अन्हार में अंजोर खातिर लड़त किसान

मालोज चव्हाण आपन एक एकड़ के अंगूर के बगइचा में पहुंचला के बाद उनका सहारा के जरूरत ना रहे. ऊ आपन संगी संतोष हिंगमिरे के हाथ छोड़ देलन, आ आपन समझ-बूझ आ भीतरी के भरोसा से आगू बढ़े लगलन. 31 बरिस के मालोजी आज भले देख ना सकेलन, बाकिर आपन जमीन के एक-एक कोना उनकर देखल-जानल बा.

अंगूर के लत्तर चढ़ल एगो लोहा के खंभा ओरी देखावत ऊ पूछेलन, “एकर टहनी देखाई देता का?”

तनी देर खातिर हमनी सोच में पड़ गइनी, “कवन टहनी?”

किस्मत के एह खेल पर मुस्कात मालोजी झुक के अंगूर के लत्तर में से एगो नया-नया निकलल टहनी के उठइलन. एकर झोक्का के पांचो खिच्चा पत्ता मोड़ा गइल रहे. अंगुरी से ओकरा सहलावत ऊ तनी धीरे से कहलन, “जइसन बढ़े के चाहीं, ई बढ़ ना सकल. एकर जड़ खराब हो गइल, आ बहुते महीना से ठीक से घामो नइखे मिलल.”

ऊ अकेला लत्तर, उनकर एक एकड़ के बगइचा के असलियत जाहिर कर देता. ई उनकर माई-बाऊजी, धनाजी आ पुष्पाबाई के सींचल पांच एकड़ के खेत के हिस्सा बा. अबकी साल एकरा में अंगूर ना फरी. खेत में भइल केतारी (गन्ना) के नयका पौधा आ दोसर फल वाला गाछो सब खराब हो रहल बा. परिवार के हिसाब से कोई दस लाख रुपइया के घाटा भइल बा. एकरा से उबरे में उनकरा पूरा दस साल लग जाई.

ई तबाही सन् 2025 के बरसात में जबरदस्त पानी पड़े चलते भइल, जे थमे के नामें ना लेत रहे. ना त जामगांव में, ना सोलापुर जिला में, आउर ना ही मराठवाड़ा के पड़ोसी बीड आ धाराशिव जिला में. नवंबर 2025 के सुरु में सोयाबीन के खेत आ अंगूर के बगइचा पूरा तरह से तबाह हो चुकल रहे. मोटा-मोटी पूरा साल सूखल रहे वाला छोट धार सब, एह सूखाग्रस्त जमीन पर उफान मार के बहे लागल रहे.

2025 के बीच मई से लेके अक्टूबर के आखिर ले, पस्चिमी महाराष्ट्र आ मराठवाड़ा में बिना थमले बरखा होखत रहल. 19 से 25 सितंबर के बीच हालत आउर खराब हो गइल. बादल फटला से आ अचानक आइल बाढ़ से खड़ा फसल, माटी, मवेसी आ कइएक जगह पर त आदमियो के जान चल गइल. सोलापुर जिला में अफसर लोग 47,000 हेक्टेयर से जादे फसल बरबाद होखे के पुष्टि कइलक.

एह गिनती से चुपचाप सड़त केतारी आ अंगूर के बगइचा के दरद बखान नइखे होत, जहंवा खाली कुछ दिन के नमी पूरा साल के मिहनत पर पानी फेर सकेला. अंगूर आ केतारी एह जिला के खेती-किसानी के असली सहारा बा.

हिंगमिरे के कहनाम बा, “एह पट्टी में अंगूर के बगइचा सबले जादे मार झेललस.” ऊ मालोजी के रस्ता देखावे से जादे, साथी बनके संगे ठाड़ रहेलन.

सन् 2025 के बीच सितंबर में पानी खातिर पियासल धरती पानी में डूब गइल. जून से सितंबर के बीच एह जिला में 600 मिमी से जादे बरखा भइल, जवन सामान्य बरखा से 125 फीसदी जादे रहे. एह इलाका में, जहंवा किसान बूंद-बूंद के हिसाब रखेला, अइसन बेहिसाब पानी पहिले कबो ना बरसल रहे.

उन्नईस सितंबर के दिन, आसमान जइसे टूट पड़ल होखे. अइसन घनघोर पानी बरसल जइसन पहिले कबो ना देखल गइल. तीन दिन के एह अचानक आइल बरखा किसानन के कटनी के समय घेरलक, जब ऊ लोग कवनो मुसीबत खातिर तइयार ना रहे.

