लद्दाख: बिगड़ल मौसम के मार झेलत सड़क मजूर

“इहे उ जगह हवे जहां हम लगभग बरफ में दफ़न हो गईल रहनी. कई लोग मान लिहलें कि हम मर गईल बानी.

शराप 17,480 फीट के ऊंचाई पर तांगलांग ला पर्वत मार्ग पर हो रहल बरफबारी याद कईलें. “मजदूर लोग हमरी मदद खातिर दौड़ल,” उ बतावेलन. उनकर भाग नीमन रहे कि सेना के अस्पताल लगहीं रहले आ उनके समय से इलाज मिल पावल.

लद्दाख के ऊंच पहाड़ी इलाका में काम करे वाला शराप जईसन सड़क निर्माण मजदूर लोग नियमित रूप से अनिश्चित मौसम आ एकरी संघे होखे वाला खतरा के सामना करेला. तापमान अक्सर शून्य से नीचे गिर जाला बाकिर पिछला दू दशक में ई और बदल गईल बा. “अब हमनी के अधिक खतरा के सामना कर रहल बानी जा काहें कि जलवायु परिवर्तन के कारण देरी से बरफबारी हो रहल बा आ एमे बहुत भारी बरफ गिरेला,” लेह जिला के जिया गांव में रहे वाला शराप कहेलन.

क्षेत्र के दूसरा सबसे उंच मार्ग – तांगलांग ला के फिर से खोले के जिम्मेदारी शराप आ उनकी टीम जईसन श्रमिकन के हवे. जबरदस्त ठंडी आ बहुते खराब मौसम के वजह से अक्टूबर से मई ले ए मार्ग के बंद कर दिहल जाला. मार्ग खोलला से लेह से मनाली राजमार्ग पर यातायात सुचारू रहेला. ई 428 किलोमीटर के यात्रा हवे जवन चार पासन (मार्ग) से हो के गुजरेला आ तांगलांग ला सबसे उंच बिंदु हवे. एइजा से अद्भुत नजारा देखाई पड़ेला बाकिर हवा आ ठण्ड के वजह से केहू खातिर 10 से 15 मिनट से अधिका खड़ा भईल मुश्किल हो जाला.

जब पारी शराप आ उनके सहयोगियन से मुलाकात कईलस त उ लोग पहाड़ी सड़क के किनारे एगो रिटेनिंग वॉल बनावे में व्यस्त रहलें ताकि पत्थर गिरला से वाहन या सड़क के नुकसान ना पहुंचे. लेह के माटी ग्रेनाईट आ ढीला तलछट से बनल बा. भारी बरखा, खास तौर पर बादल फटला से पत्थर ढीला हो जाला आ ढलान से नीचे गिर जाला. तेज ढलान बरखा के पानी के बहाव में मदद करेला. किसान, निर्माण मजदूर आ चरवाहा लोगन पर एकर बहुत प्रभाव पड़ेला.

“सड़कन के मरम्मत कठिन काम हवे. सीमेंट हाथ से मिलावे के पड़ेला. हमनी के गर्मी आ सर्दी में 7-8 घंटा काम करेनी जा. बीच में चाय आ खाना खातिर दू गो ब्रेक मिलेला,” शराप कहेलन.

कुछ महीना बाद, अगस्त 2024 में जब सूरज डूबत रहे, हम देखनी लद्दाख के लोग पैदल हुंडर गांव लौटत रहलें. ई लगभग सांझ के 6.30 बजे के बात रहे आ ओ लोगन के घरे लौटे के समय के हिसाब से तनी देरी हो गईल रहे. “जुले!’ हम पहाड़न में इस्तेमाल होखे वाला चिर-परिचित शब्द से उनकर अभिवादन कईनी. “एतना देरी कईसे भईल?”

उ लोग रुकल आ जवाब दिहल, “जुले! हमनी के दुपहरिया में काम न कर पवनी हां. बहुत गर्मी रहल ह एसे हमनी तनी सुस्ताए जात बानी जा,” उ लोग सड़क के किनारे एगो छोट शेड के ओर इशारा करत के कहल. “हमनी के कठिन मेहनत करेनी जा. धूल आ गर्मी हमनी के बहुते थका देवेला.”

