झूम ॿनियुनि में गाबीअ जो सवादु

“असां जॾहिं कमु कंदा आहियूं त मंझंद जी मानीअ में गाबी ठाहींदा आहियूं,” हारी असीनो म्हीसिएसिनो मेयासे चयो। हल्के मसाल्हनि वारो ॿोड़ु रुॻो मुठि भरि शयुनि मां तियार थिए थो– जेकी सभु नागालैंड जे खोनोमा में मक़ामी उपति आहिनि ऐं पंहिंजी ज़मीन ते कमु कंदड़ु हारियुनि जे पहुच मंझि आहिनि।

36 सालनि जी असीनो पारीअ खे ॿुधाए थी, “कॾहिं कॾहिं असां गाल्हो पिणु ठाहींदा आहियूं,” हू चांवरनि जे हिक ख़ासि खाधे ॾांहुं इशारो कंदे वधीक ॿुधाए थी, जेको ताज़े पतेदार या झंगली भाॼियुनि, मक़ामी मसाल्हनि ऐं दूंहें में पकल सूअर जे गोश्त सां गॾु रधियो वेंदो आहे। “ही अंगामी क़बीलाई बिरादरीअ जो ख़ासि तामु आहे।”

सियारे जी हिक ख़ुशगवार सुबुहु जो असीनो पंहिंजी साहेड़ी उत्सोनो मेरुअ सां गॾु खोनोमा जे झूम ॿनियुनि ॾांहुं वेंदड़ सोढ़े पेचिरे ते हली रही आहे। नागालैंड में जबलनि जी लाहीअ ते आमु तौर ते झूम खेती (मट सट वारी पोख) कई वेंदी आहे। जॾहिं असां अॻिते वधूं था, त ही ॿई साहेड़ियूं ओचितो झूकंदे जंगली साई भाॼी ऐं ॿूटनि जा टुकिरा चूंडण लॻनि थियूं, जॾहिं त ॻाल्हियूं ऐं टहिक बि हलंदा रहनि था। “असां असुलु सभ खां सुठियूं साहेड़ियूं आहियूं,” असीनो चवे थी, “असां गॾु हूंदा आहियूं तॾहिं सभ खां वधीक ख़ुशि हूंदा आहियूं।” इन करे, ही ॿालपण जूं साहेड़ियूं पंहिंजो वक़्तु गॾु तइ करे पंहिंजे झूम ॿनियुनि में कम कनि थियूं।

42 सालनि जी उत्सोनो पंहिंजे हथ में ताज़ो गॾु कयल जड़ी ॿूटियुनि जी मुठ ॾांहुं इशारो करे थी ऐं तेन्यिदी बो॒लीअ में संदनि नाला ॿुधाए थीः गाथा (फ़िश मिंटु/सिमडालू ,हाउटुइनिया कॉर्डेटा ), गागेई (हिमालयन नॉटवीड, कोएनिगिया पॉलीस्टैचिया), खाम्हु (झंगली पेरिला, पेरिला फ्रूटसेंस) ऐं गाक्रा (जावा वॉटर ड्रॉपवॉर्ट, ओएनेंथे जावानिका)।

हूअ समुझाए थी, “असां गाथा ऐं राजा मिर्च मिलाए चटिणी ठाहींदासीं त जीअं गाबीअ सां खाई सघिजे, ऐं बाक़ी सावा ॿूटा गाबीअ में वेंदा जेको कुझु बचंदो, उहो असां पोइ पचाइण लाइ घर खणी वेंदासीं।”

फ़रवरीअ जो पछाड़िको वक़्तु आहे, पूरे खोनोमा में असीनो ऐं उत्सोनो जहिड़ा हारी पंहिंजी झूम ॿनियुनि में पटाटा पोखण में मसरूफ़ आहिनि। कम वारे डिघे ॾींहं ते, हू ॿनियुनि में ई मंझंद जी मानी करण लाइ गॾु थींदियूं आहिनिः “असीं पाण सां गॾु पकल चांवर, सूअर जी चरॿी, किंग चिली, ख़मीरियल सोयाबीन जो पेस्टु ऐं लूणु खणी ईंदा आहियूं, ऐं पोइ वेझो जेके झंगली सावा पन मिलनि उन्हनि सां पचाईंदा आहियूं,” असीनो सुबुहु जो गॾु कयल चइनि क़िस्मनि जे झंगली ॿूटनि खे साफ़ु कंदे चवे थी। ॾिसोः फॉरैजिंग फॉर द डिनर टेबल

