چُورو میں اپنی جڑیں جماتی بھوپا برادری

بھادَر بھوپا کہتے ہیں، ’’ہریانہ، پنجاب ہوں لیگے جیسلمیر تک سارو دیش مہارو پگا ہوں ناپیڈو ہے [ہم نے ہریانہ اور پنجاب سے لے کر جیسلمیر تک ملک کے تمام راستے پیدل ناپ رکھے ہیں]۔‘‘ بھادَر (۶۵) شمال مغربی راجستھان میں اپنے گھر کے قریب ایک درخت کے نیچے بیٹھے ہیں۔ وہ مزید کہتے ہیں، ’’ایسی کوئی جگہ نہیں بچی جسے ہم نے نہ دیکھی ہو۔‘‘

گجرات اور راجستھان کی خانہ بدوش بھوپا برادری سے تعلق رکھنے والے بھادر نے اپنی زندگی کا بیشتر حصہ بانس اور ناریل کے خول اور تار سے تیار کردہ ساز ’راون ہتھا‘ بجاتے اور پورے ملک کا سفر کرتے گزارا ہے۔ ’’ہم ایک جگہ سے دوسری جگہ جاتے، وہاں قیام کرتے، اپنے فن کا مظاہرہ کرتے اور آگے بڑھ جاتے،‘‘ وہ پاری کو بتاتے ہیں۔

بالآخر، ۱۱ سال قبل بھادر اور ان کے پانچ بیٹوں نے چورو ضلع میں مستقل طور پر آباد ہونے کا فیصلہ کیا۔ ’’میں اس [خانہ بدوش] زندگی سے تھک گیا تھا، اس لیے میں نے ایک گاؤں میں سکونت اختیار کر لی۔‘‘ اب وہ دھیرواس بڑا میں رہتے ہیں۔ انہوں نے اس گاؤں کا انتخاب اس لیے کیا کیونکہ وہ یہاں سے بارہا گزرے تھے اور یہاں کے مقامی لوگ ان سے بخوبی واقف تھے۔ میرے دادا نے بھوپا گھرانے کو لوک فنکاروں کے طور پر ہمارے گاؤں سے گزرتے دیکھا تھا۔

یہ کنبہ اپنا تعلق نائک برادری (جو درج فہرست ذات میں شامل ہے) سے ظاہر کرتا ہے، حالانکہ راجستھان میں بھوپا برادری کو دیگر پسماندہ طبقات (او بی سی) کے زمرہ میں رکھا جاتا ہے۔ نائکوں کو بھی انہیں اپنی برادری کا حصہ تسلیم کرنے میں تامل ہے۔

شروع شروع میں دھیرواس بڑا میں زمین کی قیمتیں بہت زیادہ تھیں، اس لیے وہ ابتدائی دو برسوں تک گاؤں کے بیرونی حصے میں ہی آباد رہے۔ ’’بعد میں ہم نے سرپنچ [گرام پنچایت کے سربراہ] سے رابطہ کیا، اور انہوں نے ہمیں اس زمین تک رسائی دی،‘‘ بھادر بھوپا کے بیٹے بھنور لال بتاتے ہیں۔ ’’زمین کا یہ قطعہ تقریباً ایک بیگھہ اور تین بسوہ [تقریباً ۷۵ء۰ ایکڑ] پر مشتمل ہے۔‘‘

دھیرواس بڑا گاؤں کے مرکزی بس اسٹینڈ سے کھیتوں کی جانب جانے والی کچی سڑک پر جنوب کی سمت چلیں، تو آپ دو شمشان بھومیوں (گھاٹوں) کے پاس سے گزریں گے۔ پہلا شمشان سوامی برادری (جو دیگر پسماندہ طبقات میں شامل ہیں) کے زیرِ استعمال ہے، جبکہ کچھ فاصلہ پر واقع دوسرا شمشان درج فہرست ذاتوں کے لیے مخصوص ہے۔ یہ سڑک ان شمشان گھاٹوں کو سڑک کی دوسری جانب واقع دلت محلہ سے الگ کرتی ہے۔ اس سے آگے ہڑوار ہے، جہاں مردہ مویشیوں کو ٹھکانے لگایا جاتا ہے۔

اسی ہڑوار کے ایک حصہ پر بنے عارضی مکانات میں بھادر بھوپا کا تقریباً ۵۰ افراد پر مشتمل وسیع تر خاندان آباد ہے۔ وہ اب ایک مستحکم زندگی گزار رہے ہیں، جو ان کی سابقہ زندگی سے بالکل مختلف ہے۔

