’لوگ ہمیں شک کی نظر سے دیکھتے ہیں‘

’’ہماری پوری زندگی حکومت اور دوسرے شہریوں کو کاغذات دکھانے اور یہ ثابت کرنے میں گزر گئی کہ یہاں آباد دوسرے لوگوں کی طرح ہم بھی اسی ملک کے شہری ہیں۔‘‘

بحرالاسلام کباڑ چھانٹنے کے اپنے کام میں مصروف ہیں۔ وہ چُنی گئی ردّیوں کا الگ الگ ڈھیر بنا رہے ہیں – جیسے پلاسٹک کی بوتلوں کا ڈھیر، گیلے کچروں کا ڈھیر، کارڈ بورڈ اور تھرمو کول کا ڈھیر، اور ان ڈھیروں کو پلاسٹک کی الگ الگ بوریوں میں بھرتے جا رہے ہیں۔ تقریباً ۳۵ سال کے بحرل اُن ۱۳ مہاجر خاندانوں میں سے ایک کے رکن ہیں جو آسام کے بارپیٹا، بونگئی گاؤں اور گوال پاڑہ سے آ کر یہاں رہ رہے ہیں۔ یہ خاندان ہریانہ کے اساور پور شہر کے خالی پلاٹ پر ایک ساتھ رہتے ہیں، اور اپنے گزارہ کے لیے کچرا بیننے اور انہیں چھانٹنے کا کام کرتے ہیں۔

’’لوگ ہمیشہ ہماری پہچان پر سوال کھڑے کرتے ہیں۔ آسام اور یہاں – دونوں جگہ ایک ہی حالت ہے۔‘‘ بحرل بتاتے ہیں کہ سرکاری ملازمین ان کی جھگیوں میں ان کی شناخت سے متعلق کاغذات کی جانچ کرنے کے لیے اکثر آ دھمکتے ہیں۔ ’’جب ہم ردّی چننے نکلتے ہیں تو لوگ ہم سے پوچھتے ہیں کہ ہم کہاں سے آئے ہیں۔ آسام کا نام سن کر انہیں لگتا ہے کہ ہم بنگلہ دیشی ہیں۔‘‘ وہ مزید کہتے ہیں کہ پولیس ان سے اکثر آسام سے پولیس جانچ کرانے کے لیے کہتی ہے، تاکہ یہ معلوم کیا جا سکے کہ ان کا کوئی مجرمانہ پس منظر تو نہیں ہے۔ ’’ہم انہیں یقین دلانا چاہتے ہیں، لیکن ہماری باتوں کی ان کے لیے کوئی اہمیت نہیں ہے،‘‘ آسام میں چلائی جا رہی قومی شہری رجسٹر (این آر سی) مہم کے بارے میں معلومات رکھنے والے بحرل کہتے ہیں کہ چونکہ ان کے پاس زمین پر مالکانہ حق سے متعلق کاغذات ہیں، اس لیے انہیں اس سے فکرمند ہونے کی کوئی ضرورت نہیں ہے۔

اسی پلاٹ پر رہنے والے دو بھائی ریاض اور نور اسلام بتاتے ہیں کہ انہوں نے آسام اس لیے چھوڑ دیا کیوں کہ برہم پتر کے نزدیک ہونے کی وجہ سے ان کے کھیت ہمیشہ سیلاب کی چپیٹ میں آ جاتے تھے، ایسے میں ان کے لیے کھیتی پر منحصر رہنا ممکن نہیں تھا۔ اُدھر بارپیٹا میں ان کے ۸۰۰ مربع فٹ کی زمین پر ان کے والدین ہری مرچ، ٹماٹر اور دوسری سبزیاں اُگاتے ہیں۔ ’’بہت زیادہ بارش ہونے پر ندی کا پانی ہمارے گھروں میں داخل ہو جاتا ہے، اور ہمیں اپنی جگہ چھوڑنی پڑتی ہے۔ ہم ایک جگہ سے دوسری جگہ پہنچنے کے لیے کیلا کے تنوں کا استعمال کرتے ہیں،‘‘ ان کے بھائی کہتے ہیں۔ نیشنل رموٹ سینسنگ سنٹر (این آر ایس سی) کے مطابق، سال ۱۹۹۸ سے ۲۰۱۵ کے درمیان آسام کا تقریباً ۷۵ء۲۸ فیصد علاقہ سیلاب سے بری طرح متاثر رہا ہے۔

بحرل، ریاض اور نور اب آسام میں اپنے گھروں سے ہزاروں کلومیٹر دور رہنے کے لیے مجبور ہیں۔ ان تینوں کے علاوہ ۱۱ دوسرے مہاجر خاندان بھی رہتے ہیں۔ یہ سبھی آسام کے بارپیٹا، بونگئی گاؤں اور گوال پاڑہ ضلعوں سے آئے ہیں۔ وہ ساتھ ساتھ کام کرتے اور ساتھ ساتھ رہتے ہیں، اور اس اجنبی جگہ پر ایک دوسرے کی مدد کرتے ہیں۔ روز بروز کی تفریق اور نقل مکانی کا درد اور مشکلوں کا سامنا کرنے میں بھی وہ ایک دوسرے کا سہارا بنتے ہیں۔