भारतीय इलाका में जलवायु परिवर्तन के मूल्यांकन पर एगो रिपोर्ट के अनुसार, पिछला छव दशक में हिमालय के आस-पास के इलाका में सतह के तापमान में जबरदस्त बढ़ोत्तरी भईल बा. ए क्षेत्र में तेज सरदी के मौसम के उम्मीद रहेला एसे प्रचंड गर्मी नया आ चिंतित कर देवे वाला बा.

आ खाली ठंडा आ गर्मी के बात नईखे. बरखा के भी तालमेल गड़बड़ा गईल बा.

सोनम लोटस चिंतित हो के अपनी खिड़की के बाहर देख रहल बाड़ें. अगस्त के बरखा से सामने कुछ साफ नजर नइखे आवत. “जुलाई आ अगस्त (2025) में एइजा 44 मिलीमीटर बरखा भईल जवन मानक से बहुत अधिक बा,” लद्दाख में भारतीय मौसम विज्ञान विभाग (आईएमडी) के निदेशक कहेलन.

हाल में भइल तबाही के चलते ऊ बहुते चिंतित बाड़न. लद्दाख 2005 से लगातार भयानक बाढ़ देख झेल रहल बा. सबसे खतरनाक बाढ़ 2010 में आईल रहे जेमे 233 जान चल गईल. 2012, 2016 आ 2018 में भी बादल फटला के कारण हल्का बाढ़ आ माटी धसान के कई गो घटना भईल. सोनम लोटस के कहनाम बा कि लद्दाख जईसे-जईसे गरम होत जाता, भारी बाढ़ के आशंका बढ़त जाता.

सरकारी फंड से चल रहल एगो शोध संस्था के कहनाम बा कि ए बात में कवनो संदेह नईखे कि जलवायु परिवर्तन लद्दाख क्षेत्र में अचानक बाढ़ आवे आ ओकर गंभीरता के बढ़ा रहल बा. एमे मानल गईल बा कि लद्दाख के “विशिष्ट भौगोलिक आ जलवायु के परिस्थिति एके ए घटनन के प्रति विशेष रूप से संवेदनशील बनावेला जेकर स्थानीय समुदायन आ पारिस्थितिक तंत्र पर दूरगामी प्रभाव पड़ सकेला.

बरखा 24 अगस्त 2025 से बरसे शुरू भईल आ बिना रुके चार दिन ले लगातार बरसल. एह चलते लेह में स्थित केंद्र शासित प्रदेश लद्दाख पूरी तरह से ठप हो जाला. लेह हवाई अड्डा चार दिन खातिर बंद हो जाला आ स्कूल, आंगनवाड़ी केंद्र आ राज्य के अन्य संस्थानो बंद रहेला.

अगिला दिन हमके हमरा दोस्त तेनजिन दोरजे के फोन आवेला. उ हमके बतावेलन कि हम खारदुंग ला के चोटी पर जा के ओइजा काम करे वाला ग्रामीणन से बतिया ना पाईब. “जिला प्रशासन भारी बरफबारी के वजह से वाहनन के आवाजाही पर रोक लगा दिहले बा. सोचीं, अगस्त में बरफ पड़ रहल बा. अब कुल चीज बहुत बदल गईल बा,” उ फोन पर कहलन.

बीच अगस्त में सांझी के 5 बजे सास्पोल में अचानक बाढ़ आईल रहे. ई कस्बा लेह से श्रीनगर हाईवे के बीच पड़े वाला एगो प्रमुख चौराहा हवे. जब हम एक हफ्ता बाद सास्पोल पहुंचनी त अचानक आईल बाढ़ के विनाश के निशान हर ओर लउकत रहे: उखड़ल पेड़, कीचड़, बड़े बड़े गिरल पत्थर जेसे 14 फीट के चौड़ा सड़क बर्बाद हो गईल रहे.