चौदह सितंबर के जामगांव लगे पड़े वाला माढ़ा तहसील के महिसगांव वर्षामापी केंद्र में 24 घंटा के भीतर चौंका देवे वाला 174 मिमी बरखा दर्ज कइल गइल. एह इलाका में ई सबले जादे रहे. लगहीं के रोपले खुर्द (142 मिमी) आ कुर्डुवाड़ी (131 मिमी) इलाका में भी एही तरहा के जोरदार पानी पड़ल. जड़ डूब गइल, खेत के मेड़ टूट गइल, आ मालोजी के अंगूर के बगइचा पानी से लबालब गड्ढ़ा बन गइल.

मालोजी के याद आवता, “सगळी जमीन खरवड्डन गेली पावसामुळे (बरखा चलते पूरा जमीन बह गइल).” उनका अनुसार केतना दिन ले केहू घर से बाहिर ना निकल सकल.

नेशनल रिसर्च सेंटर फॉर ग्रेप्स (एनआरसीसी) के वैज्ञानिक लोग अक्टूबर में महाराष्ट्र के अलग-अलग अंगूर के बगइचा के निरीक्षण कइलक. एकरा बाद ऊ लोग चेतइलक कि जादे दिन ले बरखा आ कम घाम चलते एह साल राज्य में 50 फीसदी से कम उपज होई. निरीक्षण के समय सोलापुर, धाराशिव आ पुणे के जुन्नर तहसील के अंगूर के कइएक बाग पानी से भरल मिलल.

महाराष्ट्र अकेला भारत के कोई 80 प्रतिशत अंगूर पैदा करेला. एकर खेती कोई 1.5 लाख हेक्टेयर में फइलल बा. आम दिन में एक एकड़ के खेत से 12 से 16 टन अंगूर निकलेला. बाकिर 2025-26 के सीजन के बात कइल जाव, त वैज्ञानिक लोग के अंदेसा बा कि अंगूर आधे होई. जादे नमी, घाम के कमी आ लत्तर में फफूंद लागे से कली मुरझा गइल, आ एकरा चलते किसान लोग के आमदनी आधा से जादे घट गइल. मालोजी जइसन किसान लोग के हिसाब से अंगूर खातिर घाम, पानिए जेतना जरूरी होखेला.

“एक एकड़ अंगूर के खेती पर, लत्तर के ढांचा लगावे के खरचा सहित, एक सीजन में कोई 3.5 से 4 लाख रुपइया के खरचा आवेला. किसिम के हिसाब से प्रति एकड़ 8 से 15 टन अंगूर निकलेला. बाकिर अबकी साल एकरा से आधे अंगूर भइल,” नासिक के किसान आ निर्यातक तुषार दावंगे कहलन.

“हमनी के खाली एह साल के अंगूर के फसल खराब होखे के चिंता नइखे,” मालोजी कहलन. “असल डर त ई बा कि अगिला साल ले जिनगी कइसे चली.”

मालोजी के जनम भइल, त उनकर आंख ठीक रहे. बाकिर जब सोलह बरिस के भइलन, त उनका ग्लूकोमा नाम के बीमारी हो गइल, जेकरा चलते उनका धीरे-धीरे देखाई देवल बंद होखे लागल. एह बेमारी से आंख के ऑप्टिक नर्व खराब होखे लागेला आ जल्दी इलाज ना मिले त आदमी के देखाई देवल बंद हो सकेला. पहिले उनकर आसपास देखे के ताकत गइल, फेरु बावां आंख के रोसनी भी चल गइल. गांव में ना मालोजी, ना उनकर माई-बाप, केहू एह बेमारी के गंभीरता समझ पाइल. इलाज के सुविधा दूर रहे आ मोटा-मोटी पहुंच से बाहर रहे. काहेकि सोलापुर में सबसे नजदीक के आंख के अस्पताल उनका इहंवा से 50 किमी बा.

उनका इयाद आवेला, “सन् 2018 के बात बा. एक दिनवा हम माढ़ा कस्बा में एगो दोस्त से भेंट करके लउटनी. घरे पहुंचनी त हमरा कुछो ना लउकत रहे.” एह बात से 23 बरिस के मालोजी के अइसन सदमा लागल कि ऊ अगिला दिन खेत में जाके अकेले में रोवत रहलन. ऊ समझ ना पावत रहस कि उनका साथे का ई का हो गइल. जिनगी अइसन भार लागे लागल कि ऊ अपना के खतम करे के सोचे लगलन. जबले केहू खेत जाके उनका घरे ना लेके आइल, लगे के मंदिर से उनकर एगो दोस्त बेर-बेर फोन करत आ उनका कुछ गलत कदम उठावे के मना करत रहलन.

