ರೈತರ ಕಿಡ್ನಿ ಕಿತ್ತು ತಿನ್ನುತ್ತಿರುವ ಬಡ್ಡಿ ಸಾಲದ ತಿಮಿಂಗಿಲಗಳು

ರೋಷನ್‌ ಸದಾಶಿವ್‌ ಕುಳೆ ತನ್ನ ಬಳಿಯಿದ್ದ ಸಾಧಾರಣ ಮಟ್ಟದ ಸ್ಮಾರ್ಟ್‌ ಫೋನನನ್ನು ಹೊರತೆಗೆದರು. ಅದರಲ್ಲಿ ತನ್ನ ಫೇಸ್ಬುಕ್‌ ಅಕೌಂಟನ್ನು ಓಪನ್‌ ಮಾಡಿದ ಅವರು ಹಳೆಯ ನೋಟಿಫಿಕೇಷನ್‌ಗಳನ್ನು ಸ್ಕ್ರಾಲ್‌ ಮಾಡತೊಡಗಿದರು. ಒಂದಷ್ಟು ಹೊತ್ತು ಸ್ಕ್ರಾಲ್‌ ಮಾಡಿದ ನಂತರ ರೋಷನ್‌ ಬದುಕನ್ನು ಬದಲಾಯಿಸಿದ ನೋಟಿಫಿಕೇಷನ್‌ ಒಂಡು ಕಂಡ ತಕ್ಷಣ ಒಂದು ಕ್ಷಣ ತಡೆದರು. ಅವರು ತನ್ನ ಅಗ್ನಿಪರೀಕ್ಷೆಯ ಎರಡನೇ ಹಂತವನ್ನು ಪಾರಿಗೆ ವಿವರಿಸುತ್ತಿದ್ದರು.

ಮಿಂಥೂರ್‌ ಗ್ರಾಮದ ಅವರ ಮನೆಯಲ್ಲಿ ನಾವು ಅವರೊಂದಿಗೆ ಮಾತನಾಡುತ್ತಿದ್ದೆವು. ಅವರ ಸುತ್ತ ಮನೆಯವರು ಕಂಗಾಲಾಗಿ ಕುಳಿತು ರೋಶನ್‌ ಹೇಳುತ್ತಿದ್ದ ಮಾತುಗಳನ್ನು ಕೇಳುತ್ತಿದ್ದರು. ಅವರ್ಯಾರೂ ಇನ್ನೂ ಆ ಆಘಾತದಿಂದ ಹೊರಬಂದಿರಲಿಲ್ಲ.

2023ರ ಅಕ್ಟೋಬರ್‌ ತಿಂಗಳ ಒಂದು ಬೆಳಗಿನ ಜಾವದ 5 ಗಂಟೆಯ ಹೊತ್ತಿಗೆ ಮೂವರ ಸಾಲದಾತರು ಕಾರಿನಲ್ಲಿ ಬಂದಿಳಿದರು ಎನ್ನುತ್ತಾ ರೋಶನ್‌ ಮಾತನ್ನು ಮುಂದುವರೆಸಿದರು. ಕೈಯಲ್ಲಿ ದೊಣ್ಣೆಗಳನ್ನು ಹಿಡಿದಿದ್ದ ಅವರು ಬಾಗಿಲು ತಟ್ಟುವ ಹೊತ್ತಿಗೆ ಮನೆಯವರೆಲ್ಲ ಬೆಳ್ಳಿ ಮೂಡುವ ಹೊತ್ತಿನ ಗಾಢ ನಿದ್ದೆಯಲ್ಲಿದ್ದರು. ಬಾಗಿಲು ತೆರೆಯುತ್ತಿದ್ದಂತೆ ಈ ಸಾಲದಾತರು ಅತ್ಯಂತ ಕೆಟ್ಟ ಪದಗಳನ್ನು ಉಪಯೋಗಿಸಿ ಬಯ್ಯುತ್ತಾ, ರೋಶನ್‌ ದೊಡ್ಡ ಮೊತ್ತದ ಹಣ ಬಾಕಿ ಇಟ್ಟುಕೊಂಡಿದ್ದನೆಂದೂ, ಅದನ್ನು ಕೂಡಲೇ ವಾಪಸ್‌ ಮಾಡಬೇಕೆಂದೂ ಗದರತೊಡಗಿದರು.

ಪದೇ ಪದೇ ಮನೆಗೆ ಬರತೊಡಗಿದ ಅವರು ರೋಶನ್‌ ಒಟ್ಟು 16 ಲಕ್ಷ ರೂಪಾಯಿ ಬಾಕಿ ಇಟ್ಟುಕೊಂಡಿರುವುದಾಗಿ ಹೇಳಿದ್ದರು.

ಆದರೆ ರೋಶನ್‌ ಸಾಲಕ್ಕೆಂದು ಹೋಗಿ ನಿಲ್ಲಬಹುದಾಗಿದ್ದ ಬಾಗಿಲುಗಳನ್ನೆಲ್ಲ ಈಗಾಗಲೇ ಬಳಸಿಕೊಂಡಾಗಿತ್ತು. ಅಲ್ಲದೆ ಕುಟುಂಬದ ಇದ್ದಬದ್ದ ಸಂಪನ್ಮೂಲಗಳನ್ನು ಅಷ್ಟು ಹೊತ್ತಿಗೆ ಅಡಮಾನ ಇಡಲಾಗಿತ್ತು ಅಥವಾ ಮಾರಲಾಗಿತ್ತು. ಒಂದು ಒಳ್ಳೆಯ ಕೆಲಸವನ್ನು ಹುಡುಕಿಕೊಳ್ಳುವ ಅವರ ಪ್ರಯತ್ನವೂ ವ್ಯರ್ಥವಾಗಿತ್ತು.

“ನಿನ್ನ ಕಿಡ್ನಿ ಮಾರಿ ನಮ್ಮ ದುಡ್ಡು ಕೊಡು” ಎಂದು ಬಂದಿದ್ದ ಆರು ಸಾಲದಾತರಲ್ಲಿ ಒಬ್ಬ ಹೇಳಿದ್ದನ್ನು ರೋಶನ್‌ ನೆನಪಿಸಿಕೊಂಡರು. “ಇಲ್ಲದೆ ಹೋದರೆ ನಾವು ನಿನ್ನ ಕುಟುಂಬದ ಸುದ್ದಿಗೆ ಬರಬೇಕಾಗುತ್ತದೆ.”

ಸಾಲದಾತನೊಬ್ಬ ಫೇಸ್ಬುಕ್ಕಿನಲ್ಲಿರುವ ಕಿಡ್ನಿ ದಾನಿಗಳ ಗ್ರೂಪ್‌ ಕುರಿತು ತಿಳಿಸಿದ್ದಲ್ಲದೆ ಅದಕ್ಕೆ ಸೇರಿಕೊಳ್ಳುವಂತೆಯೂ ಹೇಳಿದ.

“ಆರಂಭದಲ್ಲಿ [ಕಿಡ್ನಿ ಮಾರಲು] ಹಿಂಜರಿದಿದ್ದೆ” ಎನ್ನುತ್ತಾರೆ ಅವರು. ಆದರೆ ಅವರು ಆಯುಧಗಳು ಮತ್ತು ದೊಣ್ಣೆಗಳೊಂದಿಗೆ ವಸೂಲಿಗೆಂದು ಪದೇ ಪದೇ ಮನೆಗೆ ಬರತೊಡಗಿದರು. ನಾವೆಲ್ಲ ಹೆದರಿದ್ದೆವು. ಕೊನೆಗೆ ನಾನು ಈ ಆಯ್ಕೆಯನ್ನು ಪರಿಗಣಿಸುವ ಕುರಿತು ಯೋಚಿಸತೊಡಗಿದೆ.”

2023ರ ನವೆಂಬರ್‌ ತಿಂಗಳ ಒಂದು ದಿನ ರೋಶನ್‌ (ಫೇಸ್‌ಬುಕ್‌ನ ಕಿಡ್ನಿ ಡೋನರ್ ಕಮ್ಯುನಿಟಿ ಗ್ರೂಪ್‌ನ) 'ಜಾಯಿನ್' ಬಟನ್ ಒತ್ತಿದರು. ಅದಾಗಿ ಒಂದು ದಿನಕ್ಕೆ ವಾಟ್ಸಾಪ್ ಗ್ರೂಪ್‌ವೊಂದಕ್ಕೆ ಸೇರುವಂತೆ ಸಂದೇಶ ಬಂತು. "ನನಗೆ ಅನುಮಾನಗಳಿದ್ದವು, ಜೊತೆಗೆ ಭಯವೂ ಇತ್ತು. ಆದರೂ ಕೊನೆಗೆ ಮುಂದುವರೆದೆ" ಎಂದು ಅವರು ಪಾರಿಗೆ ಹೇಳಿದರು.

ಫೇಸ್ಬುಕ್‌ ಗ್ರೂಪ್‌ ಆಗಿನಿಂದ ಡಿಲೀಟ್‌ ಮಾಡಲ್ಪಟ್ಟಿದೆ.

