ترقی کی بھنٹ چڑھتے جنگل اور لوگوں کا معاش

گجانند سہریا نے پہلی بار یہ سنا کہ وہ زمین کے مالک ہیں، جب کچھ لوگ ان کے کچے مکان پر آئے اور ان سے زمین بیچنے کو کہا۔ کلونی گاؤں میں آدیواسیوں کی ایک بستی ہے، مُنڈیار۔ گجانند اسی بستی میں رہتے ہیں۔ وہ بتاتے ہیں، ’’مجھ سے کہا گیا کہ میرے نام پر ۱۰ بیگھہ [تقریباً چھ ایکڑ] زمین ہے۔ میں زمین دیکھنے گیا [جو تقریباً دو کلومیٹر دور تھی]۔ وہ زمین پوری طرح جھاڑیوں سے بھری تھی۔ اُس پر کبھی کھیتی نہیں ہوئی۔ نہ ہم نے کی اور نہ کسی اور نے۔‘‘

پینتیس سال کے اس سہریا آدیواسی کو اپنی اس نئی حالت پر یقین نہیں ہوا، لیکن وہ آنے والے پیسوں کے بارے میں سوچ کر خوش ہو گئے۔ وہ مشکل سے مہینہ میں چار پانچ دن ہی دہاڑی مزدوری کر پاتے ہیں، جہاں انہیں دن بھر کی مزدوری کے صرف ۲۰۰ روپے ملتے ہیں۔ گجانند کا ۱۵ رکنی ایک مشترکہ خاندان ہے، جو شاہ آباد کے جنگلات سے جنگلی پیداوار اکٹھا کر کے اپنا گزارہ کرتا ہے۔ انہوں نے بتایا، ’’ہم مہوا، تیندو، جلاون کی لکڑی، اچار، آنولہ لاتے ہیں۔ اسی سے ہمارا گزارہ ہوتا ہے۔‘‘ اس سے انہیں مہینہ میں کچھ ہزار روپیوں کی آمدنی ہو جاتی ہے۔

جس جنگل پر وہ منحصر ہیں، وہ مشرقی راجستان میں پھیلا شاہ آباد کے کنارے کا ایک جنگل ہے، جو ۱۷۹ مربع کلومیٹر میں پھیلا ہوا ہے۔ اس گھنے جنگلاتی علاقہ میں نایاب درخت، نباتات، ایک جنگلی حیات موجود ہیں۔ حال ہی میں، سال ۲۰۲۲ میں، ماحولیاتی اعتبار سے اہم اس جنگل کو محکمہ جنگلات نے محفوظ جنگلاتی علاقہ قرار دیا۔ کڑایا (اسٹاکولیا یورینس) کے درخت شاہ آباد جیسے کچھ ہی جنگلوں میں پائے جاتے ہیں، اور یہاں سینکڑوں ادویاتی پودے بھی موجود ہیں۔

یہ جنگل، جنگلی حیات کے تحفظ کا قانون، ۱۹۷۲ کے تحت پہلے شیڈول میں شامل کیے گئے جانوروں اور پرندوں کی پناہ گاہ ہے، جن کا شکار کرنا غیر قانونی ہے۔ ان میں بنگال فاکس، گولڈن فاکس، ہندوستانی بھیڑیا، تیندوا (پینتھیرا پارڈس)، ہندوستانی بھورا نیولا، دھاری دار لکڑ بگھا (ہائنا ہائنا)، بِجّو، سیوٹ بلی، کالے بھالو (میلرسس ارسینس)، لال سر والے گدھ، ہندوستانی مور، اور کئی دیگر انواع شامل ہیں۔

