پنجاب: ذہنی صحت پر سیلاب کے اثرات

وینا رانی (۲۴) ستمبر ۲۰۲۵ میں مہینہ بھر ٹھیک سے سو نہیں پائیں۔ وہ جیسے ہی چارپائی پر لیٹتیں اور سونے کی کوشش کرتیں، پچھلے مہینہ آئے سیلاب کی بھیانک یادیں ان کی نیندیں اُڑا لے جاتیں۔ پنجاب کے فاضلکہ ضلع کے ولّے شاہ اُتّر گاؤں میں واقع ان کے گھر اور کھیتوں کو نگل جانے والے پانی کا منظر گھنٹوں ان کی بند آنکھوں میں گھومتا رہتا۔

’’میں پہلے سے تھوڑا بہتر محسوس کر رہی ہوں،’’ سونے سے پہلے اپنی دوا کھاتے ہوئے وینا کہتی ہیں۔ گاؤں کے مرکزی حصہ میں کھیتوں کے درمیان بنا ہوا ان کا تین کمروں کا پکّا مکان ستلج ندی سے نکلنے والی ایک آبی گزرگاہ کے قریب ہے۔ ان کے گھر سے دیکھنے پر یہ آبی گزرگاہ خاموش سی لگتی ہے، لیکن آٹھ فٹ گہری ہے۔ اُس پار ان کا چار ایکڑ میں پھیلا کھیت ہے۔

’’یہ ہنسنا بھول گئی تھی،‘‘ وینا کی ۲۶ سالہ بہن کیلاش رانی بتاتی ہیں۔ ان کے والد جرنیل سنگھ (۵۲) یاد کرتے ہیں کہ اگر وہ لوگ انہیں بیٹھنے کے لیے کہتے تو وہ کیسے رونے لگتی تھیں۔

’’میں صرف یہی سوچتی رہتی تھی کہ فصل تباہ ہو چکی ہے تو اب پیسہ کہاں سے ملے گا، کھیت کب تک پانی میں ڈوبا رہے گا، کیا ہم اگلی بار گیہوں کی بوائی کر پائیں گے،‘‘ وینا کہتی ہیں۔ جب ان کے عزیز و اقارب یہ پوچھتے تھے کہ کون سی چیز انہیں بے چین کر رہی ہے، تو وہ بڑی مشکل سے اس کا جواب دے پاتی تھیں۔ ’’ایسا لگتا تھا کہ میرے سر پر کوئی بڑا بوجھ ہے۔‘‘

سیلاب کی وجہ سے گاؤں کا ہر آدمی پریشان تھا، اور وینا کو لگتا تھا کہ پانی جلد ہی اتر جائے گا۔

لیکن ایسا نہیں ہوا۔ جب ان کی بے چینی اور بے قراری بہت زیادہ بڑھنے لگی، تو گھر والے انہیں ۵۰ کلومیٹر دور، ابوہر کے ایک ماہر نفسیات کو دکھانے لے گئے، جس نے بتایا کہ وہ ڈپریشن (شدید ذہنی دباؤ) میں مبتلا ہیں، اور انہیں پانچ مہینے کی دوا دی۔

وہ کلینک میں بھی سسک رہی تھیں۔ ’’دماغ دی نسّ کمزور ہو گئی نے [میرے دماغ کی رگیں کمزور ہو گئی ہیں]،‘‘ وہ کہتی ہیں۔

ان کے گھر سے تین کلومیٹر آگے، ستلج ندی ٹیڑھی میڑھی بہتی ہوئی ہند-پاک سرحد سے ہو کر گزرتی ہے۔ یہاں کے تقریباً درجن بھر گاؤوں میں سیلاب ایک عام بات ہے۔ سال ۱۹۵۵، ۱۹۸۸، ۲۰۲۳ اور ۲۰۲۵ میں اسی طرح کے سیلاب نے بڑے پیمانے پر تباہی مچائی تھی۔

