महाजन के सूद आ किडनी के लूट

रोशन सदाशिव कुले आपन साधारण स्मार्टफोन से फेसबुक अकाउंट खोलातारन औरी पुरान नोटीफिकेशन देखत एगो अइसन नोटिफिकेशन प रुकतारन जे उनकर जिनगी बदल देहलस. उ पारी के आपन मस्किल भरल जिनगी के दुसरका सूद खेप के बारे में बता रहल बाड़न.

मिन्थुर गांव में उनका घर प उनका घर के लोग अगल-बगल बईठल बा. उ लोग एकदम लार-पुआर भईल बईठल बाड़न. चुपचाप सुनतारन. अभियो उ सदमा से बहिरा नइखन निकलल.

रोशन बतावतारन कि अक्टूबर 2023 के भोरे-भोरे एक दिन 5 बजे तीन गो उधार देवे वाला लोग कार से घर के दुआरी प आईल. जब उ लोग केवाड़ी पीतल, तब परिवार सुतत रहे. ओ लोग के हाथ में लाठी रहे. उ लोग रोशन के बहुत खराब-खराब गारी दहल औरी कहल कि उनका ऊपर बहुत करजा बा, जौन उनका चुकावाहीं के परी.

उ लोग बेर-बेर आवत रहल. उ लोग कहल कि रोशन प अभी 16 लाख रोपया के करजा बाकी बा.

बाकिर रोशन के लगे उधार लेवे के सब रास्ता बंद हो गईल रहे. परिवार के सब चीज या त गिरवी राखल जा चुकल रहे ना त बेचा गईल रहे. नौकरियो पावे के उनकर कोसिस नाकामे रहल.

रोशन के इयाद बा कि साहूकार लोग में से एक आदमी कब्बो कहले रहे कि ”हमार करजा भरे खतिरा आपन किडनी बेच द, ना त हम हम फेर तहरा परिवार के ना छोड़म.”

उ साहूकार उनका के किडनी दान करेवाल एगो फेसबुक ग्रुप के बारे बतवलन औरी ओकरा में सामिल होखे के कहलन.

उ कहलन, “सुरु में हम [आपन किडनी बेचे के ले के] हिचकिचात रहनी. बाकिर जब ऊ लोग हथियार औरी लाठी ले के वसूली करे आवे लागल त हमनी सब केहू डेरा गईनी. हम इ बात प बिचार करे लगनी.”

नवंबर 2023 में एक दिन उ (फेसबुक प किडनी डोनर कम्युनिटी ग्रुप के ) ’ज्वाइन' बटन प अंगूरी ध दहलन. एक दिन के भीतरे रोशन के एगो मैसेज मिलल जौना में उनका के एगो वाट्सअप ग्रुप में सामिल होखे के कहल गईल रहे. उ पारी के बतवलन, “हमरा सक रहे औरी डरो रहे, तभियो हम मान गईनी.”

बाद में उ फेसबुक ग्रुप के हटा दहल गईल.

वाट्सऐप ग्रुप के एडमिन उनकरा के काई दिन ले एकसुरे मैसेज भेजलन. औरी समझवलन कि किडनी के दान केतना पुन्य के कार ह. कि एकरा से केहू किडनी से जूझत आदमी के नया जिनगी मिल जय. उ उनका के बतवलस कि इ काम एकदम सुरक्षित बा.

रोशन कहलें कि "अब हमरा बुझाइल कि उ अनजान आदमी हमार हैंडलर रहे.”

बाद में चंद्रपुर के पुलिस जांच में मालूम भईल कि उ आदमी हिमांशु भारद्वाज रहलें, जे अब इ मामला के आरोपी बाड़न औरी न्यायायिक हिरासत में बाड़न. उनकर काम रोशन के किडनी बेचे खातिर मनावल रहे.

एकरा बाद भईल बातचीत से मालूम चलता कि उ आदमी रोशन के बेर-बेर फोन कईलस, समझवलस औरी मोल-भाव कईलस जौन उनका आखिर में मिले के रहे. इ रकम आठ लाख रोपया के रहे. औपरेशन के तुरंत बाद इ पईसा रोशन के मेहरारू रोहिणी के खाता में आ जाए के रहे. आखिर में अक्टूबर 2024 के आखीर में भईल आपरेशन के बाद रोशन के लमसम 7.5 लाख रोपया मिलल.

