झूम खेत मं गाबी के महक

किसान असिनो सुइसिसिनो मेयासे कहिथे, “जब हमन बूता करत रहिथन, त अक्सर मंझनिया खाय बर गाबी बनाथन.” हल्का मसला वाले ये साग ला बनाय बर बस कुछेक जिनिस के जरूरत परथे, अऊ ये ह नागालैंड के खोनामा इलाका मं सुभिता ले मिल जाथे. खेत मं बूता करेइय्या किसान मन ला ये ह आसनी ले मिल जाथे.

वो ह बतावत जाथे, “कभू-कभू हमन गाल्थो घलो बनाथन.” ये ह चऊर ले बने एक ठन पौष्टिक सागआय, जेन मं तुरते टोरे साग-भाजी, इहाँ के मसाला अऊ मांस ( गाय धन सुरा) डारके येला दलिया जइसने बनाय जाथे. “ये ह अंगामी समाज के खास साग धन पकवान आय,” 36 बछर के असिनो पारी ला बताथे.

हल्का जड़कल्ला के बिहनिया, असिनो अपन मयारू सहेली उत्सोनो मेरू संग खोनोमा के झूम खेत कोती जवेइय्या संकेल्ला/ सांकर रद्दा मं जावत हवय. नागालैंड मं, डोंगरी मन मं अक्सर झूम खेती करे जाथे. रेंगत जावत, ओ दूनों अचानक झुक जाथें अऊ साग-भाजी अऊ रुख मन के कुछेक हिस्सा ला टोरथें, संगे संग गोठियावत, हँसत घलो रहिथें. असिनो कहिथे, “ सिरतोन हमन बढ़िया सहेली आन. जब हमन संग मं होथन, त सबले जियादा खुस रहिथन.” बालपन के ये दूनों सहेली अपन बखत ला अइसने गुजारत, अपन झूम खेत मन मं संग मिलके बूता करथें.

42 बछर के उत्सनो अपन हाथ मं तुरते निकारे जड़ी-बूटी के गठरी कोती आरो करथे अऊ तेन्यिदी भाखा मं ओकर मन के नांव बताथे : गाथा (फिश मिंट, हाउटुइनिया कोर्डाटा), गागी (हिमालयन नॉटवीड, कोनिगिया पॉलीस्टैकिया), खाम्हु (जंगली पुदीना के जइसन पौधा) (जंगली पेरिला, पेरिला फ्रूटेसेंस) अऊ गाकरा (जावा वॉटर ड्रॉपवॉर्ट, ओएनैंथी जावानिका).

“हमन गाथा ला राजा मिर्चा (किंग चिली) के संग चटनी बनाबो जेन ला गाबी के संग खाबो, अऊ बांचे भाजी ला गाबी मं डारबो. जेन कछू घलो बांचही, वोला बाद मं रांधे बर घर ले जाबो,” वो ह बताथे.

फरवरी बीते ला हवय अऊ खोनामा मं असिनो अऊ उत्सनो जइसने किसान अपन झूम खेत मन मं आलू लगाय मं मगन हवंय. दिन भर काम-बूता चले सेती, वो मन खेतेच मं बेरा बखत खाय बर रांधथें: असिनो बताथे, “हमन भात, सूरा के चर्बी, किंग चिली, अमटाय सोयाबीन चटनी अऊ नून संग लेके जाथन अऊ ओकर बाद लकठा मं जेन घलो कुछु मिला जाथे, उही ला रांधथन.” ये बतावत वो ह बिहनिया टोरे गे चार किसम के जंगली साग-भाजी मन ला निमारत रहिथे. देखव: रात के खाय बर जंगली साग-भाजी टोरे

उत्ती हिमालय मं बसे खो नोमा गाँव मं हल्का ढलान अऊ खड़े डोंगरी मन हवंय, ये मन हरियर घन जंगल ले भरे हवंय. इहाँ राज के चिरई, नंदावत जावत 'ब्लाइथ्स ट्रैगोपैन' मिलथे. गाँव मं करीबन हरेक झिन खेती करथें, असिनो अऊ उत्सोनो, दूनों करा करीबन 50 वर्ग मीटर खेत हवय.

