‘...त मंय पुलिस अफसर बन सकत रहंय’

“गर मोर ददा मोला पढ़ाय रइतिस त मंय पुलिस अफसर बन सकत रहंय,” वो ह चिटहा बरतन भाड़ा अऊ साबुन ले भरे सिंक कोती जाय के पहिली टूटे मन ले कहिथे. ये बखत बिहनिया के 9 बजे हे अऊ वो ह कालोनी के बाड़ा भीतरी रहेइय्या लोगन मन के घर मन मं चले जाही. अनीता दीदी, वो ह कालोनी मं ये नांव ले जाने जाथे जिहां वो घर के काम बूता करथे, वोला अपन घर लहूटे के पहिली अभू घलो पांच ठन अऊ घर के बूता करे ला हवय. उत्तर-पच्छिम हैदराबाद मं नल्लगंडला, जिहां वो ह बूता करथे, ले लकठा के संगारेड्डी जिला के पटानचेरू मं अपन घर लहुटे बर 3 कोस के रद्दा जाय ला परथे.

चार लइका के महतारी 25 बछर के अनीता राठौड़, लम्बाडी समाज ले हवय, जेन ला तेलंगाना मं अनुसूचित जनजाति के रूप मं सूचीबद्ध करेगे हे. वो ह हैदराबाद मं बाड़ा वाले कालोनी मं रहेइय्या लोगन मं के घर मं बूता करेइय्या कतको प्रवासी मजूर मन ले एक आय – एक अइसने शहर जेन ह प्रवासी मजूर मन ला अपन डहर खींच लाय के मामला मं देस के पांच बड़े शहर मं सामिल हवय. लंबा बखत तक ले काम-बूता करे सेती, वोला चल्लगित्ततांडा मं अपन बड़े परिवार मं, लइका मन ला अपन मायका मेनेली मं अपन दाई-ददा करा छोड़े ला परथे, अऊ संग मं अपन कतको साध-सपना ला घलो तियागे ला परथे.

हरेक बिहनिया, ओकर दिन कुकरा बासा (4 बजे) ले रांधे, कपड़ा धोये अऊ झाडू-पोंछा ला सुरु होथे. बिहनिया 5.30 बजे वो ह रंगा रेड्डी जिला के लिंगमपल्ली बर बस मं बइठ जाथे. अऊ उहाँ ले 20 रूपिया मं ऑटो भाड़ा करके 6 बजे नल्लागंडला के बाड़ा वाले कालोनी मं रहेइय्या लोगन मन के घर मं हबर जाथे. तेलंगाना सरकार के महा लक्ष्मी योजना, जेला साल 2023 मं सूरू करे गे हे, राज सरकार के बस मं माइलोगन मन ला फोकट मं ले जाथे, येकर ले अनीता के अवई-जवई के खरचा बांच जाथे.

नौ घंटा बाद, मंझनिया करीबन 3 बजे, कालोनी के कतको घर मं झाड़ू पोंछा करे के बाद, वो ह घर लहूटे लगथे, जेकर ले बखत मं जाके अपन घर बर रांधे सके अऊ घर के दीगर काम बूता निपटा सके.

जब ले वोला सुरता हवय, ओकर घरवाला करा कोनो थिर काम बूता नइ ये. वो ह कहिथे, “वो ह घर के भाड़ा, लइका मन के घर आय ले वो मन के देखभाल धन घर चलाय मं कोनो मदद नइ करय.”

वो हमन ले गोठियावत हवय, अऊ हमन पटानचेरू मं एक ठन साफ सुथरा, संकेल्ला गली के मोड़ मन ले होवत ओकर पाछू चलत हवन जिहां वो ह रहिथे. जइसने-जइसने हमन आगू जाथन, गली ह चाकर अऊ लोगन मन के आवाजाही वाले हो जाथे, नोनी मन बर जिला परिषद के एक ठन बड़े हाइस्कूल के आगू, हफ्ता सब्जी हटरी के आगू, कपड़ा, खिलौना, मिठाई अऊ कतको दूकान के आगू, एक ठन मस्जिद के मीनार के आगू सुन्ना घर मन.

