‘डूबल खेत में जाके हमहूं डूब जइतीं’

सन् 2025 में पूरा सितंबर वीणा रानी के नींद ना आइल. फाजिल्का के वल्ले शाह उत्तर गांव के रहे वाली आ मुस्किल से 24 बरिस के वीणा खटिया पर आंख मुनले घंटो पड़ल रहेली. उनका ओह तबाही के ध्यान बेर-बेर आवेला जब पछिला महीना आइल बाढ़ उनकर खेत बहा ले गइल. आउर पानी सब घर में घुस आइल.

वीणा सुते घरिया के दवाई घोंटत कहली, “पहिले से हम ठीक से बानी.” गांव के बाहर खेत सब के बीच उनकर तीन कमरा वाला पक्का घर बा, जे सतलुज नदी से निकलल छोट नाला लगे पड़ेला. घर से देखला पर नदी के पानी शांत बुझाला, बाकिर ई आठ फीट गहिर बा. ओकरा पार कइला पर उनक चार एकड़ के खेत पड़ेला.

“ऊ हंसल भुला गइल बाड़ी,” वीणा के बहिन, 26 बरिस के कैलाश रानी कहली. बाऊजी, 52 बरिस, जनरैल सिंह इयाद करतारन कि उनका जबो उठ के बइठे के कहल जाए, त रोए लागस.

“हमरा दिमाग में खाली इहे बात आवे कि फसल बरबाद हो गइल, त अब पइसा कहंवा से आई. पानी कबले हटी. आवे वाला सीजन में हमनी गेहूं बोआ पाई कि ना,” वीणा कहली. घरवाला लोग जब उनका से पूछे कि कवन बात के घबराहट बा, त ऊ ठीक से बता भी ना पावत रहस. “लागे माथा पर कुछ भारी चीज रखल बा.”

गांव में सभे लोग बाढ़ से परेशान रहे. वीणा के इहे लागत रहे कि धीरे-धीरे सब ठीक हो जाई.

बाकिर कुछ ठीक ना भइल. जब ऊ एकदम सुस्त पड़ गइली आ चुप रहे लगली त परिवार उनका 50 किमी दूर अबोहर के एगो देमाग के डॉक्टर (मनोवैज्ञानिक) से देखावे ले गइल. उहंवा उनका डिप्रेशन (उदासी) बतावल गइल, आउर पांच महीना के दवाई लिखल गइल.

ऊ उहंवा क्लीनिको में सिसक-सिसक के रोवत रहस. ऊ बतावेली, “दिमाग दी नस कमजोर हो गई ने (दिमाग के नस कमजोर हो गइल बा).”

उनकर घर से मात्र तीन किमी के दूरी पर सतलुज नदी भारत-पाकिस्तान सीमा पर टेढ़-मेढ़ होके बहेला. इहंवा के कोई दरजन भर गांव में बाढ़ कवनो नया बात नइखे. गांव के लोग एकरा से पहिले 1955, 1988, 2023 आ 2025 में भयानक बाढ़ देख चुकल बा.

सन् 2025 के अगस्त में जब बेहिसाब बरखा भइल, त रावी, ब्यास आ सतलुज नदी आपन किनारा तुड़ के बहे लागल. खेत आ गांव पानी से लबालब हो गइल. एह में खाली फाजिल्का जिला के 37,000 एकड़ खेत सहित कोई 2,500 गांव तबाह भइल, आ 40 लोग के जान चल गइल.

डूबल खेत सब में वीणा के परिवार के कोई चार एकड़ खेत रहे. एक एकड़ खेत में लागल बासमती चाउर (धान) से कोई 80 हजार रुपइया आवे के उम्मीद रहे. एकरे से साल भर घर चले वाला रहे.

“अब हमनी के पढ़ाई खातिर फेरु करजा उठावे पड़ी,” वीणा जबरिया हंसत कहली.

ऊ आ उनकर छोट भाई लोग इलेक्ट्रिक इंजीनियरिंग के ट्रेनिंग कर रहल बा. वीणा कहेली कि जदि 30 हजार रुपइया महीना के नौकरी मिल जाई, त माथा से ‘करजा के चक्कर’ हट जाई.