یہ جنگل کونو نیشنل پارک سے ایک گھنٹہ سے بھی کم فاصلہ پر ہے۔ یہ اس مجوزہ گلیارے کے اندر واقع ہے، جس کے ذریعہ کونو کو گاندھی ساگر وائلڈ لائف سینکچوری سے جوڑنے کا منصوبہ بنایا گیا ہے۔ چونکہ چیتے بہت تیزی سے ختم ہو رہے ہیں، اس لیے اہلکاروں کو امید ہے کہ اس گلیارے سے انہیں بچانے میں مدد ملے گی۔

جون میں اس پورے ہفتہ بارش ہوتی رہی۔ پورا جنگل پانی کے چھوٹے چھوٹے بہاؤ سے بھر گیا ہے، جو پانی کی بڑی موجوں سے جڑے ہوئے ہیں۔ یہ سبھی موجیں کُنڈا کھوہ جھرنے کی طرف بہہ رہی ہیں، جو تقریباً ۱۰۰ فٹ کی اونچائی سے کیچڑ بھرے پانی کو ایک گہری کھائی میں گرا رہا ہے۔ نیچے کونو ندی سانپ کی طرح لہراتی ہوئی بہہ رہی ہے۔ بارش کے باوجود گاؤں والے یہاں لکڑیوں کو چھوڑ کر بقیہ جنگلی پیداوار جمع کرتے نظر آتے ہیں۔

سہریا آدیواسی برادری کو خاص طور پر کمزور آدیواسی گروپ (پی وی ٹی جی) کے زمرہ میں رکھا گیا ہے۔ یہ راجستھان کی اکیلی برادری ہے جسے یہ درجہ ملا ہے۔ گجانند کی طرح وہ اپنے معاش کے لیے جنگل پر زیادہ منحصر ہیں، جہاں سے انہیں گوند، جلاون کی لکڑی، پھل، قند اور ادویاتی جڑی بوٹیاں ملتی ہیں۔ کلونی گاؤں کی آبادی کا تقریباً ۷۰ فیصد حصہ آدیواسی اور دلت برادریوں پر مشتمل ہے، اور دونوں کی تعداد تقریباً برابر ہے (مردم شماری ۲۰۱۱)۔

حالانکہ، اس پرانے جنگل (جس پر ہزاروں لوگ منحصر ہیں) میں گرینکو گروپ ۱۸۰۰ میگا واٹ کا پمپ اسٹوریج ہائڈرو پروجیکٹ قائم کرنا چاہتا ہے۔ یہ پروجیکٹ مکمل ہوتا ہے تو شاہ آباد کے جنگل کی ۴۰۸ ہیکٹیئر زمین غرقاب ہو جائے گی، اور جنگل کے باہر ۲۱۶ ہیکٹیئر کی اضافی زمین سڑک، رہائش گاہ، ٹرانس مشن لائن اور پروجیکٹ کے دفاتر کے لیے قبضے میں لے لی جائے گی۔ اس سے کئی جنگلی جانوروں کی پناہ گاہیں اجڑ جائیں گی اور کونو نیشنل پارک کو گاندھی ساگر سینکچوری سے جوڑنے کے لیے جس مجوزہ گلیارے کی بات کی جا رہی ہے، وہ شروع ہونے سے پہلے ہی بند ہو جائے گا۔

ہندوستان کے جنگل اور ان کے آس پاس آباد گاؤں آج نام نہاد ’ترقیاتی‘ منصوبوں کے نشانے پر ہیں، جو لوگوں کے جنگلات پر منحصر معاش کی ثقافت کو ہمیشہ کے لیے ختم کر رہے ہیں۔ دیہی ہندوستان میں سہولیات سے محروم اور بے زمین لوگوں کے لیے جنگل ہی ان کی زندگی کی بنیاد ہے۔ ایک اندازہ کے مطابق، گاؤوں کی ۴۰ کروڑ آبادی اپنے گزارہ کے لیے غیر لکڑی پر مبنی جنگلی پیداواروں (این ٹی ایف پی) پر منحصر ہے، جس سے انہیں بطور مزدور ان کی بے قاعدہ آمدنی میں کچھ حد تک مدد ملتی ہے۔

