سخت موسم میں لداخ کی سڑک بنانے والے مزدور

’’یہ وہ جگہ ہے جہاں میں ایک طرح سے برف میں دب ہی گیا تھا۔ کئی لوگوں نے سمجھا کہ شاید میں مر گیا ہوں۔‘‘

شرپ، تانگ لانگ لا میں ۱۷ ہزار ۴۸۰ فٹ کی بلندی پر ہو رہی برف باری کو یاد کرتے ہیں۔ وہ مزید کہتے ہیں، ’’دوسرے مزدور مجھ کو بچانے کے لیے دوڑے۔‘‘ شرپ کی قسمت اچھی تھی کہ فوجی اسپتال نزدیک تھا جس کی وجہ سے انہیں جلد علاج کی سہولت مل گئی۔

لداخ میں اونچے کوہستانی سلسلوں میں کام کرنے والے شرپ جیسے سڑک کی تعمیر سے وابستہ مزدوروں کو اکثر غیر یقینی موسم اور اس سے جڑے ہوئے خطرات کا سامنا کرنا پڑتا ہے۔ درجۂ حرارت اکثر صفر سے نیچے چلا جاتا ہے، مگر گزشتہ دو دہائیوں میں اور بھی کچھ ہوا ہے۔ لیہہ ضلع کے گیا گاؤں کے رہنے والے شرپ کہتے ہیں، ’’ماحولیاتی تبدیلی کے سبب برف باری تاخیر سے اور حد سے زیادہ ہونے لگی ہے۔ اس کی وجہ سے ہمیں مزید خطرات کا سامنا کرنا پڑتا ہے۔‘‘

شرپ اور ان کی ٹیم جیسے مزدوروں کو ذمہ داری ملی ہے کہ وہ اس علاقہ کے دوسرے سب سے اونچے درّہ تانگ لانگ لا کو پھر سے کھولیں۔ کڑاکے کی ٹھنڈ اور موسم کی مار کے سبب اکتوبر سے مئی تک یہ درّہ بند رہتا ہے۔ درّہ کھلنے سے لیہہ سے منالی قومی شاہراہ پر آمد و رفت ممکن ہو پاتی ہے۔ تقریباً ۴۲۸ کلومیٹر کا یہ سفر چار درّوں سے ہو کر گزرتا ہے، جن میں تانگ لانگ لا سب سے اونچا ہے۔ حالانکہ، یہاں سے نظارہ انتہائی خوبصورت دکھائی دیتا ہے، مگر تیز ہوا اور ٹھنڈ کسی کو بھی یہاں ۱۰-۱۵ منٹ سے زیادہ رکنے یا ادھر ادھر دیکھنے نہیں دیتی۔

جب شرپ اور ان کے ساتھیوں سے پاری کی ملاقات ہوئی تو وہ پہاڑی سڑکوں کے کنارے ایک دیوار بنانے میں مصروف تھے، تاکہ چٹانوں کو گرنے سے روکا جا سکے، گاڑیوں کو خطرہ نہ رہے اور سڑک کو نقصان نہ پہنچے۔ لیہہ کی زمین گرینائٹ اور ڈھیلی تلچھٹ سے بنی ہے۔ بارش کی وجہ سے، اور خاص کر بادل پھٹنے سے چٹانیں اکھڑ کر نیچے کی طرف گرتی ہیں۔ تیز ڈھلانوں کے سبب پانی کا بہاؤ بڑھتا ہے اور کھیتوں، تعمیراتی مزدوروں اور چرواہوں پر اس کا کافی برا اثر پڑتا ہے۔

شرپ بتاتے ہیں، ’’سڑکوں کی مرمت ایک تھکا دینے والا کام ہے۔ ہمیں ہاتھ سے سیمنٹ ملانا پڑتا ہے۔ ہم لوگ گرمی اور سردی میں ۷-۸ گھنٹے کام کرتے ہیں، بیچ میں دو بار چائے اور دوپہر کے کھانے کے لیے بریک لیتے ہیں۔‘‘

