नदिया तीर पियासे गाँव

विंध्य डोंगरी मं बेर बूड़गे हवय, चिरई-चिरगुन मन अपन ठीहा मं लहूट आय हवंय. दमा सस्तिया बर अपन रद्दा धरे के इही बखत हवय. सुगत गाँव मं अपन घर ले, ये किसान पथरा-गिट्टी वाले रद्दा ले होवत कुछेक फर्लांग (एक किमी) रेंगत एक ठन झिरिया तीर जाथे. वो ह सरी रात इहींचे रइही- पानी भरही, अऊ बिहनिया लहूट आही. 50 बछर के दमा बताथे, “रतिहा मं झिरिया ले जियादा पानी निकरथे.”

एक–दू ठन झिरिया के पानी 534 (जनगणना 2011) के आबादी वाले गाँव ला नइ पूरय. बिहनिया-बिहनिया, सुगत के लोगन मन अपन पानी के जगा (डब्बा) धरे अऊ गधा संग नुहाय अऊ पानी लाय बर डोंगरी के तरी नर्मदा नदी तीर जाथें. ये काम संझा घलो करे जाथे अऊ बासिंदा मन हरेक दिन पानी बर तीन घंटा खपा देथें जेन मं नुहाय, धोय अऊ पानी भरे रहिथे. देस (भारत) के संविधान मं पानी के हक ला जिनगी के हक के हिस्सा बताय गे हवय, जेकर ले ये ह मानवाधिकार ला लांघे आय.

नदिया ले सबले दूरिहा ठीहा करीबन आधा कोस दूरिहा हवय. पानी लाय, उहाँ के लोगन मन ला डोंगरी ले तरी-उपर आय-जाय मं घंटा भर ले जियादा बखत लाग जाथे. हफ्ता भर मं, ये ह करीबन 15 घंटा रेंगे के बरोबर होथे, काबर के भरे घड़ा धरके उपर चढ़े मं उतरे ले दुगुना बखत लागथे.

बिहनिया-बिहनिया, दमा के बेटा काम संभालथे. ये जवान लइका अपन आठ परानी के परिवार बर पानी के जरकीन (कैन) ढोय बर घर के दू ठन गधा ला लेके जाही. गधा, जेन मन ला ये काम के आदत परगे हवय, ओकर मन के भरोसा हवय के वो अपन आप घर के रद्दा धर लिहीं.

पन्द्रह बछर पहिली, ये अऊ दीगर भीलाला आदिवासी लोगन मन बर पानी के कोनो दिक्कत नइ रहिस. ये लोगन मन सुगत अऊ लकठा के झंडाना गाँव के बासिंदा रहिन, जउन मन नर्मदा अऊ ओकर सहायक नदिया हथनी के पार मं रहत रहिन. पानी भरपूर रहय अऊ बउरे के सुभीता रहिस.

जब नर्मदा नदी उपर बने सरदार सरोवर बांध के सेती गाँव बूड़गे, त सब्बो कुछु बदलगे. साल 2014 के लकठाय बाँध के गेट बंद कर दे गीस, जेकर ले मध्यप्रदेश के करीबन 200 गाँव डूबान मं आगे, जेन मं सुगत अऊ झंडाना घलो रहिस. नदी ह गाँव के लोगन मन के खेत ला लील गीस. जउन मन आने जगा जाय नइ सकिन धन दीगर जगा नइ गीन, जइसने दमा अऊ ओकर परिवार, वो मन ला विन्ध्य डोंगरी मं उपर जाय ला मजबूर होय ला परिस, जिहां पानी नइ ये, बिजली नइ ये अऊ कोनो पक्का रोड नइ ये.

दमा कहिथे, “हमन देखेन के तीर-तखार के लोगन मन घर बनाय बर ईंटा अऊ रेती गधा ले ढोवत रहिन. येला देखके हमन ला पानी दोहारे बर गधा पोसे के बिचार आइस.” अब सुगत मं हरेक घर मं एक ठन गधा हवय जेन ला पानी दोहारे ला सिखाय गे हवय. सुगत के बासिंदा राजू सोलंकी बताथें के जइसनेच मालिक ह जुच्छा जरकीन ला लादथे, गधा नदिया के रद्दा धर लेथे.

जब वो मन पानी तीर रहत रहिन, त दमा अऊ ओकर परिवार करा पांच एकड़ जमीन रहिस. अब वो मन ला दू तीन एकड़ खेत मं गुजारा करे ला परथे, जेन मं चार भाई के हक हवय. दमा कहिथे, “हमन बाजरा, जुवार, जोंधरा, मूंगफली, उरीद, भदी, राहेर कमावत रहेन.”

वो मन ये बखत घलो उहिच फसल कमाथें, सोयाबीन अऊ मूंगफली बेचके करीबन 20,000 रूपिया कमा लेथें. लुवई के सीजन मं, ओकर बेटा नानिया अऊ ओकर घरवाली खेत मन मं बूता करे बर गुजरात चले जाथें. येकर ले वो मन ला दू महिना के मजूरी 30,000 रूपिया अऊ मिल जाथे.