ओभर हिमालय में मौजूदु खोनोमा ॻोठ में हल्कियूं ऐं उभियूं लाहियूं आहिनि, जेके घाटे साए ॿेलनि सां ढकियल आहिनि। राज्य पखी, ख़तरे हेठि आयल ब्लिथ्स ट्रैगोपैन हिते मिले थो। ॻोठ में लॻभॻ हर को खेती ॿाड़ी करे थो, ऐं असीनो ऐं उत्सोनो ॿिन्ही वटि अटिकल 50 वर्ग मीटर ज़मीन आहे।

“साल जे जुदा जुदा वक़्त में मुख़्तलिफ़ झंगली भाॼियूं थींदियूं आहिनि, जेतोणीकि बरसातुनि दौरानि इहे सभ खां वधीक हूंदियूं आहिनि। जॾहिं असां वटि ज़रूरत खां वधीक भाॼियूं हूंदियूं आहिनि, त असां गागेई (हिमालयन नॉटवीड, कोएनिगिया पॉलीस्टैचिया ), गाथा (फिश मिंट, हाउटुइनिया कॉर्डेटा), ऐं गान्यान्चु (मिचिंगा, ज़ैंथोक्सिलम रेट्सा) जहिड़ियूं भाॼियूं मक़ामी वापारियुनि खे 10 खां 20 रुपया हर वेड़ी जे हिसाब सां विकिणंदा आहियूं,” असीनो चवे थी।

ॻोठ में 1,943 माण्हू रहनि था (2011 जे आदमशुमारीअ मूजिब), जंहिं जो तालुकु घणोकरे अंगामी क़बीले सां आहे; ॻोठु क़बीलाई बुनियाद ते विरहायल वसंदियुनि में जंहिं खे खेलु चइजे थो अॾियलु आहे। माण्हू तेन्यिदी ॻाल्हाईनि था जेका हिक अहमु तिब्बती-बर्मन भाषा आहे, जंहिं खे अंगामी ॿोली पिणु सॾियो वञे थो ऐं बुनियादी तौर नागालैंड जे कोहिमा ज़िले में 1.5 लख खां वधीक माण्हुनि पारां ॻाल्हाइजे थी।

ज़मीनी बनावत बुनियादी तौर टिनि हिस्सनि में विरिहायल आहे। मथीं लाही ॿेलनि सां ढकियल आहे, जिनि में खोनोमा नेचर कंजर्वेशन एंड ट्रैगोपैन सैंक्चुअरी शामिलु आहे, जेका अटिकल 20 खां 25 चौरसि किलोमीटरनि वारे घाटे झंगल जी हिफ़ाज़ात करे थी। खोनोमा इकोटूरिज्म मैनेजमेंट कमेटीअ सां फ्रीलांस गाइड जे रूप में कमु कंदड़ इलाक़े जे रहवासी खरीबू मेयासे ॿुधायाईं त 1998 में, खोनोमा जे माण्हुनि पंहिंजे नमूने पंहिंजे जंगल जो हिकु वॾो हिसो कम्युनिटी कंज़र्वेशन रिज़र्व तौर अलॻि करे छॾियो, जंहिं करे हुन ॻोठ खे भारत जे पहिरिएं 'ग्रीन विलेज’ (सबज़ ॻोठ) जी मञिता मिली।

विचियूं लाहियूं झमू खेतीअ लाइ आरक्षित आहिनि, जिते असीनो ऐं उत्सोनो जूं ज़मीनूं आहिनि। हिते जा हारी रवायती एल्डर ते ॿधल झूम सिस्टम ते अमलु कनि था, जेको ॿेलाई ज़राअत जो हिकु देसी रूपु आहे, जंहिंखे नाइट्रोजन जज़्बु कंदड़ु एल्डर– अल्नस नेपालेन्सिस, जेको नागालैंड जो राज्य वणु आहे तंहिंखे मट-सट वारी पोख में शामिल कयो वेंदो आहे।