धाने एह परिवार के कमाई के एकमात्र जरिया बा. काहेकि गेहूं ऊ लोग घर में खाए खातिर उगावेला. अब त सब कुछ बरबाद हो चुकल बा, धान के खेत में बचावे लायक कुछो नइखे.

वीणा के कहनाम बा, “अगिला दू बरिस हाथ से निकल गइल.” उनकर धंसल आंख बाढ़ में बरबाद भइल खेत पर टिकल बा. बजार में बेचे खातिर कुछो नइखे बचल, पुरनका करजा चुकता ना भइल, नया करजा लेवे पड़ल, आ अब त अगिला बोआई खातिर पइसो जुटावल मुस्किल हो गइल बा.

ओह लोग के घर में देवाल में घुटना तक सीलन बा. माटी के फर्श अबहियो जगह-जगह भींजल बा. वीणा के माई, 51 बरिस के प्रकाश कौर कहेली, “पानी घुसल, त हमनी घरे में रहीं. जब पानी बढ़े लागल, त हमनी घर छोड़ के छव किमी दूर, लधुके, अनाज के बजार ओरी निकल गइनी.” ऊ राहत में मिलल राशन से पिन्नी (लड्डू) बनावत बाड़ी.

कबो ब्यूटीशियन के छोट-मोट काम करे वाली वीणा अब घर से कदम ना निकालेली. उनकर छोट भाई सुखचैन सिंह (22) भी परेशान रहेलन. स्कूल से 5,000 रुपइया फीस खातिर जब फोन पर बहुते तकादा आवे लागल, त ऊ 500 रुपइया दिहाड़ी पर सड़क बनावे के काम में मजूर लग गइलन. उनका 500 रुपइया दिहाड़ी मिलेला. ऊ कहेलन, “चिंता-फिकिर भुलाए खातिर काम में मन लगावे के कोसिस कइनी. घर लउटत-लउटत थक के चूर हो जात रहीं.”

पंजाब के बाढ़ पीड़ित इलाका में लोग खाली घर आ खेतिए-बाड़ी के दुख नइखे झेलत, चिंता, नींद ना आवे के दिक्कत, डिप्रेशन आ बाढ़ के बाद के सदमो से जूझ रहल बा.

एह हालात से साफ बा कि बिगड़त मौसम अब लोग के मनो-मिजाज पर भारी पड़ रहल बा. इहे बात जलवायु बदलाव के बारे में इंटरगर्वनमेंट पैनल ऑन क्लाइमेट चेंज के वैज्ञानिक लोग दावा करत आइल बा.

बाकिर तबो एह संकट पर अबही जादे चरचा नइखे, काहेकि लोग आपन जिनगी संभाले में लागल बा. डॉ. रुपिंदर ओबेरॉय बाढ़ से प्रभावित दोसर जिला, गुरदासपुर में मनोचिकित्सक बाड़न. उनकर कहनाम बा, “जेतना मरीज लउकता, ऊ तो समस्या के झलक भर बा. इहंवा के लोग जे झेल रहल बा, ओकरा सामने त ई कुछ नइखे.”

पंजाब के सीमावर्ती गांव में देमागी इलाज के सुविधा एक त आसानी से मिलेला ना, आउर मिलियो जाए त एकरा कलंक समझे चलते लोग सामने आवे से कतराला. डॉक्टर लोग कहेला कि पहिले त लोग बाबा आ तांत्रिक लगे चल जाला, हालत गंभीर भइला पर डॉक्टर लगे आवेला.

इहंवा जादे करके परिवार सब पंजाब में अनुसूचित जाति में गिनाए वाला राय सिख समुदाय से आवेला. मेहरारू लोग के इलाज में आउर जादे समस्या बा, काहेकि संगे जाए वाला चाहीं आउर पइसा भी जरूरी बा. डॉक्टर ओबेरॉय कहलन, “मेहरारू लोग मरद के मुकाबले समस्या जल्दी बतावेला, बाकिर परिवार के सहजोग बिना इलाज में दिक्कत आवेला.”

