बसलो पर बेहाल जिनगी जियत भोपा

“हरियाणा, पंजाब हूं लेगे जैसलमेर तक सारो देश म्हारो पगा हु नापेड़ो है (हरियाणा आ पंजाब से ले के जैसलमेर ले हमनी के अपनी कदम से पूरा देश नपले बानी जा),” 65 बरिस के भादर भोपा कहेलन. उ उत्तर पश्चिमी राजस्थान में अपनी घर के लगे एगो पेड़ के नीचे बईठल बाड़ें. “अइसन कवनो जगह नईखे जवन हमनी के देखले ना होईं जा,” उनकर कहनाम बा.

गुजरात आ राजस्थान में रहे वाला घुमंतू भोपा समुदाय के भादर अपनी जीवन के अधिकांश हिस्सा देश में घूमत के बितवले बाड़ें. उ बांस आ नारियल के खोल से बने वाला एगो तार के पारंपरिक बाजा, रावणहत्था बजावेलें. “हमनी के एक जगह से दूसरी जगह जाईं जा, रुकीं जा, ओइजा आपन कला प्रस्तुत करीं जा आ फिर आगे बढ़ जाईं जा,” उ पारी के बतावेलें.

आखिरकार, 11 बरिस पहिले भादर आ उनकर पांच गो बेटा लोग चुरू में आपन जड़ जमा लिहलें. अब धिरवास बड़ा के रहेवाला भादर कहेलें,” हम ओ (घुमंतू) जीवन से थक गईल रहनी, एसे ए गांव में आके बस गईनी.” ए गांव के चुने के वजह ई रहे कि उ कई बेर एइजा से गुजर चुकल रहलें आ एइजा के लोग उनके बढ़िया से चीन्हे लागल रहे. हमरी दादा के याद बा कि उ लोग भोपा परिवार के हमनी के गांव से गुजरे वाला लोक कलाकार (गवइया-बजइया) के रूप में चीन्हत रहे.

ई परिवार अपना के नायक समुदाय (जे अनुसूचित जाति में गिनल जाला) से जोड़ेला. अइसे, राजस्थान में भोपा समुदाय के अन्य पिछड़ा वर्ग (ओबीसी) मानल जाला. नायक समुदाय भी उनके अपनी बिरादरी के हिस्सा माने से कतराला.

शुरुआत में धिरवास बड़ा में जमीन कीनल बहुत महंगा रहे एसे पहिला दू बरिस ले उ लोग गांव के बाहर बसलें. भादर भोपा के बेटा भंवरलाल कहेलन, “बाद में हमनी के सरपंच (ग्राम पंचायत प्रमुख) के लगे गईनी जा आ उ हमनी के ए जमीन ले पहुंचवलें. “ई लगभग एक बिगहा आ तीन बिस्सा (करीब 0.75 एकड़) बा.

धिरवास बड़ा गांव के मुख्य बस स्टैंड से दक्षिण के ओर, खेतन ले जाए वाला कच्ची सड़क पर चलब त आपके दू गो शमसान भूमि देखाई दी. पहिला स्वामी समुदाय (जेके अन्य पिछड़ा वर्ग मानल जाला) इस्तेमाल करेला आ दूसरा कुछ दूरी पर अनुसूचित जाति वाला लोगन खातिर हवे. सड़क ए शमसान भूमि के दूसरी ओर स्थित दलित मोहल्ला से अलग करेले. एकरी आगे हड़वार बा, ई अइसन जगह होला जहां मरल मवेशियन के ठिकाने लगावल जाला.

एही हड़वार के एक हिस्सा में अस्थायी घरन में भादर भोपा के लगभग 50 लोगन के विस्तृत परिवार रहेला. अब उ लोग एगो स्थायी जीवन जी रहल बा जवन ओ लोगन के पहिले के जीवन से एकदम अलग बा.

शुरुआत में उनका खातिर खेती के काम खोजल आसान ना रहे.

