കബഡി: പഞ്ചാബിന്റെ ജീവനായ കായികവിനോദം

“കൗഡി, കൗഡി, കൗഡി, കബഡി, കബഡി, കബഡി….”

മൺവൃത്തത്തിനുള്ളിൽ ആർപ്പുവിളികൾ ഉച്ചത്തിലായി - റേയ്‌ഡർമാരും സ്റ്റോപ്പർമാരും തമ്മിലുള്ള പോരാട്ടത്തിന്റെ രംഗം. ഡൽഹിക്ക് പുറത്തുള്ള സിംഗു, ടിക്രി അതിർത്തികളിൽ 2020-2021-ലെ കർഷകരുടെ പ്രതിഷേധമായിരുന്നു വേദി. കബഡി വിവരണവും മുദ്രാവാക്യങ്ങളും പ്രതിരോധ പ്രസംഗങ്ങളും കലർന്നിരുന്നു - മൂന്ന് കാർഷികനിയമങ്ങൾ പിൻവലിക്കുന്നതുവരെ ലക്ഷക്കണക്കിന് കർഷകരും കർഷകത്തൊഴിലാളികളും ഇവിടെ പ്രതിഷേധത്തിൽ അണിനിരക്കുകയായിരുന്നു.

2021 സെപ്റ്റംബറിൽ ഒരാഴ്ച നീണ്ടുനിന്ന ടൂർണമെന്റിന്റെ അവസാനം, ഒരു പുതിയ കളിക്കാരൻ ഉയർന്നുവന്നു: ഹരിയാനയിലെ റോഹ്തക്കിൽനിന്നുള്ള ശിലു ബൽഹാര. പഞ്ചാബിൽനിന്നുള്ള കബഡി താരങ്ങളുടെ ലീഗിൽ അദ്ദേഹം ചേർന്നു. താഴ്ന്ന വരുമാനക്കാരും പാർശ്വവത്കരിക്കപ്പെട്ട സമുദായങ്ങളിലെ യുവാക്കളും സാമ്പത്തിക സ്ഥിതി മെച്ചപ്പെടുത്താൻ ഈ കളിയെയാണ് ആശ്രയിക്കുന്നത്.

പഞ്ചാബിലെ ഗ്രാമങ്ങളിലെ ആൺകുട്ടികൾ ആദ്യം പഠിച്ചെടുക്കുന്ന കായികയിനങ്ങളിലൊന്നാണ് വൃത്തശൈലിയിലുള്ള കബഡി. ഇതിന്റെ ആകർഷണം ഇതിന്റെ ലാളിത്യത്തിലാണ്; ഇതിന് ഉപകരണങ്ങളൊന്നും ആവശ്യമില്ല - പലപ്പോഴും കളിക്കാർ പാദരക്ഷകൾപോലും ധരിക്കാറില്ല. ഇതിന്റെ നിയമങ്ങൾ ലളിതമാണ്, കൂടാതെ മണ്ണിലാണ് ഇത് കളിക്കുന്നത്.

ബലിഷ്ഠമായ ശരീരം കെട്ടിപ്പടുക്കുന്നതിൽ അഭിമാനിക്കുന്ന യുവാക്കളെ സംബന്ധിച്ചിടത്തോളം, ഇത് അത്യന്തം ശാരീരികക്ഷമത ആവശ്യപ്പെടുന്ന ഒരു കളിയാണെന്നതുകൂടി, ഇതിന്റെ ഒരു ആകർഷണമാണ്. പഞ്ചാബ് ശൈലിയിലുള്ള കബഡി എന്നും അറിയപ്പെടുന്ന ഈ കളി മേളകൾ, സാമൂഹിക ഒത്തുചേരലുകൾ, പ്രാദേശിക ടൂർണമെന്റുകൾ എന്നിവയിൽ കളിക്കപ്പെടുന്നു.

പഞ്ചാബിലെ കബഡി സീസൺ കാർഷിക കലണ്ടറിനൊപ്പം നീങ്ങുന്നു. ഇത് ഒക്ടോബറിൽ വിത്തുപാകുന്ന സമയത്ത് തുടങ്ങി ഏപ്രിലിലെ വിളവെടുപ്പുകാലംവരെ തുടരും.

ബാഹു അക്ബർപൂർ ഗ്രാമത്തിലെ ഒരു ചെറിയ കർഷകന്റെ മകനായ ഷിലു ബൽഹാര 2025-ൽ ടൊറന്റോ ആസ്ഥാനമായുള്ള യുണൈറ്റഡ് ബ്രാംപ്ടൺ കബഡി ക്ലബിൽ ഏറ്റവും കൂടുതൽ പ്രതിഫലം വാങ്ങുന്ന കളിക്കാരിൽ ഒരാളായിരുന്നു. ക്ലബ്ബിലെ മൂന്ന് മാസത്തെ കരാർപ്രകാരം താരപദവിയാർജ്ജിച്ച കളിക്കാർക്ക് 50 മുതൽ 70 ലക്ഷം രൂപവരെ ലഭിക്കും. ഒരു മികച്ച സ്റ്റോപ്പർ എന്ന നിലയിൽ അദ്ദേഹം ഇതുവരെ ഒരു ഡസനിലധികം ട്രാക്ടറുകൾ നേടിയിട്ടുണ്ട്.

നൂറുകണക്കിന് യുവാക്കളുടെ സാമൂഹികവും സാമ്പത്തികവുമായ നിലയിൽ കബഡി വരുത്തിയ പരിവർത്തനത്തെ പ്രതിഫലിപ്പിക്കുന്ന ഒന്നാണ് ബൽഹാരയുടെ ഉയർച്ച.