اب انہیں ان کی زمین سے بھی دھوکہ سے بے دخل کیا جا رہا ہے۔ شاہ آباد شہر اور باراں سے آئے بچولیے تین گاؤوں – کلونی، بینت اور مونگاولی میں جا کر ایسے آدیواسیوں کو ’تلاش‘ کر رہے ہیں جن کے پاس زمینیں ہیں، تاکہ وہ ان سے سستی قیمتوں پر زمینیں خرید کر، پروجیکٹ کے پاس ہونے کے بعد اونچی قیمتوں پر فروخت کر سکیں۔

شاہ آباد شہر سے آئے دلال جب لگاتار ان کے پیچھے پڑے رہے، تو گجانند اور ان کے بھائیوں نے زمین بیچنے کا فیصلہ کر لیا۔ انہیں فی بیگھہ چار لاکھ روپے دیے جا رہے تھے۔ اس کا مطلب تھا کہ زمین بیچ کر انہیں ۴۰ لاکھ روپے ملتے۔ اتنی بڑی رقم کو ٹھکرانا مشکل تھا۔ انہوں نے کبھی اصلی خریدار کو دیکھا تک نہیں، بس کچھ کاغذات پر دستخط کر دیے، جنہیں وہ پڑھ بھی نہیں سکتے تھے۔ وہ یہ بھی ٹھیک ٹھیک نہیں جانتے کہ انہیں پورا پیسہ ملا یا نہیں۔ سہریا برادری کی شرح خواندگی تقریباً ۲۳ فیصد ہے، جو ریاست کے تمام آدیواسیوں کی اوسط شرح خواندگی (۳۸ فیصد) سے بھی کافی کم ہے۔

گاؤں کے اونچی ذات کے ۲۹ سالہ کسان جیتو پنڈت کہتے ہیں، ’’دلال اور کمپنیوں کے لوگ آدیواسیوں اور دلتوں کو نشانہ بنا رہے ہیں، کیوں کہ انہیں آسانی سے بہکایا جا سکتا ہے، اور وہ نقد پیسوں کو منع نہیں کر پائیں گے۔ میرے اندازہ کے مطابق، اب تک تقریباً ۲۰۰۰ بیگھہ زمین خریدی جا چکی ہے۔‘‘ دلالوں یا دلالوں کی طرح کام کرنے والے کسی بھی آدمی نے پاری سے بات کرنے کی خواہش کا اظہار نہیں کیا۔ نہ تو کھلے طور پر، نہ ہی رازدارانہ طور پر۔

کلونی گاؤں کے دلت کسان رمیش چند جاٹو اور ان کے دو بھائیوں کے پاس ۱۷ بیگھہ (تقریباً ۱۰ ایکڑ) زمین تھی۔ انہوں نے بھی اسے ۴ لاکھ روپے فی بیگھہ کی شرح سے فروخت کر دیا۔ وہ پاری کو اپنا پاس بک دکھاتے ہیں، جس میں ۷ مئی ۲۰۲۴ کو ۱۲ لاکھ روپے جمع کرنے کی جانکاری درج تھی۔ جس کے بارے میں وہ بتاتے ہیں کہ یہ ان کا حصہ ہے۔ گجانند کی طرح ہی انہیں بھی یہ نہیں معلوم کہ انہوں نے زمین کسے بیچی ہے اور ان کے پاس اس کا کوئی کاغذ بھی نہیں ہے۔ وہ کہتے ہیں، ’’مجھ سے بس دستخط کروائے گئے تھے۔‘‘

یہ مشترکہ خاندان بارش پر منحصر کھیتی کرتا ہے، لیکن اس سے چاروں کنبوں کا پیٹ نہیں بھرتا۔ مرد مزدوری کرتے ہیں، جب کہ عورتیں ایندھن کی لکڑی، مہوا، آنولہ جیسے پھل اکٹھا کرتی ہیں۔ رمیش چند نے پاری کو بتایا، ’’یہ ہماری سال بھر کی آمدنی ہے۔‘‘