सुरु-सुरु में उनकर माई-बाऊजी आ गांव के दोस्त-यार लोग उनकर सहारा बनल, काहेकि ऊ अपने से चल ना पावत रहस. उनका मोटरसाइकिलो चलावे के छोड़े पड़ल. मालोजी के बाऊजी, धनाजी मानेलन कि ऊ आपन लइका के दुख पूरा तरीका से समझ ना पइलन. धनाजी पारी से कहलन, “पण आम्हाला कळालंच नाही (हमनी कबो समझिए ना पइनी).”

एने मालोजी के लउकल बंद भइल, ओने सूखा पड़े से परेसानी आउर बढ़ गइल. ऊ कहेलन, “ओह बरिस, 2018 में खेत में तरबूज लागल रहे. खरीदनिहार एगो ना रहे आउर करजा के बोझ अलगे रहे.” पानी ना बरसे से पूरा फसल बरबाद हो गइल रहे.

केतना महीना ले दुखी रहला के बाद, मालोजी आत्मनिर्भर बने के ठान लेलन. आपन हिम्मत आ लाठी के सहारे ऊ आवाज सुन के गांव में रस्ता चले के सीखे लगलन. कुछ समय तक ऊ सांगली के तासगांव लगे चरवाहा लोग संगे रहलन. उहंवा ऊ रस्ता सब इयाद कइलन आ परिस्थिति के हिसाब से अपना के ढाले के सिखलन. अब ऊ कीपैड वाला फोन चलावे लागल रहस. उनका दरजन-दरजन भर जरूरी फोन नंबर सब इयाद हो गइल. एह सब कोसिस के बीच केतना बेरा ऊ गिरियो जात रहस.

गांव में लोग उनका आदर से ‘बाबा’ बोलावे लागल, काहेकि लोग उनका मजबूत आ भरोसामंद आदमी के रूप में देखे लागल रहे. ऊ सामाजिक काम में जुटल रहलन आ मराठा आरक्षण आंदोलन के दौरान एकजुटता देखावत विरोध प्रदर्शन सब में भी गइलन. उनका इयाद बा कि ऊ विरोध के प्रतीक के रूप में अपना के गरदन ले बालू में दबा लेले रहस. ई देख के पूरा गांव हिल गइल रहे.

सन् 2021 में मालोजी के बियाह परभणी के रहे वाली मुक्ता पवार से भइल, उनकरो देखाई ना देवे. मुक्ता चार बरिस के रहस, त खसरा चलते आपन आंख गंवा देली. बाद में ऊ स्नातक के पढ़ाई पूरा करके, विशेष शिक्षिका के रूप में ट्रेनिंग लेली आ शारीरिक रूप से अक्षम (दिव्यांग) बच्चा लोग संगे काम करे लगली.

बियाह के बाद ओह लोग कि जिनगी में उम्मीद आ स्थिरता लउट आइल. मालोजी जैविक खेती करे लगलन. अपने से जैविक कल्चर तइयर कइलन आ यूट्यूब सामग्री आ जानकार लोग के सलाह से खेती के नयका-नयका तरीका सिखलन. ऊ कहेलन, “हमनी के सपना छोट रहे, बाकिर मन के उमंग बड़ा रहे.”

14 सितंबर 2025 के मुक्ता पहिल बच्चा के जनम देली. उनकर बेटा स्वस्थ बा, बाकिर अबही ओकर नाम नइखे रखाइल. मालोजी खातिर त जइसे जिनगी में अंजोर लउट आइल रहे.

तनिए दिन बाद, मेघ झमाझम बरसे लागल. 19 से 21 सितंबर के बीच पहिलहीं से पानी से भरल जमीन पानी के तेज धार में बदल गइल. केतारी के खेत सब डूब गइल. मौसमी नदी उफान मारे लागल आ रस्ता बदल देलक. खेत के मेड़ आ जमीन के ऊपरी उपजाऊ माटी बह गइल.

धनाजी के याद में परिवार के ईनार पहिल बेर पानी से भर के बहे लागल रहे. हवा आ धूप के सही क्रम पर निर्भर मालोजी के अंगूर के बगइचा बहुते दिन ले पानी में डूबल रहल.