सुगत गाँव के बासिंदा 59 बछर के सियान गोबा सस्तिया कहिथे, “ हमन अपन आंखी मं अपन खेत मन ला बूड़त देखे हवन. ये भारी दुख के बखत रहिस.” संझा के बखत हवय, अऊ पानी के काम सिराय के बाद, गोवा अऊ गाँव के आने मइनखे मन डोंगरी उपर जुरे हवंय. वो मन उहाँ ले नदी ला देख सकथें.

अलीराजपुर जिला के पतझर अऊ सदाबहार जंगल मं बसे सुगत तक हबरे के सबले आसान रद्दा हवय हथनी नदी (नर्मदा की एक सहायक नदी) ला डोंगा ले पार करके नर्मदा नदी के संगम तीर जाय. सुगत के बासिंदा नर्मदा नदी मं तब तक ले जावत रहिथें जब तक वो मन पार मं झन हबर जायें अऊ ओकर बाद उपर डहर चढ़े सुरु करथें.

नर्मदा जल विवाद ट्रिब्यूनल (एनडब्ल्यूडीटी) ला भारत सरकार ह साल 1969 मं बनाय रहिस, अऊ 10 साल बाद ये ह एक ठन पुनर्वास अऊ पुनर्स्थापन पैकेज के सिफारिश करिस, जउन मं कहे गे रहिस के हरेक विस्थापित मइनखे अऊ ओकर बालिग बेटा मन ला ओकर अपन राज धन गुजरात मं दू हेक्टेयर सिंचित (अपासी वाले) जमीन देय जाही अऊ वो मन ला बसाय जगा मं घर अऊ दीगर सुविधा मन घलो देय जाही.

नर्मदा मं बड़े बांध बनाय के खिलाफ़ लड़ई मं सबले आगू रहेइय्या अऊ बस ऑपरेटर पारसमलजी करनावत कहिथे, “अइसने लगिस के जइसने हमर मुड़ उपर पहाड़ गिर गे होय.” वोला सुरता हवय, साल 1978 मं एनडब्ल्यूडीटी) के अंतरिम रिपोर्ट मं कहे गे रहिस के वो मन 455 फीट ऊंच बांध बनाहीं. मध्य प्रदेश मं 193 गाँव बूड़ जाही.” साल 1979 मं आखिरी फइसला के बाद, वो मन मध्य प्रदेश के निमाड़ इलाका मं निमाड़ बचाओ आंदोलन सुरु करिन.

भीलाला आदिवासी गोबा सस्तिया के परिवार ला नदी तीर के ओकर घर ले विस्थापित कर देय गीस. नर्मदा कंट्रोल अथॉरिटी के साल 2020-21 के रिपोर्ट मं बताय गे हवय के मध्य प्रदेश मं 23,000 ले जियादा परिवार उपर सरदार सरोवर प्रोजेक्ट के असर परे हवय, जेन मं एक गाँव पूरा अऊ 177 गाँव उपर थोकन असर परे हवय.

गोबा आगे बताथे, “करीबन 20-25 बछर पहिली, मंय नर्मदा बचाओ आंदोलन के संगवारी मन संग दिल्ली गे रहेंय. उहाँ बनेच अकन लोगन मन रहिन. हमन अपन जमीन के मांग करे गे रहेन जउन ह बांध मं बूड़गे रहिस.”

गोबा कहिथे के ओकर परिवार ला, जेन मं पांच झिन लइका घलो सामिल हवंय, मुआवजा अऊ पुनर्वास के रूप मं गुजरात मं सिरिफ पाँच एकड़ जमीन मिलिस. हमन ला एको पइसा नइ मिलिस,” वो ह अपन ठेंगा ला ठोढ़ी तरी राखत कहिथे. येकरे सेती गोबा ह कहूँ आने जगा नइ जाय के फइसला करिस. “ गर हमन रहे बर आने जगा जाय रइतेन, त हमन अपन समाज ले दूरिहा होगे रइतेन अऊ हमर जिनगी रोजी-मजूरी के भरोसे हो जाय रइतिस. हमन ला जमींदार मन के खेत मं बूता करे नइ भावय,” गोबा कहिथे, जेन ह सुगतेच मं रहिथे.

वो ह पारी ले गोठियावत रहिस, जब वो ह अपन मवेसी मन ला नदिया तीर मं ले जावत रहिस. अप्रैल के घाम तेज हवय अऊ गोबा एक ठन अंजन रुख के छाँव मं सुस्ताय बर बइठ जाथे.

