വൃക്ക വിൽക്കാൻ വേട്ടയാടപ്പെട്ട കർഷകൻ്റെ കഥ

തൻ്റെ ഒരു സാധാരണ സ്മാർട്ട്ഫോണിൽ ഫേസ്ബുക്ക് അക്കൗണ്ടിലെ പഴയ സന്ദേശങ്ങളിൽ പരതുകയായിരുന്നു റോഷൻ സദാശിവ് കുലെ. അപ്പോഴാണ് അയാളുടെ ജീവിതം മാറ്റിമറിച്ച ഒരു നോട്ടീസ് ശ്രദ്ധയിൽപ്പെട്ടത്. തൻ്റെ ദുരനുഭവങ്ങളുടെ രണ്ടാം ഘട്ടത്തെക്കുറിച്ച് പാരിയോട് പറയുകയാണ് റോഷൻ.

മിന്തൂർ ഗ്രാമത്തിലെ സ്വന്തം വീട്ടിലിരിക്കുന്ന റോഷൻ്റെ ചുറ്റും കൂടിയ കുടുംബാംഗങ്ങൾ അസ്വസ്ഥരും കാഴ്ചയിൽത്തന്നെ ക്ഷീണിതരുമായിരുന്നു. അദ്ദേഹം പറയുന്നത് ശ്രദ്ധയോടെ കേൾക്കുന്നുണ്ടായിരുന്നു അവർ. ഞെട്ടലിൽനിന്ന് വിമുക്തമാവാതെ.

2023 ഒക്ടോബറിലെ ഒരു പകൽസമയം 5 മണിക്ക്, വായ്പാസംഘത്തിലെ മൂന്നുപേർ ഒരു കാറിൽ വന്നു. കൈയ്യിൽ ദണ്ഡുകളുമായി അവർ വാതിലിൽ മുട്ടുമ്പോൾ കുടുംബാംഗങ്ങൾ ഉറക്കത്തിലായിരുന്നു. റോഷനെ തെറികൊണ്ട് അഭിഷേകം ചെയ്ത് അവർ തങ്ങളിൽനിന്ന് വാങ്ങിയ പണം മുഴുവൻ തിരികെ തരാൻ ആവശ്യപ്പെട്ടു.

പിന്നീടും അവർ പലപ്പോഴും വന്നു. തങ്ങൾക്ക് 16 ലക്ഷം തരാനുണ്ടെന്ന് അവർ അവകാശപ്പെട്ടു.

എന്നാൽ സഹായം തേടാൻ റോഷന് ആരുമുണ്ടായിരുന്നില്ല. വീട്ടിലെ സാധനങ്ങളെല്ലാം വിൽക്കുകയോ പണയം വെക്കുകയോ ചെയ്തിരുന്നു. ഒരു ജോലി കണ്ടെത്താനുള്ള ശ്രമങ്ങളും വിഫലമായി.

“നിങ്ങളുടെ വൃക്ക വിറ്റ് എൻ്റെ പണം താ,” വായ്പ കൊടുത്ത ആറുപേരിൽ ഒരാൾ ഒരിക്കൽ പറഞ്ഞതായി റോഷൻ ഓർമ്മിച്ചു. “ഇല്ലെങ്കിൽ ഞങ്ങൾ വീട്ടുകാരെ പിടിക്കും,” എന്ന് അവർ ഭീഷണിപ്പെടുത്തി.

വൃക്ക നൽകുന്നവരുടെ ഒരു ഫേസ്ബുക്ക് ഗ്രൂപ്പുണ്ടെന്നും അതിൽ ചേരാനും അയാൾ റോഷനോട് പറഞ്ഞു.

“വൃക്ക വിൽക്കാൻ ആദ്യം എനിക്ക് സമ്മതമുണ്ടായിരുന്നില്ല. എന്നാൽ ഇടയ്ക്കിടയ്ക്കുള്ള വരവും ഭീഷണിപ്പെടുത്തലുമായപ്പോൾ ഞങ്ങളെല്ലാം ഭയന്നുപോയി. ആ ഒരു മാർഗ്ഗത്തെക്കുറിച്ച് ആലോചിക്കാൻ തുടങ്ങി.”

2023 നവംബറിൽ ആ ഗ്രൂപ്പിൻ്റെ പേജിലെ ‘ചേരുക’ എന്ന ബട്ടണിൽ അയാൾ അമർത്തി. ഒരു വാട്ട്സാപ്പ് ഗ്രൂപ്പിലും ചേരാൻ ആവശ്യപ്പെട്ട് അടുത്ത ദിവസം മറ്റൊരു സന്ദേശവുമെത്തി. “എനിക്ക് ആകെ സംശയമായിരുന്നു. പേടിയും. എന്നിട്ടും ഞാൻ മുന്നോട്ട് പോയി,” അദ്ദേഹം പാരിയോട് പറയുന്നു.

ഇപ്പോൾ ആ ഫേസ്ബുക്ക് ഗ്രൂപ്പ് നിലവിലില്ല.

വൃക്ക നൽകുന്നത് പുണ്യപ്രവൃത്തിയാണെന്നും മറ്റൊരു ജീവന് സഹായകമാകുമെന്നും വിശദീകരിച്ചുകൊണ്ടുള്ള സന്ദേശങ്ങൾ തൊട്ടടുത്ത ദിവസങ്ങളിൽ വാട്ട്സാപ്പ് ഗ്രൂപ്പിൻ്റെ അഡ്മിനിൽനിന്ന് വരാൻ തുടങ്ങി. വൃക്കരോഗം ബാധിച്ച ഒരാൾക്ക് പുതുജീവൻ നൽകാൻ അത് സഹായിക്കും. പ്രക്രിയ വളരെ സുരക്ഷിതമാണ് എന്നെല്ലാം അവർ അറിയിച്ചു.

