लद्दाख: जाड़, घाम, बरसा झेलत रोड वर्कर

“ये वो जगा आय जिहां मंय बरफ मं बोजागे रहेंय. कतको लोगन मन मान लेय रहिन के मंय मर गेंय.”

शारप ला, 17,480 फीट ऊंच तांगलांग ला पर्वत दर्रा मं होवत भारी बरफबारी सुरता हवय. वो ह बताथे, “आने मजूर मन मोला बचाय बर कूद परिन.” ओकर किस्मत बड़े रहिस के सेना के अस्पताल लकठाच मं रहिस अऊ तुरते वोला इलाज मिलगे.

लद्दाख के ऊँच चोटी मन मं काम करेइय्या शारप जइसने रोड बनाय के काम मं लगे मजूर मन ला अक्सर बेबखत वाले मऊसम अऊ ओकर खतरा ले जूझे ला परथे. तापमान अक्सर हिमांक ले तरी चले जाथे. फेर बीते 20 बछर ले ये आंकड़ा अऊ घलो बढ़गे हवय. लेह जिला के ग्या गाँव के बासिंदा शारप कहिथें, “बदलत मऊसम सेती ढेरियाके होवेइय्या बरफबारी सेती अब हमन ला जियादा खतरा ले जूझे ला परत हवय.

शारप ओकर टोली के बूता करेइय्या मन के जिम्मेवारी हवय के वो मन ये इलाका के दूसर सबले ऊंच दर्रा - तांगलांग ला- ला फिर ले खोलेंय. भारी जाड़ अऊ मऊसम के अति सेती अक्टूबर ले मई तक ले ये दर्रा बंद रहिथे. दर्रा के खुले ले लेह ले मनाली हाइवे मं आवाजाही बढ़िया हो जाथे – ये 143 कोस (428 किमी) के रद्दा ह चार ठन दर्रा ले होके जाथे, अऊ तांगलांग ला सबले ऊँच जगा आय. वइसे इहाँ ले नजारा भारी सुग्घर हवय, फेर तेज हवा अऊ जाड़ सेती कोनो घलो 10 ले 15 मिनट ले जियादा खड़े होके एक नजर देखे मुस्किल हो जाथे.

जब पारी ह शारप अऊ संग काम करेइय्या मन ले भेंट करिस, वो बखत वो मन पहड़ी रोड के किनारा मं एक ठन भिथि बनाय मं लगे रहिन जेकर ले चट्टान मन ला गिरे ले रोके जा सकय, गाड़ी मन बर खतरा झन होवय अऊ रोड ला नुकसान झन होय. लेह के भूंइय्या ग्रेनाइट अऊ ढीला तलछट ले बने हवय. बरसा, खासकरके बादर फटे ले, चट्टान उखड़ जाथे अऊ खाल्हे गिर जाथे. भारी ढलान सेती पानी के धार बढ़ जाथे, अऊ खेत, काम करेइय्या अऊ चरवाह मन के उपर येकर भारी खराब असर परथे.

“रोड के मरम्मत भारी थका देवेइय्या बूता आय. हमन ला सीमेंट हाथ ले मेंझारे परथे. हमन घाम अऊ जाड़ मं 7-8 घंटा बूता करथन, बीच मं दू बेर चाहा पानी अऊ मंझनिया खाय बर थोकन सुस्ताथन,” शारप कहिथे.

कुछेक महीना बाद, अगस्त 2024 मं, जब बेर बूड़त रहिस, मंय लद्दाख के गाँव के कुछु लोगन मन के टोली ला रेंगत अपन गाँव हुन्दर लहुटत देखेंय. संझा 6.30 बजट रहिस, वो मन के घर लहुटे के बखत थोकन देर हो चुके रहिस. “जुले!” मंय ऊंच पहाड़ मं चलन के बोली ले वो मन के जय-जोहार करेंय. “अतक देरी काबर?”

वो मन रुक के जुवाब दीन: “जुले! हमन मंझनिया काम करे नइ सकेन. भारी गरमी रहिस, ते पायके हमन सुस्तायेन,” वो मन रोड के तीर मं बने एक ठन नानकन तंबू डहर आरो करत कहिथें. “हमन भारी मिहनत करथन. धूर्रा अऊ घाम ह हमन ला बनेच थका देथे.”

