चुरू में भोपनि छॾिया उझण जा अफ़ाल

भाननि जी इन बिरादरी जी हयाती हाणे होरियां होरियां तब्दीलु थी रही आहे छाकाणि उहे उझण जा आफ़ाल छॾे रिहाइशूं इख़्तियारु करे रहिया आहिनि। सरकारी सहूलियतुनि खां उहे अञा ताईं वांझियल आहिनि।

भादर भोपो चवे थो, “हरियाणा, पंजाब हूं लेके जैसलमेर तक सारे देश म्हारो पगा हूं नापेडो है [हरियाणा ऐं पंजाब खां वठी जैसलमेर ताईं सजे॒ मुल्क में मूं पंध कंदे ई सफ़रु कयो आहे]।” 5 सालनि जो बुज़ुर्ग उतर ओलहु राजस्थान में पंहिंजे घर जे वेझो हिक वणु हेठि वेठो आहे। हू अगि॒ते चवे थो, “अहिड़ी का बि जाइ नाहे जेका असां न ॾिठी हुजे।”

गुजरात ऐं राजस्थान में रहंदड़ ख़ानाबदोशु भोपा बिरादरीअ जे भादर पंहिंजो ज़िंदगीअ जो घणो हिस्सो मीरासियुनि वांगे रावणहथो वॼाईंदे गुज़ारियो आहे – इहो बांस ऐं नारेल जी खोपनि मां जुड़ियल हिक तार वारो साज़ु आहे। हू पारी खे ॿुधाए थो, “असीं हिक हंध खां ॿिए हंधु वेंदा रहियासीं, किथे रुकी करे पंहिंजो साज़ु वॼायो ऐं वरी ॿिए कंहिं जग॒हि लाइ हुतां हलिया वियासीं।”

नेठि, 11 सालु अॻु, भादर ऐं संदसि पंजनि पुटनि चूरू ज़िले में पाण खे थांइको कयो। धीरवास बड़े जा रहाकू चवनि था, “मां ख़ानाबदोशी में गुज़ारींदे थकी वियो हुयुसि, तंहिं करे मां हिकु ॻोठ में आबाद थी वियुसि।”हुन इन ॻोठ खे चूंडियो छाकाणि त हू हुतां केतिरनि ई दफ़े लंघी चुको हो ऐं हिते जा माण्हू संदसि वाक़ुफ़ हुआ। मुंहिंजे ॾाॾे खे यादि आहे त हुन भोपनि जे परीवार खे भाननि तौरु असांजे ॻोठ में घुमंदे ॾिठो हो।

ही कुटुंबु नायक (अनुसूचित जाति) बिरादरी जो आहे, हालांकि राजस्थान में भोपनि खे अन्य पिछड़े वर्ग (ओबीसी) में शुमार कयो वेंदो आहे। नायक पिणु उन्हनि खे बिरादरी जो हिस्सो मञण में हॿकंदा आहिनि।

शुरू में, धीरवास बड़े में ज़मीन ख़रीदण घणो महांगो थिए पियो, जंहिं जे करे ॿिनि सालनि ताईं उहे ॻोठ खां ॿाहिरि आबादु थी विया। भदर भोपे जो पुटु भंवर लाल चवे थो,“पोइ असां सरपंच सां ॻाल्हि कई, ऐं हुन असांखे इन ज़मीन ते रहण जी मोकल ॾिनी।” “इहो अटिकल हिकु बीघो ऐं टे बिस्वा [लॻभॻि 0.75 एकड़] आहे।”

धीरवास बड़ा ॻोठ जी ॾखण ॾिस में खेतनि ॾांहुं वेंदड़ कचे रस्ते ते हलंदे, तव्हांखे ब॒ श्मशान भूमियूं (मसाणा) नज़रि ईंदियूं। पहिरियों श्मशान घाटु स्वामी बिरादरी (जेके अन्य पिछड़े वर्ग में शुमार थियनि था) जा माण्हू इस्तेमालु कनि था, ऐं बि॒यों जेको थोरो परे आहे, उहे अनुसूचित जातियुनि जे माण्हुनि लाइ आहे। इहो रस्तो इन्हनि मसाणनि खे बि॒ए पासे वसियल दलितनि जे पाड़े खां धार कंदो आहे। ऐं इन जे अगि॒ते हॾवारु आहे जिते मुअल ढोर-ढॻनि खे फिटो कयो वेंदो आहे।

इन्हीअ हॾवार जे हिकु हिस्से में, आरिज़ी घरनि में भादर भोपे जो वधायल कुटुंबु रहे थो जंहिं में अटिकल 50 भाती आहिनि। हू हाणे हिकु आबादु ज़िंदगी गुज़ारे थो, जेको अॻ जी हयातीअ खां बिल्कुलु मुख़्तलिफ़ आहे।

