त्रिपुरा: खतरा मं परे बांस घर अऊ ओकर बासिंदा

भरतजाय रियांग कहिथे, “वो मन ला हमर घर उजारे बर हाथी लाय ला परिस.”

“वोला लाय के घलो (हाथी) वो मन येला उजारे नई सकिन. आखिर वो मन हमर टोंग (घर) ला आगि लगाय ला धरिन.” 75 बछर के रियांग आदिवासी वो बखत ला सुरता करथे जब जंगल अफसर मन वोला, ओकर सुवारी अऊ लइका मन ला असम के श्रीभूमि जिला (पहिली करीमगंज) मं बने ओकर घर ले जबरन बेदखल कर देय गे रहिस. ये ह 1980 के दसक के सुरु के बात आय. वो ह जेन घर के बात करत हवय वोला टोंग घर, धन इहाँ के लोगन मन गैरिंगनोक कहिथें - त्रिपुरा के कतको आदिवासी समाज मन के एक ठन पारंपरिक घर आय, जेन मं भरतजाय के घर घलो सामिल हवय.

“हम पहाड़ी लोगन मन कभू माटी धन ईंटा के घर मं नइ रहत रहेन. हमन ला सिरिफ टोंग पसंद रहिस,” वो ह उत्तरी त्रिपुरा जिला के ये पारा (बस्ती) मं अपन घर डहर आरो करत कहिथे. ये बांस के बने आय जेन ह जमीन ले एक फूट ऊपर, बांस के खंभा उपर टिके हवय. परंपरागत रूप ले, ओकर छानी घास फूस (खदर) के होवत रहिस, फेर भरतजाय के टोंग के छानी टीना के हवय. ये ह बागबासा ले अवेइय्या एक ठन लंबा अऊ खतरनाक चट्टान के पक्का सड़क के बगल मं हवय अऊ जइठंग गाँव के निरमल टोंगचेरा पाड़ा तक जाथे जिहां हमन ओकर ले गोठियावत हवन.

भारतजाय के घर तउन पहिली घर मन ले एक आय जेन ह तुमन ला बस्ती मं गोड़ रखतेच नजर आही, जेन ह घन हरियर अऊ निरमल नदिया ले भरे ऊंच पहाड़ मन के कोरा मं बसे हवय. त्रिपुरा राज के धर्मनगर शहर ले करीबन 8 कोस दूरिहा, रियांग जनजाति [जउन ला रैंग घलो लिखे जाथे] के 150 घर के दूरिहा मं बसे बस्ती आय, जेन ला राज के एकेच विशेष रूप से कमज़ोर जनजातीय समूह (पीवीटीजी)के रूप मं सूचीबद्ध करे गे हवय.

फेर गर ये बस्ती मं कुछु बखत गुजारहू, त तुमन ला गम हो जाही के सिरिफ समाजेच ह खतरा मं नइ ये. वो मन के जंगल जमीन, वो मन के भाखा – कौबरू (कोकबोरोक के आठ बोली ले एक ठन), वो मन के जिनगी गुजारे के तरीका अऊ पारंपरिक घर घलो बिपत मं हवय. समाज के कतको लोगन मन प्रधानमंत्री आवास योजना ग्रामीण (पीएमएवाई-जी) के तहत बने पक्का घर मं रहे लगे हवंय. भरतजाय ह घलो साल 2017 मं अपन बर एक ठन पक्का घर बनवाय रहिस, जब त्रिपुरा मं ये योजना के नांव इंदिरा आवास योजना ले बदलके पीएमएवाई कर दे गे रहिस.

सोचे के बात आय के घर बने के तीन बछर के भीतरीच, जब प्रधानमंत्री पूर्वोत्तर मं विकास के गंगा बोहाय के बात करत रहिस, भरतजाय के घर आगि धरे सेती जर गे ये योजना के तहत सरकरी मदद ले वो ह जेन एक खोली के पक्का घर बनवाय रहिस, वो ह पूरा जर के राख होगे. आज वो ह टोंग घर के ठीक बगल मं मलबा के ढेरी बने परे हवय.