बीते साठ बछर मं, जम्मो हिमालय इलाका मं सतह के तापमान भारी बढ़े हवय. भारतीय क्षेत्र मं मऊसम मं बदलाव के आकलन, ये रिपोर्ट कहिथे. ये इलाका मं भारी जाड़ के अंदेसा त हवय, फेर भारी घाम एक ठन नवा चिंता के बात आय.

अऊ सिरिफ जाड़ अऊ घामेच नइ, फेर बरसा के घलो झोल हवय.

सोनम लोटस चिंता करत अपन झरोखा ले बहिर देखत हवंय, जिहां अगस्त मं होवत बरसा ले नजारा धुंधला होवत हवय. लद्दाख मं भारतीय मौसम विभाग (आईएमडी) के निदेशक कहिथें, “जुलाई अऊ अगस्त (2025) मं 44 मिमी पानी गिरिस, जेन ह कोनो घलो मानक ले बनेच जियादा हवय.”

ओंकर चिंता हाल के बिनास वाले घटना मन ला लेके हवय. लद्दाख ह साल 2005 ले बिनास वाले एक के बाद एक पुर देखे हवय, सबले भयंकर पुर साल 2010 मं आय रहिस जेकर ले 233 लोगन मन के जान चले गे रहिस. बादर फटे सेती कम असर वाले पुर आय अऊ धरती धसके के अइसनेच कतको घटना साल 2012, 2016 अऊ हाल के साल 2018 मं घलो देखे गे रहिस. सोनम लोटस के कहना आय के जइसने जइसने लद्दाख गरम होवत हवय, अऊ घलो पुर आय के अंदेसा हवय.

एक ठन सरकारी मदद वाले शोध संस्था के कहना आय के ये मं कोनो संदेहा नइ ये के बदलत मऊसम लद्दाख इलाका मं अचानक ले अवेइय्या पुर के कतको घटना अऊ ओकर गहिर ले होय ला बढ़ावत हवय. संस्था के मानना आय के लद्दाख के “ अद्वितीय भौगोलिक अऊ जलवायु परिस्थिति मन येला ये घटना मन कोती खास करके संवेदनशील बनाथे, जेकर इहाँ के समाज अऊ पर्यावरन तंत्र उपर दूरिहा तक ले असर करेइय्या होथें.”

24 अगस्त, 2025 के दिन बरसा सुरु हो जाही अऊ अवेइय्या चार दिन तक ले झड़ी लगे रइही, जेकर ले केंद्र शासित प्रदेश लद्दाख पूरा ठप हो जाही. लेह हवाई अड्डा चार दिन तक ले बंद रइही, अऊ स्कूल, आंगनवाड़ी सेंटर अऊ दीगर सरकारी आफिस मन बंद रइहीं.

दूसर दिन, मोर संगवारी तेनज़िन दोरजे ह मोला फोन करके बताइस के मंय खारदुंग ला के चोटी मं काम करेइय्या गाँव के लोगन मन के इंटरव्यू लेय जाय नइ सकवं. “जिला प्रशासन ह भारी बरफबारी सेती गाड़ी मन के आय-जाय मं रोक लगा दे हवय. “सोचव, अगस्त मं बरफबारी होवत होय? अब त सब्बो कुछु अलग हवय,” वो ह फोन मं कहिथे.

बीच अगस्त मं संझा 5 बजे सासपोल मं अचानक बाढ़ आ गीस. ये शहर लेह अऊ श्रीनगर हाईवे के बीच महत्तम जंकशन आय. जब मंय हफ्ता भर बाद सासपोल हबरेंय, त चरों डहर अचानक आय बढ़ा ले तबाही के चिन्हा रहिस: उखड़े रुख, चिखला ले भरे इलाका, गिरे पथरा जेन ह 14 फीट चाकर रोड ला तहस-नहस कर देय रहिस.

