गाय बचावेला करजा लेलन, सूदखोर किडनी ले गइल

“हम असल में भाग्यशाली बानी,” रोशन सदाशिव कुले पारी से कहेलन. भाग्यशाली काहें कि उ जिन्दा बाड़ें आ अपनी घर में बाड़ें.

ई कुल पांच साल पहिले शुरू भईल जब मिन्थुर गांव के 34 बरिस के ए किसान के 12 गो जर्सी गाईन के लम्पी त्वचा रोग हो गईल. मार्च 2021 के समय रहे. महाराष्ट्र भर में मवेशी ए बेमारी से मरत रहलें सन आ ओही दौरान कोविड-19 के दूसरा लहर पूरा देश में फईलत रहे.

“हम इलाज पर बहुत पैसा खर्चा कईनी बाकिर हालत में कवनो सुधार ना भईल,” उ याद करेलन.

छव गो गाय मर गईली सन. दूध उत्पादन बुरी तरह से घट गईल. डेयरी से होखे वाला आमदनी बंद हो गईल बाकिर खर्चा ना कम भईल. चंद्रपुर के जंगलन से घिरल नागभीड़ तहसील के ए छोट किसान के लगे अपनी बचल छव गो गाईन खातिर दवाई आ टीका कीने के पईसा ना रहे.

महामारी के वजह से पैदा भईल नकदी संकट के दौरान बैंक से कर्जा मिलल मुश्किल रहे. बैकिंग संवाददाता के रूप में काम कर रहल एगो दोस्त के कहला पर रोशन पास के ब्रह्मपुरी क़स्बा में एगो निजी तौर पर कर्जा देवे वाला कर्जदाता से अनौपचारिक रूप से 1 लाख रुपया के कर्जा लिहलें.

उनका बुझाईल कि उनकर तात्कालिक संकट खतम हो गईल बा.

“बाकिर एइजे से कुल शुरू भईल,” उ याद करेलन.

मार्च 2021 में अपनी गाईन के जान बचावे वाली दवाई कीने खातिर रोशन जवन 1 लाख रुपया के कर्जा लेले रहलें, उ गैर-पंजीकृत कर्जदाता लोगन के चंगुल में फसंला के बाद बढ़त-बढ़त 50 लाख ले पहुंच गईल. एकरी बाद डेयरी किसान रोशन एगो अवैध अंग प्रत्यारोपण रैकेट के जाल में भी फंस गईलें जेकर कीमत उनके आपन एगो किडनी गंवा के चुकावे के पड़ल. उ एगो अंतर्राष्ट्रीय साइबर अपराध के रैकेट के जाल में भी फंसलें जे उनके लाओस पहुंचा दिहलस.

रोशन नवम्बर 2025 में दर्ज एगो मामला में शिकायतकर्ता आ पीड़ित हवे जेकर जांच पुलिस अधिकारियन के जरिये देश भर ले गइल आ ए दौरान कई गो भयानक ठगी नेटवर्क के खुलासा भईल.

पारी के हाथ लगल एफआईआर, सबूत, आरोपपत्र से एह रैकेट के असली चेहरा सामने आइल. रोशन आ उनकी परिवार के सदस्यन से भईल बातचीत से पता चलल कि सूदखोरी के जाल के तार अवैध अंग व्यापार नेटवर्क से जुड़ल रहे. ई व्यापार राज्यन आ पड़ोसी देशन तक ले फईलल बिचौलियन, अस्पतालन आ डॉक्टरन से जुड़ के गहराई ले जड़ जमा चुकल बा.

ए मामला दू गो रैकेट से जुड़ल बा. पहिलका, अवैध सूदखोरी के आ दोसरका ओकरो से बड़ अवैध अंग तस्करी के बा.

चंद्रपुर पुलिस हाल में ही सेशंस कोर्ट में एगो प्रारंभिक आरोपपत्र दाखिल कईले बा जेमे 6,000 पन्ना के दस्तावेजी सबूत शामिल बा – एमे पीड़ितन के बयान, बैंक लेन-देन, यात्रा रिकॉर्ड, व्हाट्सअप चैट, अस्पताल के दस्तावेज, कथित तौर पर फर्जी पहचान पत्र आ आरोपी समूहन के दू गो गुट द्वारा राखल वित्तीय डायरी दर्ज बा.