“ये ह करीबन छै बछर पहिली के बात आय,” वो ह कहिथे. “हो सकत हे शार्ट सर्किट सेती आगि लगे रहिस. हमन इहाँ के कतको नेता मन ले कतको बेर मदद के गुहार करेन. वो मन कहंय के मदद मिलही, फेर कभू नइ मिलिस. वो मन ला ककरो चिंता नइ ये. वो मन ला तो बस हमर वोट चाही.” ये बिपत्ति के दू बछर बाद तक ले, भरतजाय अऊ ओकर दूनों बेटा, जेन मन अब घलो ओकर उपर आसरित हवंय, अपन बड़े बेटा के संग उहिच बस्ती मं रहिस. फेर आखिर मं वो मन माटी के घर के जगा एक ठन नवा टोंग घर बनाय के फइसला करिन.

“मोर परिवार के काम मं लगे रहे सेती येला बनाय मं दू महिना ले जियादा बखत नइ लगिस. मंय ये टोंग चार बछर पहिली बनवाय रहंय,” भरतजाय हमन ला अपन बाँस के घर भीतरी ले जावत कहिथे. ये ह 300 वर्ग फुट ले जियादा बड़े नइ ये. ओकर घर के भूंइय्या तरी अऊ भिथि बांस के पट्टी ले बने हवय. येकर बर काम मं आय बांस के किसिम ला इहाँ के लोगन मन मुली (मेलोकैनाबैक्सीफेरा)कहिथें, वो ह मोला बताइस. “ ये आकार के टोंग बर, कम से कम 300 मुली (बांस) के जरूरत परथे. ये छोटे बांस होथे, अऊ ये ह बछर भर ले जियादा जुन्ना नइ होवय.”

सब्बो कुछु बांस मिले के बाद ले सुरू होथे. वो ह कहिथे, “बांस मिले के बाद, हमन बांस ला अलग-अलग आकार अऊ नाप मं तुरते काट लेथन. हमन वोला सूखाय नइ देवन. गर सूख जाही त वो ह आसानी ले ओदर जाथे. हमन बांस के पातर पट्टी बनाथन अऊ कसके बुनथन.” वो ह कहिथे, “आधार/भार खंभा सेती, हमन कम से कम 10-12 बछर जुन्ना सेगुन के लकरी काम मं लाथन.”

भरतजाय करीबन सब्बो काम बर लकरी के हैंडल वाले एक ठन घुमावदार लोहा के अऊजार (हंसिया कस) जेन ला दाव (धन धाऊ) कहे जाथे, काम मं लाथे – बांस कटई ले लेके वोला चीरे, इहाँ तक के पट्टी बनाय बर घलो, जेन ला बाद मं घर के भिथि अऊ भूंइय्या बर बुने जाथे. लकरी के हिस्सा बर वो ह कभू-कभू हाथ के आरी बऊरथे. पूर्वोत्तर के अलग-अलग समाज मन घर बनाय के काम मं बांस ला तियार करे बर कतको किसिम के अऊजार काम मं लाथें.

रियांग टोंग बनेइय्या एकेच ठन जनजाति नो हे. भरतजाय कहिथे, “हरेक जनजाति के टोंग बनाय के अपन तरीका होथे. हमन अक्सर अपन घर मं परछी नइ बनावन. देबबर्मा समाज के लोगन मन भूंइय्या ले आगू घलो बढ़ा के राखथें. अब हमर कुछु टोंग उपर घलो येकर असर परत हवय.”

ये मन ले कोनो घलो बांस धन लकरी नइ बिसोवय, तीर-तखार के जंगल ले मंगवाथे. मुली के छोड़, वो मन मकाल (बम्बुसा पल्लिडा)काम मं लाथें. भरतजॉय कहिथे, “ढाँचा मन ला बांधे बर गोला बेट धन बर्मी बाँस (बम्बुसा पॉलीमोर्फा) काम मं लाय जाथे. फेर ये बखत, भारी डिंयार ले ढांचा मन ला बचाय मुस्किल होगे हवय.”