लिकिर अऊ सासपोल जइसने तीर-तखार के गाँव के मजूर मन रोड के मरम्मत मं लगे रहिन. बहिर ले आय प्रवासी मजूर मन ला घलो काम मं लगाय गे रहिस. मोर भेंट झारखंड के राजेश भल्ला ले होइस, जेन ह रतिहा के ड्यूटी मं हवंय अऊ समान मन के रखवारी करत हवंय. वो ह कहिथें, “हमन ला बंद रद्दा ला साफ करे बर हर घड़ी तियार रहे ला चाही. कभू-कभू हमन ला चौबीसों घंटा बूता करे ला परथे.”

ये मऊसम मं अतक ऊँच जगा मं रहे मुस्किल आय. 39 बछर के ये सियान ह पारी ला बताइस, “ गरमी के सीजन आय, फेर रतिहा मं अचानक ले बरफबारी सुरू हो गीस. मोला लगिस जइसने तंबू मोर ऊपर गिर गे होय. ये भारी भयानक रहिस.” मंझनिया खाय के बखत होगे रहिस, ते पायके हमर गोठबात इहींचे सिरागे.

झारखंड, छत्तीसगढ़, बिहार, मध्य प्रदेश अऊ देस के दीगर इलाका मन ले आये प्रवासी मजूर मन बर ये काम ह हमेसा ले नजर मं रहे हवय. साल 2019 मं लद्दाख के केंद्र शासित प्रदेश बने के बाद ले कतको निर्माण परियोजना ला बढ़ावा मिले हवय, फेर पहिली ये ह जम्मू-कश्मीर के एक ठन जिला रहिस.

लेह के एक झिन स्थानीय ट्रैवल एजेंट तेनज़िन दोरजे कहिथें, “लद्दाख के रणनीतिक हालत, खासकरके जून 2020 मं भारत-चीन झड़प के बाद, महत्तम बदलाव आय हवय. रोड बनाय के काम मं तेजी आय हवय, सरहदी के गाँव तक ले पहुँच बढ़िया होय हवय, जेकर ले सेना के आवाजाही मं सुभिता होय हवय.”

लद्दाख मं 4,300 किलोमीटर सड़क हवंय अऊ प्रशासन के ‘विजन 2050’ के मुताबिक सब्बो रोड बारों महीना चलत रहय, येकरे सेती इहाँ रोड के काम करे बर बजूर मन के भारी मांग हवय.

सेरिंग आंगमो, सासपोल मं एक ठन रोड मरम्मत करत 13 झिन मजूर मन के टोली ले एक झिन आय. “ये [रोड मरम्मत] बनेच खतरा ले भरे बूता आय, फेर हमन ला जाड़ आय के पहिली रोड के ये टेसन ला ठीक करे ला परही. अतक ऊंच जगा मं, जतक जियादा हमन ला बरसात मं काम करे ला परही, हमन ला जुड़ सर्दी अऊ जर धरे के अंदेसा ओतक जियादा होही.”

वो अऊ दीगर लोगन मन जनरल रिजर्व इंजीनियर फोर्स (जीआरईएफ) के संग करार मं हवंय, जेन ह सीमा सड़क संगठन (बीआरओ) के मूल संगठन आय.

“मोला आस हवय के बरसात फिर ले सुरू नइ होवय. गर होही त काम ह ढेरिया जाही,” सेरिंग कहिथे, जेन ला सब्बो आचे सेरिंग कहिथें. लद्दाखी मं आचे धन आचे-ले के मतलब दीदी होथे. काम ढेरियाय के मतलब आय, चुकारा ढेरियाय, अऊ बरसात जइसने खराब मऊसम वो मन के काम बूता ला बंद कर सकथे, जेकर ले कमई के हरजा होथे.

जीआरईएफ के ‘अस्थायी मज़दूर’ के रूप मं, वो मन के अऊसत तनखा महीना मं 12,000 ले 25,000 रूपिया के बीच होथे, जेन ह येकर उपर रहिथे के आपात हालत कतक बड़े हवय अऊ खतरा कतक हवय. 13 झिन के ये टोली करीबन 16,900 रूपिया घर लेके जाही.

सासपोल मं रहेइय्या एक झिन अऊ मजूर मोंटोप कहिथे, “इहाँ दिन भर भारी गरमी रहिथे. मोला लगत रहिस के एक दिन मंय गरमी ले बेहोस हो जाहूँ.”