ಆ ವಾಟ್ಸಾಪ್ ಗ್ರೂಪ್‌ನ ಅಡ್ಮಿನ್ ದಿನಗಟ್ಟಲೆ ರೋಶನ್‌ಗೆ ಸಂದೇಶಗಳ ಸುರಿಮಳೆಯನ್ನೇ ಸುರಿಸಿದ. ಆ ಸಂದೇಶಗಳ ಮೂಲಕ ಅವನು ಕಿಡ್ನಿ ಡೊನೇಟ್‌ ಮಾಡುವುದೆಂದರೆನಿಸ್ವಾರ್ಥ ಸೇವೆ, ಜೀವ ಉಳಿಸುವ ಮಹಾನ್ ತ್ಯಾಗ ಎಂಬುದನ್ನು ರೋಶನ್‌ ಅವರಿಗೆ ತಿಳಿಸಲು ಪ್ರಯತ್ನಿಸಿದ್ದ. ಕಿಡ್ನಿ ವೈಫಲ್ಯದಿಂದ ನರಳುತ್ತಿರುವ ವ್ಯಕ್ತಿಯೊಬ್ಬರಿಗೆ ಇದರಿಂದ ಹೊಸ ಜೀವನ ಸಿಗುತ್ತದೆ ಎಂದೂ, ಈ ಪ್ರಕ್ರಿಯೆಯು ಸಂಪೂರ್ಣ ಸುರಕ್ಷಿತ ಎಂದೂ ನಂಬಿಸಲಾಯಿತು.

“ಈ ಹೆಸರಿಲ್ಲಿದ್ದ ವ್ಯಕ್ತಿ ನನ್ನನ್ನು ನಿಭಾಯಿಸಲಿದ್ದಾನೆ ಎನ್ನುವುದು ನನಗೆ ಅಷ್ಟು ಹೊತ್ತಿಗೆ ಅರ್ಥವಾಗಿತ್ತು” ಎನ್ನುತ್ತಾರೆ ರೋಶನ್.‌

ಚಂದ್ರಪುರ ಪೊಲೀಸರ ತನಿಖೆಯಲ್ಲಿ ನಂತರ ಬಯಲಾದಂತೆ, ಆ ವ್ಯಕ್ತಿಯ ಹೆಸರು ಹಿಮಾಂಶು ಭಾರದ್ವಾಜ್; ಈತ ಈಗ ಈ ಪ್ರಕರಣದ ಆರೋಪಿಯಾಗಿದ್ದು ನ್ಯಾಯಾಂಗ ಬಂಧನದಲ್ಲಿದ್ದಾನೆ. ರೋಶನ್ ತನ್ನ ಕಿಡ್ನಿಯನ್ನು ಮಾರಾಟ ಮಾಡಲು ಒಪ್ಪುವಂತೆ ಪುಸಲಾಯಿಸುವುದೇ ಆತನ ಕೆಲಸವಾಗಿತ್ತು.

ಮುಂದೆ ನಡೆದ ಸಂಭಾಷಣೆಗಳಲ್ಲಿ ಆ ಅಡ್ಮಿನ್‌ ರೋಶನ್‌ ಜೊತೆ ಕಿಡ್ನಿ ಕೊಟ್ಟರೆ ಸಿಗುವ ಮೊತ್ತದ ಕುರಿತು ಚೌಕಾಶಿ ಮಾಡಿರುವುದು, ಮೊತ್ತವೊಂದಕ್ಕೆ ಒಪ್ಪಿಸಲು ಅವರ ಬಳಿ ಅಂಗಲಾಚಿರುವುದನ್ನೆಲ್ಲ ನೋಡಬಹುದು. ಕೊಡುವುದಾಗಿ ಒಪ್ಪಿಕೊಂಡಿದ್ದ ಮೊತ್ತ 8 ಲಕ್ಷರೂಪಾಯಿ. ಆಪರೇಷನ್‌ ಮುಗಿದ ಕೂಡಲೇ ಹಣವನ್ನು ರೋಶನ್‌ ಅವರ ಪತ್ನಿ ರೋಹಿಣಿಯವರ ಖಾತೆಗೆ ಹಣ ವರ್ಗಾಯಿಸುವುದಾಗಿತಿಳಿಸಲಾಗಿತ್ತು. ಅಂತಿಮವಾಗಿ, ಅಕ್ಟೋಬರ್ 2024ರ ಕೊನೆಯಲ್ಲಿ ನಡೆದ ಶಸ್ತ್ರಚಿಕಿತ್ಸೆಯನಂತರ ರೋಶನ್‌ ಅವರಿಗೆ ಸುಮಾರು 7.5 ಲಕ್ಷ ರೂಪಾಯಿ ತಲುಪಿತು.

ಇದೆಲ್ಲ ನಡೆಯುತ್ತಿರುವಾಗ ರೋಶನ್‌ ತನ್ನ ಯೋಚನೆಯನ್ನು ಮನೆಯವರೊಂದಿಗೆ ಹಂಚಿಕೊಂಡಿರಲಿಲ್ಲ. ಮನೆಯಲ್ಲಿ ಇದಕ್ಕೆಲ್ಲ ಒಪ್ಪುವುದಿಲ್ಲ ಎನ್ನುವುದು ಅವರಿಗೆ ತಿಳಿದಿತ್ತು.

“ರೋಶನ್‌ ಕಿಡ್ನಿ ಮಾರಲು ತೀರ್ಮಾನಿಸಿದ್ದಾರೆ ಎನ್ನುವುದರ ಸುಳಿವೂ ನಮಗೆ ಸಿಕ್ಕಿರಲಿಲ್ಲ” ಎಂದು ರೋಹಿಣಿ ವಿಷಾದದಿಂದ ಹೇಳಿದರು. “ಹಾಗೆ ಮಾಡುವುದಕ್ಕೆ ನಾನು ಯಾವ ಕಾರಣಕ್ಕೂ ಬಿಡುತ್ತಿರಲಿಲ್ಲ” ಎನ್ನುವ ರೋಶನ್‌ ಅವರ ತಂದೆಗೆ ಮಗನ ಮೇಲಿರುವ ಒತ್ತಡ ಅರ್ಥವಾಗಿದೆ. ಆದರೆ ಮಗನ ನಿರ್ಧಾರ ಅವರನ್ನು ಆಘಾತಕ್ಕೆ ತಳ್ಳಿತ್ತು.

ಆ ವಾಟ್ಸಾಪ್ ಗ್ರೂಪಿನಲ್ಲಿ ಮತ್ತೊಬ್ಬ ವ್ಯಕ್ತಿಯಿದ್ದ — ಆತನನ್ನು ಡಾ. ಕೃಷ್ಣ ಎನ್ನುವ ಗಣ್ಯ ವೈದ್ಯನ ಹೆಸರಿನಲ್ಲಿ ಪರಿಚಯಿಸಲಾಗಿತ್ತು. "ಆತ ವೈದ್ಯಕೀಯ ವಿಷಯಗಳಿಗೆ ಸಂಬಂಧಿಸಿದ ಕಾನೂನು ಅಂಶಗಳನ್ನು ಸರಳವಾಗಿ ಮನವರಿಕೆಯಾಗುವ ಧಾಟಿಯಲ್ಲಿ ವಿವರಿಸುತ್ತಿದ್ದ" ಎಂದು ರೋಶನ್ ನೆನಪಿಸಿಕೊಳ್ಳುತ್ತಾರೆ. "ಅದೊಂದು ಅತ್ಯಂತ ಸುರಕ್ಷಿತವಾದ ಜೀವ ಉಳಿಸುವ ತ್ಯಾಗ ಎಂದು ಆತ ಹೇಳುತ್ತಿದ್ದ." ಈ ಎಲ್ಲಾ ಸಂಭಾಷಣೆಗಳು ಯಾವಾಗಲೂ ಕೇವಲ ವಾಟ್ಸಾಪ್ ಸಂದೇಶಗಳು ಮತ್ತು ಸುದೀರ್ಘ ಚಾಟ್‌ಗಳ ಮೂಲಕವೇ ನಡೆಯುತ್ತಿದ್ದವು. ಯಾವ ಕಾರಣಕ್ಕೂ ವಾಯ್ಸ್ ಕಾಲ್ ಮೂಲಕ ಮಾತುಕತೆ ನಡೆಸಿರಲಿಲ್ಲ.

ಡಾ. ಕೃಷ್ಣ ಎನ್ನುವುದು 36 ವರ್ಷದ ಕಿಂಗ್‌ಪಿನ್ ರಾಮಕೃಷ್ಣ ಸುಂಚು ಬಳಸುತ್ತಿದ್ದ ಕಳ್ಳ ಹೆಸರಾಗಿತ್ತು. ರೋಶನ್‌ ಅವರ ಕಿಡ್ನಿ ಹೊರತೆಗೆಯುವ ಆಪರೇಷನ್‌ ಕಾಂಬೋಡಿಯಾದ ನೊಮ್ ಪೆನ್‌ ಎನ್ನುವ ಆಸ್ಪತ್ರೆಯಲ್ಲಿ ನಡೆಯುವುದಿತ್ತು. ಇದಕ್ಕೆಂದು ಅವರು ಕೋಲ್ಕತ್ತಕ್ಕೆ ಪ್ರಯಾಣಿಸುತ್ತಿದ್ದ ಸಂದರ್ಭದಲ್ಲಿ ಈತ ಮೊದಲ ಬಾರಿಗೆ ವಿಡಿಯೋ ಕಾಲ್ ಮೂಲಕ ಕಾಣಿಸಿಕೊಂಡಿದ್ದ. ಅಷ್ಟು ಹೊತ್ತಿಗೆ ಆತ ರೋಶನ್‌ ಅವರ ಸಂಪರ್ಕಕ್ಕೆ ಬಂದು ಒಂದು ವರ್ಷವಾಗಿತ್ತು.