“वो ह (डिंयार ह) लकरी के सार ला खा जाथे, जेकर ले वो ह भीतरी ले पोंडा पर जाथे. गर ये ह काइंगला धन कावाध्युति (बांस की एक किसिम) होथे, त ढांचा बछरों बछर तक ले टिके रहिथे.” वो ह तउन नंदावत जावत रुख मन के बात करत रहिस जेन ह कभू घर बनाय के सामन मं माई भार धरेइय्या के रूप मं काम मं लाय जावत रहिस जेन ह वोला कीरा अऊ डिंयार धरे ले बचावत रहिस.

“अइसने रुख मन कइसने बांचहीं? लोगन मन सुपारी धन दीगर जिनिस के खेती सेती जंगल ला साफ करत हवंय जेकर ले वो मन जियादा कमाथें,” भरतजाय कहिथे.त्रिपुरा घन जंगल वाले राज आय, जेकर करीबन 60 फीसदी भूंइय्या सदाबहार अऊ पतझर जंगल ले भरे हवय. ये जंगल रियांग जइसने कतको आदिवासी समाज ला जीविका देथे अऊ वो मन के जिनगी के अटूट हिस्सा आय.

झूम (काटके अऊ जराके खेती एक जगा ले दूसर जगा मं खेती करे के तरीका) ले कंद-मूल खोजे अऊ खेती दूनों करे जावत रहिस. फसल लुये के बाद, जमीन ला बनेच लंबा बखत तक ले परिया राखे जाथे, तब तक के फिर ले रूख-रई जाम नइ जावय अऊ वो भूंइय्या एक पईंत अऊ खेती के लइक झन हो जावय. फेर बखत के संगे संग, झूम के खेती बर भूंइय्या के जगा दीगर उपाय अऊ जमीन कम होय लगिस, जेकर ले झूम के चक्र छोटे होगे. अऊ परिया राखे के बखत कम होय सेती जमीन कम रसहा होगे जेकर सेती उपज घलो कम होगे.

साल 1980 दसक मं जब जंगलअफसर मन भरतजाय ला ओकर घर ले बेदखल करे रहिन, वो मन के मंसूबा जंगल मन ला बचाय अऊ 1980 के वन (संरक्षण) अधिनियम के तहत झूम खेती उपर रोक लगाय रहिस. झूम, राज के पहाड़ी इलाका मन मं सदियों ले चलन मं रहे मिश्रित फसल के तरीका रहिस. बेदखली के पहिली के अपन जिनगी ला सुरता करत भरतजाय कहिथे, “हमन अधिकतर झूम खेती के भरोसे रहेन अऊ कभू–कभार वन विभाग बर रुख लगाय के ठेका घलो लेवत रहेन.”

80 के दसक के बाद जंगल के जमीन मं रहेइय्या कतको आदिवासी जनजाति उजर गीन. वो मन ले कतको मन सुपारी अऊ रबर जइसने भारी उपज वाले फसल के थिर खेती डहर चले गीन. सोचे के बात ये आय के झूम खेती ले हटके बागवानी खेती ले राज के जंगल इलाका मं भारी कमी आय हवय. भारतीय वन सर्वे के साल 2023 के एक ठन रिपोर्ट के मुताबिक, त्रिपुरा मं देस के 116. 90 वर्ग किलोमीटर के रिकॉर्डेड फॉरेस्ट एरिया (आरएफए) के भीतरी वन इलाका मं सबले जियादा कमी देखे गे हवय.