شروع میں ان کے لیے زرعی مزدور کا کام تلاش کرنا آسان نہیں تھا۔

’’گاؤں والوں کا خیال تھا کہ ’بھوپا سست رفتاری سے کام کرتے ہیں اور زیادہ کچھ نہیں کر سکتے‘،‘‘ بھنور لال یاد کرتے ہوئے بتاتے ہیں۔ ’’لیکن فصل کی کٹائی کے عین عروج کے موسم میں ایک برہمن کسان کی والدہ کا انتقال ہوگیا، اور آخری رسومات کی ادائیگی کے باعث ان کے کھیت کا کام تاخیر کا شکار ہو گیا۔ فصل کٹوانے کی جلدی میں انہوں نے ہم [بھوپا لوگوں] کو کام پر رکھ لیا...اور تب سے لوگوں نے ہمیں کام دینا شروع کر دیا۔‘‘

فصل کٹائی کے اس پہلے موسم کو کئی سال گزر چکے ہیں، لیکن بھوپا برادری کے لوگوں کا کہنا ہے کہ مقامی لوگ اب بھی انہیں گاؤں کے زرعی نظام کا حصہ تسلیم کرنے میں جھجھک محسوس کرتے ہیں۔ آج بھی انہیں کام کے منصفانہ اوقات اور اجرت کے لیے مسلسل مول تول کرنی پڑتی ہے، جب کہ دیگر برادریوں کی اجرتیں پہلے سے مقرر ہوتی ہیں۔

بھوپا کنبے کے افراد پیاز کی کٹائی کے موسم میں ۱۵۰ کلومیٹر تک کا سفر طے کر کے سیکر بھی جاتے ہیں۔ بچے بھی اسکول چھوڑ کر اپنے والدین کے ساتھ کام میں شامل ہو جاتے ہیں۔ اور جب کاشتکاری کا کوئی کام نہیں ہوتا، تو نوجوان ساٹّا (ریڈ ہاگ ویڈ) کھودتے ہیں، جو آیورویدک ادویات میں استعمال ہونے والی ایک جڑی بوٹی ہے۔ ’’ہم اس سے اچھی کمائی کر لیتے ہیں – اوسطاً ۵۰۰ روپے یومیہ،‘‘ بھنور لال کے بیٹے ونود بتاتے ہیں۔ دیگر افراد تعمیراتی مقامات یا آرا مشینوں (لکڑی کی کٹائی کے کارخانوں) پر کام کرتے ہیں۔

میں دھیرواس بڑا میں پلا بڑھا ہوں اور میری پڑھائی یہاں کے سرکاری اسکول میں ہوئی ہے۔ بچپن میں بھوپ بھوپا بھی میرے ساتھ اسکول میں پڑھتے تھے، جن کی عمر اب ۲۲ سال ہے۔ اسکول میں بہت سے دلت بچے تھے۔ ہم خوش قسمت تھے کہ ہجاری میگھوال کے روپ میں ہمیں ایک دلت استاد مل گئے، جو ہماری بہت حوصلہ افزائی کیا کرتے تھے۔

بھوپ کے گھر میں بجلی نہیں تھی، اور پہلی نسل کے اسکول جانے والے فرد ہونے کی وجہ سے گھر پر اسکول کے کام میں ان کی مدد کرنے والا کوئی نہیں تھا۔ ان پر گھر کے مویشیوں کی دیکھ بھال کی اضافی ذمہ داری بھی تھی۔ مجھے یاد ہے کہ وہ کئی دنوں تک اسکول سے غیرحاضر رہے تھے، اور واپس آ کر بتایا کہ وہ اپنے جانوروں کو لے کر تقریباً ۴۰ کلومیٹر دور گوگامیڑی کے مشہور مویشی میلہ میں گئے تھے۔

کچھ ہی دنوں بعد انہوں نے چوتھی جماعت میں پڑھائی چھوڑ دی اور گھر کے دیگر افراد کی طرح مزدوری کرنے لگے۔ اس وقت لوک گیت کاروں کے اس کنبے میں وہ واحد خواندہ شخص تھے۔ نائک ذات، جس سے یہ کنبہ اپنی شناخت جوڑتا ہے، میں ۲۰۱۱ میں شرحِ خواندگی ۵۷ فیصد سے کچھ ہی زیادہ تھی۔

آج صرف بھادر بھوپا اور بھنور لال ہی راون ہتھا بجا سکتے ہیں، لیکن مؤخر الذکر کو لوک گیتوں کی پیشکش کی طرف واپس لوٹنے میں کوئی دلچسپی نہیں ہے۔ اس کے بجائے، وہ قریبی گاؤں بھاڈنگ میں ایک بٹائی دار کے طور پر تقریباً ۱۰ بیگھہ (۲۵ء۶ ایکڑ) زمین پر کھیتی باڑی کرتے ہیں۔ وہ پاری سے کہتے ہیں، ’’اس کام میں بڑی عزت ہے۔‘‘

