बांस के चंचरी वाला अनुपम, बाकिर दुर्लभ होत घर

“हमनी के घर ढाहे खातिर हाथी लावे के पड़ल,” भरतजॉय रियांग कहत बाड़न.

“उनकर हाथियो हमनी के घर ना तुड़ सकल. आजिज आके ऊ लोग के हमनी के टोंग जरावे पड़ल.” 75 बरिस के रियांग आदिवासी इयाद करत कहलन. 1980 के सुरुआती साल रहे. वन अधिकारी उनका, उनकर घरवाली आ लरिकन सब के जबरदस्ती असम के श्रीभूमि जिला (पहिले करिमगंज) में उनकर घर से निकाल बाहिर कइलक. ऊ जवन घर के बात करत बाड़न, ओकरा इलाका के लोग टोंग घर, चाहे ‘गैरिंग नोक’ कहलेला. ई घर बनावे के एगो पुरान तरीका बा, जे त्रिपुरा के कइएक जनजाति के बीच आम रहल बा. एह में भरतजॉय के आपनो समुदाय आवेला.

ऊ बतावत बाड़न, “हमनी पहाड़ी आदमी सब कबो माटी, चाहे ईंटा के मकान में ना रहनी. सुरुए से हमनी के टोंगे घर भावत रहे.” अइसन कहत ऊ उत्तर त्रिपुरा जिला के एह पारा (बस्ती) में आपन घर ओरी देखावे लगलन. उहंवा बास के घर बा जे बांसे के खंभा सब पर जमीन से कोई एक फुट ऊपर ठाड़ होई. पहिले अइसन घर सब घास-फूंस से छावल रहत रहे. बाकिर भरजॉय के टोंग घर में टीना के छत बा. ई घर बागवासा से टोंगचेरा पारा, जैथांग गांव ले जाए वाला एगो लमहर आ कंकड़-पाथर वाला रस्ता के किनारे बा. हमनी इहंई उनका से बतियावत बानी.

गांव में घुसते सबसे पहिले भरतजॉय के घर लउकल. ई पहाड़न के ऊंचाई पर बसल एगो गांव बा. इहंवा चारो ओरी घना जंगल आ शांत पानी के तलाब सब बा. त्रिपुरा राज्य के धर्मनगर शहर से कोई 25 किमी दूर ई एगो एकदम गुमनाम बस्ती बा. रियांग (चाहे राइंग) जनजाति के मोटा-मोटी 150 परिवार इहंवा रहेला. ई जनजाति प्रदेस के एकमात्र बिसेष रूप से कमजोर जनजातीय समूह (पीवीटीजी) के सूची में शामिल बा.

बाकिर एह टोला में कुछ देर रहला पर रउआ समझ में आ जाई कि खाली ई समुदाये खतरा में नइखे, बलुक ओह लोग के जंगल, भाषा काउब्रू (कॉकबोरोक के आठ बोली में से एक), जिए के तौर-तरीका आ पारंपरिक आवासो मुसीबत में बा. समुदाय के कइएक लोग प्रधानमंत्री आवास योजना ग्रामीण (पीएमएवाई-जी) के मदद से बनल पक्का घर में रहे लागल बा. भरतजॉय भी सन् 2017 में आपन पक्का मकान बनवा लेले रहस. उहे साल ई योजना त्रिपुरा में इंदिरा आवास योजना से बदलकर पीएमएवाई नाम से सुरु भइल रहे.

भाग के खेला देखीं, बनला के खाली तीने बरिस बाद भरतजॉय के घर आग में जरके खाक हो गइल, जबकि उहे घरिया प्रधानमंत्री उत्तर-पूरब में बिकास के गंगा लावे के बात करत रहस. सरकारी योजना के मदद से बनल उनकर एक कोठरी के पक्का मकान, आग में जर गइल. आज ऊ घर बस माटी-पत्थर के ढेर बन बा, उनकर टोंग घर के बगल में चुपचाप रोवत ठाड़ बा.

“बात कोई छव बरिस पुरान होई. सायद शॉर्ट सर्किट चलते आग लग गइल. हमनी केतना बेरा इलाका के नेता लोग से मदद मंगनी. सभे मदद के आश्वासन देलक, बाकिर केहू पूरा ना कइलक. एक्को बेरा ना. केहू के परवाहे नइखे हमनी के. ऊ लोग के त खाली हमनी के वोट चाहीं,” ऊ गोस्सा में कलन. आग लगला के बाद भरतजॉय आपन दू बेटा (जे लोग अबही आपन बाऊजी पर निर्भर बा) संगे बड़ बेटा लगे रहे चल गइलन. बाकिर उहंवा दू बरिस के बाद ऊ माटी के घर के बजाय एगो नया टोंग घर बनावे के ठान लेलन.