अप्रैल के मध्य में चंद्रपुर जिला पुलिस मुख्यालय में आपन बयान दर्ज होखे के इंतजार करत दू गो बच्चन के बाप रोशन आंख में आंसू भरले पारी के बतावेलें कि जरूरत के ओ समय पर लिहल गईल कर्जा उनके आ उनकी परिवार के अइसन दलदल में ढकेल दिहलस जेसे निकले खातिर उ पांच साल बाद अभियो संघर्ष कर रहल बाड़ें.

“काश, हम उ कर्जा ना लेले होतीं,” रोशन अफ़सोस जतावेलें.

ग्रामीण विदर्भ में कर्जा लिहल बहुत भारी पड़ सकेला. बाकिर रोशन के मामला में कर्ज चुकावे के मतलब अपनी शरीर के गिरवी रखला तक ले पहुंच गईल रहे. उ कम्बोडिया में 2024 में आपन एगो किडनी बेच दिहलें. ओइजा उनके एगो गुप्त अखिल भारतीय नेटवर्क के जरिये कम से कम दर्जन भर लोगन के समूह संघे ले जाईल गईल रहे. ए समूह में 20 से 32 साल के उमिर वाला उ लोग रहे जे कर्जा में डूबल रहे. अगिला साल उ लाओस में चल रहल ठगी के जानलेवा अड्डा ले पहुंच गईलें बाकिर सौभाग्य से उनके बचा लिहल गईल.

जबरन वसूली, अवैध रूप से बंधक बना के राखे आ मारपीट के आरोप में दिसम्बर 2025 में गिरफ्तार कईल गईल छव गो साहूकार अब जमानत पर बाहर बाड़ें सन. किडनी बेचे के मामला में कथित सरगना सहित लगभग आधा दर्जन अरोपियन के भारत के अलग-अलग हिस्सन से गिरफ्तार कईल गईल रहे आ उ लोग न्यायिक हिरासत में बा. एगो बड़ अस्पताल के मालिक सहित दू गो अन्य आरोपी फरार बाड़ें सन.

रोशन आ उनकी परिवार के अधिकांश लोगन के रोजी-रोटी 2021 ले डेयरी व्यवसाय से होखे वाला नियमित आमदनी पर टिकल रहे बाकिर लम्पी त्वचा रोग से ई संकट पैदा भईल. एकरी अलावा, उ लोग अपनी चार एकड़ के खेत में धान आ सब्जी उगावें. रोशन आ उनकर छोट भाई अमोल हाले में डेयरी के काम शुरू कईले रहलें.

उनकर पिता सदाशिव कुले, पास के नागभीड़ क़स्बा के रेलवे में लोकोमोटिव शेड में मेकैनिक के पद से मामूली पेंशन ले के रिटायर भईल बाड़ें. उ अपनी बचत से जमीन कीनले रहलें आ अपनी तीन गो बच्चा- दू बेटा एक बेटी के बियाह में भी उहे पैसा लगवले रहलें.

कुले परिवार के लगे 12 गो जर्सी गाय रहे आ स्थानीय बाजार आ डेयरी कम्पनी के दूध बेच के उ लोग हर महीना करीब 80,000 रुपया कमायें. रोशन आ अमोल सरकारी योजना के तहत बैंक से लिहल गईल कर्ज से एगो बड़ पशु शेड बनववले रहलें आ डेयरी के काम बढ़ावे के सोचत रहलें.

तबले गाय बेमार पड़े आ मरे लगली सन.

कर्जा देवे वाला मनीष घाटबांधे – जेकर नाम एफआईआर आ आरोपपत्र में आरोपी के रूम में दर्ज बा- रोशन के कम समय पर कर्जा दिहलस.

रोशन के आरोप बा कि कुछ ही हफ्ता के भीतर कर्जा के शर्त सख्त हो गईल.

“उ हमके 15 दिन में कर्जा लौटावे के कहलस,” रोशन बतावेलें. “जब हम ना लौटा पवनी त उ हमके 20 प्रतिशत ब्याज आ हर दिन 5,000 रूपया के जुरमाना लगा दिहलस.”