लिकिर आ सास्पोल जईसन आस पड़ोस के क्षेत्रन के कामगार लोग सड़क मरम्मत के काम करत रहे. प्रवासी कामगारन के भी काम पर रखल गईल रहे. हम झारखण्ड से आईल राजेश भल्ला से मिलनी जे रात के ड्यूटी पर बाड़ें आ सामान सब के निगरानी कर रहल बाड़ें. उ कहेलन, “हमनी के हमेशा बाधा हटावे या रास्ता मरम्मत करे खातिर तैयार रहे के पड़ेला. कबो-कबो दिन रात काम करे पड़ेला.”

ए मौसम में एतना ऊंचाई पर रहल भारी काम बा. “ई गर्मी के समय हवे बाकिर अचानक रात में बरफ गिरे लागल. हमारा बुझाईल कि तम्बू हमरी ऊपर गिर रहल बा. ई बहुत डरावना रहे,” 39 बरिस के भल्ला पारी के बतवलें. दोपहर के भोजन के समय हो गईल रहे एसे बातचीत के बंद करे के पड़ल.

छत्तीसगढ़, बिहार, मध्य प्रदेश आ देश के अन्य क्षेत्रन से आवे वाला प्रवासी कामगारन के मन में ए नौकरियन के प्रति हमेशा से आकर्षण रहल बा. लद्दाख के 2019 में केंद्र शासित प्रदेश बनला के बाद से परियोजनन के गति मिलल बा जबकि पहिले ई जम्मू आ कश्मीर के एगो जिला रहे.

लेह के स्थानीय ट्रेवल एजेंट तेनजिन दोरजे कहेलन, “लद्दाख के रणनीतिक स्थान के वजह से बहुत महत्वपूर्ण बदलाव हो रहल बा, खास तौर पर जून 2020 में भइल भारत-चीन संघर्ष के बाद. सड़क परियोजनन के गति बढ़ल आ सीमावर्ती गांवन से कनेक्टिविटी में सुधार भईल ताकि सेना के आवाजाही सुगम बनावल जा सके.”

लद्दाख में 4,300 किलोमीटर सड़क बा आ प्रशासन के ‘विजन 2050’ योजना के लक्ष्य बा कि कुल सड़क चारों मौसम में चले लायक रहे. एसे एइजा सड़क निर्माण में मजदूरन के बहुत मांग बा.

सेरिंग अंग्मो सास्पल में सड़क के मरम्मत करे वाला 13 मजदूरन के समूह में से एक हई. “ई बहुत जोखिम से भरल काम (सड़क के मरम्मत) हवे बाकिर हमनी के सर्दी के मौसम आवे से पहिले ए सड़क के चौराहा ठीक करे के पड़ी. ए ऊंचाई पर हमनी के जेतना ज्यादा बारिश में काम करब जा, ओतने हमनी के खांसी, बोखार आ जुकाम होखे के खतरा बढ़ जाई.”

ऊ आ बाकी लोग बॉर्डर रोड्स आर्गेनाईजेशन (बीआरओ) के मूल संस्था जनरल रिजर्व इंजीनियर फ़ोर्स (जीआरईएफ) संघे अनुबंध पर बाड़ें.

“उम्मीद करतानी कि बरखा फिर से शुरू मत होखे. अब होई त काम में देरी होई,” सेरिंग कहेली जिनके सब केहू आचे सेरिंग कहेला. लद्दाखी में आचे या आचे-ले के मतलब बड़ बहिन होला. काम में देरी के मतलब बा भुगतान में देरी आ ख़राब मौसम जैसे बरखा से उनके काम बंद हो सकेला जेसे उनके आर्थिक नुकसान उठावे के पड़ेला.

ग्रेफ (जीआरईएफ) के ‘अस्थायी मजदूरन’ के औसत वेतन प्रति माह 12,000 से 25,000 रुपिया के बीच होला. आ ए बात पर निर्भर करेला कि स्थिति केतना नाजुक आ जोखिम वाला बा. 13 लोग के एह टीम के लगभग 16,900 रुपिया प्रतिमाह मिली.

“दिन भर तेज गर्मी रहेला. एक दिन लागता हम गर्मी से बेहोश हो जाईब,” सास्पोल में काम करे वाली दूसर कर्मचारी सोनम मोंटोप कहेली.