“हमन पूरा टूट चुके रहेन. कोनो हमर गुहार नइ सुनिन. हमन रातों रात बेघर हो गेन. हम सब्बो झिन ला इहाँ आके बसे ला परिस अऊ अपन जिनगी ला नवा तरीका ले सुरु करे ला परिस. हमन बीते 45 बछर ले इहाँ रहत हवन,” भरतजाय कहिथे, जेन ह कतको बछर पहिली होय अपन निजी नुकसान ले आज घलो दुखी हवय. वो ह बताथे के पहिली आदिवासी बस्ती एक डोंगरी ले दूसर डोंगरी चले जावत रहिस अऊ बांस अऊ छानी वाले बांस उपर टिके टोंग घर बनावत रहिन. भरतजाय सुरता करथे के जइसने-जइसने डोंगरी ले मैदानी इलाका मं उतरे लगिन, पारंपरिक बांस ले बने घर के जगा माटी अऊ लकरी ले बने घर ले लीस. अऊ शहरी इलाका के तीर मं, ईंटा अऊ सीमेंट ले बने घर मन.

“माटी के घर मं डिंयार धरे के डर लगे रहिथे. हमर जीविका झूम खेती के भरोसे रहिस. हमन ला कुछु बछर मं हर बेर अपन घर डोंगरी तरी ले दूसर तरी मं बनाय ला परत रहिस. टोंग हमर घर के एक ठन दीगर उपाय रहिस. मंय जिनगी भर टोंग बनावत रहे हवं. अतक बछर मं येला बनाय के तरीका ह जियादा बदले नइ ये. फेर आज के जमाना मं नवा टोंग देखे घलो दुब्भर होगे हवय,” भरतजाय कहिथे.

हमन ओकर बांस के घर मं बइठे हवन जेन ह दिन मं घलो अंधियार लागथे, दिन मं उजेला बर सिरिफ एक ठन झरोखा हवय. एक ठन नानकन रंधनी मं चूल्हा हवय, जेन ह बांस अऊ माटी के ऊँच चौरा मं बने हवय. वो ह कहिथे, “हमन घर मं कोनो भिथि नइ ये. सब्बो कुछु एकेच खोली मं हवय.”

“इहाँ परोसी मन टोंग बनाय बर एक-दूसर के मदद करथें. एक ठन मंझोल आकार के टोंग [करीबन 250-300 वर्ग फुट] 5 ले 7 झिन करीबन 2-3 हफ्ता मं बना लेथें. मोला पक्का घर के बनिस्बत टोंग जियादा भाथे. फेर ये जमाना मं सायदे कोनो टोंग बनाथे. लोगन मन पक्का घर चाहथें. मंय वो मन ला दोस नइ देवंव,” भरतजाय कहिथे. ओकर बोली पारंपरिक घर के धीरे-धीरे नंदावत जाय के संसो करत जइसने लागथे. “ये बखत एक ठन टोंग घरबनाय मं 80 ले 90 हजार रूपिया लागथे. अतक खरचा कोन करे सकही?”

इहाँ के 150 रियांग परिवार मन के बनेच कम करा थिर आमदनी के कोनो जरिया नइ ये. ये मन ले कुछु मन चाय बगीचा मं मजूरी करथें. दीगर लोगन मन काम-बूता करे बर परोस के जिला मं चले जाथें. अऊ कतको लोगन मन जंगल ले फर अऊ साग भाजी संकेल के गाँव मं धन लकठा के बजार मं बेचथें. साल 1980 के दसक मं परोसी राज असम से भाग के इहाँ आय भरतजाय जइसने लोगन मन कुछु बखत तक ले झूम खेती करत रहिन, फेर बाद मं जब ये इलाका ला रिजर्व जंगल घोसित कर दे गीस, त वोला येला छोड़े ला परिस. भरतजाय कहिथे, “इहाँ हमर करा आमदनी के कोनो थिर साधन नइ ये.”