रोशन जब एकर विरोध कईलें त उनके मारल पीटल गईल. एसे परिवार बुरी तरह डेरा गईल. एकरी बाद जवन भईल, उ खाली एगो कर्जा के बेकाबू भईला के कहानी ना रह गईल, बल्कि कई कर्जा एक दूसरा पर चढ़त गईल आ कुलही पर बेहिसाब ब्याज जोड़ात गईल. आपन पईसा चुकावे खातिर कर्जा देवे वाला रोशन के दूसरा के लगे भेजलस, दूसरा उनके तीसरा के लगे भेजलस आ सिलसिला अईसही आगे चलत गईल.

उनकी बयान आ आरोपपत्र में जवन नाम बार-बार आ रहल बा, उ हवे – किशोर बावनकुले, लक्ष्मण उके (उरकुडे), प्रदीप बावनकुले, सत्यवान बोरकर आ संजय बल्लारपुरे.

“ऊ कुल हमके सहकारी समिति, माइक्रोफाइनेंस संस्थानन आ बैंकन से कर्जा लेवे खातिर मजबूर कईलें. हमार कर्जा मंजूर करवावे खातिर उन्ह्नी के फर्जी दस्तावेज तैयार कईलें सन ताकि हम उन्ह्नी के पईसा चुका देईं,” पांच महीना के दौरान भईल कई गो बातचीतन में से एक के दौरान रोशन पारी के बतवले रहलें.

पईसा बैंक से निकासी, रिश्तेदारन आ सहकारी संस्थानन से लिहल गईल कर्जा के माध्यम से जुटावल गईल. उधर लिहल गईल रकम के एगो बड़ हिस्सा तुरंत पुरान कर्जा चुकावे में लगा दिहल जाओ. कबो बैंक या यूपीआई ट्रांसफर के माध्यम से आ कबो नकद.

अपनी एफआईआर में रोशन अपना से वसूलल गईल रकम के हिसाब देवे के कोशिश कईले बाड़ें. ई आंकड़ा हैरान कर देवे वाला बा.

“हम मनीष घाटबांधे से 1 लाख रुपया लेले रहनी. हम ओके 6.5 लाख रुपया चुकवनी,” उ बतावेलें.

“हम किशोर बावनकुले से 50,000 रुपया लेले रहनी. ओके हम नकद आ ऑनलाइन ट्रांसफर से 6.58 लाख दिहनी.”

“लक्ष्मण उके से हम 4.35 लाख लेले रहनी, ओके हम 16 लाख रुपया दिहनी.”

“प्रदीप से हम 2.8 लाख लेले रहनी आ ओके बदला में 13 लाख रूपया आ एक एकड़ जमीन दिहनी.”

हम सत्यवान बोरकर आ संजय बल्लारपुरे से भी पईसा लेले रहनी आ उन्ह्नी के 3.5 लाख रुपया से अधिक के रकम चुकवनी.”

जांचकर्ता लोग जब्त कईल डायरी, बैंक विवरण आ खाता के जानकारी के जरिये जवनी लेन-देन के पुष्टि कईले बा ओसे पता चल रहल बा कि रोशन अपनी कर्जदाता लोगन के करीब 50 लाख रुपया चुकवले बाड़ें. नकद लेन-देन के कवनो हिसाब नईखे. रोशन के कहनाम बा कि उ करीब 72-75 लाख रुपया चुकवलें बाकिर नकद भुगतान के उनकी लगे कवनो सबूत नईखे.

“आरोपपत्र में हमनी के ओही रकम के जिक्र कईले बानी जा जेकर हमनी लगे सबूत बा,” चंद्रपुर के पुलिस अधीक्षक (एसपी) मुमक्का सुदर्शन कहेली.

ए साल मई में नियमित तबादला प्रक्रिया के तहत सुदर्शन के तबादला अहिल्यानगर कर दिहल गईल रहे. इहां के मामला के जांच खातिर स्थानीय क्राइम ब्रांच के अधिकारियन के एगो विशेष जांच टीम (एसआईटी) गठित कईले रहली आ अतिरिक्त पुलिस अधीक्षक ईश्वर कातखेड़े के एकर जिम्मेदारी सौंपले रहली.

