ذہنی مریضوں کی بڑھتی تعداد اور ’بھوتوں‘ کا میلہ

نوٹ: یہ ہندوستان کے دیہی علاقوں میں صحت کی صورتحال سے متعلق سیریز کا پہلا حصہ ہے۔

زراعت پر منحصر ایک چھوٹے سے گاؤں، ملاجپور میں ۱۷ سال کی سَوی دُھروے اور ۱۶ سال کی آشا کورکو (دونوں کے نام بدل دیے گئے ہیں) کے درمیان ایک انوکھی دوستی ہو گئی ہے۔ دونوں کی ملاقات اسی سال یہاں مندر میں لگے ایک میلہ میں ہوئی تھی، جہاں ان کے گھر والے انہیں مقامی جھاڑ پھونک کی رسم کے لیے لے کر آئے تھے۔ دونوں نو عمر لڑکیوں اور ان کے رشتہ داروں کا ماننا ہے کہ وہ کسی بد روح کے زیر اثر ہیں۔

سوی اپنی حالت بیان کرتے ہوئے کہتی ہے، ’’ایسا لگتا تھا جیسے کوئی مجھے میرے کمرے میں ادھر ادھر پھینک رہا ہو اور مجھے بیہوشی کے دورے پڑتے تھے۔ درد سے میرا جسم اینٹھ جاتا تھا اور ہوش آنے پر مجھے کچھ بھی یاد نہیں رہتا تھا،‘‘ سوی کی بات پوری ہونے سے پہلے ہی آشا بول پڑتی ہے، ’’میرے ساتھ بھی یہی ہوتا تھا۔ مجھے بھی کچھ یاد نہیں رہتا تھا۔‘‘

دونوں ایک دوسرے کی طرف دیکھ کر ہنس پڑتی ہیں – بغیر کسی خاص وجہ کے، ہر بات پر۔ یہ وہی شرارتی طاقت ہے، جو اکثر ان دونوں سہیلیوں میں دکھائی دیتی ہے۔ دونوں لڑکیاں تقریباً ایک مہینہ سے مندر کے احاطہ میں رہ رہی ہیں۔ اس دوران وہ ایک دوسرے سے الگ نہ ہونے والی دوست بن گئی ہیں – آرتی (پوجا) کے وقت کندھے سے کندھا ملا کر بیٹھنا، گربھ گرہ (پوجا کی مرکزی جگہ) کی پریکرما (طواف) کرتے ہوئے آپس میں مذاق کرنا، اور ایک دوسرے کی باتوں کے درمیان بولتے ہوئے لگاتار گفتگو کرنا۔

سوی، آشا کی طرف پیار سے دیکھتے ہوئے کہتی ہے، ’’اس پر جلدی اثر ہو جاتا ہے…‘‘

’’– میں اسے ٹھیک سے سمجھا نہیں سکتی –‘‘

’’– آرتی کے وقت آپ خود دیکھ لیں گے –‘‘

’’– لیکن اب میں پہلے سے کافی بہتر ہوں –‘‘ آشا اپنی بات ختم کرتے ہوئے کہتی ہے، جس سے لگتا ہے کہ مندر میں گزارے گئے اس مہینہ سے اس کی حالت کچھ بہتر ہوئی ہے۔

ملاجپور کا ’گھوسٹ فیئر‘ جسے مقامی لوگ بھوتوں کا میلہ کہتے ہیں، صدیوں پرانی سالانہ تقریب ہے۔ یہ میلہ ماگھ پورنیما (جنوری-فروری کے دوران پورے چاند کا دن) سے شروع ہو کر بسنت پنچمی (موسم بہار کی آمد) تک چلتا ہے۔ بیتول ضلع کے چیچولی بلاک میں لگنے والا یہ میلہ گرو صاحب بابا یا دیوجی مہاراج نام کے سنت (سادھو) کی سمادھی (مزار) کے آس پاس لگتا ہے۔ مانا جاتا ہے کہ ان کے پاس ایسی روحانی طاقتیں تھیں جن سے وہ ’بد روحوں کے سایہ‘ سے متاثر لوگوں کو ٹھیک کر دیتے تھے۔ یہاں کے دیہی باشندوں کا عقیدہ ہے کہ مندر کے احاطہ میں موجود برگد کے درختوں کی پتّیوں میں بد روحیں پھنس جاتی ہیں۔ اس میلہ میں مدھیہ پردیش کے ساتھ ساتھ پڑوسی ریاستوں – چھتیس گڑھ اور راجستھان سے بھی ہزاروں عقیدت مند اور زائرین پہنچتے ہیں۔

