دیہی خواتین کے گیتوں میں زندہ ہیں امبیڈکر

جب ہم ’گرائنڈ مل سانگس‘ کے ڈیٹابیس میں درج گلوکاروں سے ملنے جا رہے تھے، تو ہمیں ایک بات خاص طور پر محسوس ہوئی کہ ان میں سے کئی خواتین آپس میں رشتہ دار ہیں جو پیدائش یا سسرال کے تعلقات کی بنیاد پر جڑی ہوئی ہیں۔ ان میں سے کچھ مائیں اور بیٹیاں ہیں، کچھ بہنیں یا بھابھی/نند ہیں، اور ساس اور بہوئیں بھی ہیں۔ لیلا بائی شندے کی والدہ کا سال ۲۰۱۲ میں انتقال ہو گیا تھا۔ ان کی کچھ اوویوں کو مئی ۲۰۱۷ میں ’گرائنڈ مل سانگس پروجیکٹ‘ کے ’کسان اور بارش کے نغمے‘ کے عنوان سے بنائے گئے ویڈیو میں شامل کیا گیا ہے۔

’گرائنڈ مل سانگس‘ کی اصل ٹیم نے لیلا بائی کی سات اوویاں لکھ رکھی تھیں، لیکن ان کے آڈیو ریکارڈ نہیں کیے گئے تھے۔ جب ہم دوبارہ ان سے ملنے گئے، تو ہم نے ان سے درخواست کی کہ وہ ہمارے کیمرے کے سامنے یہ اوویاں گائیں۔ شروع میں انہوں نے تھوڑا ہچکچاہٹ محسوس کی لیکن پھروہ مان گئیں۔ وہ ہمیں اپنے گھر کے باہر چھت والے برآمدے میں چکّی کے پاس لے گئیں اور اس کے پاس بیٹھ گئیں۔ انہوں نے بانس والے ہینڈل کے سہارے چکی گھمانا شروع کیا اور بابا صاحب امبیڈکر کی یاد میں ۱۱ اوویاں گائے۔

ڈاکٹر بھیم راؤ رام جی امبیڈکرکی پیدائش ۱۴ اپریل ۱۸۹۱ کو مہو میں ہوئی، جو اس وقت وسطی صوبہ (اب مدھیہ پردیش) کا ایک چھاؤنی علاقہ تھا۔ بابا صاحب ایک سماجی مصلح، سیاست داں، قانون داں اور آئین ہند کے معمار تھے۔ ان کا انتقال ۶ دسمبر ۱۹۵۶ کو ۶۵ سال کی عمر میں دہلی میں ہوا۔

پانچویں اووی میں لیلا بائی پوچھتی ہیں کہ ’’ہمیں الگ، اجنبی کون کہتا ہے؟‘‘ ان کے کہنے کا مطلب یہ ہے کہ ہمیں اچھوت کون کہتا ہے کہ ہم آپ جیسے نہیں ہیں، کون کہتا ہے کہ ہم ذات سے باہر ہیں۔ وہ ہمیں یاد دلاتی ہیں کہ بھیم (امبیڈکر) نے برہمن کو بھی رشتہ داری میں قبول کیا یعنی ان کی دوسری اہلیہ سویتا امبیڈکر برہمن تھیں – (یہ اسی کا حوالہ ہے۔ اس او وی کے ذریعہ وہ ذات پات کے نظام کی حدود کو توڑنے میں امبیڈکر کے کردار کو اجاگر کرتی ہیں۔)

چھٹے اووی میں، لیلا بائی پھول بیچنے والی سے پوچھتی ہیں کہ تمہاری ٹوکری میں کیا ہے کیونکہ وہ بھیم کی پگڑی کو سجانے کے لیے چنبیلی کا پھول خریدنا چاہتی ہیں۔ ساتویں اووی میں وہ کہتی ہیں کہ آنے والی ٹرین میں (ترقی کی علامت) ارہر (پھلی) کے ڈانٹھ ہیں جو خوشحالی اور عزت کی علامت ہے اور آگے وہ کہتی ہیں کہ مراٹھی لوگ مویشیوں کی لاشوں کو نمٹانے میں مصروف ہیں۔ اس اووی میں وہ ان پر غصے کا اظہار کرتی ہیں جو زیادہ تر دلتوں کے اندر اونچی ذاتوں کو لے کر ہے۔ وہ کہتی ہیں کہ ذات پات کے نظام نے دلتوں کے لیے مردہ مویشیوں کو صاف کرنے اور نسل در نسل ان کو ٹھکانے لگانے کا کام کرنا لازمی بنا دیا ہے۔ حالات آج بھی نہیں بدلے۔ اکثریت کو آج بھی ایسا کرنے کے لیے مجبور کیا جاتا ہے۔ ارہر کے ڈانٹھ والی ٹرین کی ترقی اور دلتوں کا احترام مستقبل کی جانب اشارہ کرتی ہے، جب کہ یہاں ’’مراٹھی لوگ‘‘، ان اونچی ذاتوں کے لیے استعمال کیا گیا ہے جنہوں نے دلتوں کو اپنا نوکر بنا کر توہین آمیز کام کرنے کے لیے مجبور کیا ہے۔

آخری تین اووی میں لیلا بائی نے ڈاکٹر امبیڈکر کی موت پر اپنے غم کا اظہار کیا ہے۔ اگرچہ بھیم راؤ نہیں رہے، وہ کہتی ہیں کہ وہ جنت میں چلے گئے ہیں اور اندر کی مجلس کے راجا بن گئے ہیں۔ وہ جنت کے دیوتاؤں کو چاول پیش کرتی ہیں اور کہتی ہیں، ہمارا سونا، بھیم راؤ، جو دلتوں کے لیے سونے جیسا تھا، اب جنت میں آگیا ہے۔

آخری اووی میں لیلا بائی کہتی ہیں کہ مرنے کے بعد بھیم بابا کی لاش کو ایک کار میں لے جایا گیا۔ گاڑی جیسے ہی آگے بڑھنے لگی، لوگ بھی ان کا پیچھا کرنے لگے۔ یہ اس بات کی بھی علامت ہے کہ ڈاکٹر امبیڈکر کے راستے کو بہت سے دلتوں نے اپنایا۔ بابا صاحب کی طرح انہوں نے بھی ہندو مذہب چھوڑ کر بدھ مذہب اختیار کیا۔ بابا صاحب کے نقش قدم پر چلتے ہوئے انہوں نے خود کو تعلیم سے جوڑ دیا، تاکہ وہ زیادتی اور امتیازی سلوک سے آزادی حاصل کر سکیں۔

پرفارمر/فنکار: لیلا بائی شندے

گاؤں: لوہارڈے

تعلقہ: ملشی

ضلع: پونے

ذات: نو بودھ

عمر: ۶۰

اولاد: تین بیٹے اور ایک بیٹی

پیشہ: چاول کی کاشتکاری

یہ گیت ۳۰ اپریل ۲۰۱۷ کو ریکارڈ کیے گئے تھے

پوسٹر: سنچیتا ماجی

ترجمہ نگار: عبدالحفیظ