असिनो कहिथे, “बछर भर अलग-अलग बखत मं कतको किसम के जंगली साग-भाजी जामथे, फेर बरसात के बखत सबले जियादा मिलथे. जब हमर करा अपन खाय बउरे ले ले जियादा साग भाजी होथे, त हमन गेगी (हिमालयन नॉटवीड, कोएनिगिया पॉलीस्टैकिया), गाथा (फिश मिंट, हाउटुइनिया कॉर्डाटा) अऊ गान्यान्यू (मिचिंगा, ज़ैंथोक्सिलम रेट्सा) जइसने सब्जी मन ला इहाँ के सब्जी बेचेइय्या मन ला 10 ले 20 रूपिया झुरी के हिसाब ले बेच देथन.”

ये गाँव के आबादी 1,943 हवय (2011 के जनगणना मुताबिक), जेन मं अधिकतर अंगामी जनजाति के हवंय: गाँव 'खेल' मतलब कबीला के आधार ले बस्ती मं बंटे हवय. इहाँ के लोगन मन तेन्यिदी भाखा कहिथें – ये ह तिब्बती-बर्मी भाखा परिवार के एक ठन माई भाखा आय, जेन ला अंगामी भाखा घलो कहे जाथे अऊ ये ला खास करके नागालैंड के कोहिमा जिला मं 1.5 लाख ले जियादा लोगन मन कहिथें.

इहाँ के इलाका मन ला मोटामोटी तीन हिस्सा मं बांटे गे हवय. ऊपर के ढलान उपर जंगल हवंय, जेन मं खोनोमा नेचर कंजर्वेशन अऊ ट्रैगोपैन सैंचुरी हवय; ये ह करीबन 20 ले 25 वर्ग किलोमीटर के घन जंगल ला संभाले हवय. खोनोमा के बासिंदा ख्रिएबू मेयासे बताथे के साल 1998 मं, इहाँ के लोगन मन अपन मरजी ले अपन जंगल के एक ठन बड़े हिस्सा ला कम्युनिटी कंजर्वेशन रिज़र्व के रूप मं अलग राखिन, जेकर ले ये गाँव ला देस (भारत) के पहिला 'ग्रीन विलेज' के रूप मं पहिचान मिलिस. मेयासे, खोनोमा इकोटूरिज़्म मैनेजमेंट कमिटी के संग स्वतंत्र गाइड के रूप मं काम करथें.

बीच के ढलान वाले जमीन ला झूम खेती बर राखे गे हवय, जिहां असिनो अऊ उत्सनो के जमीन हवय. किसान पारंपरिक झूम खेती करथें. ये ह एग्रोफॉरेस्ट्री (कृषि-वानिकी) के इहींचे के एक ठन तरीका आय, जेन मं नाइट्रोजन-फिक्सिंग करने वाले एल्डर (एल्नस नेपालेंसिस) – जेन ह नागालैंड के राजकीय रुख आय – ला झूम खेती मं सामिल करे जाथे.

खेत बनाय बखत रुख मन ला काटे के जगा, किसान मन बखत-बखत मं कटई-छंटई करथें. ओ मन रुख के बाढ़ बर जरी ले करीबन दू मीटर उपर बोंग देथें. असिनो कहिथे, “हमर खेत के तीर-तखार मं एल्डर रुख करीबन चालीस बछर जुन्ना हवय. कुछेक त सौ बछर ले घलो जियादा जुन्ना हवंय.”

ये तरीका ह अपन आप फिर ले माटी ला धनहा बना देथे, जेकर ले पारंपरिक झूम खेती मं अक्सर लंबा बखत तक ले खेत ला परिया छोड़े के जरूरत कम हो जाथे.

उत्सनो पारी ला बताथे, “फागुन अऊ घाम के सुरु मं हमन खासकरके आलू कमाथन, अऊ घाम मं हमन झूम खेत मन मं जोंधरा, बाजरा, कोंहड़ा, खीरा, मिर्चा अऊ दीगर फसल कमाथन.”

वो ह कहिथे, “ अपन खाय-बउरे के बाद जेन उपज बांच जाथे, ओला हमन इहींचे के कोचिया मन ला बेच देथन, ओ मन ओला कोहिमा ले जाथें.” माईलोगन मन के कहना आय के खेती ले ओकर मन के बछर भर के कमई करीबन 40,000 रूपिया होथे. ओकर मन के घरवाला घलो किसान आंय अऊ ओ मन संगे संग कुछु बखत ड्राइवरी घलो करथें, जेकर ले ओ मन बछर भर मं एक लाख रूपिया कमा लेथें.