भरतजॉय कहेलन, “हमनी सब परिवार मिल के एकरा दू महीना में बना लेनी. ई चार बरिस पहिले बनल रहे.” ऊ हमनी के आपन बांस के घर के भीतरी ले गइलन. कोई 300 वर्ग फुट के जगह होई. देवाल आ फर्श बांस के पट्टी से बीनल रहे. ऊ बतावेलन कि एकरा खातिर जवन बांस काम में लावल गइल बा, ओकरा इहंवा ‘मुली’ (मेलोकैना बैसिफेरा) कहल जाला. “एतना बड़ टोंग बनावे खातिर कम से कम 300 मुली बांस के जरूरत पड़ल. ई नया बांस होखेला, जादे से जादे एक बरिस पुरान.”

मामला बांस जुटावे से सुरु होखेला. ऊ बतावत बाड़न, “बांस मिल गइला पर हमनी जादे इंतजारी ना करीं. तुरंते ओकरा अलगे-अलगे आकार में काटल जाला. ओकरा सूखे ना देवल जाए. काहेकि बांस सूख गइल, त तुरंते फाट जाई. फेरु बांस के पातर-पातर पट्टी बनेला आउर ओकरा से खूब मजबूत चंचरा बीनाला.” ऊ इहो बतइलन, “नींव में लगे वाला खंभा खातिर हमनी सागौन के लकड़ी काम में लाविला. कम से कम 10 से 12 साल पुरान सागौन के लकड़ी.”

काम कवनो होखे, भरतजॉय एके लोहा के औजार इस्तेमाल करेलन. एकरा में लकड़ी के हत्था लागल रहेला आउर भीतरी ओरी तनी मुड़ल रहेला. एकरा दाऊ (चाहे धाऊ) पुकारल जाला. दाऊ से ऊ मोटा-मोटी सभे काम करेलन- बांस कांटे से फाड़े, पातर बनावे तक, जेकरा से बाद में घर के देवाल आ फर्श तइयार कइल जाला. लकड़ी के काम में ऊ हाथ से चले वाला आरियो इस्तेमाल करेलन. उत्तर-पूरब के अलग-अलग समुदाय बांस के काम में आपन-आपन तरीका के औजार काम में लावेला.

इहो बात ध्यान देवे वाला बा कि खाली रेयांगे लोग टोंग ना बनावे. “हर जनजाति के लोग के टोंग बनावे के आपन तरीका बा. हमनी आपन घर में बरंडा, चाहे बालकनी ना बनाईं. बाकिर देबबर्मा लोग आपन घर के फर्श तनी आगू बढ़ा के बनावेला. अब त हमनियो के टोंग घर में देबबर्मा के रंग चढ़े लागल बा.”

ऊ लोग बांस, चाहे लकड़ी कीन के ना लावे, लगे के जंगल से जुटावेला. मुली के अलावे अक्सरहा मकाल (बैंबूसा पैलिडा) काम में लावल जाला. भरतजॉय बतावत बाड़न, “बर्मी बांस (बैंबूसा पॉलीमॉर्फा) चाहे गोला बेत घर जोड़े के काम में आवेला. बाकिर आजकल दीमक के उत्पात एतना हो गइल बा कि घर के ढांचा जादे दिन टिक ना पावे.”

“दीमक सब लकड़ी के भीतरी से खोखला कर देवेला. जदि ई काइंगला, चाहे कवध्युति (बांस के अलग किसिम) से बनल रहित, त एकरा से बनल घर सौ बरिस ले टिकित.” ऊ बतइलन कि पहिले अइसन गाछ रहे जे अब ना देखे में आवे. ओही गाछ के लकड़ी से टोंग के बरियार खंभा बनत रहे आ दीमक सब से बचाव होखत रहे.

“अइसन गाछ सब कइसे बचावल जाव? सुपारी आ दोसर नीमन पइसा देवे वाला फसल के लालच में त जंगल के जंगल काटल जा रहल बा,” भरतजॉय मन मसोसत कहलन. त्रिपुरा एगो घना जंगल वाला राज्य बा. एकर मोटा-मोटी 60 प्रतिशत जमीन हरमेसा हरियर आ नम पात वाला गाछ से भरल रहेला. ई जंगल रियांग जइसन केतना आदिवासी समुदाय के जिए के आधार बा, ओह लोग के संस्कृति के हिस्सा बा.