आरोपपत्र में धमकावे, दबाव बनावे, गलत तरीका सा बंधक बनावे, शारीरिक मारपीट आ जबरन वसूली के आरोप भी दर्ज बा.

“एक बेर हमके गैराज में बंद कर देले रहलें सन. हमरी संघे मारपीट कईलें सन, हमार भाई भी हमरी संघे रहे,” रोशन आरोप लगावेलें.

महाराष्ट्र में निजी कर्जदाता लोग काम कर सकेला बशर्ते कि उ लोग पंजीकृत होखें आ कानून के पालन करें. आरोपपत्र के अनुसार छव गो में से कवनो कर्जदाता पंजीकृत ना रहे. राजस्व आ सहकारिता विभाग के अधिकारियन द्वारा कईल गईल जांच में भी पुष्टि भईल कि ई पूरा कामकाम गैर-कानूनी रहे.

कुले परिवार मिन्थुर में एगो बड़ स्वतन्त्र मकान में रहेला जेके कई बरिस के बचत के बाद बनावल गईल रहे आ आज ई मकान चार गो अलग-अलग वित्तीय संस्थानन के लगे गिरवी बा. नागभीड़ स्थित विदर्भ कोंकण कोआपरेटिव बैंक के शाखा से 2018 में लिहल गईल कर्जा से बनल पशु शेड भी गिरवी बा. अब उ खाली पड़ल बा.

“हमनी के अपनी जरूरत आ रोजमर्रा के खर्चा खातिर भी पईसन के जरूरत रहे. एसे कर्जा आ गिरवी रख के जुटावल गईल कुछ रकम घर के खर्चा आ अपनी माता-पिता के इलाज पर भी खर्च हो गईल,” रोशन अपनी घर में बतावेलन.

कर्जा के बोझ पूरा परिवार में फ़ैल गईल. रोशन के मेहरारू रोहिणी, भाई अमोल, भाभी शारदा, पिता सदाशिव आ माई निर्मला के नाम पर कर्जा लिहल गईल. रोशन के अपनी गांव के दोस्त, परिचित आ आपन शादीशुदा बहिन रामेश्वरी रड़के से भी उधार लेवे के पड़ल जे एही जिला के एगो दूर के गांव में रहेली.

“हमनी के अलग-अलग खाता से कर्जा लेत गईनी जा,” रोशन कहेलें.

जब ब्याज बढ़त गईल त उ लोग परिवार के करीब 14 तोला सोना के गहना क़िस्तन में गिरवी राख दिहल.

कर्जदाता उनकर स्वराज ट्रेक्टर जब्त कर लिहलें सन. दू गो मोटरसाइकिल बेच दिहल गईल. आखिरकार कुले परिवार के आपन चार एकड़ खेत भी मजबूरी में बेचे के पड़ल जेके रोशन के पिता कई साल के बचत के बाद कीनले रहलें. कर्जदाता में से एगो जमीन अपनी कब्जा में ले लिहलस.

परिवार कई रात भुक्खे सुत्तल, कई रात उ लोग डर आ चिंता में ना सुत्तल.

परिवार के लगे मौजूद हर संसाधन 2023 ले कर्जा चुकावे में चल गईल बाकिर कर्जा तब्बो खतम ना भईल.

आज परिवार रोशन के मेहरारू रोहिणी के तनखाह, उनके पिता के पेंशन आ छोट भाई अमोल के दिहाड़ी से गुजारा कर रहल बा. रोहिणी आंगनवाड़ी में सहायिका के काम करेली.

रोहिणी के कहनाम बा कि उनकर 7,500 रुपया के तनखाह में से 5,500 रुपया माइक्रो फाइनेंस के कर्जा चुकावे में चल जाला.

“माझा परिवार सुखी परिवार होता जी (हमार परिवार खुशहाल परिवार रहे),” रोशन के पिता सदाशिव कहेलें. उ बैसाखी के सहारे धीरे-धीरे चल पावेलें. “या लोकांनी पूरा लाम्बा करुन दिला आम्हले (इ लोग हमनी के पूरी तरह से कंगाल बना देले बा).”

