उजियार बर, अंधियार मं परे जिनगी

“मंय एक ठन जोरदार धमाका के आवाज सुनेंय अऊ धुआं के बादर ला देखत वो डहर भागेंय. धमाका ले फेक्टरी के कुछेक भिथि ढहगे रहिस. मंय देखेंय के लिंगसामी मलबा ले बहिर निकरत रहिस, अधनंगा, ओकर सब्बो कपड़ा लत्ता जर गे रहिस. जब हमन वोला इलाज बर ले जाय के बेबस्था करत रहेन, त वो ह मोला पूछत रहय के काय वो ह जींयत हवय, काय वो हा बांच गे हे. वो ह फटफटी मं बइठे नइ सकत रहिस, ते पायके हमन वोला एक ठन ठेला मं सुताके अस्पताल ले गेन.” एक झिन स्थानीय पत्रकार, मारेश्वरन, एक दिन बाद मोरे ले गोठियावत रहिस. वो ह शिवकाशी के तऊन पटाखा फेक्टरी ले रेंगे के रद्दा मं रहिथे जिहां 1 जुलाई 2025 मं धमाका होय रहिस.

मंय एक दिन बाद उहिच जगा मं लहुट आय हवं. कारखाना के फेरका मन बंद हवंय, एक ठन कारखाना के ढांचा बरबाद हो चुके हवय, अऊ तीर-तखार के इलाका मं पक्का रोड नइ ये. मोला इहाँ तक ले अपन फटफटी चलाके आय मं भारी मुस्किल होइस. मंय सोचत रहेंय के इहाँ ले लोगन मन ला 8 कोस ले जियादा दूरिहा अस्पताल ले जाय मं कतक मुस्किल होय होही.

धमाका वाले दिन बिहनिया करीबन 20 झिन काम के जगा मं रहिन. वो मन ले आठ झिन के उहिंचे परान चले गीस, दू झिन के दू दिन बाद परान चले गीस, अऊ आने तीन झिन बनेच जख्मी होय सेती बनेच बखत तक ले अस्पताल मं भर्ती रहिन.

मंय बालपन लेच पटाखा ले डेर्रावत रहे हवं. मोला जरे के डर लगे रहिथे. फेर तउन दिन शिवकाशी के सरकारी अस्पताल मं, मोला लगिस के मंय अपन डर ले घलो जियादा बदतर सपना के सामना करत हवं. अस्पताल के इमरजेंसी वार्ड ह जरे देह ले भरे रहिस. दुखियारी मरीज धन ओकर घर के लोगन मन ले कोनो कइसने गोठ-बात कर सकथे? मंय मंझनिया उहिंचे गुजारेंय.

47 बछर के लिंगसामी के हालत नाजुक हवय. ओकर जम्मो देह जर गे हवय, जेन ला डाक्टर मं 100 फीसदी जरे कहिथें. मंय ओकर ले बात करे के कोसिस करथों, फेर वो ह जियादा कुछु बनाय नइ सकिस. वो ह बस घेरी बरी एकेच सवाल करत रहय: वो ह बांचही धन नइ. अस्पताल ले छुट्टी मिले के संझा के मोला फोन आथे के वो ह गुजर गीस. अस्पताल मं ओकर आखिरी बोली आज घलो मोर दिमाग मं गूँजत हवय. ये वो मइनखे रहिस जेन ह अपन बेटी मन के बढ़िया पढ़ई-लिखई बर जिनगी भर आगि ले खेलिस. ओकर दूनों बेटी अपन काबिलियत ले दुहरी डिग्रीधारी आंय.

“ मोर ददा ह हमन ला बताय रहिस के वो ह पटाखा फेक्टरी मं ड्राइवरी करथे, फेर हमन ला पता नइ रहिस के वो ह उहाँ विस्फोटक बनाय के काम करथे. ये हमर बर भारी पीरा के बात रहे हवय,’ ओकर बड़े बेटी कृष्णवेणी कहिथे. बछर भर पहिली, लिंगसामी, जेन ह वो बखत बस ड्राइवर रहिस, विरुधनगर जिला के शिवकाशी मं कमल किशोर पटाखा फेक्टरी मं नऊकरी करत रहिस. “वो ह ड्राइवर त रहिस, फेर संग मं केमिकल मिलाय के काम घलो करत रहिस. सिरिफ ड्राइवरी के तनखा ले घर नइ चलत रहिस. अब मंय अपन दूनों बिनबियाहे बेटी मन संग अकेल्ला रहिगे हवं. पता नइ मंय वो मन के बिहाव कइसने करहूँ,” ओकर घरवाली राजम्मल कहिथे.

