‘इहाँ हमर कुछु नइ चलय’

पिंयर रंग के तिरपाल मं तुरते टोरे चेरी के ढेरी लगे हवय, तीर मं साठ बछर के दूनों सियान भाई अब्दुल सलाम खान अऊ नसरुल्लाह खान पालथी मारके बइठे हवंय, अऊ भारी जतन ले फर मन ला निमारत अऊ छांटत हवंय. सूरुज के अंजोर तिरपाल ऊपर परत हवय, अऊ ओकर धाज वो मन के थके-हारे चेहरा ला उजियार करत हवय, काबर के ये बखत बछर के कठिन सीजन सिराय बर आवत हवय.

उनका वो मन के फर के बगीचा बनेच छोटे हवय, मुस्किल ले 25 डिसमिल मं, जेन ह सेंट्रल कश्मीर के गांदरबल जिला के सोराफ रा गाँव मं हवय.

“ ये साल ह भारी मुस्किल के रहे हवय,” जून के सुग्घर बिहनिया अब्दुल सलाम कहिथे. 65 बछर के सियान अब्दुल सलाम ह आगू बतावत जाथे, “हमन 40 बछर ले जियादा बछर ले ये काम करत हवन, फेर अइसने मऊसम पहिली कभू नइ देखेंय. मऊसम अऊ सैलानी मन के कमी, दूनों मिलके हमन ला भारी नुकसान पहुंचाय हवंय.”

ये बछर के सुरु मं, पठान समाज के खान भाई मन सोराफ रा मं अलग-अलग जगा मं दू एकड़ चेरी के बगीचा ठेका मं ले हवंय. ये गाँव श्रीनगर ले करीबन 17 कोस दूरिहा भंडार दिग मं हवय, अऊ ओकर घर गोटली बाग ले करीबन 12 कोस दूरिहा मं हवय.

परिवार के लोगन मन अऊ बनिहार मन दूनों मिलके फर टोरिन, फेर महीनों के मिहनत के बाद घलो लेवाल मिलत नइ यें.

जम्मू अऊ कश्मीर के बागवानी विभाग के मुताबिक, कश्मीर घाटी मं हरेक बछर 23,000 मीट्रिक टन चेरी के उपज होथे. सिरिफ गांदरबल मं करीबन 9,000 मीट्रिक टन चेरी होथे- जे ह कुल उपज के 39 फीसदी आय. गांदरबल जिला मं करीबन 5,000 किसान अपन गुजारा बर इहीच फसल के भरोसे हवंय.

सिंध नदी के पार मं बसे सुग्घर गाँव सोराफ रा, ऊंच पहाड़ मन मं चेरी के बगीचा सेती जाने जाथे. इहाँ के ठंडा मऊसम सेती, चेरी आने जगा के बनिस्बत ढेरिया के पाकथे, जेकर ले ये ह सीजन के आखिरी फसल होथे.

मई अऊ जून के महीना मं, सोराफ रा जवेइय्या रोड के दूनों पार मं दर्जनों ठेला लग जाथें, जिहां तुरते टोरे चेरी अऊ आलूबुखारा बेचे जाथे. ये बछर, ये ठेला मन मं बनेच कम लेवाल आइन.

अब्दुल सलाम कहिथे, “हमन ये सीजन मं 10 ठन चेरी के बगीचा ठेका मं लेय रहेन, हरेक बगीचा करीबन 2 ले 3 कनाल (एक कनाल 0.125 एकड़ होथे, ते पायके तहक के बगीचा एक चौथाई धन एक तिहाई एकड़ रहिस), अऊ हमन हरेक बगीचा बर 30,000 रूपिया देय रहेन.रुख मन भारी फूले रहिस, अऊ हमन ला बढ़िया फर के आस रहिस.” येकर जगा, हमन ला हरेक बगीचा मं 20,000 रूपिया के नुकसान होवत हे, कुल मिलाके 2 लाख रूपिया के झटका लगिस. “ सबले बड़े चिंता येकर हवय के काय हमर लगाय खरचा वसूल होय सकही.”

ये बछर बागवानी मं आय गिरती कतको बिपत के एके संग आये सेती होय हवय.