رمیش چند (۵۵) بتاتے ہیں، ’’میں نے دلال کو جو زمین ’بیچی‘ وہ تو میرے والد کو ۵۰ سال پہلے دی گئی تھی۔‘‘ راجستھان اِمپوزیشن آف سیلنگ آن ایگریکلچرل ہولڈنگ ایکٹ، ۱۹۷۳ کے تحت یہ زمین درج فہرست ذات اور قبائل کے بے زمین خاندانوں کو تقسیم کی گئی تھی۔

لیکن راجستھان کاشتکاری قانون، ۱۹۵۵ کے تحت وہ اپنی زمین برادری کے باہر کے کسی آدمی کو فروخت نہیں کر سکتے۔

جب پاری نے باراں کے ضلع کلکٹر روہتاشرو سنگھ تومر سے اس کے بارے میں پوچھا تو انہوں نے کہا، ’’ایسا ہو ہی نہیں سکتا۔ میں اس کی جانچ کرواؤں گا۔ درج فہرست ذات یا قبائل کی کوئی زمین سرکاری طور پر بیچی گئی ہو، یہ ممکن نہیں ہے۔ ڈسٹرکٹ کلکٹر کے آفس میں ایسی فروخت کا رجسٹریشن ہوتا ہے، اور میرے پاس ایسی کوئی جانکاری نہیں ہے۔‘‘ چالیس سالہ اس افسر نے زور دے کر کہا، ’’میں اسے ردّ کرواؤں گا۔ یہ قانون کے خلاف ہے۔‘‘

جن کے پاس زمین ہے، یہ ان کے لیے خوش خبری ہے۔

حالانکہ، اس پروجیکٹ سے جنگلی علاقے میں بھی کمی آئے گی۔ جب کہ یہ جنگلی علاقہ بے زمین گاؤں والوں، خاص کر عورتوں کی زندگی کا سہارا ہے۔ شبو بائی (۵۰) اور رانی شری (۴۲) سہریا آدیواسی ہیں، اور دونوں نے اپنے شوہروں کو بیماری کے سبب کھو دیا ہے۔ وہ فکرمندی کے لہجہ میں کہتی ہیں، ’’ہمارے پاس نہ زمین ہے، نہ جانور۔ اگر جنگل چلا گیا تو ہمیں نقل مکانی کرنی پڑے گی۔‘‘

صبح کے ساڑھے سات بجے ہیں۔ نیمی چند اپنی پانچ گایوں کے ساتھ کلونی گاؤں سے دور جانے والی کچی سڑک پر آہستہ آہستہ چل رہے ہیں۔ وہ اپنی گایوں کو چرانے کے لیے بفر ژون کی طرف بڑھ رہے ہیں۔

جن خاندانوں کے پاس مویشی ہیں وہ جنگل کو نقصان پہنچانے والے اس پروجیکٹ سے سب سے زیادہ فکرمند ہیں۔ نیمی چند کہتے ہیں، ’’ہمارے جانوروں کی چراگاہ کی زمین چلی جائے گی۔ اگر یہ جنگل گیا، تو ہمارے جانور مر جائیں گے۔ ان کے چرنے کے لیے کہیں جگہ ہی نہیں بچے گی۔‘‘

نیمی چند (۶۰) دلت ہیں، اور ان کے پاس ۷ بیگھہ (تقریباً ۳ ایکڑ زمین) ہے، جس پر وہ مکئی، سویابین اور چارے کی کھیتی کرتے ہیں۔ فصل کا تھوڑا حصہ بیچ کر نیمی چند کو سال میں تقریباً ۱۵ ہزار روپے کی آمدنی ہو جاتی ہے، لیکن جانوروں کی دواؤں اور دوسرے خرچوں میں سارا پیسہ خرچ ہو جاتا ہے۔ ان کے چاروں بیٹے دہاڑی مزدور ہیں، اور نیمی چند خود بھی کبھی کبھی پاس کے پتھر توڑنے والے کارخانہ میں ۳۰۰ روپے کی دہاڑی پر کام کرتے ہیں۔

