काहे कइल ए बाबूजी दू रंग नीतिया

“बाऊजी पढ़इले रहतन, त आज हम पुलिस अफसर रहतीं,” उनकर आवाज में टीस रहे. ई कहत ऊ सिंक ओरी मुड़ली आ झाग वाला पानी में डूबल जूठ बरतन सब धोए लगली. भोर के नौ बाजल बा, ऊ अब दोसर फ्लैट में पहुंचे के हड़बड़ी में बाड़ी. सोसायटी में अभी पांच आउर घर उनकर रस्ता देख रहल बा. सभे घर के साफ-सफाई निपटइला के बाद हैदराबाद के उत्तर-पस्छिम कोना में पड़ेवाला एह नलगंडला, जहंवा ऊ काम करे आवेली, से संगारेड्डी जिला के आपन गांव पटनचेरू निकल जइहन. दस किलोमीटर के एगो आउर लमहर यात्रा पर.

पच्चीस बरिस के अनीता राठौड़ के चार ठो बच्चा बा. ऊ तेलंगाना राज्य में अनुसूचित जनजाति मानल जाए वाला लम्बाडी समाज से आवेली. हैदराबाद देस के पांच सबले बड़ सहर में से बा, जहंवा मजूरी खतिर भारी तादाद में लोग पलायन करके आवेला. इहंवा के गेट वाला मोहल्ला (सोसायटी/गेटेड कम्युनिटी) सब में काम करे वाला दोसर हजारन प्रवासी कामगार लोग में से उहो एगो बाड़ी. एह काम में अनीता के भोर से सांझ हो जाला, एहि से ऊ आपन परिवार के तांडा (गांव जइसन बस्ती) चलगिड्डा में, आ लरिका लोग के माई-बाऊजी लगे मैनेली गांव में रख आइल बाड़ी. उनकर सपना? ऊ त बीच रस्ते में छूट गइल.

रोज सबेरे मुंह अन्हारे 4 बजे उठके ऊ खाना बनावे, कपड़ा फींचे, आ घर के साफ-सफाई में लग जाली. भोरे साढ़े पांच बजे रंगा रेड्डी जिला के लिंगमपल्ली जाए खातिर बस पकड़े के पड़ेला. बस स्टेसन से बीस रुपइया के ऑटो पकड़ के छव बजे ले ऊ नलगंडला के सोसायटी पहुंचेली. तेलंगाना सरकार के सन् 2023 में सुरु भइल ‘महालक्ष्मी योजना’ चलते रोज के दौड़-धूप में उनका कुछ राहत मिल जाला. एह योजना में मेहरारू लोग के सरकारी बस में टिकट ना लागे. अनीता के रोज आवे-जाए के खरचा कुछ हद ले कम हो जाला.

मोटा-मोटी नौ घंटा खटला के बाद, दुपहरिया के तीन बजे ले ऊ कॉलोनी के कइएक घर में सफाई के काम कर चुकल रहेली. एकरा बाद घर लउटे के यात्रा सुरु होखेला ताकि ऊ समय पर पहुंच के परिवार खातिर खाना बना सकस आ घर के दोसर काम निपटा सकस.

जहंवा ले इयाद बा, उनकर घरवाला कवनो पक्का काम ना करत रहस. “ऊ कवनो तरह के मदद ना करस. ना त घर के किराया देवे में, ना बच्चा सब के संभारे में, ना घर के काम-काज में,” ऊ कहली.

पटनचेरू के साफ-सुथ्थर आ पातर गली में हमनी भीतरी घुसत जात रहीं आ बतियावत जात रहीं. ऊ गली आगू जाके फइल गइल रहे, आउर एकदम भीड़-भाड़ होखे लागल रहे. रस्ता में लइकी लोग के सरकारी स्कूल, हाट बजार, कपड़ा-खिलौना बेचे वाला ठेला, आ मस्जिद के मीनार पार करत आखिर में हमनी एगो शांत बाकिर चहल-पहल से भरल बस्ती में पहुंच गइनी. इहंई उनकर घर रहे.