चाय के कप हाथ में उठावत के लिकिर के रहे वाली 39 बरिस के ई कामगार कहेली, “बरखा अब अक्सरहा होखे लागल बा. हम एइजे पैदा भईल आ पलल बढ़ल हईं. मौसम के मिजाज भले बदल गईल होखे, गुर गुर (पारंपरिक लद्दाखी नमक वाली चाय) के स्वाद नईखे बदलल. त एक कप गुर गुर पियल जाओ.”

ज्यादातर लोग ऊंच पहाड़न के खुला नजारा देख के गहिर सांस लेवेला. बाकिर जरूरी नईखे कि अइसन कइल सही होखे. ए क्षेत्र में धूल भरल आंधी बढ़ गइल बा. एह जगह के हवा एलर्जन चलते दूषित हो रहल बा.

डॉक्टर सोनम नोरबू कहेलन कि कई गो लद्दाखी मरीज के सांस के रोग बा. “जांच कईला पर पता चलल कि उनके टीबी (ट्यूबरकुलोसिस) बा,” ए इलाका के पुरान चिकित्सकन में से एक डॉक्टर नोरबू कहेलन. कुछ समय पहिले 82 बरिस के ई डॉक्टर साहब इंडस नदी क्षेत्र के ग्रामीणन पर बहुत बड़ शोध कईले रहलें.

उनकी बाद के शोध से पता चलल कि पल्मोनरी (फेफड़ा वाला) रोगन के एगो समूह, जेकर डॉक्टरी नाम न्यूमोकोनियोसिस बा, एइजा बहुत प्रचलित रहे. न्यूमोकोनियोसिस काम के दौरान फेफड़ा पर असर डाले वाला रोग के एगो समूह हवे. ई सांस में कोयला, सिलिका या एस्बेस्टस जईसन महीन धूल आ रेशा जाए से होला.

उनकर अध्ययन के पुष्टि लेह के तीन गो गांवन में न्यूमोकोनियोसिस के प्रसार पर 1991 के एगो शोध पत्र से भी होखता. लेखक के कहनाम बा कि ई सब धूल भरल तेज आंधी आ रसोई में चिमनी के उपयोग, संघही आंधी के दौरान हवा में उच्च सिलिका सामग्री के जरिये भी होखेला. “धूल भरल आंधी से निकलल सिलिका आ घरेलू ईंधन से निकले वाला करिखा के संपर्क में आवे चलते न्यूमोकोनियोसिस होखेला,” एकर कहनाम बा.

डॉक्टर नोरबू के कहनाम बा कि जलवायु परिवर्तन सीधे रूप से न्यूमोकोनियोसिस के कारण ना बनेला बल्कि एकर गंभीरता बढ़ा आ नया तरह के खतरा पैदा कर सकेला. “गरमी से धूल बढ़ सकेला जेमे अइसन रोगाणु आ खनिज के कण होला जवन सिलिकोसिस आ डेजर्ट लंग सिंड्रोम के कारण बनेला. एसे जवन भी कामगार, पहिले से अइसन स्थिति से पीड़ित बाड़ें, उनके अधिक मुश्किल होई,” उ पारी से बतवलें.

एक समय में लद्दाखी लोग अगस्त के ए क्षेत्र में घूमे के महीना मानत रहलें. बाकिर पिछला दशक आ ओकरी बाद एइजा यात्रा कईल खतरनाक हो गईल बा.

ओही दिने बाद में हम सेमो गोएनखांग के मठ में देखनी कि एगो तम्बू में कुछ मजूर लोग आराम कर रहल बाड़ें. उ लोग ए पत्रकार से कहलें: “हमनी के लउट नइखी सकत काहें कि नुबरा घाटी के रास्ता आज बंद बा. बरखा त हमनी के रोजी-रोटी, सेहत आ घर के कुल बरबाद करिए के मानी. हमनी के सुख-दुख अब कुदरत के हाथ में बा.”

अनुवाद: विमल चन्द्र पाण्डेय