وہ کہتے ہیں کہ انہوں نے اپنی زمین بیچنے کے بارے میں ابھی تک سنجیدگی سے نہیں سوچا ہے، لیکن ان کے پاس زیادہ متبادل بھی نہیں ہے۔ نیمی چند کہتے ہیں، ’’جب درخت کٹ جائیں گے اور زمین چلی جائے گی، تو ہمارے پاس کچھ نہیں بچے گا۔ ہمیں گاؤں چھوڑ کر باہر جانا پڑے گا۔ آنے والی نسلوں کے پاس کوئی سہارا نہیں رہے گا – نہ دودھ، نہ گوبر، نہ کھاد…سب ختم ہو جائے گا۔‘‘

یہ جنگل کا دوسرا حصہ ہے، جہاں لالا رام جاٹو اور ان کی بیوی ریکھا جاٹو چھاتا اور پانی لے کر آئے ہیں، کیوں کہ انہیں یہاں دن بھر گزارنا ہے۔ ریکھا کہتی ہیں، ’’اگر ہمارا جنگل کٹ گیا تو بہت کچھ چلا جائے گا… پھل پھول سب ختم ہو جائیں گے۔ ہماری روزمرہ کی کمائی [غیر لکڑی پر مبنی جنگلی پیداوار اور جلاون سے] بھی چلی جائے گی۔ ہمارے گاؤں میں کام کہاں ملتا ہے؟‘‘ ریکھا ایک آنگن واڑی کارکن ہیں۔

یہ دلت جوڑی ۱۵ بیگھہ (تقریباً ۶-۷ ایکڑ) زمین کی مالک ہے، جس پر وہ سویابین، مکئی اور سرسوں کی کھیتی کرتی ہے۔ اس سے انہیں سالانہ تقریباً ۴-۵ لاکھ روپے کی آمدنی ہوتی ہے۔ لیکن دو بچے کالج میں پڑھ رہے ہیں، اس لیے یہ کمائی بھی کافی نہیں ہے۔ اسی وجہ سے وہ آج جنگل میں آئے ہیں۔

پاری کی جس سے بھی ملاقات ہوئی ان میں سے کسی نے یہ نہیں کہا کہ ان سے اس پروجیکٹ کو لے کر کوئی صلاح مشورہ کیا گیا ہے، جو جنگل پر منحصر ان کے معاش کو پوری طرح ختم کر دے گا۔ اس کا مطلب ہے کہ اس مسئلہ کو لے کر کم از کم دو مرکزی قوانین کی کھلے عام خلاف ورزی کی گئی ہے، جو اس بات کو یقینی بنانے کے لیے بنائے گئے تھے کہ جنگلات کی حفاظت سے متعلق کسی بھی منصوبہ کو نافذ کرنے سے پہلے جنگلات کے آس پاس رہنے والے لوگوں سے ضرور صلاح مشورہ کیا جائے گا اور بغیر ان کی رضامندی کے کوئی فیصلہ نہیں لیا جائے گا۔

حق جنگلات قانون، ۲۰۰۶ کے تحت کسی بھی پروجیکٹ کو تبھی منظوری مل سکتی ہے، جب گرام سبھا اس کی تحریری شکل میں ’’سفارش‘‘ کرے۔ لیکن مقامی لوگوں کا کہنا ہے کہ ان سے دھوکہ سے خالی کاغذ پر دستخط کروا لیے گئے۔

