कबीरहा बुनकर मन के टूटत ताना-बाना

चदरिया झीनी रे झीनी, चदरिया झीनी रे झीनी
राम नाम रस भीनी चदरिया झीनी रे झीनी
अष्ट कमल का चरखा बनाया, पांच तत्व की पूनी
नौ दस मास बिनन को लागे, मूरख मैली किनी
चदरिया झिनी रे झीनी

नेहरू दास जी के अंगरी मन जब हारमोनियम ऊपर चलथें, अऊ कबीर के भजन गावत त अइसन चमत्कार अऊ तालमेल दिखथे जइसने सुर अऊ मया के कोनो ताना-बाना बुनत होवय. ये देख के अइसन लगथे कि कतको बछर पहिली ओकर अंगरी मन करघा ऊपर घलो अइसने नाचत रिहिस होहीं. वइसे, ये बखत बुनई के छोड़ गाना जियादा सुभाविक आय. वो ह अपन ये पुरखौती के बूता ला अपन दूनों बेटा मन ला सौंप दे हवंय. कबीर पंथी (15वीं सदी के रहस्यवादी कबीर दास के भगत) होय के सेती, वो ह हमन ला अपन संगीत अऊ बुनई के काम के बीच के गहिरा नाता ला देखाय बर भारी आतुर हवंय.

“जइसने भगवान ये देह ला गढ़े मं बखत लेथे, वइसनेच महतारी के पेट ले लइका के जनम मं नौ महीना लागथे. हमार कबीर साहब ई बात को और कपड़े बिनेवाली बात को एक दूसरे से जोड़ संसार को समझाते हैं.” 78 बछर के नेहरू दास अपन आप ला बैगाचक के सबले सियान बुनकर कहिथे.

डिंडोरी जिला के 52 ठन गाँव वाले ये इलाका – जेन मं ओकर अपन गांव सरवाही माल घलो सामिल हवय, ओ मं जियादा करके आदिवासी मन रहिथें. जउन पनिका समाज ले ये माहिर बुनकर हवय, ओ समाज ला जम्मो मध्य प्रदेश मं एक समान सूची मं नइ राखे गे हे. डिंडोरी मं, जिहां ओ मन रहिथें, उहाँ ओ मन ला अनुसूचित जनजाति (एसटी) के जगा अन्य पिछड़ा वर्ग (ओबीसी) मं रखे गे हवय. अऊ अइसन होय के बाद घलो, वो मन जुग-जुग ले जिला के 64 फीसदी आदिवासी आबादी के संग एक-दूसर के भरोसा मं, दया-मया के संग रहत आवत हवंय. पनिका मन कपड़ा बुने के काम करथें, जऊन ओकर मन के पुरखौती के बूता आय.

वो ह कहिथे, “हमन कतको पीढ़ी ले बुनई करत हवन.” हमार दाई दादा जो थे वो भी इही ला बिन बिन के पोसे हैं और उनके जाने बाद के हम भी हमार बाल बच्चा को इसी से पोसे हैं, और इहीं धंधा करके हमर लड़का बच्चा भी हमन ला पाल रहे हैं.” ये ह हमर असल काम आय.

मैकाल पर्वतमाला के घन जंगल मं बसे बैगाचक, खास करके बैगा आदिवासी मन के बास के जगा आय, जेन मन डोंगरी मं रहिथें अऊ बेवर खेती (झूम खेती) करथें. फेर इहाँ गोंड़ आदिवासी घलो हवंय जेन मन खेती करथें ; अघरिया लोगन मन लोहा के काम करथें; अहिर लोगन मन गाय-गोरु पोसथें. डोंगरी के तरी मं रहेइय्या पनिका लोगन मन बुनकर आंय, जेन मन बैगा आदिवासी मन बर लुगरा-कपड़ा बनाथें. ये इलाका मं बैगा आदिवासी मन के आबादी सबले जियादा हवय, अऊ राज मं वो मन ला ‘विशेष रूप से कमज़ोर जनजातीय समूह' (पीवीटीजी) के रूप मं वर्गीकृत करे गे हवय.

“वो बखत”, नेहरू दास जी दस बछर पहिली के बात ला सुरता करत कहिथे. “हमन कपड़ा वइसनेच बुनत रहेन, जइसने बैगा लोगन मन हमन ला कहत रहिन. ओ मन के मरद अऊ माइलोगन मन, दूनोंच हमर बुने कपड़ा पहिरत रहिन. जिहां मरद लोगन मन बांदी जैकेट बनवावत रहिन, उहिंचे माईलोगन मन बगरा, मूंगी अऊ चकधरिया बनावत ला कहंय.”

“हमर अऊ बैगा लोगन मं नाता सुरु लेच रहे हवय,” वो ह कहिथे. वो बखत ले जब ये संसार बने रहिस. वो जमाना मं, जब घलो हमन कपड़ा बेचे बर बजार जावत रहेन, त हमर जम्मो जिनिस 10 मिनट मं बेंचा जावत रहिस. इहाँ तक के चादर घलो, जेन ला बैगा मन ओढ़त रहिन, वो बखत हमनेच बनावत रहेन.”

