جھارکھنڈ: غائب ہوتے جنگلات، دم توڑتے ہنر

’’اگر آپ جنگل میں گھونگھو پہنیں تو آپ پر کبھی بجلی نہیں گرے گی،‘‘ جھارکھنڈ کے گملا ضلع میں واقع کوجام گاؤں کی رہائشی شُکھنی اسور کہتی ہیں۔ گھونگھو ایک طرح کی چھتری ہے جو اس علاقہ میں عام طور پر پائی جانے والی بیل، مالو پودے (پھنیرا وہلی) کے پتّوں سے بنائی جاتی ہے۔

گھونگھو سال بھر استعمال ہوتا ہے۔ گرمیوں میں یہ لو (گرم ہواؤں) سے بچاتا ہے، سردیوں میں ٹھنڈی ہوا سے، اور برسات میں بارش سے تحفظ فراہم کرتا ہے۔ خاص بات یہ ہے کہ گنبد نما گھونگھو سر پر رکھنے سے پہننے والے کے دونوں ہاتھ کام کرنے کے لیے آزاد رہتے ہیں۔

شُکھنی (۵۶) نے بچپن میں اپنی ماں سے گھونگھو بنانا سیکھا تھا۔ ’’پہلے ہر کوئی جنگل میں اگنے والے مالو کے پتّے جمع کرتا تھا اور گھونگھو بناتا تھا۔ مگر اب کم لوگ اسے استعمال کرتے ہیں، اور اس سے بھی کم لوگ اسے بناتے ہیں،‘‘ وہ مزید کہتی ہیں۔

شُکھنی کا تعلق اسور برادری سے ہے، جسے ریاست میں ’خصوصی طور پر کمزور قبائلی گروہ (پی وی ٹی جی)‘میں شمار کیا جاتا ہے۔ ان کی فیملی کے پاس اپنی ۱۰ ایکڑ زمین ہے، جہاں زیادہ تر دھان، مکئی اور گنڈلی (چھوٹا باجرا) کی کاشت کی جاتی ہے۔

بشن پور فاریسٹ رینج، شُکھنی کے تین کمروں والے کچے گھر سے بمشکل ۵۰۰ میٹر کے فاصلہ پر شروع ہو جاتی ہے، جہاں ان کی فیملی کے ۱۲ افراد رہتے ہیں۔ کوجام کے باشندے ایندھن کی لکڑی، پھل، چرائی کی زمین اور دیگر ضروریات کے لیے اسی جنگل پر انحصار کرتے آئے ہیں۔ شُکھنی کہتی ہیں، ’’ہمرا روزی روٹی سب یہی ہے۔‘‘

یہ سب گملا ضلع کے مختلف گاؤوں، بشمول کوجام کے قریب والے علاقوں میں جاری سرخ باکسائٹ کی کان کنی سے شدید متاثر ہوا ہے۔ چرائی کی زمین سکڑتی جا رہی ہے اور گاؤں کے لوگ شکایت کرتے ہیں کہ کان کنی کے لیے کھودے گئے گہرے گڑھوں میں گر کر مویشی ہلاک ہو سکتے ہیں۔

شُکھنی کہتی ہیں، ’’پانی کی سطح اتنی نیچے چلی گئی ہے کہ گرمیوں میں عورتوں کو پینے کا پانی لانے کے لیے کئی کلومیٹر پیدل چلنا پڑتا ہے۔‘‘ جب یہ رپورٹر وہاں گیا تو باکسائٹ نکالنے والی بھاری مشینوں کی دور سے آنے والی گرج – ڈرلنگ، دھماکے، لوڈنگ اور نقل و حمل – مسلسل جاری تھی۔

’’پہلے سال کے درخت اتنے گھنے تھے کہ اگر دو آدمی ایک درخت کے پیچھے کھڑے ہو جاتے تو نظر نہیں آتے تھے۔ اب دیکھو، ہر جگہ کھدائی کر دی گئی ہے،‘‘ شُکھنی کہتی ہیں۔ ’’ہمارے مویشیوں کے چرنے کے لیے بھی بہت کم جگہ بچی ہے۔ پہلے جنگل میں بہت سے جنگلی جانور ہوتے تھے، مگر کانوں میں ہونے والے دھماکوں کی وجہ سے سب غائب ہو گئے ہیں۔‘‘