“എന്നെ കടത്തിയ ആളായിരുന്നു പേരില്ലാത്ത ആ അഡ്മിൻ എന്ന് ഇന്ന് ഞാൻ മനസ്സിലാക്കുന്നു, റോഷൻ പറയുന്നു.

ചന്ദ്രപുർ പൊലീസ് പിന്നീട് കണ്ടെത്തിയ ആ ആൾ ഹിമാൻശു ഭരദ്വാജായിരുന്നു. ഇന്ന് ആ കേസിൽ പ്രതി ചേർക്കപ്പെട്ട് ജുഡിഷ്യൻ കസ്റ്റഡിയിലാണ് അയാൾ. വൃക്ക വിൽക്കാൻ റോഷനെ പ്രേരിപ്പിക്കുക എന്നതായിരുന്നു അയാളുടെ പങ്ക്.

വൃക്ക നൽകിയാൽ കിട്ടാവുന്ന പൈസയെക്കുറിച്ചെല്ലാം പറഞ്ഞ് റോഷനെ അയാൾ നിർബന്ധിക്കുകയും പ്രലോഭിപ്പിക്കുകയും ചെയ്യുന്നത് അവർ തമ്മിൽ നടത്തിയ കത്തിടപാടുകളിൽനിന്ന് മനസ്സിലാക്കാം. 8 ലക്ഷമായിരുന്നു വാഗ്ദാനം. സർജറി കഴിഞ്ഞയുടൻ റോഷൻ്റെ ഭാര്യ രോഹിണിയുടെ അക്കൗണ്ടിലേക്ക് പൈസ വരുമെന്ന് അയാൾ ഉറപ്പ് കൊടുത്തു. ഒടുവിൽ ശസ്ത്രക്രിയ കഴിഞ്ഞ്, 2024 ഒക്ടോബറിൽ റോഷന് 7.5 ലക്ഷം രൂപ കിട്ടുകയും ചെയ്തു.

ഇത്രയും കാലം, റോഷൻ ഈ കാര്യം തൻ്റെ കുടുംബത്തിൽനിന്ന് മറച്ചുവെച്ചു. അവരതിന് സമ്മതിക്കില്ലെന്ന് അയാൾക്ക് അറിയാമായിരുന്നു.

“റോഷൻ വൃക്ക വിൽക്കാൻ സമ്മതിച്ചുവെന്ന് ഞങ്ങൾ അറിഞ്ഞതേയില്ല. അറിഞ്ഞിരുന്നെങ്കിൽ ഞാൻ സമ്മതിക്കില്ലായിരുന്നു,” രോഹിണി പറയുന്നു. റോഷൻ്റെ സാമ്പത്തികപ്രശ്നമൊക്കെ അച്ഛന് നന്നായി അറിയാമായിരുന്നു. പക്ഷേ ഇത്തരമൊരു തീരുമാനം റോഷൻ എടുക്കുമെന്ന് അദ്ദേഹവും പ്രതീക്ഷിച്ചതല്ല.

വാട്സാപ്പ് ഗ്രൂപ്പിൽ മറ്റൊരാളുണ്ടായിരുന്നു. ഡോ. കൃഷ്ണ എന്ന പേരിൽ പരിചയപ്പെടുത്തിയ, മാന്യനെപ്പോലെ തോന്നിപ്പിച്ച ഒരാൾ. “നമ്മളെ വിശ്വസിപ്പിക്കുന്ന രീതിയിൽ ഇതിൻ്റെ വൈദ്യശാസ്ത്ര-നിയമവശങ്ങളെല്ലാം അയാൾ വിവരിച്ചുതരും. വളരെ സുരക്ഷിതവും, ഒരു ജീവൻ രക്ഷപ്പെടുത്തുന്നതിന് തുല്യമായ ത്യാഗവുമാണതെന്ന് അയാൾ വിശദീകരിച്ചു.” ഈ സംഭാഷണങ്ങളെല്ലാം വാട്ട്സാപ്പ് മെസ്സേജുകളോ, ദീർഘമായ ചാറ്റുകളോ ആയിരുന്നു. ഒരിക്കലും ഫോൺവിളി ഉണ്ടായില്ല.

മുഖ്യ സൂത്രധാരനായ രാംകൃഷ്ണ സുഞ്ചു എന്നയാളുടെ വ്യാജനാമമായിരുന്നു ഡോ. കൃഷ്ണ. കഷ്ടിച്ച് ഒരുവർഷം കഴിഞ്ഞ്, കൊൽക്കൊത്ത വഴി, കമ്പോഡിയയിലെ പെനോം പെന്നിലേക്ക് റോഷൻ യാത്രയാവുമ്പോൾ അയാൾ പലപ്പോഴും വീഡിയോ കോളിൽ വരാറുണ്ടായിരുന്നു. പെനോം പെന്നിൽവെച്ചായിരുന്നു വൃക്ക നീക്കം ചെയ്യുന്ന ശസ്ത്രക്രിയ ചെയ്യാൻ ഉദ്ദേശിച്ചിരുന്നത്.

കടം നൽകിയവരിൽനിന്നുള്ള സമ്മർദ്ദവും, എട്ടൊമ്പത് മാസത്തെ പരസ്പരമുള്ള ആശയവിനിമയവും കഴിഞ്ഞ്, 2026 ജൂണിൽ റോഷൻ തൻ്റെ വൃക്ക വിൽക്കാൻ തീരുമാനിച്ചു.