“ഞാൻ കബഡി പഠിച്ചില്ലായിരുന്നുവെങ്കിൽ, ഒരു സൈക്കിൾ വാങ്ങുന്നതുപോലും എനിക്കൊരു വെല്ലുവിളിയാകുമായിരുന്നു,” സോണി സിംഗ് പറയുന്നു. അദ്ദേഹത്തിന്റെ കഥയും ഇതേ പാത പിന്തുടരുന്നു. ഉയർന്ന ജാതിക്കാരായ ജാട്ട് സിഖ് സമൂഹത്തിന് സ്വാധീനമുള്ള പഞ്ചാബിലെ മൻസ ജില്ലയിലെ ഭദ്ര എന്ന ഗ്രാമത്തിലെ ഒരു ദളിത് കുടുംബത്തിൽ ജനിച്ച സോണിയുടെ പിതാവ്, ഒരു കർഷകത്തൊഴിലാളിയായിരുന്നു. “കുടുംബവരുമാനം വർദ്ധിപ്പിക്കാൻ ഞാനും മറ്റുള്ളവരുടെ കൃഷിയിടങ്ങളിൽ ജോലി ചെയ്തിരുന്നു. ദാരിദ്ര്യത്തിൽനിന്ന് രക്ഷപ്പെടാൻ സായുധസേനയിൽ ചേരണമെന്ന് ഞാൻ ഒരിക്കൽ ആഗ്രഹിച്ചിരുന്നു, പക്ഷേ കബഡി കളിക്കുന്നതിനിടെ എന്റെ കണ്ണിനേറ്റ പരിക്ക് മൂലം വൈദ്യപരിശോധനയിൽ ഞാൻ പരാജയപ്പെട്ടു,” അദ്ദേഹം പറയുന്നു.

പരിക്കിനുശേഷം സോണി പൂർണ്ണമായും കബഡിയിലേക്ക് തിരിഞ്ഞു. അദ്ദേഹത്തിന്റെ കഴിവുകൾ സ്വന്തം കുടുംബത്തെ, കേവലം രണ്ട് മുറികളുള്ള വീട്ടിൽനിന്ന് ഗ്രാമത്തിലെ ഒരു ബംഗ്ലാവിലേക്ക് മാറാൻ സഹായിച്ചു.

"കബഡി എനിക്ക് എല്ലാം നൽകിയിട്ടുണ്ട് - പണവും പ്രശസ്തിയും ബഹുമാനവും. പഞ്ചാബിലും വിദേശത്തും എന്റെ ഗ്രാമത്തിന്റെ പേരെത്തിയതിൽ എന്റെ ഗ്രാമം മുഴുവൻ അഭിമാനിക്കുന്നുണ്ട്", സോണി ഭദ്ര എന്ന് സ്വന്തം ഗ്രാമത്തിന്റെ പേരിൽ അറിയപ്പെടുന്ന ഈ 27-കാരൻ പറയുന്നു.

പഞ്ചാബിലെ എൻ.ആർ.ഐ. നാകോദർ ക്ലബ്ബിനായി കളിക്കുന്ന സോണി ഇന്ന് വിദേശത്ത് സ്വന്തമായൊരു മേൽവിലാസമുണ്ടാക്കിയിരിക്കുന്നു. കഴിഞ്ഞ മൂന്നുനാല് വർഷത്തിനിടെ അദ്ദേഹം ന്യൂസിലൻഡ്, ഓസ്ട്രേലിയ, ഇംഗ്ലണ്ട് എന്നിവിടങ്ങളിൽ കളിച്ചിട്ടുണ്ട്. "ഇന്ന് ഞാൻ ഒരു ഹാർലി - ഡേവിഡ്സൺ ഉൾപ്പെടെ 18-20 മോട്ടോർബൈക്കുകൾ നേടിയിരിക്കുന്നു", സോണി പറയുന്നു.

മണി ദയാൽപൂർ എന്നറിയപ്പെടുന്ന മൻപ്രീത് സിംഗ്, 25, ഒരു സുരക്ഷാജീവനക്കാരന്റെ മകനാണ്. 9-ആം ക്ലാസിനുശേഷം സ്കൂൾപഠനം ഉപേക്ഷിച്ച അദ്ദേഹം കുറച്ചുകാലം ഒരു ആശുപത്രി അറ്റൻഡറായി ജോലി ചെയ്തു. എന്നാൽ കബഡി അദ്ദേഹത്തിന്റെ ജീവിതത്തെ മാറ്റിമറിച്ചു. 2022 മുതൽ അദ്ദേഹം ന്യൂസിലൻഡിൽ നാല് സീസണുകളും ഓസ്ട്രേലിയയിലും ഇംഗ്ലണ്ടിലും രണ്ട് സീസണുകൾ വീതവും കളിച്ചിട്ടുണ്ട്.

"എന്റെ ഗ്രാമത്തിൽ സ്വന്തമായി ഒരു വീട് പണിയുക എന്നത് എന്റെ സ്വപ്നമാണ്. ഞാൻ എന്റെ അച്ഛനോട് ഇനി ജോലിക്ക് പോകേണ്ടെന്ന് ആവശ്യപ്പെട്ടിട്ടുണ്ട്, പക്ഷേ അദ്ദേഹം ഇപ്പോഴും സ്വന്തം അധ്വാനംകൊണ്ട് ജീവിക്കുന്നതിൽ ഉറച്ചുനിൽക്കുന്നു," കപൂർത്തല, ജലന്ധർ ജില്ലകൾക്കിടയിൽ വ്യാപിച്ചുകിടക്കുന്ന ദയാൽപൂർ (2011-ലെ സെൻസസിൽ ദിയാൽപൂർ എന്ന് രേഖപ്പെടുത്തിയിരിക്കുന്ന) ഗ്രാമത്തിലെ മൻപ്രീത് പറയുന്നു.

സോണിയ്ക്കും മൻപ്രീതിനും വിദേശ ക്ലബ്ബുകളിൽ ചേരുമ്പോൾ 15 ലക്ഷം രൂപയുടെ മൂന്നുമാസത്തെ കരാറുകളാണ് ലഭിക്കുന്നത്. ഇത് കഠിനമായ ഒരു കായികയിനമാണെന്ന് അവർ ചൂണ്ടിക്കാണിക്കുന്നു - കാൽമുട്ടിനും തോളിനും പരിക്കുകൾ സാധാരണമാണ്. എന്നാൽ ഇതിലടങ്ങിയ സാമ്പത്തികനേട്ടം താഴ്ന്ന വരുമാനമുള്ള കുടുംബങ്ങളിൽനിന്ന് വരുന്ന ആൺകുട്ടികളെ ഇതിലേക്ക് ആകർഷിക്കുന്നു.