असिनो कहिथे, “हमर तीर धान के खेत घलो हवंय.: वो ह गाँव के तरी के ढलान कोती आरो करथे जिहां सीढ़ीदार खेत मन मं धान कमाय जाथे. धान के लुवई अक्टूबर के लगालगी होथे अऊ किसान मम कतको पारंपरिक किसिम के कमाथें, जेन मं लटलठहा चऊर घलो हवय. पढ़व अऊ देखव : चांकी मं मिपांमिं खाय के नेवता

खाय के बेरा होगे हवय. उत्सनो ह जंगल ले टोर के लाय साग-भाजी मन ला निमार धोके राख ले हवय अऊ असिनो आगि बारत हवय. वो ह चूल्हा मं जू (पानी) भरे एक ठन बड़े गंजी राखथे अऊ एक-एक करके वो मं सब्बो जिनिस डारे सुरु करथे. सबले पहिली चुसी (मिर्चा) डारथे, ओकर बाद मेत्सी (नून), ओकर बाद ज़ाती (अमटाय सोयाबीन चटनी) अऊ थेवोपी (सूरा के चर्बी). जब बरतन के पानी खौले लगथे, त बढ़िया सुग्घर महक बगर जाथे: ओकर बाद तुरते टोरे हरियर साग-भाजी मन ला ओ मं डार दे जाथे.

“एला बनेच बखत तक ले चुरोय ला नइ चाही, नइ त साग के मीठ अऊ महक चले जाथे,” गंजी मं धीरे-धीरे करछुल चलावत उत्सोनो कहिथे. जब साग चुर जाथे त ओ मं भात ला मिला देथे, गंजी ला ढांक देथे अऊ सुवाद ला बढ़िया करके मेंझरे देथे.

इही बेरा मं, असिनो भारी चेत धरे जानलेवा राजा मिर्चा (किंग चिली) काटथे, वो ह ये चेत धरे रहिथे के वो ह ओकर अंगुरी मन ला झन छूवय. भारी झार सेती, असम के कुछेक इलाका मं ये मिर्चा ला भूत जोलोकिया के नांव ले घलो जाने जाथे. राजा मिर्चा अपन डरावना नांव मं खरा उतरथे. दुनिया के सबले झार मिर्चा मन मं एक ये मिर्चा, कतको नागा समाज के रसोई के एक ठन जरूरी जिनिस आय. असिनो मुचमुचावत कहिथे, “हमन एकर बगेर रांधे के सोचे घलो नइ सकन. हमन ला एकर झार भारी भाथे.” ये रिपोर्टर ला तुरते पता चल जाथे के ये ह कतक झार होथे.

असिनो येला बारीक कटे गाथा (फिश मिंट), ज़ाती (अमटाय सोयाबीन चटनी) अऊ नून के संग भारी झार वाले चटनी बनाय बर जतन ले मिलाथे.

दूनों सहेली जोर देथें के हमन ओकर मन के संग खावन. ओ मन लकरी ले काम चलाऊ चम्मच बनाथें, अऊ हमन ओकर मन के रांधे के जगा मं जुर जाथन. गाबी देखे मं त बनेच सधारन लागथे, फेर खाय मं भारी मिठाथे. ये मं जंगली साग-भाजी ला सूरा के चर्बी अऊ अमटाय सोयाबीन चटनी के संग चुरोय जाथे. येकर मटियल स्वाद ला गाढ़ा अऊ मजेदार बनाके बरोबर करे जाथे, जेन मं फिशमिंट अऊ राजा मिर्चा के चटनी ले मछरी पदिना अऊ झार के जोरदार स्वाद घलो मिलथे.

कुछेक कौरा खाय के बाद, मंय कलेचुप थोकन दूरिहा चले गेंय. मोर आंखी ले आंसू बोहावत रहय अऊ हिचकी आय लगिस. राज मिर्चा मोर आस ले जियादा झार वाले निकरिस. फेर अपन नागा नेवता देवेइय्या मन के आगू हार नइ माने ला ठान के, मंय थोकन दूरिहा मं बइठ के खाय ला सिरावंय अऊ धीरे-धीरे अपन आप ला संभाल लेंय.

खाय के बेरा सिराय के बाद दूसर किसान मं खेत डहर लहूटे लगथें. दूनों सहेली कहिथें, “हमन अपन गाँव के बहिर के दुनिया ला देखे ला चाहत हवं, फेर कोनो आने जगा जाके बसे के सोचे घलो नइ सकन. इहीच हमर घर आय.”

रिपोर्टर, तेन्यिदी भाखा के अनुवाद मं हिरदे ले मदद करे सेती ख्रिएबू मेयासे अऊ रोकोसातो चूचा के आभार जतावत हवय.