“ಈ [ಬಟ್ಟೆಗಳಿಗೆ ಹಾಕಿದ] ನೈಸರ್ಗಿಕ ಡೈಯನ್ನು ಹರಿಯುವ ನೀರಿನಲ್ಲಿ ತೊಳೆಯಬೇಕು. ಯಹಾನ್ ಪೇ ತೊ ಹಾತ್ ಧೋನೆ ಕ ಪಾನಿ ನಹೀ ಮಿಲ್ತಾ [ಇಲ್ಲಿ ಕೈತೊಳೆಯಲೇ ನೀರಿಲ್ಲ]!” ಎಂದು ಅಬ್ದುಲ್ ಹಲೀಮ್ ಹೇಳುತ್ತಾರೆ.
ಹಲೀಮ್ ಅವರು ಮೂರನೇ ತಲೆಮಾರಿನ ಬ್ಲಾಕ್ ಪ್ರಿಂಟಿಂಗ್ ಕುಶಲಕರ್ಮಿ. ಒಂದು ಕಡೆ ಸರಿಯಾಗಿ ಆದಾಯವೂ ಬಾರದೇ, ಇನ್ನೊಂದು ಕಡೆ ನಕಲಿ ಉತ್ಪನ್ನಗಳ ಹಾವಳಿಯೂ ಹೆಚ್ಚಾಗಿ, ಇವರು ತಮ್ಮ ವರ್ಕ್ಶಾಪ್ ಅನ್ನು ನಡೆಸಲು ಕಷ್ಟಪಡುತ್ತಿದ್ದಾರೆ. ಇಂದೋರ್ ನಗರದಲ್ಲಿ ನೀರಿಗೆ ತತ್ವಾರ ಎದ್ದಿರುವಾಗ, ಕೈಗಳಿಗೆ ಮೆತ್ತಿದರೆ ಸುಲಭವಾಗಿ ಹೋಗದ ಡೈಯನ್ನು ಬಳಸದೆ ಇವರಲ್ಲಿ ಬೇರೆ ದಾರಿಯಿಲ್ಲ.
ಬ್ಲಾಕ್ ಪ್ರಿಂಟಿಂಗ್ ಪ್ರಕ್ರಿಯೆಯು ಮರದ ತುಂಡಿನಿಂದ ಅಚ್ಚನ್ನು ತಯಾರಿಸುವ ಮೂಲಕ ಆರಂಭವಾಗುತ್ತದೆ. ಹಲೀಮ್ ಅವರು ತಮಗೆ ಬೇಕಾದ ವಿನ್ಯಾಸಗಳನ್ನು ತಯಾರಿಸಿ, ಅವುಗಳನ್ನು ಜೈಪುರ, ಫಾರುಖ್ಬಾದ್ ಮತ್ತು ಫತೇಪುರದ ಅಚ್ಚು ತಯಾರಕರಿಗೆ ಕಳುಹಿಸುತ್ತಾರೆ. ಇವರು ಅಚ್ಚಿನ ಬ್ಲಾಕ್ಗಳನ್ನು ತಯಾರಿಸಲು ಸಾಗುವಾನಿ (ಟೀಕ್) ಅಥವಾ ಶೀಶಂ (ಬೀಟೆ) ಮರದ ತುಂಡುಗಳನ್ನು ಬಳಸುತ್ತಾರೆ.
ಈ ಬ್ಲಾಕ್ಗಳನ್ನು ಬಣ್ಣದಲ್ಲಿ ಅದ್ದಿ, ಬಟ್ಟೆಯ ಮೇಲೆ ಅಚ್ಚು ಹಾಕುತ್ತಾರೆ. “ಇದು ನಮ್ಮ ಪರಂಪರೆಯ ಒಂದು ಭಾಗ,” ಎನ್ನುತ್ತಾ ಹಲೀಮ್ ಅವರು ಅಳಿಸಲಾಗದ ಬಣ್ಣದಿಂದ ಯಾವುದೇ ಕಳೆ ಉಂಟಾಗದಂತೆ ಎಚ್ಚರಿಕೆಯಿಂದ ಚಂದೇರಿ ದುಪ್ಪಟ್ಟವೊಂದರ ಮೇಲೆ ಪಿಂಕ್ ಬಣ್ಣದ ಗುಲಾಬಿಗಳನ್ನು ಮುದ್ರಿಸುತ್ತಿದ್ದರು. ಬಟ್ಟೆಯ ಮೇಲೆ ಬಳಸುವ ಮೊದಲು ಆ ಬಣ್ಣದ ಮಿಶ್ರಣವನ್ನು ಸೆಣಬು, ಮುಲ್ಮುಲ್ ಹತ್ತಿ ಮತ್ತು ಸೊಳ್ಳೆ ಪರದೆಯನ್ನು ಬಳಸಿ ಸೋಸಿ ತೆಗೆಯಲಾಗಿದೆ. 72 ಗಂಟೆಗಳಿಗೂ ಹೆಚ್ಚು ಸಮಯವನ್ನು ತೆಗೆದುಕೊಳ್ಳುವ ಡೈ ಮಾಡುವ ಕೆಲಸದ ಮೇಲೆ ಹವಾಮಾನ ಪರಿಣಾಮ ಬಿರುತ್ತದೆ, ಅದರಲ್ಲೂ ಮಳೆಗಾಲದಲ್ಲಿ ಈ ಕೆಲಸ ತುಂಬಾ ಕಷ್ಟ.