त्रिपुरा बांस मिशन (टीबीएम) जइसने राज सरकार के योजना मन के मुताबिक “ बांस के काम ला जीविका के एक ठन माई साधन कबनाय जाही अऊ ये इलाका के 20,000 गरीब लोगन मन ला काम मिल जाही.” ये दावा के बाद घलो, भरतजाय अपन हुनर ले सायदे कोनो खास कमई करे सकथे. “मंय अधिकतर खारा बनाथों – वो अपन टोंग के तीर रखाय बांस के पिंजरा डहर आरो करत कहिथे. येला इहाँ के लोगन मन तोखाऊ घलो कहिथें अऊ पोसे कुकरी मन ला ये मं राखे मं काम मं लाथें. “ये ह 150 रूपिया नग ले जियादा मं नइ बेचाय. फेर तुमन महिना मं कतको बेच सकथो.”

अऊ नतीजा: भरतजाय करीबन 20 रूपिया रोज भाड़ा करके एक ठन ऑटो मं बजार जाके अपन माल बेचथे. येकर ले वोला मुस्किल ले 2,000 रूपिया महीना के कमई हो जाथे. वो ह कहिथे, “हमन अपन जरूरत ला पूरा करे बर अधिकतर प्राकृतिक साधन के भरोसे हवन. हमर मुस्किल ले गुजारा होवत हवय.”

गाँव मं जीविका के साधन कम होवत जावत हवंय, अइसने मं समाज के कतको लोगन मन ला अपन लइका मन ला पढ़ाय-लिखाय मं आस के उजियार नजर आथे. भरतजाय के सबले बड़े बेटा, 52 बछर के नोथिला रियांग,जेकर बस्तीच मं नानकन किराना दुकान हवय, गाँव के तीर-तखार के खराब समाजिक-आर्थिक हालत ला बताथें. वो ह कहिथे, “हमर लइका मन कभू प्रायमरी स्कूल ले आगू नइ पढ़े पावंय. अधिकतर पाँचवीं धन छठवीं क्लास के बाद पढ़े छोड़ देथें. हमर इहाँ कोनो घलो अइसने नइ ये जेन ह सरकारी नऊकरी करत होय.”

भरतजाय के 40 बछर के बेटी पांडौरंग रियांग अऊ ओकर घरवाला रोंगाकांतो रियांग, बस्ती के तीर चाय के बगीचा मन मं ठेका मजूरी करथें. ओंकर मन के छै बछर के बेटी जिनारू, बस्ती ले रेंगे के रद्दा मं, जुबराजनगर ब्लॉक के टोंगचेरा जूनियर बी स्कूल (प्रायमरी) मं पढ़थे. परिवार ह हालेच मं बस्ती ले करीबन पांच मिनट रेंगे के दूरिहा मं एक ठन नानकन डोंगरी मं नवा टोंगघर बनवाय हवय.

“सब्बो दिन हमर मन के साध एक ठन अपन टोंग के रहिस, रंगकांतो कहिथे. “हमन ला कमाय-खाय बर बहिर जाय ला परथे. ते पायके, हमन ये घर बर करीबन बछर भर तक ले रोज के थोकन बखत काम करे ला परिस अऊ येला बनवाय मं 50,000 रूपिया मजूरी के खरचा लगिस. हमन कुछेक महिना पहिली इहाँ आय हवन.” करीबन 500 वर्ग फुट के ये बड़े अपन टोंग मं उजेला बर एकेच ठन बल्ब लगे हवय.

“हमन छानी चोन [सूखा लंबा घास/ खदर जइसने] ले बनाय हवन, जइसने के पारंपरिक रूप ले करे जाथे. ये ह भारी टिकथे अऊ कुरिया ला ठंडा राखथे,” वो ह कहिथे. “अधिकतर लोगन मन करा अब ये हुनर नइ ये,” भरतजाय कहिथे, ठाढ़ ढलान के पार डोंगरी के मनभावन, धुंधला नजारा ला, उछाह ले देखत, जिहां लंबा बांस के खंभा मं टिके टोंग के बालकनी बने हवय.

“फेर मोर पोता-पोती मन सीखे बर आतुर हवंय.”

ये कहिनी मृणालिनी मुखर्जी फाउंडेशन (एमएमएफ) के फेलोशिप के मदद ले लिखे गे हवय.

अनुवाद: निर्मल कुमार साहू