2010-നും 2016-നുമിടയിൽ, ശിരോമണി അകാലിദൾ അധികാരത്തിലുണ്ടായിരുന്നപ്പോൾ, പഞ്ചാബ് സർക്കാർ എല്ലാ വർഷവും കബഡി ലോകകപ്പ് സംഘടിപ്പിക്കുകയും അങ്ങനെ ഈ കളിയെ സാമ്പത്തികമായി ഭദ്രത നൽകുന്ന ഒരു ഉദ്യോഗമാക്കി മാറ്റുകയും ചെയ്തിരുന്നു. പഞ്ചാബിലെ ആഭ്യന്തര ടൂർണമെന്റുകളുടെ മൊത്തത്തിലുള്ള വാർഷിക ബജറ്റ് ഇപ്പോൾ ഏകദേശം 250 കോടി രൂപയാണെന്ന് കണക്കാക്കപ്പെടുന്നു, വിദേശ മത്സരങ്ങളിലാകട്ടെ 150 കോടി രൂപ അധികം വരും.

1990 മുതൽ കബഡി, ഏഷ്യൻ ഗെയിംസിന്റെയും ഭാഗമാണ്. പ്രോ കബഡി ലീഗ് വഴി അത് നഗരങ്ങളിലെ വീടുകളിലും പ്രവേശിച്ചു. എന്നാൽ അത് ഇതിൽനിന്നും വ്യത്യസ്തമായ, സ്റ്റാൻഡേർഡ് ഫോർമാറ്റ് എന്ന് വിശേഷിപ്പിക്കപ്പെടുന്ന, ചതുരാകൃതിയിലുള്ള കോർട്ടിൽ കളിക്കുന്ന ഒരു കായികശൈലിയാണ്. മിക്ക ദേശീയ, അന്തർദേശീയ ടൂർണമെന്റുകളും കൃത്രിമ മാറ്റുകളിലാണ് കളിക്കുന്നത്, കൂടാതെ ആഭ്യന്തരമത്സരങ്ങൾപോലും ക്രമേണ മണ്ണിൽനിന്ന് മാറ്റിലേക്ക് മാറിക്കൊണ്ടിരിക്കുന്നു. കളിക്കാർ മാറ്റ് പ്രതലങ്ങൾക്കായി രൂപകൽപ്പന ചെയ്ത, പരന്ന അടിഭാഗമുള്ള പാദരക്ഷകളാണ് ധരിക്കുന്നത്.

മൺതറയിൽ ഒരുക്കിയ 22 മീറ്റർ വ്യാസമുള്ള വൃത്താകൃതിയിലുള്ള കളിക്കളത്തിലാണ് വൃത്തശൈലിയിലുള്ള കബഡി ഇപ്പോഴും കളിക്കുന്നത്. ഓരോ ടീമിലും റേയ്ഡർമാരും സ്റ്റോപ്പർമാരുമുണ്ട്. ഒരു റേയ്ഡർ എതിരാളികളുടെ വൃത്തത്തിൽ പ്രവേശിക്കുമ്പോൾ, അദ്ദേഹം നാല് സ്റ്റോപ്പർമാരെ നേരിടുന്നു. റേയ്ഡർ ആദ്യം സ്പർശിക്കുന്ന സ്റ്റോപ്പർ വേണം ആ റേയ്ഡർ വീണ്ടും തന്റെ മേഖലയിലേക്ക് മടങ്ങുന്നത് തടയാൻ. തത്സമയം, ദേഹോപദ്രവം അനുവദനീയമല്ലെങ്കിലും, കളി ഇരുവരും തമ്മിലുള്ള ഒരു നേർക്കുനേർ പോരാട്ടമായി മാറുന്നു. ഓരോ റേയ്ഡിലും ഒരേ നിയമം ബാധകമാണ് - നാല് സ്റ്റോപ്പർമാർ കളത്തിലിറങ്ങുന്നു, ഒരു വിജയകരമായ റേയ്ഡിലൂടെ റേയ്ഡറുടെ ടീം ഒരു പോയിന്റ് നേടുമ്പോൾ, ഒരു വിഫലമായ റേയ്ഡ് എതിർടീമിന് ഒരു പോയിന്റ് നേടികൊടുക്കുന്നു. സാധാരണയായി ഒരു ടീമിൽ 12 കളിക്കാർ ഉണ്ടാകുമെങ്കിലും, ചില ഗ്രാമീണ ടൂർണമെന്റുകളിൽ കളിക്കാരുടെ എണ്ണം വ്യത്യാസപ്പെടാം.

കബഡിയുടെ ഈ ശൈലിക്ക് ഒരു ഔപചാരിക കായികഘടനയോ അംഗീകാരമോ ഇല്ല. സമൂഹത്തിന്റെ പിന്തുണയിലാണ് ഇത് പുഷ്ടിപ്പെട്ടിരിക്കുന്നത്, ഒരുപക്ഷെ, ഔപചാരിക സംവിധാനവുമില്ലാതെ, നിലനിൽക്കുകയും, ഓരോ വർഷവും ശക്തമായി വളരുകയും ചെയ്യുന്ന ഒരേയൊരു ഇന്ത്യൻ ഗ്രാമീണ കായിക വിനോദമായിരിക്കാം ഇത്.

