फकीरानी जाटन संघे ईद के जश्न

“आप देखते बानी कि हमनी के धनी ना हईं जा बाकिर हमनी के मेहमानन के स्वागत कईल आवेला. त कृपया आवल जाओ,” लखपत तालुका के मोरी गांव के करीम जाट कहेलन. उमिर के चालीसवां फेंटा में पहुंचल करीम ओ फकीरानी जाट लोगन में से एक हवें जिनकर जिनगी के हम कई बरिस से पारी खातिर दस्तावेजीकरण कर रहल बानी. जब हम लखपत से सावला पीर मेला खातिर जात रहनी त उ हमके विदा भी करत रहने आ अपनी संघे ईद उल फितर मनावे के आमंत्रित भी करत रहने. उ मार्च 2024 रहे आ ई मार्च 2025 हवे. हम फिर से एक बेर करीम भाई के निमंत्रण के सम्मान करत कच्छ में मोरी की ओर जा रहल बानी.

करीम भाई गले लगा के हमरी स्वागत खातिर इंतजार कर रहल बाड़ें. “हम बहुत खुश बानी की आप अईनी,” उ अपनी आवाज में उत्साह आ स्नेह मिला के बोलेलन. “चलीं तनी टहल के आवल जाओ काहें कि ए साल रमजान के आखिरी नमाज से पहिले हमरी लगे थोड़ा समय बा.” मोरी के आपन अलग सुन्दरता बा – ई एगो बंजर क्षेत्र हवे जहां क्षितिज पर कुछ कैक्टस खड़ा बा. सांझ हो गईल बा बाकिर सूरज अभी ऊपरे बा. तब्बो कच्छ के खाड़ी से आवे वाला हवा रीढ़ के हड्डी में सिहरन पहुंचा देवेला.

एगो छोट तालाब के किनारे खड़ा हो के हमनी के शानदार सूरज के देख रहल बानी जा. “हम गाड़ी कुल बेच दिहले बानी,” करीम भाई धीमा आवाज में बोलेलन. “हमारा लगे अब्बो 200 ऊंट बा जे के हमार छोट बेटा चरावेला. बाकिर आमदनी घट रहल बा आ चारागाह वाला क्षेत्र भी.” उ एक पल रुक के आपन गला साफ़ करत के कहेलन, “सांझी के नमाज के समय हो गईल बा. काल्ह ईद हवे. शिकाईत करे के कवनो मतलब नईखे. चलीं संघे कुल चीज के आनंद लिहल जाओ.”

ई दूरदराज के गांव में त्यौहार शांति आ खुशी से भरल रहेला. लोग आपन सबसे बढ़िया कपड़ा पहिन के स्थानीय मस्जिद में प्रार्थना खातिर एकट्ठा होखेला आ एक दूसरा से गर्मजोशी से गले मिल के त्यौहार के बधाई देवेला. नमाज राती के 9 बजे से शुरू होखेला आ एक घंटा ले चलेला.

अस्थायी किचेन में करीम जाट के मेहरारू शमानी मेहमानन खातिर एगो खास व्यंजन मीठ पूरी बना रहल बाड़ी जवन हमरी बंगाली जबान पर चढ़ गईल बा. हवा में संगीत आ बच्चन के खेले कूदे के आवाज आ रहल बा. “पूरी के पूरा कटोरा खतम करीं. तब्बे आप दूसरी गांवन में जा सकेनी,” हम शमानी जाट के आवाज सुनेनी. ऊ अपनी रसोई में से मेहमान लोगन के थाली पर नजर राखेली.

समुदाय के मजबूत भावना आ शांत उत्सव सम्भवतः मोरी खातिर अनूठा रहे. काहें कि भचाऊ तालुका में 200 किलोमीटर दूर चिरई नानी गांव के माहौल थोड़ा और अधिक शांत बा. “पहिले ईद के जश्न मजेदार रहे. पूरा परिवार के सदस्य लोग एक संघे मिल के मनावें. हालांकि अब माहौल बदल गईल बा,” अयूब अमीन जाट (60) कहेलें. उ 80 खराई ऊंटन संघे अपनी सालाना प्रवासी यात्रा पर बाड़ें. उ कच्छ जिला के सबसे ख़राब हिस्सा से होत के जालें जहां उनकी पशुअन के खियावे वाला समुद्री मैनग्रोव लगभग खतम हो गईल बा.

राष्ट्रीय हरित न्यायाधिकरण 2018 में तालुका में मैनग्रोव के खतम भईला के संज्ञान लिहलस. ओकरी बाद नमक के अवैध रूप से अईला के वजह से ओ जगह के प्राकृतिक पारिस्थिकी के नुकसान भईल बा. अब एइजा अयूब जाट जईसन ऊंट मालिकन खातिर अपनी जानवरन के चरावे के बहुत कम मौका बचल बा. “ए क्षेत्र के पानी एतना खारा हो गईल बा कि हमरी खातिर पीये के पानी खोजल मुश्किल बा त ऊंटन के का कही,” उ कहेलन. “हमार मन अपनी परिवार संघे वोंदड़ा गांव में ईद मनावे के रहे बाकिर अब हम एइजा बानी. एइजा मैनग्रोव के संख्या बहुत कम बा बाकिर हम अपनी जानवरन के एही तरे ना छोड़ सकेनी एसे हम अउरी दूर जातानी. उम्मीद बा अगिला साल कुछ नीमन होखी,” उ आगे कहेलन. “खैर, हम काल्ह स्थानीय मस्जिद में नमाज पढ़े जरूर जाईब,” अयूब जाट कहेलन.

हम पवित्र रमजान के अंतिम दिन लखपत तालुका में रहनी. नसीबीबाई शेरममद जाट, जिनके ध्रांगवन्ध में नानी के नाम से जानल जाला, पहिला इन्सान हई जिनसे हम मिलनी. “वन विभाग के अधिकारी लोग हमरी ऊंटन के आसपास के नाला में जाके मैनग्रोव खाए खातिर तैरे से मना कर देले बा.” उ केहू से फोन पर कहेली, “हम बाद में बात करेनी, अभी एगो मेहमान आईल बा,” उ हमके देखत के कहेली आ फोन काट देली. उनकी लगे लगभग 40 गो खराई ऊंट बा. “ईद मुबारक”, आपन परेशानी कुछ देर खातिर भुला के उ मुस्करा के हमार स्वागत करेली आ सवाल पूछेली. “ए बेरी कब ले रहे के बा? हमरा विश्वास बा ए बेरी लखपत में आप साल भर ले रहब! ईद मुबारक!” हम उनके शुभकामना देत के फिर से जल्दिये लखपत आवे के वादा करेनी.

ओ सांझी के हम करीम जाट आ उनकरी परिवार से भी विदा लिहनी. “जे तरह से कच्छ के औद्योगीकरण हो रहल बा, आगे आवे वाला सालन में हमरी ऊंटन के चरे खातिर ढेर कुछ ना बची. बाकिर आप के भुलाये के नईखे कि आपके खातिर एगो घर एइजा हमेशा बा. लखपत में फिर से अगिला साल जरुर आईं,” उ कहेलन. हम चले वाला बानी आ हमके उनकरी आंख में डूबत सूरज के चमकदार रौशनी लउकता.

अनुवाद: विमल चन्द्र पाण्डेय