اگست ۲۰۲۵ میں پورے شمالی ہندوستان میں زبردست بارش ہوئی تھی، جس کی وجہ سے راوی، بیاس اور ستلج ندی کے کنارے بنے بند ٹوٹ گئے تھے۔ وہاں سے آنے والے پانی نے کھیتوں اور گاؤوں کو ڈبو دیا تھا۔ اس سیلاب کی وجہ سے ۲۵۰۰ گاؤوں متاثر ہوئے تھے، جب کہ ۴۰ لوگوں کی موت ہوئی تھی۔ تقریباً ۵ لاکھ ایکڑ کھیت تباہ ہوئے تھے، جس میں صرف فاضلکہ ضلع کے ۳۷ ہزار ایکڑ کھیت شامل تھے۔

پانی میں ڈوب چکے ان کھیتوں میں وینا کی فیملی کے بھی چار ایکڑ کھیت شامل تھے، جن میں باسمتی دھان لگے ہوئے تھے اور امید تھی کہ فی ایکڑ سے کم از کم ۸۰ ہزار روپے کی کمائی ہوگی۔ اسی پیسے سے ان کا سال بھر کا خرچ چلتا۔

’’ہمیں اپنی تعلیم کے لیے ایک بار پھر قرض لینا ہوگا،‘‘ وینا اپنی ہنسی کو دباتے ہوئے کہتی ہیں۔

وہ اور ان کا چھوٹا بھائی بجلی ٹیکنیشین کی ٹریننگ حاصل کر رہے ہیں۔ ان میں سے ہر ایک کو اگر ۳۰ ہزار روپے ماہانہ کی کوئی مستحکم نوکری مل جاتی ہے، تو وہ اپنی فیملی کو ’’بار بار قرض لینے کے جال‘‘ سے باہر نکال سکتے ہیں، وینا کہتی ہیں۔

دھان کی کھیتی ان کی فیملی کی آمدنی کا واحد ذریعہ ہے؛ گندم کی کھیتی وہ خود اپنے کھانے کے لیے کرتے ہیں۔ اب چونکہ دھان کے کھیت پوری طرح تباہ ہو چکے ہیں، لہٰذا انہیں اس بحران سے باہر نکلنے کا کوئی راستہ دکھائی نہیں دے رہا ہے۔

’’اگلے دو سال برباد ہو گئے،‘‘ وینا کہتی ہیں، ان کی آنکھیں اب بھی پانی میں ڈوبے ہوئے کھیت کی جانب لگی ہوئی ہیں۔ بازار میں بیچنے کے لیے اب ان کے پاس کچھ بھی نہیں بچا ہے، اس لیے یہ لوگ پہلے سے لیے ہوئے اپنے قرض کی ادائیگی نہیں کر پائیں گے، انہیں نیا قرض لینا ہی پڑے گا، اور اگلی فصل کی بوائی کے لیے پیسے کا انتظام کرنا بھی ان کے لیے اتنا ہی مشکل ہوگا۔

ان کے گھر کی دیواریں گھٹنے تک گیلی ہیں۔ مٹی کے فرش کیچڑ سے بھرے ہیں۔ ’’جس وقت پانی اندر داخل ہوا، ہم گھر میں ہی تھے۔ جب پانی بڑھنے لگا، تو ہم چھ کلومیٹر دور لادھوکے اناج منڈی چلے گئے۔ گھر میں صرف ان کے پاپا (والد) بچے، جو چھت کے اوپر رہتے تھے،‘‘ وینا کی ماں، ۵۱ سالہ پرکاش کور بتاتی ہیں۔ وہ لوگوں کے ذریعہ عطیہ میں دیے گئے راشن سے پِنّی [میٹھا لڈو) بنا رہی ہیں۔