شُکھنی اور ان کے پڑوسی ہر روز بشن پور فاریسٹ رینج کے زیادہ گھنے حصوں تک پہنچنے کے لیے ۱۰ سے ۱۲ کلومیٹر پیدل چلتے ہیں۔

شُکھنی کہتی ہیں، ’’ہمارے مویشی اور بکریاں چرتی رہتی ہیں اور ہم گھونگھو کے پتّے جمع کرتے ہیں۔‘‘ ان کی فیملی کے پاس تقریباً ایک درجن مویشی ہیں، جنہیں وہ تہواروں کے دوران یا مالی تنگی کے وقت فروخت کرتے ہیں۔ شُکھنی اپنے گاؤں سے ۵ کلومیٹر دور جوبھی پات ہاٹ (ہفتہ وار بازار) جا کر انہیں بیچتی ہیں۔ پچھلے سال اس سے انہوں نے ۲۵ ہزار روپے کمائے تھے۔

’’بالغ شخص کے استعمال لائق گھونگھو بنانے کے لیے ۱۰۰۰ سے ۲۰۰۰ پتّے درکار ہوتے ہیں، اور اسے بنانے میں دو سے تین دن لگتے ہیں،‘‘ شُکھنی بتاتی ہیں۔ ’’ہم عموماً لمبی ڈنڈی والے نچلے پتّے توڑتے ہیں، لیکن اگر پتّے اچھے ہوں تو درخت پر بھی چڑھ جاتے ہیں۔‘‘

مالو کی بیل، جس کے پتّے گھونگھو بنانے کے لیے استعمال ہوتے ہیں، ہمیشہ ہرا رہنے والا پودا ہے جس کی بیلیں ۱۰ سے ۳۰ میٹر تک بڑھ سکتی ہیں، اور بعض اوقات درختوں کی چوٹیوں تک پہنچ جاتی ہیں۔

گھونگھو کے ہر پتّے کی شکل چوڑی ہوتی ہے اور وہ دو گول حصوں میں تقسیم ہوتا ہے۔

شُکھنی لمبی ڈنڈی والے پتّوں کو تہہ در تہہ ترتیب دے کر گھونگھو بناتی ہیں۔ وہ سمجھاتی ہیں، “جیسے ہم لوگ مٹی کے گھر میں کھپڑیل (چھت کی ٹائلیں) سجاتے ہیں، ویسے ہی یہ پتّے سجائے جاتے ہیں۔‘‘ نرم حصہ اندر کی طرف رکھتے ہوئے پتّوں کو ایک دوسرے پر چڑھایا جاتا ہے۔ ایک پتّہ دوسرے سے اس کی ڈنڈی کے ذریعے جوڑا جاتا ہے، جہاں ڈنڈی کلپ کا کام کرتی ہے۔

جب گنبد نما ڈھانچہ تیار ہو جاتا ہے تو اسے مزید مضبوط بنانے کے لیے یہی عمل پھر سے دہرایا جاتا ہے۔ وقت کے ساتھ تازہ سبز پتّے سوکھ کر ہلکے ہو جاتے ہیں۔

گھونگھو شُکھنی کے سر سے گھٹنوں تک آتا ہے اور ہر طرف سے حفاظت فراہم کرتا ہے۔ ’’آج کل سب کے پاس رنگ برنگی پلاسٹک کی چھتریاں ہیں، گھونگھو نہیں،‘‘ شُکھنی مزید کہتی ہیں۔

’’پہلے ایک گھونگھو کے بدلے تین پَیلا دھان ملتا تھا،‘‘ وہ بتاتی ہیں۔ ’پَیلا‘ ایک معیاری ایلومینیم کا پیالہ ہے جو مقامی طور پر استعمال ہوتا ہے، اور اس میں تقریباً ایک کلو دھان آتا ہے۔ تین پَیلا یعنی تین کلو دھان، جس سے ایک کلو چاول حاصل ہوتا تھا۔