इ पूरा समय रोशन अपना परिवार से इ बात लुका के रखलन. उनका मालूम रहे कि परिवार इ बात खातिर राजी ना होई.

रोहिणी अफसोस करत कहली, “हमनी के तनियक्को अंदाजा ना रहे कि रोशन आपन किडनी बेचे के सोचले बाड़न. हम उनका के अइसन कब्बो ना करे देतीं.” उनकर बाबूजी रोशन के मस्किल त बूझत रहलन, बाकिर इ फैसला से हैरानो बाड़न.

वाट्सऐप ग्रुप में एगो औरी आदमी रहे - एगो खूम दमदार बोली वाला आदमी जेकरा के डाक्टर कृष्णा कह के सामने ले आवल गईल. रोशान ईयाद कइलन कि "उ बहुत भरोसा वाला बोली में मेडिकल, कानून के कुली बात समझावस. उ एकरा के जान बचावे वाला एगो अईसन त्याग बतवलस जौन पूरा तरे से सुरखित बा.” बातचीत हमेशा वाट्स अप प मैसेज से औरी समझावे-बुझावे वाला चैट से होखे. कब्बो वाइस कॉल प ना होखे.

‘डाक्टर कृष्णा' नाम 36 साल के मुख्य आरोपी रामकृष्ण सुंचु के नकली नाम रहे. एक साल बाद उ वीडियो कौल प तब सामने अईलन, जब रोशन कम्बोडिया के नोम पेन्ह जात रहलन - जहां उनकर किडनी निकाले के सर्जरी होखे के रहे. औरी कृष्णा बीच में कोलकाता में बिलमल रहलें.

आठ महीना के बातचीत औरी उधारी देवे वाला के बढ़त दबिस के बाद, आखिर में जून 2024 में आपन किडनी बेचे खातिर तैयार हो गईलन.

उ हैंडलर औरी स्थानीय साहूकार लोग उनका के तुरंत नागपुर से पासपोर्ट बनवावे में मदद कईल. ब्रह्मपुरी में खून के जांच भईल. चार महीना बाद इ जतरा सुरु भईल.

उनकर परिवार औरी गांव वाला लोग ए बारे में कुछु ना जानत रहे. रोशन ओ लोग से इ कहले रहलन कि उ बिदेस में कंप्यूटर औप्रेटर के नोकरी खोजतारान. ग्रेजुएशन के बाद उ कंप्यूटर प्रोग्रामिंग के कोर्स कईले रहलन.

रोशन के उनका फोन प टिकट मिलल. सबसे पहिले उ ब्रह्मपुरी से नागपुर ले बस से गइलन. फेर नागपुर रेलवे स्टेशन पहुंचे के सबूत में आपन फोटो ओरी आपन लाइव लोकेशन भेजला के बाद, उनका कोलकाता के ट्रेन टिकट मिलल, जहां उनका से भारद्वाज भेंटयिलन, फेर उनका के एगो खस्ताहाल होटल में ले गईलन.

उ इयाद करत कहलन, “हम उंहा अकेले ना रहनी; हमनी 12 लोग एक्के गो कोठरी में ठुसायिल रहनी, जहां उ सब एगो छोट पैथोलोजी लैब में हमनी के ब्लड टेस्ट औरी दूसर टेस्ट कइलस.” रोशन के बुझाईल कि उ लैबवो ओही नेटवर्क के हिस्सा रहे.

सुंचु डोनर ग्रुप के साथे औनलाइन काम करस. औरी हर दिन का करे के बा औरी का नईखे करे के इ समझावस, जब उ लोग आगे इ कार करेवाला के मंजूरी के इन्तजार करत रहे.

“भारद्वाज हमनी प कड़ा नजर राखस औरी हमनी के कोठरी से बहरा ना जाए देस.”

सबके फोन ले लहल जात रहे औरी घरे फोन करे खातिर कब्बो-कब्बो दियात रहे. ओ सब के चेतावल जाय कि फोन प एकर कौनो जानकारी नईखे देवे के. रोशन के कहनाम बा कि इ एक तरे से गैरकानूनी ढंग से बंधक बना के राखे जइसन रहे.