पूरा विदर्भ में अनौपचारिक रूप से दिहल जाए वाला कर्जा औपचारिक बैंकिंग व्यवस्था के सामानांतर चलेला आ अतीत में कई गो समितियन में एके किसानन के आत्महत्या के मुख्य कारणन में से एक पावल गईल बा. अधिकारिक रिकॉर्ड ग्रामीण कर्ज व्यवस्था के वास्तविक तस्वीर के खाली एगो छोट हिस्सा देखावेला. आपात स्थिति, शादी बियाह, मवेशियन के इलाज या दूसरा छोट मोट जरूरत खातिर लिहल गईल कर्जा शायदे कबो कृषि ऋण के आंकड़न में देखाई देला. ए संकट के व्यक्तिगत समस्या के रूप में देखल जाला बाकिर एकर जड़ में गहरा संरचनात्मक कारण होखेला.

एहू मामला में आरोपी कर्जदाता खुलेआम कर्जा देवे के एगो बड़ रैकेट चलावत रहे. दर्जनों किसान आ छोट कारोबारी लोग उनसे कथित तौर पर बढ़त जाए वाला चक्रवृद्धि ब्याज आ गैर-कानूनी नियमन आ शर्तन पर कर्जा लेले रहे. पुलिस के पता चलल कि आरोपी लोग बहुत कम समय में चंद्रपुर जिला में जमीन आ दूसर संपत्ति जमा कर लेले रहलें.

रोशन के मामला स्थानीय अख़बारन आ यूट्यूब विडिओ में काफी चर्चा में रहल. एकरी बाद अरोपियन के खिलाफ व्यापक निंदा भईल आ उनके कड़ी सजा देवे के मांग उठे लागल.

नवम्बर 2025 के एक सुबह, रोशन के मेहरारू रोहिणी आत्महत्या के प्रयास कईली.

“हम एतना दबाव में रहनी कि हमरा बुझाईल आत्महत्या ही एकमात्र रास्ता बा,” उ बतावेली.

सौभाग्य से रोशन के नींद खुल गईल आ उ समय रहते देख लिहलें कि उ अपना के छत से लटकावे के कोशिश कर रहल बाड़ी. “ऊ सबेरे हमनी के दुनो जाने रोवनी जा,” उ धीमी आवाज में कहेलें.

अगिला दिन परिवार एगो परिचित के जरिये चंद्रपुर के एगो स्थानीय टेलीविजन पत्रकार से संपर्क कईलस आ कैमरा के सामने आपन आपबीती सुनवलस. रिपोर्ट प्रसारित भईल. एसपी सुदर्शन के ध्यान ए रिपोर्ट पर गईल आ उ रोशन से मुलाकात कईली. आखिरकार ब्रह्मपुरी थाना में औपचारिक एफआईआर दर्ज कईल गईल. एकरी बाद गिरफ़्तारी भईल. रोशन के आरोप बा कि उ एकरी पहिले भी पुलिस से संपर्क कईले रहलें बाकिर उनकर बात अनुसना कर दिहल गईल रहे.

बाकिर पुलिस के हस्तक्षेप से बहुत पहिले, जब गिरवी रखे खातिर कवनो जमीन या गहना ना बचल रहे आ उधार लेवे खातिर कवनो रिश्तेदार ना बचल रहे तब रोशन के बुझाईल कि उनके एसे निकले के एगो नया रास्ता मिल गईल बा. मिन्थुर से कहीं बाहर कर्ज, अदायगी आ वसूली एजेंटन के ओ परिचित चक्र से परे, एगो अउरी नेटवर्क उनकर इंतजार करत रहे जवन अंतिम समाधान निहर बुझात रहे.

कर्जदाता लोगन के उकसवला पर रोशन ओके फेसबुक पर खोज लिहलें. उनके बस ज्वाइन बटन दबावे के रहे.

अगर आप आत्महत्या के विचारन से जूझ रहल बानी या कवनो तरह के संकट में बानी त किरन के कॉल करीं या त नेशनल हेल्पलाइन 1800-599-0019 (24/7टोल फ्री) मिलाईं या फिर अपनी पास के कवनो हेल्पलाइन के सहायता लीं.

पढ़ीं: मिन्थुर सीरीज भाग 2 – महाजन के सूद आ किडनी के लूट