लोग खाए पिए के चीज या त खेत में उगावेला, चाहे जंगल से जुटावेला. इहंवा पहिले पुरान झूम तरीका से खेती कइल जात रहे. झूम खेती में जमीन पर फसल लगावे से पहिले ओकरा जरा के साफ कइल जाला. कटाई भला पर जमीन के बहुते दिन ले परती छोड़ देवल जाला आ घास-पात के अपने से बढ़े देहल जाला. जमीन जब खेती खातिर फेरु से तइयार मानल जाला तब एक बार फेरु इहे प्रक्रिया दोहरावल जाला. जमीन पर उगल घास-पात, झाड़-झंखाड़ के आग लगाके साफ कइल जाला. बाकिर समय के साथे झूम खेती खातिर जमीन कम होखे लागल आउर झूम के चक्र छोट हो गइल. जमीन के आराम के समय कम होखे से एकर उर्वरकता कम भइल आ फसल कमजोर हो गइल.

1980 के जमाना में जब वन अधिकारी लोग भरतजॉय के उनका घर से हटइलक, त एकर मकसद वन संरक्षण अधिनियम 1930 के तहत जंगल बचावल आ झूम खेती के चलन सीमित कइल रहे. झूम राज्य के पहाड़ी इलाका में पुरखन से चलल आ रहल मिश्रित फसल उगावे के तरीका रहल. भरतजॉय आपन घर से हटावल जाए से पहिले के दिन सब इयाद करत कहलन, “हमनी जादेतर झूमें खेती पर निर्भर रहीं आ कबो-कबो वन विभाग खातिर ठेका पर गाछ रोपे के काम करत रहीं.”

अस्सी के दसक के बाद जंगल में बसल केतना आदिवासी समुदाय उहंवा से बेदखल कर देवल गइल. एकरा में से केतना लोग सुपारी आ रबर जइसन नीमन फसल देवे वाला खेती सुरु कइलक. बाकिर अजीब बात रहे कि झूम खेती छोड़ के प्लांटेशन (बगान) अर्थव्यवस्था अपनावे से राज्य में जंगल के बड़ा नुकसान भइल. भारत के 2023 के फॉरेस्ट सर्वे रिपोर्ट के हिसाब से, त्रिपुरा में रिकॉर्डेड फॉरेस्ट एरिया (आरएफए) में 116.90 वर्ग किमी के कमी देखल गइल. एकरा अब तक के सबले बड़ कमी मानल जाला.

“सब कुछ बरबाद हो गइल. केहू हमनी के गुहार ना सुनलक. रातों-रात सभे के घर खाली करावल गइल. हमनी के इहंवा आके मजबूरी में जिनगी फेरु से सुरु करे पड़ल. हमनी इहंवा 45 साल से बानी,” भरतजॉय कहेलन. अबहियो आपन दसियो साल पुरान बरबादी के दुख में डूबल ऊ बतावेलन कि पहिले कइसे आदिवासी बस्ती एक पहाड़ी से दोसर पहाड़ी ले सरकत रहत रहे. ऊ लोग खंभा पर टोंग बनावत रहे जवन पूरा बांस आ घास-फूस के बनल रहत रहे. बाद में जब ई जनजाति सब पहाड़ से उतर के मैदान में बसे लागल, त पारंपरिक टोंग घर के जगह माटी आ लकड़ी के घर आ गइल. शहरी इलाका में ईंटा आ सीमेंट के मकान बने लागल.

भरतजॉय के कहनाम बा, “माटी के घर में आसानी से दीमक लाग जाला. हमनी के असल कमाई त झूमे से होत रहे. हर कुछ साल पर आपन घर एक पहाड़ी से दोसर पहाड़ी ले जाए के पड़त रहे. टोंग मन के घर रहे. हम जिनगी भर टोंग बनावत रहनी. इधर के साल में भी एकरा बनावे के तरीका नइखे बदलल. बाकिर अब एकर चलन कम हो गइल बा.”

हमनी उनकर बांस के घर के भीतरी बइठल बानी. इहंवा दिनो में अन्हार लागेला. अंजोर खातिर खाली एगो खिड़की बा. घर में एगो छोट चौका बा, बांस आ माटी के बनल एगो चूल्हा बा. उ बतावेलन, “टोंग में एक से जादे कोठरी ना होखे.”

“इहंवा पड़ोसी लोग टोंग बनावे में एक-दोसरा के मदद करेला. एगो औसत आकार के टोंग घर (मोटा-मोटी 250-300 वर्ग फुट) बनावे में 5 से 7 लोग के कोई 2-3 हफ्ता लाग जाला. हमरा त पक्का घर के जगह टोंगे घर जादे नीमन लागेला. बाकिर अब टोंग जादे नइखे बनत. लोग के पक्का घर जादे पसंद आव लागल बा. लोग के दोष नइखे.” उनकर बात से साफ पता चलत रहे कि पुरनका टोंग घर के चलन धीरे धीरे खतम होखे से ऊ केतना खिन्न बाड़न. “आज टोंग घर बनावे जाईं त 80-90 हजार रुपइया लाग जाई. एतना पइसा केकरा लगे बा?”