مہینوں بعد، اگست ۲۰۲۴ میں غروب آفتاب کے وقت میں نے لداخی لوگوں کے ایک گروپ کو پیدل اپنے گاؤں ہُندر لوٹتے دیکھا۔ شام کے ساڑھے چھ بجے تھے، گھر لوٹنے میں انہیں تھوڑی تاخیر ہو گئی تھی۔ ’’جُلے!‘‘ میں نے ان کی تکریم میں پہاڑوں میں مروج اس لفظ کا استعمال کیا۔ ’’اتنی تاخیر کیسے ہوئی؟‘‘

وہ رک کر بولے: ’’جُلے! ہم دوپہر میں کام نہیں کر پائے تھے۔ بہت گرمی تھی۔ اس لیے ہم نے آرام کیا۔‘‘ سڑک کے پاس ایک چھوٹے سے شیڈ کی طرف اشارہ کرتے ہوئے انہوں نے یہ بتایا۔ بولے، ’’ہم کڑی محنت کرتے ہیں۔ گرد و غبار اور گرمی ہمیں بہت تھکا دیتی ہے۔‘‘

یہ رپورٹ ’اسسمنٹ آف کلائمیٹ چینج اووَر انڈین ریجن‘ بتاتی ہے کہ گزشتہ چھ دہائیوں میں پورے ہمالیائی خطہ میں سطح کے درجۂ حرارت میں قابل ذکر اضافہ ہوا ہے۔ اس علاقہ میں حد سے زیادہ ٹھنڈ کا خدشہ تو برقرار رہتا ہی ہے، لیکن شدید گرمی ایک نئی اور تشویش ناک بات ہے۔

اور صرف ٹھنڈ اور گرمی ہی نہیں، یہاں بارش کا موسم بھی اُلٹ گیا ہے۔

فکرمند سونم لوٹس اپنی کھڑکی سے باہر دیکھتے ہیں جہاں اگست میں ہو رہی بارش سے نظارہ دھندلا ہو رہا ہے۔ لداخ میں محکمہ موسمیات (آئی ایم ڈی) کے ڈائرکٹر کہتے ہیں، ’’جولائی اور اگست [۲۰۲۵] میں ۴۴ ملی میٹر بارش ہوئی، جو کسی بھی لحاظ سے بہت زیادہ ہے۔‘‘

ان کی فکرمندی حالیہ تباہ کن واقعات کی وجہ سے ہے۔ لداخ نے ۲۰۰۵ سے کئی تباہ کن سیلاب کا سامنا کیا ہے، جن میں سب سے خطرناک سیلاب ۲۰۱۰ میں آیا تھا، جس میں ۲۳۳ لوگ جاں بحق ہوئے تھے۔ سال ۲۰۱۲، ۲۰۱۶ اور ۲۰۱۸ کے حالیہ دنوں میں بھی بادل پھٹنے سے کم بہاؤ والے سیلاب اور تودہ کھسکنے کے واقعات درج کیے گئے تھے۔ سونم لوٹس کے مطابق، جیسے جیسے لداخ گرم ہو رہا ہے، مزید غیر متوقع سیلاب آنے کا خطرہ ہے۔

ایک سرکاری امداد یافتہ تحقیقی ادارہ کے مطابق، اس میں کوئی شک نہیں کہ ماحولیاتی تبدیلی لداخ خطہ میں اچانک سیلاب کے واقعات اور اس کی سنگینی میں اضافہ کر رہی ہے۔ ادارہ کا ماننا ہے کہ لداخ کے ’’انوکھے جغرافیائی اور ماحولیاتی حالات اسے ان واقعات کے تئیں خاص طور پر حساس بناتے ہیں، جن کے نتائج مقامی برادریوں اور حیاتیاتی نظام پر دور رس ہوتے ہیں۔‘‘