गोबा कहिथे के गुजरात मं मिले जमीन मं, “कोनो दीगर खेती करथे अऊ बदला मं हमन ला बछर भर के 20-25 हजार [रूपिया] देथे. हमन गुजरात येकर सेती नइ गेन काबर के हमर लकठा के रिस्तेदार मन ला दूसर गाँव मं बसाय गे हवय, जेन ह इहाँ ले करीबन 7 कोस दूरिहा हवय. हमन अफसर मन ला उहिच गाँव मं खेत अऊ घर बर जमीन दय के मांग करे हवन.”

जब गाँव मं कोनो बर-बिहाव अऊ कोनो कार्यक्रम होथे, त पूरा समाज जुरथे, सिरिफ तिहार बर नइ, फेर पानी भरे घलो सेती. गोबा कहिथे, “जम्मो गाँव अपन-अपन गधा ला धरके नर्मदा नदी ले पानी भरथे. हमन कोनो कार्यक्रम के हफ्ता भर पहिली पानी भरे सुरु कर देथन. गर कार्यक्रम के दिन पानी सिरा जाथे, त हमन पानी लाय बर अपन गधा मन ला तियार राखे रहिथन.”

नदिया अभू घलो पानी बड़े जरिया आय. फेर ये ह लंबा रद्दा अऊ गरभ धरे माइलोगन मन बर खतरा ले भरे हवय, जइसने के सुगत के बासिंदा गीला सोलंकी ह बताइस. “जब मंय सात महीना के पेट ले रहेंय, त मंय नदिया पानी लेगे बर गे रहेंय. जब मंय लहूटत डोंगरी चढ़त रहंय, त मंय बिछल गेंय. किस्मत बने रहिस के मोला नइ लगिस.”

कुछू अऊ घलो कतको दिक्कत हवंय. बांध के सेती जंगल कटे सेती, भूंइय्या मं पानी जियादा नइ ठहरय; घाम मं झिरिया मन धीरे-धीरे सूखे लगथे. मऊसम मं बदलाव ला कम करे अऊ पर्यावरन तंत्र ला बने करेइय्या बिशेषज्ञ डॉ. राहुल बनर्जी कहिथें के ये ह वन विभाग डहर ले भारी जियादा रुख काटे सेती होथे. वो ह आगू बताथे, “मउसम मं बदलाव सेती, थोकन बखत मं भारी बरसा जइसने मऊसम के कतको घटना होथे. येकर ले माटी कटे अऊ पानी बोहाय बढ़ जाथे, जेकर ले भूंइय्या भीतरी पानी कम ठहरथे अऊ तरी चले जाथे.” (इहाँ ओकर एक ठन इंटरव्यू देखव).

“नवंबर ले जून के बीच (कार्तिक ले जेठ, जब तक ले बरसा नइ होवय) हमन ला पानी के भारी दिक्कत ले जूझे ला परथे,” नायका समाज के 20 बछर के गीला बताथे ( ये समाज ला राज मं अन्य पिछड़ा वर्ग मं राखे गे हवय)

मरद लोगन मन घलो पानी लाय मं मदद करथें. “फेर जब वो मन कमाय चले जाथें, त माई लोगन करा बीमार परे के बाद घलो पानी लाय के छोड़ कोनो रद्दा नइ बांचय,” गीला के सास रैती सोलंकी कहिथे. ओकर बाद वो ह हांसत कहिथे, “हमन सीख ले हवन के गर हपट के गिरगे त तुरते कइसने उठे जाय.”

सुगत के बासिंदा कटिया अऊ सनी सस्तिया बछर के दू महीना खेत मं बूता करे बर गुजरात जाथे. येकर ले वो मन ला 30,000 रूपिया मिल जाथे. कटिया बताथे के बाकी बखत वो मन गाँवेच मं रहिथें, फेर सनी डोंगरी मं सौर बिलजी के उजियार मं रांधथे. ये परिवार करा नानकन सोलर पैनल हवय जेकर ले एक ठन बलब बरथे अऊ वो मन येकर ले अपन मोबाइल ला चार्ज घलो करथें. फेर पैनल अक्सर बिगड़ जाथे.

पानी लाय के काम बर, कटिया अऊ सनी चार ठन गधा पाले हवंय. ओकर मन के तीन झिन लइका आदिवासी लइका मन बर बने रानी काजल जीवनशाला नांव के आवासीय स्कूल मं पढ़थें, जेन ह नदी के वो पार ककराना मं हवय. छुट्टी मं घर आय ले वो मन घलो मदद करथें . भीलाला समाज के ये परिवार ला गुजरात मं पांच एकड़ ज़मीन मिले रहिस, जब बांध बनिस त ओकर गाँव बूड़ गीस. जमीन के बँटवारा तीनों भाई मं होय ला रहिस अऊ कटिया ह उहाँ नइ जाय के फइसला करिस.

गोबा ह विस्थापित बासिंदा मन के बात ला बताइस, “हमर करा पानी,बिजली अऊ रोड के सुविधा नइ ये. ओकर बाद घलो, गाँव हमन ला भाथे काबर के इहाँ हमर खेत खार अऊ समाज हवय.’

अनुवाद: निर्मल कुमार साहू