وینا پہلے پارٹ ٹائم بیوٹیشین کا کام کرتی تھیں، لیکن اب گھر سے باہر نہیں نکلتی ہیں۔ ان کا چھوٹا بھائی، ۲۲ سالہ سُکھ چین سنگھ بھی پریشان ہو گیا تھا۔ فیس کے تقریباً ۵۰۰۰ روپے ادا کرنے باقی تھے، جس کے لیے ٹیچر بار بار تقاضا کر رہے تھے، آخرکار انہیں سڑک کی تعمیر کے کام میں لگنا پڑا، جہاں سے وہ روزانہ ۵۰۰ روپے کماتے ہیں۔ ’’تناؤ سے بچنے کے لیے میں نے کام کرنا شروع کر دیا۔ جب گھر واپس آتا، تو بری طرح تھک چکا ہوتا تھا،‘‘ وہ بتاتے ہیں۔

سیلاب سے متاثرہ پنجاب کے تمام گاؤوں میں، لوگ نہ صرف اپنے گھروں اور فصلوں کے نقصان کا سامنا کر رہے ہیں، بلکہ فکرمندی، بے خوابی، شدید ذہنی دباؤ اور اس قسم کی دیگر بیماریوں میں مبتلا ہو چکے ہیں۔

ان کی اس کیفیت کا اظہار ماحولیاتی تبدیلی سے متعلق بین حکومتی پینل کی طرف سے جاری وارننگ سے بھی ہوتا ہے، جس میں کہا گیا ہے کہ شدید موسمی حالات کا لوگوں کی ذہنی صحت پر بہت برا اثر پڑ رہا ہے۔

یہ بحران اتنا بڑا ہے، لیکن لوگوں کی زندگی کو دوبارہ بنانے کی کوئی فوری کوشش کہیں دکھائی نہیں دیتی۔ سیلاب سے متاثرہ ایک اور ضلع، گرداس پور کے ماہر نفسیات ڈاکٹر روپندر اوبرائے کہتے ہیں، ’’ہم جن مریضوں کو دیکھ رہے ہیں وہ تعداد میں اس سے کہیں کم ہیں، جتنے بڑے پیمانے پر یہ کمیونٹی اس مصیبت کا سامنا کر رہی ہے۔‘‘

پنجاب کے سرحدی گاؤوں میں، ایک تو ذہنی صحت کی دیکھ بھال تک رسائی مشکل ہے، اوپر سے سماج میں اس کے بارے میں بدگمانی بھی پائی جاتی ہے۔ ڈاکٹروں کا کہنا ہے کہ لوگ سب سے پہلے انہیں جھاڑ پھونک کرنے والوں کے پاس لے جاتے ہیں، اور جب حالت بہت خراب ہو جاتی ہے تبھی کسی ماہر نفسیات کو دکھاتے ہیں۔

یہاں کے زیادہ تر خاندانوں کا تعلق رائے سکھ برادری سے ہے، جنہیں پنجاب میں درج فہرست ذات کا درجہ حاصل ہے۔ عورتوں کے معاملے میں تو رکاوٹیں اور بھی زیادہ ہیں، ان کا علاج تبھی ممکن ہو پاتا ہے جب گھر کا کوئی آدمی ان کے ساتھ ڈاکٹر کے پاس جائے اور خرچ کرنے کے لیے جیب میں پیسے بھی ہوں۔ ڈاکٹر اوبرائے کہتے ہیں، ’’مردوں کے مقابلے عورتوں میں بے چینی کی علامتیں پہلے ظاہر ہونے لگتی ہیں۔ لیکن فیملی کے سپورٹ کے بغیر، وہ طبی نگہداشت حاصل نہیں کر پاتیں۔‘‘