अप्रैल 2025 मं पहलगाम मं होय आतंकी हमला मं 26 लोगन मन के जान जाय के बाद, जम्मू-कश्मीर के कारोबार के मेरखूंटा माने जवेइय्या टूरिज्म इंडस्ट्री मं भारी खराब परे हवय.

अब्दुल सलाम कहिथे, “हमर कारोबार मं अक्सर 70 फीसदी सैलानी मन होथें. वो मन के बगेर, सीजन काम के नइ लगय.”

ये सीजन के नुकसान कतको दिक्कत के लिस्ट मं नवा होही. अब्दुल सलाम धीरे ले कहिथे, “बीते चार बछर मं, बेबखत के करा अऊ पानी ह रुख मं लगे फर मन ला नुकसान करे हवय.”

कश्मीर मं चेरी के बगीचा अक्सर खान जइसने ठेकेदार मन ला ठेका मं देय जाथे, जेन मन बढ़िया सीजन मं भरपूर मुनाफा कमाथें, फेर ये बछर जइसने खराब सीजन मं वो मन ला भारी नुकसान उठाय ला परथे. अब्दुल सलाम कहिथे, “हमन फर के अंताजा, फुलाय ले लगाथन, फेर हरेक बखत रिस्क लगे रहिथे.”

चेरी के फसल भारी बखत मुताबिक होथे. रुख मं अप्रैल अऊ मई मं फर धरथे. ये महीना मं बेबखत करा-पानी गिरे ले फसल ला भारी नुकसान होइस. चेरी नाजुक फर आय, अऊ खराब मऊसम ले फर दागी हो गीस. गांदरबल के किसान मन के कहना आय के दागी फर के बजार मं कोनो दाम नइ मिलय.

कश्मीर मं बागवानी के क्षेत्र बर साल 2025 भारी मुस्किल ले भरे बछर रहिस.सितंबर मं, जेन बखत कश्मीर मं सेब टोरे के सीजन होथे, पुलवामा, शोपियां अऊ बारामूला मं भारी बरसा ले बाग बगीचा अऊ धान के खेत पानी मं बूड़ गे रहिस, जेकर ले बनेच नुकसान होइस, रोड-रद्दा बंद होगे अऊ आवाजाही बंद होगे. कतको ट्रक कतको दिन तक ले फंसे रहिगे, जेकर सेती किसान मन ला दीगर -अऊ खरचा वाले- रद्दा मं जाय ला परिस .

चेरी के किसान, जेन मन पहिलीच ले फर के जियादा दिन नइ ठहरे सेती हलाकान रहिन, वो मन ला सबले जियादा नुकसान होइस.पहिली जेन एक ठन बक्सा 200 रूपिया मं बिकावत रहिस, जून 2025 मं 60 ले 80 रूपिया मं मिलत रहिस. अब्दुल सलाम कहिथें, “ ये तो खातू अऊ दवई छिंचे के खरचा ले आधा घलो नइ रहिस. हमर अधिकतर फर बक्सा मं बक्सा मं बिन बिकाय परे हवय, अऊ कुछेक दिन मं वो ह खइता हो जाही.”

गांदरबल ले सोनमर्ग जवेइय्या रोड, जेन घूमे के नामी जागा आय, चेरी के ठेला मन मं बिन बिकाय बक्सा रखाय हवंय.

30 बछर के अख्तर खान कहिथें, “मंय दिन भर मं तुरते टोरे चेरी के 30-40 बक्सा बेचत रहंय, फेर पहलगाम के घटना के बाद ले, मंय मुस्किल ले 5-10 बक्सा बेच पावत हवंव, वो ह घलो लोकल ग्राहेक मन ला. घाटी मं कोनो सैलानी नइ यें. कोनो अपन जान जोखम मं डारके इहाँ काबर आय ला चाही?”

सरकार के मुताबिक, साल 2024 मं जम्मू-कश्मीर अवेइय्या सैलानी मन के संख्या रिकॉर्ड 2.36 करोड़ तक हबर गे रहिस.