मालोजी कहेलन, “अब खेती करे के हिम्मत ना रहे.” ऊ कोई दू महीना ले खेत से दूर रहलन. उनकर माई-बाऊजी लोग लउट के जे कुछ बचा सकत रहे, बचावे के कोसिस कइल. पूरा महाराष्ट्र से किसान लोग मौसम के उथल-पुथल से भइल एह तरह के बरबादी के बात बतइलक. पढ़ीं: बाढ़, बरबादी में आस बन्हावत हेल्पलाइन

फसल खराब होखे से मवेशी सब आउर मरे लागल रहे. अब मालोजी के परिवार के माथ पर बैंक, साहूकार आ संगी-साथी से उठावल कोई 15 लाख के करजा बा.

मालोजी आ मुक्ता के एगो झटका आउर लागल. बच्चा जनमला के बाद मुक्ता के तबियत कुछ खराब हो गइल. ऊ आपन लइका के दूध नइखी पिया सकत. अब ऊ बच्चा महंगा आ जल्दी ना मिले वाला बेबी फूड पर निर्भर हो गइल बा.

मालोजी बतावेलन, “हमनी के ई कुछे-कुछे दिन पर कीने पड़ेला. आउर ई बहुते महंगो बा.”

मुक्ता कुछ दिन खातिर परभणी, आपन मायका चल गइल बाड़ी. उहंवो उनकर परिवार के 2025 में मानसून में फसल के बरबादी झेले पड़ल रहे. जामगांव में अकेले रह गइल मालोजी आर्थिक तंगी आ अकेलापन से जूझत रहलन.

“हमरा इहे चिंता रहे कि आपन लइका के कइसे ख्याल रखम. दोस्त लोग त पहिलहीं मुस्किल में बा, ऊ लोग से आउर केतना उधार मांगी?”

अक्टूबर में एक दिन ढलत सांझ के, जब ऊ पूरा तरीका से हिम्मत हार गइलन, किसान लोग खातिर चले वाला शिविर हेल्पलाइन में फोन लगइलन. एगो स्वयंसेवक उनकर सब बात बहुते संयम से सुनलक. मालोजी बतावेलन, “ओह घरिया कइल गइल फोन हमरा बचा लेलक. अब ओह रस्ता पर कबो ना जाएम.”

महाराष्ट्र के गांव-देहात में कइएक हजार मालोजी लोग बा, जेकर सपना टूट गइल आउर जे चिंता आ डर में जी रहल बा.

ऊ साफ बतावेलन, “आपन ना लउके के खाली बात नइखे. असल चिंता त बाजार, अनिश्चित मौसम, सरकार के ठंडा रवैया आ काम करे के सही मौका ना मिले के बा.”

दस हजार रुपइया के सरकारी राहत पूरा नइखे पड़त. मालोजी आपन अंगूर के बगइचा के कुछ हिस्सा के छांटे आ दोबारा रोपे आ बचल सीजन में आमदनी देवे वाला तरकारी उगावे के सोचत बाड़न. ऊ जानकार लोग, नर्सरी आ किसान लोग से फोन पर घंटों बतियावेलन आ आगू के रस्ता तय करे के कोसिस कर रहल बाड़न.

एने मुक्ता बैंक आ दोसर तरह के सरकारी नौकरी खातिर प्रतियोगी परीक्षा सब के तइयारी कर रहल बाड़ी. “हमरा नौकरी चाहीं,” ऊ कहेली.

खेत के स्थिति भी डांवाडोल बा. खराब माटी, बेमौसम बरखा, आर्थिक तंगी से भविष्य अन्हार हो गइल बा.

नवंबर अबही सुरुए भइल बा. दुपहरिया के 12 बजता. घाम हलका बा आ माटी अबहियो नरम बा. मालोजी आपन अंगूर के बगइचा में एगो हाथ खंभा पर टिकइले, अंगुरी से खिच्चा पत्ता टोअत ठाड़ बाड़न.

“हम आपन पौधा सब के देख त ना सकीं, बाकिर महसूस कर सकिला.”

मौसम के झटका, सरकार के ठंडा रवैया, बाजार के उतार-चढ़ाव वाला एह साल में मालोजी चव्हाण खिच्चा हरियर पत्ता के सहारे उम्मीद नइखन हरले- खेतो में, आ जिनगियो में.

अनुवाद: स्वर्ण कांता