بحرل بتاتے ہیں، ’’اگر ہم میں سے کسی کو پیسوں کی ضرورت پڑتی ہے تو ہم ایک دوسرے کی پیسے سے بھی مدد کرتے ہیں۔ چونکہ ہم میں سے کچھ لوگ ہی واپس خود آسام جانے یا اپنی فیملی کو وہاں بھیجنے کا خرچ اٹھا پانے سے قاصر ہیں، اس لیے ہم عید اور بقرعید جیسے اپنے تہوار بھی ایک دوسرے کے ساتھ ہی منا لیتے ہیں۔ رمضان کے مہینہ میں ہم کبھی کبھی مل جل کر سحری بھی کر لیتے ہیں۔‘‘

ان میں سے زیادہ تر خاندان یہاں وبائی مرض سے پہلے ہی ۲۰۱۷ میں آ کر آباد ہو گئے تھے، اور جو رہ گئے تھے وہ لوگ بھی ۲۰۲۱ میں چلے آئے۔ انہوں نے ساتھ مل کر اس جگہ کو ۱۷ ہزار روپے ماہانہ کے کرایے پر لے لیا ہے۔ اس طرح ہر ایک فیملی پر ایک ہزار روپے سے کچھ زیادہ رقم کرایہ کے طور پر ادا کرنے کا بوجھ رہتا ہے۔ بحرل کی بیوی مفیدہ جیسی کچھ عورتیں بھی مردوں کا ہاتھ بٹاتی ہیں۔ مفیدہ ۱۰ویں پاس ہیں اور وہ بھی بونگئی گاؤں سے آئی ہیں۔ وہ آسامی زبان کے ساتھ ساتھ انگریزی بھی پڑھ اور لکھ سکتی ہیں۔ وہ ہر ایک فیملی کے ذریعہ اکٹھا کیے گئے کباڑ کو وزن کرنے کے بعد ایک چھوٹی سی نوٹ بک میں اس کا وزن لکھ لیتی ہیں۔

ان تمام خاندانوں کا پورا کام کاج ہی کباڑ سے متعلق ہے۔ کچھ رہائشی علاقوں میں کباڑ چنتے ہیں، جب کہ بحرل جیسے لوگ آس پاس کی فیکٹریوں اور صنعتی علاقوں سے کچرا اکٹھا کرنے کا کام کرتے ہیں۔ چھوٹے بچے کچرا چھانٹنے، اور کئی بار بڑوں کے ساتھ جا کر کچرا بیننے جیسا کام کرتے ہیں۔

’’ہمارا کام صبح ۷ بجے تک شروع ہو جاتا ہے۔ ہم شہر کے گلی محلوں میں گھوم گھوم کر کچرا چنتے ہیں اور دوپہر کو تین بجے تک واپس لوٹ آتے ہیں،‘‘ نور اسلام کہتے ہیں، لیکن یہ بتانا بھی نہیں بھولتے کہ اگر کام زیادہ ہونے کی حالت میں انہیں واپس لوٹتے ہوئے رات کے ۹ بھی بج جاتے ہیں۔ کچرا چن لیے جانے کے بعد انہیں موٹے طور پر ۳۰ سے ۳۵ گروپوں میں چھانٹ لیا جاتا ہے، مثلاً خالی ہو چکی بوتلیں، پلاسٹک کی تھیلیاں، چپٹیاں، تھرموکول، کانچ کی چیزیں اور دوسرے کباڑ۔ ’’ہم کباڑوں کو مقامی تاجروں کے ہاتھوں بیچ دیتے ہیں،‘‘ بحرل کہتے ہیں۔ قیمتیں تاجر ہی طے کرتے ہیں جو عموماً مانگ پر منحصر ہوتی ہیں، اور ردّی چننے والوں کو انہیں ماننا پڑتا ہے۔ ’’ایک کلو تھرموکول کی قیمت ۱۵ سے ۳۰ روپے کے درمیان کچھ بھی ہو سکتی ہے،‘‘ بحرل بتاتے ہیں۔

ایک فیملی مہینہ میں تقریباً ۷ سے ۱۰ ہزار روپے کے درمیان کما پاتی ہے۔ گرمیوں کے موسم میں چونکہ بوتل بند پانی کی کھپت بڑھ جاتی ہے، لہٰذا ان کی آمدنی بھی بڑھ جاتی ہے۔