നാഗ്പുരിൽനിന്ന് ഒരു പാസ്പോർട്ട് കിട്ടാൻ ഇടനിലക്കാരും കടം നൽകിയവരും സഹായിച്ചു. ബ്രഹ്മപുരിയിൽവെച്ച് രക്തപരിശോധന നടത്തി. നാലുമാസങ്ങൾക്കുശേഷം യാത്ര ആരംഭിച്ചു.

അദ്ദേഹത്തിൻ്റെ കുടുംബത്തിനും ഗ്രാമീണർക്കും ഇതിനെക്കുറിച്ചൊന്നും അറിവുണ്ടായിരുന്നില്ല. ഒരു കമ്പ്യൂട്ടർ ഓപ്പറേറ്ററായി വിദേശത്ത് ജോലി അന്വേഷിക്കുന്നു എന്നായിരുന്നു റോഷൻ അവരോടെല്ലാം പറഞ്ഞത്. ബിരുദം നേടിയതിനുശേഷം കമ്പ്യൂട്ടർ പ്രോഗ്രാമിൽ ഒരു കോഴ്സ് അയാൾ പൂർത്തിയാക്കിയിരുന്നു.

ഫോണിൽ ടിക്കറ്റുകളെത്തി. ആദ്യം ബ്രഹ്മപുരിയിൽനിന്ന് നാഗ്പുരിലേക്ക് ബസ്സിൽ മൂന്ന് മണിക്കൂർ യാത്ര. നാഗ്പുർ റെയിൽവേ സ്റ്റേഷനിലെത്തിയെന്ന് കാണിച്ച് ലൈവ് ലൊക്കേഷനും തൻ്റെ ഫോട്ടോയും വാട്ട്സാപ്പിൽ ഷെയർ ചെയ്തപ്പോൾ, കൊൽക്കൊത്തയിലേക്കുള്ള ട്രെയിൻ ടിക്കറ്റ് വന്നു. അവിടെവെച്ച് ഭരദ്വാജ് അദ്ദേഹത്തെ സ്വീകരിച്ച് ഒരു ചെറിയ ഹോട്ടലിലേക്ക് കൊണ്ടുപോയി.

“ഞാൻ ഒറ്റയ്ക്കായിരുന്നില്ല. കൊൽക്കൊത്തയിലെ ആ മുറിയിൽ ഞങ്ങൾ 12 പേരുണ്ടായിരുന്നു. അവിടെ അവർ ഞങ്ങളുടെ രക്തപരിശോധനകളും മറ്റ് ടെസ്റ്റുകളും ഒരു ചെറിയ ലാബിൽവെച്ച് നടത്തി,” അദ്ദേഹം ഓർമ്മിച്ചെടുത്തു. ആ ലാബും ഇവരുടെ ശൃംഖലയിലെ കണ്ണിയാണെന്ന് റോഷന് തോന്നി.

സുഞ്ചു മിക്ക ദിവസവും ഓൺലൈനിൽ വന്ന് ദാതാക്കളോട്, ചെയ്യേണ്ടതും ചെയ്യരുതാത്തതുമായ കാര്യങ്ങളെക്കുറിച്ച് നിർദ്ദേശങ്ങൾ നൽകിക്കൊണ്ടിരുന്നു. പുറത്തേക്ക് കൊണ്ടുപോകുന്ന ഇടനിലക്കാരുടെ പച്ചക്കൊടി കാത്തിരിക്കുകയായിരുന്നു അവർ.

“ഭരദ്വാജ് എപ്പോഴും ഞങ്ങളെ നിരീക്ഷിച്ചുകൊണ്ടിരുന്നു. മുറിയിൽനിന്ന് പുറത്തിറങ്ങാൻ അനുവദിച്ചില്ല.”

ഞങ്ങളുടെ ഫോണുകളൊക്കെ അവർ വാങ്ങി. ഇടയ്ക്ക്, വീട്ടിലേക്ക് വിളിക്കാൻ മാത്രം കുറച്ച് സമയത്തേക്ക് തിരിച്ചുതരും. വിവരങ്ങളൊന്നും മറ്റുള്ളവരുമായി ഫോണിൽ പങ്കുവെക്കരുതെന്ന് അവർ മുന്നറിയിപ്പ് തന്നുകൊണ്ടിരുന്നു. ഒരു അനധികൃതമായ തടവിലായിരുന്നു തങ്ങൾ എന്ന് റോഷൻ പറയുന്നു.

എല്ലാം എണ്ണയിട്ടതുപോലെ കൃത്യമായി നടന്നതായി റോഷൻ ഓർക്കുന്നു.

12 പേരിൽ ഒരാൾ, രക്ഷപ്പെട്ടു. കൊൽക്കൊത്ത എയർപോർട്ടിൽവെച്ച്, പെനോം പെന്നിലേക്ക് പോവുന്നതിന് തൊട്ടുമുമ്പ്, കക്കൂസിൽ പോകാനെന്ന വ്യാജേനയാണ് അയാൾ രക്ഷപ്പെട്ടത്. “അയാൾ ശരിക്കും ഭയപ്പെട്ടു,” പുഞ്ചിരിച്ചുകൊണ്ട് റോഷൻ പറഞ്ഞു.

പൈസയുടെ അത്യാവശ്യമുണ്ടായിരുന്ന മറ്റുള്ളവർ പിടിച്ചുനിന്നു.

“2024 ഒക്ടോബറിലെ ആ ഒരു മാസത്തിനുള്ളിൽ ഞങ്ങളെല്ലാം അടുത്ത സുഹൃത്തുക്കളായി. ഞങ്ങൾ പ്രതീക്ഷ കൈവിട്ടില്ല,” റോഷൻ പറയുന്നു.

