बांध मं बूड़त शाहबाद जंगल

गजानंद सहरिया को पहली पईंत पता चलिस के वो ह जमींदार आय, जब कुछु लोगन मन ओकर कच्चा घर (माटी के घर) मं आइन अऊ वोला जमीन बेचे ला कहे लगिन. कलौनी गाँव के एक ठन आदिवासी बस्ती,मुंडेयार के ये बासिंदा कहिथे, “वो मन मोला बताइन के 10 बीघा [करीबन छै एकड़] जमीन मोर नांव मं हवय. मंय जमीन ला देखे गेंय (डेढ़ कोस ले जियादा). खेत मं बन-कचरा जामे रहिस. उहाँ न तो हमन अऊ न कोनो कभू खेती करे रहिस.”

35 बछर के ये सियान सहरिया आदिवासी अपन नवा पहिचान उपर भरोसा नइ करत रहिस अऊ वो ह मिलेइय्या पइसा ले खुस रहिस. वो ह महीना मं मुस्किल ले चार-पांच दिनेच करीबन 200 रूपिया रोजी के मजूरी कर पाथे; वो ह बूता काम बर बहिर घलो जाथे. गजानंद के 15 परानी के सामिलात परिवार अधिकतर शाहबाद के जंगल ले गैर-लकरी वन उपज (एनटीएफपी) के भरोसे हवय.वो ह बताथे, “हमन मऊहा, केंदू, जलावन लकरी, अचार, आंवला, लाथन. येकरेच ले हमर गुजारा होथे.” येकर ले महीना मं वोला कुछेक हजार रूपिया मिल जाथे.

वो मन उत्ती राजस्थान मं शाहबाद-तलेटी के जंगल के भरोसे हवंय, जेन ह 179 वर्ग किलोमीटर के दयारा मं बगरे हवय. ये ह घना जंगल दुब्भर रुख-रई अऊ जंगली जीव-जन्तु ले भरे हवय. हालेच मं 2022 मं, वन विभाग ह येकर इकोलाजिकल महत्ता डहर आरो करिस अऊ येला संरक्षण रिजर्व के नांव दीस. कराया [स्टर्कुलिया यूरेन्स] शाहबाद जइसने कुछेक जंगल मं मिलथे, अऊ इहाँ सैकड़ों किसिम के जड़ी-बूटी घलो हवय.

ये जंगल अनुसूची 1के जीव-जन्तु अऊ चिरई-चिरगुन के ठीहा आय – ये मन वन्यजीव संरक्षण अधिनियम 1972 के तहत शिकार ले संरक्षित हवंय. येकर सूची मं सामिल हवंय : बंगाल अऊ सुनहरी खखरा,भारतीय हुंर्रा/ हुड़रा,चितरी बघवा (पेंथेरा पार्डस), भारतीय ग्रे नेवला,धारीदार रेडवा धन गहब (हाइना हाइना), कबर बिज्जू , कोलिहा, भलवा, लाल मुड़ी वाले गिधवा, भारतीय मयूर अऊ घलो कतको.

ये ह कुनो नेशनल पार्क ले घंटा भर ले कम दूरिहा के रद्दा मं हवय अऊ कुनो गांधी सागर मध्यप्रदेश मं चितवा /बूंदी बघवा के दूसर ठीहा ले जोड़ेइय्या प्रस्तावित कारीडोर मं आथे. तेजी ले चितवा मन के मरे ला देखत, अफसर मन ला आस हवय के येकर ले मदद मिलही.

जून के सातों दिन बरसा वाले रहिस. जंगल ह छोटे छोटे नदिया नरुआ ले भरे हवय जेन ह बड़े नदिया मं जाके मिलथे. इहाँ के सब्बो पानी कुंदा खो झरना डहर बोहावत हवय, जेन ह मताय पानी के एक ठन धार 100 फीट तरी घाटी मं गिरथे. तरी मं कउनो नदिया सांप जइसने बोहाथे. बरसा के बाद घलो, इहाँ के गाँव के लोगन मन जलावन लकरी (एनटीएफपी) संकेलत देखे जा सकथें.