जिला के छिन्नगामनपट्टी गाँव के बासिंदा कमल कुमार, मायाकृष्णन अऊ सेल्वम के ये फेक्टरी मं 100 झिन काम करथें. ये सब्बो दलित आंय, जेन मं खतरनाक जिनिस मन ला धरे, बगेर कोनो उचित प्रसिच्छ्न धन सुरच्छा अऊजार के, बिन सुरच्छा वाले हालत मं बूता करथें, अऊ ये मन ले कतको ला मालिक ह राज्य बीमा धन देस के श्रम कानून के तहत मिलेइय्या दीगर लाभ के घलो हकदार नो हें.

हमर बर ये पूछे आसान आय: तुमन ये बूता काबर चुनेव?

उहिच फेक्टरी के एक झिन जख्मी मजूर, 48 बछर के मुरुग लक्ष्मी कहिथे, ये हमर किस्मत आय. मंय 500 रूपिया रोजी मं बूता करे ला आथों.” वो ह करीबन 8 कोस दूरिहा सुलकरई नांव के क़स्बा मं रहिथे अऊ रोज अपन घर के लकठा ले फेक्टरी मालिक मन के टेम्पो मं बइठ के आथे. वो ह बिहनिया 7 बजे ले रतिहा 12 बजे तक ले काम करथे. इहाँ बूता करेइय्या मरद लोगन मन ला अतकेच बेरा तक ले बूता करे के 1,000 रूपिया रोजी मिलथे.

“मोर घरवाला गुजर गे. मंय अपन परिवार के अकेल्ला कमेइय्या अवं. मोला दू झिन लइका ला पाले-पोसे परथे,” सुलकरई के 48 बछर के बेवा मुरुग लक्ष्मी कहिथे, जेन ह ये अलहन मं जख्मी होगे रहिस. वो ह कहिथे,” मंय 200 रूपिया रोजी मं पेपर मिल मं काम करत रहेंय, पइसा पूरत नइ रहिस. मंय 370 रूपिया रोजी मं पटाखा फेक्टरी मं काम करे लगेंय. जब मंय फेंसी पटाखा बर केमिकल मिलाय ला सुरु करेंय त मोला 500 रूपिया रोजी मिले लगिस.”

जब धमाका होइस मुरुग लक्ष्मी ला काम करे बछर भर होय रहिस. “मंय सब्बो कुछु सही करत रहेंय. कोनो आने के गलती रहिस अऊ मोर परान जावत जावत बांचिस. मंय भागेंय, फेर तभे हपट परेंय. धमाका मं मोर हाथ-गोड़ जर गे. मोला समझ मं नइ आइस के मंय काय करवं. मंय अपन हाथ मं पानी डारेंय. मोर हाथीपांव के आपरेसन हो चुके हवय. मोर गोड़ फिर ले सूज गे रहिस. ते पायके मंय वो बखत भागे नइ पावत रहेंय. मंय ये काम अपन घर के कतको समस्या सेती करत रहेंय. हमन कोन ला दोस देबो?”

हमन अक्सर देवारी ला जगमग जोत अऊ पटाखा के उछाह मं देखथन. अब तक ले मंय उजियार तरी लुकाय लोगन मन के असलियत ला लेके कभू सोचे नइ रहेंय, जेन मन के लड़ई ह अनदेखा रहि जाथे, अऊ जेकर मन के कहिनी अनसुना रहि जाथें. हमन ला वो लोगन मन ला काबर बिसोरे ला चाही जेन मन बछर भर अंधियार मं काम करथें जेकर ले हमन उजियार के तिहार मनाय सकन

वित्त मंत्री तंगम तल्लरस के हाथ ले कारणेसन जंक्शन मं इहीच मंसूबा ले अनावरण करे गे एक ठन मूर्ति –“शिवकाशी के प्रतिष्ठित पटाखा कारीगर मन के सम्मान मं”. हालत ला अऊ घलो सोचे के लइक बना देथे.ये मूर्तिकला कारखाना के मजूर मन के बिखरे, असल जिनगी ले बड़े हथेली ला उजागर करथे जेन मं एक झिन नानचिक टूरा हवय जेन ह फुलझड़ी धरे हवय. ये मूर्ति ह शहर मं मजूर मन के मरे के आंकड़ा उपर बनेच कम जिनिस ला उजागर करथे. फेर सोचे के बात आय के मूर्ति स्थापना के मुस्किल ले महिना भर बाद, शहर मं तीन ठन अऊ धमाका होइस.