غروب آفتاب کے تھوڑی دیر بعد ہونے والی آرتی (پوجا) کے دوران، گویا متعینہ اشارے پر، آشا اچانک اُس عجیب حالت میں پہنچ جاتی ہے۔ اس کی ماں پیچھے ہٹ جاتی ہے اور سوی اپنی دوست کی دیکھ بھال کے لیے آگے بڑھتی ہے۔ آشا کی آنکھیں مستحکم نہیں رہتیں، اس کے کندھے جھٹکوں سے ہلتے ہیں اور کبھی کبھی اس کا چہرہ درد سے اینٹھ جاتا ہے۔ ماں بار بار اس کا نام پکارتی ہے، لیکن وہ کوئی جواب نہیں دیتی۔ سوی مشق والے انداز میں اس کے بال مضبوطی سے پکڑتی ہے، تاکہ ’’بد روح‘‘ کو قابو میں رکھا جا سکے اور ساتھ ہی آشا خود کو چوٹ نہ پہنچا لے۔ اگلے کچھ منٹوں تک سوی اپنی ’بھوت کے چنگل میں پھنسی‘ دوست کو لے کر گربھ گرہ کے چاروں طرف گھومتی ہے اور اسے دھیرے دھیرے بھروسہ دلاتی رہتی ہے۔ ان دونوں کی ماں پیچھے پیچھے چلتی ہیں، ان کے چہرے پر فکرمندی کے آثار صاف دکھائی دیتے ہیں۔ جب یہ دورہ ختم ہوتا ہے، تو آشا زمین پر گر جاتی ہے اور عورتیں اس کے چاروں طرف گھیرا بنا لیتی ہیں۔ کوئی ایک گلاس پھونکا ہوا پانی دیتا ہے اور سوی اس کے ہونٹوں پر چند بوندیں ڈالتے ہوئے آہستہ سے کہتی ہے، ’’پی لو…ہو گیا۔‘‘

سنیتا اور پپّی، دونوں مائیں اپنی بیٹیوں کو یہاں اس لیے لے کر آئیں، کیوں کہ ان کے پاس جانے کے لیے اور کوئی جگہ نہیں تھی۔ نہ کوئی ماہر نفسیات۔ نہ ذہنی صحت سے متعلق علاج کا کوئی ڈاکٹر۔ نہ کوئی کاؤنسلر۔ وہ ایسے علاقہ میں رہتی ہیں جہاں طبی سہولیات نہ کے برابر ہیں اور یہ مندر ان کے لیے ایک سہارا بن گیا ہے، جہاں ان کے جیسے لوگوں کو ذہنی صحت سے متعلق مدد اور آپسی سہارا مل جاتا ہے۔

کچھ لوگ آشیرواد لینے آتے ہیں۔ کچھ لوگ اُس چیز سے نجات حاصل کرنے آتے ہیں جسے وہ بھوت (بد روح) کہتے ہیں۔ یہاں آنے والے تقریباً ہر شخص کے پاس کسی ’چمتکار‘ (کرشمہ) کی کہانی ہوتی ہے۔ پاس کے گاؤں کی ایک عورت، جو کینسر سے ٹھیک ہو گئی۔ کسی کو کئی دہائیوں بعد اولاد کی دولت حاصل ہوئی۔ کوئی جو سانپ کے کاٹنے کے بعد ٹھیک ہو گیا اور اسے دوبارہ زندگی ملی۔ جب عقیدت مندوں کی دلی مراد پوری ہوتی ہے، تو وہ ’’گرو مہاراج‘‘ کو گُڑ چڑھاتے ہیں۔