उंहा औपरेशन में एक तरह के मेडिकल बारीकी औरी सफाई रहे. उ इयाद कईलन.

रोशन हंसत बतवलन, 12 लोग में से एगो, नोम पेन्ह जायेवाला फ्लाईट में बईठे से पहिलही पेसाब जाए के बहाने कोलकाता एयरपोर्ट से भाग गईल. “उ बहुत डेरा गईल रहे.”

बाकी लोग ऊंहे बिलमल रहल. ओ सब के पईसा के बहुत जरुरत रहे.

रोशन कहलन, “अक्टूबर 2024 के उ एक महीना में हमनी के सब केहू आपस में खूब पकिया साथी बन गईनी. हमनी आसा ना छोड़नी.”

उ लमसम 10 दिन ले कोलकाता रहलन औरी करीब 20 दिन ले कंबोडिया में. जहां ओ लोग के 'प्रीह केट मीलिया' अस्पताल ले जाईल गईल, इ कंबोडिया सरकार के सैनिक सुविधा के साथे एगो जानल-मानल अस्पताल ह. सर्जरी से पहिले उ करीब एक हफ्ता ले ओहीजा रहलन. औरी सर्जरी के बादो करीब दू हफ्ता ले ओहीजा रहलन. रोशन बतावेलें कि ओ बेरा उ दरद औरी डर में रहलन. उ पनरे दिन में उ अपना परिवार से संपर्क ना क पवलन.

रोशन कहलन, “हमनी के छोट-छोट कोठरी में बंद राखल गइल रहे. बहरी दुनिया से हमनी के कौनो संपर्क ना रहे.” उ आगे कहलन, “जब हमनी के टांका सूख गईल, तब हमनी के एक-एक कर के अलगे-अलगे रास्ता से हवाई जहाज से घरे वापस भेज दहल गईल.” उ विशाखापट्टनम के राहे आईल रहलन.

पुलिस के जांच के सिरा राष्ट्रीय सीमा प जा के ख़तम हो जाला.

रोशन के सहायता से, पुलिस भारत के अलगे-अलगे हिस्सा से लमसम दर्जन भर अइसन 'दानी' के पता लगवलस जे लोग ओही नेटवर्क के आपन किडनी देले रहे.

एगो आदमी जुआ में हार गईल रहे त दूसर आदमी स्टॉक मार्केट में सट्टेबाजी के चलते बर्बाद हो गईल रहे.

पारी चार लोग से इ शर्त प बात कईलस कि ओ लोग के पहचान ना बतावल जाई. काहे से कि ओ लोग में से सब लोग अपना परिवार से आपन इ फैसला लुकौले रहे.

ओमे से एक आदमी आपन बात फोन प पारी के बतवले रहे, “हमरा ऊपर करजा रहे औरी हमार छोट कारोबार पूरा तरे से बर्बाद हो गईल रहे.” उ आदमी अब आपन सहर इलाहबाद से दूर केरल में नौकरी करता.

मार्च 2026 के आखिर में चंद्रपुर पुलिस सत्र न्यायालय में चार्जशीट दाखिल कईलस. कुछ सौ पन्ना के इ चार्जशीट के साथे 6,000 पन्ना के दस्ताबेजी सबूतो बा. मुख्य आरोपी सुंचु औरी इ मामला में नामजद कंसल्टिंग ट्रांसप्लांट सर्जन के बीच कॉल डिटेल रिकॉर्ड औरी वाट्सऐपो प बातचीत सबूत के हिस्सा बा. औरी इ कई सौ पन्ना में बा.

सबूतन में जतरा के दस्तावेज औरी पइसा के लेन -देन के जानकरियो बा. जौन एगो मजबूत नेटवर्क के ओर इशारा करता.

चार्जशीट के मुताबिक, सुंचु - 40 बरीस के बीच के आदमी जे जनवरी 2026 के सुरुआत में सोलापुर सहर के अपना आलीसान घर से गिरफ्तार कईल गईल रहे - ऊहो आपन किडनी बेचले रहे औरी बाद में ओही अनुभव से एगो बडका कारोबार सुरु क दहलस.