ಸಾಲಗಾರರ ಒತ್ತಡ ಮಿತಿಯಿಲ್ಲದೆ ಮುಂದುವರೆಯುತ್ತಿತ್ತು. ಎಂಟು ತಿಂಗಳ ಕಾಲ ಹೇಗೋ ಇದನ್ನೆಲ್ಲ ತಡೆದುಕೊಂಡಿದ್ದ ರೋಶನ್‌ ಕಡೆಗೂ 2024ರ ಜೂನ್‌ ತಿಂಗಳಿನಲ್ಲಿ ಕಿಡ್ನಿ ಮಾರಲು ಒಪ್ಪಿಕೊಂಡರು.

ಭಾರದ್ವಾಜ್‌ ಮತ್ತು ಸ್ಥಳೀಯರು ಬಡ್ಡಿ ವ್ಯವಹಾರಸ್ಥರು ರೋಶನ್‌ ಅವರಿಗೆ ತುರ್ತಾಗಿ ಪಾಸ್‌ಪೋರ್ಟ್‌ ಮಾಡಿಸಿಕೊಳ್ಳಲು ಸಹಾಯ ಮಾಡಿದರು. ಬ್ರಹ್ಮಪುರಿ ಎನ್ನುವಲ್ಲಿ ರಕ್ತ ಪರೀಕ್ಷೆಯನ್ನು ನಡೆಸಲಾಗಿತ್ತು. ಇದಾಗಿ ನಾಲ್ಕು ತಿಂಗಳ ನಂತರ ಪ್ರಯಾಣ ಆರಂಭವಾಯಿತು.

ಅವರ ಊರಿನವರು ಮತ್ತು ಮನೆಯವರನ್ನು ಈ ವಿಷಯದಲ್ಲಿ ಪೂರ್ತಿಯಾಗಿ ಕತ್ತಲೆಯಲ್ಲಿ ಇಡಲಾಗಿತ್ತು. ರೋಶನ್‌ ಅವರಿಗೆಲ್ಲ ತಾನು ವಿದೇಶದಲ್ಲಿ ಕಂಪ್ಯೂಟರ್‌ ಆಪರೇಟರ್‌ ಕೆಲಸ ಹುಡುಕುತ್ತಿರುವುದಾಗಿ ಹೇಳಿದ್ದರು. ಪದವಿ ಮುಗಿದ ನಂತರ ಅವರು ಕಂಪ್ಯೂಟರ್‌ ಪ್ರೋಗ್ರಾಮಿಂಗ್‌ ವಿಷಯದಲ್ಲಿ ಕೋರ್ಸ್‌ ಕೂಡ ಮಾಡಿಕೊಂಡಿದ್ದರು.

ಟಿಕೇಟನ್ನು ರೋಶನ್‌ ಅವರ ಫೋನಿಗೆ ಕಳುಹಿಸಲಾಗಿತ್ತು. ಮೊದಲಿಗೆ ಬ್ರಹ್ಮಪುರಿಯಿಂದ ನಾಗಪುರದ ತನಕ ಬಸ್‌ ಪ್ರಯಾಣ. ಮತ್ತೆ ಅಲ್ಲಿಗೆ ತಲುಪಿದ ಅವರು ತನ್ನ ಲೈವ್‌ ಲೊಕೇಶನ್‌ ಮತ್ತು ಫೋಟೋಗಳನ್ನು ನಾಗಪುರ ರೈಲ್ವೇ ನಿಲ್ದಾಣ ತಲುಪಿದ್ದಕ್ಕೆ ಸಾಕ್ಷಿಯಾಗಿ ಒದಗಿಸುವಂತೆ ಕೇಳಲಾಯಿತು. ಇವುಗಳನ್ನು ಒದಗಿಸಿದ ನಂತರ ಅವರಿಗೆ ಅಲ್ಲಿಂದ ಕೋಲ್ಕತ್ತಾ ತೆರಳುವ ರೈಲಿನ ಟಿಕೇಟ್‌ ನೀಡಲಾಯಿತು. ಟಿಕೇಟನ್ನು ಪಾಳುಬಿದ್ದ ಹೋಟೇಲ್‌ ಒಂದರಲ್ಲಿ ಭಾರಾದ್ವಾಜ ಖದ್ದು ಬಂದು ತಲುಪಿಸಿದ್ದ.

“ಅಲ್ಲಿ, ಕೋಲ್ಕತ್ತಾದಲ್ಲಿ ನಾನೊಬ್ಬನೇ ಇದ್ದಿರಲಿಲ್ಲ. ಅಲ್ಲಿ ಒಂದೇ ರೂಮಿನಲ್ಲಿ ನಾವು ಹನ್ನೆರಡು ಜನರಿದ್ದೆವು. ನಮಗೆ ರಕ್ತ ಪರೀಕ್ಷೆ ಮತ್ತು ಇತರ ಪರೀಕ್ಷೆಗಳು ಇಲ್ಲಿನ ಸಣ್ಣ ಲ್ಯಾಬ್‌ ಒಂದರಲ್ಲಿ ನಡೆಯಲಿದ್ದವು” ಎಂದು ಅವರು ನೆನಪಿಸಿಕೊಳ್ಳುತ್ತಾರೆ. ರೋಶನ್‌ ಅವರಿಗೆ ಈ ಲ್ಯಾಬ್‌ ಕೂಡಾ ಆ ಜಾಲದ ಒಂದು ಭಾಗವಾಗಿ ಕಂಡಿತ್ತು.

ಸುಂಚು ಆನ್ಲೈನ್‌ ಮೂಲಕ ಸೂಚನೆಗಳನ್ನು ಕೊಡುತ್ತಿದ್ದ. ದಾನಿಗಳು ಏನೇನು ಮಾಡಬೇಕು, ಏನು ಮಾಡಬಾರದೆನ್ನುವುದನ್ನು ಈ ಬ್ರೀಫಿಂಗ್‌ಗಳಲ್ಲಿ ವಿವರಿಸಲಾಗುತ್ತಿತ್ತು. ಈ ದಾನಿಗಳು ಮುಂದಿನ ಹ್ಯಾಂಡ್ಲರ್‌ನಿಂದ ಬರುವ ಕರೆಗಾಗಿ ಕಾಯುತ್ತಿದ್ದರು.

“ಭಾರದ್ವಾಜ ನಮ್ಮ ಮೇಲೆ ಎಚ್ಚರದ ದೃಷ್ಟಿಯನ್ನು ಇಟ್ಟಿದ್ದ, ನಾವು ಕೋಣೆಯಿಂದ ಹೊರಗೆ ಹೋಗದ ಹಾಗೆ ನೋಡಿಕೊಳ್ಳುತ್ತಿದ್ದ.”

ಅವರ ಕೈಯಿಂದ ಫೋನುಗಳನ್ನು ಕಿತ್ತುಕೊಳ್ಳಲಾಗಿತ್ತು. ಮನೆಗೆ ಫೋನ್‌ ಮಾಡುವ ಸಲುವಾಗಿಯಷ್ಟೇ ಅವರುಗಳಿಗೆ ಫೋನ್‌ ಕೊಡಲಾಗುತ್ತಿತ್ತು. ಮನೆಯವರೊಂದಿಗೆ ಮಾತನಾಡುವಾಗ ಈ ವಿಷಯಗಳ ಕುರಿತಾಗಿ ಮಾತನಾಡದಂತೆ ಎಚ್ಚರಿಸಲಾಗುತ್ತಿತ್ತು. ಇದು ಹೆಚ್ಚೂ ಕಡಿಮೆ ಅಕ್ರಮ ಬಂಧನದಂತಿತ್ತು ಎನ್ನುತ್ತಾರೆ ರೋಶನ್.‌

ಆಪರೇಷನ್‌ ಮಾಡುವುದಕ್ಕೂ ಮೊದಲು ಕ್ಲಿನಿಕಲ್‌ ಫಿಟ್ನೆಸ್‌ ನೋಡಲಾಗುತ್ತಿತ್ತು ಎಂದು ಅವರು ನೆನಪಿಸಿಕೊಳ್ಳುತ್ತಾರೆ.

12 ಜನರಲ್ಲಿ ಒಬ್ಬ ವ್ಯಕ್ತಿ ವಿಮಾನ ಕೋಲ್ಕತ್ತಾ ವಿಮಾನ ನಿಲ್ದಾಣದಿಂದ ಓಡಿ ಹೋಗುವುದರಲ್ಲಿ ಯಶಸ್ವಿಯಾಗಿದ್ದ. ಆ ವಿಮಾನ ನಿಲ್ದಾಣದಿಂದ ಅವರೆಲ್ಲ ಫ್ನೋಮ್‌ ಪೆನ್ಹ್‌ ನಗರ ತಲುಪುವವರಿದ್ದರು. ಆ ವ್ಯಕ್ತಿ ಟಾಯ್ಲೆಟ್ಟಿಗೆ ಹೋಗಿ ಬರುವುದಾಗಿ ಹೇಳಿ ತಪ್ಪಿಸಿಕೊಂಡಿದ್ದ. “ತ್ಯಾಚಿ ಫಟ್ಲೀ [ನಂಗೂ ಜೀವ ಹೋಗುವಷ್ಟು ಭಯ ಆಗಿತ್ತು]” ಎನ್ನುತ್ತಾ ರೋಶನ್‌ ನಕ್ಕರು.