ज़मीन तयार करण वक़्ति वणनि खे कटण बदिरां, हारी वक़्त ब वक़्त उन्हनि खे छांगींदा आहिनि, ऐं ज़मीन खां अटिकल ॿ मीटर मथे मुख्य थुड़ खे कटींदा आहिनि त जीअं नयूं टारियूं फुटी सघनि। असीनो चवे थी, “असां जी ॿनियुनि जे चौधारी एल्डर जा वण लॻभॻ चालीह साल पुराणा आहिनि। कुझु त सौ सालनि खां बि वधीक पुराणा आहिनि।”

ही सिरिश्तो मिटीअ जे ज़रख़ेज़ीअ खे क़ुदिरती तौर ते बहालु करे थो, जंहिं सां रवायती मट सट वारी ज़राअत वांगुरु वॾे अरसे ताईं ज़मीन ग़ैर आबाद छॾण जी ज़रूरत घटि थी वेंदी आहे।

उत्सोनो पारीअ खे ॿुधाइ थी, “वसंत ऐं शुरूआती गर्मियुनि में, असां बुनियादी तौर पटाटा पोखींदा आहियूं, ऐं गर्मियुनि में असां पंहिंजी झूम ॿनियुनि में मकई, ॿाझरी, कदू, खीरो, मिर्च ऐं ॿिया फ़सुल लॻाईंदा आहियूं।

हूअ अॻियां चवे थी, “असां पंहिंजी ज़रूरत पूरी करण खां पोइ जेका बि पैदावार बचे थी सा मक़ामी वापारियुनि खे विकिणंदा आहियूं, जेकी उनखे कोहिमा खणी वेंदा आहिनि।” हुननि औरतुनि जो चवणु आहे त ॿनीअ मां संदनि सालियानी कमाई लॻभॻ 40,000 रुपया आहे। संदनि मुड़ुस बि हारी आहिनि, ऐं हू पार्ट टाईम ड्राईवर तौर बि कम कनि था, ऐं साल में अटिकल 1 लखु कमाईनि था।

“असां वटि चांवरनि जूं ॿनियूं बि आहिनि,” असीनो ॻोठ जे हेठीं लाहीअ ॾांहुं इशारो कंदे चवे थी। हीउ ॾाकणियुनि वांगुरु ठहियल हिस्सा चांवरनि जी पोख लाइ मुक़रर आहिनि। चांवरनि जी लुणाई आक्टोबर धारे थिए थी, ऐं हारी केतिराई रवायती क़िस्म पोखींदा आहिनि, जिनि में चिंबड़ंदड़ चांवर पिणु शामिलु आहिनि। पढ़ो ऐं ॾिसोः चांकी में मिपांमिं जी हिकु दावत

मंझंद जी मानीअ जो वक़्तु वेझो आहे, ऐं उत्सोनो गॾु कयल भाॼियुनि जी सफ़ाई ऐं तियारी पूरी करे वरिती आहे, जॾहिं त असीनो अॻु ई मचु मचाइण में लॻल आहे। हूअ बाहि ते ड्ज़ू (पाणी) जो हिकु वॾो देॻिड़ो रखे थी ऐं हिकु हिकु करे शयूं विझणु शुरू करे थी। पहिरियां छुसी (मिर्च), पोइ मेत्सी (नूणु), उन बैदि ज़ाती (ख़मीररियलु सोयाबीन पेस्टु) ऐं थेवोपी (सूअर जी चरिॿी) विधी वेंदो आहे। जीअं ई पाणी टहिकण लॻे थो, त फ़िज़ा में हिक ख़ुश्बूदार सुॻंध फहिलिजी वञे थी, जंहिं खां पोइ ताज़ा गॾु कयल सावा पन उन में विधा वञनि था।