देमागी डॉक्टर (मनोचिकित्सक) लगे जाए में वीणा के कइएक हफ्ता लाग गइल. ऊ तिपहिया से फाजिल्का गइली, फेरु बस से अबोहर, आ फेर तिपहिया लेके क्लीनिक पहुंचली. उनकर घर से तीन किमी के दूरी पर मौजूद कम्युनिटी सेंटर आ 20 किमी दूर सिविल अस्पताल जाए के ऊ कबो ना सोचली. वीणा कहेली, “उहंवा के डॉक्टर लोग जादे ध्यान ना देवे.”

सरकारी अस्पताल ‘हस्तन कलां’ के डॉक्टर लोग कहेला कि बाढ़ के बाद मानसिक समस्या के शिकायत लेके कवनो मरीज नइखे पहुंचल.

“मन भारी लागे, मन ना लागे, डिप्रेशन, पीटीएसडी आ तनाव के शिकायत लेके मरीज लोग आवता,” फाजिल्का के सरकारी अस्पताल में मनोचिकित्सक डॉक्टर पिकाशी अरोड़ा कहली. उनका हिसाब से बाढ़ के बाद मानसिक बेमारी मोटा-मोटी 20 प्रतिशत बढ़ गइल बा. “लोग चुपचाप दुख झेल रहल बा, दोसरा के सामने मन के बात कहे से हिचकता.”

डॉक्टर लोग कहेला कि पंजाब में मानसिक इलाज के ब्यवस्था पहिलहीं से कमजोर बा. वीणा के इलाज करे वाला, अबोहर के मनोचिकित्सक डॉ. रमेश अरोड़ा कहेलन, “सरकारी अस्पताल त नशा करे वाला मरीज सब से भरल बा.” फजिल्का आ जलालाबाद के सिविल अस्पताल में काम करे वाला डॉ. सिद्धार्थ कलूचा के कहनाम बा कि “अफीम के लत” चलते नशा छोड़ावे खातिर भारी संख्या में मरीज सब आ रहल बा, जेकरा चलते मानसिक मरीज के अक्सरहा अनदेखी हो जाला.

सतलुज नदी के पार वल्ले शाह हिथाड़ में 30 साल के परमजीत कौर रोटी बेलत बाड़ी. उहे घरिया अगस्त 2025 में उनकर देवरानी राजो बाई चिल्लात घर में घुसली, “पानी आवता!”

परमजीत कौर के तनिको अंदाजा ना रहे कि पानी एतना जल्दी ऊपर चढ़ जाई. ऊ आराम से कहली, “बच्चों को भूखा थोड़ी मारना है (बच्चा सब के भुखले थोड़िए मारे के बा).” आज ओह दिन के बेफिकरी इयाद करके ऊ हंस देवेली. ऊ बतइली, “मिनट भर में, पानी घर में घुस गइस.” दुनो मेहरारू लोग जल्दी से पांचो लरिकन के धइलक आउर पानी हेलत गांव में आपन ससुरारी भागल.

शहर में खेती के सामान ढ़ोवे वाला ड्राइवर, उनकर घरवाला, हरबंस सिंह जब घरे पहुंचलन, त ऊ आउर उनकर बड़ भाई, दरशन सिंह लोग नाव से घर के सामान बचावे में लाग गइल. बाकिर जल्दिए पता चलल कि लगे के ट्रांसफार्मर से पानी में करंट फैल गइल बा. गांव के गुरुद्वारा सभे के ओह जगह से दूर रहे के चेतावनी देलक

परमजीत जिनगी में पहिले कबो अइसन बाढ़ ना देखले रहस. तीन बरिस पहिले नशा के ओवरडोज से घरवाला के खतम भइला के बाद, 2023 के सरदी उनकर हरबंस से बियाह भइल. पहिलका बियाह से उनकर छव बरिस के लइकी बा. हरबंस के भी आपन पहिल बियाह से 15 साल के लइकी आ 10 साल लइका बा.

ओह लोग के घर के पाछू परमजीत के आपन लगावल आधा एकड़ के धान पानी में डूब गइल.

कइएक हफ्ता ले ऊ लोग रोज घर के हाल देखे आवे, जइसे-जइसे पानी उतरत गइल. “पानी में पड़ल-पड़ल ईंटा सब फूल गइल रहे. घाम लागल त फाटे लागल,” ऊ बतइली. “घर देखिला त मन घबरा जाला. रात में नींद ना आवे. मन बहुते बेचैन हो जाला.”

