत में चिन्हित 164 संभावित परियोजना में से एक हवे जेमे से 36 गो महाराष्ट्र में बा. दरअसल ऊर्जा मंत्रालय पीएसपी प्रचार दिशा निर्देश पर्यावरणीय स्वीकृति के ‘जटिल’ आ पीएसपी के विकास खातिर एगो बाधा के रूप में देख रहल बा.

मानसी के कहनाम बा कि शहर जेतना तेजी से बढ़ रहल बा, आ बिना सोचले-समझले बिकास हो रहल बा, ओतने बिजली के भी मांग बढ़ रहल बा. एकरा से अइसन गांव पर बहुते दबाव पड़ रहल बा. “ई त सिस्टम के गड़बड़ी बा,” उ कहेली. भारत में ऊर्जा के खपत रोकल असंभव हो गईल बा जवन 1950 में 5,610 गीगावाट प्रति घंटा से बढ़ के 2024 में 1,440,310 गीगावाट प्रति घंटा हो गईल बा. आ कुल खपत के 41 प्रतिशत अबहियो उद्योगन के हिस्से बा.

सोलर चाहे पवन जइसन नवीकरणीय ऊर्जा मौसम के लगातार बदलत परिस्थिति पर निर्भर करेला जेकरी वजह से एकरी उत्पादन के नियंत्रित कईल लगभग असंभव हो जाला. जब ए तरह के बहुते स्रोत अब पावर ग्रिड से जुड़ गइल बा, त ग्रिड के ठीक से चलावे खातिर पीएसपी जइसन ऊर्जा बचावे वाला तरीका लावल अब बहुते जरूरी हो गइल बा. बाकिर जानकार लोगन के कहनाम बा कि कुछ आउरी आसान तरीका बा, जेपर विचार करे के चाहीं.

“हमनी के पीएसपी के पूरा विचार पर सवाल उठावे के जरूरत बा,” पुणे में सोसाइटी फॉर प्रमोटिंग पार्टिसिपेटिव इकोसिस्टम मैनेजमेंट (एसओपीपीईसीओएम) के संस्थापक सदस्य आ वरिष्ठ फेलो के. जे. जॉय कहेलन. “वर्तमान हाइड्रोपॉवर परियोजनन से अधिकतम पीकिंग आउटपुट (उच्च मांग के समय में ऊर्जा उत्पादन) सुनिश्चित कईल बेहतर विकल्प बा. ओकरी बादे ओ पीएसपी बांधन के बारे में सोचे के चाहीं जवन पारिस्थितिक तंत्र पर विनाशकारी प्रभाव डाले वाला बा.”

भारत के बढ़त ऊर्जा संसाधनन के चर्चा के बीच येमा आ सोमनाथ अभी ले एकरी कवनो फायदा के अनुभव नईखन कईले लोग. “हमनी के 2010 में बिजली मिलल बाकिर आठ घंटा (रोज) के कटौती के संघे, खास तौर पर गर्मी आ बरसात में,” अपनी घर के बरामदा पर आराम करत येमा कहेलन. “ई आपके मुंबई ना हवे जहां 24 घंटा बिजली रही.”

उनकरी पीछे उनकर घर खाली दरवाजा आ खिड़की से आ रहल रौशनी से रोशन बा. हमनी के उनकी घर में इलेक्ट्रिक सामान के नाम पर एगो सीलिंग फैन आ दू गो बलब लउकता.

“कुल बिजली कंपनी आ शहर खातिर बा. बाकिर इयाद रखीं, उ एइजा हमनी इहंवा बनेला.”

अनुवाद: विमल चन्द्र पाण्डेय