“उन खे घणी देर ताईं न पचाइणु घुरिजे, न त सावा पन पंहिंजो ज़ाइक़ो ऐं सुॻंध विञाइ छॾींदा,” उत्सोनो वधिणी हलाईंदे चवे थी। जॾहिं भाॼियूं बिल्कुल नरमु थी वञनि थियूं, त हूअ उन मंझि पकल चांवर विझी, देॻड़े खे ढके थी छॾे त जीअं सभु ज़ाइका हिक ॿिए में जज़्ब थी वञनि।

इन दौरानि, असीनो चङे अहितियात सां ख़तरनाकु राजा मिर्च कुटे थी, ऐं पंहिंजे उघाड़नि हथनि सां उन खे छुहणु खां पासो करे थी। ही मिर्चु आसाम जे कुझु हिस्सनि में पंहिंजे तिखी जलन सबब भूत जोलोकिया (जिन मिर्च) नाले सुञातो वञे थो। राजा मिर्च पंहिंजी ख़ौफ़नाक सुञाणप ते पूरी तरह लहे थो। दुनिया जे सभ खां तेज़ मिर्चनि में शुमारु थींदड़ ही मिर्चु केतिरनि ई नागा क़बीलनि जे रधणनि जो हिकु लाज़िमी जुज़ो आहे। “असां हिन खां सवाइ खाधो पचाइण जो तसवुरु बि नथा करे सघूं, असां खे उन जी तिखाण पसंदि आहे।” असीनो मुरकंदी चवे थी। हिन रिपोर्टर खे जुल्द ई समुझ में अचण वारो हो त उन जी तिखाणु असुलु केतिरी ज़बरदस्त आहे।

असीनो निहायत महारत सां बारीक कटियल गाथा (फ़िश मिंटु), ज़ाती (ख़मीरियल सोयाबीन पेस्ट) ऐं लूणु मिलाए हिक बेहद तिखी बाहि जहिड़ी चटिणी तियार करे थी।

ॿिन्ही दोस्तनि ज़ोरु भरियो त असां साणि गॾु मंझंद जी मानी खाऊं। हुन ॿारण काठियुनि मां आरज़ी चिमचा तियार कया, ऐं असां संदनि रधियल ताम जे चौधारी मिड़ी वेठासीं। गाबी सादी ऐं हद खां वधीक ज़ाइक़ेदारु आहे। सूअर जी चरॿी ऐं ख़मीरियल सोयाबीन सां तियार कयल झंगली साग वारो तामु, पंहिंजी क़ुदिरती मिटीअ जहिड़ी ख़ुश्बूइ ऐं सवाद, मछीअ जहिड़ी ख़ुश्बूइ ऐं फ़िश मिंटु तोड़े राजा मिर्च वारी चटणीअ जे तिखे असर सां हिक ज़बरदस्त तवाज़नु पैदा करे थो।

कुझु गिरहनि खां पोइ, मां माठि करे थोरो परे थी वेही रहियसि। मुंहिंजियुनि अखियुनि मां ॻोढ़ा वहण लॻा ऐं मूंखे ओचितो हिॾिकी लॻी। राजा मिर्च मुंहिंजे उमेद खां बि वधीक तिखा ऐं असरदार साबितु थिया। पर पंहिंजी नागा मेज़बाननि आॾो हार न मञणु जो फ़ेसिलो कंदे, मूं पंहिंजी मानी थोरी परे वेही, हिकु हिकु गिरहु खाईंदे ऐं हवासनि खे संभालींदे पूरी कई।

जॾहिं मंझंद जी मानी पुॼाणीअ ते पहुती, त ॿिया हारी ॿनियुनि ॾांहुं वापसि वरण लॻा। ॿिन्ही साहेड़ियुनि चयो, “असां पंहिंजे ॻोठि खां ॿाहिरि जी दुनिया ॾिसणु चाहियूं था, पर असां ॿिए किथे रहण जी कल्पना बि नथा करे सघूं। ही असां जो पंहिंजो घरु आहे।”

रिपोर्टर तेन्यिदी भाषा जे तर्जुमे में मदद करण ते खरीबू मेयासे ऐं रोकोसाटो छूचा जो शुक्राना अदा करणु चाहे थी।