یہ بات ۳۰ سال سے بھی زیادہ پرانی ہے۔

’’اس وقت ہمارے پاس کھانے کو کچھ نہیں ہوتا تھا اور ہم ۲-۳ دن صرف ایک وقت کے کھانے پر گزارہ کرتے تھے،‘‘ شُکھنی کی سہیلی اور پڑوسن سمن اسور (۶۲) کہتی ہیں۔ وہ ۱۹۸۰ کی دہائی کے ان خشک سالوں کا ذکر کر رہی ہیں جنہوں نے اس علاقہ میں شدید غذائی قلت پیدا کر دی تھی۔ عورتیں گھونگھو جیسی روزمرہ استعمال کی چیزیں بناتیں اور انہیں پڑوسی گاؤوں میں بیچ کر گزر بسر کرتی تھیں۔

تب بھی اور اب بھی، جنگل اسور برادری کی بقا کے لیے نہایت اہم رہا ہے۔

’’ہمیں جنگل سے سب کچھ ملتا ہے – خوراک، ایندھن کی لکڑی، لوہا پگھلانے کے لیے کوئلہ، اور گھونگھو بنانے کے لیے پتّے،‘‘ شُکھنی کہتی ہیں۔ ’’ہمارے دیوتا بھی جنگل میں ہی رہتے ہیں۔‘‘ وہ کرما اور سرہل کے تہواروں میں زمین کی پوجا کرتے ہیں۔

شُکھنی کہتی ہیں، ’’ہم مالو کی بیل کے پتّوں سے پوتانگ بھی بناتے ہیں۔‘‘ پوتانگ ایک گول تہہ والا برتن ہے جو اناج، بیج اور پھول رکھنے کے لیے استعمال ہوتا ہے۔ ’’اگر آپ ان پتّوں کو ۲۰ سال تک بھی رکھیں تو ان میں کیڑے نہیں لگیں گے۔‘‘

موسم بہار کے تہوار سرہل کے دوران، جو نئے سال کے آغاز کی خوشی میں منایا جاتا ہے، پوتانگ میں نئی کٹی ہوئی دھان بھری جاتی ہے۔ شُکھنی بتاتی ہیں، ’’ہم اسے اپنے سروں پر رکھ کر رقص کرتے ہیں۔‘‘

شُکھنی کے شوہر، ۶۱ سالہ بندھوا اسور کہتے ہیں، ’’اسوروں کے بنائے ہوئے لوہے میں زنگ نہیں لگتا۔‘‘ وہ ایک لوہے کا ہتھوڑا اٹھائے ہوئے ہیں جس پر زنگ کا ایک بھی دھبہ نہیں ہے، اور ان کا دعویٰ ہے کہ یہ کم از کم ۲۰۰-۳۰۰ سال پرانا ہے۔

اسور روایتی طور پر دھات پگھلانے والے لوگ ہیں، جو کھیتی باڑی کے لیے کداری (پھاؤڑا)، ٹانگی (کلہاڑی) اور پھار (ہل) بناتے ہیں، جبکہ گھریلو استعمال کے لیے پَوسُل (لوہے کی ویلی)، ہسوا (درانتی) اور تیر تیار کرتے ہیں۔

’’ٹانگی ناتھ دھام جائیے۔ وہاں جو پھرسا (جنگی کلہاڑی) ہے، اسے اسوروں نے بنایا تھا،‘‘ بندھوا مزید کہتے ہیں۔ وہ قریب کے ایک مشہور مندر کا حوالہ دے رہے ہیں جہاں ایک قدیم پھرسا زمین میں گڑا ہوا ہے اور آج تک اس پر زنگ نہیں لگا ہے۔

’’لیکن جب سے محکمۂ جنگلات نے جنگل کا کنٹرول سنبھالا ہے، ہمارے تمام ہنر ختم ہو گئے ہیں،‘‘ بندھوا کہتے ہیں۔

فاریسٹ کنزرویشن ایکٹ، ۱۹۸۰ کے تحت، سال کے درختوں کی کٹائی پر مکمل پابندی عائد کر دی گئی۔ اس کی لکڑی سے بننے والا کوئلہ اسور لوگ بھٹّیوں میں ایندھن کے طور پر استعمال کرتے تھے، جن میں علاقہ سے ملنے والی لوہے کی کان سے لوہا نکالا جاتا تھا۔