सहरिया आदिवासी मन ला विशेष रूप ले असुरच्छित जनजातीय समूह (पीवीटीजी) मं बांटे गे हवय -राजस्थान मं अइसने एकेच समूह. गजानंद जइसने, वो मन राल, जलावन लकरी, फर, कंद-मूल अऊ जड़ी-बूटी ले होवेइय्या आमदनी बर जंगल उपर सबले जियादा आसरित हवंय. कलौनी गाँव मं करीबन बरोबर बरोबर आदिवासी अऊ दलित रहिथें (जनगणना 2011).

फेर हजारों लोगन के काम आवत ये जुन्ना जंगल ला ग्रीनको ग्रुप ला 1,800 मेगावाट के एक ठन पंप स्टोरेज हाइड्रो परियोजना (पीएसपी) सेती चिन्हित करेगे हवय. येकर ले शाहबाद के जंगल के 408 हेक्टेयर जमीन डूबान मं आ जाही, अऊ जंगल के बहिर 216 हेक्टेयर जमीन रोड,घर, ट्रांसमिशन अऊ कतको आफिस बनाय बर जरूरी हवय. कतको वन्यजीव जन्तु मन के ठीहा बरबाद हो जाही, अऊ प्रस्तावित चितवा कॉरिडोर – जेन ह कुनो नेशनल पार्क ला गांधी सागर अभयारण्य ले जोड़थे - अपन सुरु के जगा के तिरेच मं खतम हो जाही.

देस (भारत) के जंगल अऊ ओकर तीर ताखर के गाँव,’विकास’ परियोजना मन के चपेट मं हवंय, जेन ह जंगल-आसरित जीविका ला सब्बो दिन बर खतम करत हवय. देस के गाँव-देहात मं सीमांत अऊ भूमिहीन लोगन मन बर जिनगी बने – अन्ताजन 40 करोड़ लोगन मन अपन छिटपुट रोज के खरचा बर गैर-लकरी वन उपज (एनटीएफपी) के भरोसे हवंय.

अब वो मन ला वो मनके जमीन ले घलो बेदखल करे जावत हे. दूरिहा शाहबाद शहर अऊ बारां ले दलाल मन, तीन ठन गाँव- कलौनी,बैंत अऊ मुंगावली- मं आदिवासी जमीन मालिक मन ला ‘खोजत’ हवंय, जेन मन ले वो मन सस्ता मं जमीन बिसोय ला चाहत हवंय अऊ परियोजना पूरा होय के बाद वोला महंगा दाम मं बेचे ला चाहत हवंय.

शाहबाद कस्बा के दलाल मन के सरलग पाछू परे रहे के बाद, आदिवासी गजानंद अऊ ओकर भाई मन अपन जमीन बेंचे के फइसला करिन. बीघा पाछू 4 लाख रूपिया के भाव ले, कुल 40 लाख रूपिया के दाम, जमीन ला छोड़े मुस्किल रहिस. वो मन आखिरी लेवाल ले कभू नइ मिलय, बस कुछु कागजात मं दसखत करिन जेन ला वो मन पढ़े नइ सकिन, अऊ वो मन ला पूरा भरोसा नइ ये के वो मन ला जम्मो रकम मिलही धन नइ. सहरिया साक्षरता दर करीबन 23 फीसदी हवय, जेन ह राज के सब्बो आदिवासी मन के 38 फीसदी औसत ले घलो कम हवय.

गाँव के 29 बछर के ऊंच जात के किसान जीतू पंडित कहिथे, “दलाल अऊ कंपनी के लोगन मन आदिवासी अऊ दलित मन के उपर नजर राखे हवंय काबर के वो मन ला आसानी ले धोखा देय जा सकथे अऊ ओंकर मन बर पइसा के भाव टोरे मुस्किल होथे.” वो ह कहिथे, “मोर अन्ताज के मुताबिक, 2,000 बीघा जमीन पहिलीच ले बिसो ले गेय हवय. कोनो घलो दलाल, धन दलाली करेइय्या कोनो घलो मइनखे, पारी ले सीधा धन बिन रिकार्ड के बात करे बर तियार नइ रहिस.