കൊൽക്കൊത്തയിൽ അവർ 10 ദിവസമുണ്ടായിരുന്നു. കമ്പോഡിയയിൽ 20 ദിവസവും. അവിടെ അവരെ പ്രിയ കേട് മിയാലിയ ആശുപത്രിയിലേക്ക് കൊണ്ടുപോയി. കമ്പോഡിയ സർക്കാരിലെ ഒരു സൈനിക ഫെസിലിറ്റിയും അറിയപ്പെടുന്ന ചികിത്സാകേന്ദ്രവുമായിരുന്നു അത്. ശസ്ത്രക്രിയയ്ക്ക് മുമ്പ് ഒരാഴ്ചയും ശസ്ത്രക്രിയയ്ക്ക് ശേഷം രണ്ടാഴ്ചയും അവരവിടെ കഴിഞ്ഞു. ആ രണ്ടാഴ്ച വേദനയിലും ഭയത്തിലുമായിരുന്നു കഴിഞ്ഞുകൂടിയതെന്ന് അയാൾ ഓർത്തെടുത്തു. രണ്ടാഴ്ച കുടുംബത്തെയും അയാൾക്ക് വിളിക്കാൻ കഴിഞ്ഞില്ല.

“ബാഹ്യലോകവുമായി ഒരു ബന്ധവുമില്ലാതെ ഞങ്ങളെ ചെറിയ മുറികളിൽ അടച്ചിട്ടിരിക്കുകയായിരുന്നു. തുന്നൽപ്പാടുകളൊക്കെ ഉണങ്ങിയപ്പോൾ ഞങ്ങളെ ഓരോരുത്തരെയായി നാട്ടിലേക്ക് വ്യത്യസ്ത റൂട്ടുകളിലൂടെ തിരിച്ചയച്ചു,” റോഷൻ പറഞ്ഞു. വിശാഖപട്ടണംവഴിയാണ് റോഷൻ നാട്ടിലെത്തിയത്.

രാജ്യാതിർത്തിയിൽവെച്ച് പൊലീസ് അന്വേഷണങ്ങളെല്ലാം അവസാനിച്ചു.

റോഷൻ്റെ സഹായത്തോടെ പൊലീസ്, ഇന്ത്യയുടെ വിവിധ ഭാഗങ്ങളിൽനിന്ന് അര ഡസൻ വൃക്കദാതാക്കളെ കണ്ടെത്തി. ഇതേ ശൃംഖലയിലൂടെ, തങ്ങളുടെ വൃക്കകൾ വിറ്റവരായിരുന്നു അവരെല്ലാം.

ഒരാൾ ശീട്ട് കളിച്ച് പണം നഷ്ടപ്പെടുത്തിയ ആളായിരുന്നു. മറ്റൊരാൾ ഓഹരി മാർക്കറ്റിലെ ഊഹക്കച്ചവടത്തിൽ പണം തുലച്ചയാൾ.

പേരുവിവരങ്ങൾ വെളിപ്പെടുത്തില്ല എന്ന ഉറപ്പിന്മേൽ അവരിൽ നാലുപേരുമായി പാരി സംസാരിച്ചു. അവരിൽ ആരുംതന്നെ തങ്ങളുടെ തീരുമാനങ്ങൾ കുടുംബാംഗങ്ങളെ അറിയിച്ചിട്ടില്ലായിരുന്നു.

“എനിക്ക് കടങ്ങളുണ്ടായിരുന്നു. എൻ്റെ ചെറിയ കച്ചവടവും ആകെ താറുമാറായിരുന്നു,” അവരിലൊരാൾ ഫോണിൽ പാരിയോട് പറഞ്ഞു. ഈ സംഭവത്തിനുശേഷം അയാൾ, സ്വദേശമായ അലഹബാദിൽനിന്ന് അകലെ, കേരളത്തിൽ ഒരു തൊഴിൽ കണ്ടെത്തുകയായിരുന്നു.

2026 മാർച്ച് അവസാനം ചന്ദ്രപുർ പൊലീസ് ഒരു സെഷൻസ് കോടതിയിൽ ചാർജ്ഷീറ്റ് ഫയൽ ചെയ്തു. നൂറുകണക്കിന് പേജുകൾ വരുന്ന ചാർജ്ഷീറ്റിന് അനുബന്ധമായി 6,000 പേജുകളുള്ള തെളിവുകളുമുണ്ടായിരുന്നു. ആരോപണവിധേയനായ സുഞ്ചു എന്ന ഡോ. കൃഷ്ണയും കൺസൾട്ടിംഗ് ട്രാൻസ്പ്ലാൻ്റ് സർജണും തമ്മിൽ നടന്ന ഫോൺ, വാട്ട്സാപ്പ് സംഭാഷണങ്ങൾ രേഖപ്പെടുത്തിയ നൂറുകണക്കിന് പേജുകൾ തെളിവുകളുടെ ഭാഗമായി.

യാത്രാരേഖകളും സാമ്പത്തിക ഇടപാടുകളുമടക്കമുള്ള തെളിവുകൾ വിരൽ ചൂണ്ടുന്നത്, വ്യവസ്ഥാപിതമായ ഒരു ശൃംഖലയിലേക്കാണ്.

ചാർജ്ഷീറ്റ് പ്രകാരം സുഞ്ചു എന്ന 40-കളുടെ പകുതിയിലെത്തിയ വ്യക്തി അയാളുടെ സ്വന്തം വൃക്കകൾതന്നെ വിറ്റതിനുശേഷമാണ് പുതിയ കച്ചവടത്തിലേക്ക് ഇറങ്ങിയത്. 2026 ജനുവരിയിൽ, സോളാപുർ പട്ടണത്തിലെ അയാളുടെ രാജകീയ വസതിയിൽനിന്ന് സുഞ്ചുവിനെ അറസ്റ്റ് ചെയ്തു.