شُکھنی کہتی ہیں، ’’بھٹّی مٹی کی بنی ہوتی ہے اور اتنی اونچی ہوتی ہے،‘‘ یہ کہتے ہوئے وہ اپنے کولہے تک اشارہ کرتی ہیں۔ بھٹّی کے اندر دونوں طرف مخروطی شکل ہوتی ہے تاکہ حرارت لوہے کی کان پر مرکوز رہے۔ آگ جلانے اور اسے برقرار رکھنے کے لیے پاؤں سے چلنے والی دھونکنی استعمال کی جاتی ہے۔

لیکن گزشتہ چند دہائیوں میں یہ بھٹّیاں خاموش ہو گئی ہیں۔ اور جب مقامی طور پر لوہا بننا بند ہو گیا تو اسوروں میں لوہے کے اوزار بنانے کا ہنر بھی زوال کا شکار ہو گیا۔

’’سرکار ہم لوگ کو بولا کہ آپ جنگل نہیں کاٹ سکتے، پھر سارا جنگل مائننگ کمپنی کو دے دیا،‘‘ بندھوا کہتے ہیں۔

وقت کے ساتھ اسور لوگ زراعت کی طرف منتقل ہو گئے۔ لیکن پٹّ علاقہ میں یہ بھی مستقل آمدنی کی ضمانت نہیں دیتا۔ شُکھنی کہتی ہیں، ’’یہاں ہمارے پاس زیادہ پانی نہیں ہے، اس لیے ہم سال میں صرف ایک بار کھیتی کرتے ہیں۔‘‘

وہ مزید کہتی ہیں، ’’کان کنی ہمارے پاس موجود تھوڑا بہت پانی بھی ختم کر دیتی ہے۔‘‘

کوجام کے بہت سے باشندوں نے مزدور کی نوکری کے بدلے اپنی زرعی زمین کان کنی کمپنیوں کو لیز پر دے دی ہے یا فروخت کر دی ہے۔ بندھوا بھی قریب کی کانوں میں یومیہ اجرت پر مزدوری کرتے ہیں، اور جن دنوں انہیں کام مل جاتا ہے، وہ تقریباً ۳۵۰ روپے کما لیتے ہیں۔

’’جہاں کہیں بھی اسور ہنر کی بات ہوتی ہے، ہم وہاں جاتے ہیں،‘‘ شُکھنی کہتی ہیں۔ ’’ہم چاروں۔‘‘ وہ حکومت یا غیر سرکاری تنظیموں کے ذریعہ لگائے گئے میلوں میں جاتی ہیں، اور اکثر ان کے ساتھ ان کی پڑوسنیں نائیہری اسور (۶۰)، ندھی اسور (۷۰) اور ٹاکی اسور (۷۵) بھی شامل ہوتی ہیں۔

پچھلے سال شُکھنی کی بیٹی کے انتقال کے بعد، وہ اپنی برادری کی دوسری نوجوان عورتوں کو اپنے ہنر کے بارے میں سکھانے کے لیے اور بھی زیادہ پُرعزم ہو گئی ہیں۔ ’’میں اپنی بیٹی کو تو نہیں سکھا سکی، لیکن اب میں اپنی باقی سب بیٹیوں کو اپنی وراثت کے بارے میں سکھاؤں گی،‘‘ شُکھنی کہتی ہیں۔

اسور قبیلہ کے بعض سرکردہ لوگ ان کے ہنر کو بدنام کرنے کی کوشش کرتے ہیں اور اسے ’نقلی‘ قرار دیتے ہیں، گویا اس میں نفاست اور اصلیت کی کمی ہو۔ کبھی کبھار شُکھنی اور ان کی سہیلیوں کو ہنر کے میلوں میں لے جایا جاتا ہے مگر انہیں کوئی معاوضہ نہیں دیا جاتا۔ لیکن شُکھنی قدرے مزاحمت کے ساتھ کہتی ہیں، ’’ہمیں اس کی پروا نہیں۔ یہ ہمارا ہنر ہے۔‘‘

یہ اسٹوری مرنالنی مکھرجی فاؤنڈیشن (ایم ایم ایف)کی فیلوشپ کے تعاون سے لکھی گئی ہے۔