اس سال (۲۰۲۵)، ۲۴ اگست کو بارش شروع ہوئی اور اگلے چار دن تک بغیر رکے جاری رہی، جس سے مرکز کے زیر انتظام علاقہ لداخ پوری طرح ٹھپ ہو گیا۔ لیہہ ہوائی اڈہ کو چار دنوں کے لیے بند کر دیا گیا اور اسکول، آنگن واڑی مراکز اور دوسرے سرکاری ادارے بھی بند رہے۔

اگلے دن، میرے دوست تینزن دورجے نے مجھے فون پر بتایا کہ میں کھاردُنگ لا کی چوٹی پر کام کر رہے گاؤں والوں کا انٹرویو لینے نہیں جا سکوں گا۔ انہوں نے فون پر بتایا، ’’ضلع انتظامیہ نے بھاری برف باری کے سبب گاڑیوں کی آمد و رفت پر پابندی لگا دی ہے۔ تصور کریں کہ اگست میں برف باری ہو رہی ہے؟ اب سب کچھ بہت بدل چکا ہے۔‘‘

وسط اگست میں شام ۵ بجے ساسپول میں اچانک سیلاب آ گیا تھا۔ یہ شہر لیہہ اور سرینگر ہائی وے کے درمیان ایک اہم جنکشن ہے۔ ہفتہ بھر بعد جب میں ساسپول پہنچا تو چاروں طرف اُس سیلاب سے ہوئی تباہی کے نشان موجود تھے – اکھڑے ہوئے درخت، کیچڑ، گرے ہوئے پتھر، جن سے ۱۴ فٹ چوڑی سڑک برباد ہو گئی تھی۔

لِکِر اور ساسپول جیسے آس پاس کے گاؤوں کے مزدور سڑک ٹھیک کرنے میں لگے ہوئے تھے۔ مہاجر مزدور بھی کام پر رکھے گئے تھے۔ میری ملاقات جھارکھنڈ کے راجیش بھلّا سے ہوئی، جو رات کی ڈیوٹی پر ہیں اور سامانوں کی دیکھ بھال کر رہے ہیں۔ وہ کہتے ہیں، ’’ہمیں ہمیشہ رکاوٹیں دور کرنے یا راستہ بنانے کے لیے تیار رہنا چاہیے۔ کبھی کبھی ہمیں چوبیسوں گھنٹے کام کرنا پڑتا ہے۔‘‘

اس موسم میں اتنی اونچائی پر رہنا مشکل کام ہے۔ بھلّا (۳۹) نے پاری کو بتایا، ’’گرمی کا موسم ہے، مگر رات میں اچانک برف باری شروع ہو گئی۔ ایسا لگا کہ میرا ٹینٹ میرے اوپر گر گیا ہو۔ یہ کافی ڈراؤنا تھا۔‘‘ دوپہر کے کھانے کا وقت ہو گیا تھا، اس لیے گفتگو یہیں ختم ہو گئی۔

یہ نوکریاں جھارکھنڈ، چھتیس گڑھ، بہار، مدھیہ پردیش اور ملک کے دوسرے علاقوں کے مہاجر مزدوروں کے لیے ہمیشہ مرغوب رہی ہیں۔ سال ۲۰۱۹ میں لداخ کے یو ٹی بننے کے بعد سے تعمیر سے متعلق پروجیکٹوں کو فروغ حاصل ہوا ہے، جب کہ پہلے یہ جموں و کشمیر کا ایک ضلع تھا۔

لیہہ کے ایک مقامی ٹریول ایجنٹ تینزن دورجے کے مطابق، ’’لداخ کے اسٹریٹجک محل وقوع کی وجہ سے، اور جون ۲۰۲۰ میں ہند-چین تصادم کے بعد خاص طور پر اہم تبدیلیاں رونما ہوئی ہیں۔ سڑک سے متعلق پروجیکٹوں میں اضافہ ہوا ہے، سرحدی گاؤوں سے رابطہ بہتر ہوا ہے، جس سے فوج کی آمد و رفت میں بہتری آئی ہے۔‘‘