وینا کو ماہر نفسیات تک پہنچنے میں ہفتوں لگ گئے۔ پہلے وہ تین پہیہ گاڑی (تھری وہیلر) سے فاضلکہ گئیں، پھر وہاں سے بس سے ابوہر، اس کے بعد دوبارہ تین پہیہ گاڑی پر سوار ہوئیں، تب جا کر کلینک پہنچیں۔ حالانکہ کمیونٹی ہیلتھ سنٹر ان کے گھر سے صرف تین کلومیٹر دور ہے، اور سول ہسپتال ۲۰ کلومیٹر دور، لیکن کسی نے بھی وہاں جانا مناسب نہیں سمجھا۔ ’’وہاں کے ڈاکٹر ٹھیک سے دیکھ بھال نہیں کرتے ہیں،‘‘ وینا کہتی ہیں۔

ریاست کے ذریعہ چلائے جا رہے ہستا کلاں ہیلتھ سنٹر کے ڈاکٹر اس بات کی تصدیق کرتے ہیں کہ سیلاب کے بعد ذہنی صحت سے متعلق علاج کرانے کے لیے ان کے پاس کوئی بھی مریض نہیں آیا ہے۔

فاضلکہ میں واقع سرکاری سول اسپتال میں تعینات ماہر نفسیات ڈاکٹر پیکاشی اروڑہ کہتی ہیں، ’’یہاں اداسی، بے رغبتی، شدید ذہنی تناؤ، پی ٹی ایس ڈی اور حالات کے ساتھ ہم آہنگی میں دشواری جیسی شکایتوں والے مریض آ رہے ہیں۔‘‘ ان کا اندازہ ہے کہ سیلاب کے بعد لوگوں کے درمیان ڈپریشن اور بے چینی کی کیفیت میں ۲۰ فیصد کا اضافہ ہوا ہے۔ ’’بہت سے لوگ خاموشی سے انھیں برداشت کر رہے ہیں۔ وہ دوسروں کے سامنے ذہنی صحت کے بارے میں بات نہیں کرنا چاہتے۔‘‘

ڈاکٹروں کا کہنا ہے کہ پنجاب میں پہلے سے ہی نفسیاتی علاج کی کمی ہے۔ ابوہر میں وینا کا علاج کر رہے ماہر نفسیات ڈاکٹر رمیش اروڑہ بتاتے ہیں، ’’سرکاری اسپتالوں میں منشیات کے عادی مریضوں کی بھرمار ہے۔‘‘ فاضلکہ اور جلال آباد کے سول اسپتالوں میں علاج کرنے والے ڈاکٹر سدھارتھ کلوچا کا کہنا ہے کہ ’’افیم کی وبا‘‘ کے سبب نشہ چھڑانے والے معاملوں کا بوجھ بہت زیادہ ہے، جس کی وجہ سے ذہنی صحت کے مریضوں کو نظر انداز کر دیا جاتا ہے۔

ستلج کی آبی گزرگاہ کے دوسرے کنارے پر واقع ولّے شاہ ہیتاڑ میں ۳۰ سالہ پرم جیت کور، اگست ۲۰۲۵ میں اُس دن روٹیاں بیل رہی تھیں، جب ان کی نند رَجّو بائی اچانک زور زور سے چیخنے لگیں، ’’پانی آ رہا ہے!‘‘

پرم جیت کو اس بات کا اندازہ نہیں تھا کہ سیلاب کا پانی تیزی سے چڑھ جائے گا، لہٰذا انہوں نے بے پرواہ ہو کر جواب دیا، ’’بچوں کو بھوکا تھوڑی مارنا ہے۔‘‘ اب اس واقعہ کو یاد کر کے وہ ہنسنے لگتی ہیں، اور کہتی ہیں، ’’منٹوں میں پانی ہمارے پاس پہنچ گیا۔‘‘ دونوں عورتوں نے تیزی سے پانچوں بچوں کو اپنی گود میں اٹھایا اور گاؤں کے مرکز میں واقع اپنے سسرالی گھر کی طرف بھاگیں، جسے ۲۰۱۳ کے سیلاب کے بعد چار فٹ کی اونچائی پر بنایا گیا تھا۔