माचिस अऊ पटाखा बनाय के केंद्र के रूप मं जाने जवेइय्या ये जिला मं 1000 ले जियादा लाइसेंस वाले फेक्टरी हवंय अऊ करीबन 3 लाख लोगन मन बिन सुरच्छा वाले ये काम के भरोसे हवंय. ये मन ले 55 फीसदी माईलोगन मन आंय, जेन मन मरद लोगन मन के बनिस्बत कम रोजी मं बूता करथें. सिरिफ साल 2025 मं, शिवकाशी मं करीबन 18 धमाका होय हवय जेन मं 30 झिन मारे गीन अऊ 29 झिन भारी जख्मी होइन. जिला कलेक्टर के आफिस मले मोला मिले आंकड़ा के मुताबिक, साल 2011 ले 20 23 के बीच, जब फेक्टरी मालिक पटाखा बनाय मं चीन ले मुकाबला करे के दावा करत रहिन, वो बखत शहर मं 190 अऊ आगि लगे के घटना मं 337 मजूर मारे गीन.

देस (भारत) मं अंगरेज मन के राज के बखत ले ये उदीम ह आजादी के बाद के 78 बछर मं जोरदार उन्नति करे हवय. तमिलनाडु फ़ायरवर्क्स एंड अमोरसेस मैन्युफैक्चरर्स एसोसिएशन के मुताबिक, आज भारत मं करीबन 80 फीसदी पटाखा विरुधनगर मं बनथे, जेकर कारोबार करीबन 6,000 करोड़ रूपिया हवय –अऊ ये ह हरेक बछर बढ़त जावत हवय.

दुनिया के बजार मं जाय के अपन योजना मुताबिक, एसोसिएशन ह हालेच मं शिवकाशी के पटाखा सेती “बने जिनिस मन” के श्रेणी मं भौगोलिक संकेत (जीआई) टैग बर अरजी देय हवय. दूसर डहर, वायु प्रदूषण ला लेके चिंतित सरकार, बेरियम नाइट्रेट ला बउरे मं रोक लगावत, ग्रीन पटाखा सेती कतको नीति बनावत हवय.

जीआई टैग बर अरजी अऊ ग्रीनपटाखा के बिचार ला लेके जेन उछाह हवय, ओकर ठीक उलट वो मजूर मन ला लेके कोनो उछाह नइ ये जेन मन खतरनाक केमिकल मन ला हाथ ले मेंझारथें. ये मन ले कतको कारखाना बगेर लाइसेंस वाले आंय अऊ कानून ला टोर के बनाय गे हवंय, अऊ नवा जमाना के वो मसीन के बगेर चलत हवंय जेकर ले मजूर मन के उपर जान के खतरा कम रहिथे.

मजूर मन ले गोठ बात करे के बादेच मोला गम होइस के तमिलनाडु मं पटाखा मालिक मन के एसोसिएशन त हवय फेर मजूर मन के कोनो संगठन नइ ये. वो लोगन मन के लड़ई अऊ समस्या मन ला उठाय बर कोनो संगठन नइ ये जेन मन जिनगी चलाय बर बूता करथें अऊ जेकर मन बर कोनो देवारी ह उजियार ले के नइ आवय.

जब मजूर मन ला वो मन के मूल हक ले दूरिहा राखे जावत हवय त जीआई टैग हासिल करे के काय मतलब?

ये चिन्हारी 1 जुलाई 2025 मं शिवकाशी मं फेक्टरी मं होय धामाका मं मारे गेय 10 झिन मजूर मन के सुरता मं हवय.

वैरामनी (35), सुलकरई
नागपांडी (28), सेवइकारनपट्टी
रामजयम (27), मीनमपट्टी
महालिंगम (46), मीनमपट्टी
चेल्लपांडी (करीबन 30), अनपनकुलम
राममूर्ति (55), ओ. कोविलपट्टी
पुन्नियमूर्ति (47), विरुधनगर
लक्ष्मी (करीबन 25), मदी सेनई
लिंगसामी (47), सेवलपट्टी
अझगराजा (28), सेवकारनपट्टी

अनुवाद: निर्मल कुमार साहू