تحویل اراضی، نقل مکانی اور باز آبادکاری قانون، ۲۰۱۳ (ایل اے آر آر اے) کے تحت انہیں مناسب معاوضہ اور شفافیت کا حق حاصل ہے، جہاں کسی پروجیکٹ کے لیے ان کی پیشگی منظوری لازمی ہے۔ لیکن اس قانون کو بھی نظر انداز کر دیا گیا۔ (جنگلاتی زمین میں ہوئے نقصان کی ’’تلافی‘‘ اب تک صرف محکمہ جنگلات کو گئی ہے، جہاں انہیں جیسلمیر میں ۴۰۸ ہیکٹیئر زمین مختص کی گئی ہے۔)

حالانکہ، ۲۰۲۲ میں دوپہر کے کھانے سے جڑا قصہ سب کو یاد ہے، جہاں ’’کمپنی‘‘ (گرینکو) کے لوگ کلونی گاؤں آئے تھے اور انہوں نے گاؤں والوں کو دوپہر میں پوڑی سبزی کی دعوت کے لیے مدعو کیا تھا۔ اُس دوران باتوں باتوں میں گاؤں والوں سے کہا گیا کہ وہ آئندہ کے پروجیکٹ کے لیے اپنی زمین کمپنی کو فروخت کر دیں۔ جیتو پنڈت بتاتے ہیں کہ انہوں نے اس کے بدلے میں زمین بیچنے والے ہر آدمی کو نوکری دینے کا وعدہ کیا تھا۔

یہ سب تب ہوا تھا، جب شاہ آباد کے جنگل کی زمین کو غیر جنگلاتی استعمال کے لیے مرکزی حکومت کی منظوری نہیں ملی تھی۔ وہ منظوری اس واقعہ کے دو سال بعد ملی۔ ماحولیاتی منظوری (ای آئی سی) بھی اگست ۲۰۲۴ میں ملی تھی۔ حالانکہ، بعد میں اسے ملتوی کر دیا گیا، اور اب (ستمبر ۲۰۲۵ تک) یہ معاملہ جودھپور کے راجستھان ہائی کورٹ میں زیر التوا ہے جسے وہاں چنوتی دی گئی ہے۔

حالانکہ، جنگل میں گڑھے کھودنے اور نشان لگانے کا کام شروع ہو چکا ہے۔ جیتو پنڈت کہتے ہیں، ’’اُس دن دوپہر کی دعوت میں کمپنی نے جو وعدے کیے تھے ان میں سے کوئی وعدہ پورا نہیں ہوا ہے۔ گاؤں کے کسی آدمی کو کام نہیں ملا۔ وہ باہر سے مزدور لا رہے ہیں۔‘‘

جودھپور کے راجستھان ہائی کورٹ نے اس معاملے میں خود سے نوٹس لیتے ہوئے سماعت شروع کی، جس میں کارکنوں کے ایک گروپ نے ایک عبوری اپیل دائر کی ہے۔ اس میں انہوں نے ’’باراں ضلع کے شاہ آباد بلاک میں مجوزہ پمپ اسٹوریج پروجیکٹ کے لیے کاٹے جانے والے ۱۹ء۱ لاکھ درختوں کی حفاظت‘‘ کا مطالبہ کیا ہے۔

جتیندر شرما ان لوگوں میں سے ہیں جنہوں نے یہ عرضی دائر کی ہے۔ وہ سوال کرتے ہیں، ’’جنگلی حیات کے تحفظ کا قانون، ۱۹۷۲ کے تحت محفوظ کردہ علاقہ میں بغیر منظوری کے کسی پروجیکٹ کو کیسے منظوری دی جا سکتی ہے؟‘‘ جتیندر شرما، جو صاف طور پر پریشان دکھائی دیتے ہیں، وہ بتاتے ہیں، ’’پھر بھی پیڑ کاٹنے کا کام پہلے ہی شروع ہو گیا ہے۔‘‘ ان کا اندازہ ہے کہ پروجیکٹ کے تحت ۱۹ء۱ لاکھ نہیں، بلکہ تقریباً ۲۵ لاکھ درخت کاٹے جائیں گے۔ (خود محکمہ جنگلات کے اہلکار بھی مانتے ہیں کہ سرکاری تعداد بہت کم بتائی جا رہی ہے۔) جتیندر شرما پیشہ سے ٹیچر ہیں اور اِنٹیک کی باراں شاخ کے کنوینر ہیں۔