कलौनी के दलित किसान रमेश चंद जाटव अऊ ओंकर दूनों भाई करा 17 बीघा जमीन (करीब 10 एकड़) हवय. वो मन घलो 4 लाख रूपिया बीघा के भाव ले जमीन बेचे रहिन. पारी ला अपन पासबुक दिखावत, वो ह 7 मई, 2024 के जमा रकम 12 लाख रूपिया डहर दिखाथे, जेन ला वो ह अपन हिस्सा बताथे. गजानंद जइसने, वो मन ला घलो नइ पता के वो मन जमीन कोन ला बेचिन, वो मन करा कोनो कागजात नइ ये. “मोर ले सिरिफ दसखत करवाय गे रहिस.”

सामिलात परिवार बरसा के भरोसे खेती करत रहिस, फेर ये ह चार झिन के पेट भरे बर भरपूर नइ रहिस. मरद लोगन मन मजूरी करथें, अऊ घर के माईलोगन मन जलावन लकरी, मऊहा अऊ आंवला जइसने जंगली फर संकेलथे. रमेश चंद पारी ला बताथे, “बछर भर के आमदनी इहीच ले होथे.”

55 बछर के सियान रमेश चंद कहिथे के जेन जमीन ला वो मन एक झिन दलाल ला “बेचे” रहिन, वो ह “ मोर ददा ला 50 बछर पहिली देय गे रहिस.” राजस्थान कृषि जोत सीमा अधिनियम, 1973 के तहत भूमिहीन अनुसूचित जाति (एससी) अऊ अनुसूचित जनजाति (एसटी) परिवार मन ला जमीन बांटे गे रहिस.

फेर राजस्थान काश्तकारी अधिनियम,1955 मुताबिक वो मन ला अपन जात-समाज के बहिर बेचे नइ सकेंय.

“अइसने होय नइ सकय. मंय येकर जाँच करवाहूँ,” बारां के जिला कलेक्टर रोहिताश्व सिंह तोमर ह पारी के सवाल के जुवाब देवत कहिथे. 40 बछर के ये सरकारी अफसर ह जोर लगाके कहिथे, “अइसने होय नइ सकय के अनुसूचित जाति धन जनजाति के जमीन के बिक्री सरकारी रूप मं करेगे होय. येकर पंजीयन कलेक्टर आफिस के जरिये होय ला चाही, अऊ मोर करा अब तक ले कोनो मामला आय नइ ये. मंय येला रद्द करवाहूँ. ये ह कानून के खिलाफ आय.”

ये वो लोगन मन बर बढ़िया खबर हवय जेकर मन करा जमीन हवय.

फेर ये परियोजना ले जंगल के आकार घलो कम हो जाही, जेन ह येकर उपर आसरित कतको गाँव के कतको भूमिहीन, खासकरके माइलोगन बर भारी महत्तम हवय. 50 बछर के सियान शबू बाई अऊ 42 बछर के रानीश्री, सहरिया आदिवासी आंय, ओंकर घरवाला मन बीमारी ले मर गीन. वो मन दुख जतावत कहिथें, “हमर करा न जमीन हवय अऊ न गाय-गरुआ. गर जंगल नंदागे,त हमन ला इहाँ ले आने जगा जाय ला परही.”

बिहनिया के साढ़े सात बजत हवय, अऊ नेमी चंद पांच ठन गाय ला धरके कलौनी ले निकरेय्या रद्दा मं किंजरत हवय. गरुआ मन बफर जोन मं चरे बर जावत हवंय.

गाय-गरुआ पोसेइय्या सब्बो परिवार ये बात ले खासकरके चिंता मं परे हवंय के पंप स्टोरेज परियोजन सेती जंगल मं कब्जा हो जाही. नेमी चंद कहिथे, “ हमर मवेसी मन के चरी-चरागान जावत हवय. गर ये जंगल चले गे, त मवेसी मन मर जाहीं. वो मन के चरे के कोनो जगा नइ बांचही.”