ഡോക്ടർമാർ, ഏജൻ്റുമാർ, ഇടനിലക്കാർ, ഹോട്ടലുടമകൾ, ടാക്സി ഓപ്പറേറ്റർമാർ എന്നിവരുടെ സഹായമുപയോഗിച്ച് അയാൾ, തൻ്റെ സോഷ്യൽ മീഡിയയിലൂടെ, സാമ്പത്തികമായി ദുരിതമനുഭവിക്കുന്നവരെ തിരഞ്ഞുപിടിച്ചുവെന്നാണ് അന്വേഷണോദ്യോഗസ്ഥർ പറയുന്നത്. ഈ ശൃംഖലകളുപയോഗിച്ച് ഇന്ത്യയിലേയും കമ്പോഡിയയിലേയും ദാതാക്കളേയും സ്വീകർത്താക്കളേയും അയാൾ ബന്ധപ്പെടുത്തി. കൂടാതെ, ആശുപത്രി ശൃംഖലകളും ദല്ലാളുമാരേയും കണ്ടെത്തി, വൈദ്യപരിശോധനകളും, യാത്രകളും, വൃക്ക മാറ്റിവെക്കൽ പ്രക്രിയകളും നടത്തുകയും ചെയ്തുവെന്ന് പൊലീസ് കൂട്ടിച്ചേർക്കുന്നു.

ഒരു ട്രാൻസ്പ്ലാൻ്റിന് സ്വീകർത്താവിൽനിന്ന് വാങ്ങിയിരുന്നത് 50-70 ലക്ഷം രൂപയായിരുന്നു. വ്യക്തികളുടെ സാമ്പത്തികസ്ഥിതി കണക്കിലെടുത്ത് ചിലപ്പോൾ കോടികളും വാങ്ങിയിരുന്നു. ഈ സംഖ്യയിൽനിന്ന് അവയവദാതാക്കൾക്ക് നൽകിയിരുന്നത് 5 മുതൽ 8 ലക്ഷം രൂപവരെയായിരുന്നു. ശസ്ത്രക്രിയ ചെയ്യുന്നവർക്ക് 10-15 ലക്ഷവും, ആശുപത്രികൾക്ക് മറ്റൊരു 10-15 ലക്ഷവും, മറ്റൊരു പങ്ക് ഇടനിലക്കാർക്കും മറ്റ് ചിലവുകൾക്കും കൊടുത്തുകഴിഞ്ഞ്, ബാക്കിയുള്ളത് സുഞ്ചു സ്വന്തമാക്കുകയായിരുന്നു.

കമ്പോഡിയയിലും, തമിഴ് നാട്ടിലെ ട്രിച്ചിയിലെ സ്റ്റാർ കിംസ് ആശുപത്രിയിലും, ബംഗളൂരുവിലെ ആശ ഹോസ്പിറ്റലിലുമായി അനധികൃതമായ 30-35 വൃക്ക മാറ്റിവെക്കലുകളാണ് നടന്നിട്ടുള്ളതെന്ന് അന്വേഷണത്തിൽ കണ്ടെത്തി. സ്റ്റാർ കിംസ് ഹോസ്പിറ്റൽ ഇപ്പോൾ അടച്ചുപൂട്ടി.

റോഷൻ്റെ സഹായത്തോടെ പൊലീസ് മറ്റൊരു ദാതാവിനെയും കണ്ടെത്തി. എന്നാൽ, രക്തപരിശോധനയിൽ കണ്ട ചില പ്രശ്നങ്ങൾ കാരണം കമ്പോഡിയയിൽവെച്ച് അയാളെ ശസ്ത്രക്രിയയിൽനിന്ന് ഒഴിവാക്കി. എന്നാൽ ആറ് മാസത്തിനുശേഷം, സ്റ്റാർ കിംഗ് ഹോസ്പിറ്റലിൽവെച്ച്, ന്യൂദില്ലിയിലെ ഓർഗൻ ട്രാൻസ്പ്ലാൻ്റ് സർജനായ ഡോ. രവീന്ദർ പാൽ സിംഗ് അയാളുടെ വൃക്ക നീക്കം ചെയ്തുവെന്ന് ചാർജ്ജ്ഷീറ്റിൽ പറയുന്നു. “8 ലക്ഷം രൂപ ഡോ, കൃഷ്ണ വാഗ്ദാനം ചെയ്തിരുന്നെങ്കിലും എനിക്ക് 5.5 ലക്ഷം രൂപയാണ് കിട്ടിയത്” എന്ന് അദ്ദേഹം പൊലീസിനോട് പറഞ്ഞു. അംഗീകാരമുള്ള ഡോക്ടറാണ് സുഞ്ചു എന്നാണ് അയാളും കരുതിയിരുന്നത്.

ചാർജ്ഷീറ്റിലുള്ളത് ഡോ. രവീന്ദ്ര പാൽ സിംഗിൻ്റേയും, സ്റ്റാർ കിംസിൻ്റെ പ്രൊമോട്ടറായ ഡോ. രാജരത്തിനം ഗോവിന്ദസ്വാമിയുടേയും പേരുകളാണ്. അവയവ കള്ളക്കടത്ത് റാക്കറ്റിൽ ഉൾപ്പെട്ട രണ്ട് ഡോക്ടർമാരാണ് ഇവർ.

ഡോ. ഗോവിന്ദസ്വാമിയും വൈദ്യപരിശോധനകളും ആശുപത്രി സജ്ജീകരണങ്ങളും നടത്താൻ സുഞ്ചുവിനെ സഹായിച്ച ഇടനിലക്കാരൻ ശുഭജിത്ത് പാലും എന്നിവർ ഒളിവിലാണ്.

