आनी-बानी के भाखा-बोली, फेर खेल के भाखा एक

सात झिन नोनी, छै ठन गाँव, पाँच ठन महतारी भाखा, दू ठन खेल अऊ खेल के एक ठन भाखा!

रंजन राठवा (12), ज्योति भील (11), शर्मिला धायकी (9), किजल नायका (10) अऊ निरल राठवा (10), गुजरात के छोटा उदयपुर जिला के आदिवासी गाँव तेजगढ़ मं कोरज पहाड़ी के तरी मं बने अपन आवासीय प्राथमिक स्कूल, वसंत शाला के खेल के मैदान मं खेले मं मगन हवंय.

अड़को दड़को दही दडूको
श्रावण गाजे, पिल्लुपाके...

ये गीत गुजराती भाखा मं बड़-बड़ गीतो धन उटपटांग तुकबंदी मन के एक ठन बड़े खजाना ले एक आय, जेन ल राज भर के लइका मन खेले बखत गाथें. मजा के बात ये आय के ये तुकबंदी के भाखा ये टोली के ककरो के महतारी भाखा घलो नो हे. ये पाँचों नोनी मन स्कूल ले 10 ले 17 कोस दूरिहा के गाँव मं रहेइय्या अपन घर के लोगन मन ले राठवी, धाणकी, डुंगरा भीली, नायकी जइसने अपन आदिबासी भाखा मं गोठ बात करथें. फेर आदिवासी अकादमी के ये परिसर मं, जिहां ओकर स्कूल अऊ हास्टल बने हवय, मुख्यधारा के गुजरातीच ह वो मनके बोलचाल के भाखा बन गे हे.

वसंत शाला, शिक्षा के क्षेत्र मं एक ठन बहुभाषी प्रयोग आय जेन ह आदिवासी लइका मन ला वो मन के संस्कृति अऊ समाज ले जुड़ाव मं कोनो बाधा डारे बगेर स्कूली शिक्षा देय बर प्रतिबद्ध हवय. गुजरात के वडोदरा ले करीबन 30 कोस दूरिहा बने ये स्कूल मं, लइका मन ला अपन भाखा काम मं लाय बर प्रोत्साहित करे जाथे अऊ तीसरी क्लास तक के अधिकतर पढ़ई इहाँ के कतको जिनिस मन के उपर रहिथे. गुजराती के औपचारिक शिक्षा 4 थी क्लास ले सुरु करे जाथे.

वसंत शाला मं रहिके पढ़ेइय्या लइका मन के दाई-ददा मन अधिकतर गरीब, कमाय खाय बर बहिर जवेइय्या मजूर आंय, जेन मन बछर भर ले जियादा बखत तक ले जगा जगा जावत रहिथें, ते पायके ओकर लइका मन के बढ़िया पढ़ई-लिखई मुस्किल हो जाथे. ये कहे मुस्किल आय के वो मन के आन-आन जगा मन मं जाय अऊ दूसर, वो मन ले बड़े समाज के संग मेलजोलेच ह आय जेन ह गुजराती भाखा ला वो मन के संस्कृति मं जगा बनाय के मऊका दे हवय. धन ये ह एक ठन जरूरत आय जेन हा ये असलियत जाने के बाद के वो मन ला आखिर मं पारंपरिक शिक्षा तरीका के हिस्सा बने बर तियारे होयच ला परही. एक ठन अइसने जरूरत जेन ह ओकर भाखा ला सहज ढंग ले सीखे अऊ बोले जरूरी बनाथे.

वीडियो : 1

“हवे मारोवारो [अब मोर पारी आय]” लक्ष्मी अपन आगू बइठे एलिसा ले गुजराती मं धीरे ले कहिथे. वो ह नानकन कठवा ला बालू के ढेरी मं लुकाय बर ले जाथे जेन ला वो मन अपन बीच मं बनाय हवंय. वो मन उहिच स्कूल के अहाता के दूसर कोती काठियु शोधवानी रमत (‘कठवा खोजो’ खेल) खेलत हवंय. कावंत तालुका के अंबाडुंगर गाँव करे 11 बछर के एलिसा भील घर मं भीली कहिथे, अऊ धोरकुवा गाँव के 11 बछर के लक्ष्मी नायक नायकी कहिथे. अधिकतर कतको पारंपरिक खेल जइसने, ओकर मन के खेल बर बनेच कम धन कोनो संसाधन के जरूरत नइ परय. बालू ला कूढ़ो के राखे जाथे, अऊ एक झिन गड़ी कूढ़ोय बालू मं एक ठन नानकन लकरी ला लुका देथे.

वीडियो : 2

अनुवाद: निर्मल कुमार साहू