ہندوستان کی سب سے بڑی ریاستوں میں سے ایک، مدھیہ پردیش بد عقیدگی اور ذہنی صحت سے متعلق مسائل میں مبتلا ہے۔ یہاں کی ۷۰ فیصد سے زیادہ آبادی دیہی علاقوں میں رہتی ہے۔ بیتول ضلع اسپتال کے ماہر نفسیات، ڈاکٹر سنجے کھاتیرکر کہتے ہیں، ’’مندر میں جو آپ نے دیکھا، وہ مسئلہ کا صرف ایک چھوٹا سا حصہ ہے۔ اسپتالوں میں کئی عہدے خالی ہیں جنہیں پُر نہیں کیا گیا ہے۔ ہم کیمپ لگانے اور گاؤوں میں جا کر مریضوں کو دیکھنے کی کوشش کرتے ہیں۔ جن مریضوں کو اسپتال میں داخل کرنے کی ضرورت ہوتی ہے، انہیں بھوپال بھیجا جاتا ہے۔ لیکن یہ بہت بڑا مسئلہ ہے، جسے کچھ دوروں سے حل نہیں کیا جا سکتا۔‘‘

سال ۲۰۲۱ میں سائکیٹری جرنل میں شائع ایک تحقیقی مقالہ کے مطابق، ۱۹۹۶ میں شروع کیے گئے ڈسٹرکٹ مینٹل ہیلتھ پروگرام کے تحت ریاست کے صرف ۷ء۱۳ فیصد حصہ کا ہی احاطہ کیا گیا ہے۔ ریاست کے صرف ۸ء۱۱ فیصد اسپتال ذہنی صحت سے متعلق خدمات فراہم کرتے ہیں۔ وہیں، ریاست میں ماہرین نفسیات کی دستیابی فی لاکھ آبادی پر صرف ۰۵ء۰ ہے، جو عالمی ادارۂ صحت (ڈبلیو ایچ او) کے ذریعہ مقررہ کم از کم پیمانہ ۳ فی ایک لاکھ کی آبادی سے بہت کم ہے۔

بیتول میں سول سرجن ڈاکٹر جگدیش گھورے بتاتے ہیں کہ ضلع اسپتال میں بنیادی ڈھانچہ تو ہے، لیکن اسٹاف کی شدید قلت ہے۔ وہ کہتے ہیں، ’’اگر ہمارے پاس اینڈوسکوپی یا ایکو کارڈیوگرام کی سہولت ہے، تو مشین چلانے کے لیے ٹیکنیشین نہیں ہے۔ ہمارے پاس نئی عمارتیں اور اچھا ڈھانچہ ہے، لیکن یہاں ماہرین کے ۳۰ عہدوں میں سے صرف ۱۱ ہی بھرے ہوئے ہیں۔‘‘

مجموعی طور پر یہ اعداد و شمار ایسی ریاست کی خراب تصویر پیش کرتے ہیں، جہاں ذہنی امراض میں مبتلا زیادہ تر لوگوں کا علاج ہی نہیں ہو پاتا۔ سہولیات کی کمی کے سبب لوگ علاج کے لیے آگے نہیں آتے اور سوی اور آشا جیسے نوجوانوں کی بیماری اور بڑھ جاتی ہے۔ ’’مینٹل ہیلتھ سروسز کے معاملے میں ۹۱ فیصد لوگوں کے درمیان علاج کا بڑا فرق پایا گیا اور ان میں سے زیادہ تر مریض مناسب علاج کے لیے کسی قسم کی طبی خدمات حاصل نہیں کر پاتے۔