पक्का भिथि अऊ नहानी खोली वाले एक खोली के घर बर अनीता हर महिना 5,000 रूपिया भाड़ा देथे. वो ला पानी अऊ बिजली के अलग से पइसा देगे ला परथे. ओकर खोली के बहिर एक ठन नल हवय जेन मं हर दू दिन मं एक बेर पानी आथे. कभू-कभू, ओकर घरवाला पानी भरथे. थोकन दूरिहा मं एक ठन नानकन मैदान के बहिर कूड़ा कचरा गंजाय हवय. अनीता कहिथे, “लोगन मन इहींचे कचरा फेंक देथें; मुन्सीपाल्टी (नगरपालिका) के कचरा गाड़ी महिना मं सिरिफ एक बेर कचरा उठाय आथे.” वो ह हर महिना कचरा उठाय सेती 100 रूपिया देथे. हरेक महिना ओकर कमई के करीबन 25,000 रूपिया ले दू तिहाई हिस्सा घर चलाय मं चले जाथे.

वो ह कहिथे, “मंय बचपना ले भारी मिहनत ला छोड़ कुछु नइ देखे हवं,” वो ह सुरता करथे के कइसने ओकर ददा ह वोला 5 वीं क्लास मं पढ़े बखत भंइसा चराय पठोवत रहिस. ओकर छोटे भाई मन प्राइवेट स्कूल मं पढ़त रहिन, फेर वोला पढ़ई छोड़े बर मजबूर होय ला परिस. “सब चले जाते तो घर में काम कौन करने बोल के मारे मेरेकु [मोर ददा कहय के सब्बो स्कूल चले जाहू त घर के बूता कोन करही- कहिके मोला मारय],” वो ह अचकचाय हांसत कहिथे अऊ मुंह ला हथेली ले तोप लेथे.

“मंय जब नौ बछर के रहंय भंइसा चराय जाय ला सुरु करेंय. मंय ओकर मन के पीठ मं चढ़ जावत रहंय.” येकर बाद वोला कुसियार के खेत मं बूता करे बर भेज देय गीस. अनिता के छोटे भाई वीना कहिथे, “खेत मं बूता करेइय्या लइका मन एक धन दू महिना मं करीबन 10,000 -12,000 रूपिया कमा लेवत रहिन, सिरिफ अतकाच.” वो ह कहिथे, कुसियार कटई भारी कठिन बूता आय अऊ काम बखत अलहन घलो लागे रहिथे.”

अनीता कहिथे, “हमन दिन मं 15 घंटा बूता करत रहेन, अंधियार होय तक ले घला, अपन हंसिया ले वोला काटके, बीड़ा बांधत रहेन. ओकर बाद हमन वो भारी बीड़ा ला खेत ले होवत रोड तक ले, ले जावत रहेन अऊ ट्रक मन मं लोड करत रहेन.” अपन देह कोती आरो करत वो ह कहिथे,“जब मंय सांटा [कुसियार के ढेंठा] काटत रहंव त मोर हाथ-गोड़ मं लाग जावत रहिस.”

अनिता के भाई कहिथे, “वो बखत तुरते इलाज के दवई-पानी नइ होवत रहिस. गर तंय कहूँ कटा जावत रहय, त वो मन कुसियार के रस डार देवत रहिन धन तुरते चेंदरी बांध देवत रहिन.”

“मंय क्रिकेटर बने ला चाहत रहंय,” वीना कहिथे. “मंय बढ़िया खेलत रहंय अऊ हैदरावाद मं लीग मं घला खेलंय. मोर ददा ह मोला हिम्मत दीस अऊ मोला सलेक्ट घलो कर ले गीस, फेर जब वो मन मोला 10 लाख रूपिया मांगिन त सब्बो खतम होगे.” फेर, अनीता अऊ ओकर तीनों बहिनी मन के उलट, वोला अऊ ओकर भाई मन ला अपन पढ़ई करे बर देय गीस.