टोंगचेरा पारा में रहे वाला 150 रियांग परिवार में से बहुत कम लोग लगे आमदनी के पक्का ठिकाना बा. केहू चाय बगान में मजूरी करेला, त केहू लगे के जिला में रोटी खोजे जाला. केतना लोग त जंगल में उग रहल फल आ तरकारी तुड़ के गांव चाहे लगे के हाट-बजार में बेच के कमाई करेला. भरतजॉय जेका जे लोग 1980 के दसक में असम से उजड़ के आइल, ऊ लोग इहंवो तनी समय खातिर झूम के खेती कइलक. बाकिर बाद में एह इलाका के आरक्षित वन क्षेत्र घोषित कइला पर ई खेती छोड़े पड़ल. भरतजॉय कहेलन, “इहंवा कमाई-धंधा के कवनो पक्का जरिया नइखे.”

राज्य सरकार के त्रिपुरा बांस मिशन (टीबीएम) जइसन योजना “बांस उद्योग के रोजी-रोटी के बड़ा जरिया बने आ एकरा से बीस हजार गरीब उत्पादक लोग के रोजगार” मिले के दावा करेला. बाकिर अइसन दावा के बावजूद भरतजॉय टोंग बनावे के आपन कला से बेसी कमाई नइखन कर पावत. टोंग लगे राखल बांस के पिंजरा ओरी इसारा करत ऊ कहे लगलन, “हम जादे करके खारा बनाइले,” एकरा इहंवा के लोग तौखाऊ भी कहेला. एकरा पालतू मुर्गियन के बंद करके रखे खातिर काम में लावल जाला. “एकर दाम 150 रुपइया होखेला. बाकिर एक महीना में रउआ केतना (पिंजरा) बेच लेहम? ई जादे ना बिकाए.”

हालत अइसन बा कि भरतजॉय के रोज बजार जाए आ समान बेचे में ऑटो भाड़ा में बीस रुपइया फूंका जाला. आपन बनावल ई सब सामान बेच के उनका मुस्किल से महीना के 2,000 कमाई होखेला. ऊ कहेलन, “हमनी के सहारा त बस ई जंगले-पहाड़ बा. जिनगी कइसहूं कट रहल बा.”

गांव में काम-धंधा के जरिया कम होखे चलते समुदाय के लोग के आस अब बस लइकन के पढ़ाइए-लिखाई पर टिकल बा. भरतजॉय के बड़का लइका नोथिला रियांग (52) गांवे में परचून के छोट दोकान चलावेलन. उनका गांव के सामाजिक-आर्थिक हालात के लेके गंभीर चिंता बा. “हमनी के लरिकन के प्राइमरी के बाद पढ़ाई छूट जाला. जादेतर पंचमा, चाहे छठा के बाद स्कूल ना जा पावे. इहंवा केकरो लगे तय काम नइखे.”

भरतजॉय के लइकी पांडोरुंग रियांग, 40 बरिस, आ उनकर घरवाला रोंगाकांतो रियांग गांव के लगे चाय बगान में ठिका मजूरी करेला लोग. उनकर छव बरिस के लइकी जिनारुटोंगचेरा जूनियर बी स्कूल (प्राइमरी) में पढ़े जालीम. स्कूल जुबराजनगर ब्लॉक में पड़ेला आ गांव से उहंवा बस पैदले जाइल जा सकेला. परिवार हाले में गांव से कोई पांच मिनट के दूरी पर, एगो छोट पहाड़ी पर नया टोंग घर बनइले बा.

रोंगाकांतो के कहनाम बा, “हमनी बरिसन से आपन टोंग के सपना देखत रहीं. रोज कमाए खातिर बाहिर जाए पड़ेला. एही से एक-एक दिन तनी-तनी काम करके हमनी एकरा बनइनी. एकरा में हमनी के मजूरी पर कुल 50,000 रुपइया खरचा भइल. कुछे महीना पहिले हमनी इहंवा रहे अइनी ह.” कोई 500 वर्गफुट के एतना बड़ टोंग में एके गो बल्ब से अंजोरिया होखेला.

उनकर कहनाम बा, “हमनी चों (सूखल पातर घास) से छत बनइनी. पुरान टोंग घर में इहे इस्तेमाल होखत रहे. ई जादे दिन टिकेला आउर घर के ठंडा रखेला.” भरतजॉय लमहर-लमहर बांस पर टिकल आपन बरंडा से धुंध में घेराइल पहाड़ी के एकटक ताकत कहलन, “जादेतर लोग अब टोंग बनावे के सही तरीका ना जाने.”

“बाकिर हमार पोता-पोती ई कला सीखे खातिर बेकल बा.”

स्टोरी मृणालिनी मुखर्जी फाउंडेशन (एमएमएफ) फेलोशिप के मदद से लिखल गइल बा.

अनुवाद: स्वर्ण कांता