ഏതാണ്ട് 12,500-ലധികം വരുന്ന പഞ്ചാബിലെ എല്ലാ ഗ്രാമങ്ങളും ടൂർണമെന്റുകൾ നടത്താറുണ്ട്. കർഷകസമൂഹം ഇതിനായി ധനം സംഭാവന നൽകുകയും, ഗ്രാമത്തിലെ പ്രവാസി ഇന്ത്യക്കാർ (എൻ.ആർ.ഐ.കൾ) ഇതിനെ ഉദാരമായി പിന്തുണയ്ക്കുകയും ചെയ്യുന്നു. സംസ്ഥാനത്തെ ടൂർണമെന്റുകളിലേക്കുള്ള പ്രവേശനം സൗജന്യമാണ്, കാരണം ഇവ കൂടുതലും ഉത്സവങ്ങളായി കാണപ്പെടുന്നു. ടൂർണമെന്റിന്റെ വലിപ്പമനുസരിച്ചു, കാണികളുടെ എണ്ണം 5,000 മുതൽ 50,000വരെയാകാം.

സമ്മാനത്തുകയിൽ ധാരാളം വ്യതിയാനങ്ങളുണ്ടാകും. ഒരു നല്ല ടൂർണമെന്റിന് 10-50 ലക്ഷം രൂപ ബജറ്റും, കൂടാതെ കാറുകൾ, മോട്ടോർസൈക്കിളുകൾ അല്ലെങ്കിൽ കമ്പൈൻ ഹാർവെസ്റ്ററുകൾ പോലുള്ള സമ്മാനങ്ങളും ഉണ്ടാവും. പങ്കെടുക്കുന്ന ഓരോ ടീമിനും കളിക്കാൻ വന്നതിന് ഒരു ഫീസ് ലഭിക്കും, ഇത് 12 കളിക്കാർക്കിടയിൽ വിഭജിക്കപ്പെടും. മത്സരത്തിൽ പുരോഗമിക്കുമ്പോൾ ടീമിന്റെ പ്രതിഫലം വർദ്ധിക്കുകയും, വിജയികൾക്ക് പ്രത്യേക സമ്മാനങ്ങൾ ലഭിക്കുകയും ചെയ്യുന്നു. വ്യക്തിഗത പുരസ്‌കാരങ്ങൾ - മികച്ച റേയ്ഡർ അല്ലെങ്കിൽ സ്റ്റോപ്പർ - പണമായും സാമഗ്രികളായും നൽകപ്പെടുന്നു. ഉയർന്ന ബജറ്റുള്ള മത്സരങ്ങളിൽ, മികച്ച കളിക്കാർക്ക് പലപ്പോഴും ഹാർലി-ഡേവിഡ്സൺ ബൈക്കുകൾ, ട്രാക്ടറുകൾ, മഹീന്ദ്ര ഥാറുകൾ തുടങ്ങിയവ വ്യക്തിഗത പുരസ്കാരങ്ങളായി ലഭിക്കുന്നു.

നവംബറിനുശേഷം മികച്ച കളിക്കാർ വിദേശത്തുനിന്ന് മടങ്ങിയെത്തുമ്പോഴാണ് ഏറ്റവും വലിയ ടൂർണമെന്റുകൾ നടക്കുന്നത്.

"ഒരു കളിക്കാരൻ, കാഴ്ചക്കാരൻ, ഇപ്പോൾ ഒരു സംഘാടകൻ എന്നീ നിലകളിൽ ഞാൻ ഈ ടൂർണമെന്റിൽ ജീവിച്ചിട്ടുണ്ട്," ലെഹൽ ഖുർദിലെ 42-കാരനായ ബൽകാർ സിംഗ് പറയുന്നു. "തലമുറകളായി പഞ്ചാബിന്റെയും പഞ്ചാബികളുടെയും സ്വത്വമാണ് കബഡി. കബഡി താരങ്ങളുടെ കഥകൾ കണ്ടും, കേട്ടും, കളിച്ചുമാണ് ഞങ്ങൾ വളർന്നത്."

സംഗ്രൂർ ജില്ലയിലെ ലെഹൽ ഖുർദ് എന്ന ഗ്രാമത്തിലേക്കുള്ള പാത സ്വയം അധികമൊന്നും കൊട്ടിഘോഷിക്കുന്നില്ല. എന്നാൽ അതിന്റെ പ്രവേശനകവാടത്തിൽ ഉയരത്തിൽ നിൽക്കുന്നത് 1971-ലെ ഇന്ത്യ-പാകിസ്ഥാൻ യുദ്ധത്തിലെ രക്തസാക്ഷിയും, വീർചക്ര പുരസ്‌കാര ജേതാവുമായ നായിക് ഗുർജന്ത് സിങ്ങിന്റെ പ്രതിമയാണ്. 1972 മുതൽ എല്ലാ ഡിസംബറിലും ഈ ധീരപുത്രന്റെ ഓർമ്മയിൽ ആ ഗ്രാമം ഒരു കബഡി ടൂർണമെന്റിന് ആതിഥേയത്വം വഹിച്ചിട്ടുണ്ട്. ഈ വർഷത്തെ ടൂർണമെന്റ് ഡിസംബർ 11 മുതൽ 13-വരെ നടന്നു, നായിക് ഗുർജന്ത് സിംഗ് ജീവൻ ബലിയർപ്പിച്ച ദിവസമാണ് അത് സമാപിച്ചത്.

ഡിസംബർ 11-ന് മുൻ സൈനികരെ ആദരിച്ചുകൊണ്ടാണ് പരിപാടികൾ ആരംഭിച്ചത്, തുടർന്ന് കുട്ടികളുടെ മത്സരങ്ങൾ നടന്നു. കാണികൾ എന്ന നിലയിൽ സ്ത്രീകൾക്കുള്ള ഇടം വളരെ കുറവാണെങ്കിലും, ഒരു വനിതാ പ്രകടനമത്സരത്തിലൂടെ പുതിയൊരു തുടക്കം കുറിക്കാൻൻ സംഘാടകർ ശ്രമിച്ചു. ട്രോളി-ലോഡിംഗ് മത്സരമായിരുന്നു ഒരു പുതിയ ഇനം, ഇതിൽ ടീമുകൾ 35 കിലോഗ്രാം ധാന്യം നിറച്ച 75 ചാക്കുകൾ വീതം എടുത്തുമാറ്റിക്കൊണ്ട് തങ്ങളുടെ കായികശക്തിക്കും ഏകോപനത്തിനും കാണികളിൽനിന്ന് ഉച്ചത്തിലുള്ള ഹർഷാരവങ്ങൾ ഏറ്റുവാങ്ങി. ഫൈനൽ മത്സരം പുലർച്ചെ 2 മണിവരെ നീണ്ടുനിന്നു.