जांचकर्ता के आरोप बा कि डाक्टर, एजेंट, दलाल औरी होटल मालिक, टैक्सी ड्राइवर के मदद से उ सोशल मीडिया से पईसा के तंगी से जूझत लोग के निसाना बनवलस. पुलिस के कहनाम बा कि नेटवर्क जरूरतमंद दानी लोग के भारत औरी कंबोडिया में किडनी लेवे वाला से जोरत रहे. औरी अस्पताल औरी औरी दलालन के एगो कड़ी से मेडिकल टेस्ट, जतरा, औरी ट्रांसप्लांट के काम के इंतजाम करत रहे.

किडनी लेवे वाला लोग से ट्रांसप्लांट खातिर 50-70 लाख रोपया लहल जाय. कुछ मामला में इ रकम करोड़ ले पहुँच जात रहे. इ रकम में से किडनी दानी लोग के 5-8 लाख रोपया, सर्जन लोग के 10-15 लाख रोपया औरी अस्पतालों के 10-15 लाख रोपया मिलत रहे. बाकी खर्चा औरी बिचौलीय कुल के फीस दहला के बादो सुंचु के लगे एगो बडका रकम बांचत रहे.

जांचकर्ता लोग के पता चलल कि इ नेटवर्क से कम्बोडिया के साथे-साथे तमिलनाडु के त्रिची में केआईएमएस हॉस्पीटल औरी बेंगलुरु में आशा हॉस्पीटल में 30 से 35 अवैध किडनी ट्रांसप्लांट करवावल गईल रहे. स्टार किम्स हॉस्पीटल के अब बंद क दहल बा.

रोशन के मदद से पुलिस के एगो औरी दानी के पता चलल, जेकर कम्बोडिया में आपरेसन ना हो पावल रहे. काहे से कि उनका ब्लड रिपोर्ट में कुछ दिक्कत रहे. चार्जशीट के मुताबिक, छव महीना बाद नया दिल्ली के एगो अंग प्रत्यारोपण के डाक्टर रविंदर पाल सिंह स्टार केआईएमएस हॉस्पीटल में उनकर किडनी निकललन. किडनी देवे वाला उ व्यक्ति पुलिस के बतवलन, “डाक्टर कृष्णा हमरा के 8 लाख रोपया देवे के कहलें रहलन बाकिर असल में हमरा 5.5 लाख रोपया मिलल.” उन्करो ईहे बुझात रहे कि सुंचु एगो पढल-लिखल डिग्री वाला डाक्टर हवन.

चार्जशीट में स्टार केआईएमएस के प्रमोटर डाक्टर रविंदर पाल सिंह औरी डाक्टर राजारत्नम गोविन्दास्वामी के नाम उ दू गो डाक्टर के रूप में सामिल बा जे आर्गन ट्रैफिकिंग रैकेट में सामिल रहे. डाक्टर गोविंदस्वामी औरी सुभजीत पाल (एगो बिचौलिया जे मेडिकल टेस्ट औरी हॉस्पिटल के कुल बात के इंतजाम करावे में सुंचु के मदद कईले रहस.) फरार बाड़न.

पुलिस के जांच अभी चार्जशीट में नामजद दू गो फरार आरोपी के गिरफ्तारी औरी डाक्टर रविंदर पाल सिंह के भूमिका के पता लगावे प बा ध्यान देत बा.

डाक्टर सिंह लमसम छव महीना ले गिरफ्तारी से बांचत रहलन. बाकिर 24 जून के उ चंद्रपुर पुलिस के सामने समर्पण क दहलन. अइसन तब भईल जब बाम्बे हाई कोर्ट के नागपुर बेंच उनकर अग्रिम जमानत के अर्जी खारिज क दहलस. औरी उनका खिलाफ दर्ज एफआईआर के रद्द करे के उनकर याचिका के "सुनवाई के लायक नईखे" मानत खारिज क दहल. मई 2026 में सुप्रीम कोर्ट हाई कोर्ट के इ आदेस में दखल देवे से इनकार क दहल. औरी डाक्टर सिंह के रेगुलर जमानत खातिर कोसिस करे के निर्देस दहलस.