शुरूआति में उन्हनि लाइ खेतीॿाड़ीअ जो कमु ॻोल्हण सवलो न हो।

भंवर लाल यादि कंदे चवे थो, “ॻोठाणन जो ख़्यालु हो त भोपा कमु चोर हूंदा आहिनि ऐं घणो कमु नथा कनि। लेकिनि जॾहिं लाबारे जो वक़्तु थियो, उन महिल हिक ॿांभण किसान जी माउ गुज़ारे वेई। अंतिम संस्कार जी रस्मुनि जे हलंदे खेत जो कमु रोकणो पियो। फ़सुल जी तुरत कटाई जे लाइ उन्हनि असां भोपनि खे कम ते रखियो। इन वाक़िए खां पोइ माण्हुनि बि असांखे कम ते रखणु शुरू कयो।”

उन पहिरिएं लाबारे खे केतिराई ई साल थी विया आहिनि, पर भोपनि जे मुताबिक़ि ॻोठाणा अॼु बि खेतीॿाड़ीअ जे कम में उन्हनि खे शामिल करण में हॿकंदा आहिनि। अॼु बि कम जे लाइ मुक़ररु कलाकनि ऐं मज़ूरीअ जे लाइ सांदहि ॻाल्हियूं करणियूं पवंदियूं आहिनि पर ॿियनि बिरादरियुनि जे लाइ मज़ूरी अॻे ई मुक़रर हूंदी आहे।

भोपे परीवार जा मेम्बर बसर जे लाबारे महिल कम जे वास्ते 150 किलोमीटरनि ताईं सफ़रु कंदा आहिनि। ॿारनि खे बि पंहिंजनि माउ-पीउ सां गॾु वञणो पवंदो आहे, जंहिं जे करे स्कूलु बि छॾिणो पवंदो आहे। जॾहिं खेतीअ जो कमु नथो मिलेनि, त उहे साटे (रेड हॉगवीड) जा ॿूटा गॾु कंदा आहिनि। इन ॿूटे जो आयुर्वेद में घणो इस्तेमालु थिए थो। भंवर लाल जो पुटु विनोद चवे थो, “इन सां असांजी सुठी कमाई थी वेंदी आहे। नेमाइते तौर ते अटिकल 500 रुपया मिली वेंदा आहिनि। परीवार जा ॿिया भाती अॾावती जग॒हियुनि ते या इमारती काठियुनि जी कटाई ऐं काठियुनि जे दुकाननि याने आरनि में कमु कंदा आहिनि।”

मां हिते धीरवास बड़े में वॾो थियो आहियां ऐं मुंहिंजी पढ़ाई हिते जे सरकारी स्कूल में थी। नंढपिण में भूप भोपो बि मूं सां गॾु स्कूल में पढ़ंदो हो, जंहिं जी उमिरि 22 साल आहे। उन स्कूल में असां सां गॾु केतिरा ई दलित ॿार पढ़ंदा हुआ। क़िस्मत चङी हुई जो असांजो मास्तरु हजारी मेघवाल बि हिकु दलित हो। हू ॿारनि जो हौसिलो वधाईंदो हो।

भोपे जे घर में बिजिली न हुई, ऐं घर में पहिरियों स्कूलु वेंदड़ जे करे, घरेलू कमनि में हथि वंडाइण वारो बि केरु न हो। उन दौर में वक़्त ब वक़्त हुन खे कुटुंबी माल सां पहिरजण लाइ वञणो पवंदो हो। मूंखे यादि आहे त हू केतिरनि ई ॾींहनि ताईं स्कूल में ग़ैरु हाज़ुरु रहियो ऐं जड॒हिं वापसि आयो त चयाईं त पंहिंजे जनावरनि खे अटिकल 40 किलोमीटर परे गोगामेड़ी जे पसूं मेले में वठी वियो हो। थोरे ई वक़्त खां पोइ,चौथे दर्जे में ई पढ़ाई छडे॒ ॾिनाईं ऐं ॾिहाड़ियूं करण लॻो – जीअं त कुटुंब जा घणेई माण्हू कंदा हुआ। उन वक़्त ते हू पंहिंजे परीवार में अकेलो माण्हू हो जेको पढ़ियल हो। ही कुटुंबु पंहिंजे पाण खे नायक बिरादरी जो मञे थो ऐं इन बिरादरी में अखर सुर्ति (साक्षरता) जी शरह 2011 में फ़क़ति 57 सेकिड़े खां थोरो वधीक हुई।

अॼु फ़क़ति भादर भोपा ऐं भंवर लाल ई रावणहत्थो वॼाए सघनि था, लेकिनि भंवर लाल खे लोक संगीत जे कम खे वरी शुरू करण में को दिलचस्पी नाहे। इन जे बदिरां हू वेझे भारंग ॻोठ में बटाई तौरु अटिकल 10 बीघनि (6.25 एकड़) जी ज़मीन ते खेती कंदो आहे। हू पारी खे ॿुधाए थो, “इन कम में इज़त आहे।”