2,600-ലധികം വോട്ടർമാരുള്ള, ജനസംഖ്യയിൽ ഭൂരിഭാഗവും ജാട്ട് സിഖ് വിഭാഗത്തിൽപ്പെട്ടവരടങ്ങിയ ഈ ഗ്രാമം ടൂർണമെന്റിനെ ഒരു സംയുക്‌ത കർത്തവ്യമായി കാണുന്നു. മുഴുവൻ പഞ്ചായത്തും സംഭാവന നൽകുകയും, തയ്യാറെടുപ്പുകൾ മാസങ്ങൾക്ക് മുമ്പേ ആരംഭിക്കുകയും ചെയ്യുന്നു. ഈ പരിപാടി ഒരു ചെറിയ ഗ്രാമീണ സമ്പദ്‌വ്യവസ്ഥയെ ശക്തിപ്പെടുത്തുന്നു - ഛോല - കുൽച്ച, കരിമ്പ് ജ്യൂസ്, നിലക്കടല എന്നിവ വിൽക്കുന്ന കച്ചവടക്കാർ സാധാരണയായി ഒരുമാസത്തിൽ സമ്പാദിക്കുന്ന വരുമാനം, കേവലം മൂന്ന് ദിവസത്തിനുള്ളിൽ സമ്പാദിക്കുന്നു. സ്റ്റേഡിയത്തിൽ ഉച്ചയ്ക്ക് നിരന്നിരുന്നവരിൽ എല്ലാ പ്രായത്തിൽപ്പെട്ട പുരുഷന്മാരും അടങ്ങിയിട്ടുണ്ടായിരുന്നെങ്കിലും, കാണികളിൽ കൂടുതലും ചെറുപ്പക്കാരാണ്. സൂര്യാസ്തമയത്തോടുകൂടി ഫ്ലഡ്‌ലൈറ്റുകൾ പ്രകാശിക്കാൻ ആരംഭിക്കുമ്പോൾ, രാത്രി വൈകുംവരെ നീണ്ടുനിൽക്കുന്ന പൊരിഞ്ഞ അങ്കങ്ങൾക്ക് സാക്ഷ്യം വഹിക്കാൻ യുവാക്കളെ ബാക്കിനിർത്തി, പ്രായമായവർ വീട്ടിലേക്ക് നീങ്ങി.

പഞ്ചാബികൾ ചേക്കേറിയ ഇടങ്ങളിലേക്കെല്ലാം - അത് കാനഡയോ യു.എസ്സോ, യു.കെയോ ഓസ്ട്രേലിയയോ ആകട്ടെ - കബഡിയും അവരോടൊപ്പം സഞ്ചരിച്ചിട്ടുണ്ട്. വിദേശത്ത് നടക്കുന്ന ടൂർണമെന്റുകൾ കേവലം കായികമത്സരങ്ങൾ മാത്രമല്ല, മറിച്ച് അവ അവിടത്തെ സമൂഹങ്ങളെ പഞ്ചാബിന്റെ മണ്ണിന്റെ താളവുമായി ബന്ധിപ്പിക്കുന്ന സാംസ്കാരികോത്സവങ്ങളുമാണ്.

പഞ്ചാബ് ഭാഷാവകുപ്പിലെ ഗവേഷണ ഉദ്യോഗസ്ഥനും ഈ കായികരംഗത്തിന്റെ വിദേ ബന്ധങ്ങളെക്കുറിച്ചുള്ള പഠനത്തിൽ പി.എച്ച്.ഡി.യും കരസ്ഥമാക്കിയ ഡോ. സുഖ്‌ദർശൻ സിംഗ് ചഹൽ പറയുന്നു: "പഞ്ചാബിൽനിന്നുള്ള വിദേശ കുടിയേറ്റം 20-ആം നൂറ്റാണ്ടിന്റെ തുടക്കത്തിലാണ് ആരംഭിച്ചത്, പഞ്ചാബികൾ പോകുന്നിടത്തെല്ലാം അവർ പഞ്ചാബ് ശൈലിയിലുള്ള കബഡിയും കൊണ്ടുപോയി. കുടിയേറ്റത്തിന്റെ ആദ്യകാല തരംഗങ്ങൾ കാനഡയിലേക്കും ഇംഗ്ലണ്ടിലേക്കും ആയിരുന്നതിനാൽ, പഞ്ചാബ് ശൈലിയിലുള്ള കബഡി ആദ്യമായി വിദേശത്ത് ചുവടുറപ്പിച്ചത് ഇവിടങ്ങളിലാണ്."

ഇംഗ്ലണ്ടിൽ 1950-കളിൽ തുടങ്ങി ടൂർണമെന്റുകൾ സംഘടിപ്പിച്ചുവരുന്നുണ്ട്, മേയ് മുതൽ ഓഗസ്റ്റ് ആദ്യംവരെയാണ് സീസൺ. കാനഡയിൽ ഇത് ജൂൺമുതൽ സെപ്റ്റംബർവരെ നീണ്ടുനിൽക്കുകയും തുടർന്ന് യുണൈറ്റഡ് സ്റ്റേറ്റ്സിൽ ടൂർണമെന്റുകൾ നടക്കുകയും ചെയ്യുന്നു. വിദേശമത്സരപരമ്പരകളുടെ കലണ്ടർ മാർച്ചിൽ ന്യൂസിലൻഡിൽ ആരംഭിച്ച് ഏപ്രിലിൽ ഓസ്‌ട്രേലിയയിലേക്ക് നീങ്ങുന്നു. ഈ ആഗോളവ്യാപനം നൂറുകണക്കിന് പഞ്ചാബ് കളിക്കാർക്ക് വർഷം മുഴുവനും ഒരു ഉപജീവനമാർഗ്ഗം ഉറപ്പാക്കുന്നു.