ಉಳಿದವರು ತೀರದ ಹಣದ ಬಿಕ್ಕಟ್ಟಿನಿಂದಾಗಿ ಪ್ರಯಾಣಕ್ಕೆ ಮುಂದಾದರು.

“2024ರ ಅಕ್ಟೋಬರ್‌ ತಿಂಗಳ ಒಂದು ತಿಂಗಳ ಅವಧಿಯಲ್ಲಿ ನಾವೆಲ್ಲರೂ ಆಪ್ತ ಸ್ನೇಹಿತರಂತಾದೆವು. ನಾವೆಲ್ಲರೂ ಭರವಸೆಯ ಎಳೆಯೊಂದನ್ನು ನಂಬಿ ದಿನ ದೂಡುತ್ತಿದ್ದೆವು” ಎನ್ನುತ್ತಾರೆ ರೋಶನ್.‌

ಅವರು ಕೋಲ್ಕತ್ತಾದಲ್ಲಿ 10 ದಿನ ಇದ್ದರು. ಮತ್ತೆ ಕಾಂಬೋಡಿಯಾದಲ್ಲಿ ಸುಮಾರು 20 ದಿನ. ಕಾಂಬೋಡಿಯಾದಲ್ಲಿ ಇವರನ್ನು ಪ್ರೀಹ್‌ ಕೆಟ್‌ ಮೀಲೀ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಈ ಆಸ್ಪತ್ರೆ ಕಾಂಬೋಡಿಯಾ ಸರ್ಕಾರದಡಿ ಮಿಲಿಟರಿ ಸೌಲಭ್ಯವಾಗಿ ನೋಂದಣಿಯಾಗಿತ್ತು ಮತ್ತು ಇದು ಅಲ್ಲಿನ ಬಹಳ ಪ್ರಸಿದ್ಧ ಆಸ್ಪತ್ರೆ. ಅಲ್ಲಿ ಅವರು ಆಪರೇಷನ್‌ ನಡೆಯುವುದಕ್ಕೂ ಮೊದಲು ಒಂದು ವಾರ ಇದ್ದರು. ಆಪರೇಷನ್‌ ಮುಗಿದ ನಂತರ ಸುಮಾರು ಹದಿನಾಲ್ಕು ದಿನ ಉಳಿದಿದ್ದರು. ಆ ದಿನಗಳ ನೋವು ಮತ್ತು ಭಯವನ್ನು ನೆನಪಿಸಿಕೊಂಡರೆ ರೋಶನ್‌ ಈಗಲೂ ನಡುಗುತ್ತಾರೆ. ಆ ಎರಡು ವಾರ ಅವರಿಗೆ ತನ್ನ ಕುಟುಂಬವನ್ನು ಸಂಪರ್ಕಿಸಲು ಸಾಧ್ಯವಾಗಿರಲಿಲ್ಲ.

“ನಮ್ಮನ್ನು ಹೊರಜಗತ್ತಿನ ಸಂಪರ್ಕವೇ ಇಲ್ಲದ ಸಣ್ಣ ಕೋಣೆಯೊಂದರಲ್ಲಿ ಕೂಡಿ ಹಾಕಲಾಗಿತ್ತು” ಎನ್ನುತ್ತಾರೆ ರೋಶನ್.‌ “ನಮಗೆ ಹಾಕಿದ್ದ ಹೊಲಿಗೆಗಳು ಒಣಗಿದ ನಂತರ ಒಬ್ಬೊಬ್ಬರನ್ನೇ ಬೇರೆ ಬೇರೆ ಮಾರ್ಗಗಳ ಮೂಲಕ ಊರಿಗೆ ಕಳುಹಿಸಲಾಯಿತು.” ರೋಶನ್‌ ವಿಶಾಖಾಪಟ್ಟಣಮ್‌ ಮೂಲಕ ಮನೆ ತಲುಪಿಕೊಂಡರು.

ಪೊಲೀಸ್‌ ತನಿಖೆ ದೇಶದ ಗಡಿಯೊಂದಿಗೆ ಮುಗಿದುಹೋಗುತ್ತದೆ.

ರೋಶನ್‌ ಅವರ ಸಹಾಯದೊಂದಿಗೆ ಪೊಲೀಸರು ಸುಮಾರು ಅರ್ಧದಷ್ಟು ದಾನಿಗಳನ್ನು ದೇಶದ ವಿವಿದೆಡೆಗಳಲ್ಲಿ ಪತ್ತೆಹಚ್ಚಿದರು. ಇವರೆಲ್ಲರೂ ಇದೇ ಜಾಲದ ಮೂಲಕ ಕಿಡ್ನಿ ಮಾರಿಕೊಂಡಿದ್ದರು.

ಅವರಲ್ಲಿ ಒಬ್ಬ ಹಣವನ್ನು ಜೂಜಿನಲ್ಲಿ ಕಳೆದುಕೊಂಡಿದ್ದ. ಇನ್ನೊಬ್ಬ ಸ್ಟಾಕ್‌ ಮಾರ್ಕೆಟಿನಲ್ಲಿ ಹೂಡಿಕೆ ಮಾಡುವ ಮೂಲಕ ದುಡ್ಡನ್ನು ಹಾಳು ಮಾಡಿದ್ದ.

ಪಾರಿ ಅವರಲ್ಲಿ ನಾಲ್ಕು ಜನರನ್ನು ಮಾತನಾಡಿಸಿತು. ಬಹುತೇಕ ಇವರೆಲ್ಲರೂ ಮನೆಯಲ್ಲಿ ಈ ವಿಷಯ ಹೇಳಿರದ ಕಾರಣ ನಾವು ಅವರುಗಳ ಹೆಸರನ್ನು ಬಹಿರಂಗಪಡಿಸದಿರುವಕ್ಕೆ ಒಪ್ಪಬೇಕಾಯಿತು.

“ನನಗೆ ಸಾಲವಿತ್ತು. ಸಣ್ಣ ವ್ಯಾಪಾರ ಮಾಡಿಕೊಂಡಿದ್ದೆ. ಅದೂ ನಷ್ಟದಲ್ಲಿತ್ತು” ಎಂದು ಅವರಲ್ಲೊಬ್ಬರು ಪಾರಿಗೆ ತಿಳಿಸಿದರು. ಈ ವ್ಯಕ್ತಿನಿಂದ ಅಂದಿನಿಂದ ತನ್ನ ಊರಾದ ಅಲಹಾಬಾದ್‌ ತೊರೆದು ಕೇರಳದಲ್ಲಿ ಕೆಲಸ ಮಾಡಿಕೊಂಡಿದ್ದಾರೆ.

2026ರ ಮಾರ್ಚ್‌ ತಿಂಗಳ ಕೊನೆಯಲ್ಲಿ ಚಂದ್ರಪುರ ಠಾಣೆಯ ಪೊಲೀಸರು ಸೆಷನ್‌ ನ್ಯಾಯಾಲಯದ ಎದುರು ಚಾರ್ಜ್‌ಶೀಟ್‌ ಸಲ್ಲಿಸಿದರು. ನೂರಾರು ಪುಟಗಳ ಚಾರ್ಜ್‌ಶೀಟ್‌ ಜೊತೆಗೆ 6,000 ಪುಟಗಳ ಸಾಕ್ಷಿ ದಾಖಲೆಗಳನ್ನೂ ಸಲ್ಲಿಸಲಾಗಿತ್ತು. ಮುಖ್ಯ ಆರೋಪಿ ಸುಂಚು ಅಲಿಯಾಸ್‌ ಡಾ. ಕೃಷ್ಣ ಮತ್ತು ಇನ್ನೊಬ್ಬ ಕನ್ಸಲ್ಟೆಂಟ್‌ ಟ್ರಾನ್ಸ್‌ಪ್ಲಾಂಟ್‌ ಸರ್ಜನ್‌ (ಈತನ ಹೆಸರೂ ಆರೋಪಟ್ಟಿಯಲ್ಲಿದೆ) ನಡುವಿನ ಕಾಲ್‌ ಡೀಟೇಲ್ಸ್‌ ಮತ್ತು ವಾಟ್ಸಾಪ್‌ ಮಾತುಕತೆಗಳ ದಾಖಲೆಗಳೇ ನೂರಾರು ಪುಟಗಳಿದ್ದವು.

ಸಾಕ್ಷಿ ಪಟ್ಟಿಯಲ್ಲಿ ನೀಡಲಾಗಿರುವ ಪ್ರಯಾಣ ದಾಖಲೆಗಳು ಮತ್ತು ಹಣಕಾಸು ವಹಿವಾಟು ಈ ಜಾಲ ಎಷ್ಟು ಸುಸಜ್ಜಿತವಾಗಿ ಹರಡಿತ್ತು ಎನ್ನುವುದನ್ನು ತೋರಿಸುತ್ತವೆ.