अप्रैल में हाईकोर्ट के अग्रिम जमानत के अर्जी के बिरोध करत, सरकारी वकील देवेन्द्र चौहान बेंच के सामने सुंचु के फोन से मिलल वाट्सऐप बातचीत के जिक्र करत ओकरा के सामने ले अयिलन - जौन अब सार्वजनिक रिकार्ड के हिस्सा बा. सुनवाई के बेरा कोर्ट में दहल औरी पारी के देखल इ सबूत कुल में बहुत परेसान करे वाला बात कुल सामने आईल बा.

एगो बातचीत में सुंचू डाक्टर सिंह के बतवले बाड़न कि बांग्लादेस में ढाका के लगे के एगो गांव से आईल एगो गरीब किडनी दानी के बेंगलुरु में किडनी निकाले के सर्जरी में मौत हो गईल रहे. उनकरा गांव जा के दानी के मेहरारू के जवान मेहरारू के 1 करोड़ रोपया के मुआवजा देवे के परल कि पुलिस में रिपोर्ट ना होखे. सबूत नंबर 3393 औरी 3415 में दर्ज इ वाट्सऐप बातचीत में ए बात के जिक्र बा कि दानी के अंतिम संस्कार बेंगलुरु में चुपचाप क दहल रहे. सबूत में सामिल इ वाट्सऐप बातचीत से पता चलता कि सुंचु डाक्टर से कहले रहलन कि ई घटना से भईल खर्चा के पूरा टीम के आपस में बांटे के होई.

इ बातचीत में अनोपचारिक तरीका से कईल पईसा के लेन-देन के ब्योरा बा. सिंह के अग्रिम जमानत अर्जी प सुनवाई के बेरा पुलिस कोर्ट के बतवलस कि पईसा के सब लेन-देन हवाला तरीका से भईल रहे.

चार्जशीट में आपराधिक साजिस, अंग के अवैध बैपार औरी 'ट्रांसप्लांटेशन औफ़ ह्युमन और्गंस एंड टिश्यूज एक्ट' के तहत मानव अंग के बैपारिक लेन-देन से जुड़ल प्रावधान कुल के जिक्र बा. एकरा अलावे, एमे डेरवावे, धमकावे, जबरिया वसूली, गलत तरीका से बंधक बनावे औरी अवैध रूप से उधारी देवे जइसन अपराधो सामिल बा.

अग्रिम जमानत देवे से इनकार करत बाम्बे हाईकोर्ट के नागपुर बेंच कहलस कि आरोपी डाक्टर - जे भारत भर के कई गो अस्पताल में कंसल्टिंग सर्जन के रूप में काम कर रहल बा - अंग दान से जुडल कानूनी नियम कुल के जानत रहे. कोर्ट जोर दे के कहलस कि इ सब आरोप में कानूनी सुरक्षा उपाय कुल के गंभीर उल्लंघन, जबरदस्ती औरी धन के संदिग्ध लेन-देन सामिल बा.

इ मामला बहुत बड़का पैमाना प तंत्र के बिफलता के ओर इशारा करता.

गंवई इलाका में करजा औरी बिना नियम क़ानून के चले वाला मणि-लैंडिंग के धंधा, आर्थिक जानकारी के कमी औरी स्थानीय स्तर प नियम कुल कमजोर पालन, मेडिकल के क्षेत्र में गलत काम औरी देस कुल के बीच चले वाला तस्करी के नेटवर्क -रोशन के कहानी शोषण के हर बिंदु से जुडल बा.

अंग बेचे के फैसला सायदे कब्बो अकेले लहल जाला. इ दबाव, करजा औरी दूसर रास्ता के कम होत गईला से, जब कोनो औरी रास्ता ना रह जाला तब्बे लिहल जाला. कई मामला में बेचेवाला के बुझाला कि उ गरीबी से बहरा निकाल रहल बा. बाकिर बेसी मामला में उ गरीबी में बनल रहेला.

बर्कले के कैलीफोर्निया यूनिवर्सिटी में 'और्गंस वॉच' प्रोजेक्ट के संस्थापक औरी मानव विज्ञानी नैन्सी शेपर ह्यूज इ बारे में बहुत कुछ लिखले बाड़ी कि कईसे ग्लोबल ऑर्गन मार्किट कीने औरी बेचे वाला ,दुनू के मजबूरी के फायदा उठावता. औरी अंग "गरीब से अमीर " ले पहुंचता.