"ഇംഗ്ലണ്ടിലെ പഞ്ചാബി സമൂഹം കബഡിയുമായി ആഴത്തിലുള്ള ഒരു ബന്ധം പുലർത്തുന്നുണ്ട്. അത് അവരുടെ സംസ്കാരത്തിന്റെയും പാരമ്പര്യത്തിന്റെയും ഭാഗമാണ്, കൂടാതെ അവർക്ക് തങ്ങളുടെ വേരുകളുമായി ബന്ധം നിലനിർത്താനുള്ള ഒരു മാർഗവുമാണ്," തൻ ദേസി എന്നറിയപ്പെടുന്ന ബ്രിട്ടീഷ് പാർലമെന്റ് അംഗം തന്‍മൻജീത് സിംഗ് ദേസി, 47, അഭിപ്രായപ്പെടുന്നു.

“മൂന്നുമാസത്തെ ഇംഗ്ലണ്ട് സീസണിൽ പഞ്ചാബിൽനിന്നുള്ള ഒരു പുതുമുഖത്തിന് എളുപ്പത്തിൽ 10 ലക്ഷം രൂപ സമ്പാദിക്കാൻ കഴിയും, അതേസമയം സ്റ്റാർ കളിക്കാർക്ക് 40-50 ലക്ഷം രൂപവരെ സമ്പാദിക്കാം.” ഇപ്പോൾ 60-ന് മുകളിൽ പ്രായമുള്ള കബഡി പ്രൊമോട്ടറായ കുൽവന്ത് സംഘ പറയുന്നു.

പഞ്ചാബിന് പുറത്തുള്ള ഏറ്റവും വലിയ കബഡി മത്സരപരമ്പരകൾക്ക് കാനഡ ആതിഥേയത്വം വഹിക്കുന്നു. “ഓരോ വർഷവും ഏകദേശം 100 കബഡി കളിക്കാർ പഞ്ചാബിൽനിന്ന് കാനഡയിലേക്ക് യാത്ര ചെയ്യുന്നു. ഒരു കളിക്കാരന് ഒരു സീസണിൽ കുറഞ്ഞത് 10 ലക്ഷം രൂപയെങ്കിലും സമ്പാദിക്കാം, അതേസമയം മികച്ച 10-15 പേർക്ക് 50-70 ലക്ഷം രൂപവരെ വരുമാനമായി നേടാം,” കാനഡ ആസ്ഥാനമാക്കിയ പ്രൊമോട്ടർ മഞ്ജീത് സിംഗ് ലാലി പറയുന്നു.

കബഡി സമ്പദ്‌വ്യവസ്ഥ കളിക്കാർക്കുമപ്പുറം വ്യാപിച്ച്, പരിശീലകരെയും സപ്പോർട്ട് സ്റ്റാഫിനെയും പ്രത്യേകിച്ച് കമന്റേറ്റർമാരെയും ഉപജീവനത്തിന് സഹായിക്കുന്നു.

"ഒരു വിദേശ സീസണിൽ ഒരു കമന്റേറ്റർക്ക് 10-12 ലക്ഷം രൂപവരെ സമ്പാദിക്കാൻ കഴിയും. ദേശീയതലത്തിൽ, അവർ ഒരു ടൂർണമെന്റിൽ 10,000-20,000 രൂപവരെ സമ്പാദിക്കുന്നു," 24 വർഷമായി മൈക്കിന് പുറകിലുള്ള സത്പാൽ മാഹി ഖാദിൽ എന്ന 43 വയസ്സുകാരൻ പറയുന്നു.

സത്പാൽ ഒരു ഭൂരഹിത ദളിത് കുടുംബത്തിൽനിന്നാണ് വരുന്നത് - അദ്ദേഹത്തിന്റെ പിതാവ് ഒരു ദിവസവേതനക്കാരനായിരുന്നു. "ഞാനും ഒരു തൊഴിലാളിയായി മാറുമായിരുന്നു. പക്ഷേ, റേഡിയോയിൽ കളികളുടെ വിവരണങ്ങൾ കേൾക്കുന്നതും പുസ്തകങ്ങൾ വായിക്കുന്നതും എനിക്ക് വളരെ ഇഷ്ടമായിരുന്നു, അത് എന്റെ കഴിവുകൾ മെച്ചപ്പെടുത്തി. കബഡി എല്ലാം മാറ്റിമറിച്ചു - ഇന്ന് എനിക്ക് സ്വന്തമായി ഒരു വീടും കാറും ഉണ്ട്, കൂടാതെ ഓസ്‌ട്രേലിയ, ഇംഗ്ലണ്ട്, കാനഡ എന്നിവിടങ്ങളിലേക്ക് ഞാൻ യാത്രയും ചെയ്തിട്ടുണ്ട്."

സത്പാലിനെപ്പോലുള്ള കമന്റേറ്റർമാർ ടൂർണമെന്റുകളുടെ നട്ടെല്ലാണ്, ഇവർ ആയിരക്കണക്കിന് കാണികളെ അവരുടെ ഊർജ്ജസ്വലമായ ശബ്ദങ്ങൾ വഴി പിടിച്ചിരുത്തുന്നു. അവർ കളിക്കാരെ പരിചയപ്പെടുത്തുകയും, തന്ത്രങ്ങൾ വിശദീകരിക്കുകയും, ആവേശം കൂട്ടുകയും, ടൂർണമെന്റുകൾ ആഗോളതലത്തിൽ എത്തുമ്പോൾ സാംസ്കാരിക ബന്ധങ്ങൾ ഊട്ടിയുറപ്പിക്കുകയും ചെയ്യുന്നു.