लिकिर के 39 बछर के सियान चाय के कप ला धरथे अऊ कहिथे: बरसात के दिन आम होवत जावत हवय; मंय इहींचे जन्मे अऊ पले-बढ़े हवं, अऊ मऊसम के सुभाव त बदल गे हवय, फेर गुड़ गुड़ [पारंपरिक लद्दाखी नुनचुर चाय] के सुवाद बदले नइ ये. त एक कप गुड़ गुड़ पी लेवव.”

ऊँच-ऊंच, बड़े-बड़े पहाड़ ला देख के अधिकतर लोगन मन गहरा साँस लेथें. फेर अब ये ह बढ़िया बिचार नइ होय सकय - धुर्रा भरे गर्रा बढ़े हवय अऊ हवा मं एलर्जी वाले जिनिस मन ये इलाका मं घलो साफ हवा ला खराब करत हवंय.

डॉ. सोनम नोरबू कहिथें के वो ह कतको लद्दाखी मरीज मन मं साँस के बीमारी मिलिस. ये इलाका के सुरू के डाक्टर मन ले एक, नोरबू कहिथें, “मंय जाँच करेंय अऊ पता चलिस के वो मन ला टीबी हवय.” 82 बछर के सियान ये डाक्टर ह सुरु मं सिंधु नदी इलाका के गाँव के लोगन मन के उपर व्यापक शोध करे रहिस.

ओंकर बाद के शोध ले पता चलिस के फेफड़ा मन के बीमारी, जेन ला डाक्टरी भाखा मं न्यूमोकोनियोसिस कहिथे, इहाँ बनेच रहिस. न्यूमोकोनियोसिस, काम करे के जगा सेती होवेइय्या बीमारी आय जेन ह कोयला के धूर्रा, सिलिका धन एस्बेस्टस जइसने महीन धूर्रा अऊ रेसा ला साँस लेय बखत भीतरी जाय ले होथे.

ओकर अध्ययन लद्दाख के तीन ठन गाँव मं न्यूमोकोनियोसिस के भारी असर उपर साल 1991 मं लिखे गे एक ठन शोध पत्र मं देखे मं आथे. लेखक के कहना आय के ये धूर्रा भरे गर्रा/ आंधी अऊ रसोई के चूल्हा ले निकरत धूंआ के संगे संग गर्रा मं सिलिका के भारी मात्र ले मेल खाथे. ये मं कहे गे हवय के, “धूर्रा भरे गर्रा के सिलिका अऊ रसोई के चूल्हा ले निकरेइय्या धूंआ ला न्यूमोकोनियोसिस के कारन माने जाथे.”

डॉ. नोरबू कहिथें के बदलत मऊसम सीधा सीधा न्यूमोकोनियोसिस के कारन नइ बनय, फेर ये ह येकर असर ला अऊ बिगाड़ सकथे अऊ नवा खतरा पैदा कर सकथे. वो ह पारी ला बताइस, “गरमी धूर्रा के बढ़े ले बढ़ सकथे, जेन मं रोगानु अऊ खनिंज के कन होथें जेन ह सिलिकोसिस अऊ डेजर्ट लंग सिंड्रोम जइसने फेफड़ा के बीमारी के कारन बनथे. ते पायके, जेन वर्कर मन ला पहिलीच ले ये बीमारी हवय, वो मन ला जियादा नुकसान होही.

एक बखत रहिस जब लद्दाखी लोगन मन ये इलाका मं घूमे बर अगस्त के महीना चुनत रहिन. फेर बीते दस बछर ले घलो जियादा बखत ले इहाँ घूमे खतरा ले भरे होगे हवय.

तउन दिन के बाद, सेमोगोएनखांग मठ मं, मंय कुछेक मजूर मन ला लकठा के एक ठन तंबू मं सुस्तावत देखेंय. वो मन ये रिपोर्टर ला बताइन: हमन लहुट के जाय नइ सकन काबर के नुब्रा घाटी जवेइय्या रद्दा आज बंद हवय. बरसात तभेच थमही जब येकर असर हमर काम बूता, सेहत अऊ घर उपर परही. हमन प्रकृति के दया के भरोसे हवन.”

अनुवाद: निर्मल कुमार साहू