सेल्फी ना, सल्फी ले ल बबुआ!

“हम इहंवा का कर रहल बानी? अरे, लगहीं त हमार घर बा,” सुखराम कुमेटी कहलन आ कोई 200 मीटर दूर आपन घर देखावे लगलन. अपना के साठ बरिस के माने वाला परदादा, सुखराम रोड किनारे एगो गाछ के झरझर छांह में पत्थर पर बइठल बाड़न. उनका लगे एने-ओने रखल सामान सब देख के हमनियो के उत्सुकता जागल.

उहंवा एगो 20 लीटर वाला कनस्तर रखल रहे, जेकरा में उज्जर रंग के कवनो पिए वाला पदार्थ लउकत रहे. लगहीं एगो पुरान, खूब मजबूत बाल्टियो रखल रहे, जेकरा में पानी रहे. ओह में पिलास्टिक के रंग-बिरंगा मग्गा सब तइरत रहे. भूइंया पर रखल लाल रंग के पिलास्टिक के गिलास के अलावे, उहंवा दू गो मगो रहे. एगो रंग उतरल गुलाबी मग कनस्तर में टिकावल रहे, आ दोसरका बुल्लू आ लाल रंग के मग हरियर बाल्टी में रहे.

ई कोडोली बा. जदि रउआ नारायणपुर जिला मुख्यालय से गाड़ी से आवत बानी, त छत्तीसगढ़ के बस्तर के अबूझमाड़ इलाका में घुसते दोसरका गांव, कोडोली पड़ी.

सुखराम चच्चा तनी हड़बड़ात, बतावे के कोसिस करत बाड़न कि ऊ का करेलन. आपन टोली में एगो हमहीं बानी जेकरा पल्ले कुछो ना पड़ल.

“सल्फी, सल्फी...” हमार मुरखई पर ऊ आंख मटकावत कहलन. हम अपना दुनो लगे जे कैमरा रहे, ओकरा देखे लगनी. बाकिर ऊ हमरा के सेल्फी लेवे के ना कहत रहस.

“ऊ बस्तर के बीयर, सल्फी बेचत बाड़न,” एके इलाका से आवे वाला केशव शोरी तनी गर्व से कहलन. यात्रा वृतांत लिखे वाला लोग सल्फी के नरियर वाला पानी जइसन हल्का पेय बतावेला. बाकिर ई ओकरा जइसन मीठ ना होखे. हम त समझनी कि कनस्तर में महुआ बा, उहे त हर जगहा देखे के मिलेला.

“हमरा रोज 200 से 400 रुपइया के कमाई हो जाला. हमरा लगे सल्फी (कैरियोटा यूरेन्स- ताड़ प्रजाति) के 20 ठो गाछ बा,” ऊ बतइलन. पुरुषोत्तम कहलन कि तब त रउआ जमींदार भइनी. ई सुनके ऊ ठहाका मार के हंसे लगलन.

उनका उम्मेद बा कि नारायणपुर के मावली मेला से लउटे घरिया ढेरे लोग आज सांझ के सल्फी पिए आई. ई मेला मावली माता के पूजा खातिर लागेला. इहंवा जुटे वाला भक्त लोग आदिवासी समुदाय के अलग-अलग जात जइसे अबूझमाड़ी, गोंड, हल्बा, मुरिया आ माड़िया से होखेला.

सुखराम चच्चा बतकही रोक के, मोटरसाइकिल पर आइल आपन एगो ग्राहक के देखे लगलन. ऊ आदमी एक लीटर वाला हरियर बोतल में सल्फी के रस लेवे आइल रहे. एक गिलास के दस रुपइया के हिसाब से बोतल के दाम जादे रहे. ग्राहक, रोहित नाथ मग से आपन बोतल में सल्फी ढारत हमनी से बतावे लगलन, “गरमी खातिर ई नीमन बा.” बाकिर साथही ऊ इहो सलाह देलन, “गरमी जादे होखे, त मत पीह.” तबहिए उनकर हाथ हिले से तनी सल्फी छलक के नीचे गिर जात बा. चच्चा के आंख देखावते आ दू-चार कड़ुवा बोली सुनावते रोहित के सिट्टी-पिट्टी गुम हो गइल, डरे मुंह लटक गइल.

चच्चा के अइसन बरताव देख के त हमनी सोच में पड़ गइनी. काहेकि हमनी त इहे जानत रहीं कि गांवे के मुरिया गोंड लोग मीठ बोले आउर अदब वाला मानल जाला. बाकिर ई सुखराम चच्चा त मुंहफट निकललन, आ कबो-कबो त भड़कियो जातारन. चच्चा लड़ाई-झगड़ा बढ़े चलते ऊपर के इलाका से जंगल-पहाड़ त्याग के इहंवा आ के बस गइल रहस. उनकर पुरान ठिकाना में आज हिंसा आउर बढ़ गइल बा. माओवादी लोग के खिलाफ सरकार के जबरदस्त अभियान चल रहल बा. आम लोग एह में पिसा रहल बा.

कोडोली में माहौल एकदम शांत बा. चच्चा के जादे बोले के कारण बुझा गइल रहे. हल्का नसा वाला सल्फी बेचत-बेचत, बीच-बीच में एकरा उहो तनी-मनी चिख लेत रहस. हमनी से बिदा होखे घरिया ऊ दांत चियारे लगलन, त बुझा गइल कि सल्फी आपन काम कर चुकल बा.

अनुवाद: स्वर्ण कांता