भंवरलाल याद करेलन, “गांव वालन के विचार रहे कि ‘भोपा लोग आलसी मजदूर होला आ ढेर काम ना कर सकेला’ बाकिर एक बेर फसल कटाई के व्यस्त मौसम के दौरान एगो ब्राह्मण किसान के माई के मृत्यु हो गईल आ अंतिम संस्कार के रसम रिवाज के वजह से खेत पर काम रुक गईल. फसल जल्दी से जल्दी कटवावे खातिर उ लोग हमनी के (भोपा लोगन के) फसल काटे के काम पर राख लिहल...ओकरी बाद से उ लोग हमनी के काम पर रखे शुरू कर दिहलें.

उनकरी पहली फसल कटाई के मौसम के कई साल बीत चुकल बा बाकिर भोपा के कहनाम बा कि स्थानीय लोग आज भी ओ लोगन के गांव के कृषि व्यवस्था के हिस्सा माने में हिचकिचायेला जबकि दूसरी समुदाय के लोगन के मजदूरी पहिले से तय होला.

भोपा परिवार के सदस्य लोग प्याज के फसल कटाई के समय 150 किलोमीटर दूर सीकर ले भी जायेला. बच्चा लोग भी अपनी माई बाबू संघे जाला आ स्कूल छोड़ देवेला. जब कृषि के काम ना मिलेला त युवा आदमी लोग साटा (लाल बथुआ) खोदे के काम करेला जवन आयुर्वेद में उपयोग होखे वाला एगो पौधा हवे. भंवरलाल के बेटा विनोद कहेलन, “एसे हमनी के बढ़िया कमाई हो जाला, औसतन 500 रूपया रोज के.” बाकी लोग निर्माण स्थलन पर या लकड़ी काटे वाला दुकानन में काम करेला जेके आरा कहल जाला.

हम धीरवास में ही पलल बढ़ल बानी आ स्थानीय सरकारी स्कूल में भूप भोपा संघे पढ़ले बानी जे अब 22 बरिस के बाड़ें. स्कूल में कई गो दलित बच्चा रहलें सन आ हमनी के भाग्यशाली रहनी जा कि हमनी के हजारी मेघवाल नाम के एगो दलित शिक्षक मिललें जे हमनी के खूब उत्साह बढ़ावें.

भूप के घर में बिजली ना रहे आ परिवार में पहिला पीढ़ी के स्कूल जाये वाला बच्चन के रूप में घर में भी केहू अइसन ना रहे जे पढ़ाई में उनकर मदद कर सके. समय-समय पर ओके परिवार के मवेशियन के देखभाल के अतिरिक्त जिम्मेदारी भी उठावे के पड़े. हमके याद बा कि उ कई-कई दिन में स्कूल से गायब रहे आ वापस आ के बतावे कि उ अपनी जानवरन के ले के 40 किलोमीटर दूर गोगामेड़ी में लागे वाला प्रसिद्ध पशु मेला गईल रहल ह.

कुछ समय बाद उ चौथी कक्षा में पढ़ाई छोड़ दिहलस आ परिवार के अधिकांश सदस्यन निहर मजदूरी करे लागल. ओ समय संगीतकारन के ए परिवार में उहे एगो अकेल पढ़ल-लिखल आदमी रहे. ई परिवार अपना के नायक जाति से जोड़ेला जेकर साक्षरता दर 2011 में मात्र 57 प्रतिशत से तनी अधिक रहे.

आज खाली भादर भोपा आ भंवरलाल ही रावणहत्था बजा सकेलें बाकिर भंवरलाल के लोक प्रस्तुति में वापस लौटे के कवनो रूचि नईखे रह गईल. एकरी बजाय उ पास के भारंग गांव में बटाईदार के रूप में लगभग 10 बिगहा जमीन (6.25 एकड़) पर खेती करेलें. उ पारी के बतावेलें, “ए काम में बहुत इज्जत बा.”