ചാർജ്ഷീറ്റിൽ പ്രതിചേർക്കപ്പെട്ട, ഒളിവിലുള്ള രണ്ടുപേരെ കേന്ദ്രീകരിച്ചാണ് പൊലീസ് അന്വേഷണം നടക്കുന്നത്. ഡോ. രവീന്ദ്ര പാൽ സിംഗിൻ്റെ പങ്കും അന്വേഷണത്തിൽ ഉൾപ്പെട്ടിരുന്നു.

ബോംബെ ഹൈക്കോടതിയുടെ നാഗ്പുർ ബെഞ്ച് മുൻകൂർ ജാമ്യം നിഷേധിക്കുകയും എഫ്.ഐ.ആർ റദ്ദാക്കാനുള്ള അപേക്ഷ, ‘നിലനിൽക്കില്ല’ എന്ന് പറഞ്ഞ് തള്ളിക്കളയുകയും ചെയ്തതിനുശേഷമാണ്, ആറുമാസം ഒളിവിൽക്കഴിഞ്ഞ ഡോ. സിംഗ് ജൂൺ 24-ന് ചന്ദ്രപുർ പൊലീസിൻ്റെ മുമ്പാകെ കീഴടങ്ങിയത്. ഹൈക്കോടതിയുടെ വിധിയിൽ ഇടപെടാൻ 2026 മേയിൽ സുപ്രീം കോടതിയും വിസമ്മതിച്ചു. പതിവ് ജാമ്യത്തിനുള്ള ശ്രമം തുടരാൻ ഡോ. സിംഗിനോട് സുപ്രീം കോടതി ആവശ്യപ്പെടുകയായിരുന്നു.

മുൻകൂർ ജാമ്യാപേക്ഷയെ ഹൈക്കോടതിയിൽ എതിർത്തുകൊണ്ട് ഗവണ്മെൻ്റ് പ്ലീഡർ ദേവേന്ദ്ര ചൗഹാൻ, ബെഞ്ചിന് മുമ്പാകെ, സിഞ്ചുവിൻ്റെ മൊബൈലിൽനിന്ന് ലഭിച്ച വാട്ട്സാപ്പ് സംഭാഷണങ്ങൾ ഹാജരാക്കി. ആ സംഭാഷണങ്ങൾ ഇപ്പോൾ പൊതുവിടത്തിൽ ലഭ്യമാണ്.

ബംഗ്ലാദേശിലെ ധാക്കയിൽനിന്ന് കൊണ്ടുവന്ന ഒരു പാവപ്പെട്ട വൃക്കദാതാവ്, ശസ്ത്രക്രിയയ്ക്കുശേഷം ബംഗളൂരുവിൽവെച്ച് മരിച്ചുവെന്നും, പൊലീസ് കേസാവാതിരിക്കാൻ അയാളുടെ ചെറുപ്പക്കാരിയായ ഭാര്യയ്ക്ക് ഒരു കോടി രൂപ നഷ്ടപരിഹാരം നൽകാൻ താൻ അവരുടെ ഗ്രാമത്തിലേക്ക് പോവുകയാണെന്നും ഒരു ഫോൺ സംഭാഷണത്തിൽ സുഞ്ചു ഡോ. സിംഗിനോട് പറയുന്നത് രേഖകളിലുണ്ട്. 3393, 3415 എന്ന നമ്പറിട്ട ആ തെളിവ് സംഭാഷണത്തിൽ, ആ മരിച്ച ആളെ സ്വകാര്യമായി ബംഗളൂരുവിൽവെച്ച് അടക്കിയതും സൂചിപ്പിക്കുന്നുണ്ട്. ഈ ഒരു കോടി രൂപ, സംഘത്തിലെ എല്ലാവരും ചേർന്ന് വഹിക്കേണ്ടതാണെന്നും സുഞ്ചു ഡോക്ടറോട് പറയുന്നത് വാട്ട്സാപ്പ് സംഭാഷണത്തിൽ കേൾക്കാം.

അനൗപചാരിക മാർഗ്ഗങ്ങളിലൂടെ സാമ്പത്തിക ഇടപാടുകൾ നടത്തിയതിൻ്റെ വിശദാംശങ്ങൾ സംഭാഷണങ്ങളിലുണ്ട്. എല്ലാ പണമിടപാടുകളും ഹവാല രീതിയിലായിരുന്നുവെന്ന്, സിംഗിൻ്റെ മുൻകൂർ ജാമ്യാപേക്ഷ കേൾക്കുന്ന കോടതിയെ പൊലീസ് അറിയിച്ചു.

കുറ്റകരമായ ഗൂഢാലോചന, മനുഷ്യക്കടത്ത്, അനധികൃതമായ അവയവ വിൽപ്പന, ട്രാൻസ്പ്ലാൻ്റേഷൻ ഓഫ് ഹ്യൂമൻ ഓർഗൻസ് ആൻഡ് ടിഷ്യൂസ് ആക്ടിൻ്റെ (ടി.എച്ച്.ഓ.ടി.എ) കീഴിലുള്ള മനുഷ്യാവയവ വ്യാപാരം എന്നിവയ്ക്ക് പുറമേ, ഭീഷണിപ്പെടുത്തൽ, തട്ടിയെടുക്കൽ, നിയമപരമല്ലാത്ത തടവിലാക്കൽ, അനധികൃത വായ്പ ഇടപാടുകൾ എന്നിവയൊക്കെ ഉൾപ്പെടുത്തിയാണ് ചാർജ്ഷീറ്റ് തയ്യാറാക്കിയിരിക്കുന്നത്.