جب ان کے شوہر ہربنس سنگھ (۳۸)، جو گاڑی سے اناج کو شہر تک پہنچانے کا کام کرتے ہیں، گھر لوٹے تو انہوں نے اپنے بڑے بھائی درشن سنگھ کے ساتھ مل کر کشتی سے گھریلو سامان کو نکالنے کی کوشش کی۔ لیکن پاس کے ایک ٹرانس فارمر سے بجلی کا کرنٹ پانی میں دوڑ گیا، جس کے بعد مقامی گرودوارہ نے سبھی کو متنبہ کیا کہ وہ پانی سے دور رہیں۔

پرم جیت نے اس سے پہلے سیلاب کبھی نہیں دیکھا تھا۔ ہربنس سے ان کی شادی ۲۰۲۳ کی سردیوں میں اس وقت ہوئی تھی، جب ان کے پہلے شوہر کی موت حد سے زیادہ نشہ کرنے کی وجہ سے ہو گئی تھی۔ اُس شادی سے ان کی ایک چھ سال کی بیٹی ہے۔ ہربنس کی بھی پہلے شادی ہو چکی تھی، جن کے پاس پہلی بیوی سے ۱۵ سال کی ایک بیٹی اور ۱۰ سال کا ایک بیٹا ہے۔

پرم جیت نے اپنے گھر کے پیچھے، آدھے ایکڑ کھیت میں خود سے دھان کی بوائی کی تھی، لیکن وہ بھی پانی میں ڈوب گیا۔

کئی ہفتوں تک وہ روزانہ گھر کو دیکھنے جاتی رہیں، کیوں کہ پانی دھیرے دھیرے اتر رہا تھا۔ پرم جیت کہتی ہیں، ’’پانی نے اینٹوں کو بھگو دیا تھا۔ دھوپ پڑتے ہی وہ ٹوٹنے لگیں۔ گھر کو دیکھتے ہی مجھے تناؤ ہونے لگتا تھا۔ رات میں نیند نہیں آتی تھی۔ میں جاگ کر بیٹھی رہتی اور سوچتی رہتی – جِتھے دھیان ہو جائے [جہاں میرا ذہن چلا جائے]۔‘‘

جب ان کی بے خوابی میں اضافہ ہونے لگا، تو ہربنس انہیں فاضلکہ شہر کے ایک پرائیویٹ ماہر نفسیات کے پاس لے گئے۔ پرم جیت ڈاکٹر کی بات یاد کرتے ہوئے کہتی ہیں، ’’دماغ دی نسّاں تے دباؤ پَے گیا ہے [دماغ کی رگوں پر دباؤ پڑ گیا ہے]۔‘‘ انہیں دن میں دو بار دوا لکھی گئی تھی، لیکن وہ صرف رات میں سونے کے لیے ایک گولی لیتی ہیں۔

وہ کہتی ہیں، ’’میری ایک سال کی بیٹی اب بھی دودھ پیتی ہے۔ اگر میں زیادہ دوا لوں، تو اس کا اثر اُس پر بھی پڑتا ہے۔‘‘ یہ کہتے ہوئے وہ اپنے ٹوٹے ہوئے گھر کے اندر اُکڑوں بیٹھی ہیں، جب کہ ان کی ننھی بچی فرش کی مٹی کرید رہی ہے۔

ایک مہینہ کی دوا سے ان کی نیند تو واپس آ گئی، لیکن اندر کی گہری بے چینی انہیں عقیدت کے راستے پر لے گئی۔ اب پرم جیت ہر جمعرات کو پاس کی ایک صوفی درگاہ پر جاتی ہیں اور مانتی ہیں کہ ان کے پہلے شوہر کی روح ہی ان کی پریشانیوں کی وجہ ہے۔ ان کے ساس سسر اُس درگاہ کی دیکھ بھال کرتے ہیں۔ فیملی کا عقیدہ ہے کہ ایک بابا، جو کبھی ان کی ساس کے خواب میں آئے تھے، وہاں آنے والوں کو ٹھیک کرتے ہیں۔

