फकीरानी जाट मन के संग ईद

लखपत तालुका के मोरी गांव के करीम जाट कहिथे, “जइसने के तुमन देखत हव, हमन अमीर नो हन, फेर अपन महेमान (पहुना) ला माने ला जानथन. त आज जावव.” 35 ले 40 बछर के भीतरी के उमर के, वो ह कतको फकीरानी जाट मन ले एक आंय, जेकर जिनगी के ला मंय कतको बछर ले पारी बर लिखे हवं. सावला पीर मेला के बाद जब मंय लखपत ले निकरत रहेंय, वो ह मोला बिदा करत रहिस अऊ संगे संग मोला ईद-उल-फितर मनाय के नेवता घला देवत रहिस. वो ह मार्च 2024 रहिस, ये मार्च 2025 आय. मंय एक पईंत अऊ गुजरात के कच्छ मं मोरी जावत हवं. करीम भाई के नेवता के मान राखत.

करीम भाई गले लगाके मोर सुवागत करे बर अगोरत हवंय. “मोला भारी खुसी हवय के तंय आय, वो ह अपन साफ उछाह अऊ मयारू बोली मं कहिथे. “चलो टहलबो काबर के मोर तीर ये बछर के रमजान के आखिरी नमाज बर अभू घला बखत हवय.” मोरी के अपन सुग्घरता हवय – बंजर इलाका जिहां, जतक दूरिहा तक ले नजर जाय उहाँ कैक्टस के छोड़ कुछु घलो नइ ये. संझा होगे हे फेर सुरुज अब तक ले उबत हवय. वइसे, कच्छ के खाड़ी ले अवेइय्या हवा पीठ ला कंपा देथे.

एक ठन नानकन तरिया के पार मं ठाढ़ होके हमन चमकत सुरुज ला देखथन. करीम भाई फुसफुसावत कहिथे, “मंय गाड़ी मन ला बेंच देंय. मोर तीर अभू घला करीबन 200 ऊँट हवय जेन ला मोर छोटे बेटा चराथे. फेर आमदनी कम होवत हे अऊ चरी-चरागान घलो कम होवत जावत हे.” वो ह रुक जाथे अऊ ओकर बाद साफ साफ कहिथे: “संझा के नमाज के बखत होगे हे. कालि ईद आय. समस्या मन ला बताय के कोनो मतलब नइ ये. चलव सब्बो मिलके जसन मनाबो.”

ये दूरिहा गाँव मं तिहार शांत अऊ आनंद-मगन होथे. लोगन मन बढ़िया कपड़ा-लत्ता पहिरके इहाँ के मस्जिद मं नमाज बर जुरथें, एक-दूसर ले उछाह ले गले मिलथें अऊ तिहार के बधाई देथें. नमाज रात के 9 बजे सुरु होथे अऊ घंटा भर तक ले चलथे.

कामचलाऊ बने रंधनी मं, करीम जाट के घरवाली शमनी पहुना मन बर खास पकवान मीठा पूरी बनावत हवय, जेन ह मोर बंगाली सुवाद वाले मइनखे ला भाथे. माहौल ह संगीत अऊ तीर-तखार मं खेलत लइका मन के हँसी ले भरे हवय. “बढ़िया होही के तुमन पूरा कटोरी खा जाव. तभेच तुमन दीगर गाँव मन मं जाहू,” मंय शमनी जाट के अवाज ला सुनेंय. वो ह अपन रंधनी ले पहुना मन के थारी उपर नजर राखत रहिस.

समाज के ये मजबूत भाव अऊ शांत तिहार मोरी सेती सायेद सबले बड़े रहिस. काबर के चिराई नानी मं, जेन ह भचाऊ तालुका मं 66 कोस (200 किमी) ले जियादा दूरिहा रेगिस्तान मं एक ठन अऊ गाँव आय, माहौल थोकन जियादा शांत हवय. 60 बछर के सियान अयूब अमीन जाट कहिथें, “पहिली ईद मजेदार होवत रहिस. घर के सब्बो परानी तिहार मनाय बर एक संग आवत रहिन, वइसे, अब बात अलग हवय.” वो ह 80 खराई ऊँट धरके अपन सलाना जाय के रद्दा मं हवय, जेन ह कच्छ जिला के सबले खराब इलाका आय जिहा ओकर ऊँट गोहड़ी मन बर समुद्री मैंग्रोव करीबन खतम होगे हे.

नेशनल ग्रीन ट्रिब्यूनल ह साल 2018 मं तालुका मं मैंग्रोव के नास ला अपन संज्ञान मं लेगे रहिस. ओकर बाद घलो नून ह खुसर गीस, जेकर ले ये जगा के पर्यावरन तंत्र बरबाद होवत जावत हे. अब अयूब जाट जइसने ऊँट मालिक मन बर ये इलाका मं अपन जानवर मन ला चराय के बनेच कम गुंजाइस बांचे हवय. “ये इलाका के पानी अतक नुनछुर होगे हे के मोला पीये के पानी मिले घला मुस्कुल होगे हे, ऊँट मन के त बात झन करव,” वो ह कहिथे. “मंय ईद अपन परिवार के संग वोंधड़ा गाँव मं मनाय ला चाहत रहंय, फेर मंय इहींचे हवं. इहाँ मैंग्रोव बनेच कम हवय, फेर मंय अपन गोहड़ी ला छोड़े नइ सकवं,” वो ह बतावत जाथे. “कइसने करके, मंय कालि इहाँ के मस्जिद मं नमाज जरुर पढ़हूँ,” अयूब जाट कहिथे.

मंय रमजान के पवित्र महिना के आखिरी दिन लखपत तालुका मं रहंय. ध्रांगवंध गाँव मं नानी के नांव ले मसहूर नसीबीबाई शेरमोहम्मद जाट पहिली माईलोगन रहिस जेकर ले मोर भेंट होइस. “ वन अफसर मन मोर ऊँट मन ला लकठा के खाड़ी मं जाय ला नइ देवत हवंय, वो ह फोन मं कोनो ले गोठियावत रहिस, “मंय तोर ले बाद मं बात करहूँ, मोर इहाँ एक झिन पहुना आय हवय,” वो ह कहिथे अऊ मोला देखतेच सात फोन काट देथे. ओकर तीर करीबन 40 ऊँट हवय. “ईद मुबारक,” कुछेक बखत बर अपन दिक्कत मन ला बिसोरके वो ह मुचमुचावत मोर ले सवाल करथे. “ये पईंत तुमन कतक दिन रइहू? मोला लागथे के ये पईंत बछर भर तक ले लखपत मं रइहू!” “ईद मुबारक!” मंय घलो जल्दीच लाखपत आय के वादा करके जोहार झोंकत कहिथों.

वो दिन के संझा मंय करीम जाट अऊ ओकर परिवार ले घलो बिदा लेथों. “जेन तरीका ले कच्छ मं कल-कारखाना खुलत हवंय, अवेइय्या बछर मं मोर ऊँट मन के चरे बर बनेच कुछु नइ बांचही. फेर तोला कभू नइ भूलाय ला चाही के इहाँ हमेसा तोर बर मोर घर खुल्ला हवय, अवेइय्या बछर अऊ लखपत आहू,” वो ह कहिथे. मंय जावत बेरा ओकर आंखी मं बूड़त सुरुज के चमक देखत हवं.

अनुवाद: निर्मल कुमार साहू