’’ہماری آدھی کمائی تو کرایہ دینے اور بجلی پانی کا بل بھرنے میں ہی خرچ ہو جاتی ہے۔ بجلی اور پانی کے لیے الگ سے پیسے ادا کرنے پڑتے ہیں۔ بجلی کا خرچ تقریباً ایک ہزار روپے کے آس پاس آتا ہے،‘‘ بحرل بتاتے ہیں۔ ان خاندانوں کو پینے کا پانی ایک الگ سپلائر سے خریدنا پڑتا ہے، کیوں کہ پلاٹ میں لگے نل کا پانی پینے لائق نہیں ہے۔

بحرل بتاتے ہیں کہ کھانے پر ہونے والے خرچ سے بھی ان پر الگ سے مالی بوجھ بڑھ جاتا ہے۔ ’’آسام میں ہمیں راشن ملتا ہے،‘‘ پی ڈی ایس (عوامی تقسیم کا نظام) کے تحت ملنے والے اناج کا حوالہ دیتے ہوئے وہ کہتے ہیں۔ ’’لیکن یہاں اس سہولت کے لیے ہمارے پاس ہریانہ کا شناختی کارڈ ہونا ضروری ہے، اور ہمارے پاس ایسا کوئی بھی شناختی کارڈ نہیں ہے۔‘‘

بحرل کو او این او آرسی (وَن نیشن ون راشن کارڈ، یعنی ایک ملک ایک راشن کارڈ) کے بارے میں کوئی جانکاری نہیں ہے، جو ۲۰۱۹ میں شروع کی گئی ایک ملک گیر پورٹیبلیٹی اسکیم ہے اور اس کا مقصد اندرونی مہاجرین سمیت ہندوستان کے تمام شہروں کے لیے غذائی تحفظ کو یقینی بنانا ہے۔ ’’مجھے اس کے بارے میں جانکاری نہیں ہے،‘‘ وہ اس رپورٹر سے کہتے ہیں۔

ان کی جھگیاں بانسوں پر ٹکی ترپال کی چھتوں کی بنی ہوئی ہیں۔ ان کے گھر اور ان کے ذریعہ اکٹھا کیے گئے کباڑوں کے درمیان بٹوارے کی کوئی لکیر نہیں ہوتی اور دونوں باہم گڈمڈ ہوتے رہتے ہیں۔ ان کے بچے بھی انھیں کباڑوں پر اچھلتے کودتے رہتے ہیں۔ ایک رپورٹ کے مطابق، اپنے مہاجر والدین کے ساتھ شہروں میں آئے صرف ۵۵ فیصد بچے ہی اسکول جا پاتے ہیں۔ اس علاقہ میں رہنے والے زیادہ تر بچے اپنی پڑھائی جاری رکھنے کی بجائے کام کرنا زیادہ پسند کرتے ہیں۔ ریاض کے ۱۲ سال کے بیٹے انور نے تیسری جماعت تک کی تعلیم مکمل کرنے کے بعد اسکول جانا بند کر دیا، اور اب وہ کباڑ چُننے اور چھانٹنے کے کام میں ریاض کی مدد کرتا ہے۔ ’’کوئی بھیی آدمی کباڑی والے کے بیٹے کے قریب نہیں پھٹکنا چاہتا ہے۔ میرا کوئی دوست نہیں ہے۔ میں نے اپنے والد کا ہاتھ بٹانے کے لیے اسکول جانا بند کر دیا،‘‘ انور کہتا ہے۔

سونی پت آنے سے پہلے بحرل نے چنئی میں ایک کالج میں بطور سیکورٹی گارڈ بھی تین سال کام کیا۔ ’’یہاں میں اپنے ایک گاؤں والے کے کہنے پر آ گیا،‘‘ وہ بتاتے ہیں۔

’’اگر میں اپنے ماں باپ اور گاؤں کے لوگوں کو بتاؤں گا کہ میں یہ کام کرتا ہوں، تو مجھجے بہت شرمندگی محسوس ہوگی،‘‘ بحرل کہتے ہیں۔ ’’میں انہیں کہتا ہوں کہ میں اسکولوں میں چھوٹے موٹے کام کرتا ہوں۔‘‘ وہ بتاتے ہیں کہ نقل مکانی کی دوسری مشکلیں بھی ہیں: ’’آسام میں مچھلی ہماری غذا کا بنیادی حصہ ہے۔ لیکن یہاں اگر ہم مچھلی کھاتے ہیں تو ہمارے کچھ پڑوسی ہمیں حقارت کی نظر سے دیکھتے ہیں۔ ہمیں اسے چوری چھپے پکانا اور کھانا پڑتا ہے۔‘‘

ان کا خواب ہے کہ وہ اتنا پیسہ کما لیں کہ آسام میں اپنے لیے ایک چھوٹی سی زمین خرید سکیں، تاکہ اپنے لوگوں کے ساتھ رہ سکیں۔ ’’اپنے گھر والوں سے جھوٹ بولنا کسی کو اچھا نہیں لگتا ہے۔ ہم بھی ایک عزت کی زندگی بسر کرنا چاہتے ہیں۔‘‘

ترجمہ نگار: قمر صدیقی