ಚಾರ್ಜ್‌ಶೀಟ್ ಪ್ರಕಾರ, ಜನವರಿ 2026ರ ಆರಂಭದಲ್ಲಿ ಸೋಲಾಪುರ ಪಟ್ಟಣದ ತನ್ನ ಐಷಾರಾಮಿ ಮನೆಯಿಂದ ಬಂಧಿಸಲ್ಪಟ್ಟ ಸುಮಾರು ನಲವತ್ತೈದು ವರ್ಷದ ಸುಂಚು, ಈ ಹಿಂದೆ ಸ್ವತಃ ತನ್ನದೇ ಒಂದು ಕಿಡ್ನಿಯನ್ನು ಮಾರಾಟ ಮಾಡಿದ್ದ; ನಂತರ ಆ ಅನುಭವವನ್ನೇ ಬಳಸಿಕೊಂಡು ಅತ್ಯಂತ ವ್ಯವಸ್ಥಿತವಾದ ಅಕ್ರಮ ದಂಧೆಯನ್ನು ಕಟ್ಟಿ ಬೆಳೆಸಿದ್ದ.

ವೈದ್ಯರು, ಏಜೆಂಟರು, ಮಧ್ಯವರ್ತಿಗಳು, ಹೋಟೆಲ್ ಮಾಲೀಕರು ಮತ್ತು ಟ್ಯಾಕ್ಸಿ ಚಾಲಕರ ಬೆಂಬಲದೊಂದಿಗೆ, ಆತ ತನ್ನ ಸಾಮಾಜಿಕ ಜಾಲತಾಣಗಳ ಮೂಲಕ ಆರ್ಥಿಕ ಸಂಕಷ್ಟದಲ್ಲಿರುವ ಜನರನ್ನು ಗುರಿಯಾಗಿಸಿಕೊಳ್ಳುತ್ತಿದ್ದ ಎಂದು ತನಿಖಾಧಿಕಾರಿಗಳು ಆರೋಪಿಸಿದ್ದಾರೆ. ಈ ಜಾಲವು ಆಸ್ಪತ್ರೆಗಳು ಮತ್ತು ದಲ್ಲಾಳಿಗಳ ವ್ಯವಸ್ಥೆಯ ಮೂಲಕ ವೈದ್ಯಕೀಯ ಪರೀಕ್ಷೆಗಳು, ಪ್ರಯಾಣ ಮತ್ತು ಕಸಿ ಶಸ್ತ್ರಚಿಕಿತ್ಸೆಯ ಪ್ರಕ್ರಿಯೆಗಳನ್ನು ವ್ಯವಸ್ಥೆಗೊಳಿಸಿ, ಅಸಹಾಯಕ ದಾನಿಗಳನ್ನು ಭಾರತ ಮತ್ತು ಕಾಂಬೋಡಿಯಾದಲ್ಲಿರುವ ಗ್ರಾಹಕರೊಂದಿಗೆ ಸಂಪರ್ಕಿಸುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಜಾಲವು ಕಿಡ್ನಿ ಕಸಿ ಮಾಡಿಸಿಕೊಳ್ಳುವವರಿಂದ 50-70 ಲಕ್ಷ ರೂಪಾಯಿಗಳ ತನಕ ವಸೂಲಿ ಮಾಡುತ್ತಿತ್ತು. ಇನ್ನೂ ಕೆಲವು ಪ್ರಕರಣಗಳಲ್ಲಿ “ಕೊಳ್ಳುವವನ ಹಣಕಾಸಿನ ಸಾಮರ್ಥ್ಯವನ್ನು ಅವಲಂಬಿಸಿ” ಈ ಮೊತ್ತ ಕೋಟಿಗಳನ್ನೂ ತಲುಪುತ್ತಿತ್ತು. ಈ ದುಡ್ಡಿನಲ್ಲಿ ದಾನಿಗೆ 5-8ಲಕ್ಷ ಕೊಡಲಾಗುತ್ತಿತ್ತು. ಸರ್ಜನ್‌ ವೈದ್ಯರಿಗೆ 10-15 ಲಕ್ಷ, ಆಸ್ಪತ್ರೆಗಳಿಗೆ ಮತ್ತೆ 10/15 ಲಕ್ಷ, ಮತ್ತು ಉಳಿದ ಖರ್ಚುಗಳನ್ನು ಪೂರೈಸಿ ಸುಂಚು ಮನೆಗೆ ದೊಡ್ಡ ಮೊತ್ತವನ್ನೇ ಒಯ್ಯುತ್ತಿದ್ದ.

ತನಿಖೆಯ ಪ್ರಕಾರ ಈ ಜಾಲವು ಕಾಂಬೋಡಿಯಾದ ಜೊತೆಗೆ, ತಮಿಳುನಾಡಿನ ತಿರುಚಿಯಲ್ಲಿನ ಸ್ಟಾರ್‌ ಕೆಐಎಮ್‌ಎಸ್ ಆಸ್ಪತ್ರೆ, ಮತ್ತು ಬೆಂಗಳೂರಿನ ಆಶಾ ಆಸ್ಪತ್ರೆಗಳಲ್ಲಿ ಸುಮಾರು 30ರಿಂದ 35ರಷ್ಟು ಅಕ್ರಮ ಕಿಡ್ನಿ ಕಸಿ ಆಪರೇಷನ್‌ಗಳನ್ನು ಮಾಡಿಸಿದೆ. ಈ ಪೈಕಿ ಸ್ಟಾರ್‌ ಕೆಐಎಮ್‌ಎಸ್ ಆಸ್ಪತ್ರೆ ಈಗ ಮುಚ್ಚಿದೆ.

ರೋಶನ್‌ ಒದಗಿಸಿದ ಮಾಹಿತಿಯನ್ನು ಆಧರಿಸಿ ಪೊಲೀಸರು ಮತ್ತೊಬ್ಬ ಕಿಡ್ನಿ ದಾನಿಯನ್ನು ಪತ್ತೆಮಾಡಿದರು. ರಕ್ತಪರೀಕ್ಷೆಯಲ್ಲಿ ಕಂಡುಬಂದ ನ್ಯೂನತೆಗಳ ಕಾರಣದಿಂದಾಗಿ ಇವರಿಗೆ ಕಾಂಬೋಡಿಯಾದಲ್ಲಿ ಆಪರೇಷನ್‌ ನಡೆದಿರಲಿಲ್ಲ. ಆದರೆ ಆರು ತಿಂಗಳ ನಂತರ, ನವದೆಹಲಿಯ ಅಂಗಾಂಗ ಕಸಿ ಶಸ್ತ್ರಚಿಕಿತ್ಸಕ ಡಾ. ರವೀಂದರ್ ಪಾಲ್ ಸಿಂಗ್ ತಮಿಳುನಾಡಿನ ಸ್ಟಾರ್ ಕಿಮ್ಸ್ ಆಸ್ಪತ್ರೆಯಲ್ಲಿ ಇವರ ಕಿಡ್ನಿಯನ್ನು ಹೊರತೆಗೆದಿದ್ದರು ಎನ್ನುತ್ತದೆ ಚಾರ್ಜ್‌ಶೀಟ್.‌ "ಡಾ. ಕೃಷ್ಣ ನನಗೆ 8 ಲಕ್ಷ ರೂಪಾಯಿ ಕೊಡುವುದಾಗಿ ಹೇಳಿದ್ದರು. ಆದರೆ ಕೊನೆಗೆ ಕೊಟ್ಟಿದ್ದು ಕೇವಲ 5.5 ಲಕ್ಷ ರೂಪಾಯಿ ಮಾತ್ರ" ಎಂದು ಅವರು ಪೊಲೀಸರ ಬಳಿ ಹೇಳಿದ್ದಾರೆ. ಈ ವ್ಯಕ್ತಿಯೂ ಸುಂಚು ಓರ್ವ ವೈದ್ಯನೆಂದೇ ನಂಬಿದ್ದರು.

ಚಾರ್ಜ್‌ಶೀಟಿನಲ್ಲಿ ಡಾ. ರವೀಂದರ್ ಪಾಲ್ ಸಿಂಗ್ ಮತ್ತು ಸ್ಟಾರ್ ಕಿಮ್ಸ್ ಪ್ರವರ್ತಕ ಡಾ. ರಾಜರತ್ನಂ ಗೋವಿಂದಸ್ವಾಮಿ ಇಬ್ಬರನ್ನೂ ಅಂಗಾಂಗ ಕಳ್ಳಸಾಗಣೆ ದಂಧೆಯಲ್ಲಿ ಭಾಗಿಯಾಗಿರುವ ವೈದ್ಯರೆಂದು ಹೆಸರಿಸಲಾಗಿದೆ.

ವೈದ್ಯಕೀಯ ಪರೀಕ್ಷೆಗಳು ಮತ್ತು ಆಸ್ಪತ್ರೆಯ ಪ್ರಕ್ರಿಯೆಗಳನ್ನು ನಡೆಸಲು ಸುಂಚುವಿಗೆ ಸಹಾಯ ಮಾಡಿದ ಮಧ್ಯವರ್ತಿ ಡಾ. ಗೋವಿಂದಸ್ವಾಮಿ ಮತ್ತು ಸುಭಜಿತ್ ಪಾಲ್ ತಲೆಮರೆಸಿಕೊಂಡಿದ್ದಾರೆ.