60 बछर के ये दलित सियान करा सात बीघा (करीबन तीन एकड़) खेत हवय जेन मं वो ह जोंधरा, सोयाबीन अऊ चारा कमाथे. फसल के एक हिस्सा बेंचके वो ह सालाना करीबन 15,000 रूपिया कमा लेथे, फेर अपन मवेसी मन बर दवई-पानी अऊ दीगर खरचा सेती ओकर करा फूटी कौड़ी नइ बांचय. ओकर चारों बेटा मजूरी करथें, अऊ नेमी चंद घलो, जेन ह कभू-कभार तीर के एक ठन क्रेसर फेक्टरी मं 300 रूपिया रोजी मं बूता करथे.

वइसे वो ह अपन जमीन बेचे जे बारे मं गहिर ले सोचे नइ ये, फेर ओकर कहना आय के ओकर करा उपाय बनेच कम हवय. “एक पईंत रूख मन कटा गे अऊ (खेती) जमीन चले गे, त हमर तीर चरी-चारागान नइ बांचही, कुछु घलो नइ. हमन ला बहिर जाय ला परही, गाँव छोड़े ला परही. नवा पीढ़ी करा कोनो सहारा नइ रहि जाही. न गोरस, न गोबर, न खातू... सब्बो नंदा जाही,” वो ह बतावत जाथे.

जंगल के एक ठन दूसर हिस्सा मं, लाला राम जाटव अऊ ओकर सुवारी रेखा जाटव छाता अऊ पानी धरके दिन भर बर बहिर घूमे निकरे हवंय. आँगनवाड़ी कार्यकर्ता रेखा सवाल करत कहिथे, “गर हमर जंगल कट गे, त हमन ला भारी नुकसान होही... फर-फूल नंदा जाहीं. हमर रोज के कमई [वनोपज अऊ जलावन लकरी] खतम हो जाही. हमर गाँव मं तुमन ला काय [ नऊकरी] मिलही?”

ये दलित जोड़ा करा 15 बीघा (करीबन 6-7 एकड़) जमीन हवय जेन मं वो मन सोयाबीन, जोंधरा अऊ सरसों कमाथें अऊ बछर भर मं 4-5 लाख रूपिया कमा लेथें. फेर दू झिन लइका के कालेज मं पढ़े सेती, ये ह नइ पूरय, ते पायके वो मन इहाँ जंगल मं हवंय.

पारी ले मिले कोनो घलो मइनखे ये नइ कहिस के ओकर ले अवेइय्या परियोजना सेती ओकर मन ले गोठ-बात धन सलाह लेय गे रहिस जेकर ले वो मन के जंगल उपर आसरा खतम हो जाही. येकर मतलब आय कम से कम दू ठन केन्द्रीय कानून ला टोरे गीस – जेन ह ये तय करे बर बनाय गे रहिस के हमर जंगल के तीर-तखार के बासिंदा मन ला वन भूमि के कोनो घलो बदलाव मं वाजिब हक मिलय.

वन अधिकार अधिनियम, 2006 के तहत, कोनो घलो परियोजना तभेच सुरु हो सकथे जब गाँव के ग्राम सभा लिखित रूप मं येकर “सिफारिस ” करय. इहाँ के लोगन मन के कहना आय के वो मन ला धोखा देके एक ठन सादा कागज मं दसखत करवाय गीस.

भूमि अधिग्रहण,पुनर्वासन अऊ पुनर्व्यवस्थापन मं वाजिब मुआवज़ा अऊ पारदर्शिता के अधिकार अधिनियम, 2013 (एलएआरआरए/लारा) के तहत घलो वो मन के पूर्व सहमति जरूरी आय. ये ला घलो नजरंदाज करे गीस. (जैसलमेर मं 408 हेक्टेयर वाले ये जंगल के नुकसान सेती अब तक ले सिरिफ वन विभाग ला ‘मुआवजा’ देय गे हवय.)

फेर साल 2022 मं कलौनी गाँव मं “कंपनी” के लोगन मन के मंझनिया खवाय ह सुरता हवय- ग्रीनको के बात करत. पूरी अऊ साग ह बात ला थोकन गुरतुर बना देय रहिस – बासिंदा मन ला अवेइय्या परियोजना ला देख के अपन जमीन कंपनी ला बेचे बर कहे गे रहिस. जीतू पंडित बताथें के बदला मं, हरेक बेचेइय्या ला परियोजना मं नऊकरी देय के वादा करे गे रहिस.