پرم جیت کہتی ہیں، ’’ہماری فیملی پہلے سے ہی غریب تھی، اور اب بھگوان نے ہمارے ساتھ یہ کر دیا۔‘‘ وہ اپنی ناراضگی سرکاری اہلکاروں پر بھی جتاتی ہیں کہ انہوں نے آبی گزرگاہوں کی صفائی نہیں کرائی۔ ان کی آواز میں غصہ نہیں، صرف بے بسی ہے۔ وہ کہتی ہیں کہ فیملی اب غیر سرکاری تنظیموں (این جی او) اور کسان یونینوں کی مدد پر زندہ ہے۔ ’’کوئی روز کھانا نہیں دے سکتا،‘‘ وہ کہتی ہیں۔

ریاستی حکومت نے فصل کے نقصان کے لیے تقریباً ۲۰ ہزار روپے فی ایکڑ اور گھر ٹوٹنے پر ایک لاکھ ۲۰ ہزار روپے معاوضہ کا اعلان کیا۔ لیکن کئی کنبوں کا کہنا ہے کہ یہ رقم بہت کم ہے۔

ڈاکٹروں کے مطابق، مالی عدم تحفظ سیلاب متاثرین کے لیے شدید تناؤ کا باعث ہے اور علاج میں تاخیر کی بڑی وجہ بھی۔ اوبرائے کہتے ہیں، ’’اتنے مالی تناؤ میں ذہنی صحت پیچھے چھوٹ جاتی ہے۔ ابھی لوگوں کو اپنے گھر دوبارہ بنانے اور اگلی فصل کی خاطر زمین تیار کرنے کے لیے فوراً مالی مدد کی ضرورت ہے۔‘‘

جنوری ۲۰۲۶ میں پاری کے سوالوں کے جواب میں ڈپٹی ڈائرکٹر (محکمۂ ذہنی صحت) روہنی گوئل نے تمام ضلع سول سرجنوں اور ڈپٹی میڈیکل کمشنروں کو خط لکھ کر ہدایت دی کہ سیلاب متاثرہ خاندانوں کو سرکاری اسپتالوں اور کلینکوں میں دستیاب ذہنی صحت سے متعلق سہولیات کی معلومات فراہم کی جائیں۔ حالانکہ، محکمہ نے سیلاب سے مخصوص ذہنی صحت کے پروٹوکول یا کسی عوامی پروگرام کا خاکہ پیش نہیں کیا۔

محکمۂ مالیات، باز آبادکاری اور ڈیزاسٹر مینجمنٹ کے اہلکاروں نے پاری کو بتایا کہ ریاستی حکومت نے سیلاب متاثرین کے لیے طبی جانچ کے کیمپ لگائے اور ضروری سہولیات مہیا کرائیں۔ جواب میں وضاحت کے ساتھ یہ نہیں بتایا گیا ہے کہ آیا ذہنی صحت سے متعلق مدد ڈیزاسٹر مینجمنٹ پروٹوکول کا حصہ ہے یا نہیں۔

من پریت کور (تبدیل شدہ نام) کے لیے تناؤ کی وجہ ان کے پانچ سال کے بیٹے کی بقایا اسکول فیس تھی۔ ایک غیر منافع بخش ادارہ کے ذریعہ تین مہینے بعد فیس بھرنے تک، اسکول سے ہر بار فیس کی یاد دلانے والے پیغام ملنے پر انہیں ’’گھبراہٹ‘‘ ہوتی تھی، جھنگڑ بَھینی گاؤں کی رہنے والیں من پریت (۲۸) بتاتی ہیں۔