पक्का देवाल के एगो छोट कोठरी वाला घर, जेकरा में एगो बाथरुमो रहे. अनीता एकरा खातिर महीना के 5,000 किराया देवेली. किराया के अलावे पानी आ बिजली खातिर भी उनका अलग से पइसा देवे पड़ेला. घर से बाहिर बस एगो नल बा जेकरा में पिए वाला पानी हर दू दिन पर आवेला. कबो-कबो उनकर घरवाला पानी भर देवेलन, बाकिर त अक्सरहा अनीते के सब काम-काज संभारे पड़ेला. घर से तनिके दूर एगो छोट मैदान रहे जहंवा कूड़ा-करकट के अंबार रहे. अनीता कहेली, “लोग रोज-रोज इहंवा आके कूड़ा फेंक जाला, कवनो रोक-टोक नइखे. नगर निगम के गाड़ी त महीना में बस एक बेरा आवेला.” सफाई खातिर हर महीना ऊ सौ रुपइया देवेली. पच्चीस हजार के उनकर महीना के कमाई के दू-तिहाई हिस्सा किराया, रासन-पानी, बिजली में निकल जाला.

“होस संभरला के बाद से खटते बानी,” ऊ इयाद करत कहली. लरिकाई में जब ऊ पंचमा में पढ़त रहस, बाबूजी उनका स्कूल के जगहा भैंस चरावे खेत भेज देत रहस. भाई लोग त प्राइवेट स्कूल में पढ़ल, बाकिर उनकर स्कूल छोड़ा देवल गइल. “सब चले जाते तो घर में काम कौन करते बोलके मारे मेरेकू (बाऊजी कहस सभे पढ़हीं चल जाई, त घर के काम के करी, आ हमरा पीट देस),” ई सब इयाद करत उनकर करेजा कुहके लागल. आपन भाव छिपाए खातिर ऊ हंसत हाथ से मुंह झांप लेली.

“नौ बरिस के रहीं, भइंस चरावे लगनी. हम त ओकर सवारियो कर लेत रहीं.” जल्दिए उनका ऊंख के खेत में काम करे भेज देवल गइल. अनीता के छोट भाई बतइलन, “बच्चा लोग के खेत में काम कइला पर महीना-दू महीना पर दस से बारह हजार मिलत रहे. खेत में ऊंख काटे के काम एकदम थका देवे वाला आ जोखिम भरल होखेला.”

“हमनी बेरा डूबला ले, दिन के पंद्रह घंटा काम करीं, दरांती से ऊंख काटीं, गट्ठर बनाईं. फेरु ऊ भारी भारी गट्ठर के उठा के खेत से रोड ले लेके आईं. ट्रक पर लोड करीं,” अनीता बतावत बाड़ी. फेरु आपन हाथ-गोड़ देखावत कहे लगली, “ऊंख काटे से हमार हाथ-गोड़ भी घवाइल हो जात रहे.”

“आपातकालीन सहायता किट (फर्स्ट-एड किट) के बारे में त तब केहू ना जानत रहे. हाथ गोड़ कहूं कटा गइल त ओकरा पर ऊंख के रस ढार देवल जात रहे, चाहे पहिरल कपड़ा में से एगो पातर टुकड़ा फाड़ के पट्टी कर देवल जात रहे,” अनीता के भाई बतावत बाड़न.

वीना कहेलन, “हम त क्रिकेटर बने के चाहत रहीं. बढ़िया खेलत रहीं. हैदराबाद लीग में भी खेल चुकल रहीं. बाबूजी हमर साथ देलन. हम चुनइबो कइनी. बाकिर उहंवा 10 लाख रुपइया मांगल गइल. फेरु त सब खतम हो गइल.” आपन भाई लोग संगे वीना के पढ़ाई जारी रहल, बाकिर अनीता आउर उनकर तीनो बहिन लोग पढ़ाई से बेदखल कर देवल गइली.