لداخ میں ۴۳۰۰ کلومیٹر کی سڑکیں ہیں اور انتظامیہ کے ’وژن۲۰۵۰‘ میں ہدف طے کیا گیا ہے کہ سبھی سڑکیں بارہ ماسی سڑکیں بن جائیں، اس لیے یہاں سڑک مزدوروں کی بھاری مانگ رہتی ہے۔

سیرنگ آنگمو، ساسپول میں سڑک کی مرمت کر رہے ۱۳ مزدوروں کے گروپ میں ہیں۔ وہ کہتی ہیں، ’’یہ [سڑکوں کی مرمت] بہت جوکھم بھرا کام ہے، لیکن ہمیں سردی آنے سے پہلے سڑک کے اس جنکشن کو ٹھیک کرنا ہوگا۔ اس اونچائی پر ہم جتنا زیادہ بارش میں کام کریں گے، ہمیں بخار، کھانسی اور زکام ہونے کا اتنا ہی زیادہ خدشہ ہوگا۔‘‘

وہ اور دوسرے لوگ بارڈر روڈ آرگنائزیشن (بی آر او) کے بنیادی ادارہ ’جنرل ریزرو انجینئر فورس (جی آر ای ایف) میں ٹھیکہ پر کام کر رہے ہیں۔

سیرنگ، جنہیں سب آچے سیرنگ بلاتے ہیں، کہتی ہیں، ’’مجھے امید ہے کہ بارش دوبارہ نہیں ہوگی۔ اگر ایسا ہوا تو کام میں تاخیر ہو جائے گی۔‘‘ لداخی میں ’آچے‘ یا ’آچے لے‘ کا مطلب بڑی بہن ہوتا ہے۔ کام میں تاخیر کا مطلب ہے پیسے کی ادائیگی میں تاخیر اور بارش جیسے سخت موسم میں ان کا کام بند ہو سکتا ہے، جس سے معاشی نقصان ہوگا۔

جی آر ای ایف کے ’عارضی مزدور‘ ہونے کے ناطے ان کی اوسط تنخواہ ۱۲ ہزار روپے سے ۲۵ ہزار روپے ماہانہ کے درمیان ہوتی ہے۔ یہ تنخواہ اس بات پر منحصر ہے کہ ناگہانی حالات کتنے سنگین ہیں اور خطرہ کتنا ہے۔ یہ ۱۳ لوگوں کا گروپ تقریباً ۱۶ ہزار ۹۰۰ روپے گھر لے جائے گا۔

ساسپول کے ہی ایک اور مزدور سونم مونٹوپ کہتے ہیں، ’’دن بھر بہت گرمی رہتی ہے۔ مجھے لگا تھا کہ میں کسی دن گرمی سے بیہوش ہو جاؤں گا۔‘‘

لِکِر کے ۳۹ سالہ مزدور سونم چائے کا ایک پیالہ اٹھاتے ہیں اور مزید کہتے ہیں، ’’بارش تو اب عام بات ہوتی جا رہی ہے۔ میں یہیں پیدا ہوا اور پلا بڑھا ہوں، اور موسم کا مزاج بھی کافی بدل گیا ہے، لیکن گُڑگُڑ [روایتی لداخی نمکین چائے] کا ذائقہ نہیں بدلا ہے۔ تو آئیے، ایک کپ گڑگڑ پیجیے۔‘‘

زیادہ تر لوگ اونچی پہاڑیوں کے طویل سلسلہ کو دیکھ کر گہری سانس لیتے ہیں۔ لیکن شاید اب یہ اچھا خیال نہ ہو، کیوں کہ گرد آلودہ آندھیوں میں اضافہ ہو چکا ہے اور ہوا میں موجود الرجی اس خطہ میں بھی ہوا کے معیار کو خراب کر رہی ہے۔