ये साफ-साफ केंद्र सरकार डहर ले शाहबाद जंगल के जमीन ला गैर-जंगल के काम मं लाय बर देय के ‘मंजूरी’ देय के पहिली के बात आय. ये ह दू बछर बाद होइस. अगस्त 2024 मं पर्यावरणीय मंज़ूरी (ईआईसी) घलो दे देय गीस. तब ले येला रोक देय गे हे अऊ ये बखत (सितंबर 2025 तक) जोधपुर, राजस्थान के हाई कोर्ट मं येला चुनोती दे जावत हे.

वइसे, जंगल मं खंचवा बनाय अऊ चिन्हा पारे के काम सुरु होगे हवय.जीतू पंडित कहिथें के “कंपनी के खवाय बखत के वादा” के बाद घलो, गाँव के एको झिन ला काम नइ मिले हवय. वो मन पारी ला बताइन, वो मन बहिर ले मजूर लावत हवंय.”

कार्यकर्ता मन के एक ठन मंडली ह जोधपुर के राजस्थान हाई कोर्ट मं विचाराधीन स्वतः संज्ञान याचिका मं एक ठन अंतरिम आवेदन दायर करे हवंय, जेन मं “बारां जिला के शाहबाद ब्लॉक मं पंप स्टोरेज परियोजना सेती कटेइय्या प्रस्तावित 1.19 लाख रूख मन के सुरच्छा”के मांग करे गे हवय .

जितेंद्र शर्मा घलो ये याचिका दायर करेइय्या मन ले एक आंय. वो ह पूछथें के वन्यजीव (संरक्षण) अधिनियम,1972 के तहत संरक्षित इलाका मं बगेर मंजूरी के कोनो परियोजना ला कइसने इजाजत देय जा सकथे. हलाकान शर्मा कहिथें, “ओकर बाद घलो रूख मन के कटई सुरु हो चुके हवय.” ओंकर अन्ताज हवय के सरकार ला बताय गे 1.19 लाख रुख के जगा 25 लाख रुख काटे जाहीं. (जंगल के अफसर मन घलो मानथें के सरकार के आंकड़ा बनेच कम हवय.) शर्मा टीचर अऊ इंटैक बारां चैप्टर के संयोजक आंय.

वो ह सवाल करथें, “राज सरकार शाहबाद मं अतक बड़े निजी बिजली प्रोजेक्ट बर अतक जंगल ला कइसने काटे के इजाजत दे सकथे?” शर्मा शाहबाद संरक्षण संघर्ष समिति के एक केंद्रीय नेता आंय. “ ये ह पूरा एक ठन तुगलकी फरमान आय.”

बीते महीना (10 सितंबर, 2025) राजस्थान वन विभाग ह बारां संभाग के जिला वन अधिकारी अनिल यादव ला अवैध कब्जा अऊ रुख मन ला काटे के इजाजत देय के आरोप मं निलंबित कर देय रहिस. निलंबन ले पहिली पारी ले गोठ-बात करत वो ह मानिस के “वृक्षारोपण कभू घलो जंगल के जगा नइ ले सकय.”

ये मं कोनो संदेहां नइ ये के, ये परियोजना ला आखिरी मंजूरी मिल जाही. आखिर, देस भर मं बड़े-बड़े ‘विकास” परियोजना मन ला मंजूरी मिलत हवय. कुल मिलाके, 411 बड़े बांध बनाय जवेइय्या हे अऊ ये सब्बो बड़े परियोजना मन आंय. आंकड़ा मन के उपर नजर मारे जाए : अरुणाचल मं सियांग नदी मं 1,50,000 करोड़ रूपिया ले लेके ग्रेट निकोबार परियोजना बर 72,000 करोड़ रूपिया तक.