इहे ना, अनीता जब मात्र 12 बरिस के रहस, उनकर बियाह कर देवल गइल. “हमनी इहंवा बाल बियाह के परंपरा बा, लइकी लोग के 12 चाहे 13, आ लइका लोग के 16 चाहे 17 बरिस में हाथ पियर कर देवल जाला,” अनीता कहली. “हमरा त खूब पढ़े के मन रहे, बाकिर बड़ लोग के बात सुने के पड़ल. रउरा बड़ के बात सुनही के पड़ेला, ह कि ना? बियाह भइल त हमरा कुछो समझ में ना आइल, का हो रहल बा!” कहत-कहत ऊ हंसे लगली.

अनीता के इयाद बा कि बियाह खातिर बाबूजी उनकर दूल्हा के 14,000 रुपइया नकद आ 30,000 के सोना के कुछ गहना-जेवर देले रहस. ससुराल वाला उनकर सब सोना बेच देलक. उनका बियाह के बादो खेत पर काम करत रहे पड़ल. “आपन पहिल बच्चा के जनम देला के मात्र 20 दिन बाद हमरा से खेत पर ऊंख काटे खातिर जाए के कहल गइल,” ऊ बतइली. “हम बेटा के चक्कर में बहुते बच्चा पैदा कर लेनी, काहेकि लंबाड़ी मेहरारू बेटा ना जनी, त ओकर घरवाला दोसर बियाह कर लेवेला.”

मेहरारू लोग के खिलाफ हिंसा उनकर समाज में रोज के बात बा, ऊ कहेली. उनका इयाद बा बाबूजी कइसे उनकर माई (दोसर घरवाली) आ आपन पहिल घरवाली के रोज मारत-पीटत रहस. “बाबूजी दारू पी के आवस आ खूब झंझट करस. पहिलका मेहरारू के त एतना मरलन कि ऊ घर छोड़ के भाग गइली. माई के भी चलल-फिरल मुस्किल हो गइल रहे.”

अनीता के मरद भी दोसर मरद लोग जइसन बाड़न. “ऊ ना त घर में एक्को पइसा देवेलन, ना कुछ और मदद करेलन. कुछ कह, चाहे मांग त पीटहीं दउड़िहन, बच्चा लोग के भी ना छोड़स,” ऊ कहली. मरद के एको सहारा लेले बिना चार गो लरिका सब के ऊ कइसे पालत-पोसत बाड़ी, उहे जानत बाड़ी.

कुछ महीना पहिले अनीता के छोट लइकी के हार्ट के बेमारी भइल, त इलाज खातिर पइसा के जरूरत पड़ल. इलाज खातिर लइकी के नारायणखेड़ से कर्नाटक के बीदर ले जाए पड़ल. उहंवा डॉक्टर स्कैन करवावे के कहलक. इलाज आ आवे-जाए के खरचा खातिर अनीता हर महीना पांच हजार चिट्टी (चिट फंड) में जमा करेली. उनका कहल गइल बा दू बरिस में एकरा बदले एक लाख पांच हजार आ संगे 15,000 ब्याज मिली. बाकिर का होई, इ त समये बताई.

अनीता के ऊंख के खेत के काम घरेलू काम से नीमन बुझाला. “ऊ लोग हमनी के एडवांस देवेला, केतना बेरा त एक लाख रुपइया से जादे मिल जाला. कोई बच्चा अचानक बेमार पड़ गइल, त ओह घरिया ई पइसा के बहुते सहारा हो जाला,” ऊ कहेली. केतना बेरा अनीता के मन करेला कि ऊ फेरु पहिलका काम पर लउट जास. “सांता (ऊंख) काटे में मिहनत त बा, बाकिर पइसो मिल जाला.”

जबले गांव नइखी लउटत, अनीता के रोज भोरे-भोरे बस, फेरु ऑटो पकड़े के होई, हैदराबाद के पॉश इलाका में आवे के होई, उहंवा बरनत, झाड़ू-पोछा करे, घर चमकावे वाला काम करत रहे के होई.

अनुवाद: स्वर्ण कांता