ആരോപണവിധേയനും ഇന്ത്യയിലെ വിവിധ ആശുപത്രികളിൽ കൺസൾട്ടൻ്റ് സർജനുമായ ഡോക്ടർക്ക് അവയവദാനത്തെക്കുറിച്ചുള്ള നിയമപരമായ ചട്ടക്കൂടുകളെല്ലാം അറിയാമെന്ന്, മുൻകൂർ ജാമ്യാപേക്ഷ തള്ളിക്കളഞ്ഞ ബോംബെ ഹൈക്കോടതിയുടെ നാഗ്പുർ ബെഞ്ച് നിരീക്ഷിച്ചു. നിയമപരമായ മുൻകരുതലുകളുടെ ഗുരുതരമായ ലംഘനം, ഭീഷണിപ്പെടുത്തൽ, സംശയാസ്പദമായ പണമിടപാടുകൾ എന്നിവ ആരോപണങ്ങളിൽ ഉൾപ്പെടുന്നുണ്ടെന്ന് കോടതി അടിവരയിട്ട് പറഞ്ഞു.

വലിയ തോതിലുള്ള സംവിധാനപരമായ വീഴ്ചയിലേക്കാന് ഈ കേസ് വിരൽചൂണ്ടുന്നത്.

ഗ്രാമീണമേഖലയിലെ കടബാധ്യതകൾ, അനിയന്ത്രിതമായ സ്വകാര്യ പണം കടംകൊടുക്കലുകൾ; സാമ്പത്തികമായ നിരക്ഷരതയും ദുർബ്ബലമായ പ്രാദേശിക നിർവ്വഹണങ്ങളും; വൈദ്യശാസ്ത്രപരമായ ദുഷ്പ്രവൃത്തിയും അന്താരാഷ്ട്ര മനുഷ്യക്കടത്ത് ശൃംഖലകളും – ചൂഷണത്തിൻ്റെ എല്ലാ അടരുകളും ഇടകലരുന്ന ഒന്നാണ് റോഷൻ്റെ കഥ.

അവയവങ്ങൾ വിൽക്കാനുള്ള തീരുമാനങ്ങൾ പൊടുന്നനെ ഉണ്ടാവുന്നത് അപൂർവ്വമാണ്. സമ്മർദ്ദം, കടബാധ്യത, മറ്റെല്ലാ വഴികളും അടഞ്ഞ് ഈ ഒരേയൊരു മാർഗ്ഗം മാത്രം രക്ഷയാവുന്നത് ഇവയെല്ലാമാണ് അവയവങ്ങൾ വിൽക്കാനുള്ള ആ തീരുമാനത്തെ സൃഷ്ടിക്കുന്നത്. പല കേസുകളിലും, അവയവം വിൽക്കുന്നവർ കരുതുന്നത് തങ്ങൾ ദാരിദ്ര്യത്തിൽനിന്ന് മുക്തരാവും എന്നാണ്. എന്നാൽ മിക്കപ്പോഴും അവർക്ക് അതിൽനിന്ന് പുറത്ത് കടക്കാനാവുന്നില്ല.

ആഗോള അവയവ കമ്പോളം എങ്ങിനെയാണ് വാങ്ങുന്നവരുടേയും ദാനം ചെയ്യുന്നവരുടേയും നിവൃത്തികേടുകളെ ചൂഷണം ചെയ്യുന്നത്, ‘ദരിദ്രരിൽനിന്ന് ധനികരിലേക്ക്” അവയവങ്ങൾ ഒഴുകുന്നത് എങ്ങിനെയാണെന്നതിനെക്കുറിച്ചൊക്കെ ധാരാളം എഴുതിയിട്ടുള്ള വ്യക്തിയാണ് കാലിഫോർണിയ യൂണിവേഴ്സിറ്റിയിലെ ഓർഗൻസ് വാച്ച് പ്രോജക്ടിലെ നരവംശ ശാസ്ത്രജ്ഞയായ നാൻസി ഷെപ്പർ-ഹുഗ്സ്.

മനുഷ്യാവയവ കള്ളക്കടത്തുമായി ബന്ധപ്പെട്ട് ആഗോളതലത്തിൽ അനധികൃതമായി നടക്കുന്ന ട്രാൻസ്പ്ലാൻ്റേഷൻ ശസ്ത്രക്രിയകളുടെ എണ്ണം ഒരു പതിറ്റാണ്ട് മുമ്പ് 10,000 ആയിരുന്നുവെന്ന് ലോകാരോഗ്യ സംഘടന കണക്കാക്കുന്നു.

ചൈന, ഇന്ത്യ, പാക്കിസ്താൻ എന്നിവിടങ്ങളീലേക്ക് ശസ്ത്രക്രിയയ്ക്കായി പോകുന്ന ധനികരായ രോഗികൾ 200,000 യു.എസ്. ഡോളർ (128,000 യൂറോ, അഥവാ 2 കോടി രൂപ), നൽകിയാണ്, ദരിദ്രരെ ചൂഷണം ചെയ്യുന്ന അവയവക്കടത്ത് സംഘങ്ങളിൽനിന്ന് അവയവങ്ങൾ വാങ്ങുന്നതെന്ന് ഡബ്ല്യു.എച്ച്.ഒ. കണ്ടെത്തി. ആ ദരിദ്രർക്ക് കിട്ടുന്നതോ, കേവലം 5,000 യു.എസ്. ഡോളറും.

പ്രമേഹം, മറ്റ് ശാരീരിക രാസപ്രവർത്തനങ്ങൾ എന്നിവമൂലം വൃക്കകൾ ആവശ്യമായി വരുന്നവരുടെ എണ്ണം, ദാതാക്കളേക്കാൾ കൂടുതലാണ്.