उनकर नींद जब आउर बिगड़ गइल, त हरबंस उनका के फाजिल्का शहर के एगो प्राइवेट मनोचिकित्सक लगे ले गइलन. ऊ डॉक्टर के कहल बात इयाद करत रहस, “तोहरा दिमाग के नस पर जोर पड़ गइल बा.” परमजीत के दिन में दू बेर दवाई खाए के लिख गइल, बाकिर ऊ बस रात में सुते घरिया एके बेरा दवाई खाली.

“हमार एक बरिस के लइकी अबहियो हमार दूध पिएला. जदि हम जादे दवाई लेहम, त ओकरा पर असर पड़ी,” ऊ कहली. उनकर लइका जमीन पर माटी से खेलता, आउर ऊ घर के बचल-खुचल हिस्सा में चुक्के-मुक्के बइठल बाड़ी.

एक महीना दवाई चलला के असर ई भइल कि नींद त वापस आवे लागल, बाकिर मन के भीतर बेचैनी ना गइल. ओही बेचैनी धीरे-धीरे उनका आस्था ओरी मोड़ देलक. अब परमजीत हर गुरुवार लगे के एगो सूफी दरगाह जाएली. उनका पूरा बिस्वास बा कि पहिल घरवाला के आत्मा ही उनका परेसान कर रहल बा. ओह दरगाह के देखभाल उनकर सास-ससुर लोग करेला. परिवार मानेला कि एगो बाबा, जे कबो उनकर सास के सपना में आइल रहस, आजो ओह जगह आवे वाला के दुख-पीड़ा हरेलन.

“हमनी एक त पहिलहीं से गरीब परिवार रहीं, ओकरा पर भगवनो हमनी के नया दुख दे देलन,” परमजीत के आवाज धीमा पड़ जाला. ऊ नाला-नहर साफ ना होखे आ पानी घर में घुस आवे के लेके सरकारी अफसरन से भी परेसान बाड़ी. अइसे उनकर आवाज में गोस्सा कम, लाचारी जादे झलकता. परिवार अभी एनजीओ आ किसान यूनियन के सहारे चल रहल बा. ऊ कहेली, “रोज-रोज कोई कबले खाना दीही?”

सरकार खराब फसल के भरपाई खातिर 20,000 रुपइया प्रति एकड़ आ टूटल घर खातिर 1,20,000 रुपइया के मुआवजा देवे के कहले बा. बाकिर केतना परिवार कहता कि ई रकम पर्याप्त नइखे.

डॉकटर लोग के कहनाम बा कि बाढ़ से बचल लोग खातिर पैसा के कमी सबले बड़ बोझ बन गइल बा. एकरा चलते आदमी ना खाली तनाव में रहे, बलुक इलाजो टालेला. डॉ. ओबेरॉय कहत बाड़न, “एह तरह के आर्थिक दबाव में आदमी के मानसिक सेहत गड़बड़ा जा रहल बा. अभी सबले जरूरी बा कि लोग के तत्काल आर्थिक सहायता मिले, ताकि लोग फेरु आपन घर बना सके आउर अगला फसल के तइयारी कर सके.”

जनवरी 2026 में पारी के पूछल गइल सवाल के जवाब में मानसिक स्वास्थ्य शाखा के उपनिदेशक रोहिणी गोयल सभे जिला के सिविल सर्जन आ डिप्टी मेडिकल कमिश्नर के चिट्ठी लिखली. चिट्ठी में बाढ़ प्रभावित परिवार के सरकारी अस्पताल आ क्लीनिक में मौजूद मानसिक स्वास्थ्य सेवा के बारे में जानकारी देवे के निर्देश देवल गइल. बाकिर अफसोस कि विभाग बाढ़ से जुड़ल खास मानसिक स्वास्थ्य योजना या पहुंच कार्यक्रम के कवनो जिकिर ना कइलक.