وہ سوال کرتے ہیں، ’’ریاستی حکومت شاہ آباد کے اتنے بڑے جنگل کو ایک پروائیویٹ بجلی پروجیکٹ کے لیے کیسے کٹنے دے سکتی ہے؟‘‘ جتیندر شرما ’شاہ آباد سنرکشن سنگھرش سمیتی‘ کے ایک اہم رکن ہیں۔ وہ کہتے ہیں، ’’یہ تو تغلقی فرمان ہے۔‘‘

پچھلے مہینے (۱۰ ستمبر ۲۰۲۵) راجستھان کے محکمہ جنگلات نے باراں سب ڈویژن کے ڈسٹرکٹ فاریسٹ آفیسر انل یادو کو غیر قانونی قبضہ اور درختوں کی کٹائی کی منظوری دینے کے الزام میں برخاست کر دیا۔ برخاستگی سے پہلے پاری سے بات چیت میں انہوں نے مانا تھا کہ ’’پیڑ لگانا کبھی بھی جنگل کا متبادل نہیں ہو سکتا۔‘‘

اس بات کو لے کر شاید ہی کوئی شک باقی ہے کہ اس پروجیکٹ کو آخری منظوری مل ہی جائے گی۔ آخر پورے ملک میں بڑے بڑے ’ترقیاتی‘ پروجیکٹوں کو لگاتار ہری جھنڈی مل رہی ہے۔ کل ۴۱۱ بڑے باندھ بنائے جانے ہیں اور یہ سبھی اربوں کے سودے ہیں۔ ذرا تعداد دیکھئے: اروناچل میں سیانگ پروجیکٹ پر ایک لاکھ ۵۰ ہزار کروڑ روپے، اور گریٹ نکوبار پروجیکٹ پر ۷۲ ہزار کروڑ روپے خرچ کیے جائیں گے۔

بجلی کے شعبہ کی بڑی کمپنی، اڈانی، راجستھان اور مدھیہ پردیش میں گرینکو کے ساتھ مل کر کئی پروجیکٹوں پر کام کر رہی ہے۔ اڈانی گروپ کی ویب سائٹ پر ۱۴ مارچ ۲۰۲۲ کو جاری ایک پریس ریلیز میں کہا گیا: ’’گرینکو، اڈانی گروپ کے مجوزہ صنعتی کیمپس کے لیے ۶ گیگا واٹ گھنٹہ بجلی دستیاب کرائے گا۔ اس کی سپلائی گرینکو کی ’پمپ ہائڈرو اسٹوریج‘ صلاحیت سے کی جائے گی، جسے مدھیہ پردیش اور راجستھان میں بنائے جانے کا منصوبہ ہے۔‘‘ دلچسپ بات یہ ہے کہ ۲۰۳۵ تک مجوزہ سبھی پمپ اسٹوریج پروجیکٹوں میں دونوں کمپنیوں کی ۲۰ فیصد سے زیادہ کی حصہ دار ہیں۔‘‘

حالانکہ، پمپ اسٹوریج تکنیک اور اس کی افادیت کے بارے میں اب سنگین سوال اٹھنے لگے ہیں۔ اس تکنیک کا مقصد ہوتا ہے، اضافی بجلی کو محفوظ کرنا اور ضرورت پڑنے پر اس کی پیداوار کرنا۔ یعنی جب مانگ کم ہو، تب بجلی کو ’’جمع کرنا‘‘، اور جب مانگ بڑھے تب اسے ’’پیدا‘‘ کرنا۔