अनीता के बिहाव तय होय बखत वो ह मुस्किल ले 12 बछर के रहिस. वो ह कहिथे, “हमर लइका मन के बिहाव जल्दीच कर दे जाथे, नोनी मन के बर-बिहाव 12 धन 13 बछर के उमर मं अऊ टूरा मन के बिहाव 16 धन 17 बछर के उमर मं कर दे जाथे.” “मंय अऊ आगू पढ़े ला चाहत रहंय, फेर मोला अपन सियान मन के बात माने ला परत रहिस. तुमन हमेसा अपन बड़े सियान मन के सुनथो, हय ना? जब मोर बिहाव होइस, त मंय समझे नइ सकत रहंय के काय होवत हे!” वो ह हांसत कहिथे.

अनीता ला सुरता हवय के अपन बिहाव बर ओकर ददा ह दमान ला 14,000 रूपिया अऊ 30 हजार रूपिया के sona के जेवर अऊ दीगर जेवर देगे रहिस. ओकर ससुराल वाले मन ओकर जम्मो सोना बेंच दीन. बिहाव के बाद घला वो ह खेत मं बूता करत रहिस. वो ह कहिथे, “मोर पहिली लइका के जचकी के सिरिफ 20 दिन बादेच. आपरेसन होय रहिस, अऊ मोला कुसियार काटे जाय बर कहे गीस. मोला कतको लइका जन्माय ला परिस काबर के गर लम्बाडी माइलोगन ह बेटा नइ जनिस त ओकर घरवाला वोला छोड़ देथे.”

वो ह कहिथे के ओकर समाज मं माईलोगन मन के खिलाफ अतियाचार आम बात आय. वोला सुरता हवय के ओकर ददा ह अपन पहिली घरवाली के संग अऊ ओकर बाद ओकर दाई के संग, जेन ह ओकर दूसर सुवारी रहिस, के साथ मारपीट करे रहिस. “मोर ददा कभू-कभू भारी दारू पीयय. वो ह दू बेर बिहाव करिस अऊ अपन पहिली सुवारी ला अतक मारिस के वो ह भाग गे. ओकर दूसर सुवारी, मोर महतारी के रेंगे मुस्किल होगे रहिस, काबर के मोर ददा ह वोला भारी मारय.”

अनीता के घरवाला घलो अपन सुवारी संग अइसनेच बेवहार करथे. वो ह कहिथे, “वो ह मोला एको रूपिया घलो नइ देवय अऊ गर मंय ओकर ले कुछु मांगथों, त मोला पीटे ला सुरु कर देथे, इहाँ तक के लइका मन ला घलो.” घरवाला के मदद बगेर चार लइका मन ला पाले-पोसे ओकर बर भारी मुस्किल होवत हे.

कुछेक महिना पहिली, अनीता ला अपन छोटे बेटी के इलाज बर पइसा के जरूरत परिस, जेन ला दिल के बीमारी हवय अऊ वोला डाक्टर के बताय गे स्कैन बर नारायणखेड़ ले कर्नाटक के बीदर ले जाय रहिस. अइसने खरचा बर, वो ह हरेक महिना चिट फंड (बीसी, जेन मं एक ठन मंडली बनाके पइसा जोरे जाथे अऊ जरूरत वाले उठाथे) मं 5, 000 रूपिया जमा करे सुरु करे हवय. वोला भरोसा दे गे हवय के दू बछर के जमा करे के मियाद के बाद, वोला 1,05,000 रूपिया अऊ 15,000 रूपिया बियाज के कमाही.

वोला लागथे के कुसियार के काम घर के काम बूता ले बढ़िया रहिस. वो ह कहिथे, “वो मन हमन ला बयाना देवत रहिन, एक लाख रूपिया ले घला जियादा. गर लइका मन बीमार पर गीन त अचानक खरचा ले सहारा मिल जावत रहिस.” अनिता कभू-कभू वो बूता करे के मन बना लेथे. वो ह कहिथे, “साटा काटने में काम रहता मगर पैसा भी रहता (कुसियार काटे के बूता भारी मिहनत वाले आय, फेर ये मं पइसा घलो मिलथे.”

जब तक ले वो ह अपन गाँव लहूट नइ जावय, तब तक ले वो ह हरेक बिहनिया बस अऊ ऑटो ले हैदराबाद के बड़े लोगन मन के इलाका मं जावत रइही- झाडू-पोंछा करे, बरतन मांजे, अवेइय्या दिन बर.

अनुवाद: निर्मल कुमार साहू