ان کے شوہر، جو مقامی گودام میں ۷۰۰۰ روپے ماہانہ کماتے ہیں، سیلاب کے بعد سے بمشکل ہی بول پاتے ہیں۔ وہ کہتی ہیں، ’’میں سبزی خریدنے کے لیے ۱۰۰ روپے بھی مانگوں، تو جواب نہیں دیتے۔‘‘ ان کے ساس سسر بھی مدد نہیں کر سکے۔ یہ کہتے ہوئے من پریت ٹوٹ جاتی ہیں۔ ’’ان کی چھ ایکڑ کی پوری فصل برباد ہو گئی۔‘‘

گھر چلانے کے لیے من پریت نے زرعی مزدوری تلاش کرنی شروع کی – دھان کی روپائی کرنا، لہسن چھیلنا یا چُننا، جو بھی کام مل جائے اور دن کے کچھ سو روپے دے سکے۔

سال ۲۰۲۳ سے پہلے انہوں نے کبھی کھیتوں میں کام نہیں کیا تھا۔ وہ مسکراتے ہوئے کہتی ہیں کہ یہ پہلی بار تھا، جب انہوں نے ایسا سیلاب دیکھا۔ پہلے وہ بچوں کو ٹیوشن پڑھاتی تھیں، لیکن سیلاب کے بعد گاؤں میں آمدنی اتنی کم ہو گئی کہ اب کوئی ماں باپ ٹیوشن کا خرچ نہیں اٹھا سکتا۔

وہ یاد کرتی ہیں، ’’پانی ہمارے کھیتوں میں داخل ہوا اور پھر اتر گیا۔ ہم نے جو دھان بویا تھا وہ سڑ گیا، اس لیے دوبارہ روپائی کی۔ پھر پانی لوٹ آیا۔ تبھی اصلی تناؤ شروع ہوا۔‘‘ فیملی نے دھان کی روپائی کے لیے ابوہر کی نرسری سے پودے خریدے تھے۔ وہ بتاتی ہیں، ’’پانی پھر آیا اور سب کچھ برباد کر گیا۔‘‘ فیملی کا اندازہ ہے کہ انہیں تقریباً ۵ لاکھ روپے کا نقصان ہوا۔

سال ۲۰۲۳ اور ۲۰۲۵ میں، دونوں بار جب سیلاب آیا تھا، تب من پریت گھر پر ہی تھیں۔ وہ کہتی ہیں، ’’وقت کے ساتھ، جتنا سیلاب دیکھتے ہیں اتنی عادت ہو جاتی ہے۔‘‘

لیکن ۲۰۲۳ کے سیلاب کے تناؤ سے ہوئے شدید مائگرین کو وہ بھول نہیں پاتیں۔ ’’میرے سر میں مسلسل درد رہتا تھا،‘‘ وہ کہتی ہیں۔ ’’یہ سب تناؤ کی وجہ سے تھا۔‘‘ پھر آہستہ سے مزید کہتی ہیں، ’’کچھ دن ایسے بھی تھے، جب میرا من کرتا تھا کہ گھر کے باہر ڈوبے کھیتوں میں ہی ڈوب جاؤں۔‘‘

اگر آپ کے ذہن میں خودکشی جیسے خیالات آ رہے ہیں یا آپ کسی سنگین ذہنی پریشانی کے شکار ہیں، تو براہ کرم قومی ہیلپ لائن کرن پر ۱۸۰۰۵۹۹۰۰۱۹ پر فون کریں۔ یہ چوبیسوں گھنٹے کی مفت سروس ہے۔ آپ اپنے نزدیکی ہیلپ لائنوں پر بھی رابطہ کر سکتے ہیں۔

ماحولیاتی تبدیلی اور ذہنی صحت پر مرکوز پاری کی یہ ملک گیر سیریز ماری والا ہیلتھ انیشیٹو کے تعاون سے تیار کی گئی ہے۔ اس سیریز میں دیہی ہندوستان اور شہروں میں رہنے والے دیہی مہاجرین کی ذہنی اور مجموعی صحت اور معاش پر ماحولیاتی بحران کے اثرات کا جائزہ لیا جائے گا۔

ترجمہ نگار: قمر صدیقی