ڈاکٹر سونم نوربو کہتے ہیں کہ انہوں نے کئی لداخی مریضوں کو سانس کی بیماری میں مبتلا پایا۔ اس علاقہ کے ابتدائی ڈاکٹروں میں سے ایک، نوربو کہتے ہیں، ’’میں نے آگے جانچ کی اور پتہ چلا کہ انہیں تپ دق ہے۔‘‘ اب ۸۲ سال کے ہو چکے اس ڈاکٹر نے ایک زمانہ میں سندھ ندی کے علاقہ والے دیہاتیوں پر گہری تحقیق کی تھی۔

ان کے بعد کے مطالعہ سے پتہ چلا کہ پھیپھڑوں کی بیماریاں، جنہیں طبی طور پر نیوموکونیوسس مانا جاتا ہے، یہاں بہت عام تھیں۔ نیوموکونیوسس کام کاج کے دوران ہونے والی پھیپھڑوں کی بیماریاں ہیں جو کوئلہ کی راکھ، سلیکا یا ایسبسطوس جیسی چیزوں کی باریک گرد اور ریشوں کو سانس کے ذریعہ اندر لینے سے ہوتی ہیں۔

ان کے اس مطالعہ کی گونج لداخ کے تین گاؤوں میں نیوموکونیوسس کے پھیلاؤ پر ۱۹۹۱ کے ایک تحقیقی مقالہ میں سنائی دیتی ہے۔ اس کے مصنفین کے مطابق، گرد آلودہ آندھیوں کی سنگینی اور باورچی خانہ میں چمنیوں کے استعمال کے ساتھ ساتھ طوفان کے دوران ہوا میں سلیکا کی اعلی مقدار سے اس بات کا سیدھا تعلق ہے۔ اس میں کہا گیا ہے، ’’گرد آلودہ آندھیوں سے نکلنے والے سلیکا اور گھریلو ایندھن سے نکلنے والی سیاہی کو نیوموکونیوسس کے ان معاملوں کی وجہ مانا جاتا ہے۔

ڈاکٹر نوربو کہتے ہیں کہ حالانکہ، ماحولیاتی تبدیلی سیدھے طور پر نیوموکونیوسس کی وجہ نہیں بنتی، لیکن یہ اس کے اثر کو مزید بگاڑ سکتی ہے اور نئے خطرات پیدا کر سکتی ہے۔ انہوں نے پاری کو بتایا، ’’گرم درجۂ حرارت میں گرد کے ذرات بڑھ سکتے ہیں، جس میں مرض پیدا کرنے والے ذرات اور معدنی ذرات ہوتے ہیں جو سلیکوسس اور ڈیزرٹ لنگ سنڈروم جیسی پھیپھڑے کی بیماریوں کی وجہ بنتے ہیں۔ اس لیے جن مزدوروں کو پہلے سے ہی یہ بیماریاں ہیں انہیں مزید تکلیف ہوگی۔‘‘

ایک زمانہ میں لداخی لوگ اگست مہینہ کو اس علاقہ میں سفر کرنے کا مہینہ مانتے تھے۔ مگر گزشتہ ایک دہائی سے بھی زیادہ عرصے سے اس مہینہ میں یہاں سفر کرنا خطرناک ہو گیا ہے۔

بعد میں اُس دن سیمو گوئین کھانگ کی مونیسٹری میں، میں نے کچھ مزدوروں کو پاس کے ایک عارضی ٹینٹ میں آرام کرتے دیکھا۔ انہوں نے اس رپورٹر کو بتایا، ’’ہم واپس نہیں جا سکتے، کیوں کہ نوبرا وادی جانے والا راستہ آج بند ہے۔ بارش ہماری نوکریوں، صحت اور گھروں پر اثر ڈال کر ہی رکے گی۔ ہم قدرت کے رحم و کرم پر زندگی بسر کر رہے ہیں۔‘‘

ترجمہ نگار: قمر صدیقی