ಪೊಲೀಸ್ ತನಿಖೆಯು ಪ್ರಸ್ತುತ ಚಾರ್ಜ್‌ಶೀಟಿನಲ್ಲಿ ಹೆಸರಿಸಲಾಗಿರುವ ತಲೆಮರೆಸಿಕೊಂಡಿರುವ ಇಬ್ಬರು ಆರೋಪಿಗಳ ಬಂಧನ ಮತ್ತು ಡಾ. ರವೀಂದರ್ ಪಾಲ್ ಸಿಂಗ್ ಪಾತ್ರವನ್ನು ಬಯಲಿಗೆಳೆಯುವುದರ ಮೇಲೆ ಗಮನವನ್ನು ಕೇಂದ್ರೀಕರಿಸಿದೆ.

ಸುಮಾರು ಆರು ತಿಂಗಳ ಕಾಲ ತಲೆಮರೆಸಿಕೊಂಡಿದ್ದ ಡಾ. ಸಿಂಗ್‌ 2024ರ ಜೂನ್‌ ತಿಂಗಳಿನಲ್ಲಿ ಚಂದ್ರಪುರ ಪೊಲೀಸರೆದುರು ಶರಣಾದ. ಈತ ಇದಕ್ಕೂ ಮೊದಲು ಬಾಂಬೆ ಹೈಕೋರ್ಟಿನ ನಾಗಪುರ ಪೀಠದ ಎದುರು ನಿರೀಕ್ಷಣಾ ಜಾಮೀನು ಅರ್ಜಿಯನ್ನು ಸಲ್ಲಿಸಿದ್ದ. ಆದರೆ ಕೋರ್ಟ್‌ ಅದನ್ನು ತಿರಸ್ಕರಿಸುವುದರv ಜೊತೆಗೆ ತನ್ನ ವಿರುದ್ಧದ ಎಫ್‌ಐಆರ್‌ ರದ್ದುಗೊಳಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನೂ “ಪರಿಗಣನೆಗೆ ಯೋಗ್ಯವಲ್ಲ” ಎಂದು ಕಾರಣ ಕೊಟ್ಟು ವಜಾಗೊಳಿಸಿತ್ತು.

ಸುಪ್ರೀಂ ಕೋರ್ಟ್‌ ಕೂಡಾ 2026ರ ಮೇ ತಿಂಗಳಿನಲ್ಲಿ ಹೈಕೋರ್ಟ್‌ ಆದೇಶದಲ್ಲಿ ಹಸ್ತಕ್ಷೇಪ ಮಾಡಲು ನಿರಾಕರಿಸಿತು. ಜೊತೆಗೆ ಡಾ. ಸಿಂಗ್‌ಗೆ ನಿಯಮಿತ ಜಾಮೀನಿಗೆ ಅರ್ಜಿ ಸಲ್ಲಿಸಲು ನಿರ್ದೇಶನ ನೀಡಿತು.

ನಿರೀಕ್ಷಣಾ ಜಾಮೀನಿನ ವಿಚಾರಣೆ ಏಪ್ರಿಲ್‌ ತಿಂಗಳಿನಲ್ಲಿ ನಡೆಯಿತು. ಅರ್ಜಿ ವಿಚಾರಣೆಯನ್ನು ಸರ್ಕಾರಿ ವಕೀಲ ದೇವೇಂದ್ರ ಚೌಹಾಣಣ್‌ ತೀವ್ರವಾಗಿ ವಿರೋಧಿಸಿದರು. ಈ ಸಂದರ್ಭದಲ್ಲಿ ಅವರು ಸುಂಚು ಬಳಿಯಿದ್ದ ಸಾಧನಗಳಿಂದ ವಶಪಡಿಸಿಕೊಳ್ಳಲಾದ ಮತ್ತು ಈಗ ಸಾರ್ವಜನಿಕ ದಾಖಲೆಯ ಭಾಗವಾಗಿರುವ ವಾಟ್ಸಾಪ್ ಸಂಭಾಷಣೆಗಳನ್ನು ಹೈಕೋರ್ಟ್ ಪೀಠದ ಮುಂದೆ ಹಾಜರುಪಡಿಸಿದರು. ವಿಚಾರಣೆಯ ಸಮಯದಲ್ಲಿ ನ್ಯಾಯಾಲಯಕ್ಕೆ ಸಲ್ಲಿಸಲಾದ ಈ ಸಾಕ್ಷ್ಯಗಳನ್ನು ಪಾರಿ ಪರಿಶೀಲಿಸಿದ್ದು, ಇವುಗಳಲ್ಲಿನ ವಿವರಗಳು ಬೆಚ್ಚಿಬೀಳಿಸುವಂತಿದ್ದವು.

ಒಂದು ಮಾತುಕತೆಯಲ್ಲಿ ಬಾಂಗ್ಲಾದೇಶದ ಢಾಕಾ ಸಮೀಪದ ಹಳ್ಳಿಯೊಂದರಿಂದ ಅಕ್ರಮವಾಗಿ ಕರೆಸಲಾದ ಬಡ ಕಿಡ್ನಿ ದಾನಿಯೊಬ್ಬ ಬೆಂಗಳೂರಿನಲ್ಲಿ ನಡೆದ ಆಪರೇಷನ್‌ ನಂತರ ನಂತರ ಮೃತಪಟ್ಟಿದ್ದಾನೆ ಎಂದು ಸುಂಚು ಡಾ. ಸಿಂಗ್‌ ಬಳಿ ತಿಳಿಸಿರುವುದಾಗಿ ಆರೋಪಿಸಲಾಗಿದೆ. ಅಲ್ಲದೆ, ಪೊಲೀಸ್ ದೂರು ದಾಖಲಾಗುವುದನ್ನು ತಡೆಯಲು ತಾನು ಆತನ ಹಳ್ಳಿಗೆ ತೆರಳಿ, ಮೃತ ದಾನಿಯ ಯುವ ಪತ್ನಿಗೆ 1 ಕೋಟಿ ರೂಪಾಯಿ ಪರಿಹಾರ ನೀಡಬೇಕಾಯಿತು ಎಂದೂ ಆತ ಹೇಳಿದ್ದಾನೆ. 3393 ಮತ್ತು 3415 ಸಂಖ್ಯೆಯ ಸಾಕ್ಷ್ಯಾಧಾರಗಳಾಗಿ ದಾಖಲಾಗಿರುವ ಈ ವಾಟ್ಸಾಪ್ ಸಂಭಾಷಣೆಗಳಲ್ಲಿ, ಬೆಂಗಳೂರಿನಲ್ಲೇ ಆ ದಾನಿಯ ಅಂತ್ಯಸಂಸ್ಕಾರವನ್ನು ಸದ್ದಿಲ್ಲದೆ ಹೇಗೆ ನೆರವೇರಿಸಲಾಯಿತು ಎನ್ನುವುದರ ಕುರಿತಾಗಿಯೂ ಚರ್ಚಿಸಲಾಗಿದೆ. ಅಷ್ಟೇ ಅಲ್ಲದೆ, ಈ ಅನಿರೀಕ್ಷಿತ ಘಟನೆಯಿಂದ ಉಂಟಾದ ಆರ್ಥಿಕ ನಷ್ಟವನ್ನು ಇಡೀ ತಂಡ ಹಂಚಿಕೊಳ್ಳಬೇಕೆಂದು ಸುಂಚು ವೈದ್ಯರಿಗೆ ತಿಳಿಸಿರುವುದು ಸಾಕ್ಷ್ಯದ ಭಾಗವಾಗಿರುವ ವಾಟ್ಸಾಪ್ ಸಂಭಾಷಣೆಯಿಂದ ಬಹಿರಂಗಗೊಂಡಿದೆ.

ಈ ಮಾತುಕತೆಗಳಲ್ಲಿ ಅನೌಪಚಾರಿಕ ಮಾರ್ಗಗಳಲ್ಲಿ ಹಣಕಾಸಿನ ವಹಿವಾಟು ನಡೆದಿರುವುದು ಸಹ ಪತ್ತೆಯಾಗಿದೆ. ಎಲ್ಲಾ ಹಣಕಾಸಿನ ವಹಿವಾಟುಗಳು ಹವಾಲಾ ವ್ಯವಸ್ಥೆಯ ಮೂಲಕವೇ ನಡೆದಿರುವುದಾಗಿ ಪೊಲೀಸರು ಡಾ. ಸಿಂಗ್‌ ನಿರೀಕ್ಷಣಾ ಜಾಮೀನು ಅರ್ಜಿಯ ವಿಚಾರಣೆ ಸಂದರ್ಭದಲ್ಲಿ ಕೋರ್ಟಿಗೆ ತಿಳಿಸಿದ್ದಾರೆ.

ಕ್ರಿಮಿನಲ್ ಪಿತೂರಿ, ಮಾನವ ಕಳ್ಳಸಾಗಣೆ, ಅಕ್ರಮ ಅಂಗಾಂಗ ವ್ಯಾಪಾರ ಮತ್ತು ಮಾನವ ಅಂಗಾಂಗ ಕಸಿ ಕಾಯ್ದೆ (ಟಿಎಚ್‌ಒಟಿಎ) ಅಡಿಯಲ್ಲಿ ಮಾನವ ಅಂಗಾಂಗಗಳ ವ್ಯಾಪಾರ ವ್ಯವಹಾರಕ್ಕೆ ಸಂಬಂಧಿಸಿದ ನಿಬಂಧನೆಗಳನ್ನು ಆರೋಪಪಟ್ಟಿಯಲ್ಲಿ ಉಲ್ಲೇಖಿಸಲಾಗಿದೆ.