മറ്റൊരു കമന്റേറ്ററായ 34-കാരനായ അമൻ ലോപോൺ പറയുന്നു: “ഞാൻ 2007-ൽ ആരംഭിച്ചു. എന്റെ ആദ്യത്തെ വിദേശദൗത്യം 2010-ൽ കാനഡയിലായിരുന്നു. അതിനുശേഷം, പ്രൊഫഷണൽ കബഡി കളിക്കപ്പെടുന്ന എല്ലാ രാജ്യങ്ങളിലും ഞാൻ പരിപാടികൾ കെെകാര്യം ചെയ്തിട്ടുണ്ട്.” മോഗയിലെ ലോപോൺ ഗ്രാമത്തിൽനിന്ന് വരുന്ന അദ്ദേഹത്തിന് വെറും ഒന്നരയേക്കർ കൃഷിഭൂമി മാത്രമേ കൈവശമുള്ളൂ. എന്നാൽ കബഡി കമന്ററിയിൽനിന്നുള്ള വരുമാനം അദ്ദേഹത്തെ “മാന്യമായ ഒരു വീട്ടിൽ” താമസിക്കാനും ഒരു എസ്‌.യു.വി. ഓടിക്കാനും പ്രാപ്തനാക്കി.

പഞ്ചാബ് കബഡി അസോസിയേഷന്റെ പ്രസിഡൻ്റുകൂടിയായ മുൻ കളിക്കാരൻ ഗുർലാൽ സിംഗ് ഘനൗറിന്, ഈ കളി പൊതുജീവിതത്തിലേക്കുള്ള ഒരു തുടക്കമായി മാറി - അദ്ദേഹം ഇപ്പോൾ ആം ആദ്മി പാർട്ടി (എ.എ.പി) ടിക്കറ്റിൽ ഘനൗറിൽനിന്നുള്ള എം.എൽ.എ. ആണ്. പഞ്ചാബ് കബഡി അസോസിയേഷൻ സംസ്ഥാനത്തെ നാല് പ്രധാന കബഡി അസോസിയേഷനുകളിൽ ഒന്നാണ്, അവയിൽ ഓരോന്നിലും നിലവിലുള്ളവരും മുമ്പുള്ളവരുമായ കളിക്കാരും പ്രൊമോട്ടർമാരും ഉൾപ്പെടുന്നു. അവർ ടീമുകളെ അവരോടൊപ്പം ചേർക്കുകയും സ്വതന്ത്രമായി ടൂർണമെന്റുകൾ സംഘടിപ്പിക്കുകയും ചെയ്യുന്നു.

ലുധിയാനയിലെ ഗാലിബ് കലാൻ ഗ്രാമത്തിൽനിന്നുള്ള 43-കാരനായ ജഗ്‌ദീപ് സിംഗ്, 2001-ൽ ടൂർണമെന്റുകളിൽ പങ്കെടുക്കാൻ തുടങ്ങിയപ്പോൾ, പ്രതിഫലം പരിമിതമായിരുന്നു. ഏകദേശം 20 വർഷത്തോളം അദ്ദേഹം കളിച്ചു, ഇപ്പോൾ പരിശീലകനായും പ്രതിഭകളെ കണ്ടെത്തുന്നയാളായും പ്രവർത്തിക്കുന്നു. കഴിഞ്ഞ 15 വർഷത്തിനിടെ ഈ കായികരംഗത്തുള്ള പ്രതിഫലം പല മടങ്ങായി വർദ്ധിച്ചിട്ടുണ്ടെന്ന് അദ്ദേഹം പറയുന്നു.

എന്നാൽ ഈ കായികരംഗത്തിന്റെ വിജയത്തോടൊപ്പം ഇതിൽ ദുഷിച്ച വ്യക്തിവൈരാഗ്യങ്ങളും വർദ്ധിച്ചിട്ടുണ്ട്. 2022-ൽ, ഈ കായികരംഗത്തെ മുൻനിര താരങ്ങളിൽ ഒരാളും മയക്കുമരുന്ന് ഭീഷണിക്കെതിരായ പ്രചാരകനുമായ ബ്രിട്ടീഷ് - ഇന്ത്യൻ കളിക്കാരൻ സന്ദീപ് നംഗൽ അംബിയ, 38, ജലന്ധറിലെ മല്ലിയാൻ ഖുർദിൽ നടന്ന ഒരു ടൂർണമെന്റിനിടെ വെടിയേറ്റ് മരിച്ചു. കബഡിയിലെ വ്യക്തിവൈരാഗ്യമാണ് കൊലപാതകത്തിന് കാരണമെന്ന് പോലീസ് സംശയിക്കുന്നു.

കബഡി നേരിടുന്ന മറ്റൊരു ദുഷ്പേര് ലിംഗപരമായ അസമത്വത്തെച്ചൊല്ലിയുള്ളതാണ്, സ്ത്രീകൾക്ക് ഇതിൽ വളരെ കുറച്ച് അവസരങ്ങൾ മാത്രമേ ലഭ്യമാകുന്നുള്ളൂ. നാല് അസോസിയേഷനുകളിൽ ഒന്നായ മേജർ കബഡി ലീഗ് - അവരുടെ ബാനറിൽ എല്ലാ ടൂർണമെന്റിലും കുറഞ്ഞത് ഒരു പെൺകുട്ടികളുടെ മത്സരമെങ്കിലും ഉൾപ്പെടുത്തിക്കൊണ്ട് ഈ വിടവ് നികത്താൻ ശ്രമിക്കുകയാണ്.

എന്നിരുന്നാലും, മൊത്തത്തിൽ, പഞ്ചാബിന്റെ ഗ്രാമീണ ഹൃദയമിടിപ്പ് എന്ന പേര് കബഡി അന്വർത്ഥമാക്കുന്നുണ്ട്.

കളിക്കാർക്ക് വീരനായക പദവി ലഭിക്കുകയും പാട്ടുകളിലും ഗ്രാമസമ്മേളനങ്ങളിലും ഇവർ ആഘോഷിക്കപ്പെടുകയും ചെയ്യുന്നു. ദിൽജിത് ദൊസാഞ്ച് മുതൽ പരേതനായ സിദ്ദു മൂസെവാലവരെ നിരവധി ഗായകർ ഈ കായികരംഗത്തിന് പ്രണാമങ്ങൾ അർപ്പിച്ചിട്ടുണ്ട്. ബബ്ബു മാന്റെ "കബഡി കബഡി" എന്ന ഗാനം യൂട്യൂബിൽ ഇതുവരെ 11 ദശലക്ഷത്തിലധികം ആൾക്കാർ കണ്ടിട്ടുണ്ട്.