سائنس داں ہمانشو ٹھکر کہتے ہیں، ’’لیکن موجودہ ہائڈرو پاور پروجیکٹ کو بھی پیک آوَرز میں [جب بجلی کی مانگ سب سے زیادہ ہوتی ہے] نہ تو پوری طرح استعمال کیا جا رہا ہے، نہ ہی ان کی نگرانی کی جا رہی ہے۔‘‘ ہمانشو ساؤتھ ایشیا نیٹ ورک آن ڈیمز، ریورز اینڈ پیپل (ایس اے این ڈی آر پی) کے کوآرڈینیٹر ہیں۔

ان کا کہنا ہے کہ پمپ اسٹوریج پروجیکٹوں کو ’ماحولیات کے موافق‘ بتانے کی کوئی سائنسی بنیاد نہیں ہے۔ اس کے برعکس، اس قسم کے بڑے ڈھانچہ جاتی پروجیکٹوں کے سنگین سماجی اور ماحولیاتی نتائج ہوں گے۔

ایسے کم از کم ۶۲ پمپ اسٹوریج پروجیکٹ مجوزہ ہیں، جنہیں سال ۲۰۳۵-۳۶ تک تیار کیا جانا ہے۔ دہلی اور حیدرآباد میں گرینکو کے دفاتر میں کیے گئے فون کالز کا جواب نہیں ملا۔ ایک نمبر تو وائس میل باکس میں چلا گیا جو پہلے ہی میسجز سے بھرا ہوا تھا، اور بھیجے گئے ای میلز کا بھی اب تک کوئی جواب نہیں آیا۔

لیکن اس کہانی کا ایک اور پہلو ہے، اور شاید وہی شاہ آباد کو بچا سکتا ہے۔

کونو نیشنل پارک، جو افریقہ سے لائے گئے چیتوں (ایسینونکس جوبیٹس) کا گھر ہے، یہاں یہ صرف ۴۰ کلومیٹر دور ہے۔ پچھلے ایک سال میں کئی چیتے شکار کی تلاش میں کونو سے باہر نکل چکے ہیں، اس لیے نیشنل ٹائیگر کنزرویشن اتھارٹی (این ٹی سی اے) نے ایک بین ریاستی چیتا کنزرویشن کمپلیکس کی تعمیر کا منصوبہ بنایا ہے، جو تقریباً ۱۷ ہزار مربع کلومیٹر کے رقبہ میں پھیلا ہوگا، جسے کونو-گاندھی ساگر (کے جی ایس) لینڈ اسکیپ کہا جا رہا ہے۔

اس راستے سے جاتے ہوئے چیتے، کونو سے نکل کر کچھ ہی گھنٹوں میں شاہ آباد پہنچ سکتے ہیں – اور انہیں یہاں پہلے دیکھا بھی گیا ہے۔ چیتے کونو ندی کو تیر کر بھی پار کر سکتے ہیں، جس سے وہ اور بھی جلدی پہنچ سکتے ہیں!

اس پمپ اسٹوریج پروجیکٹ نے اس فاریسٹ کوریڈور کے ۴۰۸ ایکڑ حصے کو ہڑپ لیا ہے، جسے اب چیتوں کی ضروریات کے سامنے تولا جائے گا، جس پروجیکٹ کا افتتاح خود وزیر اعظم نے ستمبر ۲۰۲۲ میں کیا تھا۔

محافظین کے لیے یہ خیال خوش کن ہو سکتا ہے کہ شاید چیتے ہی شاہ آباد کو بچا لیں۔

حالانکہ، پہلے چیتوں کو خود کو بچانا ہوگا۔

اس رپورٹ کو تیار کرنے میں مدد کے لیے کوٹہ کے سینئر صحافی برجیش وجے ورگی، ایشا شاہ اور سورج پرتاپ شرما کا شکریہ۔

ترجمہ نگار: قمر صدیقی