ಬಾಂಬೆ ಹೈಕೋರ್ಟಿನ ನಾಗಪುರ ಪೀಠವು ನಿರೀಕ್ಷಣಾ ಜಾಮೀನು ಮನವಿಯನ್ನು ತಿರಸ್ಕರಿಸುವ ಸಂದರ್ಭದಲ್ಲಿ ಭಾರತದಾದ್ಯಂತ ಹಲವಾರು ಆಸ್ಪತ್ರೆಗಳಲ್ಲಿ ಕನ್ಸಲ್ಟೆಂಟ್‌ ಸರ್ಜನ್‌ ಆಗಿ ಕೆಲಸ ಕೆಲಸ ಮಾಡುತ್ತಿರುವ ಆರೋಪಿ ವೈದ್ಯರಿಗೆ ಅಂಗಾಂಗ ದಾನವನ್ನು ನಿಯಂತ್ರಿಸುವ ಕಾನೂನು ಚೌಕಟ್ಟಿನ ಬಗ್ಗೆ ತಿಳಿದಿತ್ತು ಎಂದು ಅಭಿಪ್ರಾಯಪಟ್ಟಿದೆ. ಹೊರಿಸಿರುವ ಆರೋಪಗಳಲ್ಲಿ ಶಾಸನಬದ್ಧ ಸುರಕ್ಷತಾ ಕ್ರಮಗಳ ಗಂಭೀರ ಉಲ್ಲಂಘನೆ, ಬಲವಂತ ಮತ್ತು ಸಂಶಯಾಸ್ಪದ ಹಣಕಾಸು ವಹಿವಾಟು ಒಳಗೊಂಡಿವೆ ಎಂದು ನ್ಯಾಯಾಲಯ ಒತ್ತಿ ಹೇಳಿದೆ.

ಈ ಪ್ರಕರಣವು ವ್ಯವಸ್ಥೆಯೊಳಗಿನ ದೊಡ್ಡ ಮಟ್ಟದ ವೈಫಲ್ಯವನ್ನು ಪ್ರತಿಬಿಂಬಿಸುತ್ತದೆ.

ರೋಶನ್ ಅವರ ಕಥೆಯಲ್ಲಿ ಶೋಷಣೆಯ ಪ್ರತಿಯೊಂದು ಹಂತವನ್ನೂ ನಾವು ನೋಡಬಹುದು. ಇದರಲ್ಲಿ ವೈದ್ಯಕೀಯ ಲೋಪಗಳು ಮತ್ತು ಅಂತರರಾಷ್ಟ್ರೀಯ ಕಳ್ಳಸಾಗಣೆ ಜಾಲಗಳು; ಆರ್ಥಿಕ ಸಾಕ್ಷರತೆಯ ಕೊರತೆ ಮತ್ತು ಸ್ಥಳೀಯ ಕಾನೂನುಗಳು ದುರ್ಬಲ ರೀತಿಯಲ್ಲಿ ಜಾರಿಗೆ ಬಂದಿರುವುದು; ಗ್ರಾಮೀಣ ಸಾಲದ ಹೊರೆ ಹಾಗೂ ಅನಿಯಂತ್ರಿತ ಖಾಸಗಿ ಲೇವಾದೇವಿ ಹೀಗೆ ಎಲ್ಲವೂ ಸೇರಿಕೊಂಡಿವೆ.

ಅಂಗಾಂಗ ಮಾರಿಕೊಳ್ಳುವ ಯೋಚನೆ ಸ್ವತಃ ಹುಟ್ಟಲು ಸಾಧ್ಯವಿಲ್ಲ. ಅಂತಹ ಆಲೋಚನೆ ಹುಟ್ಟುವುದು ಉಳಿದ ಎಲ್ಲಾ ದಾರಿಗಳು ಮುಚ್ಚಿದ್ದು, ಇದೊಂದೇ ಇರುವ ಆಯ್ಕೆ ಎನ್ನುವಂತಹ ಸನ್ನಿವೇಶ ಸೃಷ್ಟಿಯಾದಾಗ ಹುಟ್ಟುತ್ತದೆ. ಇದಕ್ಕೆ ಸಾಲ ಒತ್ತಡ ಎಲ್ಲವೂ ಕಾರಣವಾಗುತ್ತದೆ. ಅನೇಕ ಸಂದರ್ಭಗಳಲ್ಲಿ ಸಂತೃಸ್ತರು ತಾವು ಕಿಡ್ನಿ ಮಾರಿಕೊಳ್ಳುವ ಮೂಲಕ ಬಡತನದಿಂದ ಹೊರಬರಲಿದ್ದೇವೆ ಎಂದುಕೊಂಡಿರುತ್ತಾರೆ. ಆದರೆ ಬಹುತೇಕು ಬಡವರಾಗಿಯೇ ಉಳಿದಿರುತ್ತಾರೆ.

ಬರ್ಕ್ಲಿಯ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ ಆರ್ಗನ್ಸ್ ವಾಚ್ ಯೋಜನೆಯ ಸಂಸ್ಥಾಪಕರಾದ ಮಾನವಶಾಸ್ತ್ರಜ್ಞ ನ್ಯಾನ್ಸಿ ಶೆಪರ್-ಹ್ಯೂಸ್, ಜಾಗತಿಕ ಅಂಗಾಂಗ ಮಾರುಕಟ್ಟೆಗಳು ಖರೀದಿದಾರರು ಮತ್ತು ಮಾರಾಟಗಾರರ ಹತಾಶೆಯನ್ನು ಹೇಗೆ ಬಳಸಿಕೊಳ್ಳುತ್ತವೆ ಎನ್ನುವುದರ ಕುರಿತು ವ್ಯಾಪಕವಾಗಿ ಬರೆದಿದ್ದಾರೆ. ಅಂಗಾಂಗಗಳನ್ನು ಸಾಮಾನ್ಯವಾಗಿ “ಬಡವರಿಂದ ಶ್ರೀಮಂತರು” ಖರೀದಿಸುತ್ತಾರೆ.

ಜಗತ್ತಿನಾದ್ಯಂತ ಮಾನವ ಕಾಳಸಂತೆಯಲ್ಲಿ ವರ್ಷಕ್ಕೆ 10,000 ದಷ್ಟು ಮಾನವ ಅಂಗಾಂಗಳನ್ನು ಖರೀದಿ ಮಾಡಿ ಕಸಿ ಮಾಡಲಾಗುತ್ತದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ದಶಕಗಳ ಹಿಂದೆಯೇ ಅಂದಾಜಿಸಿದೆ.

“ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿರು ರೋಗಿಗಳಲ್ಲಿ ಅನೇಕರು ಆಪರೇಷನ್‌ ಮಾಡಿಸಿಕೊಳ್ಳಲು ಚೀನಾ, ಭಾರತ ಅಥವಾ ಪಾಕಿಸ್ತಾನಕ್ಕೆ ಹೋಗುತ್ತಾರೆ. ಅಲ್ಲಿ ಇವರು ಕಾಳಸಂತೆಯಲ್ಲಿ ಕಿಡ್ನಿ ಮಾರುವ ಗ್ಯಾಂಗುಗಳಿಗೆ ಒಂದು ಕಿಡ್ನಿಗೆ $ 200,000 (ಸುಮಾರು £ 128,000 ಅಥವಾ ಸುಮಾರು 2 ಕೋಟಿ ರೂ.) ತನಕ ಪಾವತಿಸುತ್ತಾರೆ. ಆದರೆ ಈ ಕಿಡ್ನಿ ವ್ಯಾಪಾರದವರು ಅಸಹಾಯಕ ಮತ್ತು ದಿಕ್ಕಿಲ್ಲದ ಜನರಿಂದ ಕೆಲವೊಮ್ಮೆ ಕೇವಲ $5,000 (ಸುಮಾರು 4-5 ಲಕ್ಷ ರೂಪಾಯಿ) ಯಷ್ಟು ಹಣ ಕೊಟ್ಟು ಖರೀದಿಸಿರುತ್ತಾರೆ.

ಹೆಚ್ಚುತ್ತಿರುವ ಸಕ್ಕರೆ ಕಾಯಿಲೆ ಮತ್ತು ಚಯಾಪಚಯ ಸಂಬಂಧಿ ಕಾಯಿಲೆಗಳಿಂದ ಕಿಡ್ನಿಗೆ ಬೇಡಿಕೆ ಹೆಚ್ಚುತ್ತಲೇ ಇದ್ದು, ಇದು ಪೂರೈಕೆಯನ್ನು ಮೀರಿದೆ.

