تائی تورونگ زبان کو بچانے کی کوشش

ناگالینڈ کی سرحد سے متصل، آسام کے جورہاٹ ضلع میں تائی تورونگ برادری کا ایک پُرسکون اور دلکش گاؤں پوہوکوتیا شیام واقع ہے، جسے سرکاری ریکارڈ میں تیپومیا ہابی گاؤں کے نام سے جانا جاتا ہے۔* پرانی بل کھاتی کچی سڑکیں، گھنی سرسبز نباتات، روایتی سانگ گھر (کھمبوں پر تعمیر شدہ مکانات)، چھوٹے باغات اور موسم کی سختیوں سے بوسیدہ بانس کی باڑیں مل کر اس گاؤں کے دلکش اور پاکیزہ منظرنامہ کو تشکیل دیتی ہیں۔ اسی گاؤں میں ۷۷ سالہ کسان اننت تورونگ رہتے ہیں، جو اپنی مادری زبان تائی تورونگ میں الفاظ کا ایک منفرد ’ذخیرہ‘ تعمیر کر رہے ہیں۔

وہ کہتے ہیں، ’’زبان پانی کی مانند ہے، یعنی ایک بہتا ہوا دریا۔ یہ کبھی ایک جیسی نہیں رہتی، لیکن اسے اچانک بدل کر مر نہیں جانا چاہیے۔‘‘ اسی یقین کے سہارے یہ چھوٹے درجہ کے کسان گزشتہ پانچ دہائیوں سے زیادہ عرصے سے اپنی مادری زبان کی دستاویز بندی میں مصروف ہیں۔ وہ اپنی تورونگ برادری کی جڑوں پر تحقیق کرتے ہیں، الفاظ جمع کرتے ہیں، ان کی اصل، قواعدِ زبان، متعدد ہجرتوں اور ثقافتی امتزاج کے زبان کی ساخت اور استعمال پر پڑنے والے اثرات کو سمجھتے ہیں، اور ان موضوعات پر کتابوں، رسائل اور اخبارات میں لکھتے ہیں۔

یہ سب کچھ وہ اپنی ذاتی لاگت پر کرتے ہیں، اس معمولی آمدنی سے جو انہیں اپنی پانچ بیگھہ (۶ء۱ ایکڑ) زمین سے حاصل ہوتی ہے۔ ایک نجی امدادی اسکول میں چالیس برس سے زیادہ عرصے تک بطور ’غیر سرکاری‘ استاد اور منتظم خدمات انجام دینے کے باوجود انہیں کبھی تنخواہ نہیں ملی۔ جب بالآخر سرکاری امدادی گرانٹ منظور ہوئی اور وہ کلرک کی تنخواہ کے حقدار بنے، تب ان کی ریٹائرمنٹ میں صرف تین ماہ باقی رہ گئے تھے۔ لیکن اپنی زبان کو بچانے کے مشن میں کوئی بھی رکاوٹ ان کے راستے میں حائل نہ ہو سکی۔

سال ۲۰۱۱ کی مردم شماری کے لسانی اعداد و شمار میں تائی تورونگ کو ایک الگ زبان کے طور پر درج نہیں کیا گیا، بلکہ اسے تائی زبانوں کے بڑے گروہ میں شامل کر دیا گیا ہے۔ اس وجہ سے سرکاری دستاویزات کے ذریعہ اس زبان کے فعال بولنے والوں کی درست تعداد معلوم کرنا ممکن نہیں۔ چند برس قبل جب کچھ محققین نے اس بارے میں اننت تورونگ سے معلومات طلب کیں تو انہوں نے باقاعدہ میدانی تحقیق کی۔ وہ اپنے گاؤں کے ہر گھر گئے، دیگر گاؤوں کو معلومات کے لیے خطوط لکھے، اور آخرکار اس نتیجے پر پہنچے کہ ان کی زبان شدید خطرے سے دوچار ہے اور اس کے صرف ۱۴۵۶ فعال بولنے والے باقی رہ گئے ہیں۔ یہ افراد آسام کے چھ مختلف گاؤوں میں پھیلے ہوئے ہیں، جب کہ چند خاندان اروناچل میں بھی مقیم ہیں۔

زبان کے زوال اور ثقافتی ورثے کے مٹنے کا خطرہ بالکل قریب تھا۔ اننت تورونگ نے اپنی آنکھوں سے روایتی لوک گیتوں، میٹھی لوریوں اور منفرد رقصوں کو معدوم ہوتے دیکھا ہے۔ انہوں نے یہ بھی دیکھا کہ روزگار کی تلاش میں ہجرت کرنے والے خاندان اپنی زبان پیچھے چھوڑ دیتے ہیں، اور نوجوان اپنی مقامی دھنوں کو ترک کر کے آسامی بیہو گیت گانے لگتے ہیں۔ لیکن اننت تورونگ نے اپنے ’الفاظ کے ذخیرہ‘ کی تعمیر جاری رکھی۔

انہوں نے ’تورونگ گا دُم‘ (الفاظ کا ذخیرہ) کے نام سے ایک ہاتھ سے لکھی ہوئی لغت نما کتاب تیار کی ہے، جس میں انسانی جسم کے اعضاء، جانوروں کے نام، قدرتی اشیاء اور روزمرہ استعمال کے الفاظ تائی تورونگ، آسامی اور انگریزی زبانوں میں درج ہیں۔ وہ آئندہ نسلوں کے لیے ایک مکمل لغت اور گرامر کی کتاب بھی مرتب کر رہے ہیں۔ وہ کسی صلہ یا انعام کی توقع کے بغیر اپنی زبان کا ایک مستقل ذخیرہ تیار کر رہے ہیں۔ ان کی اہلیہ، ۶۳ سالہ بھانوموتی تورونگ بتاتی ہیں، ’’ان کے پاس اس لفظی کتاب کا ایک زیادہ مفصل اور طویل نسخہ بھی تھا۔ دس سال سے زیادہ عرصہ پہلے انہوں نے اسے آسام ساہتیہ سبھا کے حوالے کیا تھا، اس امید کے ساتھ کہ ایک دن وہ شائع ہو جائے گا۔ ہم اب تک اس کا انتظار کر رہے ہیں۔‘‘

اننت تورونگ کے لیے معاملہ بہت سادہ ہے، ’’تورونگ زبان کو میری زندگی کے بعد بھی زندہ رہنا چاہیے۔‘‘

*فلم میں مذکور بعض گاؤوں کے نام مردم شماری کے ریکارڈ میں اسی صورت میں نظر نہیں آئیں گے، کیوں کہ ان میں سے کئی دراصل چھوٹی بستیاں ہیں۔

پاری کا خطرے سے دوچار زبانوں کا پروجیکٹ ایک ایسے اقدام کا حصہ ہے، جسے عظیم پریم جی فاؤنڈیشن کی معاونت حاصل ہے۔ اس پروجیکٹ کا مقصد ہندوستان کی نازک اور معدومیت کے خطرے سے دوچار زبانوں کو اُن لوگوں کی آوازوں اور زندگی کے تجربات کے ذریعے دستاویزی شکل دینا ہے، جو ان زبانوں کو بولتے ہیں۔