राजस्थान अऊ मध्य प्रदेश मं, बड़े बिजली कंपनी, अडानी,ग्रीनको के संग कतको परियोजना मन मं हिस्सेदारी हवय. ओकर वेबसाइट मं 14 मार्च, 2022 मं जारी एक ठन प्रेस विज्ञप्ति मं कहे गे हवय: “ग्रीनको,अडानी समूह के प्रस्तावित औद्योगिक परिसर ला 6 गीगावाट घंटा बिजली दिही. ये बिजली ग्रीनको के ‘पंप्ड हाइड्रो स्टोरेज’ ले आही, जेन ह मध्य प्रदेश अऊ राजस्थान मं बनत हवय.” संजोग ले, ये भागीदारी मं 2035 तक ले प्रस्तावित पंप स्टोरेज परियोजना मन के 20 फीसदी ले जियादा हिस्सा सामिल हवय.

वइसे, पंप स्टोरेज के तकनीक अऊ असर के कड़ा आलोचना होइस. येकर मंसूबा उपराहा बिजली ला भंडारन करे अऊ जरूरत परे ला बनाय हवय. येकरे सेती, जब मांग कम होय, तब भंडारन करे जाय अऊ जरूरत मुताबिक बनाय जाय.

वैज्ञानिक हिमांशु ठक्कर कहिथें, “फेर जियादा मांग बखत मं पनबिजली के घलो निगरानी करे नइ जावत हे.” वो ह साउथ एशिया नेटवर्क ऑन डैम्स, रिवर्स एंड पीपल (एसएएनडीआरपी) के समन्वयक आंय.

ठक्कर कहिथें के पीएसपी ला 'पर्यावरन के मुताबिक’ बताय के कोनो वैज्ञानिक आधार नइ ये. येकर उलट, पीएसपी जइसने बड़े बुनियादी ढाँचा के दखल के समाजिक अऊ पर्यावरनीय असर महत्तम होही.

कम से कम 62ठन अऊ पीएसपी प्रस्तावित हवंय, अऊ ये 2035-36 तक ले बन जाहीं. दिल्ली अऊ हैदराबाद के ग्रीनको आफिस मन मं करे गे कॉल के कोनो जुवाब नइ मिलिस, एक ठन नंबर अइसने मेलबॉक्स मं चले गीस जेन ह संदेसा ले बर भरे रहिस, अऊ मेल के कोनो जुवाब नइ मिलिस.

फेर ये कहिनी मं एक ठन फेर आगे हवय, अऊ हो सकथे इही ह शाहबाद ला बचा लेय.

कुनो नेशनल पार्क – जेन ह अफ्रीकी चितवा (एसिनोनिक्स जुबेटस) मन के ठीहा आय - इहाँ ले सीधा रद्दा मं सिरिफ 13 कोस दूरिहा हवय. बीते बछर भर ले, चितवा शिकार खोजत कुनो ले बहिर निकरत हवंय, ते पायके राष्ट्रीय बाघ संरक्षण प्राधिकरण (एनटीसीए) ह एक ठन एक अंतरराज्यीय चितवा संरक्षण परिसर बनाय हवय – जेन ह करीबन 17,000 वर्ग किलोमीटर के दायरा मं हवय, जेन ला कुनो-गांधी सागर (केजीएस) के नजारा कहे जा सकथे.

ये रद्दा ले जावत, कूनो ले निकरेइय्या चितवा कुछेक घंटा मं शाहबाद हबर जाही – अऊ वो मन ला पहिलीच ले देखे जा चुके हवय. चितवा कूनो नदिया मं तैर घलो सकथे, अऊ ओकर ले घलो तेजी ले हबर सकथे!

अब ये जंगल कारीडोर के 408 एकड़ इलाका ला देखेइय्य करेइय्या पीएसपी ला चितवा के जरूरत के संग नापे ला परही – एक अइसने परियोजना जेकर उद्घाटन खुदेच प्रधानमंत्री ह सितंबर 2022 मं करे सही समझे रहिस.

संरक्षनवादी मन बर, ये संभावना सुखद हवय के चितवा असल मं शाहबाद ला बचा सकेय.

फेर ओकर पहिली चितवा मन ला अपन आप ला बचाय ला परही.

लेखक कोटा के वरिष्ठ पत्रकार ब्रजेश विजयवर्गी, ईशा शाह अऊ सूरज प्रताप शर्मा ला ये कहिनी मं बड़े मन ले मदद बर आभार जतावत हवय.

अनुवाद: निर्मल कुमार साहू