ವಿದ್ವಾಂಸರಾದ ಶಾರದಾಮಯಿ ಚಟರ್ಜಿ ತಮ್ಮ ಉದಯೋನ್ಮುಖ ಆರ್ಥಿಕತೆಗಳ ಕುರಿತ ಅಧ್ಯಯನದಲ್ಲಿ ಹೀಗೆ ಬರೆಯುತ್ತಾರೆ: "ಇತ್ತೀಚಿನ ದಿನಗಳಲ್ಲಿ ಹೆಚ್ಚುತ್ತಿರುವ ಚಯಾಪಚಯ ಕ್ರಿಯೆಯ ದೋಷಗಳು ಜಗತ್ತಿನಾದ್ಯಂತ ಅಂಗಾಂಗ ಕಸಿ ಬೇಡಿಕೆಯನ್ನು ಗಣನೀಯವಾಗಿ ಹೆಚ್ಚಿಸಿವೆ, ಆದರೆ ಅದಕ್ಕೆ ತಕ್ಕಂತೆ ಪೂರೈಕೆ ಆಗುತ್ತಿಲ್ಲ. ಇದರಿಂದಾಗಿ ಕಾಳಸಂತೆಯಲ್ಲಿ ಅಂಗಾಂಗ ಖರೀದಿ ಹೆಚ್ಚಿದ್ದು, ಅವರಿಗೆ ಇದು ದೊಡ್ಡ ಮಟ್ಟದ ಲಾಭವನ್ನು ತಂದು ಕೊಡುತ್ತಿದೆ."

ಡ್ರಗ್ಸ್ ಮತ್ತು ಅಪರಾಧಗಳಿಗೆ ಸಂಬಂಧಿಸಿದ ವಿಶ್ವಸಂಸ್ಥೆ ವರದಿಗಳ ಪ್ರಕಾರ, ಅಂಗಾಂಗ ಹೊರತೆಗೆಯುವಿಕೆಗಾಗಿ ನಡೆಯುವ ಮಾನವ ಕಳ್ಳಸಾಗಣೆಯನ್ನು ಅಂತರರಾಷ್ಟ್ರೀಯ ಸಂಘಟಿತ ಅಪರಾಧವೆಂದು ಗುರುತಿಸಲಾಗಿದೆ; ಏಕೆಂದರೆ ವ್ಯಕ್ತಿಗಳ ನೇಮಕಾತಿ, ಸಾಗಣೆ, ಶಸ್ತ್ರಚಿಕಿತ್ಸೆ ಮತ್ತು ಹಣಕಾಸಿನ ವಹಿವಾಟುಗಳು ಹೆಚ್ಚಾಗಿ ಬೇರೆ ಬೇರೆ ದೇಶಗಳ ನ್ಯಾಯವ್ಯಾಪ್ತಿಗಳಲ್ಲಿ ನಡೆಯುತ್ತವೆ.

ಹಲವು ತನಿಖೆಗಳಲ್ಲಿ ದಾಖಲಾಗಿರುವಂತೆ ಬಾಂಗ್ಲಾದೇಶವು ಅಂಗಾಂಗ ದಾನಿಗಳ ಪ್ರಮುಖ ಮೂಲವಾಗಿ ಮುಂದುವರಿದಿದೆ. ಇನ್ನೊಂದೆಡೆ, ಕಾಂಬೋಡಿಯಾ ದೇಶವು ಅಂಗಾಂಗ ಕಳ್ಳಸಾಗಣೆ, ಸೈಬರ್ ವಂಚನೆ ಕೇಂದ್ರಗಳು, ಕಾರ್ಮಿಕರ ಕಳ್ಳಸಾಗಣೆ ಮತ್ತು ಆಧುನಿಕ ಗುಲಾಮಗಿರಿಗೆ ಖ್ಯಾತವಾಗಿದೆ ಮತ್ತು ಇವೆಲ್ಲವೂ ಒಂದಕ್ಕೊಂದು ಬೆಸೆದುಕೊಂಡಿವೆ.

ರೋಶನ್‌ ಅವರ ಪ್ರಯಾಣದ ಮಾದರಿ ಮೇಲಿನಂತೆಯೇ ಇದೆ.

ಅವರ ಕಿಡ್ನಿ ಮಾರುವ ನಿರ್ಧಾರ ಒಂದೇ ಕ್ಷಣದಲ್ಲಿ ರೂಪುಗೊಂಡಿದ್ದಲ್ಲ. ವಾರ, ತಿಂಗಳು ಎಂದು ನೋಡದೆ ಮಾತುಕತೆ ನಡೆಸಿದ ನಂತರ ಕೈಗೊಂಡಿದ್ದು. ಎಲ್ಲ ಬಗೆಯ ಲೆಕ್ಕಾಚಾರಗಳು ಮತ್ತು ಉಳಿದ ದಾರಿಗಳೆಲ್ಲ ಈ ನಿರ್ಧಾರವನ್ನು ಕೈಗೊಳ್ಳುವ ಹೊತ್ತಿಗೆ ಮುಚ್ಚಿದ್ದವು. ಇದೆಲ್ಲದರ ಒಟ್ಟಾರೆ ಪರಿಣಾಮವೇ ಅವರ ನಿರ್ಧಾರವಾಗಿತ್ತು. ಕಡೆಗೆ ಕಿಡ್ನಿ ಮಾರುವ ವಿಷಯವನ್ನು ಗಟ್ಟಿಯಾಗಿ ಬಾಯಿಬಿಟ್ಟು ಮಾತನಾಡುವ ಹೊತ್ತಿಗೆ ಅವರಿಗೆ ಅದೊಂದು ಅಸಾಧಾರಣ ಅಥವಾ ಅಸಾಧ್ಯ ಸಂಗತಿ ಎಂದು ಎನ್ನಿಸಲೇ ಇಲ್ಲ

ಇಂದು ರೋಶನ್‌ ಅವರ ಪಾಲಿಗೆ ಉಳಿದಿರುವುದು ಹೊಟ್ಟೆಯ ಎಡಭಾಗದಲ್ಲಿನ ಆಪರೇಷನ್‌ ಗೆರೆಯ ಗುರುತು ಮತ್ತು ಜೀವಿತಾವಧಿಯುದ್ದಕ್ಕೂ ಪಾಲಿಸಲೇಬೇಕಾದ ನಿಯಮಗಳು ಮತ್ತು ಮುನ್ನೆಚ್ಚರಿಕೆಗಳ ಪಟ್ಟಿ ಮಾತ್ರ. ಆರೋಗ್ಯದ ವಿಚಾರದಲ್ಲಿ ಸಣ್ಣ ಮಟ್ಟದಲ್ಲೂ ಎಡವುವ ಹಾಗಿಲ್ಲವೆನ್ನುವ ಕಟು ವಾಸ್ತವದೊಂದಿಗೆ ಅವರು ತನ್ನ ಮುಂದಿನ ಬದುಕನ್ನು ದೂಡಬೇಕಿದೆ.

ಸಿಕ್ಕ ಹಣ ನೋಡನೋಡುತ್ತಲೇ ಕರಗಿಹೋಯಿತು. ಜಮೀನು ಮತ್ತೆ ಸಿಗಲಿಲ್ಲ. ಸಾಲ ತೀರಲಿಲ್ಲ. ಅವರ ಪಾಲಿಗೀಗ ಉಳಿದಿರುವುದು ಕುಟುಂಬವನ್ನು ಕಾಪಾಡುವ ಅತಿ ದೊಡ್ಡ ಜವಾಬ್ದಾರಿ. ಯಾವುದು ತನ್ನನ್ನು ಸಾಲದಿಂದ ಮುಕ್ತಿಗೊಳಿಸುತ್ತದೆ ಎಂದು ನಂಬಿದ್ದರೋ ಅದೇ ಇಂದು ಅವರನ್ನು ಇನ್ನಷ್ಟು ಸಂಕಷ್ಟಕ್ಕೆ ದೂಡಿದೆ.

ಆದರೆ ಸಣ್ಣದೊಂದು ಸಾಲದಿಂದ ಆರಂಭವಾಗಿ ಕೋಲ್ಕತ್ತಾ ಮತ್ತು ಕಾಂಬೋಡಿಯಾದ ಮೂಲಕ ಸಾಗಿದ ಆ ದುಸ್ಸಾಹಸ ಅಲ್ಲಿಗೇ ಮುಗಿದಿರಲಿಲ್ಲ. ಅವರ ಪಾಲಿಗೆ ಆಸ್ಪತ್ರೆಗಳು ಮತ್ತು ಆಪರೇಷನ್ ಥಿಯೇಟರುಗಳ ಆಚೆಗೆ ಮತ್ತೊಂದು ಕರಾಳ ಆರ್ಥಿಕತೆಯ ನೆರಳು ಕಾದಿತ್ತು. ಅದು ನಂಬಲಸಾಧ್ಯವಾದ ಆಮಿಷವನ್ನೊಡ್ಡುವ ಆಗ್ನೇಯ ಏಷ್ಯಾದ ಗೋಲ್ಡನ್ ಟ್ರಯಾಂಗಲ್ ವ್ಯಾಪ್ತಿಯ ಸೈಬರ್ ವಂಚನೆ ಕೇಂದ್ರಗಳು ಹಾಗೂ ಅಲ್ಲಿಗೆ ಕೊಂಡೊಯ್ಯುವ ಮಾನವ ಕಳ್ಳಸಾಗಣೆ ಮಾರ್ಗಗಳು.

ಇದನ್ನು ಓದಿ: ಮಿಂಥೂರ್ ಸರಣಿ: ಭಾಗ I – ಅಂಗಾಂಗ ಕಳ್ಳಸಾಗಣೆಯ ಜಾಲದೊಳಗೆ ಸಾಲಗಾರ ಕೃಷಿಕರು