ശാരദാമൊയി ചാറ്റർജി എന്ന പണ്ഡിത, സമ്പദ്‌വ്യവസ്ഥയെക്കുറിച്ചുള്ള പഠനത്തിൽ എഴുതുന്നു: ശരീരത്തിലെ രാസപ്രവർത്തനങ്ങളുടെ തകരാറുകൾ ഈയിടെയായി വർദ്ധിക്കുന്നതുമൂലം, ലോകമൊട്ടുക്കും, അവയവ മാറ്റിവെക്കലിൻ്റെ ആവശ്യവും വർദ്ധിക്കുന്നുണ്ട്. എന്നാൽ ലഭ്യത കുറവും. ഇതുമൂലം, അവയവ വിൽപ്പനയുടെ കരിഞ്ചന്ത ഇപ്പോൾ വളരെ ലാഭകരമായ ഒരു കച്ചവടമായിരിക്കുന്നു.”

ഐക്യരാഷ്ട്രസഭയുടെ ഡ്രഗ്സ് ആൻഡ് ക്രൈംസ് ഓഫീസ് സൂചിപ്പിക്കുന്നത്, അവയവക്കടത്ത് ഇപ്പോൾ ഒരു അന്താരാഷ്ട്ര ക്രിമിനൽ പ്രവർത്തനമായി മാറിയിരിക്കുന്നു എന്നാണ്. കാരണം, റിക്രൂട്ട്മെൻ്റ്, ഗതാഗതം, ശസ്ത്രക്രിയ, സാമ്പത്തിക ഇടപാടുകൾ എന്നിവയൊക്കെ ഇപ്പോൾ നടക്കുന്നത്, വിവിധ രാജ്യങ്ങളുടെ അധികാരപരിധികളിലാണ്.

അവയവദാതാക്കളുടെ വലിയൊരു സ്രോതസ്സ് ബംഗ്ളാദേശാണെന്ന് അന്വേഷണങ്ങളിൽ തെളിയുന്നു. അവയവക്കടത്ത്, സൈബർ-സ്കാമുകൾ, മനുഷ്യക്കടത്ത്, ആധുനികരീതിയിലുള്ള അടിമജോലികൾ എന്നിവയ്ക്ക് കംബോഡിയ കുപ്രശസ്തമാണ്.

റോഷൻ്റെ യാത്രയും അതേ രീതിതന്നെയാണ് പിന്തുടർന്നത്.

പെട്ടെന്നൊരു നിമിഷത്തിൽ ഉണ്ടായതല്ല ആ തീരുമാനം. ആഴ്ചകളും മാസങ്ങളുമെടുത്ത്, സംഭാഷണങ്ങളിലൂടെയും കണക്കുകൂട്ടലുകളിലൂടെയും ഓരോരോ ബദൽ മാർഗ്ഗങ്ങൾ ഇല്ലാതായതിലൂടെയും ഉണ്ടായതാണ് അത്. വൃക്ക വിൽക്കുന്നതിൻ്റെ സാധ്യതയെക്കുറിച്ച് ഉറക്കെ പറയാറുമ്പോഴേക്കും അതിൽ ഒരസാധാരണത്വവും തോന്നാത്ത അവസ്ഥയിലായി റോഷൻ.

റോഷൻ്റെ വയറിൻ്റെ ഇടതുവശത്ത് ലംബമാനമായ ഒരു പാട് മാത്രം ബാക്കിയായി. ജീവിതകാലം മുഴുവൻ ചെയ്യേണ്ടതും ചെയ്യരുതാത്തതുമായ കാര്യങ്ങളുടെ ഒരു പട്ടികയും. ആരോഗ്യത്തിൻ്റെ കാര്യത്തിൽ ഇനി ഒരു ചെറിയ വിട്ടുവീഴ്ചപോലും പറ്റില്ല എന്ന യാഥാർത്ഥ്യവുമായി വേണം ഇനി അയാൾക്ക് ജീവിക്കാൻ.

പണം പെട്ടെന്ന് തീർന്നു. സ്ഥലം തിരിച്ചുകിട്ടിയില്ല. കടം അപ്രത്യക്ഷമായില്ല. തൻ്റെ കുടുംബത്തെ രക്ഷിക്കുമെന്ന് അയാൾ വിശ്വസിച്ച മാർഗ്ഗം അതിനേക്കാൾ വലിയ ഒരു കുരുക്കിലേക്കാണ് തന്നെ കൊണ്ടുപോയതെന്ന തിരിച്ചറിവ് മാത്രമാണ് ബാക്കിയായത്.

എന്നാൽ, ഗ്രാമത്തിലെ കടബാധ്യതയിൽനിന്ന് തുടങ്ങി, കൊൽക്കൊത്ത, കമ്പോഡിയ എന്നിവിടങ്ങളിലേക്കുള്ള യാത്ര അവസാനിച്ചിട്ടില്ല. ആശുപത്രികൾക്കും ഓപ്പറേഷൻ തിയറ്ററുകൾക്കുമപ്പുറത്ത്, മറ്റൊരു നിഴൽ സമ്പദ്‌വ്യവസ്ഥ കിടക്കുന്നുണ്ട് – തെക്ക് കിഴക്കൻ ഏഷ്യയുടെ സുവർണ്ണ ത്രികോണത്തിലെ സൈബർസ്കാമുകളുടെയും അതിൻ്റെ മനുഷ്യക്കടത്ത് റൂട്ടുകളുടേയും സംയുക്തം – പ്രലോഭിപ്പിക്കുന്ന വാഗ്ദാനങ്ങളുമായി.

വായിക്കുക: മിന്തൂർ പരമ്പര:
ഭാഗം 1 - കാർഷിക വായ്പയിലൂടെ അവയവക്കച്ചവടം