भादर के बड़ बेटा भागीरथ के उमिर 50 से ऊपर हो गईल बा आ उनकर कहनाम बा कि उनकर बीते समय में लौटे के कवनो इच्छा नईखे. ऊ अतीत के कम आमदनी आ कठिन हालत के ओर इशारा करत के कहेलन कि संगीत के विरासत से परिवार के कवनो खास मदद ना मिलल. मेरठ के एगो होटल में काम करे वाला आ अपनी नोकरी से खुश भागीरथ बतावेलें, “अब हमनी के बढ़िया जीवन जी रहल बानी जा. जब भी जरूरत होला हमनी के पईसा मिल जाला आ हमनी लगे कुल सुख सुविधा बा.”

अपनी नया रोजगार के ले के संतुष्टि के बावजूद धिरवास के जीवन बहुत कठिन बा. बिजली ना होखला के वजह से रात में तेल के दिया जरावल जाला – बिजली के सबसे नजदीकी कनेक्शन उनसे खाली 500 मीटर के दूरी पर बा बाकिर अभी ओ लोगन ले नईखे पहुंचल. भादर भोपा के 35 बरिस के छोट बेटा महेंद्र कहेलें, “आपन मोबाइल चार्ज करे खातिर हमनी के मोहल्ला के कुछ घरन में जा के उनसे कहे के पड़ेला.”

भादर भोपा आ उनकर मेहरारू कमला के राजस्थान सरकार के ओर से मिले वाला मासिक वृद्धावस्था पेंशन जईसन सरकारी योजनन के पहुंच भी डिजिटलीकरण आ बदलत केवाईसी नियमन के वजह से मुश्किल हो गईल बा. उनकरी बैंक के दूसरी बैंक में विलय भईल त कुछ समय ले ई दंपत्ति कवनो लेन देन ना कर पवलस.

“हमके नईखे पता कि सरकार के हमनी से का चाहीं. हर दिन ओ लोगन के कवनो कागज चाहीं या कवनो प्रक्रिया पूरा करे के होला,” भागीरथ कहेलें. उ राजस्थान में मतदाता सूचियन के विशेष गहन पुनरीक्षण (एसआईआर) के दौरान परिवार के राजस्थान में मतदाता के रूप में अपनी अस्तित्व के साबित करे खातिर मेरठ से वापस आइल बाड़ें. एइजा रहला के मतलब उनकर होटल में मिले वाला मजदूरी के रोज नुकसान हो रहल बा.

हालांकि, गांव के निवासी होखे के प्रमाण देवे खातिर जवन दस्तावेज उ जुटावेलें, ओमे हैरान करे वाली बात ई बा कि उनके गांव के बीचोबीच रहल देखावल जाता जहां उनकी जरूरत के सब सेवा आ सुविधा उपलब्ध बा. स्वच्छ भारत मिशन– (ग्रामीण) के डैशबोर्ड में गांव के खाली खुले में शौच से मुक्त ही नईखे देखावल गईल बल्कि एके उचित कचरा प्रबंधन के व्यवस्था से भी लैस बतावल गईल बा. भादर भोपा खातिर ई निश्चित रूप से चौंकावे वाला बात हवे काहें कि उनके शौचालय बनवावे खातिर कब्बो कवनो राशि नईखे मिलल आ उ लोग खुले में शौच जाए खातिर मजबूर बा.

“हमनी के सरकार से कुछ ना मिलेला,” महेंद्र कहेलें आ धूल से भरल एगो गढ़हा के ओर इशारा करेलें – इहे उ जगह हवे जहां हर घर जल योजना के तहत परिवार के पानी के कनेक्शन मिलल रहे. पानी के लाइन पर बहुत अधिक दबाव होखला के कारण कई महीना बाद उनकी घरे ले पानी पहुंचल बाकिर अब उ लाइन फिर से सूख गईल बा. गांव के पूर्व सरपंच से बात करे के भी कवनो नतीजा ना निकलल.

दुर्भाग्य से परिवार खातिर ई कवनो नया बात नईखे. महेंद्र कहेलें, “चुनाव में हर केहू वादा करेला बाकिर ओकरी बाद केहू हमनी के ना सुनेला.”