സമൂഹത്തിന് എന്തെങ്കിലും തിരിച്ചുനൽകുന്ന കാര്യത്തിലും കളിക്കാർ മുൻപന്തിയിലാണ്. 2020 സെപ്റ്റംബറിൽ നടപ്പാക്കിയ മൂന്ന് കാർഷികനിയമങ്ങൾക്കെതിരെ ഡൽഹിയുടെ അതിർത്തികളിൽ നടന്ന കുത്തിയിരിപ്പ് സമരം 2020 നവംബറിൽ ആരംഭിച്ച്, നിയമങ്ങൾ പിൻവലിക്കപ്പെടുന്നതുവരെ ഒരു വർഷത്തിലേറെ നീണ്ടുനിന്നു. ദിവസങ്ങൾ ആഴ്ചകളായും പിന്നീട് അനന്തമായും നീണ്ടപ്പോൾ, കർഷകരുടെ പിന്നിൽ പഞ്ചാബി സമൂഹം അണിനിരന്നു: ഡോക്ടർമാർ സന്നദ്ധസേവനം നടത്തി, ജനപ്രിയ ഗായകർ കലാപ്രകടനം നടത്തി, കബഡി കളിക്കാരാകട്ടെ പ്രതിഷേധസ്ഥലത്തെ ആവേശം നിലനിർത്താൻ അതിനെ ഒരു കായികവേദിയാക്കി മാറ്റി.

2020 സെപ്റ്റംബറിൽ പാർലമെന്റിൽ തിരക്കിട്ട് പാസാക്കിയ മൂന്ന് കരിനിയമങ്ങൾക്കെതിരേ - കർഷക (ശാക്തീകരണ, സംരക്ഷണ) വില ഉറപ്പാക്കൽ, കാർഷിക സേവനങ്ങൾ എന്നിവയ്ക്കുള്ള കരാർ, 2020, കർഷക ഉൽ‌പന്ന വ്യാപാര, വാണിജ്യ (പ്രോത്സാഹനവും സൗകര്യവും) നിയമം, 2020, അവശ്യവസ്തുക്കൾ (ഭേദഗതി) നിയമം, 2020 - 2020-21-ൽ, രാജ്യമെമ്പാടുമുള്ള കർഷകർ പ്രതിഷേധിക്കാൻ ഒത്തുകൂടി. പ്രക്ഷോഭം വിജയിക്കുകയും 2021 നവംബറിൽ ഈ മൂന്ന് കർഷകവിരുദ്ധ നിയമങ്ങൾ റദ്ദാക്കാൻ യൂണിയൻ സർക്കാർ നിർബന്ധിതമാവുകയും ചെയ്തു. പ്രക്ഷോഭത്തെക്കുറിച്ചുള്ള പാരി വാർത്തകൾ വായിക്കുക: കാർഷിക നിയമങ്ങൾക്കെതിരായ പ്രതിഷേധങ്ങൾ: പൂർണ്ണ ലേഖനപരമ്പര

സിംഗുവിലും ടിക്രിയിലും കളിക്കാർ വെറും മത്സരങ്ങളിൽ പങ്കെടുക്കുക മാത്രമല്ല ചെയ്തത്, കുത്തിയിരുപ്പ് സമരത്തിൽ അച്ചടക്കം പാലിക്കാനും, വിഭവങ്ങളും സേവനങ്ങളും വ്യവസ്ഥാനുസൃതമായി സംഘടിപ്പിക്കുവാനും അവർ സന്നദ്ധരായി. കൂടാതെ ലങ്കാറിന് (സമൂഹ അടുക്കള) സംഭാവന നൽകിക്കൊണ്ട് ഇവർ കായികരംഗവും സമൂഹവും തമ്മിലുള്ള ബന്ധം ശക്തിപ്പെടുത്തി.

കർഷകരുമായി ബന്ധപ്പെട്ട എന്തെങ്കിലും പ്രശ്‌നങ്ങൾ ഉണ്ടാകുമ്പോൾ ആദ്യം പ്രതികരിക്കുന്നവരിൽ എപ്പോഴും കബഡി കളിക്കാരുണ്ടാകുമെന്നു ടൂർണമെന്റ് സംഘടിപ്പിച്ച മേജർ കബഡി ലീഗിന്റെ സെക്രട്ടറിയും, ഒരു ഫുട്ബോൾ കളിക്കാരനിൽനിന്നും കബഡി പ്രമോട്ടറുമായി മാറിയ ടോണി സന്ധു പറയുന്നു.

2010-ലെ പ്രഥമ കബഡി ലോകകപ്പിൽ ഇന്ത്യൻ ടീമിന്റെ ക്യാപ്റ്റനായിരുന്ന മംഗത് സിംഗ് മാംഗി ആ വികാരം വിശദീകരിക്കുന്നു. “കബഡി ഒരു ഗ്രാമീണ കായികവിനോദമാണ്, ഗ്രാമീണ യുവാക്കൾ കളിക്കുകയും സമൂഹം അവരെ പിന്തുണയ്ക്കുകയും ചെയ്യുന്നു. അപ്പോൾ കബഡി കളിക്കാർക്ക് എങ്ങനെ സമൂഹത്തിൽനിന്നും അകലം പാലിക്കാൻ കഴിയും?” കബഡിയുടെ ‘രാജാവ്’ എന്നറിയപ്പെടുന്ന ജലന്ധർ ജില്ലയിലെ ബഗ്ഗ ഗ്രാമത്തിൽനിന്നുള്ള ഈ 41-കാരൻ ചോദിക്കുന്നു. “ഇന്ന് ഞാൻ എന്താണോ, അതിനെല്ലാത്തിനും കാരണം കബഡിയും ഈ കായിക വിനോദത്തിന് പിന്നിൽ അടിയുറച്ചുനിൽക്കുന്ന സമൂഹവുമാണ്.”

പരിഭാഷ:വിശാലാക്ഷി ശശികല (വൃന്ദ)