بھادر کے بڑے بیٹے بھاگیرتھ کی عمر اب پچاس سال سے زیادہ ہو چکی ہے۔ انہیں بھی ماضی کی طرف واپس لوٹنے میں کوئی دلچسپی نہیں ہے۔ وہ ماضی کی قلیل آمدنی اور مشکل حالات زندگی کا حوالہ دیتے ہوئے کہتے ہیں کہ موسیقی کا یہ ورثہ ان کی فیملی کے لیے کچھ خاص فائدہ مند ثابت نہیں ہوا۔ ’’اب ہم ایک اچھی زندگی گزار رہے ہیں،‘‘ بھاگیرتھ کہتے ہیں۔ وہ میرٹھ کے ایک ہوٹل میں کام کرتے ہیں اور اپنے کام سے مطمئن ہیں۔ ’’ہمیں جب بھی ضرورت ہوتی ہے پیسے مل جاتے ہیں اور تمام سہولیات میسر ہیں۔‘‘

معاش کا ایک نیا بھروسہ مند ذریعہ ملنے کے باوجود دھیرواس بڑا میں زندگی بڑی مشکل ہے۔ بجلی نہ ہونے کے باعث رات کو تیل کے چراغ روشن کیے جاتے ہیں۔ محض ۵۰۰ میٹر کے فاصلہ پر موجود بجلی کا کنکشن ابھی ان تک نہیں پہنچ سکا ہے۔ ’’اپنے موبائل فون چارج کرنے کے لیے ہمیں محلہ کے دیگر گھروں میں جا کر درخواست کرنی پڑتی ہے،‘‘ بھادر بھوپا کے چھوٹے بیٹے، ۳۵ سالہ مہندر کہتے ہیں۔

راجستھان حکومت کی جانب سے ملنے والی ماہانہ بڑھاپا پینشن جیسی سرکاری اسکیموں تک بھادر بھوپا اور ان کی اہلیہ کملا کی رسائی، ڈیجیٹلائزیشن اور کے وائی سی کے بدلتے اصول و ضوابط کے پیشِ نظر دشوار تر ہو گئی ہے۔ جب ان کا بینک کسی دوسرے بینک میں ضم ہو گیا، تو یہ جوڑا کچھ عرصے تک کوئی بھی لین دین نہیں کر سکا۔

’’مجھے نہیں معلوم کہ حکومت کو ہم سے کیا چاہیے۔ روزانہ انہیں کسی نہ کسی دستاویز کی ضرورت ہوتی ہے یا کوئی نہ کوئی کارروائی پوری کرنی ہوتی ہے،‘‘ بھاگیرتھ کہتے ہیں، جو میرٹھ سے اس لیے واپس آئے ہیں تاکہ یہ یقینی بنا سکیں کہ ان کے اہل خانہ راجستھان کی ووٹر لسٹ کی خصوصی جامع نظرثانی (ایس آئی آر) کے لیے اپنا انتخابی وجود ثابت کر سکیں۔ یہاں ان کی موجودگی کا مطلب یہ بھی ہے کہ وہ ہوٹل سے ملنے والی اپنی یومیہ اجرت سے محروم رہیں۔

تاہم، وہ خود کو گاؤں کا رہائشی ثابت کرنے کے لیے جو دستاویزات جمع کرتے ہیں، ان میں انہیں حیرت انگیز طور پر تمام ضروری خدمات اور سہولیات کے ساتھ گاؤں کے عین وسط میں آباد دکھایا گیا ہے۔ سووچھ بھارت مشن - (گرامین) کا ڈیش بورڈ اس گاؤں کو نہ صرف کھلے میں رفع حاجت سے پاک دکھاتا ہے، بلکہ کچرے کے مناسب انتظام و انصرام کی سہولت سے لیس بھی دکھاتا ہے۔ یہ بات یقینی طور پر بھادر بھوپا اور ان کے اہل خانہ کے لیے حیران کن ہے، جنہیں بیت الخلاء بنانے کے لیے کبھی کوئی فنڈ نہیں ملا اور وہ کھلے میں رفع حاجت کرنے پر مجبور ہیں۔

’’ہمیں حکومت سے کچھ نہیں ملتا،‘‘ دھول مٹی سے بھرے ایک گڑھے کی طرف اشارہ کرتے ہوئے مہندر کہتے ہیں – یہ وہی جگہ ہے جہاں ہر گھر جل یوجنا کے تحت اس فیملی کو پانی کا کنکشن ملا تھا۔ پانی کی لائن پر زیادہ دباؤ کی وجہ سے پانی ان تک مہینوں بعد پہنچا، لیکن اب یہ لائن دوبارہ خشک ہوچکی ہے۔ گاؤں کے سابق سرپنچ سے بات کرنے کا بھی کوئی نتیجہ برآمد نہیں ہوا۔ اب ان کی جگہ نئے سرپنچ آ چکے ہیں۔

بدقسمتی سے یہ معاملہ اس فیملی کے لئے نیا نہیں ہے۔ مہندر کہتے ہیں، ’’چناؤ [انتخابات] میں ہر کوئی وعدے کرتا ہے لیکن اس کے بعد ہماری کوئی نہیں سنتا۔‘‘