गांदरबल के वाईल गाँव के बासिंदा अख्तर, सड़क –इमारत बनाय के जगा मं मजूरी करथे, चार परानी के अपन परिवार के पेट पालथे – ओकर सुवारी, दू बछर के बेटा अऊ नौ बछर के बेटी. मई अऊ जून मं चेरी टोरे के सीजन मं, वो ह गांदरबल जिला के वोस्सान इलाका मं रोड के बाजू मं चेरी घलो बेचथे.

अख्तर ये सीजन मं अपन कंस्ट्रक्शन के बूता करे बर जाये ले बचत हवय. वो ह कहिथे, “मंय एक झिन ठेकादार ले चेरी के 4,000 बक्सा मंगवाय हवंव, चाहे मंय वो ला बेचे सकों धन नइ.” ओकर किस्मत बढ़िया रहिस के, वो ठेकादार ह, जेन ह किसान अऊ फर बेचेइय्या मन के दलाल रहिस, श्रीनगर के थोक बजार मं बिकवाय मं ओकर मदद करिस. अख्तर कहिथे, “गर वो ह मोर मदद करे नइ रइतिस, त मोर उपर कतको लाख के करजा चढ़ जातिस.”

अख्तर के जइसने, गांदरबल ले सोनमर्ग तक के करीबन 17 कोस (50 किमी) के रद्दा भर मं, दर्जनों ठेला मालिक ग्राहेक मन ला अगोरत रहिथें.

ये सब्बो ठेला मं रहे लोगन मन मानथें के सैलानी मन के आय के कमी सेती वो मन के कारोबार मं भारी खराब असर परे हवय. ये धंधा मं सिरिफ उहिच मन ला फरक नइ परिस जेन मन बगीचा के मालिक आंय अऊ रुख फूलेच के बाद अपन फसल बेच देथें.

ठेका के रकम अऊ बगीचा के देखरेख के संगे संग, किसान मन ला बिक्री के चिंता ला छोड़ मजूरी के खरचा उठाय ला परथे. अब्दुल सलाम कहिथे, “हमन बनिहार मन ला 600 रूपिया रोजी देथन, भले ये बछर टोरई सुस्त हवय, ओकर बाद घलो मोला पूरा रोजी देगे ला परथे. गर फर बढ़िया हवय, त एक झिन बनिहार दिन भर मं 10 बक्सा टोर सकथे. खराब होय के बाद टोरे मुस्किल हो जाथे. गर हमन ला दिन भर मं पांच बक्सा घलो मिल जाय त हमर किस्मत बने आय.”

खान भाई चेरी के कतको किसिम लगाथें, जेन मं अवल नंबर (गुइग्नेपौपेरा प्रीस), डबल (बिगारो नेपोलियन), मखमली (गुइग्ने नोइर हैटिव) अऊ मिसरी (बिगारो नोइर ग्रोसा) हवंय. अब्दुल सलाम बताथें, “मिसरी ह एक ठन अइसने किसिम आय जेन ला हमन बहिर भेजे सकथन काबर के ह बने दिन तक ले रहे सकथे, खराब नइ होय. बाकी किसिम मन ला हमन ला इहींचे के बजार मं बेचे ला परथे.”

खान भाई मन अपन फर के दाम तय करे नइ सकंय, काबर के मंडी (थोक बजार) मं बेपारी मन रेट तय करथें. अब्दुल सलाम कहिथें, हमन चेरी ला बक्सा मं पठोथन, अऊ जब वो ह मंडी हबर जाथे, त बजार के हालत अऊ फर के गुन के मुताबिक रेट तय करे बेपारी मन के भरोसे रहिथे.” वो ह कहिथे,” इहाँ हमर कुछु नइ चलय.”

अतक कतको मुस्किल के बाद घलो, वो ह हिम्मत हारत नइ ये. “ये कारोबार कभू आसान नइ रहिस. ये बछर, एकेच संग सब्बो कुछु गलत होगे – मऊसम, बजार अऊ सैलानी मन के कमी. फेर हमन अपन काम-बूता करत रहिथन काबर के इही हमर रोजी-रोटी आय,अऊ हमन ला बस इहीच आथे.”

येकहिनी पारी सीनियर फेलोशिप 2025 के मदद ले लिखे गे हवय.

अनुवाद: निर्मल कुमार साहू