ریاست میں خودکشی کی شرح فی دس لاکھ آبادی پر ۱۹ء۱ تھی اور یہ شرح ۱۸ سے ۴۵ سال کی عمر کے لوگوں میں سب سے زیادہ تھی،‘‘ سال ۲۰۲۱ کے مطالعہ میں یہ نتیجہ نکلا۔ اکتوبر ۲۰۲۵ میں سامنے آئے ایک حالیہ مطالعہ میں پایا گیا کہ مدھیہ پردیش میں ماہرین نفسیات عام طور پر کچھ شہری مراکز – خاص کر اندور، بھوپال اور گوالیار – میں ہی موجود ہیں۔ وہیں، ریاست کے ۵۴ ضلعوں میں سے تقریباً آدھے ضلعوں میں ایک بھی ماہر نفسیات نہیں ہے۔

ڈاکٹر کھاتیرکر کہتے ہیں، ’’ملا جپور میں ہونے والی جھاڑ پھونک کی رسمیں، جو زیادہ تر عورتوں پر کی جاتی ہیں، اگر مناسب تعداد میں ڈاکٹر دستیاب ہوں تو مرگی، ذہنی انتشار، تشویش یا دیگر ذہنی امراض کی پہچان کی جا سکتی ہے۔‘‘

لیکن ایسی طبی سہولیات سے محروم علاقوں میں سوی اور آشا جیسی نو عمر لڑکیوں کی ذہنی پریشانی اور درد کو مقدس اور غیبی نظریہ سے دیکھا اور سمجھا جاتا ہے: جیسے شیطان اور فرشتے، درویش اور تبرکات، بصارت اور عذابِ الٰہی۔ اکیسویں صدی کے وسط میں یہ سوچ دورِ وسطیٰ جیسی لگتی ہے۔ سوی اور آشا جیسی نوعمر لڑکیوں کے لیے ’’بھوت کے زیر سایہ‘‘ ہونا ان کی روزمرہ کی الجھنوں اور ذہنی تناؤ کے اظہار کا ایک ذریعہ بن جاتا ہے۔

سوی کی ماں سُنیتا کہتی ہیں، ’’جسمانی مرض کے لیے اسپتال جانا پڑتا ہے۔ لیکن ذہنی مرض کے لیے ہمیں یہاں آنا پڑتا ہے۔‘‘ ان کا ماننا ہے کہ کسی نے ان کی بیٹی پر کوئی ’شراپ‘ ڈال دیا ہے (یعنی بد دعا کردی ہے) اور ایسی چیزوں کا حل صرف اسی مندر میں ہو سکتا ہے۔

بسنت پنچمی کے دن جب ایک مہینہ تک چلنے والا بھوتوں کا میلہ ختم ہونے کو ہوتا ہے تو سوی بتاتی ہے، ’’جب میں پہلی بار یہاں آئی تھی، تو بہت روتی تھی۔ مجھے گھر واپس جانا تھا۔ پھر میری ملاقات آشا سے ہوئی…اب یہ جگہ اچھی لگنے لگی ہے۔ یہاں میرے دوست بن گئے ہیں۔‘‘

آشا سرگوشی کرتے ہوئے کہتی ہے، ’’کل میں اپنے گاؤں لوٹ جاؤں گی، سوی کے بغیر۔ پتہ نہیں میں کیا کروں گی۔‘‘

جہاں ان کی مائیں اب بھی لڑکیوں کے ٹھیک ہونے کو روحانی علاج مانتی ہیں وہیں سوی اور آشا، جو ایک جیسی پریشانیوں سے گزری ہیں، انہیں ایک معمولی چیز سے راحت ملی: جو ان کی دوستی تھی۔ مہینہ کے آخر تک دونوں، اگلے سال پھر مندر میں ملنے کا منصوبہ بنانے لگتی ہیں۔ ’’…اور اس کے اگلے سال…‘‘ سوی کہتی ہے۔

’’…اور اس کے اگلے سال بھی…‘‘ دونوں ایک ساتھ کہتی ہیں اور زور سے ہنس پڑتی ہیں۔

شاید یہاں واقعی میں کوئی جادو ہوتا ہے۔

یہ اسٹوری پاری سینئر فیلوشپ ۲۰۲۵ کے تحت شائع کی گئی ہے۔

ترجمہ نگار: قمر صدیقی