भादर जो वॾो पुटु भगीरथ जेको लॻभॻि पंजाह सालनि जो आहे, हू पिणु पुराणनि ॾींहनि वांगे ज़िंदगी गुज़ारण नथो चाहे। हू माज़ीअ जी घटि आमदनी ऐं मुश्किल हालतुनि जो ज़िक्र कंदे चवे थो त ॻाइण वॼाइण जी मीरास मां परीवार खे को ख़ासि फ़ाइदो न थियो। हू चवे थो, “हाणे असां सुठी ज़िंदगी गुज़ारे रहिया आहियूं।” हू मेरठ में हिक होटल में कमु करे थो ऐं पंहिंजी नौकरी खां ख़ुशि आहे। हू चवे थो, “असां खे जॾहिं बि ज़रूरत हुजे त पैसा मिलंदा आहिनि ऐं असां वटि सभु सहूलियतूं हूंदियूं आहिनि।”

रोज़ी रोटीअ जी नईं सिरि ख़ातिरीअ जे बावजूदि, धीरवास बड़े जी जीवत में ॾाढायूं आहिनि। हिते बिजली न हुअण जे करे रात में मिटीअ जा ॾीया ॿरंदा आहिनि। फ़क़ति 500 मीटरनि जी विछोटीअ ते मौजूदु बिजलीअ जो कनेक्शन बि हिननि ताईं पहुची न सघियो आहे। भादर भोपे जो नंढो पुटु (35) महेंद्र चवे थो, “मोबाइल फ़ोन चार्ज करणो हुजे त पाड़े में कंहिं जे घरि वञी मददु घुरणी पवंदी आहे।”

राजस्थान सरकार जी मुख्यमंत्री वृद्धजन सम्मान मासिक पेंशन योजिना जहिड़ियूं केतिरियूं ई योजिनाऊं जेके ख़ासि तौर ते बुज़ुर्गनि जे लाइ हलायूं पेयूं वञनि, उन्हनि जो फ़ाइदो भादर भोपे ऐं संदसि ज़ालि खे वधंदड़ डिजिटलाइज़ेशन ऐं केवाईसी क़ाइदनि में बदिलावनि जे हलंदे मिली न पियो सघे। जंहिं बैंक में संदसि खातो हो, उहो जॾहिं बि॒ए बैंक सां मिली हिकु थी वियो त कुझ वक़्त जे लाइ हू पंहिंजे खाते मां कंहिं बि क़िस्म जी ॾे वठु न करे सघियो।

भागीरथ चवे थो, “हुकूमत खे असां सभिनी खां छा घुरिजे हर रोज़ु इन्हनि खे कंहिं न कंहिं दस्तावेज़ या अमल जी ज़रूरत आहे।” सूबे में वोटर लिस्टुनि खे बारीकबीनीअ सां जाचियो (एसआईआर, स्पेशल इन्टेन्सिव रिविज़न) पियो वञे। इन्ही कम जे लाइ भागीरथ मेरठ खां हिते आयो आहे, जंहिं सां पंहिंजे परीवार जी नागरिकता खे साबितु करे सघे। हू जेतिरनि ॾींहनि लाइ हिते रहंदो ओतिरे ॾींहनि लाइ हुन खे होटल में पंहिंजी मज़ूरीअ जो नुक़सानु थींदो।

जेतोणीकि, पाण खे ॻोठ जे रहवासी तौर ज़ाहिरु करण जे लाइ हुन केतिरा ई दस्तावेज़ हथि कया आहिनि, पर हैरानी जी ॻाल्हि आहे त दस्तावेज़नि में हुन खे ॻोठ जे विच में रहंदड़ ॾेखारियो वियो आहे, जिते सभु सेवाऊं ऐं सुविधाऊं आहिनि। ॻोठ में स्वच्छ भारत मिशन (ग्रामीण) जो बोर्डु लॻो पियो आहे, जंहिं में इन ॻोठ खे खुलियल जाइ में पाइख़ाने खां आजो ॿुधायो वियो आहे, बल्कि इहा बि दावा कई वेई आहे त हिते कचिरे जे निबेरे लाइ बि चङा इंतिज़ाम आहिनि। यक़ीनन भादर भोपे ऐं संदसि कुटुंब जे लाइ हीअ ख़बर नईं आहे छाकाणि जिनि खे काकूसु ठाहिण जे लाइ कॾहिं बि इमदाद न मिली ऐं उन्हनि खे अॼु बि काकूस जे लाइ खुलियल जग॒ह में वञणो पवंदो आहे।

महेंद्र वारीअ भरियल खाई ॾांहुं इशारो कंदे चवे थो, “असांखे हुकूमत वटां कुझु बि न मिलंदो आहे। हर घर जल योजिना जे तहति हितां ई परीवार खे पाणीअ जो कनेक्शनु हासिलु थियो। पाणीअ जी वधंदड़ घुर जे करे महीननि बैदि उन्हनि जे घरि ताईं पाणी पहुतो हो। लेकिनि हाणे वरी लाइन सुकी वेई आहे। ॻोठ जे पुराणे सरपंच सां ॻाल्हाइण जो को बि नतीजो न निकितो हो। हाणे हुन जे बदिरां नओं सरपंचु अची चुको आहे।

तक़्दीर जो लिखियल आहे जो इन कुटुंब जे लाइ इहा का नईं ॻाल्हि नाहे। महेंद्र चवे थो, “चुनाव में त हरिको वाइदा थो करे, पोइ केरु बि असांजी नथो ॿुधे।”