वर्ल्ड हेल्थ आर्गेनाइजेशन दस साल से पहिले अंकले रहे कि दुनिया भर में इंसानी अंग कीने से होखे वाला कालाबजारी ट्रांसप्लांट आपरेशन के सालाना संख्या 10,000 बा.

डब्लूएचओ देखलस कि "मरीज, जेमे से कई गो लोग सर्जरी खातिर चीन, भारत चाहे पाकिस्तान जाला, उ लोग कमजोर औरी मजबूर लोग के अंग निकाले वाला गैंग के किडनी खातिर 200,000 डॉलर (करीब 2 करोड़ रोपया) ले दे सकेला. जबकि ऊहे अंग कब्बो-कब्बो खाली 5,000 डॉलर में मिल जाला."

डायबिटीज औरी दूसर मेटाबोलिक बेमारी के बढ़े के चलते किडनी के मांग, ओकरा पूरा करे से बेसी बनल बा.

ऊगत अर्थबेवस्था प कईल गईल पढ़ाई में स्कॉलर सारदामई चटर्जी लिखतारी, “अभी के समय में मेताबौलिज्म से जुडल बेमारी के बढ़े से दुनिया भर में ट्रांसप्लांट खातिर अंग के मांग बढ़ गईल बा, जबकि एकर सप्लाई कम बा. एही कारन कीने वाला अंग के एगो बडका ग्लोबल ब्लैक मार्केट बन गईल बा.”

यूनाइटेड नेशंस ऑफ़ीस ऑन ड्रग्स एंड क्राइम के रिपोर्ट में अंग निकाले खातिर कईल गईल तस्करी के एगो अंतरराष्ट्रीय अपराध बतावल बा. काहे से कि एमे लोग के जोरल, एक जघे से दुसरा जघे ले जाईल, सर्जरी करवाल औरी पईसा के लेन-देन के काम अलगे-अलगे देस के अधिकार क्षेत्र में होला.

कई सारा दर्ज कइल जांच में बांग्लादेस के डोनर के संख्या सबसे जादे बतावल गईल बा. ऊंहें कंबोडिया अंग तस्करी, साइबर-स्कैम सेंटर, मानव दुर्व्यापार औरी आधुनिक तरह के गुलामी से जुडल होखला से बदनाम हो गईल बा.

रोशनो के सफ़र करीब एही तरे रहल.

इ फैसला एक पल में ना लिहल गईल. इ हफ्ता, महीनन के बातचीत, हिसाब-किताब औरी दूसर रास्ता के धीरे-धीरे ख़तम भईला के बाद बनल. जब किडनी देवे के बात जोर से कहल गईल त उ बात खराब ना लागत रहे.

आज रोशन के पेट प एगो लमहर निसान बा. औरी जिनगी भर कुछ खास बात के धेयान औरी परहेजी राखे के बा. उनका ई बात के साथे जीये के बा कि सेहत के मामला में उनकर तनियक्को गलती ना सहाई.

जौन पईसा मिलल उ जल्दीए बिला गईल. जमीन वापस ना मिलल. कर्जो ना उतरल. बस ईहे सोच के रह गइलन कि जौना फैसला से उनका बुझाइल कि उनकर परिवार बाच जाई ऊहे उनका के एगो बडका जाल में फंसा दहलस.

बाकिर गांव के करजा से सुरु भईल ई जतरा कोलकाता औरी कंबोडिया से गुजरल. इ सफ़र अभी ख़तम ना भईल रहे. आस्पताल औरी थियेटर के बाहरे एगो औरी अवैध कारोबार के दुनिया ठाड़ रहे - जौन दक्षिण-पूर्व एशिया के साइबर-स्कैम के 'गोल्डन ट्रायंगल' रहे औरी तस्करी के कुल राह उहां पहुँचत रहे - और एगो अइसन प्रस्ताव देत रहे जौना प बिस्वास कईल मस्किल बा.

पढ़ीं: मिन्थुर सीरीज:
भाग 1 - गाय बचावेला करजा लेलन, सूदखोर किडनी ले गइल