खेल-खेल में मेल सिखावे वाला स्कूल

सात लइकी, छव गांव, पांच ठो मातृभाषा. दू गो खेल आउर एगो खेल के भाषा!

बारह बरिस के रंजन राठवा, ग्यारह बरिस के ज्योति भील, नौ बरिस के शर्मिला धाएकी, दस के किंजल नायका, दसे बरिस के निरल राठवा. सभे कोई बसंत शाला के मैदान में खेल में मगन बा. ई स्कूल गुजरात के छोटाउदेपुर जिला के तेजगढ़ गांव में, कोरज हिल के नीचे बसल बा.

अड़को दड़को दही दड़ुको
श्रावण गाजे, पिल्लू पाके...

ई गीत ‘बड़-बड़ गीतो’ (तुकबंदी वाला खेल-गीत) में से बा, जेकरा गुजरात भर में बच्चा लोग खेले घरिया मजा खातिर गावेला. ई जान के बड़ा अचरज होखी कि जवन बाल गीत गावल जा रहल बा, ऊ उहंवा खेल रहल एक्को बच्चा के बोली में नइखे. खेले में लागल पांचो लइकी लोग घर में आपन-आपन तरफ के आदिवासी बोली बोलेला. जइसे कि राठवी, धानकी, डूंगरा भीली, नायकी. लइकी लोग के घर स्कूल के 30 से 50 किमी के घेरा में पड़ेला. बाकिर इहंवा आदिवासी अकादमी के कैंपस में, जहंवा ओह लोग के स्कूल आ हॉस्टल बा, ठेठ गुजरातिए में आपस में बोलल-बतियावल जाला.

बसंत शाला, पढ़ाई-लिखाई के एगो अइसन बहुभाषी परयोग बा, जे आदिवासी लइकन के आपन समाज आ माटी से जुड़ाव बिगाड़ले बिना पढ़ावे के काम कर रहल बा. ई स्कूल गुजरात में बड़ोदरा से कोई नब्बे किमी दूर बा. इहंवा लइकन सब के आपन घर-गांव के बोली में बतियावे आउर सीखे के आजादी बा. तेसर दरजा तक के पढ़ाई गांव के जिनगी आ देसज बात सब पर टिकल बा. गुजराती भाषा के औपचारिक पढ़ाई त चउथा दरजा से चालू होखेला.

बसंत शाला में जवन लइकन सब पढ़े आ रहेला, ओह लोग के माई-बाऊजी लोग जादेतर गरीब मजूर लोग बा. रोजी-रोटी खातिर सालो भर भटकत रहे वाला. एहि से आपन लइकन खातिर ढंग के स्कूल ना खोज पावेला. ई कहल मुस्किल बा कि गुजराती भाषा उनकर तहजीब में कइसे घुस गइल. का ई कुल काम परदेस जाए आ बड़हन-बड़हन जात-बिरादरी से रोज-रोज के मेलजोल के नतीजा बा. या ई भी हो सकेला कि ई सब एगो मजबूरी होखे, काहे कि आखिर में त लइकन सब के परंपरागत पढ़ाई के ढांचा के हिस्सा त बनही के पड़ी. एगो अइसन जरूरत जेकरा चलते ओह लोग के एह भाषा के बोले-बूझे में तनी सहज होखल जरूरी बना देले बा.

वीडियो: 1

“हवे मारो वारो (अब हमार बारी बा)” लक्ष्मी धीरे से सामने बइठल एलिसा से गुजराती में कहेली. ऊ लकड़ी के छोट टुकड़ा के बालू से बनल एगो पहाड़ के ढेर में लुका देवेली, जेकरा दुनो लोग मिल के बनवले रहे. दुनो जनी स्कूल के उहे मैदान में, दोसर कोना में ‘काठी खोजे के खेल (काठियु शोधवानी रमत)’ खेलत बाड़ी. ग्यारह बरिस के एलिसा भील कावंत तालुका के अंबाडुंगर गांव से आवेली. उनका घर में भील बोलल जाला. उहंई ग्यारहे बरिस के लक्ष्मी नायक धोरकुवा गांव से आवेली आ नायकी बोलेली. इनकर खेल में, बाकी पारंपरिक खेल नियर, जादे सामान के जरूरत ना पड़े. केतना बेरा त कुछुओ चीज के ना. इहंवा त बस दू गो खेले वाला आ तनी-मनी बालू चाहीं. बालू के ऊंच पहाड़ बना लेवल जाला, आ एगो खिलाड़ी ओह ढेर में लकड़ी के छोट काठी लुका देवेला. दोसरा के ओह काठी के खोजे के बा. ऊ जइसहीं मिल जाई, दोसर के काठी लुकाए के बारी आई.

वीडियो: 2

अनुवाद: स्वर्ण कांता