राजस्व, पुनर्वास आ आपदा प्रबंधन विभाग के अधिकारी लोग पारी के बतइलक कि राज्य सरकार बाढ़ पीड़ितन खातिर मेडिकल जांच कैंप लगवले बा आ जरूरी सुविधा सब उपलब्ध करावता. बाकिर जवाब में ई बात साफ ना भइल कि आपदा प्रबंधन में मानसिक स्वास्थ्य सहायतो शामिल बा कि ना.

मनप्रीत कौर (नाम बदलल बा) आपन पांच बरिस के लइका के स्कूल के बकाया फीस खातिर सबसे जादे परेसान रहस. तीन महीना बाद जब एगो संस्था पइसा देके मदद कइलक, तब जाके उनका शांति मिलल. झंगर भैनी गांव के रहे वाली 28 बरिस के मनप्रीत बतइली कि ओकरा से पहिले, स्कूल से फीस खातिर बेर-बेर तकादा आवे त उनका “घबराहट” आ बेचैनी होखे लागे.

बाढ़ के बाद मनप्रीत के घर में चुप्पी छाइल बा. इलाका के गोदाम में काम करके 7,000 महीनवारी कमाए वाला उनकर घरवाला के आवाज शायदे कबो सुनाई देवेला. “हम तरकारी कीने खातिर सौ रुपइया मांगिला, तबो ऊ कुछ ना बोलस,” ऊ कहली. उनकर सासो-ससुर लोग मदद ना कर सकल, ई कहत मनप्रीत रोए लगली. “पूरा छव एकड़ खेत के फसल बरबाद हो गइल.”

घर चलावे खातिर मनप्रीत खेत में मजूरी करे, धान रोपे, लहसून तुड़े, छीले जइसन जब जवन काम मिल जाए, करेली. उनकर मकसद दिन के कुछ सौ रुपइया कमाए के रहेला.

सन् 2023 से पहिले ऊ खेत में कबो काम ना कइले रहस. ऊ कहेली कि एतना भयानक बाढ़ो ऊ पहिल बेर देखली. हंसमुख स्वभाव के मनप्रीत पहिले बचवन के ट्यूशन पढ़ावत रहस. बाकिर बाढ़ सब कुछ बदल देलक. अब गांव के लोग ट्यूशन के फीस देवे से लाचार हो गइल बा.

“पहिले पानी खेत में घुसल आ फेरु निकल गइल. जे धान बोवल रहे, ऊ सड़ गइल. त हमनी फेरु रोपनी कइनी. बाकिर पानी फेरु लौट आइल. उहे बेरा से असली चिंता सुरु भइल,” ऊ इयाद करेली. परिवार धान रोपे खातिर अबोहर के एगो नर्सरी से पौधा कीनले रहे. “पानी फेरु से आइल आ फसल खराब कर देलक.” परिवार के अनुमान बा कि एह सब में 5 लाख के नुकसान भइल होखी.

सन् 2023 आ 2025 में जब बाढ़ आइल, त मनप्रीत घरहीं रहस. ऊ बतावेली, “बेर-बेर बाढ़ देखे से, आदमी एकर अभ्यस्त हो जाला.”

सन् 2023 के बाढ़ के तनाव से भइल तेज माइग्रेन के ऊ आजो भुला ना पावेली. ऊ कहेली, “माथा में लगातार दरद होखत रहे. ई सब तनाव चलते रहे. अइसनो दिन रहे, जब मन करे, घर के बाहर पानी में डूबल खेत में हमहूं जाके डूब जइतीं.”

जदि राउरो मन में खुदकुशी के ख्याल आवेला, चाहे रउआ अइसन केहू इंसान के जानत हईं जे संकट में बा, त कृपया राष्ट्रीय हेल्पलाइन ‘किरण’ के 1800-599-0019 (24/7 टोल फ़्री)नंबर पर कॉल करीं.

मारीवाला हेल्थ इनीशिएटिव, पारी के पूरा देस में चल रहल जलवायु बदलाव आ मानसिक सेहत पर बनावल सीरिज के सहारा दे रहल बा. एह सीरिज में खोज कइल जाई कि मौसम के बदलत मिजाज से गांव के लोग आ सहर में रहे वाला मजूरन के दिमागी, शारीरिक आ रोजी-रोटी पर का असर डालता.