गाँव मन मं अपन खुद के राज-काज (नारव्यवस्था) के एक ठन मजबूत तरीक़ा रहिस अऊ समाज ह गाँव के संपत्ति (सब्बो के हक) के सोच ला मानय. वो बखत नजरिया मं धरती के हरेक जिनिस अऊ लोगन मन के जिनगी एक-दूसर से जुड़े रहिस. कोनो एक उपर खराब असर ह जम्मो ला असर डारत रहिस. पचास बछर के सुनील दास कहिथे, “गाँव के मुखिया ला मुकद्दम कहे जावय. वो बखत हमर समाज मं कोनो ऊंच-नीच (जात-पात) नइ रहिस. फेर अब समे भारी बदल गे हवय.” सुनील दास ह नेहरू दास जी के बड़े परिवार के आय.

ये बखत पारंपरिक बुनई के काम ला आगू बढ़ाय मं रूचि कम लोगन मन के हवय. रोजी मजूरी मं जियादा पइसा मिलथे. “बुनई के काम भारी मिहनत वाला आय. ये ह हाथ के काम आय, ये मं बखत लागथे. गर परिवार के दू तीन झिन मिलके एक ठन लुगरा बुनथें, अऊ गर वो लुगरा ला 2,000 ले 2,300 रूपिया मं बेचथें, त हमर मिहनत के पइसा घलो कइसने निकरही? तुमन बतावव हमर गुजारा कइसने होही?” सुनील दास पूछथे.

नेहरू दास जी के उमर होय के संग कमजोर होवत नजर अऊ ओकर सुवारी के बुनई के काम ला कठिन बना दे हवय. परिवार के कतको लोगन मन, जइसने सुनील दास के कका गंगू दास (करीबन 65 बछर के), पारंपरिक लुगरा बुने के संगे संग दीगर जिनिस घलो बनाय सुरु कर दे हवय. सुनील दास बताथे, “वो ह ग्राहेक मन के लेवाली मुताबिक कुरता, पइजामा अऊ दीगर तरीका के सूती लुगरा बनाथे, अऊ येकर ले दू पइसा जोड़ लेथे. बैगा लोगन मन अब पहिली के जइसने पारंपरिक लुगरा पहिरे छोड़ दे हवंय, जेकर सेती ये कला ला नुकसान पहुँचत हवय.”

सरकार ह ये इलाका मं पारंपरिक 'पिट लूम' (ज़मीन मं बने खंचवा करघा) के जगा फ़्रेम लूमलाय के कोसिस करे हवय. सुनील दास, जेन ह खुदेच फ़्रेम लूम मं काम करथे, कहिथे, “ये नवा करघा मन ले घलो, गर तीन झिन मिलके महीना भर काम करेंय, त 15 ले 20 थठन लुगरा बना सकथें. फेर, ओतकेच बखत मं हमन पिट लूम मं दू ले तीन ठन लुगराच बुने सकथन. सरकार हमन ला करघा देथे, अऊ हमन ला ट्रेनिंग घलो देथे.” फेर, महीना भर मं तीन झिन बर 30,000 रूपिया के ये कमई, शहर मं रोजी मजूरी ले मिलेइय्या कमई ले सिरिफ एक तिहाई भर आय.

“आजीविका योजना के तहत सरकार ह हरेक छै महीना मं एक बेर 10,000 रूपिया देथे. वो ह धागा, करघा अऊ बेचे बर घलो मदद करथे. फेर येकर बाद घलो हमन बुनई ले ओतक कमाय नइ सकन के हमर गुजारा होय सकय. हमन ला ये जिनिस ले कोनो फायदा नइ होवय,” गंगू दस कहिथे, जेन ह अपन पारंपरिक बुनई ला दुनिया के आगू राखे के कोसिस करे हवय. वो ह सरकारी प्रदर्सनी मन मं अपन स्टाल घलो लगाय हवय.

सुनील दास के मुताबिक, आगू बढ़े के रद्दा कोनो सरकारी टेक्सटाइल कॉलेज लेच होके जाथे, ओकर चार झिन लइका हवंय. ओकर एक झिन बिन बियाहे बेटी कालेज मं पढ़त हवय, अऊ ओकर बेटा 11 वीं क्लास मं पढ़थे. ओकर सपना हवय के वो ह अपन बेटा ला कोनो कालेज मं भेजे, जिहां वो ह बुनाई के नवा तरीका (तकनीक) सीख सकय- जेन ह ओकर पुरखौती के कारोबार के काम आय सकय.

“कबीर साहिब हमर भगवान जइसने आय. ये काम ओकर किरिपा आय.” कबीर पंथी महान कवि के बारे में गोठियावत नेहरू दास जी के बोली एकदम साफ़ रिहिस. “ये हमर दाई-ददा अऊ पुरखा मन उपर ओकर असीस आय जेकर सेती हमन ये बूता ला आज घलो करत हवन अऊ आगू घलो करत रहिबो. गर लोगन मन हमर बनाय लुगरा मन ला पहिरे छोड़ दिहीं, त हमन अपन बर बुनबो. फेर हमन बुने के बूता ला आगू ले जावत रहिबो.”

ये कहिनी मूल रूप ले हिंदी मं लिखे गे हवय.

ये कहिनी मं लुगरा मन के फोटो खुदेच सुनील दास ह खींचे हवय.

ये कहिनी ला मृणालिनी मुखर्जी फाउंडेशन (एमएमएफ) के फ़ेलोशिप मिले हवय.